¿Chucoch jiñi wiñic tsaʼ bʌ subenti ti «Jeyaj» tsiʼ yʌlʌ chaʼan mi caj i sʌt i chubʌʼan mi tsaʼ ñujpuñi yicʼot Rut? (Rt. 4:1, 6).

Ti wajali, mi juntiquil wiñic ñujpuñem bʌ miʼ chʌmel (sajtel) i maʼañic i yalobil, miʼ loqʼuel ili cʼajtiya tac. ¿Majqui mi caj i cʌytʌl yicʼot jiñi i lum? ¿Muʼ ba caj i sajtel i cʼabaʼ jiñi i familia? Ili miʼ tsictesʌntel ti jiñi Mandar tsaʼ bʌ aqʼuenti Moisés.

Mi juntiquil wiñic miʼ chʌmel o miʼ chon i lum tiʼ caj pʼumpʼun, jiñi i yeran o i familia miʼ mejlel i chaʼ mʌn jiñi lum. Cheʼ bajcheʼ jiñi bej i chaʼañʌch i familia (Lv. 25:23-28; Nm. 27:8-11).

¿Chuqui miʼ mejlel chaʼan maʼañic miʼ sajtel i cʼabaʼ i familia jiñi tsaʼ bʌ chʌmi? Jiñi i yeran miʼ ñujpuñel yicʼot jiñi xʼixic tsaʼ bʌ chʌmi i ñoxiʼal chaʼan miʼ yʌqʼuen juntiquil i yalobil i maʼañic miʼ sajtel i cʼabaʼ jiñi tsaʼ bʌ chʌmi yicʼot maʼañic miʼ sʌt jaʼel jiñi i lum. Cheʼ bajcheʼ iliyi, mach wocolic miʼ ñusan jiñi tsaʼ bʌ chʌmi i ñoxiʼal (Dt. 25:5-7; Mat. 22:23-28). Cheʼʌch tsaʼ ujti tiʼ tojlel Rut.

Laʼcu lac ñaʼtan tsaʼ bʌ i ñusa Noemí. Ñujpuñem yicʼot Elimélec. Pero cheʼ bʌ tsaʼ chʌmi Elimélec yicʼot jiñi chaʼtiquil i yalobil, maʼañix majqui mi caj i mejlel i cʌntan (Rt. 1:1-5). Cheʼ bʌ Noemí tsaʼ chaʼ sujti ti Judá, tiʼ sube jiñi i yʌʼlib i cʼabaʼ Rut chaʼan miʼ suben Boaz, i familia bʌ Elimélec, chaʼan miʼ chaʼ mʌn jiñi lum (Rt. 2:1, 19, 20; 3:1-4). Pero Boaz yujil chaʼan an yambʌ i familia, i jiñʌch yom bʌ miʼ mʌn jiñi lum (Rt. 3:9, 12, 13). Jiñi Biblia miʼ yʌl chaʼan cʌmbil bajcheʼ «Jeyaj».

Ti ñaxan, jiñi wiñic tsiʼ yʌlʌ chaʼan mucʼʌch i mʌn jiñi lum (Rt. 4:1-4). Yujilʌch chaʼan wen lets mi caj i loqʼuel i tojol, pero yujil jaʼel chaʼan Noemí añix i jabilel i mach mejlix i yʌcʼ i yalobil muʼ bʌ i mejlel ti cʌytʌl yicʼot jiñi i lum Elimélec. Pejtelel jiñi lum mi caj i cʌytʌl yicʼot jiñi wiñic. Poj weñʌch yilal.

Pero cheʼ bʌ tsiʼ qʼuele chaʼan yom miʼ ñujpuñel yicʼot Rut, tsiʼ yʌlʌ chaʼan maʼañix miʼ mʌn jiñi lum. Tsiʼ yʌlʌ: «Mach mejlic c mʌn joñon ame sajtic lamital c chubʌʼan» (Rt. 4:5, 6). ¿Chucoch tsiʼ chaʼ choco i bʌ tiʼ pat?

Mi jiñi wiñic o yambʌ i familia miʼ ñujpuñel yicʼot Rut i miʼ tilel juntiquil i yalobil, jiñi i yalobil jiñʌch mi caj i cʌytʌl yicʼot i lum Elimélec. ¿Bajcheʼ miʼ mejlel i sʌt i chubʌʼan jiñi wiñic? Jiñi Biblia maʼañic miʼ yʌl, pero laʼ lac ñop laj qʼuel chucoch.

• Ñaxam bʌ, tajol tsiʼ ñaʼta chaʼan mucʼ jach caj i sʌt i taqʼuin come mach i chaʼañic miʼ cajel jiñi lum, i chaʼañʌch miʼ cajel jiñi i yalobil Rut.

• I chaʼchajplel, yom miʼ mʌcʼlan Noemí yicʼot Rut.

• I yuxchajplel, mi jiñi wiñic yicʼot Rut añob yambʌ i yalobilob, jiñi herencia mi caj i tʼoxbeñob i bʌ yicʼot i yalobilob jiñi wiñic.

• I chʌnchajplel, mi jiñi wiñic maʼañic yambʌ i yalobil, jiñi i yalobil muʼ bʌ i tilel yicʼot Rut jiñʌch mi caj i cʌlel yicʼot jiñi lum i miʼ cʌntʌben i cʼabaʼ Elimélec, mach i chaʼañic jiñi wiñic. Tsiʼ bʌcʼña chaʼan cheʼ miʼ yujtel bajcheʼ jiñi, jin chaʼan maʼañic tsiʼ colta Noemí. Jiñi wiñic tiʼ sube Boaz chaʼan miʼ mʌn jiñi lum. Boaz tsaʼʌch i jacʼʌ. ¿Chucoch? Tsiʼ yʌlʌ: «Chaʼan mic techben i yalobil tiʼ cʼabaʼ jini chʌmen bʌ» (Rt. 4:10).

Tsiquil chaʼan jiñi wiñic tsiʼ bajñel ñaʼta i bʌ chaʼan maʼañic miʼ sajtel i cʼabaʼ yicʼot jiñi herencia. Pero maʼañic i cʼʌjñibal jiñi tsaʼ bʌ i mele come tsaʼ ñajʌtesʌnti jiñi i cʼabaʼ. Cheʼ jaʼel, tiʼ sʌtʌ jiñi ñuc bʌ majtañʌl tsaʼ bʌ i taja Boaz: Tsaʼ otsʌbenti i cʼabaʼ tiʼ ñojteʼelob jiñi Mesías, Jesucristo. Mach weñic chuqui tsaʼ ujti tiʼ tojlel jiñi wiñic tiʼ caj tsaʼ jach i bajñel ñaʼta i bʌ yicʼot chaʼan maʼañic tsiʼ colta jiñi i cʼʌjñibal bʌ i chaʼan (Mat. 1:5; Luc. 3:23, 32).