Laʼ lac mel chuqui toj yicʼot laʼ lac pʌs pʼuntaya bajcheʼ Jehová
«Toj yom mi laʼ mel. Chaʼlenla chuqui utsʼat tiʼ tojlel laʼ piʼʌlob. Pʌsbeñob i yutslel laʼ pusicʼal [«pʼuntaya», TNM]» (ZAC. 7:9).
CʼAY: 125, 88
1, 2. a) ¿Bajcheʼ yilal tsiʼ qʼuele Jesús jiñi i Mandar Dios? b) ¿Chucoch mi la cʌl chaʼan jiñi xtsʼijbayajob yicʼot fariseojob mach weñic bajcheʼ tsiʼ cʼʌñʌyob jiñi Mandar?
JESÚS tsiʼ qʼuele ti ñuc jiñi i Mandar Moisés. La cujil chaʼan cheʼʌchi come jiñi Mandar tilem tiʼ Tat, jiñʌch ñumen ñuc bʌ miʼ qʼuel tiʼ cuxtʌlel. Jiñi Biblia tsiʼ wʌn alʌ chaʼan Jesús mi caj i wen qʼuel ti ñuc i mandar tac Dios, tsiʼ yʌlʌ: «C Dios tijicña wolic mel chuqui a wom. Lotol a mandar tic pusicʼal» (Sal. 40:8). Jesús tsiʼ yʌlʌ yicʼot tsiʼ pʌsʌ tiʼ melbal chaʼan tojʌch jiñi Mandar yicʼot miʼ yʌqʼueñonla lac wenlel, i chaʼan pejtelel chuqui tsʼijbubil yaʼi miʼ tsʼʌctiyel (Mt. 5:17-19).
2 Tajol wen chʼijiyem tsiʼ yubi Jesús cheʼ tsiʼ qʼuele chaʼan jiñi xtsʼijbayajob yicʼot fariseojob mach weñic tsiʼ cʼʌñʌyob jiñi Mandar tsaʼ bʌ i yʌcʼʌ i Tat. Isujm chaʼan an tacʌch muʼ bʌ i yʌl jiñi mandar tsaʼʌch bʌ i meleyob bajcheʼ tsʼijbubil, pero jin jach mach bʌ ñoj ñuquic i cʼʌjñibal. Jin chaʼan, Jesús tsiʼ yʌlʌ: «Mi laʼ locʼsan i diezmojlel jini pimel i cʼabaʼ menta yicʼot yambʌ i cʼabaʼ enelto yicʼot yambʌ i cʼabaʼ comino». ¿Baqui bʌ i wocolel cheʼ jiñi? Jesús tsiʼ chaʼ alʌ: «Pero mi laʼ ñusan ñumen ñuc tac bʌ i mandar Dios, jiñʌch toj bʌ meloñel yicʼot pʼuntaya yicʼot chuqui yom ñopol» (Mt. 23:23). Jiñi fariseojob maʼañic tsiʼ chʼʌmbeyob isujm jiñi Mandar yicʼot wen yujilob tsiʼ yubiyob i bʌ. Pero Jesús tsaʼʌch i chʼʌmbe isujm chuqui yom i yʌl jiñi Mandar yicʼot chuqui miʼ pʌs tiʼ tojlel Jehová.
3. ¿Chuqui mi caj laj qʼuel ti ili temaj?
3 Jiñi xñoptʼañonbʌla mach yaʼix chuculonla tiʼ Mandar Moisés (Ro. 7:6). Pero ¿chucoch tsiʼ cʌyʌ Jehová yaʼ ti Biblia? Mach chaʼañic mi laj cʌlʌx acʼ lac pensar ti jujunchajp chuqui miʼ yʌl, chaʼañʌch mi lac chʼʌmben isujm yicʼot mi laj qʼuel ti ñuc jiñi «ñumen ñuc tac bʌ», yom i yʌl jiñi principio tac baqui chucul. Jumpʼejl ejemplo, ¿chuqui bʌ principio tac miʼ mejlel laj cʌn ti jiñi mandar tsaʼ bʌ ajqʼui chaʼan jiñi tejclum tac chaʼan putsʼijib? Yaʼ ti yambʌ temaj tsaʼ laj qʼuele chuqui miʼ mejlel i mel chaʼan miʼ pʼuntʌntel jiñi muʼ bʌ i chaʼlen tsʌnsa mach bʌ yʌlolic i chaʼan. Ili temaj miʼ pʌs chuqui miʼ mejlel laj cʌn tiʼ tojlel Jehová cheʼ tsiʼ yʌcʼʌ jiñi tejclum tac yicʼot bajcheʼ miʼ mejlel lac lajiben i melbal. Mi caj lac jacʼ uxpʼejl cʼajtiya: ¿Bajcheʼ miʼ pʌs i pʼuntaya Jehová cheʼ tsaʼ ajqʼui jiñi tejclum tac chaʼan putsʼijib? ¿Chuqui miʼ cʌntesañonla chaʼan bajcheʼ miʼ qʼuel jiñi cuxtʌlel? I ¿bajcheʼ miʼ pʌs chaʼan tojʌch chuqui miʼ mel? Cheʼ woli (choncol) laj qʼuel majlel, laʼ lac ñaʼtan bajcheʼ tac miʼ mejlel lac lajiben i melbal Dios (pejcan Efesios 5:1).
«YOM MI LAʼ YAJCAN TEJCLUM TAC BAʼ MIʼ MEJLEL TI PUTSʼEL JINI MUʼ BΛ I TSΛNSAN I PIʼΛL»
4, 5. a) ¿Chuqui tsaʼ mejli chaʼan mach wocolic miʼ taj jiñi tejclum tac chaʼan putsʼijib jiñi xtsʌnsa mach bʌ yʌlolic i chaʼan, i chucoch? b) ¿Chuqui miʼ cʌntesañonla chaʼan Jehová iliyi?
4 Jehová tsiʼ wen qʼuele chaʼan mach wocolic ti cʼotel yaʼ ti 6 tejclum chaʼan putsʼijib. Tsiʼ yʌlʌ chaʼan yom miʼ yajcʌntel uxpʼejl tejclum tiʼ jujunwejlel jiñi Jordán jaʼ. Cheʼ bajcheʼ iliyi, jiñi stsʌnsa mach wocolic miʼ cʼotel yicʼot ti orajach (Nm. 35:11-14). Jiñi israelob yom wen cʌntʌbil i chaʼañob jiñi bij majlen bʌ yaʼ ti tejclum tac (Dt. 19:3). Cheʼ jaʼel, miʼ yʌjlel chaʼan jiñi judíojob ñʌmʌl i yʌcʼob letrero ti bij chaʼan miʼ ñaʼtañob jiñi stsʌnsajob baqui yom miʼ majlelob. Come tsaʼ waʼchoconti jiñi tejclum tac chaʼan putsʼijib, jiñi stsʌnsajob mach wersajic miʼ majlelob ti putsʼel ti ñajt bʌ tejclum mach bʌ i cʌñʌyobic baqui tajol miʼ mejlel i mulañob i chʼujutesañob diosteʼ tac.
5 Laʼ lac ñaʼtan ili: Jehová tsiʼ yʌlʌ chaʼan yom miʼ tsʌnsʌntel jiñi xtsʌnsa, pero yom miʼ pʌsbentel pʼuntaya yicʼot miʼ coltʌntel jiñi mach bʌ yʌlolic i chaʼan. Juntiquil wen yujil bʌ chaʼan Biblia, tiʼ tsʼijbu: «Wen tsiquil bajcheʼ tsaʼ ajli chaʼan yom miʼ mejlel yicʼot mach wocolic ti tsʼʌctesʌntel. Jiñʌch muʼ bʌ i pʌs i pʼuntaya Dios». Jehová miʼ wen pʼuntañonla, mach juntiquilic xmeloñel mucʼ jach bʌ i mulan i yʌqʼuen i xotʼ i mul i wiñicob (Ef. 2:4).
6. ¿Chucoch mach lajalic i melbal jiñi fariseojob bajcheʼ i chaʼan Dios?
6 Jiñi fariseojob mach lajalobic bajcheʼ Jehová come maʼañic miʼ pʼuntañob yambʌlob. Jumpʼejl ejemplo, i cʌntesa jiñi judíojob miʼ yʌl chaʼan maʼañix miʼ ñusʌbeñob i mul jiñi ñumeñix bʌ ti uxyajl melbil i chaʼan jumpʼejl sajtemal. Jesús tsiʼ pʌsʌ chaʼan mach weñic i melbal jiñi judíojob cheʼ bʌ tsiʼ taja ti tʼan juntiquil fariseo yicʼot juntiquil xchʼʌm tojoñel woliyoʼ (yʌqueloʼ) Lc. 18:9-14).
bʌ ti oración. Jiñi xchʼʌm tojoñel tsiʼ cʼajtibe Dios chaʼan miʼ pʼuntʌntel. Pero jiñi fariseo tsiʼ yʌlʌ: «Wocolix a wʌlʌ Dios, come mach lajalonic bajcheʼ yañoʼ bʌ. Xujchʼob, mach tojobic i pusicʼal. Miʼ chaʼleñob tsʼiʼlel. Mach lajalonic jaʼel bajcheʼ jini xchʼʌm tojoñel». Jiñi fariseojob tsiʼ ñaʼtayob chaʼan «mach tojic i pusicʼal yañoʼ bʌ», jin chaʼan tsiʼ qʼueleyob mach cʼʌñʌlic miʼ pʌsbeñob i pʼuntaya (Mi añʌch lac pecʼlel, jiñi yambʌlob mach wocolic mi caj i cʼajtiñob chaʼan mi lac ñusʌbeñob i mul. (Qʼuele jiñi párrafo 4 cʼʌlʌl ti 8).
7, 8. a) ¿Bajcheʼ miʼ mejlel lac lajiben i melbal Jehová cheʼ miʼ lowoñobla tiʼ tʼan? b) ¿Chucoch yomʌch mi lac pʌs lac pecʼlel chaʼan mi lac ñusʌben i mul yambʌlob?
7 Maʼañic baqui ora yom mi lac mel bajcheʼ jiñi fariseojob. Laʼ lac tsajcʌben i melbal Jehová yicʼot laʼ lac pʌs pʼuntaya (pejcan Efesios 4:32). Junchajp bajcheʼ miʼ mejlel lac mel jiñʌch cheʼ mi lac wen qʼuel chaʼan jiñi yambʌlob maʼañic miʼ bʌcʼñañob i cʼajtibeñoñobla i ñusʌntel i mul (Lc. 17:3, 4). Laʼ laj cʼajtiben lac bʌ: «¿Muʼ ba c pʌsben yambʌlob chaʼan comʌch c ñusʌbeñob i mul jiñʌch jajayajl yom mic mel? ¿Comʌch ba chaʼ utsʼan quicʼot jiñi muʼ bʌ i mel mach bʌ weñic tic tojlel?».
8 Chaʼan mi lac ñusʌben i mul yambʌlob yom an lac pecʼlel. Jiñi fariseojob maʼañic tsiʼ ñusʌbeyob i mul yambʌlob come ñumen ñuc tsiʼ qʼueleyob i bʌ. Pero joñonla ‹ñumen ñuc mi laj qʼuel lac piʼʌlob› i mi lac ñusʌbeñob i mul (Fil. 2:3). Miʼ mejlel laj cʼajtiben lac bʌ: «¿Woli ba c tsajcʌben i melbal Jehová yicʼot woli ba c pʌs c pecʼlel?». Mi cheʼʌchi, jiñi yambʌlob mach wocolic mi caj i cʼajtiñob chaʼan mi lac ñusʌbeñob i mul, i mucʼʌch caj lac ñusʌbeñob. Tiʼ pejtelel ora yom mi lac pʌs lac pʼuntaya yicʼot mach ti orajic yom mi lac michʼan (Ec. 7:8, 9).
LAʼ LAJ QʼUEL TI ÑUC LAJ CUXTΛLEL I MAʼAÑIC MI CAJ LAC TAJ LAC MUL
9. ¿Bajcheʼ tsiʼ colta Jehová chaʼan miʼ chʼʌmbeñob isujm jiñi israelob chaʼan chʼujulʌch laj cuxtʌlel?
9 Jiñi tejclum tac tsaʼ cʼʌjñibʌyi chaʼan miʼ cʌntan jiñi israelob i maʼañic miʼ chaʼleñob tsʌnsa (Dt. 19:10). Jehová miʼ qʼuel ti ñuc laj cuxtʌlel i miʼ tsʼaʼlen jiñi muʼ bʌ i yʌlol tsʌnsan jiñi toj bʌ (Pr. 6:16, 17). Come Dios chʼujul yicʼot toj, maʼañic miʼ mulan cheʼ an majqui miʼ chaʼlen tsʌnsa anquese mach yʌlolic i chaʼan. Isujm chaʼan mucʼʌch i pʼuntʌntel jiñi mach bʌ yʌlolic miʼ chaʼlen tsʌnsa. Pero yomʌch miʼ sub i bʌ ti ancianojob. Mi tsaʼ qʼuejli chaʼan mach yʌlolic tsiʼ mele, yom miʼ cʌytʌl ti jiñi tejclum chaʼan putsʼijib cʼʌlʌl miʼ chʌmel (sajtel) jiñi ñuc bʌ motomaj. Ili yom i yʌl chaʼan an i tajol yaʼ yom miʼ cʌytʌl ti chumtʌl tiʼ pejtelel ora. Cheʼ bajcheʼ jiñi, Jehová tsiʼ colta i chʼʌmben isujm jiñi israelob chaʼan chʼujulʌch laj cuxtʌlel. Chaʼan miʼ qʼuelob ti ñuc jiñi tsaʼ bʌ i yʌqʼueyonla laj cuxtʌlel, mach yomic miʼ yʌcʼob ti wocol i cuxtʌlel yambʌ wiñicob xʼixicob (quixtañujob) tiʼ caj chuqui tsiʼ meleyob o maʼañic bʌ miʼ melob.
10. Cheʼ bajcheʼ tsiʼ yʌlʌ Jesús, ¿bajcheʼ tsiʼ pʌsʌyob jiñi xtsʼijbayajob yicʼot fariseojob chaʼan maʼañic miʼ qʼuelob ti ñuc i cuxtʌlel yambʌlob?
10 Jiñi xtsʼijbayajob yicʼot fariseojob maʼañic tsiʼ lajiyob Jehová. Wen tsiquil chaʼan maʼañic tsiʼ qʼueleyob ti ñuc i cuxtʌlel yambʌlob. Jesús tiʼ subeyob: «Come mach laʼ womic laʼ wʌqʼueñob i tajob i ñaʼtʌbal. Jatetla, maʼanic tsaʼ ochiyetla. Cheʼ jaʼel, tsaʼ laʼ mʌcta jini woliyoʼ bʌ ti ochel» (Lc. 11:52). I wentʌlel tsiʼ coltayob jiñi quixtañujob chaʼan miʼ chʼʌmbeñob isujm i Tʼan Dios yicʼot miʼ tajob i cuxtʌlel maʼañic bʌ i jilibal. Pero tsiʼ mʌctayob chaʼan miʼ tsajcañob Jesús, jiñi xColtaya bʌ lac chaʼan (Hch. 5:31). Cheʼ bajcheʼ jiñi, tsiʼ yotsayob ti wocol i cuxtʌlel jiñi quixtañujob. Cojach tsiʼ bajñel ñaʼtayob i wenlel i tsiʼ qʼueleyob i bʌ ti ñuc, i mach i wentajob jiñi i piʼʌlob. ¡Wen jontolob yicʼot wen tsʌtsob jax i pusicʼal!
11. a) ¿Bajcheʼ tsiʼ pʌsʌ Pablo chaʼan miʼ qʼuel jiñi cuxtʌlel cheʼ bajcheʼ miʼ qʼuel Jehová? b) ¿Chuqui mi caj i coltañonla chaʼan mi laj qʼuel jiñi lac subtʼan cheʼ bajcheʼ tsiʼ qʼuele Pablo?
11 Mi la com lajalonla cheʼ bajcheʼ Jehová i mach cheʼic bajcheʼ jiñi ñaxam bʌ miʼ yʌcʼob i bʌ ti ñopbalʌl, yom mi laj qʼuel ti ñuc laj cuxtʌlel. Cheʼʌch tsiʼ mele jiñi apóstol Pablo cheʼ tiʼ sube wen tʼan jiñi quixtañujob cheʼ bajcheʼ cʼamel tsaʼ mejli. Jin chaʼan tsaʼ mejli i yʌl: «Mach chʌn c wentajix laʼ cuxtʌlel ti laʼ pejtelel» (pejcan Hechos 20: 26, 27). Tsiʼ chaʼle subtʼan mach chaʼan jach an i mul miʼ yubin o chaʼan jach tsaʼ subenti ti Jehová. Tsiʼ mele come miʼ cʼuxbin jiñi quixtañujob yicʼot miʼ qʼuelben ti ñuc i cuxtʌlelob (1 Co. 9:19-23). Joñonla jaʼel yom mi laj qʼuel laj cuxtʌlel cheʼ bajcheʼ miʼ qʼuel Jehová, «come mach yomic miʼ sajtel mi juntiquilic» (2 P. 3:9). ¿Jiñʌch ba a wom bʌ jaʼel? Mi mucʼʌch lac pʌs jiñi lac pʼuntaya, mi caj lac ñumen pʌs lac chʼejlel ti subtʼan yicʼot ñumen tijicña mi caj la cubin lac bʌ.
12. ¿Chucoch miʼ wen cʌntañob i bʌ jiñi i wiñicob Dios?
12 Yambʌ bajcheʼ mi lac pʌs chaʼan cheʼʌch mi laj qʼuel laj cuxtʌlel bajcheʼ miʼ qʼuel Jehová jiñʌch cheʼ mi lac chʼʌm ti ñuc pejtelel muʼ bʌ lac subentel chaʼan laj cʌntʌntel. Yom tsajilonla tiʼ pejtelel ora cheʼ woliyonla ti eʼtel (troñel) o ti ñijca carro, cheʼ choncolonla ti mel otot yicʼot cheʼ woli la cʌqʼuen i cʌntʌntel, cheʼ choncol lac majlel ti carro chaʼan lac tempa bʌ o colem tempa bʌ. Ñumen an i cʼʌjñibal laj cuxtʌlel yicʼot laj cʼocʼlel, i mach jiñic bajcheʼ cʼamel la com lac mel ti la queʼtel, jiñi taqʼuin yicʼot i yorajlel am bʌ lac chaʼan. Jiñi lac Dios tiʼ pejtelel ora toj chuqui miʼ mel yicʼot utsʼat, i cheʼʌch la com lac mel jaʼel bajcheʼ jiñi. Jiñi ancianojob jiñʌch ñaxam bʌ miʼ qʼuelob bajcheʼ mi caj i cʌntañob i bʌ yicʼot jiñi yambʌlob jaʼel (Pr. 22:3). Jin chaʼan, mi juntiquil anciano miʼ cʼajtesʌbeñonla bajcheʼ yom mi laj cʌntan lac bʌ, yomʌch mi lac jacʼben i tʼan (Gá. 6:1). Mi woli laj qʼuel laj cuxtʌlel bajcheʼ miʼ qʼuel Jehová, maʼañic mi caj lac taj lac mul.
‹LAʼ I MELOB [...] CHEʼ BAJCHEʼ WOLI CΛQʼUEÑOB MANDAR›
13, 14. ¿Chuqui yom miʼ mel jiñi ancianojob ti Israel chaʼan toj chuqui miʼ melob cheʼ bajcheʼ Jehová?
13 Jehová tiʼ sube jiñi ancianojob ti Israel chaʼan yom miʼ jacʼob jiñi toj bʌ mandar. Ti ñaxan, yom miʼ cʌñob bajcheʼ an jiñi wocol. Ti wiʼil, chaʼan miʼ mejlel i ñaʼtañob mi mucʼʌch caj i pʌsbeñob pʼuntaya o maʼañic jiñi xtsʌnsa, yom miʼ qʼuelob bajcheʼ yilal i melbal ti ñaxan, chuqui an tiʼ pusicʼal yicʼot chuqui miʼ ñaʼtan. Chaʼan toj miʼ chaʼleñob meloñel cheʼ bajcheʼ Jehová, yom miʼ wen qʼuelob mi mach chaʼañic i michʼajel o i jontolil i pusicʼal tsiʼ mele (pejcan Números 35:20-24). Cheʼ jaʼel, mi an majqui tsiʼ qʼuele jiñi tsaʼ bʌ ujti, yomʌch an chaʼtiquil muʼ bʌ i tsictesañob chucoch yʌlolʌch i chaʼan jiñi xtsʌnsa (Nm. 35:30).
14 Wen tsiquil chaʼan jiñi ancianojob yomʌch miʼ ñaʼtañob bajcheʼ yilal jiñi quixtañu i mach cojic jach tsaʼ bʌ i mele. Yomʌch miʼ wen cʼʌñob i ñaʼtʌbal, yom bʌ i yʌl, chaʼan yom miʼ wen cʌñob jiñi mach bʌ ti orajic mi lac taj laj qʼuel. Jin chaʼan, ñuc i cʼʌjñibal cheʼ añob i coltʌntel ti jiñi chʼujul bʌ i yespíritu Jehová chaʼan miʼ cʼʌñob i ñaʼtʌbal, miʼ pʌsob pʼuntaya yicʼot miʼ melob chuqui toj (Éx. 34:6, 7).
15. ¿Bajcheʼ yilal tsiʼ qʼuele Jesús jiñi xmulilob, i bajcheʼ tsiʼ qʼueleyob jiñi fariseojob?
15 Jiñi fariseojob cojach miʼ yʌcʼob ti ñuc i mul jiñi quixtañu, i mach jiñic bajcheʼ yilal i melbalob. Laʼ laj qʼuel chuqui tsaʼ ujti cheʼ bʌ Jesús tsajñi ti jumpʼejl qʼuiñijel tiʼ yotot Mateo. Jiñi fariseojob tsiʼ cʼajtibeyob jiñi xcʌntʼañob i chaʼan Jesús: «¿Chucoch woliʼ piʼlen ti weʼel jini xchʼʌm tojoñelob yicʼot xmulilob laʼ maestro?». Jesús tsiʼ jacʼʌ: «Jini cʼocʼoʼ bʌ mach yomobic tsʼʌcʌntel, jini jach jini cʼamoʼ bʌ. Cucula. Ñopola Mt. 9:9-13). ¿Choncol ba i mucben i mul xmulilob jiñi Jesús? Maʼañic. Yom bʌ jiñʌch cheʼ miʼ cʌyob i mul. Ili jiñʌch junchajp ñuc bʌ i cʼʌjñibal ti jiñi wen tʼan tsaʼ bʌ i tsictesa (Mt. 4:17). Pero Jesús wen an i ñaʼtʌbal i tsiʼ qʼuele chaʼan añʌch «xchʼʌm tojoñelob yicʼot xmulilob» yomoʼ bʌ i cʌy i mul. Maʼañic tsaʼ majliyob tiʼ yotot Mateo chaʼan yomob jach uchʼel. Cabʌl yaʼ bʌ añob ti jiñi bʌ ora xcʌntʼañob i chaʼan Jesús (Mr. 2:15). Jiñi fariseojob maʼañic tsiʼ qʼueleyob jiñi quixtañujob bajcheʼ tsiʼ qʼuele Jesús. Tiʼ subeyob ti xmulil i tsiʼ qʼueleyob chaʼan maʼañix mi caj i tojʼañob. Jiñi fariseojob mach lajalobic bajcheʼ jiñi toj bʌ Dios yicʼot am bʌ i pʼuntaya woli bʌ i chʼujutesañob tsiʼ poj alʌyob.
i sujmlel jini tʼan: ‹Com mi laʼ chaʼlen pʼuntaya, mach comic mi laʼ wʌqʼueñon c majtan›. Come maʼanic tsaʼ tili c pʌy jini tojoʼ bʌ i pusicʼal. Tsaʼ tili c pʌy xmulilob chaʼan miʼ cʌyob i mul» (16. ¿Chuqui yom bʌ miʼ qʼuel jiñi ancianojob yajcʌbiloʼ bʌ chaʼan miʼ chaʼleñob meloñel?
16 Ili ora, jiñi ancianojob yom miʼ wen qʼuelob mi woliyʌch i lajiñob Jehová, jiñi muʼ bʌ i «mulan chuqui toj» (Sal. 37:28). Jin chaʼan, yom miʼ ñaxan ‹wen cʼajtiñob› chuqui tsaʼ ujti, yom i yʌl, miʼ wen qʼuejlel mi tsaʼʌch ujti jumpʼejl mulil. Mi cheʼʌchi, yom miʼ yujtel mel bʌ cheʼ bajcheʼ miʼ yʌl jiñi mandar (Dt. 13:12-14). Jiñi ancianojob yajcʌbiloʼ bʌ chaʼan miʼ chaʼleñob meloñel yom miʼ wen qʼuelob mi jiñi xñoptʼan tsaʼʌchix i cʌyʌ i mul o maxto. An i tajol wocolʌch iliyi. Yom miʼ wen qʼuelob bajcheʼ yilal, chuqui miʼ ñaʼtan yicʼot chuqui an tiʼ pusicʼal jiñi tsaʼ bʌ i chaʼle mulil (Ap. 3:3). Jiñi quixtañu yomʌch miʼ cʌy i mul chaʼan miʼ pʼuntʌntel. *
17, 18. ¿Bajcheʼ miʼ mejlel i ñoj ñaʼtañob jiñi ancianojob chaʼan tiʼ sujm tsaʼix i cʌyʌ i mul juntiquil quixtañu? (Qʼuele jiñi foto am bʌ tiʼ tejchibal).
17 Jehová yicʼot Jesús miʼ mejlel i ñaʼtañob chuqui an ti lac pusicʼal, pero jiñi ancianojob maʼañic. Jin chaʼan, ¿bajcheʼ miʼ ñaʼtañob mi juntiquil quixtañu tsaʼix i junyajl cʌyʌ i mul? Ñaxan, yom miʼ cʼajtiñob i ñaʼtʌbal ti Dios (1 R. 3:9). I chaʼpʼejlel, yom miʼ cʼʌñob jiñi Biblia yicʼot jiñi jun tac locʼbil bʌ i chaʼan jiñi xucʼul bʌ xʼeʼtel chaʼan miʼ mejlel i ñaʼtañob bajcheʼ yilal jiñi «chʼijiyemlel tilem bʌ ti pañimil» yicʼot jiñi «i chʼijiyemlel lac pusicʼal chʼoyol bʌ ti Dios», com bʌ la cʌl jiñʌch mi ti isujmʌch tsaʼix i cʌyʌ i mul (2 Co. 7:10, 11). Yom miʼ wen qʼuelob chuqui miʼ yʌl jiñi i Tʼan Dios chaʼan bajcheʼ miʼ yubin i bʌ, chuqui miʼ ñaʼtan yicʼot bajcheʼ yilal i melbal juntiquil tsaʼix bʌ i cʌyʌ i mul yicʼot maxto bʌ i cʌyʌ.
18 I yuxpʼejlel, yom miʼ ñaʼtañob jaʼel bajcheʼ yilal jiñi quixtañu i miʼ chʼʌmob ti ñuc chuqui ñusʌbil i chaʼan, chucoch tsiʼ mele bajcheʼ jiñi i baqui bʌ i cʼunlel. Jiñi Biblia tsiʼ wʌn alʌ bajcheʼ yilal mi caj i mel Jesús, i jol bʌ jiñi congregación: «Mach jelchojquic mi caj i mel winicob. Maʼanic mi caj i ñop uʼyaj tʼan yicʼot lot. Mi caj i coltan jini pʼumpʼuñoʼ bʌ yicʼot jini utsoʼ bʌ muʼ bʌ i ticʼlʌntelob» (Is. 11:3, 4). Jesús tsiʼ yajca jiñi ancianojob chaʼan miʼ cʌntañob jiñi congregación tac yicʼot mi caj i coltan chaʼan miʼ chaʼleñob meloñel cheʼ bajcheʼ miʼ mel (Mt. 18:18-20). Cheʼ jiñi ancianojob miʼ wen pʌsob i cʼuxbiya yicʼot miʼ chaʼleñob wersa i lajiñob Jesús, miʼ yʌqʼueñonla lac tijicñʌyel. Tiʼ sujm, mi lac wen qʼuelob ti ñuc cheʼ miʼ chaʼleñob wersa i pʌsob i pʼuntaya yicʼot chaʼan toj chuqui miʼ mejlel ti jiñi congregación tac.
19. ¿Baqui bʌ cʌntesʌntel chaʼan jiñi tejclum chaʼan putsʼijib a wom a pʌs jatet?
19 Jiñi i Mandar Moisés miʼ chʼʌm tilel i ñaʼtʌbal yicʼot i sujmlel chaʼan bʌ Jehová yicʼot toj bʌ i principio tac (Ro. 2:20). Jumpʼejl ejemplo, jiñi tejclum tac chaʼan putsʼijib miʼ cʌntesan jiñi ancianojob chaʼan «toj» yom miʼ chaʼleñob meloñel. Miʼ cʌntesañonla jaʼel chaʼan yom mi lac pʌsben lac bʌ la cutslel yicʼot pʼuntaya (Zac. 7:9). Anquese maʼañix chuculonla tiʼ Mandar Moisés, Jehová mach yujil qʼuextʌyel, i chʌn ñucʌch i cʼʌjñibal miʼ qʼuel cheʼ toj chuqui mi lac mel yicʼot la cujil pʼuntaya. ¡Wen tijicña mi la cubin lac bʌ cheʼ miʼ lac melben i yeʼtel Dios! Jin chaʼan, laʼ lac lajiben i melbal tac i laʼ sʌclan lac putsʼib tiʼ tojlel.
^ parr. 16 Qʼuele jiñi sección «Jiñi xpejcaya juñob miʼ cʼajtibeñob i bʌ» yaʼ ti La Atalaya 15 i chaʼan septiembre, 2006, tiʼ yopol 30.