1, 2. ¿Chucoch mach yomic maʼ wubin a chʼijyemlel mi maxto chajpʌbiletic chaʼan maʼ chʼʌmjaʼ? (Qʼuele jiñi foto tac am bʌ tiʼ tejchibal).

 MIC chaʼleñet lon ti felicitar mi wolix (choncolix) a ñaʼtan chʼʌmjaʼ. ¿Chajpʌbiletix ba? Mi cheʼʌchi i mi weñʌch miʼ qʼuelob jiñi ancianojob mach a chʌn pijtañix. Cheʼ bajcheʼ jiñi, tijicña mi caj a wubin cheʼ bʌ maʼ melben i yeʼtel (troñel) Jehová.

² Pero mach a wubin a chʼijyemlel mi tsaʼ subentiyet chaʼan maxto chajpʌbiletic chaʼan maʼ chʼʌmjaʼ o mi maxto chajpʌbiletic maʼ wubin a bʌ. Maʼ mejlel a bej chaʼlen wersa chaʼan maʼ taj jiñi a meta, mach yʌlʌyic jaypʼejl a jabilel.

3. ¿Chuqui tiʼ sube Felipe juntiquil xʼeʼtel ti Etiopía, i chuqui ti cʼajtiya miʼ loqʼuel? (Hechos 8:36, 38).

³ (Pejcan Hechos 8:36, 38). Juntiquil xʼeʼtel ti Etiopía tsiʼ cʼajtibe Felipe: «¿Chuqui miʼ mʌctañon chaʼan mic chaʼlen chʼʌmjaʼ?». Tsiquil chaʼan yomʌch i chʼʌmjaʼ. Pero ¿chajpʌbilix ba?

4. ¿Bajcheʼ tsiʼ pʌsʌ jiñi etíope chaʼan yomʌch i bej cʌn i sujmlel?

 ⁴ Jiñi etíope «tsajñi ti Jerusalén chaʼan miʼ chʼujutesan Dios» (Hech. 8:27). Jin chaʼan, miʼ mejlel la cʌl chaʼan juntiquilʌch tsaʼ bʌ ochi tiʼ ñopbal jiñi judíojob. I cʌñʌ jiñi Tsʼijbujel hebreo i yaʼʌch baqui tsiʼ cʌñʌ chaʼan bʌ Jehová. Pero yomto i ñumen cʌn. ¿Chuqui woli (yʌquel) i mel cheʼ bʌ Felipe tsiʼ taja yaʼ ti bij? Woliʼ pejcan i tsʼijbujel jiñi xʼaltʼan Isaías (Hech. 8:28). Jiñi wocolʌch ti chʼʌmbentel i sujm. Pero jiñi etíope mach jasʌlic tsiʼ yubi jiñi yujilix bʌ, yomʌch i bej cʌn.

5. ¿Chuqui tsiʼ mele jiñi etíope yicʼot jiñi tsaʼ bʌ i cʌñʌ?

⁵ Jiñi wiñic juntiquilʌch wen ñuc bʌ i yeʼtel tiʼ yotot Candace, jiñi reina ti Etiopía. «An tiʼ wenta pejtelel i chubʌʼan» (Hech. 8:27). Cabʌlʌch i yeʼtel, pero tsiʼ locʼsʌbe i yorajlel chaʼan miʼ chʼujutesan Jehová. Mach jasʌlic tsiʼ yubi cheʼ tsiʼ cʌñʌ i sujmlel: Jiñi yujil bʌ tsiʼ ñijcʌbe i pusicʼal chaʼan añʌch chuqui miʼ mel. Tsaʼ loqʼui ti Etiopía chaʼan miʼ majlel i chʼujutesan Jehová yaʼ ti templo ti Jerusalén. Cabʌlʌch chuqui tsiʼ mele (chaʼle), tsiʼ chaʼle ñajt bʌ xʌmbal i tsiʼ cʼʌñʌ cabʌl taqʼuin come yomʌch i chʼujutesan Jehová.

6, 7. ¿Chuqui tsiʼ mele jiñi etíope chaʼan miʼ colel i cʼuxbiya ti Jehová?

⁶ Felipe tiʼ tsictesʌbe jiñi etíope jiñi i sujmlel tac maxto bʌ yujilic, junchajp chaʼan Jesús jiñʌch jiñi Mesías (Hech. 8:34, 35). Miʼ mejlel lac ñaʼtan chaʼan jiñi etíope tsaʼ wen cʼoti tiʼ pusicʼal cheʼ bʌ tsiʼ cʌñʌ pejtelel chuqui tsiʼ mele Jesús tiʼ tojlel. ¿Chuqui mi caj i mel? Cheʼ yomiqui maʼañic chuqui miʼ mel i miʼ bej qʼuejlel ti ñuc bajcheʼ juntiquil judío. Pero tsiʼ chʼʌmʌ jaʼ yicʼot tsaʼ sujti ti xcʌntʼan i chaʼan Jesús come tsaʼ wen coli jiñi i cʼuxbiya tiʼ tojlel Jehová yicʼot Jesús. Felipe tsiʼ yʌcʼʌ ti chʼʌmjaʼ come tsiʼ qʼuele chaʼan chajpʌbilix.

⁷ I yejemplo jiñi etíope mi caj i coltañet a chajpan a bʌ chaʼan maʼ mejlel ti chʼʌmjaʼ. Mi caj a mejlel a wʌl jaʼel: «¿Chuqui miʼ mʌctañon chaʼan mic chaʼlen chʼʌmjaʼ?». Wʌle mi caj laj qʼuel bajcheʼ miʼ mejlel a lajin: Maʼ bej cʌn majlel, maʼ jacʼ muʼ bʌ a cʌn yicʼot maʼ pʼʌtʼesan a cʼuxbiya ti Jehová.

8. Cheʼ bajcheʼ miʼ yʌl Juan 17:3, ¿chuqui yom maʼ mel?

⁸ (Pejcan Juan 17:3 yicʼot jiñi nota). ¿Tsaʼ ba i coltayet chaʼan maʼ tech estudio jiñi tsaʼ bʌ i yʌlʌ Jesús? Cheʼʌch tsaʼ ujtiyob yonlelob. Iliyi miʼ coltañonla chaʼan mi lac bej chaʼlen estudio. Maʼañic baʼ ora mi caj i yujtel laj cʌn jiñi cojach bʌ i sujm bʌ Dios (Ec. 3:11). Tiʼ pejtelel ora mi caj lac bej cʌn.  Cheʼ bʌ mi lac ñumen cʌn Jehová, mi lac ñumen lʌcʼtesan lac bʌ tiʼ tojlel (Sal. 73:28).

9. ¿Chuqui yom mi lac mel cheʼ bʌ laj cʌñʌyix jiñi ñaxan tac bʌ cʌntesa?

⁹ Cheʼ bʌ mi lac tech laj cʌn Jehová, an cʌntesa tac yom bʌ mi lac ñaxan cʌn, jiñi apóstol Pablo tsiʼ taja ti tʼan bajcheʼ «jiñi ñaxan tac bʌ cʌntesa» ti jiñi carta tsaʼ bʌ i chocbe majlel jiñi hebreojob. Mach wolic i yʌl chaʼan mach ñuquic i cʼʌjñibal iliyi, woli bʌ i yʌl jiñʌch chaʼan lajal jach bajcheʼ leche muʼ bʌ i yʌqʼuentel juntiquil alʌl (Heb. 5:12; 6:1). Tiʼ sube jaʼel jiñi xñoptʼañob chaʼan mach jasʌlic yom miʼ yubiñob jiñi ñaxan tac bʌ cʌntesa, yomʌch miʼ cʌñob jaʼel jiñi cʌntesa tac wocol bʌ ti chʼʌmbentel i sujm yaʼ tiʼ Tʼan Dios. ¿Muʼ ba a wen mulan a cʌn? ¿A womʌch ba a chaʼlen wersa chaʼan maʼ bej colel yicʼot maʼ cʌn chaʼan bʌ Jehová yicʼot jiñi ñaʼtʌbil bʌ i chaʼan?

10. ¿Chucoch an wocol bʌ miʼ yubiñob chaʼan miʼ chaʼleñob estudio?

¹⁰ An wocol bʌ miʼ yubiñob chaʼan miʼ chaʼleñob estudio. ¿Ixcu jatet? ¿Tsaʼ ba pʌsbentiyet leer yicʼot bajcheʼ yom maʼ chaʼlen estudio yaʼ ti escuela? ¿Mucʼʌch ba a mulan a mel? ¿O tsaʼ ñaʼta chaʼan mach melbiletic chaʼan maʼ pejcan libro tac? Mi cheʼʌchi, mach jatetic jach. Jehová miʼ mejlel i coltañet. Tojʌch yicʼot jiñʌch jiñi ñumen wem bʌ maestro.

11. ¿Chucoch Jehová jiñʌch jiñi Ñuc bʌ xcʌntesa?

¹¹ Jehová jiñʌch jiñi Ñuc bʌ xcʌntesa (Is. 30:20, 21). Yujil pijt, uts, miʼ chʼʌmbeñonla i sujm yicʼot miʼ qʼuel chuqui wem bʌ tiʼ tojlel jiñi muʼ bʌ i cʌntesañob (Sal. 130:3). Maʼañic baʼ ora miʼ cʼajtibeñonla mach bʌ mejlic lac mel. Laʼ laj cʼajtesan chaʼan jiñʌch tsaʼ bʌ i mele (pʌtʌ) lac sicojc, jumpʼejl wen ñuc bʌ lac majtan (Sal. 139:14). Cheʼ jaʼel, tsiʼ meleyonla chaʼan añʌch chuqui mi lac mulan laj cʌn i yom chaʼan tiʼ pejtelel ora mi lac bej cʌn yicʼot mi lac ñusan lac bʌ. Jin chaʼan, cʼʌlʌl ili ora yom mi lac chaʼlen wersa lac sʌclan jiñi i sujmlel (1 Ped. 2:2). ¿Chuqui miʼ mejlel i coltañet? Aqʼuen a bʌ meta tac mucʼʌch bʌ i mejlel a tsʼʌctesan yicʼot pejcan jiñi Biblia (Jos. 1:8). Jehová miʼ mejlel i coltañet chaʼan maʼ ñumen ñusan a bʌ tiʼ pejcʌntel jiñi Biblia yicʼot chaʼan maʼ cʌn tiʼ tojlel.

12. ¿Chucoch yom mi lac pejcan bajcheʼ tsaʼ chumle Jesús yicʼot chaʼan bʌ jiñi i subtʼan?

¹² Locʼsʌben i yorajlel chaʼan maʼ wen ñaʼtan bajcheʼ tsaʼ chumle Jesús yicʼot bajcheʼ tsiʼ chaʼle subtʼan. Chaʼan mi lac melben i yeʼtel Jehová, yomʌch mi lac tsajcan tsaʼ bʌ i mele Jesús, ñumento ti ili ora wen wocol jax bʌ (1 Ped. 2:21). Jesús jamʌ tsiquil tiʼ sube jiñi xcʌntʼañob i chaʼan chaʼan mi caj i ñusañob wocol tac (Luc. 14:27, 28). Pero yujil chaʼan xucʼulʌch mi caj i yajñelob cheʼ bajcheʼ xucʼul tsaʼ ajñi jaʼel (Juan 16:33). Pejcan bajcheʼ tsiʼ ñusa Jesús i aqʼuen a bʌ meta tac chaʼan miʼ mejlel a lajin ti jujumpʼejl qʼuin.

13. ¿Chuqui yom maʼ bej cʼajtiben Jehová, i chucoch?

¹³ Cheʼ bʌ mi lac chaʼlen estudio mach chaʼan jach la com lac ñumen taj lac ñaʼtʌbal. La com lac ñumen cʌn Jehová, laj cʼuxbin yicʼot lac ñop tiʼ tojlel (1 Cor. 8:1-3). Bej cʌñʌ majlel i mach a cʌy a cʼajtiben chaʼan miʼ ñumen aqʼueñet a ñopoñel (Luc. 17:5). Mucʼʌch caj i yʌqʼueñet. Mi pʼʌtʌlʌch jiñi a ñopoñel i chucul ti chuqui cʌmbil bʌ a chaʼan tiʼ tojlel Dios, mucʼʌch caj a mejlel a bej chaʼlen wersa (Sant. 2:26).

14. ¿Bajcheʼ tsiʼ pʌsʌ Pedro chaʼan ñucʌch i cʼʌjñibal cheʼ mi lac jacʼ muʼ bʌ laj cʌn? (Qʼuele jaʼel jiñi dibujo).

¹⁴ Jiñi apóstol Pedro tsiʼ pʌsʌ chucoch wen  ñuc i cʼʌjñibal cheʼ jiñi xcʌntʼañob i chaʼan Cristo miʼ jacʼob jiñi muʼ bʌ i cʌñob. Tsiʼ cʼʌñʌ i yejemplo Noé chaʼan miʼ tsictesan. Jehová tiʼ sube Noé chaʼan mi caj i choc tilel jumpʼejl ñuc bʌ Butʼjaʼ muʼ bʌ caj i jisan pejtelel jiñi lac piʼʌlob jontoloʼ bʌ (mañajoʼ bʌ). Pero mach jasʌlic cheʼ Noé yicʼot i familia yujilobix chuqui mi caj i yujtel. Añʌch chuqui yom miʼ melob chaʼan maʼañic miʼ sʌtob i cuxtʌlel. Pedro tsiʼ cʼʌñʌ jiñi tʼan «cheʼ bʌ woliʼ mejlel jumpʼejl arca» chaʼan miʼ yʌcʼ ti ñaʼtʌntel jiñi tiempo cʌylem bʌ cheʼ bʌ maxto tilemic jiñi Diluvio (1 Ped. 3:20). Noé yicʼot i familia tsaʼʌch i meleyob tsaʼ bʌ i subeyob Jehová i tsiʼ meleyob jumpʼejl arca (Heb. 11:7). Cheʼ jiñi, Pedro tsiʼ laji jiñi tsaʼ bʌ i mele Noé yicʼot jiñi chʼʌmjaʼ. Tsiʼ yʌlʌ: «Miʼ mejlel lac lajin jiñi tsaʼ bʌ ujti ti wajali yicʼot jiñi chʼʌmjaʼ woli bʌ i coltañetla ili ora» (1 Ped. 3:21). Jiñi woli bʌ a mel chaʼan maʼ chajpan a bʌ chaʼan jiñi chʼʌmjaʼ lajal bajcheʼ tsaʼ bʌ i mele Noé yicʼot i familia chaʼan miʼ melob jiñi arca. Cheʼ jiñi, ¿chuqui yom maʼ mel chaʼan maʼ chajpan a bʌ chaʼan jiñi chʼʌmjaʼ?

15. ¿Chuqui yom i yʌl cheʼ mi lac chaʼ ñaʼtan lac bʌ tiʼ sujm?

¹⁵ Junchajp yom bʌ mi lac mel jiñʌch mi lac chaʼ ñaʼtan lac bʌ chaʼan pejtelel jiñi lac mul (Hech. 2:37, 38). Cheʼ mi lac chaʼ ñaʼtan lac bʌ tiʼ sujm, yom i yʌl chaʼan mucʼʌch laj qʼuextan lac bʌ. ¿Tsaʼix ba a cʌyʌ a mel maʼañic bʌ miʼ mulan Jehová bajcheʼ jiñi tsʼiʼlel, cʼujtsijel o tsucu tʼan? (1 Cor. 6:9, 10; 2 Cor. 7:1; Efes. 4:29). Mi maxto a mele, chaʼlen wersa. Mi a wom coltʌntel yicʼot ticʼojel tac suben jiñi muʼ bʌ i yʌqʼueñet estudio o jiñi ancianojob. Mi colelto muqʼuet i chumuletto a wicʼot a tat a ñaʼ miʼ mejlel a subeñob chaʼan miʼ coltañetob a cʌy jiñi muʼ bʌ i mʌctañet ti chʼʌmjaʼ.

16. ¿Chuqui yom mi lac mel mi la com lac chʌcʌ chʼujutesan Jehová?

¹⁶ Wen ñuc i cʼʌjñibal jaʼel cheʼ bʌ maʼ chʌcʌ chʼujutesan Jehová. Ili yom i yʌl chaʼan maʼ majlel ti tempa bʌ yicʼot maʼ wʌcʼ a comentario (Heb. 10:24, 25). I mach a cʌy subtʼan cheʼ bʌ maʼ wochel ti publicador. Mi caj a qʼuel chaʼan mi caj a ñumen ñusan a bʌ cheʼ bʌ maʼ ñumen mel (2 Tim. 4:5).  Mi xcoleletto i chumuletto a wicʼotob a tat a ñaʼ, cʼajtiben a bʌ: «¿Muʼ ba i chʌcʌ subeñoñob chaʼan yom mic majlel ti tempa bʌ o ti subtʼan? ¿O c bajñel mic ñaʼtan c mel?». Cheʼ bʌ loqʼuem ti a pusicʼal maʼ mel iliyi, maʼ pʌs chaʼan añʌch a ñopoñel, chaʼan maʼ cʼuxbin Jehová yicʼot chaʼan mucʼʌch a wʌqʼuen wocolix i yʌlʌ. Cheʼ bʌ maʼ chʌn chʼujutesan Jehová woli a pʌs a xucʼtʌlel ti Dios, i lajal bajcheʼ woli a wʌqʼuen i majtan (2 Ped. 3:11; Heb. 13:15). Miʼ mulan cheʼ bʌ mach xicʼbiloñicla cheʼ bʌ an chuqui mi la cʌqʼuen (laja yicʼot 2 Corintios 9:7). I joñonla tijicñayonla jaʼel cheʼ bʌ mi la cʌqʼuen jiñi ñumen wem bʌ ti lac tojlel.

17, 18. ¿Chuqui mi caj i coltañet chaʼan maʼ mejlel ti chʼʌmjaʼ, i chucoch? (Proverbios 3:3-6).

¹⁷ Mucʼʌch caj a taj wocol tac cheʼ bʌ woli a ñaʼtan chʼʌmjaʼ. Tajol an muʼ bʌ caj i wajleñet o maʼ tsʼaʼlentel tiʼ caj jiñi a ñopbal (2 Tim. 3:12). O tajol an chuqui woli a chaʼlen wersa a cʌy pero maʼ chaʼ yajlel. O maʼ ñaʼtan chaʼan maʼañic baʼ ora mi caj a mejlel ti chʼʌmjaʼ, i jiñi miʼ yʌqʼueñet a chʼijyemlel. ¿Chuqui mi caj i coltañet? Jiñʌch jiñi a cʼuxbiya ti Jehová.

¹⁸ Jiñi a cʼuxbiya ti Jehová jiñʌch jiñi ñumen ñuc bʌ am bʌ a chaʼan (pejcan Proverbios 3:3-6). Mi mucʼʌch a cʼuxbin Jehová tiʼ pejtelel a pʼʌtʌlel, mi caj i mejlel a cuch jiñi wocol tac. Jiñi Biblia miʼ wen al chaʼan Jehová miʼ pʌsben xucʼul bʌ i cʼuxbiya o i yutslel jiñi i wiñicob. Ili yom i yʌl chaʼan maʼañic mi caj i cʌyob yicʼot chaʼan maʼañic miʼ cʌy i cʼuxbiñob (Sal. 100:5). Jatet melbilet tiʼ yejtal Dios (Gn. 1:26). Jin chaʼan, ¿bajcheʼ miʼ mejlel a pʌs jaʼel ili cʼuxbiya?

19. ¿Chuqui miʼ mejlel a mel chaʼan maʼ wʌqʼuen wocolix i yʌlʌ Jehová chaʼan tsaʼ bʌ i mele ti a tojlel? (Gálatas 2:20).

¹⁹ Ñaxan yom mi la cʌqʼuen wocolix i yʌlʌ Jehová (1 Tes. 5:18). Cʼajtiben a bʌ ti jujumpʼejl qʼuin: «¿Bajcheʼ tsiʼ pʌsbeyon Jehová ili qʼuin chaʼan mucʼʌch i cʼuxbiñon?». I cheʼ bʌ woli a melben oración jamʌ tsiquil yom maʼ suben chucoch woli a wʌqʼuen wocolix i yʌlʌ. Cheʼ bajcheʼ tsiʼ mele jiñi apóstol Pablo, qʼuele jiñi i cʼuxbiya bajcheʼ junchajp woli bʌ i yilo pʌsbeñet (pejcan Gálatas 2:20). I cʼajtiben a bʌ: «¿Com ba c pʌsben Jehová chaʼan mucʼʌch j cʼuxbin jaʼel?». Jiñi a cʼuxbiya tiʼ tojlel mi caj i coltañet chaʼan maʼañic maʼ yajlel ti mulil, chaʼan maʼ ñusan jiñi wocol tac yicʼot  chaʼan maʼ chʌn chʼujutesan. Cheʼ bajcheʼ jiñi mi caj a pʌs ti jujumpʼejl qʼuin chaʼan mucʼʌch a cʼuxbin jiñi a Tat Jehová.

20. ¿Chuqui yom i yʌl cheʼ mi la cʌcʼ lac bʌ ti Jehová, i chucoch ñucʌch i cʼʌjñibal?

²⁰ Ti wiʼil, jiñi ñuc bʌ a cʼuxbiya tiʼ tojlel Jehová mi caj a ñijcañet chaʼan maʼ melben jumpʼejl oración baqui maʼ suben chaʼan mi caj a wʌcʼ a bʌ tiʼ tojlel. I cheʼ bʌ tsaʼix a wʌcʼʌ a bʌ tiʼ tojlel, mi caj a mejlel ti sujtel tiʼ wiñic tiʼ pejtelel ora. Cheʼ bʌ maʼ wʌcʼ a bʌ ti Jehová, maʼ suben chaʼan mi caj a melben i yeʼtel, mach yʌlʌyic mi an wocol o maʼañic. Junyajl jach miʼ mejlel a mel iliyi. I sujmʌch chaʼan iliyi mach alasic jach. Pero cʼajtesan chaʼan jiñʌch jiñi ñumen wem bʌ decisión muʼ bʌ i mejlel a chʼʌm (Sal. 50:14). Satanás mi caj i ñop i jisan jiñi a cʼuxbiya tiʼ tojlel Jehová i maʼ cʌy a melben i yeʼtel. Pero mach a wʌqʼuen i mʌlbeñet (jotbeñet) (Job 27:5, TNM). Jiñi ñuc bʌ a cʼuxbiya tiʼ tojlel Jehová mi caj i coltañet a tsʼʌctesan jiñi a tʼan yicʼot a ñumen lʌcʼtesan a bʌ tiʼ tojlel.

21. ¿Chucoch mi la cʌl chaʼan jiñi chʼʌmjaʼ i tejchibal jaxto?

²¹ Cheʼ bʌ tsaʼix a wʌcʼʌ a bʌ ti Jehová, suben jiñi ancianojob chaʼan a womix chʼʌmjaʼ. Pero cʼajtesan chaʼan jiñi chʼʌmjaʼ maxto i yujtibalic, i tejchibal jaxto i melol i yeʼtel Jehová. Jin chaʼan, techex a pʼʌtʼesan a cʼuxbiya tiʼ tojlel i aqʼuen a bʌ meta tac chaʼan miʼ bej colel jiñi a cʼuxbiya. Jiñi mi caj i coltañet chaʼan maʼ mejlel ti chʼʌmjaʼ. Maʼañic mi caj i ñajʌyel a chaʼan jiñi. Pero i tejchibal jaxto. Laʼ bej colic jiñi a cʼuxbiya ti Jehová yicʼot tiʼ Yalobil.