1. ¿Chucoch mi la cʌl chaʼan cabʌl chuqui woliʼ yujtel ili ora?

 CABɅL chuqui woliʼ yujtel ili ora. Ti jujumpʼejl qʼuin mi laj qʼuel bajcheʼ miʼ tsʼʌctiyel jiñi profecía tac. Jumpʼejl ejemplo, mi laj qʼuel bajcheʼ miʼ contrajiñob i bʌ jiñi rey ti norte yicʼot jiñi rey ti sur (Dn. 11:40). Cheʼ jaʼel, woli (choncol) i sujbel jiñi wen tʼan chaʼan i Yumʌntel Dios tiʼ petol pañimil, i cabʌl lac piʼʌlob woliʼ yʌcʼob i bʌ chaʼan miʼ melbeñob i yeʼtel Jehová (Is. 60:22; Mat. 24:14). Yic’ot jaʼel, woli la cʌqʼuentel cabʌl bʌlñʌcʼʌl tiʼ yorajlel (Mat. 24:45-47).

2. ¿Chuqui muʼ bʌ i mejlel lac ñop, i chuqui mach bʌ la cujilic?

² Jehová woli (yʌquel) i coltañonla lac chʼʌmben i sujm chuqui tac mi caj i yujtel ti talto bʌ qʼuin (Pr. 4:18; Dn. 2:28). Miʼ mejlel lac ñop chaʼan cheʼ miʼ tejchel jiñi ñuc bʌ wocol la cujilix chuqui yom mi lac mel chaʼan xucʼul mi la cajñel yicʼot temelonla, pero yom mi lac ñaʼtan jaʼel chaʼan an tacʌch chuqui mach bʌ la cujilic. Ti ili estudio mi caj lac ñaxan qʼuel chucoch qʼuexelix bajcheʼ mi lac chʼʌmben  i sujm jiñi muʼ bʌ caj i yujtel ti talto bʌ qʼuin, cheʼ jiñi mi caj laj qʼuel jiñi la cujilʌch bʌ yicʼot muʼ bʌ caj i mel Jehová.

MACH BɅ LA CUJILIC

3. ¿Chuqui tsaʼ lac ñaʼta chaʼan mi caj i yujtel cheʼ bʌ miʼ tejchel jiñi ñuc bʌ wocol, i chucoch cheʼ tsaʼ lac ñaʼta bajcheʼ jiñi?

³ Ti wajali tsaʼ lac ñaʼta chaʼan cheʼ miʼ tejchel jiñi ñuc bʌ wocol, jiñi lac piʼʌlob maʼañix mi caj i mejlel i cʌñob Jehová i mi caj i jisʌntelob ti Armagedón. Tsaʼ lac ñaʼta chaʼan jiñi tsaʼ bʌ ujti ti Diluvio tsiʼ pʌsʌ chaʼan cheʼʌch mi caj i yujtel ti talto bʌ qʼuin. Jumpʼejl ejemplo, tsaʼ la cʌlʌ chaʼan cheʼ bajcheʼ Jehová tsiʼ ñupʼbe i puertajlel jiñi arca cheʼ bʌ maxto tejchi jiñi Diluvio i maʼañix majqui tsaʼ mejli ti ochel, lajal mi caj i yujtel cheʼ bʌ miʼ tejchel jiñi ñuc bʌ wocol, maʼañix majqui mi caj i mejlel ti coltʌntel (Mat. 24:37-39).

4. ¿Chucoch maʼañix mi la cʌl chaʼan pejtelel tsaʼ bʌ ujti tiʼ yorajlel Noé cheʼ mi caj i tsʼʌctiyel ti talto bʌ qʼuin?

⁴ ¿Yom ba mi lac ñaʼtan chaʼan pejtelel tsaʼ bʌ ujti ti jiñi Diluvio tsiʼ pʌsʌ chaʼan cheʼʌch mi caj i yujtel ti talto bʌ qʼuin? Maʼañic, come jiñi Biblia maʼañic miʼ yʌl. I sujmʌch chaʼan Jesús tsiʼ yʌlʌ chaʼan ili ora lajal bajcheʼ tiʼ yorajlel Noé, pero maʼañic tsiʼ yʌcʼʌ ti ñaʼtʌntel chaʼan ti talto bʌ qʼuin cheʼʌch mi caj i yujtel cheʼ bajcheʼ tiʼ yorajlel jiñi Diluvio. a Pero an  cabʌl chuqui miʼ mejlel laj cʌn ti ili relato.

5. a) ¿Chuqui tsiʼ mele Noé cheʼ bʌ maxto tili jiñi Diluvio? (Hebreos 11:7; 1 Pedro 3:20). b) ¿Bajcheʼ lajal jiñi lac subtʼan bajcheʼ i chaʼan Noé?

⁵ Cheʼ bʌ Noé tsiʼ ñʌchʼta tsaʼ bʌ i yʌlʌ Jehová, tsiʼ pʌsʌ chaʼan añʌch i ñopoñel i tsaʼ caji i mel jiñi arca (pejcan Hebreos 11:7; 1 Pedro 3:20). Jiñi lac piʼʌlob muʼ bʌ i ñʌchʼtañob jaʼel jiñi wen tʼan chaʼan i Yumʌntel Dios yom miʼ pʌsob tiʼ melbal (chaʼlibal) chaʼan añobʌch i ñopoñel (Hech. 3:17-20). Pedro tsiʼ yʌlʌ chaʼan Noé tiʼ subu jiñi wen tʼan (2 Ped. 2:5). Cheʼ bajcheʼ tsaʼix laj qʼuele ti yambʌ estudio, mach la cujilic mi Noé tsaʼʌch i ñopo i suben pejtelel lac piʼʌlob jiñi muʼ bʌ caj i yujtel. Ti ili ora jaʼel, joñonla mi lac chaʼlen wersa lac sub jiñi wen tʼan tiʼ pejtelel pañimil (mulawil), pero la cujil chaʼan maʼañic mi caj i cʼotel i luʼ ubiñob cheʼ bʌ miʼ tilel i jilibal, ¿chucoch mi la cʌl?

6, 7. ¿Chucoch maʼañic mi caj i mejlel lac subeñob wen tʼan tiʼ pejtelel lac piʼʌlob cheʼ bʌ miʼ tilel i jilibal?

⁶ Laʼ laj qʼuel tsaʼ bʌ i yʌlʌ Jesús chaʼan jiñi subtʼan, tsiʼ yʌlʌ: «Mi caj i sujbel tiʼ pejtelel pañimil chaʼan miʼ yubiñob jiñi tejclum tac» (Mat. 24:14). Ili tsaʼ bʌ i yʌlʌ wolʌch i tsʼʌctiyel, come woli lac sub jiñi i Yumʌntel Dios ñumen ti mil tʼan tac. Ti jiñi lac página chaʼan internet jw.org, cabʌl lac piʼʌlob miʼ mejlel i cʌñob tiʼ tojlel Dios.

⁷ Jesús tiʼ sube jiñi xcʌntʼañob i chaʼan: «Maʼañic mi caj i yujtel laʼ sub jiñi wen tʼan tiʼ pejtelel tejclum tac i chaʼan Israel cheʼ bʌ miʼ tilel i Yalobil wiñic». Ili yom i yʌl chaʼan maʼañic mi caj i mejlel i subeñob jiñi wen tʼan pejtelel lac piʼʌlob cheʼ bʌ mi chaʼ tilel Jesús (Mat. 10:23; 25:31-33). Ili ora, cabʌl lac piʼʌlob chumulob yaʼ baqui mʌctʌbil jiñi lac subtʼan. Cheʼ jaʼel, cabʌl alʌlob miʼ yilañob pañimil (chʼocʼañob) ti jujumpʼejl qʼuin. Jin chaʼan maʼañic mi caj i mejlel lac suben wen tʼan tiʼ pejtelel lac piʼʌlob cheʼ bʌ miʼ tilel i jilibal, anquese woli lac chaʼlen wersa subtʼan «tiʼ pejtelel ñuqui tejclum, pʼolbalʌl tac, tʼan tac yicʼot alʌ tejclum tac» (Apoc. 14:6).

8. ¿Chuqui miʼ mejlel laj cʼajtiben lac bʌ? (Qʼuele jaʼel jiñi foto tac).

⁸ Jin chaʼan, tajol mi laj cʼajtiben lac bʌ: «¿Chuqui mi caj i chaʼleñob jiñi lac piʼʌlob mach bʌ añix tsiʼ yubiyob jiñi wen tʼan cheʼ bʌ miʼ tejchel jiñi ñuc bʌ wocol? ¿Chuqui mi caj i mel Jehová yicʼot Jesús cheʼ bʌ miʼ chaʼleñob meloñel?» (Juan 5:19, 22, 27; Hech. 17:31). Jiñi texto baqui chucul ili estudio miʼ cʼajtesʌbeñonla chaʼan Jehová «mach yomic chaʼan mi juntiquilic miʼ jisʌntel, yom chaʼan pejtelel lac piʼʌlob miʼ chaʼ ñaʼtañob i bʌ» (2 Ped. 3:9; 1 Tim. 2:4). La cujil chaʼan Jehová maxto i yʌlʌ chuqui mi caj i mel tiʼ tojlelob, i mach cʼʌñʌlic miʼ subeñonla.

9. ¿Chuqui an i subeyonla Jehová yaʼ ti Biblia?

⁹ Jiñi Biblia miʼ subeñonla muʼ tac bʌ caj i mel Jehová. Jumpʼejl ejemplo, miʼ yʌl chaʼan mi caj i chaʼ chʼojyelob jiñi mach bʌ tojobic, ili jiñobʌch jiñi mach bʌ añic tsiʼ yubiyob jiñi wen tʼan i maʼañic tsaʼ mejli i qʼuextañob i melbal (Hech. 24:15; Luc. 23:42, 43). Ili miʼ mejlel i yʌqʼueñonla lac melben lac bʌ yambʌ cʼajtiya tac.

10. ¿Chuqui yambʌ miʼ mejlel laj cʼajtiben lac bʌ?

¹⁰ Ixcu jiñi lac piʼʌlob muʼ bʌ caj i chʌmelob ti jiñi ñuc bʌ wocol, ¿yaʼ ba jaxʌl  mi caj i jilelob o mi caj i chaʼ chʼojyelob? Jiñi Biblia miʼ yʌl chaʼan jiñi maʼañix bʌ mi caj i chaʼ chʼojyelob jiñobʌch jiñi muʼ bʌ caj i jisʌntelob ti Armagedón come tsiʼ contrajiyob Jehová (2 Tes. 1:6-10). Pero ti jiñi ñuc bʌ wocol an muʼ bʌ caj i chʌmelob ti jumpʼejl accidente, tiʼ caj cʼamʌjel o ñoxlel, o an muʼ bʌ caj i tsʌnsʌntelob. ¿Chuqui mi caj i yujtel tiʼ tojlelob? ¿Yaʼ ba ochemob ti jiñi mach bʌ tojobic muʼ bʌ caj i chaʼ chʼojyelob? Mach la cujilic (Ec. 9:11; Zac. 14:13).

LA CUJIL BɅ

11. ¿Chuqui mi caj i chʼʌm ti ñuc Jesús cheʼ bʌ miʼ chaʼlen meloñel?

¹¹ An cabʌl chuqui la cujil bʌ. La cujil chaʼan Jesús mi caj i tʼox jiñi lac piʼʌlob lajaloʼ bʌ bajcheʼ tiñʌmeʼ yicʼot chivo. Mi caj i chʼʌm ti ñuc bajcheʼ yilal tsiʼ qʼueleyob jiñi ungidojob (Mat. 25:40). Cheʼ jaʼel, la cujil chaʼan cheʼ bʌ tsaʼix tejchi jiñi ñuc bʌ wocol an ungidojob wʌʼto bʌ mi caj i yajñelob ti pañimil i mi caj i majlelob ti panchan cheʼ bʌ tsʼitaʼ jachix yom chaʼan miʼ tejchel Armagedón. Jin chaʼan, cheʼ bʌ wʌʼto añob ti pañimil jiñi ungidojob, tajol an lac piʼʌlob utsoʼ bʌ i pusicʼal muʼ bʌ caj i mulañob i coltañob (Mat. 25:31, 32; Apoc. 12:17). ¿Chucoch wen ñuc i cʼʌjñibal jiñi?

12, 13. ¿Chuqui mi caj i melob chaʼtiquil uxtiquil lac piʼʌlob cheʼ bʌ miʼ qʼuelob miʼ jisʌntel jiñi Ñuc bʌ Babilonia? (Qʼuele jaʼel jiñi foto tac).

¹² Cheʼ bʌ miʼ tejchel jiñi ñuc bʌ wocol i miʼ jisʌntel jiñi Ñuc bʌ Babilonia, tajol an muʼ bʌ caj i cʼajtesañob chaʼan jiñi i testigojob Jehová tsaʼʌch i subuyob jiñi muʼ bʌ caj i yujtel, ¿am ba muʼ bʌ caj i ñopob Jehová? (Apoc. 17:5; Ez. 33:33).

¹³ Laʼ lac ñaʼtan tsaʼ bʌ ujti tiʼ yorajlel Moisés. Cheʼ bʌ jiñi israelitajob tsaʼ loqʼuiyob ti Egipto, «cabʌl yan tac bʌ winicob xʼixicob» tsaʼ bʌ majliyob yicʼotob (Éx. 12:38). Tajol an tsaʼ bʌ caji i ñopob Jehová cheʼ bʌ tsiʼ qʼueleyob jiñi diez wocol tsaʼ bʌ i subu Moisés. Ixcu mi cheʼ miʼ  yujtel jaʼel cheʼ bʌ miʼ jisʌntel jiñi Ñuc bʌ Babilonia, ¿muʼ ba caj lac michʼan mi jiñi lac piʼʌlob miʼ yochelob tiʼ tejclum Jehová cheʼ bʌ maxto tilemic i jilibal? Maʼañic, la com lac lajin jiñi lac Tat Jehová. Come juntiquilʌch Dios yujil bʌ pʼuntaya, uts, jal miʼ michʼan, cabʌl miʼ pʼuntañonla i xucʼul (Éx. 34:6). b

14, 15. Chaʼan juntiquil miʼ mejlel ti chumtʌl tiʼ pejtelel ora, ¿ñuc ba i cʼʌjñibal jalix tsaʼ chʌmi o baqui chumul? (Salmo 33:4, 5).

¹⁴ Tajol an hermanojob muʼ bʌ i yʌlob tiʼ tojlel i familia mach bʌ Testigojic: «Ñumen wen cheʼ muqʼuic i chʌmel cheʼ bʌ maxto tejchi jiñi ñuc bʌ wocol, cheʼ bajcheʼ jiñi miʼ mejlel ti chaʼ chʼojyel». Pero chaʼan juntiquil miʼ mejlel i taj i cuxtʌlel, mach yaʼic cʌyʌl jalix tsaʼ chʌmi. La cujil chaʼan Jehová, «jiñi xMeloñel muʼ bʌ i mel pejtel añoʼ bʌ ti pañimil», toj chuqui mi caj i mel (Gn. 18:25; pejcan Salmo 33:4, 5).

¹⁵ ¿I chuqui mi caj i yujtel tiʼ tojlel jiñi lac piʼʌlob ñajt bʌ chumulob maʼañic bʌ tsiʼ yubiyob jiñi wen tʼan? Jehová maʼañic mi caj i yʌl chaʼan pejtelel jiñi lac piʼʌlob lajalob bajcheʼ chivo (Mat. 25:46). Ili tsiquil miʼ pʌs chaʼan Jehová mach jiñic mi caj i chʼʌm ti ñuc baqui chumul juntiquil lac piʼʌl chaʼan miʼ yʌqʼuen i cuxtʌlel. Pero mach la cujilic bajcheʼ mi caj i mel cheʼ bʌ wolix jiñi ñuc bʌ wocol. Mi joñonla mi lac pʼuntañob, Jehová ñumento. Tajol an muʼ bʌ caj i ñopob tiʼ tojlel  Jehová cheʼ bʌ miʼ qʼuelob chuqui woliʼ yujtel ti jiñi ñuc bʌ wocol, come mi caj i tsictiyel tiʼ pejtelel pañimil majqui Jehová (Ez. 38:16).

16. ¿Chuqui la cujil tiʼ tojlel Jehová? (Qʼuele jaʼel jiñi dibujo).

¹⁶ Yaʼ ti Biblia tsaʼ laj cʌñʌ chaʼan Jehová miʼ wen qʼuelonla ti ñuc, jin chaʼan tsiʼ yʌcʼʌ i Yalobil chaʼan mi lac mejlel ti chumtʌl tiʼ pejtelel ora (Juan 3:16). Miʼ mejlel la cʌl chaʼan Jehová añix i pʌsbeyonla i yutslel yicʼot i pʼuntaya (Is. 49:15). Wen i cʌñʌyonla ti jujuntiquilonla ti laj cʼabaʼ. Mi tsaʼ chʌmiyonla, lajal miʼ mejlel i chaʼ melonla, i mi caj i mejlel lac chaʼ cʼajtesan pejtelel tsaʼ bʌ lac ñusa (Mat. 10:29-31). Miʼ mejlel lac ñop chaʼan Jehová wen miʼ cajel ti meloñel come wen an i ñaʼtʌbal, toj yicʼot wen yujil pʼuntaya (Sant. 2:13).

17. ¿Chuqui mi caj laj qʼuel ti yambʌ estudio?

¹⁷ Wʌle muqʼuix lac ñumen chʼʌmben i sujm chucoch wen ñuc i cʼʌjñibal jiñi subtʼan. ¿Chucoch mi la cʌl? ¿I chuqui mi caj i coltañonla chaʼan mi lac chʌn chaʼlen subtʼan? Ti jiñi yambʌ estudio mi caj lac jacʼ ili cʼajtiya.