1. ¿Chuqui miʼ subeñonla lac mel Jehová? (Qʼuele jaʼel jiñi foto tac).

 ¿MAJQUI miʼ mejlel laj cʼajtiben i ñuqʼuesʌntel lac pusicʼal yicʼot laj coltʌntel? Jiñʌch Jehová i mi lac mel (chaʼlen) cheʼ bʌ mi lac pejcan ti oración. La cujil chaʼan yom chaʼan mi lac pejcan ti bele ora come miʼ subeñonla: «Chʌn chaʼlenla oración» (1 Tes. 5:17). Maʼañic mi lac bʌcʼñan lac pejcan ti oración yicʼot laj cʼajtiben i coltaya ti laj cuxtʌlel (Pr. 3:5, 6). I come wen uts, miʼ mejlel lac pejcan Jehová jiñʌch jaysujtel la com.

2. ¿Chuqui mi caj laj qʼuel ti ili estudio?

² Jiñi oración jumpʼejlʌch majtañʌl muʼ bʌ lac wen qʼuel ti ñuc. Pero an i tajol wocol mi la cubin chaʼan mi lac tajben i yorajlel chaʼan mi lac pejcan Jehová ti oración come cabʌl jax chuqui mi lac mel. Cheʼ jaʼel, tajol mi lac ñaʼtan chaʼan yomto mi lac ñumen weñʼesan jiñi la coración tac. Pero jiñi Biblia miʼ mejlel i coltañonla. Ti ili estudio mi caj laj qʼuel i yejemplo Jesús yicʼot mi caj laj cʌn bajcheʼ miʼ mejlel lac locʼsʌben i yorajlel chaʼan mi lac chaʼlen oración. Cheʼ jaʼel, mi caj laj qʼuel chaʼan miʼ mejlel lac ñumen weñʼesan jiñi la coración tac mi tsaʼ lac taja ti tʼan joʼchajp ñuc bʌ i cʼʌjñibal.

3. ¿Chuqui yujil Jesús?

³ Jesús yujil chaʼan Jehová ñuc i cʼʌjñibal i chaʼan jiñi oración tac. Cheʼ bʌ maxto tilemic ila ti Lum, tsiʼ qʼuele bajcheʼ jiñi i Tat tsiʼ jacʼbe i yoración jiñi i wiñicob. Jumpʼejl ejemplo, yaʼan yicʼot  cheʼ bʌ tsiʼ jacʼbe i yoración Ana, David, Elías yicʼot yañoʼ bʌ cheʼ tiʼ pejtelel i pusicʼal tsiʼ pejcayob Jehová (1 S. 1:10, 11, 20; 1 R. 19:4-6; Sal. 32:5). Jin chaʼan, Jesús tiʼ sube jiñi xcʌntʼañob i chaʼan chaʼan yom miʼ chaʼleñob oración ti bele ora yicʼot chaʼan mach yomic miʼ bʌcʼñan i melob (Mat. 7:7-11).

4. ¿Chuqui wem bʌ ejemplo tsiʼ yʌqʼueyonla Jesús?

⁴ Jesús tsiʼ yʌqʼue wem bʌ ejemplo jiñi xcʌntʼañob i chaʼan. Anquese tsaʼʌch i chaʼle subtʼan i tiʼ pejtelel ora joyol ti cabʌl lac piʼʌlob yicʼot mach wen jocholic, tsaʼʌch i locʼsʌbe i yorajlel chaʼan miʼ chaʼlen oración (Mar. 6:31, 45, 46). Sʌcʼan jach miʼ tejchel chaʼan miʼ bajñel ajñel i miʼ pejcan i Tat (Mar. 1:35). Junsujtel tsiʼ chaʼle oración ti jumpʼejl acʼʌlel come mi caj i chʼʌm jumpʼejl ñuc bʌ decisión (Luc. 6:12, 13). I cheʼ bʌ an jachix jumpʼejl acʼʌlel chaʼan miʼ chʌmel, Jesús maʼañic tsiʼ cʌyʌ i pejcan Jehová ti oración come yujil chaʼan mi caj i ñusan jumpʼejl ñuc bʌ wocol (Mat. 26:39, 42, 44).

5. ¿Bajcheʼ miʼ mejlel lac lajin Jesús?

⁵ Jiñi i yejemplo Jesús miʼ pʌsbeñonla chaʼan mach yʌlʌyic mi mach wen jocholoñicla, yomʌch mi la cʌqʼuen i yorajlel chaʼan mi lac pejcan Jehová ti oración. Cheʼ bajcheʼ Jesús, tajol yom mi laj qʼuel bajcheʼ ora mi caj lac mel: Tajol sʌcʼan jach o ti acʼʌlel miʼ mejlel lac chaʼlen oración. Cheʼ bajcheʼ jiñi mi lac pʌsben Jehová chaʼan mi laj qʼuel ti ñuc ili utsʼatax bʌ majtañʌl. Juntiquil hermana i cʼabaʼ Lynne miʼ cʼajtesan chaʼan tsiʼ wen qʼuele ti ñuc cheʼ bʌ tsiʼ cʌñʌ chaʼan miʼ mejlel i pejcan Jehová ti oración. Miʼ yʌl: «Cheʼ bʌ tsaʼ j cʌñʌ chaʼan Jehová miʼ yubiñon tiʼ pejtelel ora, tsaʼ c teche j qʼuel bajcheʼ juntiquil ñuc bʌ camigo i tsaʼ cʌqʼue c bʌ jiñi meta chaʼan mic ñumen weñʼesan jiñi coración tac». Miʼ mejlel la cʌl chaʼan cabʌlonla cheʼʌch mi la cubin lac bʌ bajcheʼ Lynne. Wʌle mi caj laj qʼuel jiñi joʼchajp ñuc bʌ i cʼʌjñibal muʼ bʌ i mejlel lac taj ti tʼan ti jiñi la coración tac.

6. Cheʼ bajcheʼ miʼ yʌl Apocalipsis 4:10, 11, ¿chuqui yom miʼ yʌqʼuentel Jehová?

⁶ Laʼ la cʌqʼuen i ñuclel Jehová. Jiñi apóstol Juan tsaʼ pʌsbenti chaʼan 24 ancianojob woli (choncol) i chʼujutesañob Jehová yaʼ ti panchan. Woli (yʌquel) i yʌqʼueñob i ñuclel Dios yicʼot tsiʼ yʌlʌyob chaʼan yomʌch miʼ  yʌqʼuentel cabʌl i ñuclel yicʼot i pʼʌtʌlel (pejcan Apocalipsis 4:10, 11). Jiñi ángelob jaʼel cabʌl chucoch yom miʼ yʌqʼueñob i ñuclel Jehová, yaʼañob yicʼot ti panchan yicʼot wen i cʌñʌyob. Miʼ tajob i qʼuel jiñi melbal (chaʼlibal) tac am bʌ i chaʼan ti chuqui tac muʼ bʌ i mel, jin chaʼan yomob i yʌqʼueñob i ñuclel (Job 38:4-7).

7. ¿Bajcheʼ tac mi la cʌqʼuen i ñuclel Jehová ti jiñi la coración tac?

⁷ Cheʼ bʌ mi lac pejcan Jehová yomʌch mi la cʌqʼuen i ñuclel jaʼel. Mi lac mel cheʼ bʌ mi lac suben chuqui mi lac mulan tiʼ tojlel yicʼot chucoch mi laj qʼuel ti ñuc. Cheʼ bʌ mi lac pejcan yicʼot mi lac tsajin (wen qʼuel) lac Biblia, laʼ lac chaʼlen wersa chaʼan mi laj qʼuel jiñi melbal tac am bʌ i chaʼan Jehová tsaʼ bʌ lac wen mulaj (Job 37:23; Rom. 11:33). Cheʼ jiñi, laʼ lac suben Jehová bajcheʼ yubil mi la cubin cheʼ bʌ mi lac wen ñaʼtan jiñi melbal tac am bʌ i chaʼan. Cheʼ jaʼel, miʼ mejlel la cʌqʼuen i ñuclel Jehová cheʼ bʌ miʼ coltañonla ti lac bajñel o pejtelel jiñi la quermañujob. Tiʼ pejtelel ora miʼ qʼuelonla yicʼot miʼ cʌntañonla (1 S. 1:27; 2:1, 2).

8. ¿Chuqui tac am bʌ i yʌqʼueñonla Jehová i yom bʌ mi la cʌqʼuen wocolix i yʌlʌ? (1 Tesalonicenses 5:18).

⁸ Laʼ la cʌqʼuen wocolix i yʌlʌ Jehová. Ti jiñi la coración tac cabʌl chucoch miʼ mejlel la cʌqʼuen wocolix i yʌlʌ (pejcan 1 Tesalonicenses 5:18). Laʼ la cʌqʼuen wocolix i yʌlʌ chaʼan pejtelel chuqui jiñi wem bʌ an lac chaʼan come yaʼʌch tilem pejtelel jiñi wem bʌ majtañʌl tac (Sant. 1:17). Jumpʼejl ejemplo, miʼ mejlel la cʌqʼuen wocolix i yʌlʌ chaʼan jiñi utsʼatax bʌ lac planeta, chaʼan jiñi melbil (pʌtbil) tac bʌ i chaʼan, chaʼan laj cuxtʌlel, lac familia, la camigojob yicʼot chaʼan jiñi lac pijtaya. I cheʼ jaʼel, la com la cʌqʼuen wocolix i yʌlʌ Jehová come miʼ yʌcʼonla ti sujtel tiʼ yamigo.

9. ¿Chucoch wocolʌch chaʼan mi la cʌcʼ wocolix yʌlʌ?

⁹ ¿Chuqui tac miʼ ñijcan lac pusicʼal ti jujuntiquilonla chaʼan mi la cʌqʼuen wocolix i yʌlʌ Jehová? Tajol wocol mi la cubin chaʼan mi lac taj laj qʼuel come chumulonla ti jumpʼejl pañimil (mulawil) maʼañic bʌ chuqui miʼ qʼuel ti ñuc. Jiñi lac piʼʌlob jin jach miʼ ñumen pensariñob chuqui yomob i mach jiñic cheʼ miʼ yʌcʼob wocolix yʌlʌ chaʼan jiñi añoʼ bʌ i chaʼan. Mi tsaʼ lac toyo ili melbalʌl, jiñi la coración tac miʼ mejlel i sujtel bajcheʼ jumpʼejl lista baqui mucʼ jach laj cʼajtin chuqui tac jach la com. Chaʼan maʼañic miʼ yujtel jiñi, yom mi lac chaʼlen wersa chaʼan mi laj qʼuel ti ñuc yicʼot mi lac chaʼlen wersa chaʼan mi la cʌqʼuen wocolix i yʌlʌ Jehová chaʼan pejtelel muʼ bʌ i yʌqʼueñonla (Luc. 6:45).

10. ¿Bajcheʼ tsiʼ colta juntiquil hermana cheʼ miʼ yʌcʼ wocolix yʌlʌ? (Qʼuele jaʼel jiñi foto).

¹⁰ Cheʼ mi la cʌcʼ wocolix yʌlʌ miʼ coltañonla chaʼan mi lac lʌtʼ jiñi wocol tac. Laʼ laj qʼuel tiʼ tojlel juntiquil hermana i cʼabaʼ Kyung-sook, muʼ bʌ i tilel i yexperiencia ti La Atalaya 15 chaʼan enero, 2015. Tsaʼ subenti chaʼan an i chaʼan wen tsʌtsix bʌ cáncer tiʼ pulmón.  Tsiʼ yʌlʌ: «Cheʼ bʌ tsaʼ cubi chaʼan cʼamon, wen cʼux tsaʼ cubi. Tsaʼ c ñaʼta chaʼan maʼañix chuqui an c chaʼan i tsaʼ c wen chaʼle bʌqʼuen». ¿Chuqui tsiʼ colta? Tsiʼ yʌlʌ chaʼan ti jujumpʼejl acʼʌlel, cheʼ bʌ muqʼuix i cajel ti wʌyel, miʼ letsel tiʼ jol i yotot chaʼan miʼ pejcan Jehová i miʼ yʌqʼuen wocolix i yʌlʌ ti cʼam bʌ tʼan chaʼan jiñi joʼchajp utsʼatax bʌ tsaʼ bʌ i ñusa ti jiñi qʼuin. Jiñi tsiʼ yʌqʼue i ñʌchʼtʌlel yicʼot tsiʼ ñijcʌbe i pusicʼal chaʼan miʼ suben Jehová bajcheʼ cʼamel miʼ cʼuxbin. Tsiʼ qʼuele chaʼan Jehová miʼ coltan i wiñicob cheʼ bʌ miʼ ñusañob tsʌts tac bʌ wocol i tsiʼ qʼuele chaʼan ñumento an jiñi bendición tac i mach jiñic jiñi wocol tac. Cheʼ bajcheʼ Kyung-sook, cabʌl chucoch yom mi la cʌqʼuen wocolix i yʌlʌ Jehová, jinto jaʼel cheʼ woli lac ñusan jumpʼejl wocol. Cheʼ bʌ mi lac mel iliyi miʼ coltañonla lac lʌtʼ yicʼot chaʼan wen mi la cubin lac bʌ.

11. ¿Chucoch yom añob i chʼejlel jiñi xcʌntʼañob i chaʼan Jesús?

¹¹ Laʼ laj cʼajtiben Jehová lac chʼejlel chaʼan mi lac chaʼlen subtʼan. Cheʼ bʌ Jesús muqʼuix caj i letsel majlel ti panchan tsiʼ cʼajtesʌbe jiñi xcʌntʼañob i chaʼan chaʼan yom miʼ chaʼleñob subtʼan «ti Jerusalén, tiʼ petol Judea yicʼot ti Samaria, i cʼʌlʌlto ti ñajt bʌ pañimil» (Hech. 1:8; Luc. 24:46-48). Mach jalic tsaʼ ñumi, i jiñi añoʼ bʌ ñuc bʌ i yeʼtel ti jiñi judíojob tsiʼ chucuyob Pedro yicʼot Juan, i tsiʼ pʌyʌyob majlel yaʼ ti Sanedrín. Tiʼ subeyob chaʼan miʼ cʌyob subtʼan yicʼot tsiʼ chʼʌcʌyob (Hech. 4:18, 21). ¿Chuqui tsiʼ meleyob ili chaʼtiquil apóstolob?

12. Cheʼ bajcheʼ miʼ yʌl Hechos 4:29, 31, ¿chuqui tsiʼ meleyob jiñi xcʌntʼañob?

¹² Cheʼ bʌ tsaʼ chʼʌjquiyob, Pedro yicʼot Juan tsiʼ yʌlʌyob: «Mi tojʌch tiʼ wut Dios cheʼ mic jacʼbeñet lojon laʼ tʼan i mach i chaʼañic Dios, qʼuelexla jatetla. Pero joñon lojon maʼañic miʼ mejlel j cʌy lon cʌl jiñi tsaʼ bʌ lon j qʼuele yicʼot tsaʼ bʌ lon cubi» (Hech. 4:19, 20). Cheʼ bʌ jiñi añoʼ bʌ ñuc bʌ i yeʼtel ti ñopbalʌl ti jiñi judíojob tsiʼ coloyob, jiñi chaʼtiquil apóstolob tsiʼ tempayob i bʌ yicʼot jiñi yambʌ xcʌntʼañob. Juntemel tsiʼ pejcayob Jehová ti oración chaʼan miʼ coltañob i bej melbeñob i yeʼtel (troñel). Tsiʼ yʌlʌyob: «Acʼʌ chaʼan jiñi a wiñicob miʼ bej subob a tʼan yicʼotob i chʼejlel». I Jehová tsiʼ jacʼʌ ili oración loqʼuemoʼ bʌ ti pusicʼal (pejcan Hechos 4:29, 31).

13. ¿Chuqui mi laj cʌn tiʼ tojlel Jin-hyuk?

¹³ Miʼ mejlel lac mel tsaʼ bʌ i meleyob jiñi xcʌntʼañob i mi lac bej chaʼlen subtʼan anquese jiñi añoʼ bʌ i yeʼtel miʼ ñop i mʌctañonla. Jiñʌch tsaʼ bʌ i mele Jin-hyuk, juntiquil hermano tsaʼ bʌ ajñi ti cárcel tiʼ caj maʼañic tsaʼ ochi ti soldado. Yaʼi tsaʼ subenti i qʼuel jiñi xcʌjchelob muʼ bʌ i bajñel ajqʼuelob ti celda. Cojach miʼ mejlel i pejcañob chaʼan miʼ cʼajtibeñob chuqui i cʼʌjñibalob i chaʼan, i mach mejlic i subeñob chaʼan bʌ Biblia. Pero tsiʼ cʼajtibe Jehová i chʼejlel yicʼot chaʼan wen jach miʼ pejcañob chaʼan miʼ mejlel i subeñob jiñi wen tʼan (Hech. 5:29). Miʼ yʌl: «Jehová tsiʼ jacʼʌ jiñi coración tac, i tsiʼ yʌqʼueyon jiñi c chʼejlel yicʼot c ñaʼtʌbal i cʼʌjñibal bʌ c chaʼan. Tsaʼ caji cʌcʼ cabʌl estudio 5 minuto jach bʌ ti jiñi celda tac. Ti acʼʌlel mic tsʼijbuben carta jiñi xcʌjchelob chaʼan tiʼ yijcʼʌlel mi cʌqʼueñob». Cheʼ bajcheʼ Jin-hyuk, mi lac ñop chaʼan Jehová mucʼʌch caj i coltañonla lac tsʼʌctesan la queʼtel i miʼ mejlel laj cʼajtiben lac chʼejlel yicʼot lac ñaʼtʌbal.

14. ¿Chuqui mi caj i coltañet a lʌtʼ jiñi wocol tac? (Salmo 37:3, 5).

¹⁴ Laʼ laj cʼajtiben i coltaya Jehová chaʼan mi lac lʌtʼ jiñi wocol tac. Cabʌlonla woli lac ñusan wocol tiʼ caj an majqui tsaʼ chʌmi lac chaʼan, jiñi ticʼlʌntel, cʼamʌjel tac, mach weñic mi la cubin lac bʌ o an wocol ti lac  familia. I ñumen wocolto an lac ñusa tiʼ caj jiñi pandemia yicʼot guerra tac. Jin chaʼan, laj suben Jehová chuqui an ti a pusicʼal, cheʼ bajcheʼ maʼ mel a wicʼot juntiquil wem bʌ a wamigo. Miʼ mejlel a ñop chaʼan Jehová mi caj i coltañet (pejcan Salmo 37:3, 5).

15. ¿Bajcheʼ miʼ coltañonla jiñi oración chaʼan mi lac lʌtʼ jiñi wocol tac? Alʌ jumpʼejl ejemplo.

¹⁵ Cheʼ bʌ maʼañic mi laj cʌy lac mel oración miʼ coltañonla chaʼan mi lac lʌtʼ wocol tac (Rom. 12:12). Jehová yujil pejtelel chuqui miʼ ñusan i wiñicob yicʼot «miʼ yubibeñob i tʼan cheʼ miʼ pejcañob» (Sal. 145:18, 19). Cheʼʌch tsiʼ qʼuele juntiquil precursora 29 bʌ i jabilel i cʼabaʼ Kristie. Ti orajach tsaʼ waʼ cʼamʼa. Tiʼ caj jiñi tsiʼ taja depresión. Ti wiʼil, jiñi mamá tsaʼ tajbenti jumpʼejl cʼamʌjel maʼañix bʌ i tsʼʌcal. Kristie miʼ yʌl: «Tsaʼ c chʌcʌ cʼajtibe Jehová chaʼan miʼ yʌqʼueñon c wersa chaʼan mic bej cuch. Maʼañic tsaʼ j cʌyʌ c lʌcʼtesan c bʌ ti Jehová: Tsaʼ chʌn majliyon ti tempa bʌ yicʼot mic chʌn chaʼlen estudio tic bajñelil». Miʼ bej al: «Jiñi oración tsiʼ coltayon cheʼ bʌ ñumen wocol jax woli c ñusan. Tsiʼ wen ñuqʼuesa c pusicʼal cheʼ bʌ cujil chaʼan Jehová tiʼ pejtelel ora an yicʼoton. Anquese mach ti orajic tsaʼ cʼocʼayon, Jehová tsaʼʌch i jacʼʌ jiñi coración tac, come tsiʼ yʌqʼueyon c ñʌchʼtʌlel». Mach ñajʌyic lac chaʼan chaʼan «Jehová yujil i coltʌntel loqʼuel ti wocol jiñi xucʼuloʼ bʌ tiʼ tojlel» (2 Ped. 2:9).

16. ¿Chucoch i cʼʌjñibal lac chaʼan i coltaya Jehová chaʼan maʼañic mi lac yajlel ti mulil?

¹⁶ Laʼ laj cʼajtiben i coltaya Jehová chaʼan maʼañic mi lac yajlel ti mulil. Xmulilonla, jin chaʼan yom mi lac chʌcʌ chaʼlen wersa chaʼan maʼañic mi lac mel mach bʌ weñic. I Satanás chuqui jachix miʼ mel chaʼan ñumen wocol mi la cubin. Jumpʼejl ejemplo, miʼ ñop i yʌsin lac pensar cheʼ bʌ miʼ cʼʌn mach bʌ weñic ñusaqʼuin. Iliyi miʼ bibʼesan lac ñaʼtʌbal muʼ bʌ i yʌcʼ chaʼan mach sʌcoñicla tiʼ wut Jehová i miʼ mejlel i yʌcʼ chaʼan mi lac mel tsʌts bʌ mulil (Mar. 7:21-23; Sant. 1:14, 15).

17. Anquese mi lac chaʼlen oración, ¿chuqui yom mi lac mel chaʼan maʼañic mi lac yajlel ti mulil? (Qʼuele jaʼel jiñi foto tac).

 ¹⁷ I cʼʌjñibal lac chaʼan i coltaya Jehová chaʼan maʼañic mi lac yajlel ti mulil. Jesús tsiʼ yʌlʌ iliyi ti jiñi oración chaʼan jiñi padrenuestro: «Mach a wʌcʼon lon ti yajlel cheʼ bʌ mij qʼuelbentel lon c pusicʼal, locʼsañon lojon tiʼ cʼʌb jiñi Satanás» (Mat. 6:13). Anquese Jehová yomʌch i coltañonla, yomʌch mi laj cʼajtiben. Pero mach jasʌlic jach cheʼ mi lac chaʼlen oración. Añʌch chuqui yom mi lac mel chaʼan maʼañic miʼ yochel ti lac ñaʼtʌbal jiñi an tac bʌ tiʼ pañimil Satanás come miʼ ticʼlañonla (Sal. 97:10). Chaʼan mi laj cʌntan lac ñaʼtʌbal i cojach mi lac ñaʼtan chuqui tac wem bʌ, yom mi lac pejcan yicʼot mi lac tsajin jiñi Biblia, mi lac majlel ti tempa bʌ yicʼot mi lac chaʼlen subtʼan. Jehová miʼ yʌcʼ i tʼan chaʼan maʼañic mi caj i yʌcʼ chaʼan mi lac ñusan jumpʼejl wocol maʼañix bʌ miʼ mejlel laj cuch (1 Cor. 10:12, 13).

18. ¿Chuqui yom mi lac mel ti lac pejtelel?

¹⁸ Chaʼan chʌn xucʼul mi la cajñel ti ili cojix tac bʌ qʼuin wen wocol jax bʌ, yom mi lac wen chaʼlen oración. Jehová yom chaʼan mi lac jamben lac pusicʼal (Sal. 62:8). Jin chaʼan, locʼsʌben i yorajlel chaʼan ti jujumpʼejl qʼuin maʼ pejcan ti oración tiʼ pejtelel a pusicʼal. Aqʼuen i ñuclel yicʼot aqʼuen wocolix i yʌlʌ chaʼan pejtelel muʼ bʌ i mel. Cʼajtiben a chʼejlel chaʼan maʼ chaʼlen subtʼan, chaʼan maʼ lʌtʼ jiñi wocol tac yicʼot chaʼan maʼañic maʼ yajlel ti mulil. Mach a wʌcʼ chaʼan an chuqui o an majqui miʼ mʌctañet chaʼan maʼ bej melben oración Jehová. Pero ¿bajcheʼ miʼ jacʼ jiñi la coración tac? Ti jiñi yambʌ estudio mi caj laj qʼuel.