I TILELɅCH cheʼ la com qʼuejlel bajcheʼ wem bʌ quixtañu yicʼot chaʼan toj lac melbal (chaʼlebal). Pero ili mach cʼuñic ti melol. Yonlel wiñicob xʼixicob (quixtañujob) «miʼ tsʼaʼleñob chuqui utsʼat» (2 Ti. 3:3). Tajol jiñʌch miʼ bajñel ñaʼtañob chuqui wen yicʼot mach bʌ weñic, miʼ lon ñaʼtañob chaʼan «utsʼat jontolil» i chaʼan «jontol jini utsʼat bʌ» (Is. 5:20). Cheʼ jaʼel, ti lac pejtelel miʼ ticʼlañonla jiñi tsaʼ bʌ lac mele ti wajali o chaʼan xmulilonla. Jin chaʼan, tajol cheʼ mi la cubin lac bʌ bajcheʼ juntiquil hermana añix bʌ cabʌl jab i cajel i melben i yeʼtel (troñel) Jehová, pero miʼ yʌl: «Maʼañic miʼ mejlel c ñop chaʼan mucʼʌch i mejlel c pʌs cutslel».

Pero mucʼʌch i mejlel lac taj i yutslel lac pusicʼal. Ili jiñʌch jumpʼejl melbalʌl am bʌ i chaʼan i wut jiñi espíritu, i ñumen pʼʌtʌl bajcheʼ ili pañimil (mulawil), jiñi quixtañujob yicʼot joñonla. Laʼ lac tsajin chuquiyes jiñi i yutslel lac pusicʼal i bajcheʼ miʼ mejlel lac pʌs ti laj cuxtʌlel.

Juntiquil am bʌ i yutslel i pusicʼal cʌmbil bajcheʼ wem bʌ quixtañu, mach jontolic yicʼot sʌc i melbal. Majqui miʼ pʌs ili melbalʌl tiʼ pejtelel ora miʼ sʌclan bajcheʼ miʼ coltan yambʌlob yicʼot chaʼan wen chuqui miʼ mel tiʼ tojlelob.

Tajol an laj cʌñʌ bʌ muʼ bʌ i wen mulañob i mel chuqui wen tiʼ tojlel i familia yicʼot i yamigojob. Pero tiʼ tojlel Dios, jiñi uts bʌ i pusicʼal mach cojic jach miʼ mel jiñi. Tiʼ sujm, maʼañic majqui miʼ mejlel i pʌs ti tsʼʌcʌl ili melbalʌl come jiñi Biblia miʼ yʌl chaʼan «maʼanic ti pañimil mi juntiquilic muʼ bʌ i mel chuqui utsʼat tiʼ pejtelel ora. Maʼanic toj bʌ mach bʌ anic miʼ wis chaʼlen mulil» (Ec. 7:20). I jiñi apóstol Pablo tsiʼ yʌlʌ: «Cujil maʼanic chuqui wen tic pusicʼal» (Ro. 7:18). Jin chaʼan, mi la com lac taj ili melbalʌl yom mi lac ñaxan tsajin bajcheʼ miʼ pʌs Jehová come yaʼʌch baqui tilem jiñi i yutslel lac pusicʼal.

Jehová jiñʌch muʼ bʌ i yʌcʼ mandar tac chaʼan chuqui wen. Jiñi Biblia miʼ yʌl tiʼ tojlel Jehová: «Utsʼatet, utsʼat chuqui wolaʼ mel. Cʌntesañon ti a tsʼijbujel» (Sal. 119:68). Laʼ laj qʼuel jiñi chaʼchajp muʼ bʌ i yʌl jiñi texto chaʼan bajcheʼ yilal jiñi i yutslel i pusicʼal Dios.

Jehová utsʼat o wen. Jiñi i yutslel i pusicʼal Jehová temel an yicʼot jiñi yan tac bʌ i melbal. Laʼ laj qʼuel chuqui tsaʼ ujti cheʼ bʌ tiʼ sube Moisés: «Pejtelel cutslel mi caj i tsictiyel ti a wut». Cheʼ choncol i qʼuelben i ñuclel yicʼot i yutslel Dios, Moisés tsiʼ yubi ili tʼan tac: «Joñon Yumʌloñʌch, a Yumon, a Dioson, cujil pʼuntaya, utson, jal mic michʼan, cabʌl mic pʼuntañob, xucʼulon. Mic pʼuntan cabʌlob, mic ñusan mulil, yicʼot i ñusʌntel mandar, yicʼot jontolil, pero maʼanic mic ñusʌben i mul jini muʼ bʌ i chʌn chaʼlen mulil chaʼan i tsʌtslel i pusicʼal» (Éx. 33:19; 34:6, 7). Ili miʼ coltañonla lac ñaʼtan chucoch jiñi i yutslel i pusicʼal Jehová miʼ tsictiyel tiʼ pejtelel chuqui miʼ mel. Cheʼ bʌ Jesús tsajñi ila ti Pañimil, jiñʌch ñumen wem bʌ tsiʼ pʌsʌ i yutslel i pusicʼal. Anquese cheʼʌch tsiʼ mele, tsiʼ yʌlʌ: «Maʼanic majch wen, jini jach Dios» (Lc. 18:19).

Jehová miʼ mel chuqui utsʼat. Jiñi i yutslel Dios tsiquil tiʼ pejtelel chuqui miʼ mel. Jiñi Biblia miʼ yʌl:  «Lac Yum miʼ pʌsbeñob i yutslel i pusicʼal pejtel winicob xʼixicob. Miʼ pʼuntañob come laj i melbalʌch» (Sal. 145:9). Jehová miʼ pʌs i yutslel i pusicʼal cheʼ junlajal miʼ qʼuel wiñicob xʼixicob, miʼ yʌqʼueñob i cuxtʌlel yicʼot i cʼʌjñibal bʌ i chaʼañob chaʼan chʌn cuxulob (Hch. 14:17). Yambʌ bajcheʼ miʼ pʌs jiñʌch cheʼ miʼ ñusan lac mul. Juntiquil tsaʼ bʌ i tsʼijbu jumpʼejl salmo tsiʼ yʌlʌ: «Isujm utsʼatet, c Yum, maʼ ñusʌbeñon lojon c mul» (Sal. 86:5). Miʼ mejlel lac ñop chaʼan Jehová mi caj i yʌqʼuen «chuqui tac utsʼat jini sʌcoʼ bʌ i pusicʼal» (Sal. 84:11).

Come Jehová tsiʼ meleyonla tiʼ yejtal, miʼ mejlel lac pʌs i yutslel lac pusicʼal yicʼot lac mel chuqui utsʼat (Gn. 1:27). Pero jiñi Biblia miʼ subeñonla: «¡Ñopox laʼ mel chuqui utsʼat!» (Is. 1:17). Laʼ laj qʼuel uxchajp muʼ bʌ i mejlel lac mel chaʼan mi lac taj i yutslel lac pusicʼal.

Ñaxam bʌ, laʼ laj cʼajtin jiñi chʼujul bʌ espíritu, miʼ mejlel i coltañonla chaʼan wen miʼ qʼuelonla Dios (Gá. 5:22). Cheʼʌchi, jiñi chʼujul bʌ i yespíritu Dios miʼ coltañonla laj cʼuxbin chuqui wen yicʼot lac tsʼaʼlen mach bʌ weñic (Ro. 12:9). Cheʼ jaʼel, jiñi Biblia miʼ yʌl chaʼan Jehová miʼ mejlel i ‹xucʼchocoñonla tiʼ pejtelel wem bʌ tʼan yicʼot tiʼ pejtelel wen bʌ eʼtel› (2 Ts. 2:16, 17).

I chaʼpʼejlel, yom mi lac pejcan i Tʼan Dios. Cheʼ bʌ mi lac mel, Jehová miʼ cʌntesañonla «chuqui tac wen» yicʼot miʼ chajpañonla tiʼ melol «pejtelel chuqui wen» (Pr. 2:9; 2 Ti. 3:17). Cheʼ bʌ mi lac pejcan i Tʼan yicʼot mi lac wen ñaʼtan, mi laj cʌy ti lac pusicʼal ñuc tac bʌ i cʼʌjñibal tiʼ tojlel Dios yicʼot chuqui miʼ mulan. Ili miʼ sujtel bajcheʼ wen letsem bʌ i tojol muʼ bʌ mejlel i coltañonla (Lc. 6:45; Ef. 5:9).

I yuxchajplel, yom mi lac chaʼlen wersa chaʼan mi lac lajin «chuqui utsʼat» (3 Jn. 11). Yaʼ ti Biblia mi lac taj cabʌl tsaʼ bʌ i pʌsʌyob i yutslel i pusicʼal i muʼ bʌ mejlel lac lajin. Tiʼ sujm, jiñi ñumen wem bʌ an i pʌsʌyob jiñʌch Jehová yicʼot Jesús. Pero an yañoʼ bʌ mejl bʌ lac lajiñob. Tajol miʼ cʼajtiyel lac chaʼan Tabita yicʼot Bernabé (Hch. 9:36; 11:22-24). ¿Chucoch maʼañic mi lac pejcan muʼ bʌ i yʌl jiñi Biblia tiʼ tojlelob i mi laj qʼuel chuqui tsiʼ meleyob chaʼan miʼ coltañob yañoʼ bʌ? Laʼ lac ñaʼtan muʼ bʌ i mejlel lac mel chaʼan mi laj coltan juntiquil ti lac familia o ti laj congregación. Cheʼ jaʼel, laʼ lac wen qʼuel chuqui ti bendición tsiʼ tajayob cheʼ tsiʼ meleyob chuqui utsʼat. Cheʼʌch miʼ mejlel ti ujtel ti lac tojlel jaʼel.

Ili ora, miʼ mejlel lac ñaʼtan jaʼel jiñi muʼ bʌ i melob chuqui utsʼat tiʼ tojlel yambʌlob. Jumpʼejl ejemplo, jiñi ancianojob ti congregación wen bʌxob ti eʼtel i miʼ mulañob i mel chuqui utsʼat. I mach lac ñajʌtesan jiñi xucʼul bʌ hermanajob, come xcʌntesajob  jaʼel chaʼan chuqui utsʼat tiʼ tʼañob yicʼot tiʼ melbalob (Tit. 1:8; 2:3). Juntiquil hermana i cʼabaʼ Roslyn miʼ yʌl: «An juntiquil camiga muʼ bʌ i jisan i bʌ i coltan yicʼot i ñuqʼuesʌben i pusicʼal jiñi hermanojob ti congregación. Miʼ ñaʼtan chuqui woli (choncol) i ñusañob yicʼot miʼ yʌqʼueñob alʌ majtañʌl tac o miʼ sʌclan bajcheʼ yambʌ miʼ mejlel i coltañob. Juntiquilʌch wem bʌ xʼixic mij qʼuel».

Jehová miʼ suben jiñi i wiñicob chaʼan ‹miʼ melob chuqui utsʼat› (Am. 5:14). Mi mucʼʌch lac mel, mach cojach mi caj laj cʼuxbin i mandar, mi caj lac ñumen mulan lac mel chuqui wen tiʼ wut Jehová.

Pero mach lac ñaʼtan chaʼan wen ñuc chuqui yom tac mi lac mel chaʼan mi lac pʌs i yutslel lac pusicʼal. Jumpʼejl ejemplo, chaʼan miʼ colel jumpʼejl lac pacʼ mach jasʌlic cheʼ junsujtel jach mi lac wen mul ti jaʼ, mucʼ jach lac chʌcʌ mul ti tsʼitaʼ tac. Joñonla jaʼel, miʼ mejlel lac pʌs i yutslel lac pusicʼal cheʼ cabʌl chuqui mi lac mel tiʼ tojlel yambʌlob anquese mach wen ñuquic.

Jiñi Biblia miʼ yʌl chaʼan ti lac pejtelel yom chajpʌbilonla tiʼ melol chuqui wen (2 Ti. 2:21; Tit. 3:1). Mi yʌxʌl laj co chaʼan chuqui miʼ yujtel tiʼ tojlel yambʌlob, mucʼʌch caj lac taj bajcheʼ miʼ mejlel laj coltañob ti chuqui wen «chaʼan miʼ pʼʌtʼañob, chaʼan miʼ tajob i wenlel» (Ro. 15:2). Chaʼan mi lac mel, tajol yom mi lac tʼoxbeñob chuqui an lac chaʼan (Pr. 3:27). Tajol miʼ mejlel lac pʌyob chaʼan jumucʼ añob la quicʼot o chaʼan comol uchʼel. ¿Laʼ cujil ba mi an majqui cʼam? Mi cheʼʌchi, miʼ mejlel lac tsʼijbuben majlel jumpʼejl jun o jumpʼejl mensaje, mi lac julaʼtan o mi lac pejcan ti teléfono. Tiʼ sujm, cabʌl i yorajlel chaʼan miʼ mejlel la cʌl ‹chuqui utsʼat chaʼan mi lac pʼʌtʼesan jini muʼ bʌ i yubiñob, chaʼan mi laj cʌqʼueñob i yutslel o i tijicñʌyel i pusicʼal› (Ef. 4:29).

Cheʼ bajcheʼ Jehová, mi lac chaʼlen wersa lac mel chuqui utsʼat tiʼ tojlel yambʌlob. Jin chaʼan junlajal mi laj qʼuelob. Junchajp wem bʌ bajcheʼ mi lac pʌs jin cheʼ mi lac subeñob jiñi wen tʼan chaʼan i Yumʌntel Dios. Mi lac ñop lac mel chuqui wem bʌ tiʼ tojlel jiñi muʼ bʌ i tsʼaʼleñoñobla, cheʼʌch bajcheʼ tsiʼ yʌlʌ Jesús (Lc. 6:27). I tojelʌch cheʼ mi lac pʌs i yutslel lac pusicʼal yicʼot mi lac mel chuqui utsʼat tiʼ tojlel yambʌlob, come «maʼañic mandar muʼ bʌ i contrajin ili tac» (Gá. 5:22, 23, TNM). Mi mucʼʌch lac mel chuqui utsʼat anquese an laj contrajintel o wocol tac, tajol jiñi quixtañujob mi caj i mulañob i cʌn i sujmlel i mi caj la cʌqʼuen i ñuclel Dios (1 P. 3:16, 17).

Jiñi Biblia miʼ yʌl chaʼan «jini weñoʼ bʌ» mi caj i tajob i chobejtʌbal chaʼan ‹wen bʌ i melbalob› (Pr. 14:14). ¿Baqui tac bʌ chobejtʌbal? Tajol jiñi quixtañujob mi caj i melob jaʼel chuqui wen ti lac tojlel (Pr. 14:22). Anquese tajol mach cheʼic miʼ melob, mi mucʼʌch lac chʌn pʌs i yutslel lac pusicʼal tajol miʼ mejlel i qʼuextañob i melbal i miʼ cʼunʼañob i pusicʼal (Ro. 12:20).

Cabʌl majqui miʼ mejlel i yʌl chaʼan añʌch i wen colta cheʼ miʼ cʌy jiñi mach bʌ weñic i miʼ mel chuqui utsʼat. Laʼ laj qʼuel muʼ bʌ i yʌl Nancy: «Wen jontol c melbal tsaʼ sujtiyon i maʼañic chuqui mij qʼuel ti ñuc. Pero cheʼ tsaʼ j cʌñʌ chuqui miʼ yʌl Dios chaʼan chuqui wen i cheʼʌch tsaʼ c mele, wen tijicña tsaʼ caji cubin c bʌ. Wʌle muqʼuix c chʼʌm c bʌ ti ñuc».

Yom mi lac taj i yutslel lac pusicʼal come cheʼʌch mi la cʌqʼuen i tijicñʌyel Jehová, iliyi jiñʌch ñuc bʌ i sujmlel cheʼ yom mi lac mel. Jehová miʼ qʼuel chuqui mi lac mel, anquese cabʌlob maʼañic miʼ qʼuelob. Miʼ chʌn qʼuel chuqui wem bʌ mi lac ñaʼtan yicʼot mi lac mel (Ef. 6:7, 8). ¿Chucoch? Come «jini wen bʌ i pusicʼal miʼ tajben i yutslel i pusicʼal lac Yum» (Pr. 12:2). Jin chaʼan, laʼ lac chʌn taj majlel i yutslel lac pusicʼal. Jehová miʼ yʌcʼ i tʼan chaʼan «mi caj i taj i ñuclel yicʼot i cʼuxbintel yicʼot i ñʌchʼtilel i pusicʼal jini muʼ bʌ i chaʼlen chuqui utsʼat» (Ro. 2:10).