TI ILI pañimil (mulawil) butʼul bʌ ti wocol, mach cʼuñic tiʼ tajol ñʌchʼtʌlel. Anquese tsʼitaʼ añʌch lac ñʌchʼtʌlel, miʼ mejlel lac sʌt. ¿Baqui tac bʌ principio am bʌ ti Biblia miʼ mejlel i coltañonla lac taj jiñi isujm bʌ ñʌchʼtʌlel i maʼañic mi lac sʌt? ¿Bajcheʼ miʼ mejlel laj coltañob i taj jiñi yambʌlob jaʼel?

An lac chaʼan isujm bʌ ñʌchʼtʌlel cheʼ bʌ maʼañic chuqui mi lac bʌcʼñan come la cujil chaʼan Jehová woli (choncol) i cʌntañonla yicʼot cheʼ tijicña lac pusicʼal. Cheʼ jaʼel, ñuc i cʼʌjñibal cheʼ an wem bʌ la camigojob. Pero ñumen ñuc i cʼʌjñibal cheʼ wen lʌcʼʌl añonla la quicʼot Dios chaʼan maʼañic mi lac sʌt jiñi ñʌchʼtʌlel. Laʼ laj qʼuel bajcheʼ miʼ mejlel lac mel (chaʼlen).

Cheʼ mucʼʌch lac jacʼ jiñi toj bʌ i mandar tac Jehová yicʼot i principio tac, mi lac pʌs chaʼan mucʼʌch lac ñop chuqui miʼ yʌl yicʼot chaʼan la com ajñel ti ñʌchʼtʌlel la quicʼot (Jer. 17:7, 8; Stg. 2:22, 23). Cheʼ jiñi, Dios miʼ lʌcʼtesan i bʌ baʼañonla yicʼot miʼ yʌqʼueñonla i ñʌchʼtʌlel lac pusicʼal. Isaías 32:17 miʼ yʌl: «Cheʼ toj miʼ melob winicob ñʌchʼʌl mi caj i yajñelob. Chaʼan tiʼ caj miʼ chaʼleñob chuqui toj, tijicñayob mi caj i cʼajob i yo. Maʼanix bʌqʼuen tiʼ pejtelel ora». Isujmʌch, cheʼ ti jumpʼejl lac pusicʼal mi lac jacʼben i tʼan Jehová, mi la cubin lac ñʌchʼtʌlel (Is. 48:18, 19).

Jehová miʼ yʌqʼueñonla ñuc bʌ lac majtan chaʼan miʼ mejlel lac taj isujm bʌ ñʌchʼtʌlel: Jiñʌch jiñi chʼujul bʌ espíritu (Hch. 9:31).

Cheʼ bʌ Pablo tiʼ tsictesa jiñi «i wut muʼ bʌ i yʌcʼ jiñi espíritu», jiñi ñʌchʼtʌlel jiñʌch i yuxchajplel tsaʼ bʌ i yʌlʌ (Gá. 5:22, 23, TNM). Jin chaʼan, mi la com lac taj jiñi isujm bʌ ñʌchʼtʌlel yomʌch mi la cʌcʼ lac bʌ ti coltʌntel ti jiñi chʼujul bʌ espíritu.  Laʼ laj qʼuel chaʼchajp muʼ bʌ i mejlel lac mel chaʼan miʼ coltañonla jiñi i yespíritu Dios.

Ñaxam bʌ, tiʼ pejtelel ora yom mi lac pejcʌben i Tʼan Dios (Sal. 1:2, 3). Cheʼ mi lac wen ñaʼtan muʼ bʌ lac pejcan yaʼ ti Biblia, jiñi chʼujul bʌ espíritu miʼ coltañonla lac ñumen chʼʌmben isujm chuqui miʼ ñaʼtan Jehová. Jumpʼejl ejemplo, mi caj lac ñaʼtan chucoch wen ñucʌch i cʼʌjñibal miʼ qʼuel jiñi ñʌchʼtʌlel yicʼot chuqui miʼ mel chaʼan maʼañic miʼ jilel. Cheʼ mucʼʌch lac mel cheʼ bajcheʼ mi laj cʌn tiʼ Tʼan, mi caj lac ñumen taj lac ñʌchʼtʌlel (Pr. 3:1, 2).

I chaʼpʼejlel, yom mi lac pejcan Jehová ti oración yicʼot mi laj cʼajtiben i yespíritu (Lc. 11:13). Jehová miʼ yʌcʼ i tʼan tiʼ tojlel jiñi muʼ bʌ i cʼajtibeñob i coltʌntel: «I ñʌchʼtʌlel laʼ pusicʼal chʼoyol bʌ ti Dios mi caj i cʌntan laʼ pusicʼal yicʼot laʼ ñaʼtʌbal ti Cristo Jesús. Maʼanic i pʼisol i ñʌchʼtʌlel lac pusicʼal muʼ bʌ i yʌqʼueñonla» (Fil. 4:6, 7). Mi mucʼʌch laj cʼajtiben i yespíritu ti bele ora, mi caj i yʌqʼueñonla i ñʌchʼtʌlel lac pusicʼal, iliyi cojach miʼ mel tiʼ tojlel i yamigojob (Ro. 15:13).

Jiñi Biblia coltʌbil i chaʼan tiʼ cuxtʌlel cabʌl wiñicob xʼixicob (quixtañujob) i chaʼan miʼ tajob i ñʌchʼtʌlel ti Jehová, tiʼ bajñelilob yicʼot tiʼ tojlel yambʌlob. Laʼ laj qʼuel chaʼpʼejl ejemplo.

Ili ora, ti jiñi congregación tac an hermanojob wen utsoʼ bʌ, mach ti orajic miʼ michʼañob, miʼ pʌsob jiñi ñʌchʼtʌlel yicʼot wenlel *, pero ti orajach yujilob michʼ ti wajali (Pr. 29:22). Laʼ laj qʼuel tiʼ tojlel chaʼtiquil hermanojob tsaʼ bʌ coltʌntiyob chaʼan mach ti orajic miʼ michʼañob yicʼot chaʼan miʼ yajñelob ti ñʌchʼtʌlel yicʼot yambʌlob.

David mach weñic miʼ chaʼlen tʼan tiʼ tojlel yambʌlob. Cheʼ maxto ochemic tiʼ sujmlel, ñʌmʌl i wen jatsʼ ti tʼan jiñi yambʌ quixtañujob yicʼot maʼañic miʼ qʼuel ti ñuc i tatob yicʼot i yerañob. Pero ti jumpʼejl bʌ qʼuin, tsiʼ qʼuele chaʼan yom miʼ qʼuextan i melbal. ¿Chuqui tsiʼ colta? Miʼ yʌl: «Tsaʼ caji c jacʼ jiñi principio tac am bʌ ti Biblia. Cheʼ jiñi, tsaʼ caji c ñumen qʼuel lojon c bʌ ti ñuc quicʼot c familia».

Rachel mach weñic bajcheʼ yilal i melbal tiʼ  caj bajcheʼ tsaʼ coli. Miʼ yʌl: «Cʼʌlʌl ili ora mic chaʼlen wersa chaʼan maʼañic mic wen chaʼlen michʼ, come tsaʼ coliyon ti jumpʼejl familia baqui tiʼ pejtelel ora miʼ chaʼleñob leto». ¿Chuqui tsiʼ colta chaʼan miʼ taj jiñi ñʌchʼtʌlel? Miʼ yʌl: «Mic chʌn cʼajtiben i coltaya Jehová».

Jiñi ejemplo chaʼan David yicʼot Rachel miʼ pʌs chaʼan cheʼ mucʼʌch lac jacʼ jiñi principio tac am bʌ ti Biblia yicʼot mi laj cʼajtin chʼujul bʌ espíritu, mucʼʌch i coltañonla lac taj lac ñʌchʼtʌlel. Anquese chumulonla ti jontol bʌ pañimil, mucʼʌch i mejlel lac taj i ñʌchʼtʌlel lac pusicʼal yicʼot tijicña mi la cajñel ti lac familia yicʼot ti congregación. Pero Jehová miʼ yʌl chaʼan yom ‹ñʌchʼʌl mi la cajñel la quicʼot pejtelel wiñicob xʼixicob› (Ro. 12:18). ¿Bajcheʼ miʼ mejlel lac mel? ¿I baqui bʌ i wenlel mi lac taj cheʼ mucʼʌch lac chaʼlen wersa chaʼan añonla ti ñʌchʼtʌlel?

Cheʼ mi lac chaʼlen subtʼan, woli (yʌquel) lac pʌy jiñi quixtañujob chaʼan miʼ mejlelob i taj ñʌchʼtʌlel ti jiñi wen tʼan chaʼan i Yumʌntel Dios (Is. 9:6, 7; Mt. 24:14). I tijicña mi la cubin cheʼ cabʌl quixtañu woli bʌ i jacʼob ti wen. Cheʼ bajcheʼ jiñi, pejtelel chuqui woliʼ yujtel ili ora maʼañix miʼ yʌcʼob ti michʼ. Añobix jumpʼejl i pijtaya chaʼan ti talto bʌ qʼuin yicʼot miʼ jacʼob ili ticʼojel: «Tsajcan majlel i ñʌchʼtilel a pusicʼal» (Sal. 34:14).

Isujmʌch, ti ñaxan mach tiʼ pejtelelic quixtañu mi caj i jacʼob ti wen jiñi lac subtʼan (Jn. 3:19). Pero jiñi i yespíritu Dios miʼ coltañonla chaʼan wen jach bajcheʼ mi lac pejcañob i mi laj qʼuelob ti ñuc. Cheʼ bajcheʼ iliyi, woli lac jacʼ tsaʼ bʌ i subeyonla Jesús chaʼan jiñi subtʼan: «Cheʼ mi laʼ wochel ti jumpʼejl otot, aqʼueñob cortesía. Mi utsʼatob jini añoʼ bʌ ti otot, aqʼueñob i yutslel laʼ tʼan chaʼan miʼ tajob i ñʌchʼtilel i pusicʼal. Mi mach utsʼatobic maʼanic mi caj i tajob i ñʌchʼtilel i pusicʼal» (Mt. 10:11-13). Cheʼ mi lac mel bajcheʼ tsiʼ yʌlʌ Jesús, tijicñayonla mi lac sujtel, i tajol muʼto i mejlel laj coltan jiñi quixtañu ti wiʼil.

Cheʼ wen jach bajcheʼ mi lac pejcañob jaʼel jiñi ñucoʼ bʌ i yeʼtel (troñel) anquese miʼ contrajiñoñobla, woliyʌch lac sʌclan jaʼel jiñi ñʌchʼtʌlel. Laʼ laj qʼuel jumpʼejl ejemplo. Jiñi yumʌl ti jumpʼejl país ti África an tiʼ contra jiñi Testigojob, i mach yomic i yʌcʼ permiso chaʼan miʼ mejlel (pʌjtel) i Yotlel Tempa bʌ. Jin chaʼan, juntiquil hermano tsajñi bʌ bajcheʼ misionero ti jiñi país, tsaʼ chojqui majlel ti Londres (Inglaterrra) chaʼan miʼ tsictesʌben jiñi embajador bajcheʼ yilal jiñi eʼtel muʼ bʌ lac mel. ¿Chuqui tsaʼ ujti?

Jiñi hermano miʼ yʌl: «Cheʼ bʌ tsaʼ cʼotiyon, tsaʼ j qʼuele chaʼan jiñi xʼixic yaʼ bʌ mucʼ ti eʼtel yaʼ baqui mi lac chaʼlen pijt, tilem ti jumpʼejl tribu yujil bʌ jiñi tʼan tsaʼ bʌ c ñopo. Jin chaʼan, tsaʼ c pejca tiʼ tʼan. I toj sajtel i pusicʼal, tsiʼ cʼajtibeyon chuqui tsaʼ cʼoti c mel. Ti wen jach bʌ tʼan tsaʼ c sube chaʼan com c pejcan jiñi embajador. Jiñi xʼixic tsiʼ pejca ti teléfono, i jiñi embajador tsaʼ loqʼui tilel i tsiʼ pejcayon tiʼ tʼan. Cheʼ jiñi, wen jach tsiʼ ñʌchʼta cheʼ tsaʼ c tsictesʌbe jiñi i yeʼtel jiñi Testigojob».

Jiñi embajador tsaʼ qʼuextʌyi bajcheʼ yilal miʼ qʼuel jiñi Testigojob come jiñi hermano wen jach bajcheʼ tsiʼ pejca. Ti wiʼil, jiñi yumʌl yaʼ ti país tsaʼ caji i yʌcʼ permiso chaʼan miʼ mejlel i Yotlel Tempa bʌ tac. ¡Jiñi hermanojob wen tijicña tsiʼ yubiyob i bʌ! Tiʼ sujm, añʌch i wenlel cheʼ mi laj qʼuel ti ñuc jiñi yambʌyob, i miʼ chʼʌm tilel ñʌchʼtʌlel.

Ili ora, chumulonla ti jumpʼejl chʼujul bʌ paraíso baqui an ñʌchʼtʌlel. Mi mucʼʌch lac chaʼlen wersa chaʼan añʌch lac chaʼan ili i wut jiñi espíritu, mi caj lac ñijcʌben i pusicʼal yambʌlob chaʼan miʼ yochelob jaʼel. Pero ñumen ñuc bʌ i cʼʌjñibal, jiñʌch cheʼ mi caj i yʌqʼueñonla i bendición Jehová yicʼot mi caj lac ñumen taj ñʌchʼtʌlel tiʼ pejtelel ora ti jiñi tsijiʼ bʌ pañimil (2 P. 3:13, 14).