1. ¿Baqui bʌ ticʼojel tsiʼ yʌqʼue Pablo jiñi xñoptʼañob? (Qʼuele jiñi dibujo).

MIʼ ñaʼtʌntel chaʼan jiñi apóstol Pablo tiʼ tsʼijbu jiñi carta i chaʼan Colosenses cheʼ tsʼitaʼ jax yom chaʼan miʼ loqʼuel yaʼ ti ñaxam bʌ i cʌjchel ti Roma, tajol cheʼ ti jabil 60 o 61. Ti jiñi jun tiʼ subeyob chaʼan wen ñuc i cʼʌjñibal cheʼ miʼ ‹chʼʌmbeñob isujm [...] chuqui yom Dios› (Col. 1:9). Cheʼ jaʼel tiʼ subeyob: «Wolic wʌn subeñetla ame anic majqui yom i lotiñetla ti maña jax bʌ tʼan». I tsiʼ bej alʌ: «Chʌcʌ qʼuele laʼ bʌ ame anic majch miʼ soquetla yicʼot i ñaʼtʌbal chʼoyol bʌ ti pañimil yicʼot i sajtemal loqʼuem bʌ tiʼ bajñel pusicʼal, cheʼ bajcheʼ i tilel i melbal lac ñojteʼel woli bʌ i ñojpel ti pañimil, mach bʌ cʌntesʌbilobic ti Cristo» (Col. 2:4, 8). Ti wiʼil, tiʼ tsictesʌbeyob chucoch an ñaʼtʌbalʌl tac mach bʌ utsʼatic yicʼot chucoch an wiñicob xʼixicob (quixtañujob) muʼ bʌ i mulañob i pensar ili pañimil. Jumpʼejl ejemplo, miʼ mejlel i yʌqʼueñonla lac ñaʼtan chaʼan ñumen chʼejlonla bajcheʼ yambʌlob. Jin chaʼan, Pablo tiʼ tsʼijbu ili jun chaʼan miʼ coltañob i cʌy bajcheʼ yilal i pensar ili pañimil (mulawil) yicʼot jiñi mach bʌ wentaquic (Col. 2:16, 17, 23).

2. ¿Chucoch mi caj laj qʼuel ñaʼtʌbalʌl tac muʼ bʌ i wen ajlel wʌʼ ti pañimil?

² Jiñi lajaloʼ bʌ i pensar bajcheʼ ili pañimil maʼañic miʼ jacʼbeñob  i mandar Jehová. Muʼ bʌ i melob o i yʌlob, xucʼu xucʼul miʼ mejlel i cʼunʼesan lac ñopoñel (chʼujbiya). Ti lac pejtelel miʼ mejlel lac toyben i pensar pañimil, ili mi lac taj ti televisión, Internet, yaʼ baqui mucʼonla ti eʼtel (troñel) o ti escuela. Ti ili temaj mi caj laj qʼuel chuqui yom mi lac mel (chaʼlen) chaʼan maʼañic miʼ jem lac pensar jiñi i pensar pañimil. Mi caj laj qʼuel joʼchajp muʼ bʌ i wen ajlel yicʼot bajcheʼ miʼ mejlel lac choc loqʼuel.

3. ¿Chuqui miʼ ñaʼtan cabʌl quixtañu, i chucoch?

³ «Mach cʼʌñʌlic mic ñop Dios chaʼan wem bʌ quixtañujon». An cabʌl país baqui maʼañic miʼ ñopob Dios. Tajol maʼañic wen qʼuelbil i chaʼañob mi añʌch Dios o maʼañic, pero miʼ mulañob cheʼ libre miʼ mejlel i melob chuqui yomob (pejcan Salmo 10:4). An muʼ bʌ i ñaʼtañob chaʼan weñʌch cheʼ mach cʼʌñʌlic mi lac ñop Dios chaʼan mi lac pʌs wem bʌ lac melbal.

4. ¿Chuqui miʼ mejlel lac suben juntiquil maʼañic bʌ miʼ ñop chaʼan añʌch majqui tsiʼ Mele pejtelel chuqui an?

⁴ ¿I tojelʌch ba cheʼ mi lac ñop chaʼan maʼañic juntiquil tsaʼ bʌ i Mele pejtel chuqui an? Cheʼ mi lac ñop lac sʌclan i jacʼbal ti ciencia, tajol mucʼ jach caj i ñumen soc lac jol. Pero mach wocolic jiñi i jacʼbal. Pejtelel chuqui cuxul ila ti pañimil añʌch majqui tsiʼ mele (pʌtʌ), lajal bajcheʼ jiñi otot an majqui miʼ mel. Cheʼ bʌ wolix i jejmel majlel jumpʼejl otot, yom chaʼan an majqui miʼ tojʼesan. Cheʼ jaʼel, cheʼ bʌ mi lac tsep lac bʌ, mach jalic miʼ mejlel ti lajmel. Pero ¿majqui tsiʼ mele iliyi? Jiñi Biblia miʼ yʌl: «Ti jujumpʼejl otot añʌch majqui tsiʼ mele. Pero jini tsaʼ bʌ i mele pejtelel chuqui tac an, jiñʌch Dios» (He. 3:4).

5. ¿Chucoch cabʌl miʼ yʌlob chaʼan mach i cʼʌjñibalic mi lac ñop Dios chaʼan mi lac ñaʼtan chuqui wen o mach bʌ weñic?

⁵ ¿Ixcu cheʼ miʼ yʌjlel chaʼan mach cʼʌñʌlic mi lac ñop Dios chaʼan mi lac ñaʼtan chuqui wen yicʼot mach bʌ weñic? Jiñi Biblia miʼ yʌl chaʼan añʌch maʼañic bʌ miʼ ñopob Dios, pero weñobʌch i melbal tac (Ro. 2:14, 15). Jumpʼejl ejemplo, tajol mucʼʌch i qʼuelob ti ñuc i tat i ñaʼ yicʼot miʼ cʼuxbiñob. Pero mi maʼañic miʼ ñaʼtañob chaʼan Jehová jiñʌch tsaʼ bʌ i Meleyonla yicʼot chaʼan añʌch tiʼ wenta i qʼuel chuqui wen yicʼot mach bʌ weñic, tajol mi caj i tajob wocol (Is. 33:22). Cabʌl quixtañu miʼ qʼuelob chaʼan mi la quilan wocol i mucʼʌch i ñaʼtañob chaʼan yomʌch miʼ coltañonla Dios (pejcan Jeremías 10:23). Jin chaʼan, mach yomic mi lac ñaʼtan chaʼan mach i cʼʌjñibalic mi lac ñop Dios yicʼot mi lac chʼʌm ti ñuc i mandar tac chaʼan mi lac yajcan lac mel chuqui wen (Sal. 146:3).

6. ¿Chuqui miʼ ñaʼtan cabʌl quixtañu chaʼan jiñi ñopbalʌl?

⁶ «Mach cʼʌñʌlic miʼ cochel ti jumpʼejl ñopbalʌl chaʼan mic taj c tijicñʌyel». Muʼ bʌ i ñaʼtañob bajcheʼ ili, miʼ yʌlob chaʼan jiñi ñopbalʌl mucʼ jach i pʌy lac tsʼuʼlel yicʼot maʼañic i cʼʌjñibal. Cheʼ jaʼel, cabʌl ñopbalʌl miʼ ñajtesañob jiñi quixtañujob ti Dios come miʼ yʌlob chaʼan miʼ choc majlel ti cʼajc jiñi jontoloʼ bʌ, chaʼan yom miʼ yʌjqʼuel taqʼuin o miʼ yotsañob i bʌ ti política. Jin chaʼan, cabʌl miʼ yʌlob chaʼan mach cʼʌñʌlic jiñi ñopbalʌl chaʼan miʼ tajob i tijicñʌyel. Tajol miʼ yʌlob chaʼan miʼ ñopob Dios, pero mach yomobic ochel ti jumpʼejl ñopbalʌl.

7. ¿Chucoch miʼ coltañonla lac taj lac tijicñʌyel jiñi isujm bʌ ñopbalʌl?

⁷ ¿Isujm ba tijicñayonla cheʼ maʼañic lac ñopbal? Mucʼʌch i mejlel lac taj lac tijicñʌyel cheʼ mach ochemoñicla ti jiñi mach bʌ isujmic ñopbalʌl. Pero maʼañic baʼ ora mi caj lac taj isujm bʌ tijicñʌyel mi mach i yamigojoñicla Jehová, «jiñi tijicña bʌ Dios» (1 Ti. 1:11, TNM). Pejtelel chuqui miʼ mel chaʼañʌch i wenlel yambʌlob, i cheʼ mi la cʌcʼ lac ñaʼtʌbal chaʼan mi laj coltan yambʌlob tijicñayonla (Hch. 20:35). Jumpʼejl ejemplo, jiñi isujm bʌ ñopbalʌl miʼ coltañonla ti lac familia chaʼan tijicñayonla. ¿Chucoch? Come miʼ  cʌntesañonla chaʼan yom mi laj qʼuel ti ñuc chaʼan xucʼulonla tiʼ tojlel lac piʼʌl, chaʼan mi laj cʌntesan la calobilob i ti jumpʼejl lac pusicʼal mi laj cʼuxbin lac familiajob. Cheʼ jaʼel, juntemelob jiñi i wiñicob Dios i tijicñayob yicʼot yambʌ hermanojob añoʼ bʌ tiʼ pejtelel pañimil (pejcan Isaías 65:13, 14).

8. ¿Bajcheʼ miʼ mejlel laj cʼʌn Lucas 11:28 chaʼan mi laj coltan i chʼʌmben isujm jiñi yambʌlob chuqui miʼ yʌqʼueñonla lac tijicñʌyel?

⁸ ¿Ixcu cheʼ miʼ yʌjlel chaʼan mucʼʌch i mejlel lac taj lac tijicñʌyel anquese maʼañic mi lac melben i yeʼtel Dios? Laʼcu lac ñaʼtan: ¿Chuqui miʼ yʌqʼueñonla tijicñʌyel? An muʼ bʌ i tajob i tijicñʌyel cheʼ miʼ chajpañob i bʌ chaʼan wem bʌ eʼtel, chaʼan alas o jumpʼejl ñusaqʼuin. An tijicña bʌ miʼ yubiñob cheʼ utsʼat bajcheʼ miʼ chaʼleñob tiʼ tojlel i familia yicʼot i yamigojob. Pejtelel iliyi mucʼʌch i yʌqʼueñonla lac tijicñʌyel, pero an yambʌ muʼ bʌ i mejlel i yʌqʼueñonla lac tijicñʌyel tiʼ pejtelel ora. Mach lajaloñicla bajcheʼ añimal tac, come miʼ mejlel laj cʌn tsaʼ bʌ i Meleyonla yicʼot mi lac melben i yeʼtel. Jiñʌch muʼ bʌ i yʌqʼueñonla lac tijicñʌyel come cheʼʌch melbilonla (pejcan Lucas 11:28). Jin chaʼan, miʼ pʼʌtʼesan lac pusicʼal yicʼot miʼ tijicñesañonla cheʼ mi lac tempan lac bʌ yicʼot yambʌ hermanojob tiʼ chʼujutesʌntel Jehová (Sal. 133:1). Miʼ tijicñesañonla jaʼel cheʼ juntemel la quicʼot la quermañojob, cheʼ utsʼat chumulonla yicʼot an utsʼatax bʌ lac pijtaya.

9. a) ¿Chuqui miʼ ñaʼtañob cabʌl quixtañujob chaʼan jiñi piʼleya? b) ¿Chucoch miʼ yʌl jiñi Biblia chaʼan mach weñic jiñi piʼleya ti mach bʌ ñujpuñemobic?

⁹ «Mach lecojic ti qʼuelol cheʼ miʼ piʼleñob i bʌ anquese mach ñujpuñemob». Tajol an majqui miʼ yʌl chaʼan yom mi lac ñusan lac bʌ ti wen come cheʼʌch tsaʼ mejliyonla i mach lecojic yom mi laj qʼuel jiñi piʼleya ti mach bʌ ñujpuñemobic. Pero jiñi Biblia miʼ yʌl chaʼan Dios miʼ tsʼaʼlen jiñi tsʼiʼlel, jin chaʼan yomʌch mi lac tsʼaʼlen jaʼel * (pejcan 1 Tesalonicenses 4:3-8). Jehová miʼ mejlel i subeñonla chuqui yom bʌ mi lac mel yicʼot mach bʌ yomic, come jiñʌch tsiʼ meleyonla. Jehová miʼ yʌl chaʼan cojach jiñi ñujpuñemoʼ bʌ miʼ mejlel i piʼleñob i bʌ. Miʼ yʌcʼ mandar tac come miʼ cʼuxbiñonla i yujil chaʼan mi lac taj lac wenlel. Cheʼ bʌ jiñi familia tac miʼ jacʼob iliyi, miʼ pʌsob i cʼuxbiya, miʼ qʼuelob i bʌ ti ñuc yicʼot tijicñayob. Jehová mi caj i yʌqʼuen i toj i mul jiñi muʼ bʌ i yʌlol ñusʌbeñob i tʼan (He. 13:4).

10. ¿Chuqui yom mi lac mel chaʼan maʼañic mi lac yajlel ti tsʼiʼlel?

¹⁰ Jiñi Biblia miʼ pʌsbeñonla bajcheʼ yom mi lac tsʼaʼlen jiñi tsʼiʼlel. Junchajp yom bʌ mi lac mel jiñʌch cheʼ mi lac tsajin chuqui mi laj qʼuel. Jesús tsiʼ yʌlʌ: «Majqui jach miʼ qʼuel xʼixic tiʼ colosojlel i pusicʼal tsaʼix i chaʼle tsʼiʼlel tiʼ pusicʼal yicʼot. Mi woliʼ yʌsañet ti mulil jini a wut am bʌ ti a ñoj, locʼsan. Choco» (Mt. 5:28, 29). Jin chaʼan, jiñi xñoptʼañob maʼañic mi caj i qʼuelob pornografía yicʼot maʼañic mi caj i ñʌchʼtañob cʼay muʼ bʌ i yʌl bibiʼ tac bʌ. Jiñi apóstol Pablo tiʼ tsʼijbu: «Jin chaʼan, tsʌnsanla am bʌ ti laʼ bʌcʼtal i chaʼan bʌ pañimil, jiñi tsʼiʼlel» (Col. 3:5, TNM). Cheʼ jaʼel, yom mi lac ticʼ lac pensar yicʼot muʼ bʌ la cʌl (Ef. 5:3-5).

11. ¿Chucoch an hermanojob muʼ bʌ i mejlel i mulañob i sʌclan ñuc tac bʌ eʼtel ila ti pañimil?

¹¹ «Chaʼan mi lac taj lac tijicñʌyel yom mi lac chajpan lac bʌ chaʼan jumpʼejl wem bʌ eʼtel». Yonlel majqui miʼ subeñonla chaʼan yom mi lac ñumen aqʼuen i yorajlel yicʼot lac pʼʌtʌlel chaʼan tiʼ melol jiñi eʼtel ti pañimil. Tajol an majqui miʼ subeñonla chaʼan mi caj lac ñumen  taj lac ñuclel yicʼot lac taqʼuin. Yonlel quixtañu jiñʌch muʼ bʌ i melob, tajol miʼ cʼotel lac ñaʼtan jaʼel chaʼan cheʼʌch yom mi lac mel.

12. ¿Mucʼʌch ba i yʌcʼ tijicñʌyel cheʼ mi lac taj ñuc bʌ la queʼtel ila ti pañimil?

¹² ¿Tiʼ sujm ba miʼ yʌqʼueñonla tijicñʌyel cheʼ mi lac taj ñuc bʌ la queʼtel wʌʼ ti pañimil? Maʼañic. Yom mi laj cʼajtesan tiʼ tojlel Satanás. Tsiʼ mulaj i chʼʌm tiʼ wenta jiñi yambʌlob i miʼ qʼuejlel ti ñuc. Anquese tsaʼʌch tsʼitaʼ mejli, maʼañic tsiʼ taja i tijicñʌyel, cojach i michʼajel (Mt. 4:8, 9; Ap. 12:12). Jiñi ñuc bʌ eʼtel ti pañimil pʼisbil jach jiñi tijicñʌyel muʼ bʌ i mejlel i yʌcʼ. Maʼañic miʼ mejlel lac lajeʼ yicʼot jiñi tijicñʌyel muʼ bʌ la cubin cheʼ mi laj coltañob i cʌn Dios jiñi yambʌlob i chaʼan miʼ mejlelob ti chumtʌl tiʼ pejtelel ora. Cheʼ jaʼel, ili jontol jax bʌ pañimil miʼ pʼol tsʼaʼleya yicʼot miʼ ñijcan lac pusicʼal chaʼan ñumen ñuc mi laj qʼuel lac bʌ bajcheʼ yambʌlob. Pero ti wiʼil, maʼañic chuqui i cʼʌjñibal come lajal jach bajcheʼ mi lac ñop lac chuc icʼ (Ec. 4:4).

13. a) ¿Bajcheʼ yilal yom mi laj qʼuel la queʼtel? b) Cheʼ bajcheʼ tiʼ sube jiñi apóstol Pablo jiñi añoʼ bʌ ti Tesalónica, ¿chuqui tsaʼ bʌ i ñumen aqʼue i tijicñʌyel?

¹³ Ti lac pejtelel yomʌch mi lac sʌclan chuqui i cʼʌjñibal lac chaʼan, i mach lecojic cheʼ mi lac mel jiñi eʼtel muʼ bʌ lac mulan. Pero mach jiñic yom bʌ mi lac ñumen acʼ ti ñuc ti laj cuxtʌlel. Jesús tsiʼ yʌlʌ: «Maʼanic xʼeʼtel muʼ bʌ mejlel i yuman chaʼtiquil yumʌl. Miʼ tsʼaʼlen juntiquil yumʌl, miʼ cʼuxbin yambʌ. Miʼ jacʼben i tʼan juntiquil, miʼ ñusʌben i tʼan yambʌ. Mach mejlic laʼ yuman Dios cheʼ woli laʼ yuman chubʌʼañʌl» (Mt. 6:24). Cheʼ mi lac ñumen qʼuel ti ñuc i melol i yeʼtel Jehová yicʼot mi laj cʌntesan yambʌlob am bʌ tiʼ Tʼan, jiñʌch muʼ bʌ i ñumen aqʼueñonla lac tijicñʌyel. Jiñi apóstol Pablo wen yujil chaʼan cheʼʌchi. Cheʼ bʌ chʼitonto, tsiʼ qʼuele ti ñuc chaʼan miʼ chajpan i bʌ tiʼ cʌntesa judíojob, i cabʌl chuqui miʼ mejlel i taj yilal. Pero tsiʼ ñumen taja i tijicñʌyel cheʼ tsiʼ yʌcʼʌ i bʌ ti subtʼan yicʼot cheʼ miʼ cʌntesan yambʌlob, i cheʼ tsiʼ qʼuele bajcheʼ tsaʼ caji i qʼuextañob i bʌ jiñi quixtañujob chaʼan choncol bʌ i cʌñob tiʼ tojlel Jehová (pejcan 1 Tesalonicenses 2:13, 19, 20). Maʼañic yambʌ muʼ bʌ i ñumen acʼ tijicñʌyel.

14. ¿Chucoch añʌch muʼ bʌ i ñopob chaʼan jiñi quixtañujob mucʼʌch i mejlel i tojʼesañob i wocol?

¹⁴ «Jiñi quixtañujob miʼ mejlel i tojʼesañob i wocol». Ili tʼan cabʌl muʼ bʌ i mejlel  mulañob, come cheʼ isujmiqui yom i yʌl chaʼan mach i cʼʌjñibalic lac chaʼan Dios yicʼot miʼ mejlel lac bajñel mel chuqui la com. Cheʼ jaʼel, isujmʌch yilal come an muʼ bʌ i yʌlob chaʼan wolix (choncolix) i lajmel majlel jiñi guerra tac, jiñi xujchʼ, cʼamʌjel yicʼot chaʼan maʼañix cabʌl pʼumpʼuñiyel. Jumpʼejl informe miʼ yʌl: «Ili pañimil wolix i tojʼan majlel come jiñi quixtañujob tsaʼix i ñaʼtayob i ñumen weñʼesan». ¿Isujm ba iliyi? ¿Woli ba i mejlel jiñi quixtañujob i tojʼesañob jiñi wocol wajalix bʌ i cajel? Laʼ laj qʼuel.

15. ¿Chuqui miʼ pʌs chaʼan wen wocolʌch bajcheʼ an ili pañimil?

¹⁵ Jiñi guerra tac. Ti jiñi chaʼpʼejl ñuc bʌ guerra tsaʼ bʌ ujti, tsaʼ chʌmiyob (sajtiyob) cheʼ bʌ 60 millón quixtañujob. Cʼʌlʌl cheʼ tsaʼ ujti jiñi Segunda Guerra Mundial, jiñi quixtañujob mach yujilobic bajcheʼ miʼ mejlel i jisañob jiñi guerra. Cheʼ bʌ tsaʼ cʼoti jiñi 2015, ñumen ti 65 millón quixtañujob tsaʼ locʼsʌntiyob tiʼ lumal tiʼ caj guerra o tsʼaʼlentel. Mi yʌjlel chaʼan cojach ti jiñi jabil, cheʼ bʌ 12,4 millón quixtañujob tsiʼ cʌyʌyob i chumlib. Muʼ bʌ i melob am bʌ tiʼ contra yumʌl. An tejclum tac baqui woli (yʌquel) i pʼojlel yan tac bʌ wocol muʼ bʌ i yʌcʼonla ti pensar, bajcheʼ jiñi muʼ bʌ i yotsañob wocol ti Internet, ticʼlʌntel ti otot yicʼot terrorismo. Cheʼ jaʼel, cabʌl muʼ bʌ i yʌlob chaʼan woliʼ ñumen pʼojlel xujchʼ. Wen tsiquil chaʼan jiñi wiñicob maʼañic miʼ mejlel i jisañob jiñi wocol tac. Jiñi cʼamʌjel tac. An cʼamʌjel tac mucʼ jach bʌ i mejlel laj cuch majlel yicʼot tsʼac tac. Pero jumpʼejl informe tsaʼ bʌ loqʼui ti 2013 tsiʼ yʌlʌ chaʼan ti jujumpʼejl jab miʼ chʌmel 9 millón maxto bʌ i tajayob 60 i jabilel tiʼ caj jiñi cʼamʌjel ti lac pusicʼal, lac jol, jiñi cáncer yicʼot diabetes. Jiñi pʼumpʼuñiyel. Jiñi Banco Mundial miʼ yʌl chaʼan ti 1990 an 280 millón pʼumpʼuñoʼ bʌ ti África pero cheʼ ti 2012 añobix cheʼ bʌ 330 millón.

16. a) ¿Chucoch jiñi añoʼ bʌ i pʼʌtʌlel ti política yicʼot ti jiñi taqʼuin maʼañic miʼ mejlel i jisañob jiñi wocol tac? b) ¿Baqui tac bʌ bendición miʼ yʌjlel ti Isaías yicʼot ti Salmos chaʼan mi caj i chʼʌm tilel i Yumʌntel Dios?

¹⁶ Mach toj sajtelic lac pusicʼal chaʼan ili woli bʌ ti ujtel. Jiñi pʼʌtʌloʼ bʌ ti política yicʼot chaʼan taqʼuin cojach miʼ bajñel ñaʼtañob i bʌ i maʼañic miʼ mejlel i jisañob jiñi guerra, muʼ bʌ i ticʼlan yambʌlob, cʼamʌjel tac yicʼot pʼumpʼuñiyel. Cojach i Yumʌntel Dios miʼ mejlel i jisan. Laʼ laj qʼuel muʼ bʌ caj i mel Jehová ila ti pañimil. Jiñi guerra tac. Jiñi i Yumʌntel Dios mi caj i jisan muʼ bʌ i yʌcʼ ti tejchel iliyi: Jiñi muʼ bʌ i bajñel ñaʼtañob i bʌ, jiñi xujchʼ, ñuc bʌ miʼ yubiñob i bʌ chaʼan i país, mach bʌ isujmic ñopbalʌl jinto jaʼel jiñi Satanás (Sal. 46:8, 9). Muʼ bʌ i melob am bʌ tiʼ contra yumʌl. Ili ora jiñi i Yumʌntel Dios woliʼ mel maʼañic miʼ mejlel i mel yambʌ yumʌl: Woliʼ cʌntesan yonlel quixtañu chaʼan bajcheʼ yom miʼ cʼuxbiñob i bʌ yicʼot temel miʼ yajñelob (Is. 11:9). Jiñi cʼamʌjel tac. Jehová mi caj i yʌqʼuen i cʼocʼlel jiñi i wiñicob (Is. 35:5, 6). Jiñi pʼumpʼuñiyel. Jehová mi caj i jisan iliyi i mi caj i yʌqʼuen i wenlel i tejclum yicʼot mi caj i bej cʌntesañob, come jiñʌch ñumen ñuc bʌ i cʼʌjñibal (Sal. 72:12, 13).

17. ¿Bajcheʼ miʼ mejlel lac choc loqʼuel jiñi i pensar pañimil?

¹⁷ Cheʼ an chuqui mi la cubin mach bʌ cheʼic an bajcheʼ ñopol lac chaʼan, laʼ lac wen qʼuel chuqui miʼ yʌl jiñi Biblia i laʼ lac pejcan juntiquil hermano wen añix bʌ i ñaʼtʌbal. Laʼ lac wen ñaʼtan chucoch cabʌl quixtañu miʼ mulan jiñi muʼ bʌ i yʌjlel, chucoch mach isujmic i bajcheʼ miʼ mejlel lac choc. Ti lac pejtelel miʼ mejlel laj cʌntan lac bʌ chaʼan bajcheʼ an i pensar ili pañimil cheʼ mucʼʌch lac jacʼ tsaʼ bʌ i sube Pablo jiñi xcʌntʼañob ti Colosas: «Ajñenla ti utsʼat tiʼ tojlel jini mach bʌ ochemobic tiʼ tʼan Dios» yicʼot «ñaʼtanla bajcheʼ yom mi laʼ jacʼben i tʼan jujuntiquil» (Col. 4:5, 6).