1. ¿Chuqui tsaʼ ajli ti jiñi reunión anual ti 2023?

 ¡WEN utsʼatax jiñi reunión anual ti 2023! a Yaʼi an tac chuqui tsaʼ tsijib tsictesʌnti yicʼot tsaʼ ajqʼui jumpʼejl anuncio chaʼan jiñi lac subtʼan. Jumpʼejl ejemplo, tsaʼ tsictesʌnti chaʼan cheʼ bʌ miʼ jisʌntel jiñi Ñuc bʌ Babilonia tajol anto muʼ bʌ caj i ñopob Jehová. Cheʼ jaʼel, tsaʼ ajli chaʼan ti noviembre chaʼan 2023 maʼañix mi caj lac chʌn sub jaypʼejl ora mi lac chaʼlen subtʼan. ¿Yom ba i yʌl iliyi chaʼan mach wen ñuquix i cʼʌjñibal jiñi subtʼan bajcheʼ ti ñaxan? Mach cheʼiqui.

2. ¿Chucoch yom mi lac ñumen chaʼlen subtʼan? (Marcos 13:10).

² Cheʼ bajcheʼ miʼ ñumel majlel jujumpʼejl qʼuin, yom mi lac ñumen chaʼlen subtʼan, ¿chucoch? Come woli (choncol) i lʌcʼtiyel i jilibal. Laʼcu lac ñaʼtan tsaʼ bʌ i yʌlʌ Jesús ti Marcos 13:10 (pejcan). Yaʼi tsiʼ yʌlʌ chaʼan yom miʼ sujbel jiñi wen tʼan tiʼ pejtelel tejclum. I ti jiñi relato am bʌ ti Mateo tsiʼ yʌlʌ chaʼan mi caj i mejlel ili eʼtel cheʼ bʌ maxto tilemic i jilibal (Mat. 24:14). Ili versículo woliʼ taj ti tʼan i jilibal i pañimil Satanás. Jehová yujilix jala mi caj i mel jiñi an tac bʌ i yʌlʌ (Mat. 24:36; 25:13; Hech. 1:7). Jiñi qʼuin woliʼ ñumel majlel, i jin chaʼan yom mi lac chʌn chaʼlen subtʼan (Rom. 13:11).

3. ¿Chucoch mi lac chaʼlen subtʼan?

³ An junchajp wen ñuc bʌ i cʼʌjñibal yom bʌ mi laj cʼajtiben lac bʌ: ¿Chucoch mi lac chʌn chaʼlen subtʼan? Ti tsʼitaʼ bʌ tʼan, chaʼan laj cʼuxbiya. Cheʼ bʌ mi lac chaʼlen  subtʼan mi lac pʌs chaʼan mi laj cʼuxbin muʼ bʌ i yʌl jiñi Biblia, chaʼan mi laj cʼuxbin lac piʼʌlob, i jiñi ñumen ñuc bʌ, chaʼan mi laj cʼuxbin Jehová yicʼot i cʼabaʼ. Laʼ laj qʼuel jujunchajp.

MI LAC CHAʼLEN SUBTʼAN COME MI LAJ CʼUXBIN MUʼ BɅ I YɅL JIÑI BIBLIA

4. ¿Chuqui mi lac mel cheʼ bʌ mi lac subentel jumpʼejl wem bʌ noticia?

⁴ ¿Jalixqui tsaʼ subentiyet jumpʼejl wem bʌ noticia? Tajol tsaʼ subentiyet chaʼan juntiquil ti a familia tsaʼix i yʌcʼʌ ti pañimil i yalobil o tsaʼix a taja jiñi a weʼtel (troñel) añix bʌ ora cajel a sʌclan, ¿bajcheʼ yubil tsaʼ wubi? Miʼ mejlel la cʌl chaʼan wen tijicñayet i a womto a subeñob pejtelel jiñi a cʌñʌyoʼ bʌ. ¿Mach ba cheʼic tsaʼ wubi a bʌ jaʼel cheʼ bʌ tsaʼ subentiyet jiñi wen tʼan chaʼan i Yumʌntel Dios?

5. ¿Bajcheʼ yubil tsaʼ wubi a bʌ cheʼ bʌ woliyet ti estudio? (Qʼuele jaʼel jiñi foto tac).

⁵ ¿Bajcheʼ yubil tsaʼ wubi a bʌ cheʼ bʌ tsaʼ caji a cʌn muʼ bʌ i yʌl jiñi Biblia? Tsaʼ cʌñʌ chaʼan Jehová miʼ cʼuxbiñet, chaʼan yom chaʼan maʼ wajñel tiʼ familia, chaʼan mi caj i jisan jiñi wocol tac yicʼot chaʼan yaʼ ti tsijiʼ bʌ pañimil mi caj i chaʼ cuxtesan jiñi chʌmeñoʼ bʌ a chaʼan (Mar. 10:29, 30; Juan 5:28, 29; Rom. 8:38, 39; Apoc. 21:3, 4). Pejtelel jiñi, tsaʼ wen cʼoti ti a pusicʼal (Luc. 24:32). Tsaʼ cʼoti a cʼuxbin jiñi cʌntesa tac am bʌ ti Biblia i a womix a suben yambʌlob tsaʼ wubi (laja yicʼot Jeremías 20:9).

6. ¿Chuqui miʼ pʌsbeñonla tsaʼ bʌ ujti tiʼ tojlel Ernest yicʼot Rose?

⁶ Laʼ laj qʼuel chuqui tsaʼ ujti tiʼ tojlel juntiquil hermano i cʼabaʼ Ernest. b Cheʼ bʌ 10 i jabilel, jiñi i papá tsaʼ chʌmi, i miʼ yʌl: «Mij cʼajtiben c bʌ mi jiñi c papá tsaʼ majli ti panchan o mi tsaʼix junyajl jili.  Tsʼaʼ mij qʼuel jiñi yambʌ alobob añobto bʌ i papá». Tiʼ pejtelel ora miʼ majlel ti panteón, miʼ ñoctʌl baqui mucul i papá i miʼ suben Dios ti oración: «A wocolic, coltañon c ñaʼtan baqui an jiñi c papá». Cheʼ 27 i jabilel tsaʼ subenti estudio i ti ora tsiʼ jacʼʌ. Wen tijicña tsiʼ yubi cheʼ tsiʼ cʌñʌ chaʼan jiñi chʌmeñoʼ bʌ lajal bajcheʼ wʌyʌlob, i chaʼan jiñi Biblia miʼ yʌl chaʼan Dios mi caj i chaʼ cuxtesan jiñi chʌmeñoʼ bʌ (Ec. 9:5, 10; Hech. 24:15). Ernest tsiʼ taja i jacʼbal jiñi cʼajtiya tac añix bʌ ora i cajel i sʌclan, i wen tijicña tsiʼ yubi chaʼan jiñi woli bʌ (yʌquel bʌ) i cʌn. Jiñi i yijñam i cʼabaʼ Rose tsaʼ caji i chʼʌm estudio jaʼel, i tsaʼʌch i wen mulaj jiñi tsaʼ bʌ i cʌñʌ. Ti wiʼil, ti 1978, tiʼ chaʼticlelob tsiʼ chʼʌmʌyob jaʼ. Yicʼotob i tijicñʌyel tsaʼ caji i subeñob wen tʼan pejtelel i cʌñʌyoʼ bʌ, i yamigojob yicʼot majqui jach yom i ñʌchʼtan. Ernest yicʼot Rose añix i coltayob ñumen ti 70 lac piʼʌlob chaʼan miʼ cʌñob Jehová yicʼot miʼ chʼʌmob jaʼ.

7. Mi mucʼʌch lac wen qʼuel ti ñuc muʼ bʌ i yʌl jiñi Biblia, ¿chuqui mi caj lac mel? (Lucas 6:45).

⁷ Mi mucʼʌch lac wen qʼuel ti ñuc jiñi cʌntesa tac am bʌ ti Biblia mi caj lac mulan lac suben yambʌlob (pejcan Lucas 6:45). Cheʼʌch mi la cubin lac bʌ bajcheʼ jiñi xcʌntʼañob ti ñaxam bʌ siglo, tsaʼ bʌ i yʌlʌyob: «Pero joñon lojon maʼañic miʼ mejlel j cʌy lon cʌl jiñi tsaʼ bʌ lon j qʼuele yicʼot tsaʼ bʌ lon cubi» (Hech. 4:20). Mi lac wen cʼuxbin muʼ bʌ i yʌl jiñi Biblia, jin chaʼan la com lac subeñob pejtelel lac piʼʌlob.

MI LAC CHAʼLEN SUBTʼAN COME MI LAJ CʼUXBIN LAC PIʼɅLOB

8. ¿Chuqui miʼ ñijcañonla chaʼan mi lac subeñob wen tʼan jiñi lac piʼʌlob? (Qʼuele jiñi recuadro « Cʼuxbin lac piʼʌlob: Cʌntesañob», qʼuele jaʼel jiñi foto).

⁸ Cheʼ bajcheʼ Jehová yicʼot Jesús, joñonla jaʼel mi laj cʼuxbin lac piʼʌlob (Pr. 8:31; Juan 3:16). Mi lac pʼuntañob come mach i cʌñʌyobic Dios i maʼañobic i pijtaya (Efes. 2:12). Lajal bajcheʼ woliʼ sujpʼelob ti jaʼ tiʼ caj jiñi wocol tac, i joñon jachla miʼ mejlel laj coltañob, ¿bajcheʼ? Jiñʌch cheʼ mi lac subeñob jiñi wen tʼan chaʼan i Yumʌntel Dios. Jiñi wen tʼan lajal bajcheʼ jiñi salvavida muʼ bʌ i mejlel i coltañob loqʼuel ti jiñi wocol. Jiñi cʼuxbiya yicʼot pʼuntaya mi caj i ñijcañonla chaʼan mi lac chaʼlen wersa subtʼan. Jiñi wen tʼan miʼ mejlel i yʌqʼueñob i pijtaya chaʼan miʼ tajob i tijicñʌyel ili ora, i miʼ mejlel i tajob jiñi i sujm bʌ cuxtʌlel yaʼ ti tsijiʼ bʌ pañimil (1 Tim. 6:19).

9. ¿Chuqui mi lac subeñob jiñi lac piʼʌlob, i chucoch? (Ezequiel 33:7, 8).

⁹ Jiñi cʼuxbiya mi caj i coltañonla jaʼel chaʼan mi lac subeñob jiñi lac piʼʌlob  chaʼan wolix i lʌcʼtiyel i jilibal ili pañimil (pejcan Ezequiel 33:7, 8). Wen chʼijyem mi la cubin cheʼ mi laj qʼuel chaʼan jiñi lac piʼʌlob ti lac territorio yicʼot jiñi lac familia mach bʌ Testigojobic cheʼ jach añob i mach yujilobic chuqui mi caj i yujtel. Mateo 24:21 miʼ yʌl chaʼan «mi caj i tilel i yorajlel cabʌl wocol» i chaʼan «tiʼ tejchibal pañimil cʼʌlʌl ili ora, maʼañic ujtem wocol tac bajcheʼ iliyi, i maʼañic baʼ ora miʼ chaʼ cajel». Jin chaʼan la com chaʼan miʼ ñaʼtañob muʼ bʌ caj i yujtel ti jiñi bʌ ora, chaʼan mi caj i jisʌntel jiñi mach bʌ i sujmic ñopbalʌl tac, i ti wiʼil, mi caj i jisʌntel ili jontol bʌ pañimil ti Armagedón (Apoc. 16:14, 16; 17:16, 17; 19:11, 19, 20). Mi laj cʼajtiben Jehová chaʼan yonlel lac piʼʌlob miʼ ñʌchʼtañob jiñi wen tʼan i miʼ melbeñob i yeʼtel. Pero ixcu jiñi lac piʼʌlob mach bʌ yomobic i ñʌchʼtan jiñi wen tʼan, tajol yaʼ ochemob jiñi lac familia, ¿chuqui mi caj i chaʼleñob?

10. ¿Chucoch ñucʌch i cʼʌjñibal mi lac chʌn subeñob jiñi lac piʼʌlob muʼ bʌ caj i yujtel?

¹⁰ Cheʼ bajcheʼ tsaʼix laj qʼuele ti yambʌ estudio, Jehová tajol mi caj i coltan jiñi muʼ bʌ i ñopob tiʼ tojlel cheʼ bʌ miʼ qʼuelob chaʼan miʼ jisʌntel jiñi Ñuc bʌ Babilonia. Iliyi miʼ coltañonla lac ñaʼtan chucoch ñuc i cʼʌjñibal mi lac chʌn subeñob jiñi lac piʼʌlob muʼ bʌ caj i yujtel, come jiñi muʼ bʌ lac subeñob ili ora tajol jiñʌch muʼ bʌ caj i cʼajtesañob ti talto bʌ qʼuin (laja yicʼot Ezequiel 33:33). Tajol mi caj i cʼajtesañob tsaʼ tac bʌ lac subeyob i mi caj i ñaʼtañob i melbeñob i yeʼtel Jehová cheʼ bʌ maxto tilemic jiñi i jilibal. Lajal bajcheʼ jiñi xcʌnta cárcel ti Filipos tsiʼ ñopo Dios jinto cheʼ bʌ tsaʼ ñumi jiñi ñuc bʌ yujquel lum, tajol cabʌl lac piʼʌlob maʼañic bʌ miʼ ñopob Dios ili ora, mucʼʌch caj i ñopob cheʼ bʌ miʼ jisʌntel jiñi Ñuc bʌ Babilonia (Hech. 16:25-34).

MI LAC CHAʼLEN SUBTʼAN COME MI LAJ CʼUXBIN JEHOVÁ YICʼOT I CʼABAʼ

11. ¿Bajcheʼ mi la cʌqʼuen Jehová jiñi i ñuclel yicʼot lac pʼʌtʌlel? (Apocalipsis 4:11, qʼuele jaʼel jiñi foto tac).

¹¹ Mi lac chaʼlen subtʼan come mi laj cʼuxbin Jehová yicʼot i cʼabaʼ, jiñʌch jiñi ñumen ñuc bʌ i cʼʌjñibal. Chaʼañonla, jiñi subtʼan jiñʌch junchajp bajcheʼ mi la cʌqʼuen i ñuclel Jehová. Cheʼʌch mi la cʌl bajcheʼ muʼ bʌ i yʌlob jiñi añoʼ bʌ ti panchan: «Jatet c Dioset lojon, yom bʌ maʼ wʌqʼuentel cabʌl a ñuclel yicʼot a pʼʌtʌlel» (pejcan Apocalipsis 4:11). ¿I bajcheʼ mi la cʌqʼuen i ñuclel? Jiñʌch cheʼ mi lac subeñob yambʌ lac piʼʌlob muʼ tac bʌ i pʌs chaʼan Jehová jiñʌch tsaʼ bʌ i mele (pʌtʌ)  pejtelel chuqui an yicʼot chaʼan jiñʌch tsaʼ bʌ i meleyonla. ¿I bajcheʼ mi la cʌqʼuen lac pʼʌtʌlel? Jiñʌch cheʼ bʌ mi laj cʼʌn lac tiempo, laj cuxtʌlel, yicʼot an tac bʌ lac chaʼan chaʼan mi lac chaʼlen subtʼan cheʼ bajcheʼ cʼamel mi lac mejlel (Mat. 6:33; Luc. 13:24; Col. 3:23). Ti tsʼitaʼ bʌ tʼan, mi lac mulan la cʌcʼ ti cʌjñel jiñi lac Dios muʼ bʌ lac wen cʼuxbin. I la com la cʌcʼ ti cʌjñel i cʼabaʼ yicʼot baqui bʌ i sujmlel jiñi i cʼabaʼ. ¿Chucoch?

12. ¿Bajcheʼ mi lac sʌqʼuesan i cʼabaʼ Jehová cheʼ mi lac chaʼlen subtʼan?

¹² Mi lac wen cʼuxbin Jehová, jin chaʼan la com lac sʌqʼuesʌben i cʼabaʼ (Mat. 6:9). Satanás an i yʌlʌ cabʌl lot tiʼ tojlel, i jiñi an bibʼesʌbe i cʼabaʼ (Gn. 3:1-5; Job 2:4; Juan 8:44). Jin chaʼan, ti jiñi subtʼan mi lac suben lac piʼʌlob majqui Jehová. La com chaʼan miʼ ñaʼtañob chaʼan cʼuxbiyajʌch i chaʼan jiñʌch jiñi ñumen ñuc bʌ i melbal. Chaʼan toj chuqui miʼ mel, chaʼan jiñi i Yumʌntel mi caj i jisan jiñi wocol tac, i chaʼan mi caj i chʼʌm tilel tijicñʌyel yicʼot ñʌchʼtʌlel ti pañimil (Sal. 37:10, 11, 29; 1 Juan 4:8). Cheʼ bʌ mi lac sub pejtelel iliyi, woli lac sʌqʼuesʌben i cʼabaʼ Jehová, i cheʼ jaʼel woli lac tsʼʌctesan la queʼtel bajcheʼ i testigo Jehová. ¿Chucoch mi la cʌl iliyi?

13. ¿Chucoch wen tijicñayonla cheʼ i testigojonla Jehová? (Isaías 43:10-12).

¹³ Jehová an i yajcayonla bajcheʼ i testigo (pejcan Isaías 43:10-12). Jiñi Junmojt muʼ bʌ i pʌsob bij tsiʼ yʌlʌyob ti yambʌ ora: «Maʼañic yambʌ ñumen ñuc bʌ, jin jach cheʼ i testigojonla Jehová». c ¿Chucoch? Laʼcu lac ñaʼtan chaʼan woliʼ yujtel meloñel ti laj contra come tsaʼ jopʼbentiyonla lac mul. I cʼʌjñibal lac chaʼan  majqui miʼ coltañonla, ¿majqui mi caj lac suben? Miʼ mejlel la cʌl chaʼan mi caj lac suben juntiquil laj cʌñʌ bʌ, cʌmbil bʌ tiʼ tojlel yambʌ lac piʼʌlob chaʼan miʼ yʌl chuqui i sujm. I jiñʌch tsaʼ bʌ i mele Jehová, tsiʼ yajcayonla chaʼan mi la cʌcʼ ti cʌjñel chaʼan jiñʌch jiñi i sujm bʌ Dios. I tsiʼ yʌqʼueyonla lac mel ili eʼtel come i cʌñʌyonla i yujil chaʼan mi caj la cʌl chuqui i sujm. Wen tijicña mi la cubin i mi laj qʼuel ti ñuc cheʼ i testigojonla Jehová. Mi lac chaʼlen wersa la cʌcʼ ti cʌjñel i cʼabaʼ i mi lac pʌs chaʼan pejtelel chuqui albil tiʼ tojlel mach i sujmic. Cheʼ bajcheʼ jiñi, mi lac tsʼʌctesan la queʼtel bajcheʼ i testigo Jehová (Sal. 83:18; Rom. 10:13-15).

MI CAJ LAC CHɅN CHAʼLEN SUBTʼAN JINTO MIʼ TILEL I JILIBAL

14. ¿Chuqui mi caj i yujtel ti talto bʌ qʼuin?

¹⁴ ¡Wen utsʼatax muʼ bʌ caj i yujtel ti talto bʌ qʼuin! Mi lac pijtan chaʼan cheʼ bʌ maxto tejchemic jiñi ñuc bʌ wocol, cabʌlto lac piʼʌlob miʼ mulañob i cʌn Jehová. Pero cheʼ jaʼel, la cujil chaʼan utsʼatax chaʼan ti talto bʌ qʼuin, cheʼ bʌ wolix jiñi ñuc bʌ wocol, tajol anto lac piʼʌlob muʼ bʌ caj i mulañob i lʌcʼtesañob i bʌ ti Jehová (Hech. 13:48).

15, 16. ¿Chuqui mi caj lac bej mel, i jala mi caj i yujtel?

¹⁵ Tsiquil chaʼan anto cabʌl eʼtel yom bʌ melol. Ili ora, woli lac mel jiñi ñumen ñuc bʌ eʼtel: Woli lac sub jiñi wen tʼan chaʼan i Yumʌntel Dios tiʼ petol pañimil. Cheʼ jaʼel yom mi lac suben lac piʼʌlob chaʼan ti ora woliʼ lʌcʼtiyel i jilibal ili pañimil. Cheʼ bʌ miʼ cʼotel i yorajlel jiñi meloñel mi caj i ñaʼtañob chaʼan jiñi tsaʼ bʌ lac subeyob tilemʌch ti Jehová (Ez. 38:23).

¹⁶ Cheʼ jiñi, ¿chuqui la com lac mel? Come mi laj cʼuxbin muʼ bʌ i yʌl jiñi Biblia, jiñi lac piʼʌlob, i jiñi ñumen ñuc bʌ, mi laj cʼuxbin Jehová yicʼot i cʼabaʼ, mi caj lac chaʼlen wersa lac chʌn chaʼlen subtʼan yicʼot lac tijicñʌyel jinto miʼ subeñonla Jehová: «¡Wʌʼ jaxʌli!».