1, 2. a) ¿Chucoch woliʼ mʌlbeñob Satanás yicʼot xibajob jiñi xcolelob? (Qʼuele jiñi dibujo). b) ¿Chuqui mi caj laj qʼuel ti ili temaj?

JIÑI apóstol Pablo tsiʼ yʌlʌ chaʼan jiñi xñoptʼan lajalʌch bajcheʼ juntiquil soldado woli (choncol) bʌ ti jatsʼ. Mach yicʼotic wiñicob woliyonla ti jatsʼ, yicʼotobʌch jiñi jontoloʼ bʌ espíritu. Jiñi laj contrajob jiñʌch Satanás yicʼot xibajob. Anquese mach mejlic laj qʼuelob wen yujilob jatsʼ yicʼot wen chajpʌbilob. Tajol mi lac ñaʼtan chaʼan mach mejlic lac mʌlbeñob, ñumento jiñi xcolelob. Pero ¿cheʼʌch ba? ¿Mejl ba jiñi xcolelob i mʌlbeñob jiñi jontol bʌ ángelob? Mucʼʌch, i cheʼʌch woli (yʌquel) i melob. ¿Bajcheʼ? Woliʼ bej ‹pʼʌtʼesañob i bʌ ti lac Yum› Jehová. Cheʼ jaʼel, lajalob bajcheʼ juntiquil wem bʌ soldado, xojolob i chaʼan ‹pejtelel jiñi mʌctʌjib muʼ bʌ i yʌcʼ Dios› (pejcan Efesios 6:10-12).

² Cheʼ bʌ Pablo tsiʼ yʌlʌ chaʼan jiñi mʌctʌjib, tajol jin tsiʼ ñaʼta jiñi muʼ bʌ i cʼʌñob jiñi soldadojob ti Roma (Hch. 28:16). Cheʼ mi caj lac tsajin majlel iliyi, laʼ laj qʼuel chuqui ñusʌbil i chaʼan jiñi xcolelob yicʼot baqui bʌ bendición tajbil i chaʼañob cheʼ xojbilob i chaʼan jiñi mʌctʌjib yom bʌ an i chaʼan jiñi xñoptʼan.

3, 4. ¿Bajcheʼ miʼ laj i bʌ jiñi i sujmlel am bʌ ti Biblia yicʼot jiñi cinturón muʼ bʌ i cʼʌñob jiñi soldadojob ti Roma?

³ (Pejcan Efesios 6:14, Jini wen bʌ tʼan *). Cheʼ bʌ Pablo tsiʼ yʌlʌ chaʼan yom mi lac chʼʌm jiñi melel bʌ tʼan cheʼ bajcheʼ mi laj cʌch lac bʌ yicʼot jumpʼejl cinturón, jin woliʼ taj ti tʼan jiñi cinturón muʼ bʌ i cʼʌn jiñi soldadojob ti Roma. Ili cinturón an i chaʼan fierro tac tiʼ sowtʌlel chaʼan miʼ mʌctʌben i xiñil soldado yicʼot chaʼan miʼ mero cuchben i yʌlel jiñi i mʌctʌjib i tajn. Cheʼ jaʼel, an i yalʌ jocʼlib tac baʼ miʼ mejlel ti cujchel jumpʼejl espada yicʼot jumpʼejl cuchillo. Cheʼ jiñi soldado wen cʌchʌlʌch i bʌ yicʼot ili cinturón, miʼ ñumen taj i chʼejlel chaʼan miʼ majlel ti guerra.

⁴ Jiñi i sujmlel am bʌ tiʼ Tʼan Dios, lajalʌch bajcheʼ jiñi cinturón come miʼ cʌntañonla chaʼan jiñi mach bʌ isujmic cʌntesʌntel tac maʼañic chuqui miʼ tumbeñonla tiʼ chaʼan bʌ Dios (Jn. 8:31, 32; 1 Jn. 4:1). Mi mucʼʌch lac wen cʼuxbin jiñi i sujmlel, mach wocolic mi caj la cubin chaʼan mi lac chumtʌl cheʼ bajcheʼ an tiʼ mandar Dios, muʼ bʌ i lajintel bajcheʼ ‹i mʌctijib lac tyajn› (Sal. 111:7, 8; 1 Jn. 5:3). I mi mucʼʌch lac wen chʼʌmben isujm am bʌ tiʼ Tʼan Dios, maʼañic mi caj lac bʌcʼñan lac tsictesʌbeñob jiñi muʼ bʌ i contrajiñoñobla (1 P. 3:15).

5. ¿Chucoch tiʼ pejtelel ora yom mi lac chaʼlen tʼan tiʼ sujmlel?

⁵ Mi wen cʌchʌloñʌchla ti jiñi «melel bʌ tʼan», mi caj lac chumtʌl cheʼ bajcheʼ mi laj cʌn yicʼot tiʼ pejtelel ora mi caj lac chaʼlen tʼan tiʼ sujmlel. ¿Chucoch maʼañic mi caj lac chaʼlen lot? Come junchajp muʼ bʌ i cʼʌn Satanás jiñʌch jiñi lot. Juntiquil muʼ bʌ ti lot miʼ bajñel ticʼlan i bʌ yicʼot miʼ ticʼlan yambʌlob (Jn. 8:44). Jin chaʼan, mi lac chaʼlen wersa chaʼan maʼañic mi lac chaʼlen lot anquese xmulilonla (Ef. 4:25). An i tajol wocolʌch mi la cubin. Abigail, am bʌ 18 i jabilel, miʼ yʌl: «An i tajol ñumen wen yilal cheʼ maʼañic mi la cʌl chuqui isujm, ñumento cheʼ añet ti wocol». Pero ¿chucoch miʼ chaʼlen wersa chaʼan maʼañic miʼ chaʼlen lot? Miʼ yʌl: «Come cheʼ bajcheʼ jiñi, sʌc miʼ yajñel j conciencia tiʼ tojlel Jehová, i jiñi c tatob yicʼot camigojob yujilob chaʼan mach cujilic lot». Victoria, am bʌ 23 i jabilel, miʼ yʌl: «Cheʼ maʼ chaʼlen tʼan tiʼ sujmlel yicʼot maʼ tsictesan chuqui maʼ ñop, mucʼʌch i mejlel i ticʼlañetob, pero wen ñuc jiñi wenlel muʼ bʌ a taj, maʼañic chuqui maʼ bʌcʼñan, maʼ ñumen lʌcʼtiyel ti Jehová yicʼot mi caj a qʼuejlel ti ñuc». Tiʼ sujm, ñuc i cʼʌjñibal cheʼ wen ñopolʌch a chaʼan jiñi i sujmlel cheʼ bajcheʼ maʼ wen cʌch a bʌ ti cinturón.

6, 7. ¿Bajcheʼ lajal jiñi toj bʌ i mandar Dios yicʼot i mʌctʌjib i tajn jiñi soldadojob?

⁶ Cheʼ ti ñaxam bʌ siglo, i mʌctʌjib jiñi soldadojob melbil ti welel tac bʌ fierro jelel tac bʌ bajcheʼ lʌtsbil. An xotol bʌ miʼ yajñel chaʼan miʼ mʌctan lac ñʌcʼ yicʼot lac tajn, i jiñi yambʌ miʼ cʼʌctʌl ti laj quejlab. Ti jujunwejl jiñi fierro an i jocʼlib tac chaʼan miʼ cʌjchel, i jiñi i chʼajñal tac melbil (pʌtbil) ti pʌchi. Jiñi soldado tsʼitaʼ wocolʌch miʼ ñijcan i bʌ cheʼ lʌpʌl i chaʼan, pero mucʼʌch i coltan chaʼan maʼañic miʼ lowbentel i pusicʼal o yan tac bʌ. Jin chaʼan, wen ñucʌch i cʼʌjñibal cheʼ jiñi soldado miʼ chʌn qʼuel mi tojʌch an yicʼot mi wen ñetʼelʌch jujunwejl jiñi fierro.

⁷ Jiñi wen tac bʌ i mandar Dios miʼ cʌntan lac pusicʼal lajal bajcheʼ i mʌctʌjib i tajn jiñi soldado (Pr. 4:23). Cheʼ bajcheʼ juntiquil soldado mach i qʼuexeyic jiñi i mʌctʌjib i tajn melbil bʌ ti fierro yicʼot yambʌ mach bʌ ñoj weñic, joñonla jaʼel mach yomic mi laj qʼuextan i mandar Dios yicʼot lac bajñel ñaʼtʌbal.  Jiñi lac bajñel ñaʼtʌbal mach wen mejlic i coltañonla come an jach baqui jaxʌl miʼ cʼotel (Pr. 3:5, 6). Jin chaʼan, i cʼʌjñibalʌch cheʼ ti bele ora mi laj qʼuel mi utsʼatʌch chucul ti lac pusicʼal jiñi toj bʌ i mandar Dios.

8. ¿Chucoch weñʌch cheʼ mi lac jacʼben i mandar Jehová?

⁸ ¿Muʼ baʼ ñaʼtan chaʼan jiñi i mandar tac Dios wocol ti jacʼol o chaʼan miʼ mʌctañet a mel (chaʼlen) chuqui a wom? Daniel, am bʌ 21 i jabilel, miʼ yʌl: «Jiñi c maestrojob yicʼot c piʼʌlob ti clase miʼ wajleñoñob come mic mel bajcheʼ miʼ yʌl jiñi Biblia. Wen wocol tsaʼ c ñusa, tsaʼ c wen ubi c chʼijiyemlel i tsaʼ c ñaʼta chaʼan maʼañic j cʼʌjñibal». ¿Chuqui tsiʼ colta? Miʼ yʌl: «Ti wiʼil, tsaʼ caji j qʼuel baqui tac bʌ i wenlel cheʼ mi lac jacʼben i mandar Jehová. An camigojob tsaʼ bʌ cajiyob i cʼʌn droga yicʼot tsiʼ cʌyʌyob jiñi escuela. Chʼijiyem tic jax bajcheʼ tsaʼ ujtiyob. Jehová mucʼʌch i cʌntañonla». Madison, 15 bʌ i jabilel, miʼ yʌl: «Wocol mi cubin chaʼan mic jacʼben i tʼan Jehová i chaʼan maʼañic mic mel jiñi ñusaqʼuin tac anquese jiñʌch ñumen wem bʌ tiʼ wut jiñi c piʼʌlob». ¿Chuqui miʼ mel chaʼan miʼ chʌn cuch? Miʼ yʌl: «Mic chaʼ cʼajtesan chaʼan i testigojon Jehová i chaʼan Satanás cheʼʌch yom i yʌcʼon ti yajlel bajcheʼ jiñi. Cheʼ mij cuch jumpʼejl wocol, ñumen tijicña mi cubin c bʌ».

9-11. a) ¿Baqui bʌ jiñi lac warach lʌpʌl bʌ lac chaʼan? b) ¿Chuqui yom mi lac mel chaʼan wen mi la cubin lac bʌ ti subtʼan?

⁹ (Pejcan Efesios 6:15). Mi juntiquil maʼañic miʼ lʌp majlel i warach, mach chajpʌbilic chaʼan guerra. Ili warach wen utsʼat melbil, jiñi i yebal melbil ti uxlajm pʌchi chaʼan wen jach miʼ cʌytʌl ti la coc. Wen yujil jalijel yicʼot maʼañic miʼ cʼuxʼesan la coc.

¹⁰ Jiñi soldadojob miʼ cʼʌñob cheʼ bʌ warach bajcheʼ iliyi chaʼan miʼ majlelob ti guerra, pero jiñi lac warach bʌ mi la cʌl joñonla jiñʌch cheʼ mi lac sub jiñi wen tʼan muʼ bʌ i yʌcʼ ñʌchʼtʌlel (Is. 52:7; Ro. 10:15). Pero yomʌch an lac chʼejlel chaʼan mi lac sub jiñi wen tʼan cheʼ mi lac tajben i yorajlel. Juntiquil xcolel 20 bʌ i jabilel i cʼabaʼ Roberto * miʼ yʌl: «Ti ñaxan, mic bʌcʼñan c subeñob wen tʼan jiñi c piʼʌlob ti clase. Tajol tiʼ caj quisin. Tiʼ sujm mach cujilic chucoch cheʼ tsaʼ cubi c bʌ bajcheʼ jiñi. Wʌleʼli, muqʼuix c wen mulan c subeñob wen tʼan jiñi yambʌ c piʼʌlob».

¹¹ Cabʌl xcolelob an i qʼueleyob chaʼan ñumen wen miʼ chaʼleñob subtʼan cheʼ wen chajpʌbilob. ¿Chuqui miʼ mejlel a mel jatet? Julia, am bʌ 16 i jabilel, miʼ yʌl: «Cheʼ bʌ mic majlel ti clase, ti bele ora mij cuch majlel jun tac loqʼuem bʌ ti Biblia, mic ñʌchʼtan chuqui miʼ yʌlob yicʼot muʼ bʌ i ñopob jiñi c piʼʌlob ti clase. Jiñʌch miʼ coltañon c ñaʼtan bajcheʼ yom mij coltañob. Mi wen chajpʌbiloñʌch, mic subeñob chuqui miʼ mejlel i coltañob». Yaneth, juntiquil xchʼoc 23 bʌ i jabilel miʼ yʌl: «Mi utsetʌch yicʼot maʼ ñʌchʼtañob, miʼ mejlel a ñaʼtan chuqui woliʼ chaʼleñob. Mic pejcan pejtelel jiñi jun muʼ bʌ i yʌl chaʼan jiñi xcolelob. Cheʼ bajcheʼ jiñi miʼ mejlel c pʌsbeñob chuqui miʼ yʌl jiñi Biblia o yambʌ muʼ bʌ i letsʌntel yaʼ ti página chaʼan Internet jw.org». Wen tsiquilʌch, cheʼ wen chajpʌbilonla chaʼan subtʼan lajal bajcheʼ xojol lac chaʼan jiñi wem bʌ lac warach.

12, 13. ¿Baqui tac bʌ i yeʼtijib miʼ cʼʌn ti laj contra jiñi Satanás?

¹² (Pejcan Efesios 6:16). Jiñi mʌctʌjib chucul bʌ tiʼ cʼʌb soldadojob wechel yicʼot wen colem chaʼan miʼ mʌcben i quejlab cʼʌlʌl tiʼ pix. Miʼ cʼʌn chaʼan maʼañic miʼ lojwel ti espada, jalʌjb o yan tac bʌ.

¹³ Jiñi eʼtijib tac muʼ bʌ i cʼʌn Satanás jiñʌch jiñi lot tiʼ tojlel Jehová, miʼ yʌl chaʼan  maʼañic miʼ qʼuelonla ti ñuc i maʼañic miʼ cʼuxbiñonla. Juntiquil xchʼoc i cʼabaʼ Hilda, am bʌ 19 i jabilel, miʼ yʌl: «Ti bele ora ñajt an mi cubin Jehová tic tojlel i mach yomic sujtel ti cAmigo». ¿Bajcheʼ miʼ mʌlben iliyi? Miʼ yʌl: «Jiñi tempa bʌ tac mucʼʌch i pʼʌtʼesan c ñopoñel (chʼujbiya) ti Dios. Ti ñaxan, mucʼ jach j cʼotel ti buchtʌl, i maʼañic mic wis letsan j cʼʌb. Mic ñaʼtan chaʼan maʼañic majqui i wenta mi tsaʼ j cʌcʼʌ j comentario. Pero ili ora muqʼuix c wen chajpan c bʌ chaʼan jiñi tempa bʌ tac i mic chaʼlen wersa chaʼan chaʼyaj uxyajl mi cʌcʼ j comentario. Mero wocolʌch mi cubin, pero tijicña mi cubin c bʌ cheʼ mic mel. Cheʼ jaʼel, jiñi hermanojob miʼ wen pʼʌtʼesañoñob. Jajayajl mic loqʼuel ti tempa bʌ mic ñop chaʼan Jehová miʼ cʼuxbiñon».

14. ¿Chuqui miʼ mejlel laj cʌn tiʼ tojlel Hilda?

¹⁴ Tsaʼ bʌ ujti tiʼ tojlel Hilda an chuqui ñuc bʌ i cʼʌjñibal miʼ pʌsbeñonla. I mʌctʌjib jiñi soldadojob pʼisbil jach bajcheʼ ñojel, pero jiñi lac ñopoñel lajal bʌ bajcheʼ lac mʌctʌjib, miʼ mejlel ti colel o ti chutʼan. Yaʼ cʌyʌl ti lac tojlel bajcheʼ cʼamel miʼ colel (Mt. 14:31; 2 Ts. 1:3). Wen ñuc i cʼʌjñibal cheʼ mi lac chʌn pʼʌtʼesan.

15, 16. ¿Bajcheʼ lajal yicʼot jumpʼejl casco jiñi lac pijtaya?

¹⁵ (Pejcan Efesios 6:17). Jiñi casco muʼ bʌ i cʼʌñob jiñi soldadojob ti Roma miʼ cʌntan chaʼan maʼañic miʼ jatsʼbentelob i jol, i bicʼ yicʼot i wut. An casco tac am bʌ bajcheʼ miʼ mejlel lac jocʼyeʼ.

¹⁶ Lajal bajcheʼ jiñi casco miʼ mʌctʌben i jol juntiquil soldado, jiñi ‹lac pijtaya› chaʼan bʌ laj coltʌntel miʼ cʌntan chuqui mi lac ñaʼtan  (1 Ts. 5.8; Pr. 3:21). Jiñi pijtaya miʼ coltañonla lac chʌn ñaʼtan chuqui albil i chaʼan Dios i chaʼan pʼisbil jach bajcheʼ mi laj qʼuel jiñi wocol tac (Sal. 27:1, 14; Hch. 24:15). Pero yomʌch chʌn an ti lac jol chaʼan miʼ cʌntañonla, mach cheʼ jach yom an ti laj cʼʌb. Ili yom i yʌl chaʼan jiñi lac pijtaya yomʌch wen tsiquil an ti lac ñaʼtʌbal.

17, 18. a) ¿Bajcheʼ miʼ ñop i locʼsʌbeñonla i mʌctʌjib lac jol jiñi Satanás? b) ¿Bajcheʼ miʼ mejlel lac pʌs chaʼan maʼañic lotibil i chaʼañonla Satanás?

¹⁷ Satanás miʼ ñop i locʼsʌbeñonla jiñi i mʌctʌjib lac jol. ¿Bajcheʼ? Ñaʼtancu tsaʼ bʌ i mele tiʼ tojlel Jesús. Tajol wen yujilʌch chaʼan Jesús woliʼ pijtan baqui ora miʼ chaʼlen yumʌntel. Pero ñaxan yom miʼ yilan wocol yicʼot miʼ tsʌnsʌntel, i cheʼ jiñi miʼ chaʼ pijtan miʼ cʼotel i yorajlel cheʼ bajcheʼ ñaʼtʌbil i chaʼan Jehová. Jin chaʼan, tsiʼ ñopo i suben chaʼan ñumen ora miʼ mejlel i taj jiñi woli bʌ i pijtan. Satanás tiʼ sube Jesús chaʼan yom jach miʼ chʼujutesan junyajl chaʼan miʼ luʼ taj (Lc. 4:5-7). Satanás yujil jaʼel chaʼan Jehová cabʌl chuqui mi caj i yʌqʼueñonla yaʼ ti tsijiʼ bʌ pañimil (mulawil). Pero yomto mi lac pijtan yicʼot mi lac ñusan wocol tac. Jin chaʼan, miʼ ñop i subeñonla chaʼan wʌleʼli jach miʼ mejlel lac taj jiñi tijicñʌyel. Yom chaʼan ñaxan mi lac sʌclan jiñi chubʌʼañʌl tac i wiʼilix mi laj cʌy chaʼan bʌ i Yumʌntel Dios (Mt. 6:31-33).

¹⁸ Cabʌl xcolelob maʼañic yajlemob tiʼ yac Satanás. Jumpʼejl ejemplo, Karina, am bʌ 20 i jabilel, miʼ yʌl: «Cujil chaʼan cojach i Yumʌntel Dios miʼ mejlel i jisan pejtelel wocol». ¿Bajcheʼ coltʌbil i chaʼan jiñi pijtaya ti chuqui miʼ ñaʼtan yicʼot miʼ mel? Miʼ yʌl: «Jiñi paraíso muʼ bʌ i cajel, miʼ coltañon c ñaʼtan ti wen chuqui com c mel. Maʼañic mij cʼʌn j cuxtʌlel chaʼan mic tempan c taqʼuin o chaʼan mic taj ñuc bʌ eʼtel (troñel) ti empresa. Jiñi i yorajlel am bʌ c chaʼan yicʼot c pʼʌtʌlel mij cʼʌn tiʼ chaʼan bʌ Dios».

19, 20. ¿Bajcheʼ miʼ mejlel lac ñumen cʼʌn ti wen jiñi i Tʼan Dios?

¹⁹ Cheʼ bʌ Pablo tiʼ tsʼijbube majlel ili jun jiñi hermanojob ti Éfeso, jiñi soldadojob ti Roma miʼ cʼʌñob ti jatsʼ jumpʼejl espada lʌcʼʌl 50 centímetro bʌ i tamlel. Jiñi soldadojob wen yujilob cʼʌñol jiñi espada come ti jujumpʼejl qʼuin miʼ chajpañob i bʌ.

²⁰ Pablo tsiʼ laji jiñi i Tʼan Dios bajcheʼ jumpʼejl espada aqʼuebil bʌ i chaʼañonla Jehová. Pero yomʌch wen la cujil cʼʌñol cheʼ bʌ yom mi lac tsictesan chuqui ñopol lac chaʼan o cheʼ bʌ yom mi lac tojʼesan bajcheʼ mi lac ñaʼtan (2 Co. 10:4, 5; 2 Ti. 2:15). ¿Bajcheʼ miʼ mejlel lac ñumen cʼʌn ti wen? Sebastian, am bʌ 20 i jabilel, miʼ yʌl: «Cheʼ mic pejcan jiñi Biblia, mic locʼsan jumpʼejl versículo ti jujumpʼejl capítulo. Woli c tsʼijbun pejtelel jiñi texto tac muʼ bʌ c mulan. Cheʼ bajcheʼ ili miʼ mejlel c ñumen cʌn chuqui miʼ ñaʼtan Jehová». Daniel, jiñi tsaʼ bʌ la cʌlʌ ti párrafo 8, miʼ yʌl: «Cheʼ bʌ mic pejcan jiñi Biblia mij qʼuel majlel jiñi versículo tac muʼ bʌ i mejlel i coltan jiñi wiñicob xʼixicob (quixtañujob). An j qʼuele chaʼan weñʌch miʼ jacʼob cheʼ miʼ qʼuelob chaʼan mi lac wen mulan lac pejcan jiñi Biblia yicʼot mi lac chaʼlen wersa laj coltañob».

21. ¿Chucoch mach yomic mi lac bʌcʼñan jiñi Satanás yicʼot i xibajob?

²¹ Muʼ bʌ i yʌl jiñi xcolelob tsaʼ bʌ lac tajayob ti tʼan ti ili temaj miʼ pʌsbeñonla chaʼan mach yomic mi lac bʌcʼñan jiñi Satanás yicʼot i xibajob. Pʼʌtʌlobʌch, pero mucʼʌch i mejlelob ti jisʌntel. Tsʼitaʼ jax yom chaʼan mi caj i mʌjquelob cheʼ bʌ Cristo miʼ chaʼlen Yumʌntel Mil Jab, i maʼañix chuqui mi caj i mejlelob i mel. Cheʼ jiñi mux caj i junyajlel jisʌntelob (Ap. 20:1-3, 7-10). Laj cʌñʌyix jiñi laj contra, jiñi i yac tac yicʼot chuqui yom ti lac tojlel. Tiʼ coltaya Jehová, xucʼul mi lac mejlel ti ajñel tiʼ contra Satanás.