1. ¿Baqui bʌ wocol tac tsiʼ tajayob Adán yicʼot Eva chaʼan tsaʼ bʌ i meleyob?

¿MAJQUI yom miʼ yʌl maʼ wʌl chuqui utsʼat yicʼot mach bʌ utsʼatic? Cheʼ bʌ Adán yicʼot Eva tsiʼ cʼuxuyob jiñi i wut teʼ muʼ bʌ i yʌqʼueñob i ñaʼtan chuqui utsʼat yicʼot chuqui jontol, tsiʼ jamʌ pʌsʌyob chaʼan maʼañic miʼ ñopob Jehová yicʼot i mandar tac. Tsiʼ bajñel mulayob i ñaʼtan chuqui wen yicʼot mach bʌ weñic (Gn. 3:22). Pero ¿baqui bʌ i wocolel tsiʼ tajayob? Mach i yamigojobix Jehová yicʼot maʼañix tsaʼ mejliyob ti chumtʌl tiʼ pejtelel ora. Cheʼ jaʼel, tsiʼ ñusʌbe mulil yicʼot chʌmel (sajtel) jiñi i pʼolbalob (Ro. 5:12). Jiñi tsaʼ bʌ i yajcayob i mel tsaʼ jach i yʌcʼʌ wocol.

2, 3. a) ¿Chuqui tsiʼ mele jiñi eunuco etíope cheʼ bʌ Felipe tiʼ sube jiñi wen tʼan? b) ¿Baqui bʌ wenlel tac mi lac taj cheʼ mi lac chʼʌm jaʼ? c) ¿Baqui bʌ cʼajtiya tac mi caj lac jacʼ?

² Ñumen qʼuexelʌch tsaʼ bʌ i mele (chaʼle) jiñi eunuco etíope cheʼ bʌ Felipe tiʼ sube jiñi wen tʼan bajcheʼ tsaʼ bʌ i mele Adán yicʼot Eva. Jiñi wiñic tsiʼ wen qʼuele ti ñuc tsaʼ bʌ i mele Jehová yicʼot Jesús tiʼ tojlel, jin chaʼan ti orajach tsiʼ chʼʌmʌ jaʼ (Hch. 8:34-38). Cheʼʌch ti lac tojlel jaʼel, cheʼ mi la cʌqʼuen laj cuxtʌlel Dios i mi lac chʼʌm jaʼ bajcheʼ jiñi etíope, mi lac pʌs chaʼan mi laj qʼuel ti ñuc chuqui an i mele Jehová yicʼot Jesús ti lac tojlel. Cheʼ jaʼel, mi lac pʌs chaʼan mi lac ñop Jehová i chaʼan mi lac jacʼ cheʼ jin jach miʼ mejlel i yʌl chuqui wen yicʼot mach bʌ weñic.

³ Ñaʼtancu pejtelel jiñi wenlel muʼ bʌ lac taj cheʼ mi lac melben i yeʼtel (troñel) Jehová. Ti ñaxan, mi lac mejlel lac taj pejtelel tsaʼ bʌ i sʌtʌ Adán yicʼot Eva, bajcheʼ jiñi chumtʌl tiʼ  pejtelel ora. Come an lac ñopoñel (chʼujbiya) ti Jesús, Dios miʼ ñusʌbeñonla lac mul yicʼot miʼ yʌqʼueñonla sʌc bʌ laj conciencia (Mt. 20:28; Hch. 10:43). Cheʼ jaʼel, mi la cochel ti jiñi i familia Jehová muʼ bʌ i chʼujutesañob, chʼʌmbiloʼ bʌ ti Dios yicʼot añoʼ bʌ utsʼatax bʌ i pijtaya (Jn. 10:14-16; Ro. 8:20, 21). Anquese jamʌ tsiquil pejtelel jiñi wenlel tac, an i cʌñʌyobix bʌ Jehová wolito bʌ i ñaʼtañob mi mucʼʌch caj i tsajcʌbeñob i melbal jiñi eunuco etíope o maʼañic. ¿Chuqui miʼ mejlel i mʌctañob chaʼan jiñi chʼʌmjaʼ? I ¿bajcheʼ miʼ mejlel i mʌlbeñob (jotbeñob)?

4, 5. ¿Chuqui ti wocol tsiʼ taja Avery yicʼot Hannah?

⁴ Cheʼ maʼañic miʼ mejlelob miʼ yubin. Jiñi i tatob juntiquil xcolel i cʼabaʼ Avery i testigojob Jehová. Jiñi i tat cʌmbil chaʼan ñoj wen i melbal bajcheʼ tatʌl yicʼot bajcheʼ anciano. Pero Avery choncol i jalitesan i bʌ chaʼan miʼ chaʼlen chʼʌm jaʼ. Miʼ yʌl: «Tsaʼ c ñaʼta chaʼan mach mejlic c pʌs c melbal bajcheʼ i chaʼan c tat». Cheʼ jaʼel, tsiʼ ñaʼta chaʼan maʼañic mi caj i mejlel i tsʼʌctesan jiñi eʼtel tac muʼ bʌ i mejlel ti aqʼuentel. Miʼ yʌl: «Tsaʼ j cʼojoʼta chaʼan mic subentel c mel oración baqui cabʌlob, chaʼan mic ñusan discurso tac o chaʼan mic locʼsan jiñi grupo chaʼan subtʼan».

⁵ Hannah, am bʌ 18 i jabilel, jiñʌch juntiquil xcʼalʌl wen yujil bʌ bʌqʼuen. Anquese tsaʼ coli ti jumpʼejl familia i testigojoʼ bʌ Jehová, maʼañic miʼ chʼʌm i bʌ ti ñuc i tsiʼ ñaʼta chaʼan mach mejlic ti chumtʌl bajcheʼ miʼ yʌl jiñi mandar tac. An qʼuiñil mach weñic miʼ yubin i bʌ i miʼ bajñel low i bʌ, pero cojach miʼ ñumen aqʼuen i chʼijiyemlel. Miʼ yʌl: «Maʼañic majqui tsaʼ c sube chuqui mic mel, mi jiñicto c tatob. Tsaʼ c ñaʼta chaʼan Jehová maʼañic baʼ ora mi caj i qʼuelon ti wen chaʼan tiʼ caj muʼ bʌ c melben c bʌ».

6. ¿Chucoch maʼañic tiʼ seb chʼʌmʌ jaʼ Vanessa?

⁶ Jiñi mach bʌ weñic amigojob. Vanessa, am bʌ 22 i jabilel, miʼ cʼajtesan: «An juntiquil wem bʌ camiga añix bʌ lʌcʼʌ 10 jab cʌmbil c chaʼan». Pero jiñi i yamiga mach lajalic i ñopbal bajcheʼ i chaʼan i maʼañic tsiʼ colta chaʼan miʼ chaʼlen chʼʌm jaʼ, i jiñi tsiʼ yʌqʼue i chʼijiyemlel. Miʼ tsictesan: «Wen tsʌts tsaʼ cubi chaʼan mic taj camigojob, i tsaʼ c bʌcʼña chaʼ mi tsaʼ j cʌyʌ c ñochtan jiñi camiga, maʼañic mi caj c taj yambʌ bajcheʼ jiñi».

7. ¿Chuqui tsiʼ bʌcʼña Makayla, i chucoch?

⁷ Jiñi bʌqʼuen chaʼan jumpʼejl tsʌts bʌ mulil. Makayla an jaxto joʼpʼejl i jabilel cheʼ bʌ tsaʼ chaʼlenti ti expulsar i yeran. Ti wiʼil, tsaʼ caji i qʼuel bajcheʼ cʼamel miʼ ticʼlan  i tatob jiñi i melbal i yeran. Miʼ yʌl: «Tsaʼ c bʌcʼña c chaʼlen chʼʌmjaʼ, mic mel jumpʼejl mulil, mic chaʼlentel ti expulsar yicʼot chaʼan muʼto c ñumen aqʼueñob wocol jiñi c tatob».

8. ¿Chuqui tsiʼ bʌcʼña Miles?

⁸ Jiñi bʌqʼuen chaʼan contrajintel. Laʼ laj qʼuel tsaʼ bʌ ujti tiʼ tojlel juntiquil xcolel i cʼabaʼ Miles. Jiñi i papá yicʼot i mamá tsiʼ chaʼleyob i bʌ ti divorciar. Jiñi i papá i testigo Jehová, pero jiñi i mamá mach jiñiqui. Miles miʼ yʌl: «Tsaʼ chumle quicʼot c mamá 18 jab. Tsaʼ c bʌcʼña c suben chaʼan com c chaʼlen chʼʌmjaʼ. Cʼajal c chaʼan chuqui tsiʼ mele cheʼ bʌ jiñi c papá tsaʼ sujti ti Testigo. Tsaʼ c bʌcʼña chaʼan miʼ yʌqʼueñon wocol cheʼ mic chʼʌm jaʼ».

9. ¿Chuqui mi caj i yujtel ti a tojlel cheʼ maʼ cʌn majlel chaʼan Jehová wen yujil pijt yicʼot cʼuxbiya?

⁹ Adán yicʼot Eva maʼañic tsiʼ yajcayob i melben i yeʼtel Jehová come maʼañic tsiʼ wen cʼuxbiyob. Anquese tsaʼ ujti jiñi, Dios tsaʼto i bej acʼʌyob ti chumtʌl cabʌl ora chaʼan miʼ tilelob i yalobil yicʼot chaʼan miʼ bajñel ñaʼtañob bajcheʼ mi caj i cosañob. Come Adán yicʼot Eva tsiʼ bajñel yajcayob chuqui yomob i mel, jiñi tsaʼ bʌ ujti majlel tiʼ tojlelob tiʼ pʌsʌ chaʼan mach weñic tsaʼ bʌ i meleyob. Jiñi ñaxam bʌ i yalobil tiʼ tsʌnsa i yeran, i ti wiʼil, jiñi wiñicob xʼixicob (quixtañujob) wen jontolob tsaʼ sujtiyob yicʼot cojach miʼ bajñel ñaʼtañob i bʌ (Gn. 4:8; 6:11-13). Pero Jehová añʌch chuqui miʼ mejlel i cʼʌn chaʼan miʼ coltan pejtelel i pʼolbal Adán yicʼot Eva yomoʼ bʌ i melben i yeʼtel (Jn. 6:38-40, 57, 58). Jehová wen yujil pijt yicʼot cʼuxbiya, ¿ñomach? Cheʼ maʼ ñumen cʌn majlel, tajol mi caj i coltañet a ñumen cʼuxbin. Maʼañic mi caj a mulan a mel bajcheʼ Adán yicʼot Eva, jatet mi caj a mulan a wʌqʼuen a cuxtʌlel Dios.

10. ¿Chucoch miʼ mejlel i coltañet chaʼan maʼ melben i yeʼtel Jehová cheʼ maʼ wen ñaʼtan jiñi Salmo 19:7?

¹⁰ Bej cʌñʌ i chaʼan bʌ Jehová. Cheʼ maʼ ñumen cʌn majlel, mi caj a ñumen ñop chaʼan mejlʌch a melben i yeʼtel. Avery miʼ yʌl chaʼan tsiʼ wen colta cheʼ tiʼ tsaji yicʼot tsiʼ wen ñaʼta muʼ bʌ i yʌl Salmo 19:7 (pejcan). Cheʼ bʌ  tsiʼ qʼuele bajcheʼ woli (choncol) i coltan tiʼ cuxtʌlel ili tʼan tac, jiñi i cʼuxbiya ti Jehová tsaʼ ñumen pʼʌtʼa. Ili cʼuxbiya mach cojach miʼ coltañonla lac ñop, miʼ coltañonla lac ñaʼtan Jehová yicʼot chuqui miʼ mulan. Hannah miʼ yʌl: «Come mic pejcan jiñi Biblia yicʼot mic chaʼlen estudio tic bajñel, tsiʼ coltayon c chʼʌmben isujm chaʼan cheʼ mic bajñel low c bʌ, mic low Jehová jaʼel» (1 P. 5:7). Tsiʼ chaʼle wersa i mel muʼ bʌ i yʌl i Tʼan Dios (Stg. 1:22). ¿Bajcheʼ tsiʼ colta? Miʼ yʌl: «Cheʼ tsaʼ j qʼuele jiñi wenlel muʼ bʌ c taj cheʼ mic jacʼben i tʼan Jehová, tsaʼ ñumen pʼʌtʼa j cʼuxbiya tiʼ tojlel. Wʌle miʼ mejlel c ñop chaʼan tiʼ pejtelel ora mi caj i coltañon cheʼ bʌ com coltʌntel». Hannah maʼañix tsaʼ caji i chʌn bajñel low i bʌ, tsiʼ yʌqʼue i cuxtʌlel Jehová i tsiʼ chʼʌmʌ jaʼ.

11. a) ¿Bajcheʼ tsaʼ mejli i taj wem bʌ i yamigojob jiñi Vanessa? b) ¿Chuqui miʼ cʌntesañonla ili ejemplo?

¹¹ Yajcan wem bʌ a wamigojob. Vanessa tsaʼ cʼoti i ñaʼtan chaʼan jiñi i yamiga woli (yʌquel) i mʌctan tiʼ melol i yeʼtel Jehová. Jin chaʼan tsiʼ cʌyʌ i ñochtan. Pero mach cojach tsiʼ mele jiñi, tsiʼ chaʼle wersa chaʼan miʼ sʌclan i yamigojob yaʼ ti congregación. Tsiʼ wen colta jiñi ejemplo i chaʼan Noé yicʼot i familia, miʼ yʌl: «Joyolob ti quixtañujob maʼañic bʌ miʼ cʼuxbiñob Jehová, jin chaʼan jiñob jach tsiʼ ñochtayob i bʌ i tijicña tsiʼ ñusayob». Ti wiʼil, Vanessa tsiʼ chʼʌmʌ jaʼ i tsaʼ ochi bajcheʼ precursora. Wʌle miʼ yʌl: «Ili an i coltayon chaʼan mic taj wem bʌ camigojob, mach cojach yaʼ tij congregación, yicʼot ti yan tac bʌ jaʼel». Jatet miʼ mejlel a taj wem bʌ a wamigojob jaʼel cheʼ maʼ chaʼlen wersa a mel jiñi eʼtel am bʌ i yʌqʼueyonla Jehová (Mt. 24:14).

12. ¿Chuqui maʼañic tsiʼ bʌcʼñayob Adán yicʼot Eva, i chuqui ti wocol tsiʼ tajayob?

¹² Mʌlben pejtelel a bʌqʼuen, pero bʌcʼñan Dios. Mach tiʼ pejtelel lac bʌqʼuen an i wocolel. Jumpʼejl ejemplo, weñʌch cheʼ mi lac bʌcʼñan lac mel mach bʌ añic miʼ mulan Jehová (Sal. 111:10). Cheʼ Adán yicʼot Eva tsaʼic i bʌcʼñayob i mel jiñi mach bʌ weñic, tajol maʼañic tsiʼ ñusʌbeyob i tʼan. Pero cheʼ tsiʼ meleyob bajcheʼ jiñi «tsaʼ cajñiyob i wut», yom i yʌl, tsaʼ cʼoti i ñaʼtañob  chaʼan xmulilobix, i chaʼan mi caj i ñusʌbeñob i pʼolbal jiñi mulil yicʼot chʌmel. Come tsiʼ qʼueleyob o tsiʼ ñaʼtayob jiñi wocol tsaʼ bʌ i tajayob, tsiʼ chaʼleyob quisin chaʼan chacalob (pitsʼilob) i tsiʼ mʌcʌyob i i bʌ (Gn. 3:7, 21).

13, 14. a) Cheʼ bajcheʼ miʼ yʌl 1 Pedro 3:21, ¿chucoch mach yomic mi lac bʌcʼñan jiñi chʌmel? b) ¿Chucoch yom mi laj cʼuxbin Jehová?

¹³ Weñʌch cheʼ mi lac bʌcʼñan lac mel mach bʌ añic miʼ mulan Jehová. Pero mach bʌ yomic mi lac bʌcʼñan jiñʌch jiñi chʌmel. ¿Chucoch? Come Dios tsaʼix i yʌqʼueyonla jumpʼejl laj coltʌntel chaʼan mi lac chumtʌl tiʼ pejtelel ora. Mi tsaʼ lac chaʼle mulil, pero ti jumpʼejl lac pusicʼal mi laj cʌy, Dios miʼ ñusʌbeñonla come an lac ñopoñel tiʼ cuxtʌlel tsaʼ bʌ i yʌcʼʌ Jesús. Junchajp bajcheʼ miʼ mejlel lac pʌsben chaʼan añʌch lac ñopoñel jin cheʼ mi la cʌcʼ lac bʌ tiʼ tojlel i mi lac chʼʌm jaʼ (pejcan 1 Pedro 3:21).

¹⁴ Cabʌl chucoch yom mi laj cʼuxbin Jehová. Mach cojach miʼ yʌqʼueñonla chuqui wem bʌ ti jujumpʼejl qʼuin, miʼ cʌntesañonla chuqui i sujmlel tiʼ tojlel yicʼot muʼ bʌ caj i mel (Jn. 8:31, 32). Tsiʼ yʌqʼueyonla jiñi congregación chaʼan miʼ tojʼesañonla yicʼot chaʼan miʼ coltañonla. Miʼ coltañonla lac ñusan jiñi wocol tac muʼ bʌ lac taj wʌle ora i miʼ yʌqʼueñonla lac pijtaya chaʼan utsʼat mi lac chumtʌl tiʼ pejtelel ora ti talto bʌ qʼuin (Sal. 68:19; Ap. 21:3, 4). Cheʼ mi lac wen ñaʼtan pejtelel am bʌ i mele chaʼan miʼ pʌsbeñonla i cʼuxbiya, miʼ cʼotel lac ñumen cʼuxbin i mach la comic la cʌqʼuen i chʼijiyemlel. Jiñʌch jiñi bʌqʼuen yom bʌ an lac chaʼan.

15. ¿Chuqui tsiʼ colta Makayla chaʼan maʼañix miʼ bʌcʼñan i mel tsʌts bʌ mulil?

¹⁵ Cheʼ bʌ Makayla tsiʼ chʼʌmbe i sujm chaʼan Jehová tiʼ pejtelel ora yom i ñusan lac mul, maʼañix tsiʼ bʌcʼña chaʼan miʼ yajlel ti mulil. Miʼ yʌl: «Tsaʼ cʼoti c ñaʼtan chaʼan laj xmulilonla yicʼot mi lac taj lac sajtemal. Pero tsaʼ cʼoti c ñaʼtan jeʼel chaʼan Jehová miʼ cʼuxbiñonla yicʼot chaʼan miʼ ñusʌbeñonla lac mul wocolix i yʌlʌ jiñi i tojol laj coltʌntel». Jiñi i cʼuxbiya ti Jehová tsiʼ ñijca i yʌqʼuen i cuxtʌlel yicʼot chaʼan miʼ chʼʌm jaʼ.

16. ¿Chuqui tsiʼ colta Miles chaʼan maʼañix miʼ bʌcʼñan i contrajintel?

¹⁶ Miles, tsaʼ bʌ i bʌcʼña chaʼan jiñi i mamá miʼ mʌctan chaʼan miʼ chʼʌm jaʼ, tsiʼ cʼajtibe i coltaya jiñi superintendente i chaʼan circuito. Miʼ yʌl: «Jiñi i mamá mach i testigojic Jehová cheʼ bʌ tsaʼ coli jaʼel. Tsiʼ coltayon c ñaʼtan chuqui miʼ mejlel c suben c mamá chaʼan miʼ chʼʌmben i sujm chaʼan joñon cujil mi com c chʼʌm jaʼ i chaʼan jiñi c papá maʼañic woliʼ xicʼon». Jiñi i mamá Miles maʼañic tsiʼ mulaj. Ti wiʼil, Miles tsaʼ loqʼui majlel tiʼ yotot chaʼan miʼ mejlel i chʼʌm jaʼ cheʼ bajcheʼ tsiʼ ñaʼta. Miʼ chaʼ al: «Tsaʼ cʼoti tic pusicʼal cheʼ tsaʼ j cʌñʌ pejtelel am bʌ i mele Jehová tic tojlel. I tsaʼ c wen ñaʼta cheʼ tsiʼ yʌcʼʌ i cuxtʌlel Jesús, tsaʼ c ñumen  chʼʌmbe i sujm bajcheʼ cʼamel miʼ cʼuxbiñon Jehová. Jiñi tsiʼ ñijcayon cʌqʼuen j cuxtʌlel yicʼot chaʼan mic chʼʌm jaʼ».

17. ¿Chuqui miʼ mejlel lac pʌs ti lac pejtelel?

¹⁷ Cheʼ bʌ Eva tsiʼ cʼuxu jiñi i wut teʼ yaʼ ti pʌcʼʌbʌl Edén, tsiʼ ñusʌbe i tʼan i Tat. I cheʼ bʌ tsiʼ cʼuxu jaʼel jiñi Adán, tsiʼ pʌsʌ chaʼan maʼañic tsiʼ wis qʼuele ti ñuc pejtelel chuqui tsiʼ mele Jehová tiʼ tojlel. Ti lac pejtelel miʼ mejlel lac pʌs chaʼan maʼañic tsaʼ lac wis mulaj jiñi tsaʼ bʌ i yajcayob i mel. Cheʼ mi lac chʼʌm jaʼ, miʼ lac pʌsben Jehová chaʼan jin jach an tiʼ wenta chaʼan miʼ yʌl chuqui wen yicʼot mach bʌ weñic. Mi lac pʌsben jaʼel chaʼan mi laj cʼuxbin yicʼot chaʼan mi lac ñop.

18. ¿Chuqui yom maʼ mel chaʼan wen maʼ ñusan tiʼ melol i yeʼtel Jehová?

¹⁸ Cheʼ tsaʼix lac chʼʌmʌ jaʼ, yom mi lac chaʼlen wersa chaʼan tiʼ pejtelel ora mi lac jacʼben i mandar tac Jehová, mach jiñic chuqui bajñel laj com. I sujmʌch, mach cʼuñic tiʼ melol, pero yonlelob cheʼʌch miʼ melob ti jujumpʼejl jab. Jatet miʼ mejlel a mel jaʼel. Chaʼan maʼ mejlel, chaʼlen wersa a ñumen chʼʌmben isujm muʼ bʌ i yʌl jiñi Biblia, ñʌmtesan a bʌ chaʼan maʼ tem ajñel a wicʼot jiñi hermanojob i subeñob yicʼot a tijicñʌyel chuqui tac an a cʌñʌ tiʼ tojlel jiñi a Tat am bʌ ti panchan (He. 10:24, 25). I cheʼ bʌ woli a ñaʼtan chuqui yom maʼ mel, ñʌchʼtan jiñi ticʼojel muʼ bʌ i subeñet Jehová yaʼ tiʼ Tʼan yicʼot tiʼ yorganización (Is. 30:21). Cheʼ jiñi, wen mi caj a wajñel (Pr. 16:3, 20).

19. ¿Chuqui yom maʼ cʼajtesan tiʼ pejtelel ora, i chucoch?

¹⁹ Mi ti bele ora maʼ cʼajtesan chaʼan cabʌl i wenlel cheʼ Jehová miʼ cʌntesañet, mi caj i colel jiñi a cʼuxbiya tiʼ tojlel yicʼot tiʼ mandar tac. Cheʼ jiñi, pejtelel chuqui miʼ pʌsbeñet Satanás maʼañic mi caj i mʌctañet tiʼ melol i yeʼtel Dios. Cheʼ bʌ ñumeñix jiñi mil jab, i maʼ ñaʼtan cheʼ tsaʼ chʼʌmʌ jaʼ, mi caj a wʌl: «Jiñʌch ñumen wem bʌ tsaʼ c yajca c mel ti j cuxtʌlel».