1, 2. ¿Chuqui tajol mi laj cʼajtiben lac bʌ?

 ¿AM BA a cʼajtibe a bʌ mi Jehová mucʼʌch i jacʼ jiñi a woración tac? Mi añʌch, mach a bajñelic jach. Cabʌl hermanojob an i yʌlʌyob chaʼan an i melbeyob i bʌ ili cʼajtiya, ñumento cheʼ wocol woli (choncol) i ñusañob. Tajol joñonla jaʼel maʼañic mi lac wen taj laj qʼuel bajcheʼ miʼ jacʼbeñonla Jehová jiñi la coración tac, ñumento cheʼ bʌ woli (yʌquel) lac ñusan wocol.

² Ti ili estudio mi caj laj qʼuel chucoch miʼ mejlel lac ñop chaʼan Jehová mucʼʌch i jacʼben i yoración jiñi i wiñicob (1 Juan 5:15). Cheʼ jaʼel, mi caj laj qʼuel chucoch an i tajol maʼañic miʼ jajqʼuel la coración mi la cubin i bajcheʼ mucʼʌch i jacʼbeñonla Jehová.

3. ¿Chucoch yom Jehová chaʼan mi lac pejcan ti oración?

³ Jiñi Biblia miʼ subeñonla chaʼan Jehová mucʼʌch i wen cʼuxbiñonla yicʼot chaʼan miʼ qʼuelonla ti ñuc (Ageo 2:7, TNM; 1 Juan 4:10). Jin chaʼan, miʼ subeñonla chaʼan mi laj cʼajtiben i coltaya ti oración (1 Ped. 5:6, 7). Yom chaʼan chʌn lʌcʼʌl mi la cajñel tiʼ tojlel yicʼot chaʼan mi lac lʌtʼ pejtelel jiñi lac wocol tac.

4. ¿Bajcheʼ la cujil chaʼan Jehová mucʼʌch i jacʼben i yoración i wiñicob? (Qʼuele jaʼel jiñi foto).

⁴ Yaʼ ti Biblia mi lac taj cabʌl relato chaʼan bajcheʼ Jehová tsiʼ jacʼbe i yoración jiñi i wiñicob. Juntiquil jiñʌch jiñi rey David, tsiʼ taja cabʌl wen jontol bʌ (simaron bʌ) i contrajob  i mach junsujtelic jach tsiʼ cʼajtibe i coltaya Jehová. Junsujtel tsiʼ cʼajtibe: «C Yum, ubibeñon coración. Ñichʼtʌbeñon chuqui wolij cʼajtibeñet. Jacʼbeñon, come xucʼul a pusicʼal, toj jaʼel» (Sal. 143:1). Jehová tsaʼʌch i jacʼbe i yoración i tsiʼ colta (1 S. 19:10, 18-20; 2 S. 5:17-25). Jin chaʼan, ti jumpʼejl i pusicʼal, David tsiʼ yʌlʌ: «Lʌcʼʌl an lac Yum tiʼ tojlel pejtel muʼ bʌ i pejcañob». I jiñʌch muʼ bʌ i mejlel lac ñop jaʼel (Sal. 145:18).

5. ¿Tsaʼ baʼ i jacʼbe Jehová tiʼ pejtelel ora i yoración i wiñicob cheʼ bajcheʼ pijtʌbil i chaʼañob? Alʌ jumpʼejl ejemplo. (Qʼuele jaʼel jiñi foto).

⁵ Tajol Jehová maʼañic miʼ jacʼbeñonla la coración cheʼ bajcheʼ pijtʌbil lac chaʼan. Jiñʌch tsaʼ bʌ ujti tiʼ tojlel Pablo, an jumpʼejl tsʌts bʌ i wocol lajal bʌ bajcheʼ chʼix tiʼ bʌcʼtal i uxsujtel tsiʼ cʼajtibe Jehová ti wocol tʼan chaʼan miʼ locʼsʌben. ¿Tsaʼ ba i jacʼbe Jehová jiñi i yoración tac? Tsaʼʌch, pero mach cheʼic bajcheʼ pijtʌbil i chaʼan. Jehová maʼañic tsiʼ locʼsʌbe jiñi i wocol, pero tsaʼʌch i yʌqʼue i pʼʌtʌlel chaʼan chʌn xucʼul miʼ melben i yeʼtel (2 Cor. 12:7-10).

6. ¿Chucoch an i tajol Jehová maʼañic miʼ jacʼbeñonla la coración yilal?

⁶ Tajol joñonla jaʼel mach cheʼic mi caj lac jacʼbentel bajcheʼ pijtʌbil lac chaʼan. Pero miʼ mejlel lac ñop chaʼan Jehová yujil chuqui jiñi ñumen wem bʌ chaʼañonla. Tiʼ sujm, «ñumento miʼ mejlel i mel cheʼ bajcheʼ pejtelel chuqui mi laj cʼajtiben o chuqui mi lac ñaʼtan» (Efes. 3:20). Jin chaʼan, miʼ mejlel ti jajqʼuel la coración cheʼ bʌ mach pijtʌbilic lac chaʼan yicʼot cheʼ bajcheʼ mach ñaʼtʌbil lac chaʼan.

7. ¿Chucoch an i tajol yom mi laj qʼuextan chuqui tac mi laj cʼajtiben Jehová? Alʌ jumpʼejl ejemplo.

⁷ Cheʼ bʌ tsaʼix lac ñumen chʼʌmbe i sujm chuqui jiñi yom bʌ Jehová tajol yom mi laj qʼuextan chuqui tac tsaʼ laj cʼajtibe. Laʼ laj cʌn tiʼ tojlel jiñi hermano Martin Poetzinger. Cheʼ bʌ tsijib ñujpuñemto, tsaʼ chojqui majlel ti jumpʼejl campo chaʼan nazijob. Ti ñaxan, tsiʼ cʼajtibe Jehová chaʼan miʼ cojlel yicʼot chaʼan mi chaʼ mejlel ti ajñel yicʼot i yijñam i miʼ chaʼleñob subtʼan. Pero tsaʼ ñumi chaʼpʼejl semana i Jehová maʼañic woliʼ jacʼben i yoración yilal come maʼañic tsaʼ ajqʼui ti libre. Jin chaʼan jiñi hermano Poetzinger tsiʼ cʼajtibe: «A wocolic, coltañon chaʼan mij qʼuel chuquiyes jiñi a wom bʌ chaʼan mic mel (chaʼlen)». Cheʼ jiñi, tsaʼ caji i ñaʼtan pejtelel woli bʌ i ñusañob jiñi hermanojob yaʼ bʌ añob jaʼel ti jiñi campo chaʼan nazijob, cabʌlob muʼ bʌ i wen pensariñob i yijñam yicʼot i yalobilob. Jin chaʼan, jiñi hermano Poetzinger tsiʼ chaʼ  sube Jehová: «Wocolix a wʌlʌ chaʼan jiñi tsijiʼ bʌ queʼtel. Coltañon chaʼan mic pʼʌtʼesan yicʼot mic ñuqʼuesʌben i pusicʼal jiñi quermañujob». I jiñʌch tsaʼ bʌ i mele ti jiñi 9 jab cheʼ bʌ yaʼ ñupʼul.

8. Cheʼ bʌ mi lac chaʼlen oración, ¿chuqui jiñi ñuc bʌ i cʼʌjñibal yom bʌ mi laj cʼajtesan?

⁸ Yom mi laj cʼajtesan chaʼan Jehová mucʼʌch caj i tsʼʌctesan jiñi ñaʼtʌbil bʌ i chaʼan cheʼ tiʼ yorajlel. Mi caj i junyajl jisan pejtelel muʼ bʌ i yʌqʼueñonla lac ñusan wocol, cheʼ bajcheʼ jiñi cʼamʌjel tac, jiñi chʌmel, jiñi icʼ jaʼal yicʼot yan tac bʌ. Jehová mi caj i cʼʌn jiñi i Yumʌntel chaʼan miʼ tsʼʌctesan jiñi albil bʌ i chaʼan (Dn. 2:44; Apoc. 21:3, 4). Pero cheʼ bʌ maxto cʼoti i yorajlel jiñi, muqʼuixto caj i bej acʼ chaʼan Satanás miʼ yuman ili pañimil (mulawil) (Juan 12:31; Apoc. 12:9). b Mi Jehová miʼ laj jisan pejtelel jiñi wocol tac am bʌ ili ora, miʼ mejlel ti ñaʼtʌntel chaʼan Satanás weñʌch woli ti yumʌntel. Jin chaʼan, anquese yomixto mi lac pijtan chaʼan Jehová miʼ tsʼʌctesan jiñi albil tac bʌ i chaʼan, mach yomic i yʌl chaʼan maʼañic miʼ coltañonla. Laʼ laj qʼuel chuqui tac miʼ mel Jehová ti lac tojlel.

9. ¿Bajcheʼ miʼ coltañonla Jehová cheʼ bʌ mi lac chʼʌm decisión tac? Alʌ jumpʼejl ejemplo.

⁹ Miʼ yʌqʼueñonla lac ñaʼtʌbal. Jehová miʼ yʌcʼ i tʼan chaʼan mi caj i yʌqʼueñonla lac ñaʼtʌbal chaʼan mi lac chʼʌm wen tac bʌ decisión. Ñumento i cʼʌjñibal lac chaʼan i ñaʼtʌbal cheʼ bʌ an chuqui mi caj lac yajcan lac mel muʼ bʌ caj i qʼuextan laj cuxtʌlel, cheʼ bajcheʼ mi mucʼʌch caj lac ñujpuñel o maʼañic (Sant. 1:5). Laʼ laj cʌn tiʼ tojlel juntiquil hermana i bajñelto bʌ i cʼabaʼ María. c Tijicña woliʼ melben i yeʼtel (troñel) Jehová bajcheʼ precursora regular cheʼ bʌ tsiʼ cʌñʌ juntiquil hermano. Miʼ yʌl: «Tsaʼ sujtiyon lon ti wem bʌ amigo i tsaʼ caji lon c mulan lon c bʌ. Cujil chaʼan añʌch chuqui yom mic mel, jin chaʼan tsaʼ c wen chaʼle oración. I cʼʌjñibal c chaʼan i coltaya Jehová, pero cujil chaʼan mach jiñic mi caj i chʼʌm jiñi decisión». María miʼ yʌl chaʼan Jehová tsaʼʌch i jacʼbe i yoración tac i tsiʼ yʌqʼue i ñaʼtʌbal. ¿Bajcheʼ? Tiʼ sʌcla información ti jiñi lac jun tac i tsiʼ taja cabʌl tema tsaʼ bʌ i jacʼbe i cʼajtiya tac. Cheʼ jaʼel, come i mamá i testigojʌch Jehová, tsiʼ yʌqʼue wen tac bʌ ticʼojel tsaʼ bʌ i colta i wen ñaʼtan jiñi woli bʌ i yubin. Ti wiʼil, María tsiʼ chʼʌmʌ jumpʼejl wem bʌ decisión.

10. Cheʼ bajcheʼ miʼ yʌl Filipenses 4:13, ¿bajcheʼ mi caj i coltan Jehová jiñi i wiñicob? Alʌ jumpʼejl ejemplo. (Qʼuele jaʼel jiñi foto).

¹⁰ Miʼ yʌqʼueñonla lac pʼʌtʌlel chaʼan mi lac lʌtʼ. Cheʼ bajcheʼ tsiʼ mele tiʼ tojlel jiñi apóstol Pablo, Jehová mi caj i yʌqʼueñonla lac pʼʌtʌlel chaʼan mi lac lʌtʼ jiñi wocol tac (pejcan Filipenses  4:13). Laʼ laj qʼuel bajcheʼ tsiʼ colta juntiquil hermano i cʼabaʼ Benjamin. Cʼʌlʌl cheʼ bʌ xcolelto, cabʌl jab tsaʼ chumle yicʼot i familia ti jumpʼejl campo chaʼan xputsʼelob yaʼ ti África. Miʼ yʌl: «Tsaʼ c chʌn cʼajtibe Jehová chaʼan miʼ yʌqʼueñon c pʼʌtʌlel chaʼan mic mel chuqui toj. Tsaʼʌch i jacʼʌ jiñi coración tac cheʼ bʌ tsiʼ yʌqʼueñon c ñʌchʼtʌlel, c chʼejlel chaʼan mic chʌn chaʼlen subtʼan yicʼot lac jun tac chaʼan mic chʌn lʌcʼtesan c bʌ tiʼ tojlel». I miʼ bej al: «Cheʼ bʌ tsaʼ c pejcʌbe i yexperiencia yambʌ hermanojob i tsaʼ j qʼuele bajcheʼ Jehová tsiʼ coltayob i lʌtʼ, tsiʼ coltayon chaʼan mic chʌn chaʼlen wersa yicʼot chaʼan chʌn xucʼul mi cajñel».

11, 12. ¿Bajcheʼ miʼ mejlel i cʼʌn Jehová jiñi la quermañujob chaʼan miʼ jacʼ la coración tac? (Qʼuele jaʼel jiñi foto).

¹¹ Miʼ cʼʌn jiñi la quermañujob. Cheʼ bʌ jumpʼejl jachix acʼʌlel yom chaʼan miʼ chʌmel, Jesús tsiʼ wen chaʼle oración. Tsiʼ cʼajtibe Jehová chaʼan maʼañic miʼ yʌjlel chaʼan woliʼ pʼaj (ñiqʼuisuben). Pero Jehová tsiʼ chocbe cʼotel juntiquil ángel, lajal bʌ bajcheʼ i yermañu, chaʼan miʼ pʼʌtʼesan (Luc. 22:42, 43). Cheʼ jaʼel, Jehová miʼ mejlel i coltañonla cheʼ bʌ juntiquil hermano miʼ pejcañonla o miʼ julaʼtañonla. Ti lac pejtelel yom mi lac chaʼlen wersa chaʼan mi lac suben wem bʌ tʼan jiñi la quermañujob (Pr. 12:25).

¹² Laʼ laj qʼuel tsaʼ bʌ ujti tiʼ tojlel juntiquil hermana i cʼabaʼ Míriam. Cheʼ bʌ maxto cabʌlic semana chʌmen i ñoxiʼal, i bajñel jach tsaʼ ajñi tiʼ yotot i wen chʼijyem tsiʼ yubi i bʌ. Maʼañic tsiʼ cʌyʌ uqʼuel, i cʼʌjñibal i chaʼan tsiʼ yubi cheʼ an majqui miʼ pejcan. Miʼ yʌl: «Maʼañic c wersa chaʼan an majqui mic pejcan, jin chaʼan tsaʼ c melbe oración Jehová. Cheʼ bʌ wolito i loqʼuel i yaʼlel c wut tiʼ subu i bʌ jiñi teléfono. Jiñʌch juntiquil anciano, juntiquil wem bʌ amigo». Jiñi hermano yicʼot i yijñam tsiʼ ñuqʼuesʌbeyob i pusicʼal Míriam, i miʼ yʌl chaʼan jiñʌch Jehová tsaʼ bʌ i yʌcʼʌ chaʼan ili hermano miʼ pejcan.

13. Alʌ jumpʼejl ejemplo chaʼan bajcheʼ Jehová miʼ mejlel i cʼʌn jiñi mach añic miʼ chʼujutesañob chaʼan miʼ jacʼbeñonla la coración tac.

¹³ Miʼ mejlel i cʼʌn jiñi mach bʌ añic miʼ chʼujutesañob (Pr. 21:1). An i tajol, Jehová miʼ jacʼben i yoración i wiñicob cheʼ bʌ miʼ cʼʌn jiñi mach bʌ añic miʼ chʼujutesañob chaʼan miʼ  coltañob. Jumpʼejl ejemplo, tsiʼ colta Nehemías chaʼan jiñi rey Artajerjes miʼ yʌqʼuen permiso chaʼan miʼ chaʼ sujtel majlel ti Jerusalén i miʼ mejlel i chaʼlen coltaya chaʼan miʼ chaʼ tojʼesʌntel jiñi tejclum (Neh. 2:3-6). Ili ora, Jehová muʼto i mejlel i cʼʌn jiñi mach bʌ i Testigojobic chaʼan miʼ coltañoñobla cheʼ bʌ i cʼʌjñibal lac chaʼan.

14. ¿Bajcheʼ miʼ coltañet tsaʼ bʌ ujti tiʼ tojlel Soo Hing? (Qʼuele jaʼel jiñi foto).

¹⁴ Juntiquil hermana i cʼabaʼ Soo Hing miʼ yʌl chaʼan Jehová tsiʼ cʼʌñʌ juntiquil doctor chaʼan miʼ coltan. Jiñi i yalobil mach weñic an tiʼ jol i tsiʼ taja jumpʼejl accidente, jin chaʼan Soo Hing yicʼot i ñoxiʼal tsiʼ cʌyʌyob i yeʼtel chaʼan miʼ cʌntañob. Tiʼ caj ili, tsiʼ tajayob wocol chaʼan taqʼuin. Wen wocol jax tsiʼ ñusa Soo Hing, tsiʼ yʌlʌ chaʼan mach cujchix i chaʼan tsiʼ yubi, chaʼan maʼañix i wersa. Jin chaʼan, tiʼ sube Jehová bajcheʼ miʼ yubin i bʌ i tsiʼ cʼajtibe i coltaya. Jiñi doctor tsaʼʌch i mulaj i coltañob, tsiʼ chʼʌmʌ tiʼ wenta chaʼan miʼ tajob jiñi coltʌntel muʼ bʌ i yʌcʼ jiñi yumʌlob i tsiʼ tajayob jaʼel baqui mi chumtʌlob mach bʌ wen letsic i tojol. Ti wiʼil, Soo Hing tsiʼ yʌlʌ: «Tsaʼ lon j qʼuelbe i coltaya Jehová tiʼ pejtelel ili wocol. Tiʼ sujm miʼ ñʌchʼtan la coración» (Sal. 65:2).

15. ¿Chuqui tsiʼ colta juntiquil hermana chaʼan miʼ qʼuel chaʼan Jehová wolʌch i jacʼben i yoración tac?

¹⁵ Lʌcʼʌ tiʼ pejtelel ora, Jehová mach wen ñuquic bajcheʼ miʼ jacʼ la coración tac. Pero jiñi i jacʼbal muʼ bʌ i yʌqʼueñonla jiñʌch i cʼʌjñibal bʌ lac chaʼan chaʼan chʌn xucʼul mi la cajñel. Jin chaʼan, yom mi lac wen qʼuel bajcheʼ miʼ jacʼbeñonla jiñi lac Tat am bʌ ti panchan. Juntiquil hermana i cʼabaʼ Yoko tsiʼ poj ñaʼta chaʼan maʼañic woliʼ jacʼbentel i yoración tac. Pero tsaʼ caji i tsʼijbun pejtelel jiñi muʼ bʌ i cʼajtiben Jehová. Mach wen jalic tsaʼ ñumi, tsiʼ chaʼ qʼuele jiñi tsaʼ bʌ i tsʼijbu i tsiʼ qʼuele chaʼan Jehová tsaʼʌch i jacʼbe cabʌl i yoración, cheʼto jaʼel jiñi mach bʌ cʼajalix i chaʼan. Yomʌch cheʼ mi lac bixel locʼben i yorajlel chaʼan mi lac wen ñaʼtan bajcheʼ an i jacʼbeyonla Jehová la coración tac (Sal. 66:19, 20).

16. ¿Bajcheʼ miʼ coltañonla jiñi ñopoñel cheʼ bʌ mi lac chaʼlen oración? (Hebreos 11:6).

¹⁶ Mach cojach yom an lac ñopoñel chaʼan mi lac pejcan Jehová ti oración, yicʼotʌch jaʼel chaʼan mi lac chʼʌm i jacʼbal muʼ bʌ i yʌqʼueñonla, mach yʌlʌyic baqui bʌ (pejcan Hebreos 11:6). Laʼ laj qʼuel tsaʼ bʌ ujti tiʼ tojlel Mike yicʼot Chrissy, jumpʼejl xñujpuñel tsaʼ bʌ  i mulayob majlel ti eʼtel ti Betel. Mike miʼ yʌl: «Mach junsujtelic jach tsaʼ lon c choco majlel jiñi solicitud i tsaʼ lon c sube Jehová chaʼan jiñi, pero maʼañic baʼ ora tsaʼ pʌjyiyon lon». Mike yicʼot Chrissy tsiʼ chʌn ñopoyob chaʼan Jehová yujil baqui mi caj i cʼʌñob. Tsaʼʌch i bej chaʼleyob wersa chaʼan miʼ wen melbeñob i yeʼtel: Tsajñiyob bajcheʼ precursor regular baqui ñumen yomto coltʌntel ti subtʼan i cheʼ jaʼel tsiʼ chaʼleyob coltaya ti construcción. Ili ora añob bajcheʼ superintendente chaʼan circuito. Mike miʼ yʌl: «Jehová mach tiʼ pejtelelic ora an i jacʼʌ lon coración bajcheʼ pijtʌbil lon c chaʼan, pero añʌch i jacʼʌ i ñumen wento bajcheʼ an i mele».

17, 18. Cheʼ bajcheʼ miʼ yʌl Salmo 86:6, 7, ¿chuqui jiñi la cujil bʌ?

¹⁷ (Pejcan Salmo 86:6, 7). David tsiʼ wen ñopo chaʼan Jehová mucʼʌch i ñʌchʼtan yicʼot miʼ jacʼben i yoración tac. Jiñʌch muʼ bʌ i mejlel a ñop jaʼel. Jiñi ejemplo tac tsaʼ bʌ laj qʼuele ti ili estudio miʼ pʌsbeñonla chaʼan Jehová miʼ mejlel i yʌqʼueñonla lac ñaʼtʌbal yicʼot lac pʼʌtʌlel chaʼan mi lac lʌtʼ. Cheʼ jaʼel, tsaʼ laj qʼuele chaʼan miʼ mejlel i cʼʌn jiñi la quermañujob o yambʌ lac piʼʌlob maʼañic bʌ miʼ chʼujutesañob chaʼan miʼ coltañonla.

¹⁸ Anquese Jehová tajol mach cheʼic mi caj i jacʼbeñonla la coración bajcheʼ pijtʌbil lac chaʼan, la cujil chaʼan mucʼʌch caj i jacʼbeñonla. Mi caj i yʌqʼueñonla chuqui i cʼʌjñibal lac chaʼan, i mi caj i mel cheʼ bʌ i yorajlelix miʼ qʼuel. Jin chaʼan, laʼ lac bej chaʼlen oración i laʼ lac ñop chaʼan Jehová mi caj i cʌntañonla ili ora yicʼot chaʼan ti talto bʌ qʼuin mi caj i yʌqʼueñonla pejtelel chuqui la com (Sal. 145:16).