1. ¿Chuqui wocol mi la cubin ti lac pejtelel?

 TI LAC pejtelel wocol an la cubi chaʼan mi lac taj jumpʼejl meta. b Jumpʼejl ejemplo, Philip yom i ñumen chaʼlen oración yicʼot miʼ suben Jehová chuqui an tiʼ pusicʼal, pero wocol tsiʼ yubi chaʼan miʼ tajben i yorajlel. Erika tsiʼ ñaʼta chaʼan sebix mi caj i cʼotel ti jiñi tempa bʌ chaʼan subtʼan, pero ti bele ora maʼañic tsaʼ mejli. Tomáš tsiʼ ñopo i pejcan ti tsʼʌcʌl jiñi Biblia. Miʼ yʌl: «Maʼañic mic mulan c pejcan jiñi Biblia. Uxyajl tsaʼ c ñopo, pero yaʼ jach mij cʌytʌl ti Levítico».

2. ¿Chucoch mach yomic mi la cubin lac chʼijyemlel mi maxto añic tsaʼ lac taja jumpʼejl meta?

² Mach a wubin a chʼijyemlel mi maxto a taja jumpʼejl meta. Jinto jaʼel ti jiñi meta tac mach bʌ wen ñuquic yomʌch miʼ ñumel cabʌl tiempo yicʼot mi lac chaʼlen wersa chaʼan mi lac taj. Cheʼ bʌ wolʌch a bej chaʼlen wersa miʼ pʌs chaʼan maʼ qʼuel ti ñuc cheʼ a wamigo Jehová yicʼot chaʼan a wom a wʌqʼuen chuqui ñumen wem bʌ. Jehová mucʼʌch i qʼuel, i maʼañic miʼ cʼajtibeñet jiñi maʼañic bʌ miʼ mejlel a mel (chaʼlen) (Sal. 103:14; Mi. 6:8). Jin chaʼan, wen qʼuele mi jiñi meta tsaʼ bʌ a wʌqʼue a bʌ mucʼʌch i mejlel a taj. Mi cheʼʌchi, ¿chuqui miʼ mejlel a mel chaʼan maʼ tsʼʌctesan? Laʼ laj qʼuel chuqui tac miʼ mejlel i coltañet.

3. ¿Chucoch ñuc i cʼʌjñibal cheʼ añʌch chuqui miʼ ñijcan lac pusicʼal?

³ Wen ñucʌch i cʼʌjñibal cheʼ añʌch chuqui miʼ ñijcan lac pusicʼal chaʼan mi lac taj jumpʼejl meta come mi caj i coltañonla chaʼan mi lac chaʼlen wersa. Jiñi muʼ bʌ i ñijcan lac pusicʼal cheʼʌch bajcheʼ jiñi icʼ muʼ bʌ i coltan juncojt barco chaʼan miʼ ñijcan majlel i bʌ. Mi añʌch icʼ, tajol jiñi barco mucʼʌch caj i cʼotel yaʼ baqui yom. I mi tsʌts jiñi icʼ tajol ñumen ora mi caj i cʼotel. Cheʼʌch joñonla jaʼel, mucʼʌch caj lac taj jumpʼejl meta mi añʌch chuqui miʼ ñijcan lac pusicʼal chaʼan mi lac mel. Juntiquil hermano chʼoyol bʌ ti El Salvador i cʼabaʼ David miʼ yʌl: «Maʼ ñumen chaʼlen wersa mi añʌch chuqui miʼ ñijcan a pusicʼal. Maʼañic maʼ wʌcʼ chaʼan an chuqui miʼ mʌctañet chaʼan maʼ taj jiñi a wom bʌ». Cheʼ jiñi, ¿chuqui mi caj i coltañet chaʼan a wom a ñumen taj jiñi a meta?

4. ¿Chuqui miʼ mejlel laj cʼajtiben Jehová? (Filipenses 2:13, qʼuele jaʼel jiñi dibujo).

⁴ Cʼajtiben Jehová chaʼan miʼ coltañet. Jehová miʼ mejlel i cʼʌn jiñi yespíritu chaʼan miʼ ñijcan lac pusicʼal chaʼan miʼ mejlel lac taj jumpʼejl meta (pejcan Filipenses 2:13). An i tajol mi la cʌqʼuen lac bʌ jumpʼejl meta come la cujil chaʼan jiñʌch yom bʌ mi lac mel, i maʼañic i wocolel jiñi. Pero tajol maʼañic mi lac mulan lac mel. Jiñʌch tsaʼ bʌ ujti tiʼ tojlel Norina, juntiquil hermana ti Uganda. Tsiʼ yʌqʼue i bʌ jiñi meta chaʼan miʼ yʌcʼ jumpʼejl estudio, pero mach wen yomic i mel come tsiʼ ñaʼta chaʼan mach weñic miʼ chaʼlen cʌntesa. ¿Chuqui tsiʼ colta? Miʼ yʌl: «Ti jujumpʼejl qʼuin tsaʼ j cʼajtibe Jehová chaʼan miʼ coltañon c ñumen mulan cʌcʼ estudio. I tsaʼ c chaʼle wersa jaʼel chaʼan mic sujtel ti ñumen wem bʌ xcʌntesa. Tsaʼ ñumi chaʼpʼej uxpʼejl uw, i tsaʼ j qʼuele chaʼan comix c mel. Ti jiñi jach bʌ jabil tsaʼ c teche cʌcʼ chaʼpʼejl estudio».

5. ¿Chuqui yom mi lac wen ñaʼtan chaʼan mi lac taj jumpʼejl meta?

⁵ Wen ñaʼtan chuqui an i mele Jehová ti a tojlel (Sal. 143:5). Jiñi apóstol Pablo tsiʼ wen ñaʼta bajcheʼ Jehová tsiʼ pʌsbe i yutslel, i jiñi tsiʼ ñijca chaʼan miʼ wen melben i yeʼtel (troñel) (1 Cor. 15:9, 10; 1 Tim. 1:12-14). Cheʼ jaʼel, mi mucʼʌch a wen ñaʼtan chuqui an i mele Jehová ti a tojlel, mi caj i ñijcañet chaʼan maʼ taj jiñi a meta (Sal. 116:12). Qʼuele chuqui tsiʼ colta juntiquil hermana ti Honduras chaʼan miʼ sujtel ti precursora regular. Miʼ yʌl: «Tsaʼ caji c wen ñaʼtan bajcheʼ cʼamel miʼ cʼuxbiñon Jehová. Tsiʼ pʌyʌyon ochel tiʼ tejclum yicʼot miʼ cʌntañon. Cheʼ bʌ tsaʼ c wen ñaʼta pejtelel iliyi, tsiʼ coltayon chaʼan mic ñumen cʼuxbin Jehová yicʼot chaʼan mic mulan ochel ti precursora».

6. ¿Chuqui yambʌ mi caj i coltañonla chaʼan mi lac taj jumpʼejl meta?

⁶ Ñaʼtan jiñi wenlel tac muʼ bʌ caj a taj. Laʼ lac chaʼ al tiʼ tojlel Erika, tsaʼ bʌ lac taja ti tʼan ti párrafo 1. ¿Chuqui tsiʼ colta chaʼan seb miʼ cʼotel ti subtʼan? Miʼ yʌl: «Tsaʼ j qʼuele chaʼan cheʼ bʌ maʼañic mic seb cʼotel ti subtʼan, cabʌl chuqui  woli (choncol) c sʌt. Pero mi sebʌch mij cʼotel, miʼ mejlel c chaʼleñob ti saludar yicʼot mic pejcañob jiñi hermanojob. Cheʼ jaʼel, miʼ mejlel c ñʌchʼtan muʼ tac bʌ caj i coltañon chaʼan mic ñumen weñʼesan yicʼot mic ñusan c bʌ ti subtʼan». Come Erika tsiʼ chʌn ñaʼta jiñi wenlel tac muʼ bʌ caj i taj cheʼ seb miʼ cʼotel, tsaʼʌch mejli i tsʼʌctesan jiñi i meta. ¿Chuqui tac ti wenlel miʼ mejlel a ñaʼtan jatet? Mi jiñi meta tsaʼ bʌ a wʌqʼue a bʌ jiñʌch chaʼan maʼ pejcan jiñi Biblia o chaʼan maʼ chaʼlen oración, ñaʼtan bajcheʼ mi caj i ñumen lʌcʼtesañet ti Jehová (Sal. 145:18, 19). Mi jiñi a wom bʌ a taj jiñʌch jumpʼejl melbalʌl, ñaʼtan bajcheʼ mi caj i coltañet chaʼan wen maʼ wajñel a wicʼot yañoʼ bʌ (Col. 3:14). ¿Chuqui yambʌ miʼ mejlel a mel? Tsʼijbun chucoch a wom a taj jumpʼejl meta i bixel chaʼ qʼuele. Tomáš, tsaʼ bʌ lac taja ti tʼan jaʼel ti ñaxan, miʼ yʌl: «Cheʼ bʌ mij qʼuel chaʼan añʌch chucoch com c taj jumpʼejl meta, miʼ coltañon chaʼan mic chʌn chaʼlen wersa».

7. ¿Chuqui tsiʼ colta Julio yicʼot i yijñam chaʼan miʼ tajob jumpʼejl meta?

⁷ Ñochtan jiñi muʼ bʌ i coltañetob (Pr. 13:20). Julio yicʼot i yijñam tsiʼ ñaʼtayob majlel baqui ñumen yomto coltʌntel ti subtʼan. Julio miʼ yʌl chuqui tsiʼ coltayob: «Tsaʼ c sʌcla lon camigojob muʼ bʌ i coltañon lojon yicʼot tsaʼ lon c subeyob jiñi com bʌ lon c mel. Come cabʌlob tsaʼix i tajayob jiñi meta tac lʌcʼʌ lajal bʌ bajcheʼ lon c chaʼan, mucʼʌch i mejlel i yʌqʼueñon lojon wen tac bʌ ticʼojel. Cheʼ jaʼel, miʼ cʼajtibeñon lojon bajcheʼ yilal woli (yʌquel) lon c majlel, i cheʼ bʌ i cʼʌjñibal lon c chaʼan, miʼ ñuqʼuesañob lon c pusicʼal chaʼan mi lon c chʌn chaʼlen wersa».

8. ¿Chuqui miʼ mejlel ti ujtel mi maʼañic mi lac chaʼlen wersa lac taj jumpʼejl meta? (Qʼuele jaʼel jiñi dibujo).

⁸ Tiʼ sujm, ti lac pejtelel an i tajol maʼañic chuqui la com lac mel. Pero mach tiʼ cajic jiñi maʼañic mi caj lac tsʼʌctesan jiñi lac meta. Laʼ lac chaʼ taj ti tʼan jiñi icʼ yicʼot jiñi barco. Anquese jiñi icʼ miʼ coltan jiñi barco chaʼan miʼ cʼotel baqui yom, an i tajol mach wen tsʌtsic jiñi icʼ i mi añicto. ¿Yom ba i yʌl jiñi chaʼan jiñi xñijca barco maʼañic chuqui miʼ mejlel i mel? Maʼañic. Jumpʼejl ejemplo, an barco tac am bʌ i chaʼan motor, i an tac am bʌ i chaʼan remo. Jin chaʼan, anquese maʼañic icʼ jiñi xñijca barco miʼ mejlel i cʼʌn chaʼan miʼ cʼotel baqui yom. Cheʼ jaʼel, an i tajol maʼañic chuqui la com lac mel mi caj la cubin. Pero yomʌch mi lac chaʼlen wersa come mi maʼañic mi lac mel maʼañic mi caj lac taj jiñi lac meta. Cheʼ bʌ muʼto caj laj qʼuel chuqui mi caj i coltañonla, laʼ lac jacʼ jumpʼejl cʼajtiya mejl bʌ i melbeñob i bʌ yañoʼ bʌ.

9. ¿Yomʌch ba mi lac chaʼlen wersa chaʼan mi lac taj jumpʼejl meta anquese mach la comic lac mel?

⁹ Jehová yom chaʼan mi lac melben i yeʼtel ti lac tijicñʌyel yicʼot tiʼ pejtelel lac pusicʼal (Sal. 100:2; 2 Cor. 9:7). Jin chaʼan, ¿chucoch yomʌch mi lac chaʼlen wersa chaʼan mi lac taj  jumpʼejl meta anquese mach la comic? Laʼ lac ñaʼtan tiʼ tojlel jiñi apóstol Pablo. Tsiʼ yʌlʌ: «Mic jatsʼ c bʌcʼtal i mic sujtesan ti xyaj eʼtel» (1 Cor. 9:25-27). Pablo tsiʼ wersa xiqʼui i bʌ chaʼan miʼ mel jiñi yom bʌ Jehová anquese an i tajol mach yomic i mel. ¿Tijicña ba tsiʼ yubi i bʌ Jehová chaʼan bajcheʼ Pablo woliʼ melben i yeʼtel? Cheʼʌchi. I tsiʼ yʌqʼue i majtan chaʼan jiñi eʼtel tsaʼ bʌ i mele (2 Tim. 4:7, 8).

10. ¿Chuqui ti wenlel tac mi caj lac taj mi mucʼʌch lac chaʼlen wersa chaʼan mi lac taj jumpʼejl meta anquese an i tajol maʼañic chuqui la com?

¹⁰ Jehová miʼ yubin i tijicñʌyel jaʼel cheʼ bʌ miʼ qʼuel chaʼan mi lac chaʼlen wersa lac taj jumpʼejl meta, cheʼto jaʼel cheʼ bʌ maʼañic chuqui la com. Mi lac mel come mi laj cʼuxbin anquese mach tiʼ pejtelelic ora mi lac mulan jiñi tsaʼ bʌ lac ñaʼta lac mel. Jehová tsiʼ yʌqʼue i bendición Pablo yicʼot mi caj i yʌqʼueñonla jaʼel mi mucʼʌch lac chaʼlen wersa (Sal. 126:5). I muqʼuix caj lac mulan cheʼ bʌ mi laj qʼuel chaʼan Jehová miʼ yʌqʼueñonla i bendición. Juntiquil hermana ti Polonia i cʼabaʼ Lucyna miʼ yʌl: «An i tajol mach comic majlel ti subtʼan, ñumento cheʼ bʌ lujbon. Pero jiñi tijicñʌyel muʼ bʌ cubin cheʼ bʌ sujtelix mucʼon ti cotot wen ñucʌch bʌ majtañʌl». Laʼ laj qʼuel chuqui miʼ mejlel lac mel mi maʼañic chuqui la com.

11. ¿Bajcheʼ miʼ coltañonla Jehová chaʼan mi lac ñumen ticʼ lac bʌ?

¹¹ Cʼajtiben Jehová chaʼan miʼ coltañet chaʼan maʼ ticʼ a bʌ. Jiñi yujil bʌ ticʼol i bʌ miʼ ticʼ i bʌ chaʼan maʼañic miʼ mel mach bʌ weñic yicʼot chaʼan miʼ mel chuqui wem bʌ, ñumento cheʼ bʌ wocol miʼ yubin i mach yomic. Laʼ laj cʼajtesan chaʼan cheʼ la cujil ticʼol lac bʌ jumpʼejlʌch melbalʌl muʼ bʌ i yʌcʼ jiñi espíritu. Jin chaʼan, mi mucʼʌch laj cʼajtiben Jehová jiñi chʼujul bʌ i yespíritu, mi caj i mejlel lac taj ili melbalʌl wen ñuc bʌ i cʼʌjñibal (Luc. 11:13; Gál. 5:22, 23). David, tsaʼ bʌ lac taja ti tʼan ti párrafo 3, tsiʼ yʌqʼue i bʌ jiñi meta chaʼan miʼ chaʼlen estudio ti bele ora i jiñi oración tsaʼʌch i wen colta. Miʼ yʌl: «Tsaʼ j cʼajtibe Jehová chaʼan miʼ coltañon c ticʼ c bʌ. I tsaʼʌch i coltayon. Tsaʼ c teche jumpʼejl programa chaʼan estudio, i jiñʌch woli c bej mel».

12. ¿Bajcheʼ miʼ coltañonla Eclesiastés 11:4 chaʼan mi lac taj jiñi lac meta tac?

¹² Mach a pijtan ñumen wem bʌ i yorajlel chaʼan maʼ mel. Ti ili pañimil (mulawil) wen wocol jax chaʼan mi lac taj jiñi. Mi meqʼuel jach laj cʼʌb, tajol maʼañic baʼ ora mi caj lac taj jiñi lac meta (pejcan Eclesiastés 11:4). Juntiquil hermano i cʼabaʼ Dayniel miʼ yʌl: «Maʼañic ñumen wem bʌ i yorajlel. Jin chaʼan mach yomic maʼ pijtan, yomʌch maʼ mel». Paul, juntiquil hermano ti Uganda, miʼ subeñonla jaʼel chucoch mach yomic mi laj cʌy ti wiʼil jiñi lac meta tac: «Cheʼ bʌ mucʼʌch a chaʼlen wersa chaʼan maʼ mel anquese wocolʌch maʼ wubin, Jehová mi caj i yʌqʼueñet i bendición» (Mal. 3:10).

13. ¿Baqui bʌ i wenlel tac cheʼ tsʼitaʼ jaxto mi lac tech lac tsʼʌctesan majlel jiñi lac meta?

¹³ Teche ti tsʼitaʼ jaxto. An i tajol mach la comic lac tsʼʌctesan jiñi lac meta come wocol mi la cubin chaʼan mi lac taj. Jin chaʼan, ¿ixcu cheʼ tsʼitaʼ jaxto maʼ tech a tsʼʌctesan majlel jiñi a meta? Jumpʼejl ejemplo, mi a wom a taj jumpʼejl melbalʌl, teche a mel chuqui tac mach bʌ wen wocolic chaʼan maʼ pʌs. Mi a wom a pejcan jiñi Biblia ti tsʼʌcʌl, teche a pejcan ti tsʼitaʼ jaxto. Tomáš, tsaʼix bʌ lac taja ti tʼan, wocol tsiʼ yubi chaʼan miʼ pejcan jiñi Biblia ti jumpʼejl jab. Miʼ yʌl: «Tsaʼ j qʼuele chaʼan wocol mi caj cubin chaʼan mic pejcan jiñi c Biblia ti jumpʼejl jach jab. Jin chaʼan, tsaʼ c ñaʼta chaʼan mucʼ jach caj c pejcan chaʼpʼej uxpʼejl párrafo ti jujumpʼejl qʼuin yicʼot mi caj c wen ñaʼtan chuqui jiñi woli bʌ j cʌn. Tsaʼ caji c ñumen  mulan c pejcan jiñi c Biblia». Come Tomáš ñumen tijicña tsaʼ caji i yubin i bʌ, tsaʼ caji i ñumen aqʼuen i yorajlel chaʼan miʼ pejcan jiñi i Biblia. I tsaʼ ujti i pejcan ti tsʼʌcʌl. c

14. ¿Chuqui tac miʼ mejlel i mʌctañonla?

¹⁴ Anquese la comʌch lac tsʼʌctesan jumpʼejl lac meta, an tac chuqui miʼ mejlel i mʌctañonla. Jumpʼejl ejemplo, miʼ mejlel lac bʌcʼ taj wocol muʼ bʌ i mejlel i chilbeñonla lac tiempo chaʼan mi lac tsʼʌctesan jiñi lac meta (Ec. 9:11, 12). Miʼ mejlel lac taj jaʼel jumpʼejl wocol muʼ bʌ i yʌqʼueñonla lac chʼijyemlel yicʼot miʼ chilbeñonla lac pʼʌtʌlel (Pr. 24:10). Cheʼ jaʼel, come xmulilonla mi lac mel mach tac bʌ weñic maʼañic bʌ miʼ coltañonla chaʼan mi lac tsʼʌctesan lac meta (Rom. 7:23). O tajol lujb mi la cubin lac bʌ (Mat. 26:43). ¿Chuqui miʼ mejlel i coltañonla chaʼan mi lac chʌn chaʼlen wersa o chaʼan maʼañic mi la cʌcʼ chaʼan miʼ mʌctañonla jumpʼejl wocol?

15. ¿Chucoch mi lac chʌn chaʼlen wersa anquese mi lac taj wocol tac? (Salmo 145:14).

¹⁵ Anquese maʼañic woli a mejlel a tsʼʌctesan jumpʼejl meta, mach yomic maʼ ñaʼtan chaʼan maʼañic baʼ ora mi caj a tsʼʌctesan. Cheʼ bajcheʼ miʼ yʌl jiñi Biblia, tajol mi caj lac ñusan cabʌl wocol. Pero cheʼ jaʼel miʼ yʌl chaʼan yicʼot i coltaya Jehová, miʼ mejlel lac bej chaʼlen wersa yicʼot lac tsʼʌctesan jiñi lac meta (pejcan Salmo 145:14). Philip, tsaʼ bʌ lac taja ti tʼan ti párrafo 1, miʼ yʌl: «Jiñi ñumen ñuc bʌ i cʼʌjñibal mach jiñic jaysujtel maʼ yajlel, jiñʌch cheʼ bʌ maʼ chaʼ tech a bʌ i maʼ chaʼlen wersa». Laʼ lac chaʼ taj ti tʼan David. Miʼ yʌl: «Maʼañic mi cʌcʼ chaʼan jiñi wocol tac miʼ mʌctañon. Mij cʼʌn jiñi chaʼan mic pʌsben Jehová bajcheʼ cʼamel mij cʼuxbin». Ñaʼtancu bajcheʼ cʼamel miʼ yubin i tijicñʌyel Jehová cheʼ bʌ miʼ qʼuel chaʼan maʼ chaʼlen wersa a tsʼʌctesan jumpʼejl a meta anquese maʼ taj wocol.

16. ¿Chuqui miʼ mejlel laj cʌn ti jiñi wocol tac?

 ¹⁶ Qʼuele chuqui miʼ mejlel a cʌn ti jiñi wocol tac. Wen ñaʼtan jiñi woli bʌ a ñusan i cʼajtiben a bʌ: «¿Chuqui miʼ mejlel j qʼuextan chaʼan maʼañic chuqui miʼ mʌctañon?» (Pr. 27:12). Cheʼ jaʼel, mi maxto añic lac taja jumpʼejl lac meta anquese tsaʼ lac chaʼle wersa, ¿ixcu mi yom mi laj qʼuextan jiñi lac meta? Chaʼan maʼ ñaʼtan mi yomʌch maʼ qʼuextan, ñaxan ñaʼtan mi jiñi meta tsaʼ bʌ a wʌqʼue a bʌ mucʼʌch i mejlel a taj. d Jehová maʼañic mi caj i ñaʼtan chaʼan maʼañic a cʼʌjñibal tiʼ caj maʼañic tsaʼ mejli a taj jiñi a meta tsaʼ bʌ wʌqʼue a bʌ (2 Cor. 8:12).

17. ¿Chucoch yomʌch mi laj cʼajtesan jiñi tsaʼ tac bʌ lac mele ti wajali?

¹⁷ Cʼajtesan jiñi meta tac tsaʼix bʌ a tsʼʌctesa. Jiñi Biblia miʼ yʌl chaʼan «Dios tojʌch i maʼañic miʼ ñajʌyel i chaʼan jiñi tsaʼ bʌ laʼ mele» (Heb. 6:10). Jin chaʼan, mach ñajayic a chaʼan jaʼel jiñi meta tac tsaʼix bʌ a taja: Tsaʼ sujtiyet ti yamigo Jehová, tsaʼ teche subtʼan yicʼot tsaʼ chʼʌmʌ jaʼ. Jiñi tsaʼ tac bʌ a mele tiʼ tojlel Dios ti wajali miʼ pʌs chaʼan mucʼʌch a mejlel a bej taj majlel jiñi a meta (Filip. 3:16).

18. ¿Chuqui yom bʌ maʼ mel cheʼ woli a tsʼʌctesan majlel jiñi a meta? (Qʼuele jaʼel jiñi dibujo).

¹⁸ Cheʼ bajcheʼ jiñi xñijca barco miʼ cʼotel yaʼ baqui yom i tijicña miʼ yubin i bʌ, jatet miʼ mejlel a taj jaʼel jiñi a meta tiʼ coltaya Jehová. Cheʼ jaʼel, cabʌl xñijca barco miʼ ñusañob i bʌ cheʼ woli xʌñob majlel ti barco. Jatet jaʼel maʼ mejlel a ñusan a bʌ cheʼ bʌ maʼ tsʼʌctesan majlel jiñi a meta mi mucʼʌch a qʼuel bajcheʼ Jehová woliʼ coltañet yicʼot miʼ yʌqʼueñet i bendición (2 Cor. 4:7). Mi mucʼʌch a chʌn chaʼlen wersa mi caj a taj ñumen ñuc tac bʌ bendición (Gál. 6:9).