JESÚS tsiʼ wʌn alʌ chaʼan jiñi xcʌntʼañob i chaʼan miʼ cajelob ti ñuc bʌ cʼajbal cheʼ lʌcʼʌlix i jilibal pañimil (Mt. 9:37; 24:14). Ili tʼan tac woliyʌch i tsʼʌctiyel yaʼ ti Transcarpatia (Ucrania). Ti uxpʼejl alʌ tejclum lʌcʼʌl tac bʌ an, an 50 congregación, i ñumen ti 5,400 xsubtʼañob. * Cheʼ mi lac tsic jaytiquil quixtañu an ti jiñi uxpʼejl alʌ tejclum, miʼ mejlel lac ñaʼtan chaʼan ti chʌntiquil quixtañu, an juntiquil i testigo Jehová.

¿Bajcheʼ yilal jiñi quixtañujob? Juntiquil hermano i cʼabaʼ Vasile miʼ yʌl: «Jiñi quixtañujob miʼ wen qʼuelob ti ñuc jiñi Biblia, chaʼan toj chuqui miʼ mejlel, juntemel añob tiʼ familia yicʼot miʼ chaʼleñob wersa chaʼan miʼ tem coltañob i bʌ». Miʼ chaʼ al: «An i tajol maʼañic miʼ mulañob chuqui mi lon c ñop, pero mucʼʌch i wen ñʌchʼtañob cheʼ mic pʌsben lojon jumpʼejl texto am bʌ ti Biblia».

Tiʼ sujm, ili hermanojob tsʼitaʼ wocolʌch miʼ yubiñob chaʼan i subtʼan come wen cabʌlobix. Jumpʼejl ejemplo, ti jumpʼejl congregación an 134 xsubtʼañob, pero an jach 50 ototʌl baqui miʼ chaʼleñob subtʼan. ¿Chuqui miʼ melob cheʼ jiñi?

Cabʌl hermanojob miʼ chaʼleñob wersa chaʼan miʼ majlelob baqui anto yom xsubtʼañob. Juntiquil hermano i cʼabaʼ Ionash, añix bʌ 90 i jabilel, miʼ yʌl: «Yaʼ ti j congregación, an juntiquil xsubtʼan ti chaʼchaʼpʼejl ototʌl. Joñon mic chaʼlen subtʼan yaʼ tic tejclum, pero cheʼ maxto wen cʼamoñic, mic majlel ti subtʼan ti jumpʼejl tejclum ti tʼan húngaro, am bʌ 160 kilómetro i ñajtlel». Jiñi xsubtʼañob miʼ chaʼleñob wersa chaʼan miʼ majlelob ti subtʼan ti ili tejclum tac. Ionash miʼ yʌl: «Come ti tren mic majlel, wen sebto mic chʼojyel, ti las 4 cheʼ ti sʌcʼan, i cʼʌlʌl ti las 6 cheʼ ti icʼan mij cʌy jiñi subtʼan, come ti jiñi bʌ ora miʼ chaʼ sujtel jiñi tren. Iliyi mic mel chaʼyaj uxyajl ti jujumpʼejl semana». ¿Añʌch ba i cʼʌjñibal miʼ ñaʼtan jiñi hermano pejtelel chuqui tsiʼ mele? Miʼ chaʼ al: «Tsiʼ wen aqʼueyon c tijicñʌyel cheʼ tsaʼ c chaʼle subtʼan bajcheʼ jiñi. I tsaʼ mejli j cʌntesan jumpʼejl familia ñajt bʌ chumul chaʼan jiñi i sujmlel am bʌ ti Biblia».

Mi lac ñaʼtan chaʼan an hermanojob maʼañic bʌ miʼ mejlelob ti ñajt bʌ xʌmbal, pero tiʼ pejtelelob mucʼob ti wersa ti subtʼan yaʼ baqui chumulob, jinto jaʼel jiñi añobix bʌ i jabilel. Jin chaʼan, tiʼ yorajlel i Cʼajtesʌntel i chʌmel Jesús, ti ili alʌ tejclum chaʼyajlto i ñumelal tsaʼ cʼotiyob cheʼ bajcheʼ jaytiquil an jiñi xsubtʼañob, yom i yʌl, ojlil xchumtʌl tsaʼ bʌ cʼotiyob. Jin chaʼan, baqui jach mi lac chaʼlen subtʼan, ‹yom bʌxonla cheʼ mi lac chaʼliben i yeʼtel lac Yum› (1 Co. 15:58).