1. ¿Chuqui miʼ yʌl jiñi Biblia chaʼan jiñi i sujm bʌ cʼuxbiya?

 JIÑI Biblia wen utsʼatax chuqui miʼ yʌl chaʼan jiñi i sujm bʌ cʼuxbiya, miʼ yʌl: «Miʼ lejmel [...] cheʼ bajcheʼ cʼajc wen ticʌw bʌ tilem bʌ ti lac Yum. Mach yajpic i cʼʌcʼal laj cʼuxbiya ti tam bʌ jaʼ» (Cnt. 8:6, 7). b Ili tʼan tac miʼ pʌsbeñonla chaʼan jiñi cʼuxbiya muʼ bʌ i yubiñob jiñi ñujpuñemoʼ bʌ miʼ mejlel ti jalʼan tiʼ pejtelel ora.

2. ¿Chuqui yom miʼ melob jiñi ñujpuñemoʼ bʌ chaʼan maʼañic miʼ jilelob i cʼuxbiya?

² Cheʼ bajcheʼ jiñi cʼajc yom miʼ bej otsʌbentel i siʼil chaʼan maʼañic miʼ yajpel, jiñi ñujpuñemoʼ bʌ yom miʼ chaʼleñob wersa chaʼan maʼañic miʼ jilelob i cʼuxbiya. Pero an i tajol tiʼ caj jiñi wocol tac chaʼan taqʼuin, cʼamʌjel yicʼot cheʼ bʌ miʼ cosañob i yalobilob miʼ mejlel i yʌcʼ chaʼan jiñi cʼuxbiya miʼ jilel majlel. Mi jatet ñujpuñemet, ¿chuqui miʼ mejlel a mel (chaʼlen) chaʼan chʌn pʼʌtʌl miʼ yajñel jiñi cʼajc tilem bʌ ti lac Yum? Ti ili estudio mi caj laj qʼuel uxchajp muʼ bʌ caj i coltañet  chaʼan pʼʌtʌl yicʼot tijicñayetla ti laʼ ñujpuñel. c

3. ¿Chucoch ñuc i cʼʌjñibal cheʼ jiñi ñujpuñemoʼ bʌ i yamigojob Jehová chaʼan maʼañic miʼ jilel jiñi cʼuxbiya? (Eclesiastés 4:12, qʼuele jaʼel jiñi dibujo yicʼot foto).

³ Jiñi ñujpuñemoʼ bʌ yom miʼ chaʼleñob wersa chaʼan wem bʌ i yamigojob Jehová. Mi tiʼ chaʼticlelob miʼ qʼuelob ti ñuc cheʼ i yamigojob Jehová mi caj i mulañob i jacʼbeñob jiñi i ticʼojel tac. Cheʼ bajcheʼ jiñi, mi caj i mejlel i lʌtʼob baqui jach bʌ wocol muʼ bʌ i mejlel i yʌcʼ ti jilel i cʼuxbiyajob (pejcan Eclesiastés 4:12). Cheʼ jaʼel, jiñi i yamigojoʼ bʌ Jehová miʼ chaʼleñob wersa chaʼan miʼ lajiñob jiñi wen tac bʌ i melbal (chaʼlibal). Jumpʼejl ejemplo, miʼ pʌsob i yutslel, yujilob pijt i miʼ ñusʌbeñob i mul yañoʼ bʌ (Efes. 4:32–5:1). Jiñi ñujpuñemoʼ bʌ cheʼo bʌ bajcheʼ ili miʼ ñumen cʼuxbiñob i bʌ. Juntiquil hermana i cʼabaʼ Lena, ñumeñix bʌ ti 25 jab ñujpuñem, miʼ yʌl: «¡Mach wocolic maʼ cʼuxbin yicʼot maʼ qʼuel ti ñuc juntiquil muʼ bʌ i wen cʼuxbin Jehová!».

4. ¿Chucoch Jehová jiñʌch tsiʼ yajca José yicʼot María chaʼan miʼ sujtelob tiʼ tat jiñi Mesías?

⁴ Laʼ laj qʼuel jumpʼejl ejemplo, tiʼ pejtelel i pʼolbal David, Jehová tsiʼ yajca José yicʼot María chaʼan miʼ sujtelob tiʼ papá i mamá jiñi Mesías. ¿Chucoch? Come wem bʌ i yamigojob, i Jehová yujil chaʼan tiʼ pejtelel ora ñaxan mi caj i yʌcʼob tiʼ ñujpuñel. ¿Chuqui miʼ mejlel i cʌñob jiñi ñujpuñemoʼ bʌ tiʼ tojlel José yicʼot María?

5. ¿Bajcheʼ miʼ mejlel i lajiñob i yejemplo José jiñi ñoxiʼalob?

⁵ José tsaʼ sujti ti wem bʌ ñoxiʼal come tiʼ pejtelel ora tiʼ sʌclʌbe i coltaya Jehová. Uxsujtel Dios tiʼ sube bajcheʼ tac yom miʼ cʌntan i familia, i tsaʼʌch i jacʼʌ, anquese tajol wocolʌch tsiʼ yubi (Mat. 1:20, 24; 2:13-15, 19-21). José tsaʼ mejli i cʌntan María come tsaʼʌch i jacʼbe i tʼan Jehová i jiñi tsiʼ colta María chaʼan miʼ ñumen cʼuxbin yicʼot miʼ qʼuel ti ñuc. Cheʼ bajcheʼ José, jatetla ñoxiʼaletʌlbʌla, miʼ mejlel laʼ sʌclan ticʼojel tac am bʌ ti Biblia muʼ bʌ i coltañetla laʼ cʌntan laʼ familia. d Mi caj laʼ pʌs chaʼan mi laʼ cʼuxbin laʼ wijñam cheʼ bʌ mucʼʌch laʼ jacʼ jiñi ticʼojel tac, anquese tajol an tac chuqui yom mi laʼ qʼuextan. Cheʼ bajcheʼ jiñi mi caj i ñumen pʼʌtʼan laʼ ñujpuñel. Juntiquil hermana ti Vanuatu añix bʌ ñumen ti 20 jab ñujpuñem, miʼ yʌl: «Cheʼ bʌ mij qʼuel chaʼan jiñi c ñoxiʼal miʼ sʌclan i coltaya Jehová i mucʼʌch i jacʼ mic ñumen qʼuel ti ñuc. Maʼañic mic chaʼlen  bʌqʼuen i cujil chaʼan mi caj i chʼʌm wen tac bʌ decisión».

6. ¿Chuqui miʼ mejlel i cʌñob jiñi ijñamʌlob tiʼ tojlel María?

⁶ María i yamigajʌch Jehová. Jiñi i ñopoñel mach yaʼic cʌyʌl tiʼ chaʼan bʌ José. Wen i cʌñʌ jiñi Tsʼijbujel tac i miʼ locʼsʌben i yorajlel chaʼan miʼ wen ñaʼtan muʼ bʌ i yʌl (Luc. 1:46; 2:19, 51). María juntiquilʌch wem bʌ ijñamʌl come miʼ wen cʼuxbin Dios. Ili ora cabʌl hermanajob cheʼob bajcheʼ María. Laʼ laj qʼuel tiʼ tojlel Émiko, miʼ yʌl: «Cheʼ bʌ maxto añic c ñoxiʼal, joñon mic bajñel chaʼlen wersa chaʼan mic lʌcʼtesan c bʌ ti Dios. Pero cheʼ bʌ tsaʼ ñujpuñiyon jiñix c ñoxiʼal miʼ mel oración yicʼot miʼ coltan jiñi lon c familia chaʼan miʼ lʌcʼtesan i bʌ ti Dios. Tsaʼ j qʼuele chaʼan jiñi c ñopoñel yaʼ jach cʌyʌl tiʼ chaʼan bʌ c ñoxiʼal. Cujil chaʼan añʌch chuqui yom mic mel chaʼan mic lʌcʼtesan c bʌ ti Jehová. Jin chaʼan, wʌle mic bajñel locʼsʌben i yorajlel chaʼan mic chaʼlen oración, mic pejcan jiñi Biblia yicʼot mic wen ñaʼtan muʼ bʌ i yʌl» (Gál. 6:5). Ijñametbʌla, mi mucʼʌch laʼ chaʼlen wersa laʼ ñumen lʌcʼtesan laʼ bʌ ti Jehová, jiñi laʼ ñoxiʼal mi caj i ñumen cʼuxbiñetla yicʼot mi caj i qʼueletla ti ñuc (Pr. 31:30).

7. ¿Chuqui miʼ mejlel i cʌn jiñi ñujpuñemoʼ bʌ tiʼ tojlel José yicʼot María?

⁷ José yicʼot María tsiʼ laja coltayob i bʌ jaʼel chaʼan chʌn pʼʌtʌlob miʼ yajñelob ti Jehová. Yujilob chaʼan ñuc i cʼʌjñibal cheʼ miʼ tem chʼujutesañob Jehová (Luc. 2:22-24, 41; 4:16). Tsaʼʌch mejli i melob jiñi anquese an i tajol wocolʌch tsiʼ yubiyob, ñumento cheʼ bʌ tsaʼ caji ti tilel i yalobilob. Mi jatetla an laʼ walobil jaʼel, tajol wocolʌch mi laʼ wubin cheʼ bʌ mi laʼ majlel ti tempa bʌ yicʼot chaʼan mi laʼ locʼsʌben i yorajlel chaʼan mi laʼ mel jiñi laʼ chʼujutesaya ti familia. Cheʼ jaʼel, tajol wocol mi la wubin chaʼan mi laʼ comol chaʼlen estudio yicʼot oración. Pero mi mucʼʌch laʼ tem chʼujutesan Jehová, ñumen temel mi caj laʼ wubin laʼ bʌ tiʼ tojlel i mi caj laʼ ñumen cʼuxbin laʼ bʌ. Jin chaʼan, acʼʌla ti ñaxan i chʼujutesʌntel Jehová.

8. Mi jatetla wocol woli laʼ ñusan ti laʼ ñujpuñel, ¿chuqui miʼ mejlel laʼ mel ti laʼ chʼujutesaya ti familia?

⁸ ¿Ixcu mi wocol woli (choncol) laʼ ñusan ti laʼ ñujpuñel? Tajol wocol mi caj laʼ wubin chaʼan mi laʼ mel jiñi chʼujutesaya ti familia. Mi cheʼ woli (yʌquel) laʼ ñusan, teche laʼ tsajin jumpʼejl tema mach bʌ wen tamic yicʼot muʼ bʌ laʼ mulan. Ili jiñʌch jiñi ñaxam bʌ muʼ bʌ i mejlel laʼ mel chaʼan mi laʼ pʼʌtʼesan laʼ ñujpuñel yicʼot mi laʼ mulan laʼ tem melben i yeʼtel (troñel) Jehová.

9. ¿Chucoch yom miʼ tem ñusañob qʼuin jiñi ñujpuñemoʼ bʌ?

⁹ Chaʼan miʼ chʌn cʼuxbiñob i bʌ jiñi ñujpuñemoʼ bʌ yom miʼ tem ñusañob qʼuin. Jiñi mi caj i coltañob chaʼan yujilob chuqui miʼ ñaʼtañob yicʼot bajcheʼ yubil woliʼ yubiñob i bʌ (Gn. 2:24). Laʼ laj qʼuel tiʼ tojlel Lilia yicʼot Ruslán, ñumeñix bʌ ti 15 jab ñujpuñemob. An chuqui tsiʼ qʼueleyob cheʼ bʌ tsijib ñujpuñemobto, Lilia miʼ yʌl: «Tsaʼ lon j qʼuele chaʼan maʼañic mi caj i mejlel lon c wen ñusan qʼuin cheʼ bajcheʼ tsaʼ lon c ñaʼta, come mi lon c chaʼlen eʼtel, an tac chuqui yom bʌ qʼuelol ti lon cotot i tiʼ wiʼil tsaʼ tili lon calobilob. Mi maʼañic mi lon c locʼsʌben i yorajlel chaʼan mi lon c tem ajñel, mi caj lon c ñajtʼesan lon c bʌ».

10. ¿Bajcheʼ miʼ mejlel i jacʼob jiñi ñujpuñemoʼ bʌ muʼ bʌ i yʌl Efesios 5:15, 16?

¹⁰ Jiñi ñujpuñemoʼ bʌ yom miʼ wen qʼuelob baqui ora mi caj i tem ñusañob qʼuin (pejcan Efesios 5:15, 16). Juntiquil hermano ti Nigeria i cʼabaʼ Uzondu miʼ yʌl: «Cheʼ bʌ mic  chajpan jiñi muʼ tac bʌ caj c mel, mi cʌqʼuen i yorajlel jaʼel chaʼan mic ñusan qʼuin quicʼot quijñam. Wen ñuc i cʼʌjñibal chaʼañon jiñi» (Filip. 1:10). Laʼ laj qʼuel tiʼ tojlel Anastasia, i yijñam juntiquil superintendente chaʼan circuito ti Moldavia. Anastasia miʼ yʌl bajcheʼ miʼ cʼʌn ti wen jiñi tiempo am bʌ i chaʼan, miʼ yʌl: «Cheʼ bʌ jiñi c ñoxiʼal miʼ qʼuel jiñi eʼtel tac am bʌ tiʼ wenta, mij qʼuel chuqui tac yom bʌ melol jaʼel. Ti wiʼil muqʼuix i mejlel lon c tem ajñel». Pero, ¿ixcu mi mach wen jocholeticla i maʼañic mi laʼ wen tajben i yorajlel chaʼan mi laʼ tem ajñel?

11. ¿Chuqui tac miʼ tem melob Áquila yicʼot Priscila?

¹¹ Cabʌl chuqui miʼ mejlel laʼ cʌn tiʼ tojlel Áquila yicʼot Priscila, jumpʼejl xñujpuñel wen cʼuxbibil bʌ ti ñaxam bʌ siglo (Rom. 16:3, 4). Jiñi Biblia miʼ yʌl chaʼan temel tsiʼ chaʼleyob eʼtel, subtʼan yicʼot cheʼ tsiʼ coltayob yañoʼ bʌ (Hech. 18:2, 3, 24-26). Cheʼ bʌ jiñi Biblia miʼ tajob ti tʼan, tiʼ pejtelel ora temel añob.

12. ¿Chuqui miʼ mejlel i melob jiñi ñujpuñemoʼ bʌ chaʼan miʼ ñumen tem ajñelob? (Qʼuele jaʼel jiñi dibujo yicʼot foto).

¹² ¿Bajcheʼ miʼ mejlel laʼ lajin i yejemplo Áquila yicʼot Priscila? ¿An tac ba eʼtel muʼ bʌ i mejlel laʼ tem mel? Jumpʼejl ejemplo, Áquila yicʼot Priscila miʼ tem chaʼleñob subtʼan. ¿Cheʼʌch ba mi laʼ mel jaʼel? Cheʼ jaʼel, Áquila yicʼot Priscila temel tsiʼ chaʼleyob eʼtel. Tajol jatetla mach lajalic jiñi eʼtel muʼ bʌ laʼ mel, pero miʼ mejlel laʼ tem mel jiñi yom tac bʌ melol ti laʼ wotot (Ec. 4:9). Mi mucʼʌch laʼ coltan laʼ bʌ ñumen lʌcʼʌl mi caj laʼ wajñel yicʼot mi caj laʼ mejlel ti tʼan. Robert yicʼot Linda ñumen ti 50 jab ñujpuñemob. Robert miʼ yʌl: «Mach wen jocholoñic lon, pero wen tijicña mi cubin cheʼ bʌ woli c poc plato i jiñi quijñam miʼ coltañon c tiquesan o cheʼ bʌ miʼ tilel i coltañon cheʼ an chuqui woli c mel yaʼ tiʼ jumpatlel lon cotot. Ñumen lʌcʼʌl mi cubin lon c bʌ yicʼot mic ñumen cʼuxbin lon c bʌ cheʼ bʌ an tac chuqui mi lon c tem mel».

13. ¿Chuqui yom miʼ melob jiñi ñujpuñemoʼ bʌ chaʼan temelob tiʼ sujm?

¹³ Cʼajtesanla iliyi: Yomʌch temeletla tiʼ sujm. Juntiquil hermana ti Brasil miʼ yʌl: «Come cabʌl jax chuqui mi lac mel an i tajol mi lac ñaʼtan chaʼan temel añonla come lajal baqui chumulonla. Pero an j qʼuele chaʼan añʌch chuqui yom mic mel. Yom mic ñusan tiempo quicʼot c ñoxiʼal». Laʼ laj qʼuel am bʌ i meleyob Bruno yicʼot Tays chaʼan miʼ tem ajñelob. Bruno miʼ yʌl: «Mic lot lon c teléfono chaʼan miʼ mejlel lon c tem ajñel».

14. ¿Chuqui miʼ mejlel i mel jiñi ñujpuñemoʼ bʌ mi maʼañic miʼ mulañob i tem ñusañob qʼuin?

¹⁴ Pero ¿ixcu mi maʼañic mi laʼ mulan laʼ tem ajñel? Tajol mach lajalic chuqui tac mi laʼ mulan laʼ mel o an i tajol mi laʼ wʌqʼuen laʼ bʌ cʼux jol. ¿Chuqui miʼ mejlel laʼ mel? Laʼ lac chaʼ ñaʼtan jiñi cʼajc. Cheʼ bʌ miʼ xijqʼuel (ñujtsel) jiñi cʼajc tsʼitaʼ jach miʼ lejmel,  chaʼan miʼ wen chʌcʼan yom mi la cotsʌben majlel i siʼil. Cheʼ jaʼel, chaʼlenla wersa chaʼan miʼ laʼ tem ñusan tiempo jujumpʼejl qʼuin. Sʌclanla chuqui mi laʼ mulan laʼ mel ti laʼ chaʼticlel i maʼañic bʌ miʼ tech wocol (Sant. 3:18). Mi an tacʌch chuqui mi laʼ tsʼitaʼ mel mi caj i chaʼ pʼʌtʼan laʼ cʼuxbiya.

15. ¿Chucoch ñuc i cʼʌjñibal cheʼ miʼ qʼuelob i bʌ ti ñuc jiñi ñujpuñemoʼ bʌ?

¹⁵ Cheʼ bajcheʼ jiñi oxígeno miʼ coltan jiñi cʼajc chaʼan maʼañic miʼ yajpel, maʼañic mi caj i jilel i cʼuxbiya jiñi ñujpuñemoʼ bʌ mi mucʼʌch i qʼuelob i bʌ ti ñuc. Pero jiñi ñumen ñuc bʌ i cʼʌjñibal mach jiñic cheʼ maʼ wʌl chaʼan maʼ qʼuel ti ñuc jiñi a piʼʌl, jiñʌch cheʼ jiñi a piʼʌl mucʼʌch i qʼuejlel ti ñuc miʼ yubin. Penny yicʼot Aret ñumen ti 25 jab ñujpuñemob. Penny miʼ yʌl: «Come mucʼʌch qʼuel lojon c bʌ ti ñuc mij cʼuxbin lon c bʌ mi lon cubin. Miʼ mejlel c tsictesʌben lon c bʌ chuqui mic ñaʼtan lojon yicʼot bajcheʼ yubil mi lon cubin come mucʼʌch qʼuel lojon ti ñuc chuqui mi lon cʌl». ¿Chuqui miʼ mejlel a mel chaʼan jiñi a piʼʌl mucʼʌch a qʼuel ti ñuc miʼ yubin? Laʼ laj qʼuel tsaʼ bʌ i meleyob Abrahán yicʼot Sara.

16. ¿Chuqui miʼ mejlel i cʌñob jiñi ñoxiʼalob tiʼ tojlel Abrahán? (1 Pedro 3:7, qʼuele jaʼel jiñi dibujo yicʼot foto).

¹⁶ Abrahán tsiʼ qʼuele ti ñuc Sara, come tsaʼʌch i ñʌchʼta chuqui miʼ yʌl yicʼot tsiʼ chʼʌmʌ ti ñuc bajcheʼ miʼ yubin i bʌ. Junsujtel Sara an chuqui woliʼ wen pensarin, tsaʼ michʼa yicʼot Abrahán i tsaʼto i sube chaʼan i mul. Pero Abrahán maʼañic tsaʼ michʼa i wen jach bajcheʼ tsiʼ pejca, wen i cʌñʌ i yujil chaʼan Sara mucʼʌch i qʼuel ti ñuc yicʼot miʼ coltan i decisión tac. Tsiʼ chaʼle wersa i ñʌchʼtan yicʼot tsiʼ ñopo i tojʼesan jiñi wocol (Gn. 16:5, 6). ¿Chuqui mi laj cʌn? Jiñi wiñic jiñʌch am bʌ tiʼ wenta chaʼan miʼ chʼʌm jiñi decisión tac tiʼ familia (1 Cor. 11:3). Pero come miʼ cʼuxbin i yijñam miʼ chʼʌm ti ñuc chuqui miʼ yʌl, ñumento mi yaʼ ochem jaʼel ti jiñi decisión (1 Cor. 13:4, 5). Cheʼ jaʼel, tajol jiñi a wijñam wen lujb i yom tʼan. ¿Mucʼʌch baʼ pʌsben chaʼan maʼ qʼuel ti ñuc yicʼot maʼ wen ñʌchʼtan chuqui miʼ yʌl? (pejcan 1 Pedro 3:7). Angela yicʼot Dimitri lʌcʼʌ 30 jab ñujpuñemob. Angela miʼ yʌl chuqui miʼ mel i ñoxiʼal chaʼan miʼ pʌsben chaʼan mucʼʌch i qʼuel ti ñuc: «Cheʼ bʌ mach weñic tsaʼ c ñusa jumpʼejl qʼuin o cojach com tʼan, Dimitri miʼ pʌs chaʼan yujil pijt. Ñumento cheʼ bʌ michʼon o cheʼ bʌ mach comic mic pejcʌntel».

17. ¿Chuqui miʼ mejlel i cʌñob jiñi ijñamʌlob tiʼ tojlel Sara? (1 Pedro 3:5, 6).

¹⁷ Sara tsiʼ pʌsʌ chaʼan mucʼʌch i qʼuel ti ñuc Abrahán come tsiʼ colta i decisión tac (Gn. 12:5). Ti jumpʼejl bʌ qʼuin, Abrahán tsaʼ cʼoti i julaʼ mach bʌ pijtʌbilic i chaʼan. Jin chaʼan, tiʼ sube Sara chaʼan miʼ chajpan cabʌl pan anquese  an tac yambʌ chuqui woliʼ mel (Gn. 18:6). Sara ti ora tsiʼ jacʼʌ i tsiʼ colta Abrahán. Ijñametbʌla, miʼ mejlel laʼ coltan i decisión laʼ ñoxiʼal cheʼ bajcheʼ Sara. Mi cheʼʌch mi laʼ mel mi caj i ñumen pʼʌtʼan laʼ ñujpuñel (pejcan 1 Pedro 3:5, 6). Dimitri, tsaʼ bʌ lac taja ti tʼan ti yambʌ párrafo miʼ yʌl chuqui miʼ mel i yijñam chaʼan miʼ pʌs chaʼan mucʼʌch i qʼuel ti ñuc: «Cujil chaʼan jiñi quijñam mi caj i coltañon cheʼ bʌ mic chʼʌm jumpʼejl decisión anquese mach lajalic bajcheʼ mi lon c ñaʼtan. I cheʼ bʌ mach weñic miʼ loqʼuel maʼañic miʼ subeñon chaʼan c mul. Mic wen qʼuel ti ñuc cheʼ cheʼʌch miʼ mel bajcheʼ jiñi». ¡Mach wocolic mi laj cʼuxbin juntiquil muʼ bʌ i qʼuelonla ti ñuc!

18. ¿Chuqui mi caj i yujtel mi mucʼʌch laʼ chaʼlen wersa chaʼan maʼañic miʼ jilel laʼ cʼuxbiya?

¹⁸ Satanás yom i jisan i cʼuxbiya jiñi ñujpuñemoʼ bʌ. Yujil chaʼan mi caj i ñajtʼesañob i bʌ ti Jehová mi cheʼʌch miʼ yujtel. ¡Pero maʼañic chuqui miʼ mejlel i jisan jiñi i sujm bʌ cʼuxbiya! Jin chaʼan, cheʼʌch yom miʼ laʼ cʼuxbin laʼ bʌ bajcheʼ miʼ yʌl Cantares. Acʼʌla ti ñaxan Jehová ti laʼ ñujpuñel, locʼsʌbenla i yorajlel chaʼan mi laʼ tem ajñel i pʌsʌla chaʼan mi laʼ qʼuel ti ñuc bajcheʼ yubil mi laʼ wubin laʼ bʌ yicʼot chuqui i cʼʌjñibal laʼ chaʼan. Mi cheʼʌch mi laʼ mel, jiñi laʼ ñujpuñel mi caj i yʌqʼuen i ñuclel Jehová, baqui tilem jiñi i sujm bʌ cʼuxbiya. Jiñi laʼ cʼuxbiya cheʼʌch mi caj i sujtel bajcheʼ cʼajc wen chʌc bʌ i maʼañic baʼ ora mi caj yajpel i cʼʌcʼal.