ALLEN tsiʼ yʌlʌ: «Cabʌl chuqui tsaʼ caji c ñaʼtan cheʼ bʌ tsaʼ ñumiyon tilel ila ti congregación. * Mach cujilic mi mucʼʌch caj c taj yambʌ camigojob o mi caj i qʼueloñob ti wen jiñi hermanojob». Allen woli (choncol) i coltan jumpʼejl congregación am bʌ 1,400 kilómetro i ñajtlel yaʼ tiʼ yotot.

Mi tsaʼ qʼuexta a bʌ ti yambʌ congregación, tajol muqʼuet ti tsʼitaʼ bʌqʼuen. ¿Chuqui miʼ mejlel i coltañet chaʼan maʼ ñʌmʼan? ¿Chuqui miʼ mejlel a mel mi ñumen wocol choncol a wubin chaʼan maʼ ñʌmʼan? Mi mach jatetic tsaʼ bʌ a qʼuexta a bʌ ti congregación, ¿bajcheʼ miʼ mejlel a coltan jiñi muʼ bʌ i cʼotelob ti a congregación?

Mi tsaʼ boco juntejc teʼ chaʼan maʼ pʌcʼ ti yambʌ lum miʼ taj wocol, chaʼan miʼ mejlel lac mel ti wen, yom miʼ tsepbentel cabʌl i wiʼ jiñi teʼ. Ti wiʼil, orajach miʼ chaʼ loqʼuel. Lajal miʼ yujtel cheʼ mi laj qʼuextan lac bʌ ti congregación an tacʌch i wocolel jaʼel. Wen ñʌmʌletix yaʼ ti ñaxam bʌ a congregación, i cabʌlix a wamigojob yaʼi yicʼot chajpʌbilix a chaʼan bajcheʼ maʼ melben i yeʼtel (troñel) Jehová. Pero yomʌch maʼ chaʼ ñʌmʼan ti jiñi tsijiʼ bʌ congregación baqui tsaʼ cʼotiyet. ¿Chuqui miʼ mejlel i coltañet? Jiñʌch cheʼ maʼ chʼʌm ti ñuc jiñi principio am bʌ ti Biblia. Laʼ laj qʼuel bajcheʼ miʼ mejlel lac mel.

Jiñi muʼ bʌ i pejcʌben i Tʼan Dios ti bele ora lajalʌch «bajcheʼ teʼ pʌcʼbil bʌ tiʼ tiʼ cuxul bʌ paʼ muʼ bʌ i yʌcʼ i wut cheʼ tiʼ yorajlel. I yopol jini teʼ mach yujilic pʼajtel. Pejtel chuqui miʼ mel jini winic utsʼat miʼ yujtel» (Sal. 1:1-3).

Cheʼ bajcheʼ juntejc teʼ yom miʼ yʌqʼuentel jaʼ tiʼ pejtelel ora chaʼan wen miʼ colel, juntiquil xñoptʼan yom miʼ mʌcʼlan i bʌ tiʼ Tʼan Dios tiʼ pejtelel ora chaʼan pʼʌtʌl miʼ yajñel yicʼot Dios. Jin chaʼan, pejcan jiñi Biblia ti jujumpʼejl qʼuin, mach a cʌy majlel ti tempa bʌ tac yicʼot mele jiñi chʼujutesaya ti familia i bajñel chajpan a bʌ. Cʼajtesan chaʼan ili ora yom maʼ chaʼlen wersa bajcheʼ ti ñaxan chaʼan bej pʼʌtʌl maʼ wajñel a wicʼot Jehová.

«Jini muʼ bʌ i yʌqʼuen jaʼ yambʌ am bʌ i tiquin tiʼ mux i lajmel i tiquin tiʼ jaʼel» (Pr. 11:25).

Mi caj a ñumen ubin a tijicñʌyel yicʼot orajach mi caj a ñʌmʼan mi mucʼʌch a ñumen loqʼuel ti subtʼan. Juntiquil anciano i cʼabaʼ Kevin, miʼ yʌl: «Tsaʼ bʌ i ñumen coltayon yicʼot quijñam jiñʌch cheʼ tsaʼ ochiyon lojon bajcheʼ precursor auxiliar cheʼ maxto jali tsaʼ cʼotiyon lojon ti jiñi bʌ congregación». Yicʼot miʼ bej al: «Ti orajach tsaʼ lon j cʌñʌ jiñi hermanojob, jiñi precursorob yicʼot baqui miʼ yujtel subtʼan». Roger, tsaʼ bʌ i qʼuexta i congregación am bʌ i ñajtlel 1,600 kilómetro ti baqui chʼoyol, miʼ yʌl: «Chaʼan ti orajach maʼ ñʌmʼan ti jumpʼejl tsijiʼ bʌ congregación jiñʌch cheʼ bele ora maʼ loqʼuel ti subtʼan. Yicʼot jaʼel, cheʼ maʼ wʌcʼ a coltaya tiʼ tojlel ancianojob ti baqui jach bʌ yom melol, tajol chaʼan maʼ sʌqʼuesan i Yotlel Tempa bʌ, maʼ ñusʌben i wenta juntiquil hermano ti jumpʼejl tempa bʌ o maʼ coltan juntiquil hermano chaʼan miʼ cʼotel ti tempa bʌ tac. Mi jiñi hermanojob miʼ qʼuelob jiñi wem bʌ a melbal tac ti orajach mi caj i chʼʌmetob ti ñuc».

«Jambeñon lojon laʼ pusicʼal» (2 Co. 6:13).

Wen añʌch i cʼʌjñibal cheʼ mi lac pʌsbeñob cʼuxbiya yambʌ hermanojob. Cheʼ bʌ Melissa yicʼot jiñi i familia tsaʼ ñumiyob ti yambʌ congregación, tsiʼ chaʼleyob wersa chaʼan miʼ tajob i yamigojob. Melissa miʼ yʌl: «Tiʼ tejchibal yicʼot tiʼ yujtibal jiñi tempa bʌ tac tsaʼ c wen lʌcʼtesa lon c bʌ tiʼ tojlel jiñi hermanojob.  Cheʼ bajcheʼ jiñi, tsiʼ yʌqʼueyon lon i yorajlel chaʼan mi lon c pejcañob, i mach cojach chaʼan mij qʼuel lon c bʌ». Jiñʌch tsaʼ bʌ i coltayob chaʼan ti orajach miʼ cʌmbeñob i cʼabaʼ jiñi hermanojob. Yicʼot jaʼel, tsiʼ pʌyʌyob jiñi hermanojob tiʼ yotot i cheʼʌch tsiʼ ñumen cʌñʌyob i bʌ. Melissa miʼ chaʼ al: «Tsaʼ c ñusʌbe lon c bʌ i númerojlel lon c teléfono. Mi tsaʼ qʼuexta a bʌ ti congregación, tajol an a bʌqʼuen. Cheʼ bajcheʼ ili, miʼ mejlel i pejcañon lojon chaʼan mic tem mel lojon eʼtel tac i chaʼan bʌ Jehová yicʼot chaʼan mi lon c tem ajñel jumucʼ».

Mi wocol maʼ wubin chaʼan maʼ tech a cʌn yambʌlob, añʌch chuqui miʼ mejlel a mel. Jumpʼejl ejemplo, tseʼtañob anquese mach a womic maʼ wubin. Mi cheʼʌch maʼ mel mi cajel i lʌcʼtesañob i bʌ ti a tojlel. Jin chaʼan jiñi Biblia miʼ yʌl: «Tijicña lac pusicʼal cheʼ tijicña miʼ qʼuelonla lac piʼʌlob» (Pr. 15:30). Rachel, tsaʼ bʌ majli ti chumtʌl ti ñajt yaʼ baqui tsaʼ coli, miʼ yʌl: «Cʼʌlʌl tsaʼ coliyon, maʼañic mic wen mulan tʼan». Yicʼot miʼ bej al: «An tajol mic wersa xicʼ c bʌ chaʼan mic pejcan tiʼ pejtelel jiñi hermanojob yaʼ ti tsijib congregación. Muʼ bʌ c mel jiñʌch mic sʌclan juntiquil i bajñel jach bʌ buchul chaʼan mic pejcan. Tajol maʼañic miʼ wen mulan tʼan bajcheʼ joñon». ¿Ixcu cheʼ muqʼuic a chaʼlen wersa a pejcan yambʌ hermanojob tiʼ tejchibal yicʼot cheʼ tiʼ yujtibal jujumpʼejl tempa bʌ?

Cheʼ jaʼel, tajol wen tijicñayet cheʼ woli (yʌquel) jaxto a cʼotel come a wom a cʌn yambʌ hermanojob. Pero tajol miʼ jilel majlel jiñi a tijicñʌyel am bʌ a chaʼan ti ñaxan. Mi cheʼ maʼ wujtel, yom maʼ chaʼlen wersa a bej sʌclan a wamigojob.

Mach junlajal miʼ loqʼuel i wiʼ jiñi teʼ yaʼ baqui miʼ pʌjqʼuel. Cheʼ joñonla jaʼel, mach junlajalic mi lac ñʌmʼan ti jumpʼejl congregación. Jiñi principio tac muʼ bʌ caj lac tsajin mi caj i coltañet mi añix ora a qʼuexta a bʌ ti jiñi congregación i maxto wen ñʌmʼayet:

«Mach yomic mi lac lujban tiʼ melol chuqui utsʼat, come tal i yorajlel mi caj lac chaʼlen cʼajbal mi maʼanic miʼ lujban lac pusicʼal» (Gá. 6:9).

Ñumen aqʼuen i yorajlel cheʼ bajcheʼ tsaʼ lon ñaʼta chaʼan maʼ ñʌmʼan yaʼ ti a congregación. An misionerojob ajñemoʼ bʌ yaʼ ti Cʌntesʌntel i chaʼan Galaad i chocbilob majlel ti yambʌ país pero maʼañic miʼ seb majlelob tiʼ yotot jinto cheʼ tsaʼix jalʼayob chaʼpʼejl uxpʼejl jab yaʼ baqui añob. Cheʼ bajcheʼ ili, miʼ mejlel i sujtesañob tiʼ yamigo jiñi hermanojob yicʼot miʼ ñʌmʼañob majlel ti yambʌ cultura.

Alejandro mach junsujtel jach an i qʼuexta i congregación i yujil chaʼan wocolʌch chaʼan mi lac ñʌmʼan. Miʼ yʌl: «Cheʼ bʌ tsaʼ j qʼuexta lon c bʌ ti congregación, jiñi quijñam tsiʼ yʌlʌ: ‹¡Pejtelel jiñi camigojob yaʼ tsaʼ cʌyleyob ti yambʌ congregación!›». Pero Alejandro tsiʼ cʼajtesʌbe chaʼan cheʼʌch tsiʼ yʌlʌ jaʼel cheʼ bʌ maxto jalic i ñumelob yaʼ baqui tsaʼ jaxto loqʼuiyob. Pero ti jiñi chaʼpʼejl jab tsaʼ bʌ ajñiyob, jiñi i yijñam tsaʼ caji i chʼʌm ti ñuc yambʌlob i tiʼ sujtesa ti wem bʌ i yamigojob jiñi mach bʌ i cʌñʌyobic ti ñaxan.

«Mach a wʌl: ‹¿Chucoch ñumen wen jiñi qʼuin tac tsaʼix bʌ ñumi bajcheʼ wʌle?›, come mach chaʼañic an a ñaʼtʌbal cheʼ maʼ cʼajtin iliyi» (Ec. 7:10, TNM).

Mach a lajeʼ jiñi congregación baqui añet yicʼot yaʼ baqui tsaʼ loqʼuiyet. Tajol ñumen ñʌchʼʌlob jach jiñi hermanojob yaʼ ti a tsijib congregación o ñumen jamʌl tsiquil yujilob tʼan. Anquese bajcheʼic jach, qʼuele jiñi wem bʌ i melbalob cheʼ bajcheʼ maʼ mulan miʼ mejlel ti a tojlel. An hermanojob ñumeñoʼ bʌ ti  yambʌ congregación qʼuelbil i chaʼañob chaʼan yom miʼ melbeñob i bʌ ili cʼajtiya: «¿Mucʼʌch ba j cʼuxbiñob tiʼ sujm tiʼ ‹pejtelel› jiñi hermanojob?» (1 P. 2:17).

«Cʼajtinla, mi caj laʼ wʌqʼuentel» (Lc. 11:9).

Chʌcʌ cʼajtiben i coltaya Jehová. Juntiquil anciano i cʼabaʼ David miʼ yʌl: «Mach a bajñel ñop a mel». I miʼ chaʼ al: «Cabʌl chuqui miʼ mejlel lac mel cojach tiʼ coltaya Jehová. Jin chaʼan suben chaʼan miʼ coltañet». Rachel, tsaʼix bʌ lac taja ti tʼan, cheʼʌch miʼ ñaʼtan jaʼel. Miʼ yʌl: «Cheʼ mi cubin quicʼot c ñoxiʼal chaʼan mach wen ñocholic c chaʼan lojon jiñi congregación, jamʌ tsiquil mij cʼajtiben lon Jehová ti wocol tʼan chaʼan miʼ coltañon lojon j qʼuel chuqui choncol lon c mel cheʼ jiñi hermanojob miʼ ñajtʼesañob i bʌ ti lon c tojlel. Cheʼ jiñi, mi lon c chaʼlen wersa chaʼan mi cʌqʼuen lon i yorajlel chaʼan mi lon c tem ajñel».

Tatʌlob, mi wocol woliʼ yubiñob a walobilob chaʼan miʼ ñʌmʼañob, chaʼlenla oración a wicʼotob chaʼan miʼ coltʌntelob. Chajpʌbenla i yorajlel chaʼan mi laʼ jumucʼ ajñel a wicʼot yambʌlob chaʼan maʼ coltañob i taj yambʌ i yamigojob.

¿Chuqui miʼ mejlel a mel tiʼ tojlel jiñi tsijiʼ cʼotemoʼ bʌ ti a congregación? Chaʼlen wersa chaʼan maʼ sujtel ti wem bʌ i yamigojetob. Ñaʼtan chuqui maʼ mulan chaʼan maʼ melbentel cheʼ jatetic maʼ cʼotel ti yambʌ congregación, i cheʼʌch yom maʼ mel (Mt. 7:12). ¿Ixcu cheʼ muqʼuic a pʌyob ti a chʼujutesaya ti familia o chaʼan mi la comol qʼuel jiñi programa chaʼan JW Broadcasting? Chajpʌben i yorajlel chaʼan maʼ loqʼuel ti subtʼan a wicʼotob. I pʌyʌyob ti uchʼel, i tijicña mi caj i yubiñob cheʼ maʼ pʌsbeñob a wutslel. ¿Anto ba chuqui tac yambʌ miʼ mejlel a mel tiʼ tojlelob?

Carlos miʼ yʌl: «Cheʼ bʌ tsaʼ cʼotiyon lon ti yambʌ congregación, juntiquil hermana tsiʼ yʌqʼueyon lon jumpʼejl jun baʼ miʼ yʌl i cʼabaʼ tienda tac jubem bʌ i tojol chuqui miʼ choñob. Tsaʼʌch i wen coltayon lon». Jiñi ñajt bʌ tilemob tajol yomʌch mi lac subeñob bajcheʼ yilal i pislel yom miʼ xojob baqui wen an ticwal, tsʌñal o jaʼlel. Miʼ mejlel i coltañob ti subtʼan jaʼel cheʼ muqʼuic a tsʼitaʼ subeñob bajcheʼ yilal yaʼ baqui chumulet o baqui bʌ i ñopbal jiñi wiñicob xʼixicob (quixtañujob).

Allen, jiñi tsaʼ bʌ la cʌlʌ ti ñaxan, añix jumpʼejl jab i cʼotel yaʼ ti congregación, i wʌle miʼ yʌl: «Cheʼ tsaʼ jaxto cʼotiyon tsaʼ c chaʼle wersa chaʼan mij cʌn pejtelel jiñi hermanojob. Pero wʌle cheʼix bajcheʼ c familia mij qʼuelob, i wen tijicñayon». Allen miʼ yʌl chaʼan maʼañic tiʼ sʌtʌ i yamigojob cheʼ tsaʼ majli ti yambʌ congregación. Tiʼ sujm, ñumen cabʌl tajbil i chaʼan, i tajol jiñʌch i yamigojoʼ bʌ miʼ cajel tiʼ pejtelel ora.