1, 2. a) ¿Chuqui tiʼ sube Jesús jiñi xcʌntʼañob i chaʼan ti jiñi cojix bʌ acʼʌlel wʌʼan ti Pañimil? (Qʼuele jiñi dibujo). b) ¿Chucoch ñuc i cʼʌjñibal cheʼ la cujil chucoch mi lac chaʼlen subtʼan? c) ¿Chuqui mi caj laj qʼuel ti ili temaj?

TI JIÑI cojix bʌ acʼʌlel wʌʼan Jesús ti Pañimil, tsiʼ wen chaʼle tʼan yicʼot i yapóstolob. Tiʼ subeyob chaʼan miʼ wen cʼuxbiñob. Cheʼ bajcheʼ tsaʼ laj qʼuele ti yambʌ temaj, tsiʼ laja i bʌ bajcheʼ i yʌqʼuil tsʼusub. Jesús tiʼ sube jiñi xcʌntʼañob i chaʼan chaʼan miʼ wen chaʼleñob wut. Ti griego ili tʼan tac yom i yʌl chaʼan Jesús tiʼ subeyob chaʼan miʼ chʌn chaʼleñob wut, yom i yʌl chaʼan miʼ chʌn subob jiñi wen tʼan chaʼan Yumʌntel (Jn. 15:8).

² Pero Jesús mach cojach tiʼ subeyob chuqui yom miʼ melob (chaʼleñob), tiʼ subeyob jaʼel chucoch yom miʼ melob. Tiʼ tsictesʌbeyob chucoch yom miʼ chʌn chaʼleñob subtʼan. ¿Chucoch ñucʌch i cʼʌjñibal cheʼ la cujil jaʼel iliyi? Come mi caj i ñijcan lac pusicʼal chaʼan mi lac bej sub jiñi wen tʼan «chaʼan miʼ yubintel ti pejtelel pañimil» (Mt. 24:13, 14). Jin chaʼan, mi caj laj qʼuel chʌnchajp muʼ bʌ i subeñonla jiñi Biblia chaʼan chucoch yom mi lac chʌn chaʼlen subtʼan. Cheʼ jaʼel, mi caj lac taj ti tʼan chʌnchajp chuqui miʼ yʌqʼueñonla Jehová muʼ bʌ i coltañonla chaʼan mi lac bej chaʼlen wut.

3. a) Cheʼ bajcheʼ miʼ yʌl Juan 15:8, ¿chucoch yom mi lac chaʼlen subtʼan? b) ¿Chuqui yom i yʌl jiñi tsʼusub tsaʼ bʌ i yʌlʌ tiʼ lajiya jiñi Jesús, i chucoch weñʌch miʼ cʼʌjñel ti jiñi lajiya?

³ Jiñi ñumen ñuc bʌ i cʼʌjñibal chucoch mi lac chaʼlen subtʼan chaʼañʌch mi la cʌqʼuen i ñuclel Jehová yicʼot mi lac sʌqʼuesʌben i cʼabaʼ (pejcan Juan 15:1, 8). Ila mi laj qʼuel chaʼan Jesús tsiʼ laji i Tat bajcheʼ juntiquil wiñic muʼ bʌ i pʌcʼ tsʼusubil. Jesús tsiʼ laji i bʌ bajcheʼ i yʌqʼuil tsʼusub, i tsiʼ yʌlʌ chaʼan jiñi xcʌntʼañob i chaʼan lajalobʌch bajcheʼ jiñi i cʼʌb tac (Jn. 15:5). Jin chaʼan, jiñi tsʼusub yom i yʌl jiñi i wut muʼ bʌ i yʌcʼob jiñi xcʌntʼañob i chaʼan Jesús, o jiñi eʼtel chaʼan subtʼan muʼ bʌ i melob. Jesús tiʼ sube jiñi apóstolob i chaʼan: «Miʼ caj ti pʌstʌl i ñuclel c Tat, cheʼ mi laʼ wʌcʼ cabʌl laʼ wut». Cheʼ mi lac chaʼlen wersa chaʼan wen mi lac sub jiñi wen tʼan chaʼan Yumʌntel, mucʼʌch la cʌqʼuen i ñuclel Jehová, lajal bajcheʼ jiñi xpʌcʼ tsʼusubil miʼ qʼuejlel ti ñuc cheʼ bʌ jiñi i tsʼusubil miʼ yʌcʼ wen tac bʌ i wut (Mt. 25:20-23).

4. a) ¿Bajcheʼ miʼ mejlel lac sʌqʼuesʌben i cʼabaʼ Dios? b) ¿Bajcheʼ yubil maʼ wubin cheʼ aqʼuebilet jiñi ñuc bʌ eʼtel chaʼan maʼ sʌqʼuesʌben i cʼabaʼ Dios?

⁴ Cheʼ bajcheʼ tsaʼix laj qʼuele, cheʼ mi lac chaʼlen subtʼan mi lac sʌqʼuesʌben i cʼabaʼ Dios. ¿Bajcheʼ? Isujm, maʼañic miʼ mejlel lac ñumen sujtesan ti chʼujul, come junyajl chʼujulix. Laʼ laj qʼuel tsaʼ bʌ i yʌlʌ jiñi xʼaltʼan Isaías: «Jehová jiñi ñumen ñuc bʌ yumʌl... jiñʌch Jiñi yom bʌ mi laʼ qʼuel bajcheʼ chʼujul» (Is. 8:13, TNM). Jin chaʼan, junchajp bajcheʼ mi lac sʌqʼuesʌben i cʼabaʼ Dios jin cheʼ mi laj qʼuel bajcheʼ jiñi ñumen ñuc bʌ, mach bʌ lajalic bajcheʼ yan tac bʌ cʼabaʼʌl, i mi laj coltan i cʌn jiñi quixtañujob chaʼan chʼujulʌch (Mt. 6:9). Jumpʼejl ejemplo, cheʼ mi lac sub jiñi wen tac bʌ i melbal Jehová yicʼot chuqui albil i chaʼan tiʼ tojlel jiñi wiñicob xʼixicob (quixtañujob), mi laj coltʌben i cʼabaʼ tiʼ lot jiñi Satanás (Gn. 3:1-5). Cheʼ jaʼel, mi lac sʌqʼuesʌben i cʼabaʼ cheʼ mi laj coltan i cʌn jiñi quixtañujob chaʼan cojach Jehová yom miʼ ‹sujbel i ñuclel yicʼot i cʼuxbintel yicʼot i pʼʌtʌlel› (Ap. 4:11). Rune, añix bʌ 16 jab i cajel bajcheʼ precursor, miʼ yʌl: «Mi cʌqʼuen wocolix i yʌlʌ tsaʼ bʌ i mele (pʌtʌ) panchan yicʼot pañimil cheʼ tsiʼ yʌcʼʌyon ti ochel bajcheʼ i Testigo. Miʼ ñijcan c pusicʼal chaʼan mic chʌn chaʼlen subtʼan».

5. a) ¿Chucoch yom mi lac chaʼlen subtʼan miʼ yʌl yaʼ ti Juan 15:9, 10? b) ¿Bajcheʼ tsiʼ pʌsʌ Jesús chaʼan yomʌch mi laj cuch wocol?

⁵ (Pejcan Juan 15:9, 10). Yambʌ i sujmlel chucoch mi lac chaʼlen subtʼan jiñʌch chaʼan mi lac wen cʼuxbin Jehová yicʼot Jesús (Mr. 12:30; Jn. 14:15). Jesús tiʼ sube jiñi xcʌntʼañob i chaʼan chaʼan yom miʼ chʌn ajñelob tiʼ cʼuxbiya. ¿Chucoch? Come yomʌch mi laj cuch wocol ti jujumpʼejl jab chaʼan tsiquil isujm bʌ xñoptʼañonla. Jesús mach junsujtel jach tsiʼ cʼʌñʌ jiñi tʼan chʌn ajñel yaʼ ti Juan 15:4-10, i cheʼʌch tsiʼ pʌsʌ chaʼan ñucʌch i cʼʌjñibal cheʼ mi laj cuch wocol.

6. ¿Bajcheʼ mi lac pʌs chaʼan la com chʌn ajñel tiʼ cʼuxbiya Cristo?

⁶ ¿Bajcheʼ mi lac pʌs chaʼan la com chʌn ajñel tiʼ cʼuxbiya Cristo yicʼot chʌn utsʼat miʼ qʼuelonla? Jiñʌch cheʼ mi laj qʼuelben i mandar. Yom i yʌl chaʼan yom mi lac jacʼben i tʼan Jesús. Tiʼ sujm, Jesús maʼañic miʼ cʼajtibeñonla mach bʌ añic miʼ mel, come tsiʼ yʌlʌ: «Cheʼ jaʼel tsac jacʼbe i mandar c Tat. Wolic chʌn cʼuxbintel tic Tat» (Jn. 15:10). Jesús tsaʼʌch i pʌsʌ bajcheʼ yom mi lac mel (Jn. 13:15).

7. ¿Bajcheʼ miʼ taj i bʌ jiñi jacʼ tʼan yicʼot jiñi cʼuxbiya?

⁷ Jesús tsiʼ pʌsʌ chaʼan jiñi jacʼ tʼan miʼ taj i bʌ yicʼot jiñi cʼuxbiya cheʼ bʌ tiʼ sube jiñi apóstolob: «Jini muʼ bʌ i cʌn c mandar,  muʼ bʌ i jacʼ, jiñʌch muʼ bʌ i cʼuxbiñon» (Jn. 14:21). Cheʼ jaʼel, cheʼ mi lac jacʼ jiñi i mandar Jesús chaʼan mi lac majlel ti subtʼan, mi lac pʌs laj cʼuxbiya ti Dios. ¿Chucoch? Come muʼ bʌ i subeñonla lac mel jiñi Cristo cheʼʌch bajcheʼ miʼ ñaʼtan i Tat (Mt. 17:5; Jn. 8:28). Jehová yicʼot Jesús mucʼʌch i chʌn cʼuxbiñonla jaʼel cheʼ bʌ miʼ qʼuel jiñi laj cʼuxbiya.

8, 9. a) ¿Baqui bʌ yambʌ i sujmlel cheʼ mi lac chaʼlen subtʼan? b) ¿Chucoch miʼ ñijcan lac pusicʼal chaʼan mi lac bej chaʼlen subtʼan muʼ bʌ i yʌl Ezequiel 3:18, 19 yicʼot 18:23?

⁸ I yuxchajplel chucoch mi lac chʌn chaʼlen subtʼan, chaʼañʌch la com lac wʌn subeñob i qʼuiñilel Jehová. Jiñi Biblia miʼ yʌl chaʼan Noé tiʼ «subu i sujmlel» (pejcan 2 Pedro 2:5). Wen tsiquil chaʼan Noé tiʼ tsictesa chaʼan woli (choncol) i lʌcʼtiyel i jilibal pañimil. ¿Chucoch mi la cʌl iliyi? Laʼ laj qʼuel tsaʼ bʌ i yʌlʌ Jesús: «Cheʼ maxto anic tsaʼ tili butʼjaʼ, tsiʼ chaʼleyob weʼel, tsiʼ chaʼleyob uchʼel, tsiʼ chaʼleyob ñujpuñijel, tsiʼ sijiyob i yalobil, jinto ti jini qʼuin cheʼ bʌ tsaʼ ochi Noé ti barco. Maʼanic tsiʼ ñaʼtayob mi an chuqui miʼ caj ti ujtel jinto tsaʼ tili butʼjaʼ. Tsiʼ luʼ jisayob. Cheʼ jaʼel miʼ caj ti ujtel cheʼ miʼ tilel i Yalobil Winic» (Mt. 24:38, 39). Anquese jiñi quixtañujob maʼañic tsiʼ jacʼʌyob, Noé tsiʼ chʌn subu jiñi tʼan tsaʼ bʌ subenti.

⁹ Ili ora, mi lac sub jiñi wen tʼan chaʼan Yumʌntel chaʼan jiñi quixtañujob miʼ cʌñob chuqui yom Dios ti lac tojlel. Cheʼ bajcheʼ Jehová, la com chaʼan jiñi quixtañujob miʼ yubiñob jiñi wen tʼan i cuxul miʼ yajñelob (Ez. 18:23). Cheʼ jaʼel, cheʼ mi lac chaʼlen subtʼan ti jujumpʼejl otot yicʼot baqui an cabʌl lac piʼʌlob, ñumen cabʌl majqui mi lac tsictesʌbeñob chaʼan jiñi i Yumʌntel Dios mi caj i jisan ili jontol bʌ pañimil (mulawil) (Ez. 3:18, 19; Dn. 2:44; Ap. 14:6, 7).

10. a) ¿Chucoch yom mi lac chaʼlen subtʼan miʼ yʌl Mateo 22:39? b) Alʌ bajcheʼ tsiʼ coltayob juntiquil xcʌnta cárcel ti Filipos jiñi Pablo yicʼot Silas.

¹⁰ Laʼ laj qʼuel yambʌ i sujmlel chucoch yom mi lac bej chaʼlen subtʼan: Come mi laj cʼuxbin jiñi quixtañujob (Mt. 22:39). La cujil chaʼan jiñi quixtañujob miʼ mejlel i qʼuextañob i melbal cheʼ an chuqui miʼ yujtel tiʼ tojlelob. Jiñi laj cʼuxbiya miʼ ñijcañonla chaʼan mi lac bej chaʼlen subtʼan. Laʼ lac ñaʼtan tsaʼ bʌ ujti tiʼ tojlel Pablo yicʼot Silas yaʼ ti Filipos. Jiñi i contrajob tsiʼ yotsayob ti cárcel. Pero cheʼ tiʼ yojlil acʼʌlel tsaʼ ñumi tsʌts bʌ yujquel i tsaʼ luʼ jajmi i puertajlel jiñi cárcel. Jiñi xcʌnta cárcel tsiʼ ñaʼta chaʼan jiñi yaʼ bʌ ñupʼulob tsaʼ putsʼiyob, jin chaʼan colelix i tsʌnsan i bʌ. Pero Pablo tiʼ sube chaʼan maʼañic miʼ mel. Cheʼ jiñi, jiñi xcʌnta cárcel tsiʼ cʼajti: «¿Chuqui yom mic chaʼlen chaʼan mij coltʌntel?». Tsiʼ jacʼbeyob: «Ñopo lac Yum Jesucristo. Cheʼ jini mi caj a coltʌntel» (Hch. 16:25-34).

11, 12. a) ¿Chuqui miʼ cʌntesañonla chaʼan lac subtʼan jiñi tsaʼ bʌ ujti tiʼ tojlel xcʌnta cárcel? b) ¿Chucoch la comʌch lac chʌn chaʼlen subtʼan?

¹¹ ¿Chuqui miʼ cʌntesañonla chaʼan lac subtʼan ili relato? Mi laj qʼuel chaʼan jiñi xcʌnta cárcel tsiʼ qʼuexta i melbal i tsiʼ cʼajti  i coltʌntel cheʼ tsaʼ ñumi jiñi yujquel. Cheʼʌch jaʼel ili ora, tajol an quixtañujob maʼañic bʌ miʼ ñʌchʼtañob jiñi wen tʼan ti ñaxan, pero cheʼ an chuqui miʼ yujtel tiʼ tojlelob miʼ qʼuextañob i melbal i miʼ cʼajtiñob i coltʌntel. Jumpʼejl ejemplo, an muʼ bʌ i wen ubiñob i chʼijiyemlel cheʼ bʌ miʼ sʌtob i yeʼtel (troñel), miʼ jejmelob i ñujpuñel, miʼ tajbentelob tsʌts bʌ cʼamʌjel o an majqui miʼ chʌmel (sajtel) i chaʼañob. Cheʼ miʼ yujtel tac iliyi, an muʼ bʌ i tech i cʼajtibeñob i bʌ: ¿Chuqui i sujmlel laj cuxtʌlel? Tajol an muʼto bʌ i cʼajtibeñob i bʌ bajcheʼ jiñi xcʌnta cárcel: «¿Chuqui yom mic chaʼlen chaʼan mij coltʌntel?». Cheʼ bʌ mi lac tajob ti subtʼan, tajol mi caj i mulañob i ñʌchʼtan jiñi wen tʼan muʼ bʌ i yʌqʼueñob i pijtaya.

¹² Jin chaʼan, mi mucʼʌch lac bej chaʼlen subtʼan ti lac xucʼtʌlel, mi caj i mejlel lac ñuqʼuesʌbeñob i pusicʼal jiñi quixtañujob cheʼ bʌ yomobʌch i ñʌchʼtañonla (Is. 61:1). Charlotte, añix bʌ 38 jab i cajel bajcheʼ precursora, miʼ yʌl: «Ili ora sajtemob jiñi quixtañujob. Yomʌch miʼ yubiñob jiñi wen tʼan». Juntiquil hermana i cʼabaʼ Ejvor, añix bʌ 34 jab i cajel bajcheʼ precursora, miʼ yʌl: «Ili ora, ñumen an quixtañujob wen chʼijiyemoʼ bʌ. Com j coltañob, i jiñʌch muʼ bʌ i ñijcañon chaʼan mic chaʼlen subtʼan». Tiʼ sujm, jiñi laj cʼuxbiya tiʼ tojlel yambʌlob jiñʌch yom bʌ miʼ ñijcañonla chaʼan mi lac chʌn chaʼlen subtʼan.

13, 14. a) ¿Chuqui ti majtañʌl miʼ taj ti tʼan Juan 15:11? b) ¿Bajcheʼ miʼ mejlel lac taj jiñi tijicñʌyel am bʌ i chaʼan Jesús? c) ¿Bajcheʼ miʼ coltañonla ti lac subtʼan jiñi tijicñʌyel?

¹³ Ti jiñi cojix bʌ acʼʌlel wʌʼan Jesús ti pañimil, tiʼ subeyob jaʼel jiñi xcʌntʼañob i chaʼan chaʼan Jehová mi caj i yʌcʼ majtañʌl tac muʼ bʌ caj i coltañob i ñumen acʼob i wut. ¿Baqui tac bʌ? ¿I bajcheʼ miʼ yʌqʼueñonla lac wenlel?

¹⁴ Jiñi tijicñʌyel. ¿Wocol ba ti jacʼol mi la cubin jiñi mandar tsaʼ bʌ i yʌlʌ Jesús chaʼan mi lac majlel ti subtʼan? Maʼañic. Cheʼ tsaʼ ujti i yʌl chaʼan jiñi tsʼusubil, Jesús tsiʼ yʌlʌ chaʼan mucʼʌch caj lac taj lac tijicñʌyel cheʼ mi lac sub jiñi wen tʼan (pejcan Juan 15:11). ¿Chucoch? Cheʼ bajcheʼ tsaʼix laj qʼuele, tsiʼ laja i bʌ bajcheʼ i yʌqʼuil tsʼusub i tsiʼ yʌlʌ chaʼan jiñi xcʌntʼañob i chaʼan lajalob bajcheʼ i cʼʌb tac jiñi acʼ. Jiñi i cʼʌb tac yaʼʌch miʼ chʼʌm jaʼ yicʼot i pʼʌtʌlel yaʼ tiʼ yʌqʼuil. Joñonla jaʼel, mi caj la cubin lac tijicñʌyel bajcheʼ Jesús cheʼ mi lac melben i yeʼtel i Tat, pero cojach mi maʼañic mi lac tʌtsʼ lac bʌ tiʼ tojlel yicʼot mi lac chʌn tsajcʌben i melbal (Jn. 4:34; 17:3; 1 P. 2:21). Hanne, ñumeñix bʌ ti 40 jab i cajel bajcheʼ precursora, miʼ yʌl: «Jiñi tijicñʌyel muʼ bʌ cubin jajayajl mic loqʼuel ti subtʼan, miʼ ñijcañon chaʼan mic chʌn melben i yeʼtel Jehová». Jiñi tijicñʌyel mucʼʌch i yʌqʼueñonla lac pʼʌtʌlel chaʼan mi lac chʌn chaʼlen subtʼan, anquese wocolʌch (Mt. 5:10-12).

15. a) ¿Chuqui ti majtañʌl miʼ taj ti tʼan Juan 14:27? b) ¿Bajcheʼ miʼ coltañonla jiñi ñʌchʼtʌlel chaʼan mi lac bej chaʼlen wut?

¹⁵ Jiñi ñʌchʼtʌlel (pejcan Juan 14:27). Ti jiñi jach bʌ acʼʌlel, Jesús tiʼ sube jiñi xcʌntʼañob i chaʼan: «Jiñʌch i ñʌchʼtilel c pusicʼal muʼ bʌ cʌqʼueñetla». ¿Bajcheʼ miʼ coltañonla la cʌcʼ lac wut jiñi i ñʌchʼtʌlel Jesús? Cheʼ maʼañic mi laj cʌy jiñi subtʼan, la cujil chaʼan Jehová yicʼot Jesús mi caj i qʼuelonla ti utsʼat. Ili mucʼʌch i chʌn aqʼueñonla lac ñʌchʼtʌlel (Sal. 149:4; Ro. 5:3, 4; Col. 3:15). Juntiquil hermano i cʼabaʼ Ulf añix bʌ 45 jab i cajel bajcheʼ precursor miʼ yʌl: «Wen lujbon mi cujtel ti subtʼan, pero ili eʼtel mucʼʌch i yʌqʼueñon c tijicñʌyel yicʼot miʼ yʌqʼuen i sujmlel j cuxtʌlel». Tiʼ sujm, wen tijicñayonla cheʼ an lac chaʼan ili ñʌchʼtʌlel mach bʌ yujilic jilel.

16. a) ¿Chuqui ti majtañʌl miʼ taj ti tʼan Juan 15:15? b) ¿Chuqui yom miʼ melob jiñi apóstolob chaʼan chʌn i yamigojob Jesús?

 ¹⁶ Cheʼ i yamigojonla Jesús. Cheʼ bʌ Jesús tsaʼ ujti i suben jiñi xcʌntʼañob i chaʼan chaʼan yom miʼ tsʼʌctiyel i tijicñʌyelob, tiʼ subeyob chaʼan jiñi isujm bʌ cʼuxbiya ñuc i cʼʌjñibal (Jn. 15:11-13). Cheʼ jiñi, tiʼ subeyob: «Mic pejcañetla tic piʼʌl [o camigo]». ¡Jumpʼejlʌch ñuc bʌ majtañʌl! Pero ¿chuqui yom miʼ melob jiñi apóstolob chaʼan miʼ chʌn ajñelob bajcheʼ i yamigo Jesús? Yomʌch miʼ bej acʼob i wut, yom i yʌl, miʼ chʌn chaʼleñob subtʼan (pejcan Juan 15:14-16). Cheʼ anto yom chaʼpʼejl jab chaʼan miʼ yʌl jiñi, Jesús tiʼ subeyob chaʼan miʼ subob ili tʼan: «Lʌcʼʌlix i yumʌntel jini am bʌ ti panchan» (Mt. 10:7). Jin chaʼan, cheʼ ti cojix bʌ acʼʌlel wʌʼan ti pañimil, tiʼ subeyob chaʼan yom miʼ cuchob wocol yicʼot miʼ chʌn melob jiñi eʼtel chaʼan subtʼan (Mt. 24:13; Mr. 3:14). Machʌch cʼuñic chaʼan miʼ jacʼob ili mandar, pero tsaʼʌch mejliyob. Cheʼ bajcheʼ jiñi, tsaʼ mejliyob ti chʌn ajñel bajcheʼ i yamigo Jesús. Pero anto yambʌ majtañʌl tilem bʌ ti Jehová muʼ bʌ caj i coltañob.

17, 18. a) ¿Chuqui ti majtañʌl miʼ taj ti tʼan Juan 15:16? b) ¿Bajcheʼ mi caj i coltan jiñi apóstolob ili majtañʌl? c) ¿Baqui tac bʌ i majtan Jehová miʼ pʼʌtʼesañonla ili ora?

¹⁷ I jacʼbal la coración tac. Jesús tiʼ sube jiñi apóstolob chaʼan cheʼ an chuqui miʼ cʼajtiñob tiʼ cʼabaʼ, Jehová mucʼʌch caj i yʌqʼueñob (Jn. 15:16). Iliyi tajol tsaʼʌch i wen pʼʌtʼesayob. * Isujm chaʼan Jesús lʌcʼʌlix mi caj i chʌmel, i jiñi apóstolob maxto añic miʼ wen chʼʌmbeñob isujm jiñi. Pero jiñi mach yomic i yʌl chaʼan mi caj i bajñel cʌjyelob. Cheʼ miʼ cʼajtiñob i coltʌntel chaʼan miʼ subob jiñi wen tʼan chaʼan Yumʌntel, Jehová mucʼʌch caj i jacʼbeñob. Maʼañic jaypʼejl qʼuin tsaʼ ñumi, i tsiʼ qʼueleyob bajcheʼ tsaʼ jacʼbentiyob (Hch. 4:29, 31).

¹⁸ Cheʼʌch miʼ yujtel jaʼel ili ora. Mi mucʼʌch lac bej chaʼlen wut, mi caj lac chʌn ajñel bajcheʼ i yamigo Jesús. Cheʼ jaʼel, miʼ mejlel lac ñop chaʼan Jehová mi caj i yʌqʼueñonla i coltaya cheʼ bʌ mi laj cʼajtiben chaʼan miʼ mejlel lac ñusan jiñi wocol tac muʼ bʌ lac taj ti subtʼan (2 Co. 4:7). Mi la cʌqʼuen wocolix i yʌlʌ Jehová cheʼ miʼ jacʼ la coración yicʼot cheʼ la camigojʌch Jesús. Iliyi mucʼʌch i yʌqʼueñonla lac pʼʌtʌlel chaʼan mi lac bej chaʼlen wut (Stg. 1:17).

19. a) ¿Chucoch mi lac chʌn chaʼlen subtʼan? b) ¿Chuqui mi caj i coltañonla la cujtesan jiñi eʼtel aqʼuebil bʌ i chaʼañonla Dios?

¹⁹ Bajcheʼ tsaʼix laj qʼuele ti ili temaj, mi lac chʌn chaʼlen subtʼan come la com lac ñuqʼuesan Jehová yicʼot lac sʌqʼuesʌben i cʼabaʼ, la com lac pʌs jiñi cʼuxbiya am bʌ lac chaʼan ti Jehová yicʼot Jesús, lac suben jiñi quixtañujob chaʼan woli (yʌquel) i lʌcʼtiyel i qʼuiñilel Jehová yicʼot mi lac pʌs chaʼan mi laj cʼuxbin jiñi quixtañujob. Cheʼ jaʼel, jiñi lac majtan tac tilem bʌ ti Jehová bajcheʼ jiñi tijicñʌyel, ñʌchʼtʌlel, cheʼ i yamigojonla Jesús yicʼot jiñi i jacʼbal la coración tac, miʼ pʼʌtʼesañonla chaʼan mi la cujtesan jiñi eʼtel tsaʼ bʌ aqʼuentiyonla. Jehová miʼ wen mulan i qʼuel cheʼ ti jumpʼejl lac pusicʼal mi lac chaʼlen wersa chaʼan mi la ‹cʌcʼ cabʌl lac wut›.