1, 2. ¿Chuqui ti ñuc bʌ decisión tsiʼ chʼʌmʌyob jiñi judíojob tsaʼ bʌ chumleyob ti Babilonia? (Esdras 1:2-4).

 ¡TSAʼ ajqʼui jiñi tʼan! Jiñi judíojob tsaʼ bʌ ajñiyob 70 jab ti Babilonia muqʼuix i chaʼ mejlelob ti sujtel majlel tiʼ lumal, ti Israel (pejcan Esdras 1:2-4). Cojach Jehová tsaʼ mejli i mel (chaʼlen) iliyi. ¿Chucoch? Come jiñi babiloniojob mach ñʌmʌlic i colob jiñi cʌchʌloʼ bʌ i chaʼan (Is. 14:4, 17). Pero Babilonia tsaʼ jisʌnti, i jiñi tsijiʼ bʌ yumʌl tsiʼ yʌlʌ chaʼan jiñi judíojob muqʼuix i mejlelob ti loqʼuel ti jiñi país. Pejtelel jiñi judíojob, ñumento jiñi i joloʼ bʌ familia, yomʌch miʼ chʼʌmob jumpʼejl ñuc bʌ decisión: Mi caj i loqʼuelob ti Babilonia o mi caj i cʌytʌlob. Tajol an wocolʌch bʌ tsiʼ yubiyob chaʼan miʼ ñaʼtañob chuqui mi caj i melob. Laʼ laj qʼuel chucoch.

² An wen ñoxobix bʌ chaʼan miʼ chaʼleñob xʌmbal ti jiñi ñajt bʌ bij yicʼot bʌbʌqʼuen bʌ. Cheʼ jaʼel, cabʌl judíojob jin jach i cʌñʌyob Babilonia come yaʼ tsaʼ coliyob. Tiʼ tojlelob, Israel jiñi jach i tejclum i ñojteʼelob. Cheʼ jaʼel, an judíojob tsaʼ bʌ sujtiyob ti rico ti Babilonia. Jin chaʼan, tajol wocolʌch tsiʼ yubiyob chaʼan miʼ cʌyob jiñi wen tac bʌ i yotot yicʼot i choñoñelob, i miʼ majlelob ti chumtʌl baqui mach i cʌñʌyobic.

3. ¿Chuqui ti bendición mi caj i tajob jiñi judíojob muʼ bʌ i chaʼ sujtelob majlel ti Israel?

 ³ Tiʼ tojlel jiñi xucʼul bʌ judíojob, ñumen cabʌlto i wenlel mi caj i tajob cheʼ miʼ chaʼ sujtelob majlel ti Israel mach yʌlʌyic chuqui mi caj i cʌyob. Ñumen ñuc bʌ bendición jiñʌch cheʼ mi caj i chaʼ chʼujutesañob Jehová cheʼ bajcheʼ miʼ mulan. Ti Babilonia an ñumen ti 50 templo chaʼan mach bʌ i sujmic diosob, pero mi jumpʼejlic i chaʼan bʌ Jehová. Maʼañic pulʌntib i mach chajpʌbilic bajcheʼ añob jiñi sacerdotejob, jin chaʼan jiñi israelitajob maʼañic miʼ mejlel i yʌcʼob majtañʌl tac cheʼ bajcheʼ miʼ cʼajtin jiñi Mandar tsaʼ bʌ aqʼuenti Moisés. Cheʼ jaʼel, ñumen cabʌlobto jiñi muʼ bʌ i chʼujutesañob mach bʌ i sujmic diosob, i mach wen cabʌlobic jiñi muʼ bʌ i qʼuelob ti ñuc Jehová yicʼot i mandar tac. Jin chaʼan, yonlel muʼ bʌ i bʌcʼñañob Dios yomobʌch chaʼ sujtel majlel tiʼ lumal yicʼot i tojʼesañob jiñi sʌc bʌ chʼujutesaya.

4. ¿Chuqui tiʼ sube Jehová jiñi judíojob?

⁴ Chaʼan miʼ cʼotelob ti Israel mi caj i xʌñob majlel cheʼ bʌ chʌmpʼejl uw. Pero Jehová tiʼ subeyob chaʼan mi caj i coltañob chaʼan maʼañic chuqui miʼ mʌctañob ti bij. Isaías tiʼ tsʼijbu: «Chajpʌbenla i bijlel lac Yum yaʼ ti colem bʌ i tiquiñal pañimil. Pʌtbenla majlel ñuc bʌ bij yaʼ ti tiquin lum chaʼan tal lac Dios. [...] Laʼ tojʼesʌntic jini bij yaʼ bʌ xoyolmetel jax. Laʼ mejlic bij baʼ bulul bexel» (Is. 40:3, 4). Cheʼ bajcheʼ jiñi, jiñi judíojob mach wocolic mi caj i xʌñob majlel ti jiñi bij yicʼot orajach mi caj i cʼotelob come mach witsic jiñi bij.

5. ¿Chuqui i cʼabaʼ tsaʼ otsʌbenti jiñi bij am bʌ ti Babilonia muʼ bʌ i cʼʌlʌl cʼotel ti Israel?

⁵ Cabʌl bij an i cʼabaʼ o i númerojlel. I jiñi Biblia miʼ yʌl chaʼan jiñi bij tsaʼ bʌ i taja ti tʼan Isaías añʌch i cʼabaʼ jaʼel. Isaías 35:8 miʼ yʌl: «Yaʼi mi caj i ñumel colem bij. Jini bij mi caj i yotsʌbentel i cʼabaʼ Chʼujul bʌ bij. Come maʼanic mi caj i xʌñob jini añoʼ bʌ i mul». Mi caj laj qʼuel chuqui i sujmlel tiʼ tojlel jiñi israelitajob iliyi yicʼot ti lac tojlel.

6. ¿Chucoch tsaʼ subenti ti chʼujul jiñi bij?

⁶ Wen utsʼatax i cʼabaʼ jiñi bij. Tsaʼ subenti ti «Chʼujul bʌ bij» come yaʼ ti Israel mach yomic miʼ yajñel mi juntiquilic muʼ bʌ i chaʼlen tsʼiʼlel, miʼ chʼujutesan mach bʌ i sujmic Dios o miʼ mel tsʌts tac bʌ mulil. Jiñi judíojob muʼ bʌ i chaʼ cʼotelob tiʼ lumal yomʌch miʼ sujtelob ti chʼujul bʌ tejclum tiʼ wut Dios (Dt. 7:6). Anquese weñʌch cheʼ bʌ jiñi judíojob tsaʼ loqʼuiyob ti Babilonia, añixto chuqui yom miʼ melob chaʼan utsʼat miʼ qʼuejlelob ti Jehová.

7. ¿Chuqui tac yom miʼ qʼuextañob chaʼtiqui uxtiquil judíojob? Alʌ jumpʼejl ejemplo.

⁷ Cheʼ bajcheʼ tsaʼix ajli, cabʌl judíojob yaʼix tsiʼ yilayob pañimil (chʼocʼayob) ti Babilonia, jin chaʼan an tsaʼix bʌ i toybeyob i ñaʼtʌbal yicʼot i melbal (chaʼlibal) jiñi babiloniojob. Ti wiʼil, Esdras tsiʼ yubi chaʼan ti jiñi ñaxam bʌ judíojob tsaʼ bʌ chaʼ sujtiyob majlel ti Israel, an tsaʼ bʌ ñujpuñiyob yicʼot xʼixicob chʼoyoloʼ bʌ ti yambʌ tejclum tac (Éx. 34:15, 16; Esd. 9:1, 2). Cheʼ jaʼel, Nehemías tsaʼ toj sajti i pusicʼal cheʼ bʌ tsiʼ qʼuele chaʼan jiñi i yalobilob jiñi judíojob mach yujilobix hebreo (Dt. 6:6, 7; Neh. 13:23, 24). ¿Bajcheʼqui mi caj i cʼuxbiñob yicʼot i chʼujutesañob Jehová jiñi i yalobilob mi maʼañic miʼ chʼʌmbeñob i sujm jiñi i Tʼan Dios tsʼijbubil bʌ ti hebreo? (Esd. 10:3, 44). Tsiquil chaʼan jiñi judíojob añʌch cabʌl chuqui tac yom miʼ qʼuextañob i mucʼʌch caj i coltañob cheʼ bʌ yaʼix miʼ chumtʌlob ti Israel, baqui wolix (choncolix) i chaʼ tejchel i chʼujutesʌntel Jehová cheʼ bajcheʼ miʼ mulan (Neh. 8:8, 9).

8. ¿Chucoch i cʼʌjñibal lac chaʼan jiñi «Chʼujul bʌ bij»? (Qʼuele jiñi dibujo am bʌ tiʼ tejchibal).

 ⁸ ¿Chucoch i cʼʌjñibal lac chaʼan cheʼ mi laj cʌn jiñi tsaʼ bʌ ujti tiʼ tojlel jiñi judíojob? Weno, joñonla jaʼel lajal bajcheʼ woliyonla (yʌquelonla) ti xʌmbal ti jiñi «Chʼujul bʌ bij». Ili bij miʼ coltañonla lac chʼujutesan Jehová ti ili ora i chaʼan ti talto bʌ qʼuin mi lac taj jiñi bendición tac muʼ bʌ caj i chʼʌm tilel jiñi i Yumʌntel. Jin chaʼan, yom mi lac chʌn ajñel ti jiñi bij mach yʌlʌyic mi jiñi lac pijtaya jiñʌch chaʼan mi caj lac majlel ti panchan o mi yaʼ ochemonla ti jiñi yambʌ tiñʌmeʼ tac (Juan 10:16). b Cʼʌlʌl ti 1919, cabʌl lac piʼʌlob tsaʼix i techeyob xʌmbal ti jiñi chʼujul bʌ bij come tsaʼix loqʼuiyob ti jiñi Ñuc bʌ Babilonia, yom bʌ i yʌl pejtelel jiñi mach bʌ i sujmic ñopbalʌl. Tajol jatet añix a mele jaʼel. Anquese ili bij añix cheʼ bʌ 100 jab tsaʼ jajmi, ñumen wajalix tsaʼ caji ti chajpʌntel.

9. Cheʼ bajcheʼ miʼ yʌl Isaías 57:14, ¿bajcheʼ tsaʼ jajmi tilel jiñi «Chʼujul bʌ bij»?

⁹ Jehová tsaʼʌch i colta jiñi judíojob chaʼan maʼañic chuqui miʼ mʌctañob ti jiñi bij (pejcan Isaías 57:14). Cheʼ bʌ anto yom miʼ cʼotel 1919, Jehová tsiʼ teche i cʼʌn xucʼul bʌ wiñicob chaʼan miʼ jam tilel jiñi «Chʼujul bʌ bij» chaʼan jiñi lac piʼʌlob miʼ mejlelob ti loqʼuel ti jiñi Ñuc bʌ Babilonia yicʼot chaʼan miʼ chʼujutesañob cheʼ bajcheʼ miʼ mulan (laja yicʼot Isaías 40:3). Laʼ laj qʼuel chuqui tac ti eʼtel (troñel) tsiʼ meleyob ili wiñicob chaʼan miʼ chajpañob tilel jiñi bij.

10, 11. ¿Chuqui ti wenlel tsaʼ tajle cheʼ bʌ tsaʼix chaʼlenti ti imprimir yicʼot ti traducir jiñi Biblia? (Qʼuele jaʼel jiñi dibujo).

¹⁰ Impresión. Cʼʌlʌl ti jiñi jabil 1450 maxto añic miʼ chaʼlentel ti imprimir jun tac. Jin chaʼan, mucʼ jach i tsʼijbuntel i copiajlel jiñi Biblia. Iliyi wen jalʌch ti melol (pʌtol) i tiʼ caj jiñi mach wen cabʌlic i copiajlel i wen lets tac i tojol. Pero cheʼ bʌ tsaʼ mejli jumpʼejl máquina chaʼan impresión, mach wocolic tsaʼ mejli ti loqʼuel jiñi Biblia yicʼot ti ñumen pujquel.

¹¹ Traducción. Ti wajali jiñi Biblia an jach ti latín, jumpʼejl tʼan tsaʼ jach bʌ i ñaʼtayob jiñi lac piʼʌlob tsaʼ bʌ i wen qʼueleyob jun. Pero come tsaʼix caji ti chaʼlentel ti imprimir jun tac, wiñicob muʼ bʌ i bʌcʼñañob Dios tsiʼ chaʼleyob wersa chaʼan miʼ chaʼleñob ti traducir jiñi Biblia ti jiñi tʼan yujiloʼ bʌ jiñi lac piʼʌlob. Cheʼ bajcheʼ jiñi, jiñi muʼ bʌ i pejcañob i Tʼan Dios tsaʼ mejli i lajob jiñi muʼ bʌ i cʌntesʌntelob yaʼ ti iglesia tac yicʼot muʼ bʌ i yʌl jiñi Biblia.

12, 13. Alʌ jumpʼejl ejemplo chaʼan bajcheʼ tsaʼ pʌsle chaʼan mach i sujmic i cʌntesa jiñi ñopbalʌl tac.

¹² Coltʌntel chaʼan mi lac tsajin jiñi Biblia. An lac piʼʌlob tsaʼ bʌ caji i tsajiñob (wen qʼuelob) jiñi Biblia, i jiñi tsaʼ bʌ i cʌñʌyob tsaʼʌch i subuyob. Jiñi tsiʼ wen michʼesa jiñi añoʼ bʌ ñuc bʌ i yeʼtel ti ñopbalʌl. Jumpʼejl ejemplo, cheʼ ti jabil 1800, cabʌl wiñicob weñoʼ bʌ i pusicʼal tsaʼ caji i locʼsañob tratado yicʼot folleto tac tsaʼ bʌ i jamʌ subu chaʼan mach i sujmic i cʌntesa jiñi iglesia tac.

¹³ Cheʼ ti 1835, juntiquil wiñic muʼ bʌ i bʌcʼñan Dios i cʼabaʼ Henry Grew, tsiʼ locʼsa jumpʼejl folleto muʼ bʌ i yʌl chuqui mi lac chaʼlen cheʼ bʌ mi lac chʌmel. Tiʼ tsictesa chaʼan jiñi cuxtʌlel mach bʌ añic miʼ mejlel ti chʌmel jumpʼejlʌch majtañʌl muʼ bʌ i yʌcʼ Dios i maʼañic miʼ mejlel lac bajñel taj. Cheʼ ti 1837, George Storrs tsiʼ taja jiñi folleto cheʼ bʌ an ti tren, cheʼ bʌ tsiʼ pejca tsiʼ mulaj i suben yañoʼ bʌ come tsiʼ cʌñʌ junchajp ñuc bʌ i cʼʌjñibal. Ti 1842, tsiʼ ñusa discurso tac am bʌ i temajlel «¿Son inmortales los inicuos?». Jiñi  tsaʼ bʌ i tsʼijbu tsaʼʌch i wen colta juntiquil chʼiton wiñic i cʼabaʼ Charles Taze Russell.

14. ¿Bajcheʼ tsiʼ colta jiñi hermano Russell yicʼot i piʼʌlob jiñi tsaʼ bʌ i meleyob yambʌlob? (Qʼuele jaʼel jiñi dibujo).

¹⁴ Jiñi tsaʼ bʌ i meleyob jiñi wiñicob tsaʼʌch i wen colta Rusell yicʼot jiñi i piʼʌlob. Come ti jiñi bʌ ora añix diccionario, concordancia yicʼot yan tac bʌ Biblia, jiñʌch tsaʼ bʌ i cʼʌñʌyob cheʼ bʌ tiʼ tsajiyob jiñi Biblia. Cheʼ jaʼel, tsaʼʌch i wen coltayob jiñi tsaʼ bʌ i meleyob Henry Grew, George Storrs yicʼot yañoʼ bʌ. Russell yicʼot jiñi i piʼʌlob jaʼel tsaʼʌch i meleyob ñuc bʌ eʼtel ti jiñi «Chʼujul bʌ bij» come tsaʼ caji i locʼsañob libro yicʼot tratado tac muʼ bʌ i yʌl chaʼan jiñi Biblia.

15. ¿Chuqui ñuc tac bʌ i cʼʌjñibal tsaʼ ujti ti 1919?

¹⁵ Ti 1919, jiñi i tejclum Dios maʼañix tsaʼ chʌn ajñi tiʼ cʼʌb jiñi Ñuc bʌ Babilonia. Ti jiñi jabil tsaʼ waʼchoconti jiñi «xucʼul bʌ xyaj eʼtel wen am bʌ i ñaʼtʌbal» chaʼan jiñi lac piʼʌlob weñoʼ bʌ i pusicʼal miʼ mejlel i techob xʌmbal ti jiñi «Chʼujul bʌ bij» (Mat. 24:45-47). Jiñi tsaʼ bʌ i techeyob xʌmbal ti jiñi bij tsaʼ mejli i ñumen cʌñob Jehová yicʼot jiñi albil bʌ i chaʼan, come jiñi yañoʼ bʌ tsaʼix i chajpayob jiñi bij (Pr. 4:18). Cheʼ jaʼel, tsaʼ mejli i qʼuextañob i melbal chaʼan wen miʼ qʼuejlelob ti Dios. Jehová maʼañic tsiʼ pijta chaʼan orajach miʼ luʼ qʼuextañob i melbal, an i cʼunteʼ sʌqʼuesa tilel jiñi i tejclum (qʼuele jiñi recuadro « Jehová an i cʼunteʼ cʼunteʼ sʌqʼuesa tilel i tejclum»). ¡Wen tijicña mi caj la cubin cheʼ bʌ miʼ cʼotel jiñi qʼuin cheʼ bʌ pejtelel muʼ bʌ lac mel jiñʌch muʼ bʌ i mulan Jehová! (Col. 1:10).

16. ¿Chuqui ti eʼtel tac an mejli chaʼan miʼ cʌntʌntel jiñi «Chʼujul bʌ bij»? (Isaías 48:17; 60:17).

¹⁶ Chaʼan jumpʼejl bij wen miʼ yajñel yomʌch miʼ cʌntʌntel. Jin chaʼan, cʼʌlʌl ti 1919, an mejli eʼtel tac chaʼan miʼ cʌntʌntel jiñi «Chʼujul bʌ bij» chaʼan cabʌl lac piʼʌlob miʼ mejlel i loqʼuelob ti jiñi Ñuc bʌ Babilonia. Cheʼ bʌ tsaʼ jaxto waʼchoconti jiñi «xucʼul bʌ xyaj eʼtel wen  am bʌ i ñaʼtʌbal» ti ora tsaʼ caji ti eʼtel. Ti 1921, tsiʼ locʼsa jiñi libro El Arpa de Dios, chaʼan miʼ coltan lac piʼʌlob chaʼan miʼ cʌñob jiñi i sujmlel. Tsaʼ pujqui lʌcʼʌ ti 6 millón ti 36 tʼan tac i yonlelob tsiʼ cʌñʌyob i sujmlel. I maxto jali tsaʼ loqʼui jiñi jun Ubin a tijicñʌyel, woli bʌ i wen coltañonla chaʼan mi la cʌcʼ estudio. Ti ili cojix tac bʌ qʼuin, Jehová an i cʼʌñʌ i yorganización chaʼan miʼ bej aqʼueñonla jiñi chʼujul bʌ bʌlñʌcʼʌl muʼ bʌ i coltañonla chaʼan mi lac chʌn ajñel ti jiñi «Chʼujul bʌ bij» (pejcan Isaías 48:17; 60:17).

17, 18. ¿Baqui miʼ pʌyonla majlel jiñi «Chʼujul bʌ bij»?

¹⁷ Cheʼ bʌ an majqui miʼ tech i chʼʌm estudio, miʼ mejlel la cʌl chaʼan miʼ tech xʌmbal ti jiñi «Chʼujul bʌ bij». An muʼ bʌ jumucʼ chaʼleñob xʌmbal ti jiñi bij, pero miʼ cʌyob. I yambʌlob bej yomobʌch xʌmbal yaʼi come an baqui yom cʼotelob. ¿Baqui?

¹⁸ Jiñi woli bʌ i pijtañob chumtʌl yaʼ ti panchan, jiñi «Chʼujul bʌ bij» miʼ pʌyob majlel tiʼ «paraíso Dios» yaʼ ti panchan (Apoc. 2:7). I jiñi woli bʌ i pijtañob chumtʌl ila ti Lum, ili bij miʼ pʌyob majlel tiʼ yujtibal jiñi Mil jab i Yumʌntel Cristo, cheʼ bʌ jiñi lac piʼʌlob tojobix mi caj i sujtelob. Mi jatet woliyetix ti xʌmbal ti jiñi bij, mach sujtic a qʼuel a pat. Chʌn chaʼlen xʌmbal jinto maʼ cʼotel ti jiñi tsijiʼ bʌ pañimil. Mi lon c pijtan chaʼan mucʼʌch laʼ cʼotel yaʼ baqui laʼ wom. ¡Cʌntan laʼ bʌ!