1. Cheʼ bʌ Adán yicʼot Eva tsiʼ chaʼleyob mulil, ¿chuqui tsiʼ yʌlʌ Jehová tiʼ tojlel laj contra?

ADÁN wen yujil chaʼan jiñi lucum mach yujilic tʼan. Jin chaʼan, cheʼ bʌ Eva tsaʼ pejcʌnti ti juncojt lucum, Adán tajol tsiʼ ñaʼta chaʼan jiñi woli (choncol) bʌ ti tʼan juntiquilʌch ángel (Gn. 3:1-6). Tiʼ chaʼticlelob maʼañic chuqui wen yujilob chaʼan jiñi tsaʼ bʌ i chaʼle tʼan. Pero Adán tsiʼ ñusʌbe i tʼan jiñi i Tat am bʌ ti panchan i tsaʼ caji i tsajcan jiñi mach bʌ i cʌñʌyic (1 Ti. 2:14). Jehová ti orajach tsiʼ yʌcʼʌ ti cʌjñel majqui jiñi tsaʼ bʌ i yʌcʼʌ ti mulil Adán yicʼot Eva, i tsiʼ yʌcʼʌ i tʼan chaʼan mi caj i jisan. Pero tsiʼ yʌlʌ jaʼel chaʼan jiñi ángel mi caj i contrajin muʼ bʌ i cʼuxbiñob Dios (Gn. 3:15).

2, 3. Cheʼ bʌ maxto julemic jiñi Mesías, ¿chucoch Jehová maʼañic tsiʼ yʌcʼʌ ti wen tsʼijbuntel tiʼ tojlel jiñi laj contra?

² Jehová wen an i ñaʼtʌbal i maʼañic baʼ ora albil i chaʼan chuqui i cʼabaʼ jiñi jontol bʌ ángel. * Tsiʼ yʌcʼʌ ti ñumel chaʼpʼejl mil jab chaʼan miʼ yʌqʼueñonla lac ñaʼtan bajcheʼ miʼ cʌjñel: Jiñʌch  Satanás, yom bʌ i yʌl, «xContra o xMʌctaya» (Job 1:6). Yaʼ ti Tsʼijbujel Hebreo jiñi i cʼabaʼ Satanás cojach miʼ tilel ti uxpʼejl libro. Cheʼ bʌ maxto julemic jiñi Mesías, ¿chucoch Jehová maʼañic tsiʼ yʌcʼʌ ti wen tsʼijbuntel tiʼ tojlel jiñi laj contra?

³ Jehová tajol mach yomic chaʼan jin Satanás miʼ cʌlʌx tajtʌl ti tʼan. Jin chaʼan, maʼañic tsiʼ yʌcʼʌ chaʼan yaʼ ti Tsʼijbujel Hebreo miʼ wen ajlel tiʼ tojlel o chaʼan chuqui miʼ mel (chaʼlen). Jehová tsiʼ yʌcʼʌ ti mejlel jiñi Tsʼijbujel chaʼan jiñi wiñicob xʼixicob (quixtañujob) miʼ cʌñob jiñi Mesías yicʼot miʼ tsajcañob (Lc. 24:44; Gá. 3:24). Cheʼ tsaʼ juli jiñi Mesías, temel yicʼot jiñi xcʌntʼañob i chaʼan cabʌl chuqui tsiʼ yʌcʼʌyob ti cʌjñel tiʼ tojlel jiñi Satanás yicʼot jiñi ángelob tsaʼ bʌ i tsajcayob. * I weñʌch cheʼ Jehová tsiʼ mele bajcheʼ jiñi, come chaʼan miʼ jisan Satanás yicʼot i xibajob jiñʌch mi caj i cʼʌn Jesús yicʼot jiñi bombiloʼ bʌ i chaʼan (Ro. 16:20; Ap. 17:14; 20:10).

4. ¿Chucoch mach yomic mi laj cʌlʌx bʌcʼñan jiñi Satanás?

⁴ Jiñi apóstol Pedro tsiʼ yʌlʌ chaʼan jiñi Xiba lajal bajcheʼ «colem bajlum woli bʌ ti jujuj tʼan», i jiñi apóstol Juan tsiʼ laja bajcheʼ «lucum» yicʼot «colem ajin» (1 P. 5:8; Ap. 12:9). ¿Yom ba i yʌl jiñi chaʼan yom mi lac wen bʌcʼñan Satanás? Maʼañic, come an jach baqui jaxʌl i pʼʌtʌlel (pejcan Santiago 4:7). An lac chaʼan i coltaya Jehová, Jesús yicʼot jiñi xucʼul bʌ ángelob. Yicʼot ili coltaya, miʼ mejlel lac mʌlben (jotben) jiñi Satanás. Pero an uxpʼejl cʼajtiya ñuc bʌ i cʼʌjñibal yom bʌ mi la cʌqʼuen i jacʼbal: ¿Bajcheʼ cʼamel i pʼʌtʌlel Satanás? ¿Bajcheʼ miʼ lotin jiñi quixtañujob? ¿I baqui jaxʌl miʼ cʼotel i pʼʌtʌlel? Laʼ lac tsajin ili cʼajtiya tac i laʼ laj qʼuel chuqui tac miʼ mejlel laj cʌn.

5, 6. ¿Chucoch jiñi yumʌlob maʼañic miʼ mejlel i tojʼesañob jiñi wocol tac am bʌ ti pañimil?

⁵ Cabʌl ángelob tsiʼ temeyob i bʌ yicʼot Satanás. Cheʼ maxto ñumeñic jiñi Butʼjaʼ, an tsaʼ bʌ jubiyob tilel wʌʼ ti Lum chaʼan miʼ piʼleñob jiñi xʼixicob. Jiñi Biblia miʼ taj ti tʼan ili ángelob cheʼ miʼ yʌl chaʼan juncojt colem ajin tsiʼ tujcʼa loqʼuel cabʌl ecʼ ti panchan (Gn. 6:1-4; Jud. 6; Ap. 12:3, 4). Cheʼ bʌ jiñi ángelob tsiʼ tʌtsʼʌyob i bʌ tiʼ tojlel Jehová, tsaʼ cʌleyob tiʼ pʼʌtʌlel Satanás. Pero mach lac ñaʼtan chaʼan cheʼ jach pam pucul añob. Satanás tsiʼ laji bajcheʼ an i Yumʌntel Dios, i juntiquilʌch yumʌl miʼ yubin i bʌ jaʼel. Wen chajpʌbil i chaʼan bajcheʼ tʼoxbil i chaʼan jiñi xibajob, tsiʼ yʌqʼueyob i yeʼtel (troñel) yicʼot chaʼan miʼ chaʼleñob yumʌntel ila ti pañimil (mulawil) (Ef. 6:12).

⁶ Jiñi wiñicob yumʌloʼ bʌ ila ti pañimil añob tiʼ pʼʌtʌlel jiñi xibajob, Satanás cheʼʌch chajpʌbil i chaʼan. Tsiquil chaʼan jiñi isujmʌch cheʼ bʌ tsiʼ pʌsbe Jesús jiñi «yumʌntel tac» i tiʼ sube: «Mi caj cʌqʼueñet pejtel iliyi yicʼot i pʼʌtʌlel yicʼot i ñuclel, come laj aqʼuebilon tic wenta. Mi cʌqʼuen majqui com» (Lc. 4:5, 6). Anquese Satanás cabʌlʌch i pʼʌtʌlel, añʌch yumʌlob muʼ bʌ i melob chuqui tac wen tiʼ tojlel quixtañujob. Cheʼ jaʼel, añʌch yumʌlob yomoʼ bʌ i mel chuqui wen. Pero mi juntiquilic yumʌl miʼ mejlel i tojʼesan jiñi wocol tac ila ti pañimil (Sal. 146:3, 4; Ap. 12:12).

7. ¿Bajcheʼ miʼ cʼʌn Satanás jiñi mach bʌ isujmic ñopbalʌl yicʼot eʼtel tac chaʼan i tajol taqʼuin chaʼan miʼ lotin quixtañujob? (Qʼuele jiñi dibujo am bʌ tiʼ tejchibal).

⁷ Satanás yicʼot jiñi xibajob mach cojach miʼ cʼʌñob jiñi yumʌlob chaʼan miʼ lotiñob «pejtel winicob ti pañimil», miʼ cʼʌñob jaʼel jiñi mach bʌ isujmic ñopbalʌl yicʼot eʼtel  tac chaʼan i tajol taqʼuin (Ap. 12:9). Satanás miʼ cʼʌn jiñi mach bʌ isujmic ñopbalʌl chaʼan miʼ puc lot tac tiʼ tojlel Jehová. Tsiquil chaʼan yom cheʼ cabʌl quixtañujob miʼ ñajʌtesañob i cʼabaʼ Dios (Jer. 23:26, 27). Tiʼ caj iliyi, cabʌl miʼ ñaʼtañob chaʼan wolʌch i chʼujutesañob Dios, pero woli (yʌquel) bʌ i chʼujutesañob jiñʌch jiñi xibajob (1 Co. 10:20; 2 Co. 11:13-15). Satanás miʼ cʼʌn jaʼel jiñi eʼtel tac chaʼan i tajol taqʼuin chaʼan miʼ puc yan tac bʌ lot. Jumpʼejl ejemplo, miʼ yʌqʼuen i ñaʼtan jiñi quixtañujob chaʼan jiñi tijicñʌyel yaʼʌch cʌyʌl ti taqʼuin yicʼot cheʼ cabʌl lac chubʌʼan (Pr. 18:11). Jiñi muʼ bʌ i ñopob ili lotintel miʼ cʼʌñob i cuxtʌlel chaʼan miʼ yumañob «chubʌʼañʌl», i mach jiñic Dios (Mt. 6:24). Jiñi cʼuxbiya am bʌ i chaʼañob tiʼ tojlel jiñi chubʌʼañʌl tac miʼ jisan jiñi cʼuxbiya am bʌ i chaʼañob ti Dios (Mt. 13:22; 1 Jn. 2:15, 16).

8, 9. a) ¿Chuqui chaʼchajp miʼ cʌntesañonla tsaʼ bʌ ujti tiʼ tojlel Adán, Eva yicʼot jiñi jontol bʌ ángelob? b) ¿Bajcheʼ miʼ coltañonla cheʼ la cujil bajcheʼ cʼamel i pʼʌtʌlel Satanás?

⁸ An chaʼchajp ñuc bʌ i cʼʌjñibal miʼ cʌntesañonla jiñi tsaʼ bʌ ujti tiʼ tojlel Adán, Eva yicʼot jiñi jontol bʌ ángelob. Jiñi ñaxam bʌ, jin chaʼan cojach mi lac mejlel ti ajñel tiʼ tojlel Jehová o tiʼ tojlel Satanás. Maʼañic chuqui yambʌ miʼ mejlel lac yajcan (Mt. 7:13). Jiñi i chaʼpʼejlel, jin cheʼ pʼisbil jach chuqui miʼ mejlel lac taj cheʼ mi lac tsajcan Satanás. Adán yicʼot Eva tsaʼ mejli i bajñel ñaʼtañob chuqui jiñi wem bʌ yicʼot mach bʌ weñic, i jiñi xibajob miʼ mejlel i melob i yeʼtel tiʼ tojlel jiñi yumʌlob ila ti Lum (Gn. 3:22). Pero cheʼ mi lac tsajcan Satanás ñumen an i wocolel bajcheʼ jiñi wenlel muʼ bʌ i mejlel lac taj (Job 21:7-17; Gá. 6:7, 8).

⁹ ¿Bajcheʼ miʼ coltañonla cheʼ la cujil bajcheʼ cʼamel i pʼʌtʌlel Satanás? Junchajp, miʼ coltañonla chaʼan pʼisbil jach bajcheʼ yom mi laj qʼuel jiñi xʼeʼtelob yicʼot yumʌlob. La cujil chaʼan Jehová yom chaʼan mi laj qʼuelob ti ñuc (1 P. 2:17). Yom chaʼan tiʼ pejtelel ora mi lac jacʼbeñob i tʼan, pero mi maʼañic mi lac ñusan ti pʼis i mandar Dios (Ro. 13:1-4). Pero cheʼ jaʼel, la cujil chaʼan yom xucʼulonla i maʼañic mi la cotsan lac bʌ ti política (Jn. 17:15, 16; 18:36). Yambʌ bajcheʼ miʼ coltañonla jin cheʼ miʼ ñijcan lac pusicʼal chaʼan mi lac chaʼlen subtʼan. La cujil chuqui yom i mel Satanás tiʼ contra Jehová yicʼot i cʼabaʼ, jin chaʼan ñumen la com laj cʌntesan jiñi quixtañujob chaʼan jiñi i sujmlel tiʼ tojlel Dios. Mi laj cʼʌmben i cʼabaʼ yicʼot tijicñayonla cheʼ mi la cʌjñel bajcheʼ i Testigo. La cujil chaʼan mi lac ñumen taj lac wenlel cheʼ mi laj cʼuxbin Dios, mach jiñic tiʼ cʼuxbintel jiñi taqʼuin yicʼot chubʌʼan tac (Is. 43:10; 1 Ti. 6:6-10).

10-12. a) ¿Bajcheʼ tsiʼ cʼʌñʌ jumpʼejl yac jiñi Satanás tiʼ tojlel jiñi ángelob? b) ¿Chuqui miʼ mejlel laj cʌn chaʼan tsaʼ bʌ ujti tiʼ tojlel jiñi ángelob?

¹⁰ Satanás wen chajpʌbil chuqui miʼ cʼʌn chaʼan miʼ lotin jiñi quixtañujob. An i tajol miʼ cʼʌn jiñi yac yicʼot cheʼ mi lac xijqʼuel lac mel mach bʌ la comic.

¹¹ Ti ñaxan, laʼ laj qʼuel bajcheʼ tsiʼ cʼʌñʌ Satanás jumpʼejl yac chaʼan miʼ lotin jiñi ángelob. Miʼ mejlel lac ñaʼtan chaʼan tsaʼʌch i wen tsaji bajcheʼ yilalob chaʼan miʼ yʌcʼob ti yajlel i miʼ yajñelob tiʼ tojlel. Añʌch tsaʼ bʌ yajliyob ti jiñi yac i tsiʼ chaʼleyob tsʼiʼlel yicʼot jiñi xʼixicob. Pejtelel jiñi i yalobilob wen colem tsaʼ majliyob yicʼot wen jontolob (Gn. 6:1-4). Satanás tajol tiʼ subeyob jaʼel chaʼan mi caj i mejlel i yumañob jiñi wiñicob xʼixicob, mach cojach tsiʼ cʼʌñʌ jiñi tsʼiʼlel. Tajol cheʼʌch tsiʼ mele come mach yomic chaʼan miʼ julel «i pʼolbal jini xʼixic» tsaʼ bʌ i wʌn alʌ Dios (Gn. 3:15). Pero Jehová tsiʼ choco tilel jiñi Butʼjaʼ, i maʼañic tsaʼ mejli cheʼ bajcheʼ tsiʼ lon ñaʼta Satanás yicʼot i xibajob.

¹² ¿Chuqui miʼ mejlel laj cʌn? Mach yomic mi lac ñaʼtan chaʼan maʼañic i wocolel jiñi tsʼiʼlel yicʼot cheʼ mi lac bajñel qʼuel lac bʌ ti ñuc. Jiñi ángelob tsaʼ bʌ i tsajcayob Satanás cabʌl ora tsaʼ ajñiyob yicʼot Jehová. Pero cabʌl ángelob tsaʼ bʌ i yʌcʼʌyob ti ochel yicʼot ti colel tiʼ pusicʼal jiñi mach bʌ weñic, anquese wen baqui lon añob. Joñonla jaʼel, tajol añix cabʌl jab ochemonla tiʼ yorganización Dios wʌʼ ti Pañimil. Pero mucʼʌch i mejlel ti ochel mach bʌ weñic ti lac pusicʼal jaʼel (1 Co. 10:12). Wen i cʼʌjñibal cheʼ mi lac chʌcʌ qʼuel bajcheʼ an lac pusicʼal i maʼañic mi la cʌcʼ ti ochel mach bʌ weñic ti lac pensar o mi lac chañʼesan lac bʌ (Gá. 5:26; pejcan Colosenses 3:5, TNM *).

13. ¿Baqui bʌ yambʌ yac miʼ cʼʌn Satanás, i chuqui miʼ mejlel lac mel chaʼan maʼañic mi lac yajlel?

¹³ Yambʌ yac muʼ bʌ i cʼʌn Satanás jiñʌch i mulʌntel chaʼan miʼ qʼuejlel baʼ miʼ pʌstʌl i pʼʌtʌlel xibajob. Mach cojach miʼ cʼʌn jiñi mach bʌ isujmic ñopbalʌl, miʼ cʼʌn jaʼel jiñi ñusaqʼuin tac. An película yicʼot videojuego tac baqui utsʼatax bajcheʼ miʼ pʌstʌl jiñi i pʼʌtʌlel xiba. ¿Chuqui miʼ mejlel lac mel chaʼan maʼañic mi lac yajlel? Mach lac pijtan chaʼan jiñi i yorganización Dios miʼ yʌcʼ jumpʼejl lista chaʼan pejtelel jiñi ñusaqʼuin mach bʌ yomic mi lac mel. Ti jujuntiquil yom mi laj cʌntesan laj conciencia tiʼ mandar Jehová (He. 5:14). Chaʼan wen chuqui mi lac yajcan yom mi lac jacʼben jiñi i ticʼojel Pablo baʼ miʼ yʌl chaʼan yom mi laj  cʼuxbin Dios «ti isujm» (Ro. 12:9). Laʼ laj cʼajtiben lac bʌ: «Mi tsiʼ qʼuele chuqui ti ñusaqʼuin woli c yajcan juntiquil woli bʌ ti estudio o juntiquil woli bʌ c julaʼtan, ¿muʼ ba caj i ñaʼtan chaʼan wolʌch c mel cheʼ bajcheʼ mic sub, o maʼañic?». Mi mucʼʌch lac chumtan bajcheʼ mucʼonla ti subtʼan, tajol maʼañic mi caj lac yajlel tiʼ yac Satanás (1 Jn. 3:18).

14. ¿Bajcheʼ miʼ ñop i xicʼonla Satanás chaʼan mi laj cʌy Jehová, i bajcheʼ miʼ mejlel laj cuch?

¹⁴ Wʌle laʼ laj qʼuel bajcheʼ miʼ ñop i xicʼonla Satanás chaʼan mi laj cʌy Jehová. Jumpʼejl ejemplo, miʼ mejlel i cʼʌn jiñi yumʌlob chaʼan miʼ mʌctañob jiñi subtʼan. Cheʼ jaʼel, miʼ mejlel i cʼʌn lac piʼʌlob ti eʼtel o qʼueljun chaʼan miʼ wajleñoñobla cheʼ mi lac jacʼben i mandar Dios (1 P. 4:4). Miʼ mejlel i cʼʌn jaʼel jiñi añoʼ bʌ ti lac familia, tajol tiʼ wenlelob i pusicʼal miʼ subeñoñobla chaʼan mi laj cʌy majlel ti tempa bʌ (Mt. 10:36). ¿Bajcheʼ miʼ mejlel laj cuch iliyi? Ti ñaxan, yom mi lac ñaʼtan chaʼan iliyi mucʼʌch caj i yujtel, come Satanás woliʼ contrajiñonla (Ap. 2:10; 12:17, TNM). I chaʼpʼejlel, jiñi wocol tac mach yomic miʼ yʌqʼueñonla lac ñajʌtesan jiñi ñumen ñuc bʌ i cʼʌjñibal bʌ: Satanás miʼ yʌl chaʼan jin jach cheʼ wen añonla mi lac melben i yeʼtel Dios, pero cheʼ mi lac taj wocol mi caj laj cʌyeʼ (Job 1:9-11; 2:4, 5). I yuxpʼejlel, laʼ laj cʼajtiben lac pʼʌtʌlel Jehová chaʼan mi laj cuch. Laʼ laj cʼajtesan chaʼan maʼañic baʼ ora mi caj i bajñel cʌyonla (He. 13:5).

15. ¿Muʼ ba i mejlel i wersa xicʼonla Satanás chaʼan mi lac mel mach bʌ weñic? Tsictesan.

¹⁵ Satanás maʼañic miʼ mejlel i wersa xicʼonla chaʼan mi lac mel mach bʌ weñic (Stg. 1:14). Cabʌl lac piʼʌlob mach yujilobic chaʼan woliʼ melob muʼ bʌ i mulan Satanás. Pero cheʼ miʼ cʌñob i sujmlel, miʼ yajcañob majqui mi caj i tsajcañob (Hch. 3:17; 17:30). Mi la comʌch lac jacʼben i tʼan Dios, Satanás maʼañic chuqui miʼ mejlel i mel chaʼan miʼ yʌqʼueñonla laj cʌy (Job 2:3; 27:5).

16, 17. a) ¿Chuqui yambʌ maʼañic bʌ miʼ mejlel i mel Satanás yicʼot i xibajob? b) ¿Chucoch mach yomic mi lac bʌcʼñan lac mel oración ti cʼam bʌ tʼan?

¹⁶ An yambʌ maʼañic bʌ miʼ mejlel i mel jiñi Satanás yicʼot i xibajob. Yaʼ ti Biblia maʼañic baqui miʼ yʌl chaʼan miʼ mejlel i qʼuel chuqui mi lac ñaʼtan o am bʌ ti la pusicʼal. Cojach Jehová yicʼot Jesús muʼ bʌ i mejlel i mel iliyi (1 S. 16:7; Mr. 2:8). Pero ¿am ba chuqui miʼ yujtel mi cʼam mi lac chaʼlen tʼan o mi lac mel oración? ¿Yom ba mi lac bʌcʼñan chaʼan jiñi Satanás yicʼot i xibajob miʼ yubiñob i miʼ chaʼ cʼʌñob ti laj contra? Maʼañic. Mi maʼañic mi lac bʌcʼñan lac melben i yeʼtel Jehová anquese woliʼ qʼuelonla jiñi xiba, mach yomic mi lac bʌcʼñan jaʼel chaʼan Satanás miʼ yubin chuqui mi la cʌl ti la coración. Jiñi Biblia miʼ taj ti tʼan cabʌl i wiñicob Dios tsaʼ bʌ i chaʼleyob oración ti cʼam bʌ tʼan, i maʼañic miʼ yʌjlel chaʼan tsiʼ bʌcʼñayob Satanás (1 R. 8:22, 23; Jn. 11:41, 42; Hch. 4:23, 24). Cheʼ mi lac chaʼlen wersa la cʌl chuqui miʼ mulan Jehová i cheʼʌch mi lac mel, Jehová maʼañic mi caj i yʌcʼ chaʼan Satanás miʼ ticʼlañonla tiʼ pejtelel ora (pejcan Salmo 34:7).

¹⁷ Yom mi lac wen cʌn jiñi laj contra, pero mach yomic mi laj cʌlʌx bʌcʼñan. Anquese xmulilonla, tiʼ coltaya Jehová miʼ mejlel lac mʌlben (1 Jn. 2:14). Mi mucʼʌch la cʌcʼ lac bʌ tiʼ contra Satanás, mi caj i putsʼtañonla (Stg. 4:7; 1 P. 5:9). Pero junchajp baqui wen an i wut Satanás jiñʌch tiʼ tojlel xcolelob. ¿Chuqui miʼ mejlelob i mel chaʼan miʼ yʌcʼob i bʌ tiʼ contra jiñi Diablo? Ili cʼajtiya mi caj lac tajben i jacʼbal yaʼ ti yambʌ temaj.