1, 2. a) ¿Chuqui miʼ yujtel cheʼ bʌ juntiquil miʼ chaʼlen chʼʌmjaʼ? b) ¿Chuqui mi caj laj qʼuel ti ili estudio?

 ¿AM BA a qʼuele junmojt muʼ bʌ i cajelob ti chʼʌmjaʼ? Cheʼ bʌ jiñi discursante miʼ melbeñob jiñi chaʼpʼejl cʼajtiya ti jumpʼejlob i pusicʼal miʼ jacʼob. Wen tijicñayob jiñi i familiajob yicʼot i yamigojob, jiñi tsaʼ bʌ i chaʼleyob chʼʌmjaʼ wen tijicñayob cheʼ miʼ loqʼuelob ti jaʼ i miʼ jatsʼob i cʼʌb jiñi yaʼ bʌ añob. Miʼ mejlel la cʌl chaʼan ti jujumpʼejl semana yonlel miʼ chaʼleñob chʼʌmjaʼ. Cheʼ bajcheʼ jiñi miʼ sujtelob tiʼ testigojob Jehová tsaʼix bʌ i yʌcʼʌyob i bʌ tiʼ tojlel i tsaʼix bʌ i chaʼleyob chʼʌmjaʼ.

² Mi woli (choncol) a ñaʼtan chʼʌmjaʼ, yom i yʌl chaʼan woli (yʌquel) a sʌclan Jehová, i jiñi miʼ pʌs chaʼan wen ñuc a cʼʌjñibal ti ili jontol bʌ pañimil (mulawil) (Sal. 14:1, 2). Ili estudio tsaʼ chajpʌnti chaʼañet, mach yʌlʌyic mi xcolelet o añix a jabilel. Mi caj a taj uxchajp chucoch yom maʼ melben i yeʼtel (troñel) Jehová. ¿Ixcu mi chʼʌmʌlix lac chaʼan jaʼ? Ili estudio mi caj i coltañonla chaʼan mi lac mulan lac ñumen melben (chaʼliben) i yeʼtel Jehová tiʼ pejtelel ora.

3. ¿Chucoch jiñi i wiñiconbʌla Jehová mi laj cʼuxbin jiñi i sujmlel yicʼot chuqui toj bʌ? (Salmo 119:128, 163).

³ Jehová tiʼ sube i wiñicob: «Cʼuxbinla jiñi i sujmlel» (Zac. 8:19, TNM). Cheʼ jaʼel, Jesús tsiʼ yʌlʌ chaʼan wen ñucʌch i cʼʌjñibal cheʼ mi lac sʌclan chuqui toj bʌ (Mat. 5:6). Ili yom i yʌl chaʼan yomʌch mi lac chaʼlen wersa lac mel (chaʼlen) chuqui toj bʌ, wem bʌ yicʼot sʌc bʌ tiʼ wut Dios. ¿Muʼ baʼ cʼuxbin jiñi i sujmlel yicʼot chuqui toj bʌ? Mi la cʌl chaʼan mucʼʌch. Jin chaʼan maʼ tsʼaʼlen jiñi lot, chuqui mach bʌ weñic yicʼot jiñi jontolil  (pejcan Salmo 119:128, 163). Jiñi muʼ bʌ i chaʼleñob lot lajalob bajcheʼ Satanás, i yum ili pañimil (Juan 8:44; 12:31). Satanás yom i bibʼesʌben i cʼabaʼ Jehová, an i yʌlʌ lot tac tiʼ tojlel Dios cʼʌlʌl yaʼ ti pʌcʼʌbʌl Edén, yaʼi tsiʼ yʌlʌ chaʼan Jehová juntiquil yumʌl muʼ bʌ i bajñel ñaʼtan i bʌ yicʼot chaʼan juntiquilʌch xlot mach bʌ yomic chaʼan mi lac ñusan lac bʌ (Gn. 3:1, 4, 5). Tiʼ mul Satanás yonlel lac piʼʌlob mach weñic chuqui miʼ ñaʼtañob tiʼ tojlel Jehová. Cheʼ bʌ jiñi lac piʼʌlob maʼañic miʼ cʼuxbiñob jiñi i sujmlel, Satanás miʼ mejlel i yʌqʼueñob i mel chuqui mach bʌ weñic (Rom. 1:25-31).

4. ¿Bajcheʼ an i pʌsʌ Jehová chaʼan jiñʌch jiñi i sujm bʌ Dios? (Qʼuele jaʼel jiñi dibujo).

⁴ Jehová jiñʌch jiñi i sujm bʌ Dios i miʼ pʌsben i sujmlel jiñi muʼ bʌ i cʼuxbiñob (Sal. 31:5). Cheʼ bajcheʼ jiñi miʼ jambeñob i wut i miʼ locʼsañob tiʼ lot tac Satanás. Cheʼ jaʼel, miʼ cʌntesañob chaʼan maʼañic miʼ chaʼleñob lot i miʼ melob chuqui toj, i jiñi miʼ yʌqʼueñob i ñʌchʼtʌlel (Pr. 13:5, 6). ¿Am baʼ qʼuele bajcheʼ an i coltayet cʼʌlʌl tsaʼ teche estudio? Tsaʼix a cʌñʌ chaʼan Jehová jiñʌch ñumen wem bʌ chaʼan miʼ tojʼesañet (Sal. 77:13). Jin chaʼan a womʌch a jacʼben ti wen jiñi i mandar tac (Mat. 6:33). Cheʼ jaʼel, a wom a coltan jiñi i sujmlel yicʼot a pʌs chaʼan mach i sujmic muʼ bʌ i yʌl Satanás tiʼ tojlel Dios. ¿Bajcheʼ miʼ mejlel a mel?

5. ¿Chuqui miʼ mejlel a mel chaʼan maʼ coltan jiñi i sujmlel yicʼot chuqui toj bʌ?

⁵ Jiñi muʼ bʌ a mel ti a cuxtʌlel mi caj i pʌsben yambʌlob chaʼan maʼañic maʼ ñop jiñi i lot tac Satanás, chaʼan a wom a coltan jiñi i sujmlel, a wom chaʼan Jehová miʼ yumañet yicʼot a jacʼben i mandar tac. Chaʼan jin maʼ wʌcʼ ti cʌñol jiñi, yom maʼ melben jumpʼejl oración Jehová baqui maʼ suben chaʼan a wom a melben i yeʼtel tiʼ pejtelel ora. Cheʼ jiñi yom maʼ chaʼlen chʼʌmjaʼ chaʼan maʼ pʌsben yambʌlob chaʼan tsaʼix a wʌcʼʌ a bʌ tiʼ tojlel. Tsiquil chaʼan cheʼ maʼ cʼuxbin jiñi i sujmlel yicʼot chuqui toj bʌ jiñʌch muʼ bʌ caj i ñijcañet chaʼan maʼ chaʼlen chʼʌmjaʼ.

6. Cheʼ bajcheʼ miʼ yʌl Salmo 45:4 (TNM), ¿chucoch yomʌch mi laj cʼuxbin Jesucristo?

⁶ ¿Chucoch maʼ cʼuxbin Jesucristo? Mi lac taj i jacʼbal ti Salmo 45:4 TNM, (pejcan). b Jesús miʼ coltan i miʼ pʌs jiñi i sujmlel, jiñi  pecʼlel yicʼot chuqui toj bʌ. Mi mucʼʌch a cʼuxbin jiñi i sujmlel yicʼot chuqui toj bʌ, maʼ cʼuxbin Jesús jaʼel. Ñaʼtancu bajcheʼ tsiʼ pʌsʌ i chʼejlel chaʼan miʼ coltan jiñi i sujmlel yicʼot chuqui toj bʌ (Juan 18:37). Pero ¿bajcheʼ tsiʼ yʌcʼʌ ti cʌñol jiñi pecʼlel?

7. ¿Chuqui muʼ bʌ a ñumen mulan chaʼan i pecʼlel Jesús?

⁷ Jesús tsiʼ pʌsʌ i pecʼlel tiʼ tʼan yicʼot tiʼ melbal. Jumpʼejl ejemplo, tiʼ pejtelel ora tsiʼ yʌqʼue i ñuclel i Tat i maʼañic tiʼ sʌcla chaʼan miʼ qʼuejlel ti ñuc (Mar. 10:17, 18; Juan 5:19). ¿Chuqui maʼ ñaʼtan jatet chaʼan i pecʼlel? ¿Maʼañic ba miʼ ñijcañet chaʼan maʼ ñumen cʼuxbin i Yalobil Dios i maʼ lajin? Mi la cʌl chaʼan mucʼʌch. ¿Chucoch wen an i pecʼlel Jesús? Come Jehová añʌch i pecʼlel, i Jesús miʼ lajin ti toj jiñi i Tat (Sal. 18:35; Heb. 1:3). ¿Mach ba muqʼuic i ñumen lʌcʼtesañet tiʼ tojlel Jesús iliyi?

8. ¿Chucoch mi lac mulan cheʼ Jesús jiñʌch lac Rey?

⁸ Mi lac wen mulan cheʼ Jesús jiñʌch lac Rey come jiñʌch ñumen wem bʌ yumʌl. Jehová tsiʼ cʌntesa i tsiʼ waʼchoco bajcheʼ Rey (Is. 50:4, 5). Cheʼ jaʼel, ñaʼtancu bajcheʼ cʼamel miʼ cʼuxbiñonla Jesús (Juan 13:1). Yomʌch mi lac wen cʼuxbin come jiñʌch lac Rey. Jesús tsiʼ yʌlʌ chaʼan jiñi muʼ bʌ i cʼuxbiñob tiʼ sujm, jiñi i yamigojob, miʼ pʌsbeñob i cʼuxbiya cheʼ miʼ jacʼbeñob i mandar tac (Juan 14:15; 15:14, 15). ¡Jumpʼejlʌch ñuc bʌ majtañʌl cheʼ mi lac mejlel ti sujtel tiʼ yamigo jiñi i Yalobil Jehová!

9. ¿Bajcheʼ lajal i chʼʌmjaʼ Jesús yicʼot i chaʼan jiñi xcʌntʼañob?

⁹ Jesús tiʼ sube jiñi xcʌntʼañob i chaʼan chaʼan yomʌch miʼ chaʼleñob chʼʌmjaʼ (Mat. 28:19, 20). Cheʼʌch tsiʼ mele jaʼel. Tsʼitaʼ yʌñʌlʌch bajcheʼ tsiʼ chʼʌmʌ jaʼ Jesús yicʼot bajcheʼ miʼ chaʼleñob chʼʌmjaʼ jiñi xcʌntʼañob i chaʼan, pero añʌch chuqui lajal bʌ (qʼuele jiñi recuadro « ¿Chucoch mach lajalic i chʼʌmjaʼ Jesús yicʼot i chaʼan jiñi xcʌntʼañob i chaʼan?»). Jumpʼejl ejemplo, cheʼ bʌ Jesús tsiʼ chʼʌmʌ jaʼ tsaʼ caji i melben i yeʼtel i Tat (Heb. 10:7). Lʌcʼʌ cheʼʌch miʼ melob jiñi xcʌntʼañob i chaʼan. Cheʼ bʌ miʼ chʼʌmob jaʼ miʼ jamʌ pʌsob chaʼan tsaʼix i yʌcʼʌyob i bʌ tiʼ tojlel Jehová i chaʼan jiñi ñumen ñuc bʌ tiʼ cuxtʌlelob jiñʌch cheʼ bʌ miʼ melbeñob i yeʼtel, i mach i chaʼañobic. Cheʼ miʼ melob iliyi miʼ lajiñob jiñi i Maestro.

10. ¿Chucoch yom maʼ cʼuxbin Jesús, i chuqui yom miʼ ñijcañet a mel jiñi?

¹⁰ Maʼ ñop chaʼan Jesús jiñʌch cojach bʌ i Yalobil Jehová i jiñʌch tsiʼ waʼchoco bajcheʼ Rey chaʼan miʼ chaʼlen yumʌntel. A wujil chaʼan Jesús an i pecʼlel i miʼ lajin i melbal i Tat. Tsaʼix a qʼuele chaʼan tsiʼ weʼsa jiñi wiʼñaloʼ bʌ, tsiʼ ñuqʼuesʌbe i pusicʼal jiñi chʼijyemoʼ bʌ yicʼot tiʼ tsʼʌca jiñi cʼamoʼ bʌ (Mat. 14:14-21). An a qʼuele jaʼel chaʼan jin an tiʼ wenta jiñi congregación ili ora (Mat. 23:10). A wujil chaʼan cabʌl chuqui utsʼatax bʌ mi caj i mel ti talto bʌ qʼuin come jiñʌch waʼchocobil bʌ bajcheʼ Rey tiʼ Yumʌntel Dios. ¿Bajcheʼ miʼ mejlel a pʌs chaʼan mucʼʌch a cʼuxbin? Jiñʌch cheʼ maʼ lajin (Juan 14:21). Jin chaʼan, junchajp yom bʌ maʼ mel jiñʌch cheʼ maʼ wʌcʼ a bʌ ti Jehová yicʼot maʼ chʼʌmjaʼ.

11. ¿Chuqui jiñi ñumen ñuc bʌ yom bʌ miʼ ñijcañet chaʼan maʼ chaʼlen chʼʌmjaʼ, i chucoch?

¹¹ ¿Chuqui jiñi ñumen ñuc bʌ yom bʌ miʼ ñijcañet chaʼan maʼ chaʼlen chʼʌmjaʼ? Mi lac taj ti jiñi tsaʼ bʌ i yʌlʌ Jesús chaʼan baqui bʌ jiñi ñumen ñuc bʌ mandar tsaʼ bʌ i yʌcʼʌ Dios. Tsiʼ yʌlʌ: «Cʼuxbin a Dios Jehová tiʼ pejtelel a pusicʼal, tiʼ pejtelel a cuxtʌlel, tiʼ pejtelel a ñaʼtʌbal yicʼot tiʼ pejtelel a pʼʌtʌlel» (Mar. 12:30). ¿Muʼ ba i pʌs ili texto chaʼan jiñʌch muʼ bʌ a wubin tiʼ tojlel Dios?

12. ¿Chucoch maʼ cʼuxbin Jehová? (Qʼuele jaʼel jiñi foto tac).

 ¹² Cabʌl jax chucoch yom mi laj cʼuxbin Jehová. Jumpʼejl ejemplo, tsaʼix a cʌñʌ chaʼan jiñʌch muʼ bʌ i yʌqʼueñonla laj cuxtʌlel yicʼot «pejtelel wem bʌ yicʼot toj bʌ majtañʌl» (Sal. 36:9; Sant. 1:17). Tilem ti Jehová pejtelel chuqui wem bʌ am bʌ a chaʼan come miʼ tʼox chuqui an i chaʼan yicʼot miʼ wen cʼuxbiñonla.

13. ¿Chucoch jiñi i tojol laj coltʌntel jiñʌch wen utsʼatax bʌ lac majtan?

¹³ Jiñi i tojol laj coltʌntel jumpʼejlʌch ñuc bʌ lac majtan tilem bʌ ti Jehová. ¿Chucoch mi la cʌl jiñi? Laʼcu lac ñaʼtan bajcheʼ cʼamel miʼ cʼuxbiñob i bʌ Jehová yicʼot i Yalobil. Jesús tsiʼ yʌlʌ: «Jiñi Tatʌl miʼ cʼuxbiñon» yicʼot «mij cʼuxbin jiñi Tatʌl» (Juan 10:17; 14:31). Cheʼ bʌ tsaʼ ñumi majlel jiñi jabil tac tsaʼto i ñumen cʼuxbiyob i bʌ (Pr. 8:22, 23, 30). Ñaʼtancu bajcheʼ cʼamel i cʼuxel tsiʼ yubi Jehová cheʼ bʌ tsiʼ yila wocol jiñi i Yalobil yicʼot tsaʼ chʌmi. Jehová miʼ wen cʼuxbiñonla, jin chaʼan tsiʼ yʌcʼʌ jiñi cojach bʌ i Yalobil chaʼan jatet yicʼot yambʌlob miʼ tajob i cuxtʌlel tiʼ pejtelel ora (Juan 3:16; Gál. 2:20). ¿Am ba yambʌ ñumen ñuc bʌ muʼ bʌ i ñijcañonla chaʼan mi laj cʼuxbin Dios?

14. ¿Chuqui jiñi ñumen wem bʌ mejl bʌ a mel ti a cuxtʌlel?

¹⁴ Cheʼ bʌ tsaʼ caji a ñumen cʌn Jehová tsaʼ caji ti colel majlel jiñi a cʼuxbiya tiʼ tojlel. A  womʌch chaʼan lʌcʼʌl maʼ wajñel tiʼ tojlel tiʼ pejtelel ora i mucʼʌch a mejlel. Miʼ mejlel a tijicñesʌben i pusicʼal ti a tʼan yicʼot ti a melbal. Cheʼto jaʼel, Jehová miʼ subeñet chaʼan maʼ mel jiñi (Pr. 23:15, 16). Muʼ bʌ caj a mel ti a cuxtʌlel mi caj i pʌs mi mucʼʌch a cʼuxbin Jehová tiʼ sujm (1 Juan 5:3). Jiñi i melbentel i yeʼtel Jehová jiñʌch ñumen wem bʌ miʼ mejlel a mel.

15. ¿Bajcheʼ miʼ mejlel a pʌs a cʼuxbiya tiʼ tojlel Jehová?

¹⁵ ¿Bajcheʼ miʼ mejlel a pʌs a cʼuxbiya tiʼ tojlel Jehová? Ñaxam bʌ, melben jumpʼejl oración baqui maʼ suben chaʼan maʼ wʌcʼ a bʌ tiʼ tojlel, jiñi i sujm bʌ Dios (Sal. 40:8). Cheʼ jiñi, yom maʼ chaʼlen chʼʌmjaʼ chaʼan miʼ tsictiyel jiñi tsaʼix bʌ a sube. Cheʼ bajcheʼ tsaʼix laj qʼuele wen tijicña mi caj a wubin cheʼ bʌ maʼ chaʼlen chʼʌmjaʼ come ti jimbʌ ora miʼ yoque qʼuextʌyel a cuxtʌlel. Mach cuxuletix chaʼan maʼ mel chuqui a wom, chaʼañʌch maʼ mel chuqui yom Jehová (Rom. 14:8; 1 Ped. 4:1, 2). Wen ñucʌch jiñi tsaʼ bʌ a mele come miʼ yʌqʼueñet chaʼan maʼ ñusan a bʌ ti a cuxtʌlel. Laʼ laj qʼuel chucoch.

16. Cheʼ bajcheʼ miʼ yʌl Salmo 41:12, ¿chuqui mi caj i yʌqʼuen Jehová jiñi muʼ bʌ i cʼʌñob i cuxtʌlel chaʼan miʼ melbeñob i yeʼtel?

¹⁶ Jehová jiñʌch ñumen yujil bʌ tʼoxol chuqui an i chaʼan. Mach yʌlʌyic chuqui maʼ wʌqʼuen, ñumento mi caj i yʌqʼueñet (Mar. 10:29, 30). Anquese lʌcʼʌlix i jilibal ili pañimil, mi caj i yʌqʼueñet wen utsʼatax bʌ a cuxtʌlel yicʼot wen tijicña mi caj a ñusan, i tejchibal jaxto iliyi. Muʼ bʌ a tech cheʼ maʼ chʼʌmjaʼ miʼ mejlel ti jalʼan tiʼ pejtelel ora, miʼ mejlel a chʌn melben i yeʼtel Jehová. Cheʼ bʌ miʼ ñumel majlel ora, mi caj laʼ ñumen cʼuxbin laʼ bʌ, i maʼ mejlel ti chumtʌl tiʼ pejtelel ora cheʼ bajcheʼ Jehová (pejcan Salmo 41:12).

17. ¿Chuqui jiñi maʼañic bʌ i chaʼan Jehová muʼ bʌ i mejlel a wʌqʼuen?

¹⁷ Cheʼ bʌ maʼ wʌcʼ a bʌ ti Jehová i maʼ chaʼlen chʼʌmjaʼ an chuqui wen ñuc bʌ miʼ mejlel a wʌqʼuen. Jehová an i yʌqʼueyet pejtelel chuqui wem bʌ an a chaʼan yicʼot chuqui utsʼatax bʌ ñusʌbil a chaʼan. Miʼ mejlel a wʌqʼuen jiñi i yum panchan yicʼot pañimil chuqui maʼañic bʌ i chaʼan: A xucʼtʌlel yicʼot cheʼ maʼ melben i  yeʼtel tiʼ pejtelel a pusicʼal (Job 1:8; 41:11; Pr. 27:11). Jiñʌch ñumen wem bʌ miʼ mejlel a mel ti a cuxtʌlel. Tiʼ sujm, jiñi a cʼuxbiya tiʼ tojlel Jehová jiñʌch muʼ bʌ caj i ñijcañet chaʼan maʼ chaʼlen chʼʌmjaʼ.

18. ¿Baqui tac bʌ cʼajtiya maʼ mejlel a melben a bʌ?

¹⁸ Cheʼ bajcheʼ tsaʼix laj qʼuele, ¿muʼ ba caj a chʼʌmjaʼ? Jatet jach miʼ mejlel a jacʼ ili cʼajtiya. Junchajp muʼ bʌ i mejlel i coltañet jiñʌch cheʼ maʼ cʼajtiben a bʌ iliyi: «¿Chajpʌbiloñix ba?» (Hech. 8:36). Cʼajtesan jiñi uxchajp chucoch yom maʼ chaʼlen chʼʌmjaʼ. Ñaxam bʌ, a cʼuxbiya tiʼ sujmlel yicʼot ti chuqui toj bʌ. Cʼajtiben a bʌ: «¿Com ba j qʼuel cheʼ bʌ ti lac pejtelel mi la cʌl chuqui i sujm bʌ yicʼot mi lac mel chuqui wem bʌ?». I chaʼchajplel, a cʼuxbiya tiʼ tojlel Jesucristo. Cʼajtiben a bʌ: «¿Com ba chaʼan jiñi i Yalobil Dios miʼ sujtel tic Rey i mic lajin?». I yuxchajplel, i ñumen ñuc bʌ i cʼʌjñibal, jiñi a cʼuxbiya tiʼ tojlel Jehová. Cʼajtiben a bʌ: «¿Com ba c melben i yeʼtel Jehová yicʼot c tijicñesʌben i pusicʼal?». ¿Chucoch maʼañic maʼ chaʼlen chʼʌmjaʼ mi weñʌch bajcheʼ tsaʼ jacʼʌ ili cʼajtiya tac? ¿Chuqui miʼ mʌctañet? (Hech. 16:33).

19. ¿Chucoch mach yomic maʼ wen ñaʼtan mi yomʌch maʼ chaʼlen chʼʌmjaʼ? Acʼʌ jumpʼejl ejemplo (Juan 4:34).

¹⁹ Mi maxto a wujilic mi yom maʼ chaʼlen chʼʌmjaʼ, ñaʼtan jiñi ejemplo tsaʼ bʌ i yʌlʌ Jesús (pejcan Juan 4:34). Jesús tsiʼ yʌlʌ chaʼan cheʼ bʌ miʼ melben i yeʼtel i Tat lajalʌch bajcheʼ i bʌl i ñʌcʼ. ¿Chucoch? Come jiñi bʌlñʌcʼʌl miʼ coltañonla. Jesús yujil chaʼan pejtelel muʼ bʌ i cʼajtibeñonla Jehová chaʼañʌch lac wenlel, Jehová maʼañic miʼ subeñonla lac mel muʼ bʌ i yʌcʼonla ti wocol. Dios yom chaʼan maʼ chaʼlen chʼʌmjaʼ (Hech. 2:38). Jin chaʼan, miʼ mejlel a ñop chaʼan a wenlelʌch cheʼ maʼ jacʼ iliyi. Cheʼ muqʼuic a wʌqʼuentel ñumen sumuc bʌ bʌlñʌcʼʌl, ¿mach ba mucʼʌch caj a cʼux? Jin chaʼan, mach a cʌlʌx ñaʼtan mi yomʌch maʼ chaʼlen chʼʌmjaʼ o maʼañic.

20. ¿Chuqui mi caj laj qʼuel ti yambʌ estudio?

²⁰ ¿Chucoch an maʼañic bʌ miʼ chʼʌmob jaʼ? Tajol maxto chajpʌbilobic miʼ yubiñob. I sujmʌch, cheʼ maʼ wʌcʼ a bʌ ti Jehová yicʼot maʼ chaʼlen chʼʌmjaʼ jiñʌch ñumen ñuc bʌ mejl bʌ a mel. Jin chaʼan, aqʼuen i yorajlel chaʼan maʼ wen ñaʼtan yicʼot chaʼlen wersa chaʼan chajpʌbiletʌchix. Pero mi a wom a chaʼlen chʼʌmjaʼ, ¿chuqui mi caj i coltañet chaʼan chajpʌbiletix chaʼan maʼ mel jiñi? Mi caj laj qʼuel ti yambʌ estudio.