TI LAC pejtelel mi lac mulan cheʼ jiñi yambʌlob yomob i ñaʼtan bajcheʼ la quilal yicʼot miʼ chʼʌmoñobla ti ñuc. Pero ¿chuqui miʼ mejlel lac mel chaʼan cheʼʌch mi lac pʌs tiʼ tojlel yambʌlob bajcheʼ jiñi?

Cheʼ weñonla tiʼ tojlel yambʌlob yom i yʌl chaʼan tiʼ isujm mi lac chʼʌm ti ñuc bajcheʼ añob, i mi lac pʌs ti uts tac bʌ tʼan yicʼot cheʼ mi lac mel chuqui wen tiʼ tojlelob. Cheʼ an lac wenlel o la cutslel mach jin jach cheʼ wen mi lac pʌs lac melbal (chaʼlebal) tiʼ tojlel yambʌlob. Ñumen ñuc baqui tilem, yaʼʌch miʼ tejchel ti cʼuxbiya yicʼot cheʼ mi la cubin jaʼel bajcheʼ miʼ yubin yambʌlob. Cheʼ jaʼel, iliyi jiñʌch jumpʼejl melbalʌl am bʌ i chaʼan jiñi i wut muʼ bʌ i yʌcʼ i yespíritu Dios, i ti lac pejtelel yom mi lac taj majlel (Gá. 5:22, 23, TNM). Jin chaʼan, laʼ laj qʼuel bajcheʼ pʌsbil i chaʼan Jehová yicʼot Jesús ili melbalʌl yicʼot bajcheʼ miʼ mejlel lac lajiñob.

Jehová miʼ mel chuqui wen yicʼot miʼ pʌsben i yutslel i pusicʼal pejtelel quixtañujob, yaʼ ochem jaʼel jiñi «mach bʌ añobic i yutslel i pusicʼal yicʼot jini jontoloʼ bʌ» (Lc. 6:35). Jumpʼejl ejemplo, Jehová «woliʼ chʌn acʼ ti pasel qʼuin tiʼ tojlel jini tojoʼ bʌ i pusicʼal yicʼot jontoloʼ bʌ jaʼel. Cheʼ jaʼel woliʼ chʌn chocbeñob tilel jaʼal» (Mt. 5:45). Cheʼ bajcheʼ mi laj qʼuel, jinto jiñi maʼañic bʌ miʼ cʌñob chaʼan Jehová tsiʼ meleyob woli (choncol) i tajob pejtelel chuqui an chaʼan chʌn cuxulonla yicʼot miʼ mejlel i ñusañob i bʌ.

Laʼ laj qʼuel jiñi wen ñuc bʌ tsiʼ mele Jehová tiʼ tojlel Adán yicʼot Eva. Cheʼ tsiʼ chaʼleyob mulil, «tsiʼ tsʼisiyob i yopol higuerateʼ» chaʼan miʼ mʌcob i bʌcʼtal. Pero Dios yujil chaʼan yom wen jiñi i pislelob come mach yaʼix mi caj ti chumtʌlob yaʼ ti pʌcʼʌbʌl Edén, i jiñi lum pujchʼemix yicʼot an cabʌl «chʼix yicʼot wisinqʼuin». Jin chaʼan, tsiʼ chʼʌmʌ ti ñuc chuqui cʼʌjñibalob i chaʼan i tsiʼ melbeyob i pislel ‹melbil bʌ ti pʌchi› (Gn. 3:7, 17, 18, 21).

Anquese Jehová miʼ mel chuqui wen tiʼ tojlel jiñi jontoloʼ bʌ yicʼot weñoʼ bʌ, ñumen yom i chʼʌm ti ñuc jiñi xucʼuloʼ bʌ i wiñicob. Jumpʼejl ejemplo, tiʼ qʼuiñilel jiñi xʼaltʼan Zacarías, juntiquil ángel tsaʼ caji i mel i pusicʼal come tsaʼ cʌjyi ti chaʼ mejlel jiñi templo ti Jerusalén. Dios tsiʼ ñʌchʼta tsaʼ bʌ i yʌlʌ yicʼot «utsʼatax tsiʼ jacʼbe i tʼan [...] chaʼan miʼ tijicñesʌben i pusicʼal» (Zac. 1:12, 13). Lʌcʼʌ cheʼʌch tsaʼ ujti tiʼ tojlel Elías. Ti jumpʼejl bʌ qʼuin wen chʼijiyem tsiʼ yubi i bʌ, i tsiʼ cʼajtibe Jehová chaʼan laʼix i yʌcʼ ti chʌmel (sajtel). Dios tsiʼ chʼʌmʌ ti ñuc woli (yʌquel) bʌ i yubin Elías, jin chaʼan tsiʼ choco majlel juntiquil ángel chaʼan miʼ pʼʌtʼesan. Yicʼot jaʼel tiʼ sube chaʼan mach i bajñel jach. Come Elías tsaʼ pejcʌnti ti wem bʌ tʼan yicʼot tsaʼ coltʌnti, tsiʼ bej tsʼʌctesa i yeʼtel (troñel) (1 R. 19:1-18). Pero ¿majqui jiñi ñumen wem bʌ tsiʼ laji Dios cheʼ wen chuqui tsiʼ mele tiʼ tojlel yambʌlob?

Cheʼ bʌ Jesús tsiʼ chaʼle subtʼan ila ti Pañimil, tsaʼ cʌjñi bajcheʼ juntiquil muʼ bʌ i chʼʌm ti ñuc yicʼot uts bʌ tiʼ tojlel yambʌlob. Mach tsʌtsic tiʼ melbal miʼ juntiquilic xicʼoñel. Tsiʼ yubi bajcheʼ miʼ yubin i bʌ yambʌlob, jin chaʼan tsiʼ yʌlʌ: «Laʼ baʼ añon pejteletla woliyet bʌ la ti wocol eʼtel, al bʌ laʼ cuch. Joñon mi cʌqʼueñetla laʼ cʼaj laʼ wo». I tsiʼ bej alʌ: «Come jini j qʼuech mach wocolic ti qʼuechol» (Mt. 11:28-30). Jin chaʼan, jiñi wiñicob xʼixicob (quixtañujob) tiʼ tsajcayob baqui jach miʼ majlel. Tsiʼ yʌqʼueyob i bʌl i ñʌcʼ come tsiʼ pʼuntayob, tiʼ tsʼʌca cʼamoʼ bʌ yicʼot cabʌl chuqui tsiʼ cʌntesayob chaʼan i Tat (Mr. 6:34; Mt. 14:14; 15:32-38).

Jesús tsiʼ chʼʌmbe i sujm yicʼot tsiʼ ñaʼta chuqui yom miʼ melben jiñi quixtañujob. Tiʼ pejtelel ora wen jach miʼ pejcan jiñi quixtañujob muʼ bʌ i cʼotel i ñʌchʼtañob, anquese an i tajol mach pijtʌbilic i chaʼan (Lc. 9:10, 11). Ti jumpʼejl bʌ qʼuin, juntiquil xʼixic añix bʌ 12 jab miʼ wen choc chʼichʼ, tsiʼ lʌcʼtesa i bʌ tiʼ tojlel i tsiʼ tʌlbe jiñi i pislel come miʼ pijtan chaʼan miʼ cʼoqʼuesan. Jiñi xʼixic maʼañic miʼ mejlel i mel (chaʼlen) jiñi come jiñi mandar miʼ yʌl chaʼan mach sʌquic (Lv. 15:25-28). Pero Jesús maʼañic tsiʼ yʌleʼ. Tsaʼ jach i pʼunta i tiʼ sube cheʼ woli ti bʌqʼuen: «Calobil, tsaʼ lajmiyet chaʼan tsaʼ ñopoyon. Cucu tiʼ ñʌchʼtilel a pusicʼal. Ajñen ti a cʼocʼlel» (Mr. 5:25-34). Jesús tsiʼ pʌsʌ chaʼan miʼ chʼʌm ti ñuc.

Jiñi ejemplo tac am bʌ laj qʼuele jamʌ tsiquil miʼ pʌs chaʼan cheʼ an lac wenlel mi lac pʌs ti lac melbal. Jesús tsiʼ pʌsʌ chaʼan ñucʌch i cʼʌjñibal iliyi cheʼ bʌ tsiʼ taja ti tʼan jumpʼejl lajiya chaʼan juntiquil samaritano. Anquese jiñi samaritanojob yicʼot jiñi judíojob mach yomic i qʼuelob i bʌ, jiñi samaritano woli bʌ i taj ti tʼan Jesús tsiʼ pʼunta juntiquil judío tsaʼ bʌ ticʼlʌnti ti xujchʼob, tsaʼ jajtsʼi yicʼot colelix i tsʌnsañob yaʼ ti bij. Tiʼ tsʼʌcʌbe i lojweñal, tsiʼ pʌyʌ majlel ti jumpʼejl otot yicʼot tsiʼ tojbe jiñi i yum otot chaʼan miʼ cʌntan. I tsiʼ yʌlʌ chaʼan mi caj i tojben chuqui jach i cʼʌjñibal i chaʼan (Lc. 10:29-37).

Tiʼ sujm, jiñi wenlel mi lac pʌs ti lac melbal, pero yicʼot jaʼel cheʼ mi la cʌl tʼan tac muʼ bʌ i pʼʌtʼesañonla yicʼot miʼ ñuqʼuesan lac pusicʼal. Anquese «lac chʼijiyemlel miʼ juʼsʌbeñonla lac pusicʼal», jiñi Biblia miʼ yʌl chaʼan «jini wen bʌ tʼan miʼ yʌqʼueñonla tijicña bʌ lac pusicʼal» (Pr. 12:25). Jiñi wenlel yicʼot i yutslel lac pusicʼal mi caj i ñijcañonla lac ñuqʼuesʌben i pusicʼal yambʌlob cheʼ mi laj cʼʌn wen jach bʌ tʼan muʼ bʌ i yʌqʼueñob i tijicñʌyel yicʼot muʼ bʌ i pʌs chaʼan mucʼʌch lac chʼʌmob ti ñuc. * Iliyi mi caj i yʌqʼueñob i pʼʌtʌlel cheʼ bʌ miʼ ñusañob wocol tac (Pr. 16:24).

Come melbilonla (pʌtbilonla) «tiʼ yejtal Dios», ti lac pejtelel miʼ mejlel lac pʌs ili melbal (Gn. 1:27). Laʼ laj qʼuel ejemplo tac am bʌ ti Biblia. Jiñi apóstol Pablo tsaʼ majli ti Roma cheʼ cʌntʌbil ti juntiquil i yum soldadojob i cʼabaʼ Julio. Jiñi i yum soldadojob wen jach chuqui tsiʼ mele tiʼ tojlel Pablo i «tsiʼ yʌcʼʌ i tʼan chaʼan miʼ majlel ti julaʼ baʼan i cʌñʌyoʼ bʌ, chaʼan miʼ poj jijlel yicʼotob» yaʼ ti tejclum Sidón (Hch. 27:3). Ti wiʼil, jiñi quixtañujob chʼoyoloʼ bʌ ti jiñi isla i cʼabaʼ Malta tsiʼ pʼuntayob jiñi Pablo yicʼot yambʌ quixtañujob cheʼ tsaʼ sujpʼi jiñi barco. Tsiʼ xicʼbeyob cʼajc chaʼan miʼ ticwesañob i bʌ i cabʌl chuqui tsiʼ meleyob chaʼan miʼ coltañob (Hch. 28:1, 2). Ili tsaʼ bʌ i meleyob ñumen weñʌch tsaʼ qʼuejli. Pero cheʼ mi lac bixeʼ mel chuqui wen, mach yomic i yʌl chaʼan woli lac pʌs jiñi lac wenlel, anto ñumen ñuc bʌ.

Mi la com chaʼan utsʼat miʼ qʼuelonla Jehová, ili melbalʌl tiʼ pejtelel ora yom miʼ tsictiyel ti bajcheʼ yilalonla yicʼot bajcheʼ chumulonla. Isujmʌch, an i tajol wocolʌch mi la cubin chaʼan mi lac mel chuqui wen tiʼ tojlel yambʌlob. ¿Chucoch? Tajol  chaʼan miʼ contrajiñob lac subtʼan, an lac bʌqʼuen o chaʼan wolito lac chaʼlen wersa chaʼan maʼañic mi lac bajñel ñaʼtan lac bʌ. Pero ili tac mucʼʌch i mejlel lac mʌlben (jotben) mi mucʼʌch laj cʼajtin laj coltʌntel ti jiñi chʼujul bʌ espíritu yicʼot cheʼ mi lac lajin jiñi i melbal Jehová (1 Co. 2:12).

¿Am ba chuqui miʼ mejlel lac weñʼesan cheʼ mi lac mel chuqui wen tiʼ tojlel yambʌlob? Yom mi laj cʼajtiben lac bʌ: «Cheʼ mic ñʌchʼtan yambʌlob, ¿muʼ ba cubin jaʼel cheʼ bajcheʼ woliʼ yubiñob? ¿Muʼ ba j qʼuel chuqui i cʼʌjñibal i chaʼañob? ¿Jalix c mele chuqui wen tiʼ tojlel juntiquil mach bʌ camigojic o juntiquil tic familia?». Miʼ mejlel lac ñaʼtan chuqui tac la com lac mel, tajol chaʼan mi lac ñumen cʌn yambʌlob, ñumento jiñi hermanojob ti laj congregación. Cheʼ jiñi, mi caj lac ñaʼtan chuqui woliʼ ñusañob yicʼot chuqui i cʼʌjñibal i chaʼañob. Ti wiʼil, laʼ lac mel tiʼ tojlel yambʌlob chuqui mi lac mulan chaʼan mi lac melbentel jaʼel (Mt. 7:12). Yicʼot jaʼel, laʼ laj cʼajtiben i coltaya Jehová, i cheʼ jiñi mi caj i yʌqʼueñonla cabʌl bendición cheʼ mi lac chaʼlen wersa (Lc. 11:13).

Jiñi apóstol Pablo tsiʼ mele chuqui tac wen tiʼ tojlel yambʌlob. Jiñi Biblia miʼ yʌl chaʼan «tijicña tiʼ pejcʌyob majchical tsaʼ bʌ cʼoti i julaʼan» (Hch. 28:30, 31, Jini wen bʌ tʼan). Tsiʼ yʌcʼʌ ti ñuc quixtañujob i tsiʼ pʌsʌ ti tʼan yicʼot ti chuqui tsiʼ mele. Jin chaʼan, jiñi quixtañujob tsiʼ mulayob i tsajcan. Lajal miʼ yujtel ti lac tojlel jeʼel, jiñi lac melbal miʼ mejlel i ñijcʌben i pusicʼal yambʌlob chaʼan miʼ cʌñob i sujmlel. Cheʼ mi lac mel chuqui tac wen tiʼ pejtelel quixtañujob, jinto jaʼel jiñi muʼ bʌ i contrajiñob lac ñopbal, miʼ mejlelob tiʼ cʼunʼan i pusicʼal yicʼot i qʼuextañob i melbal (Ro. 12:20). Ti wiʼil, tajol muʼto caj i mulañob i cʌn jiñi wen tʼan.

Yaʼ ti Paraíso mi caj i chaʼ tejchel yonlel chʌmeñoʼ bʌ i mi caj i yubiñob i tijicñʌyel cheʼ miʼ qʼuelob chaʼan miʼ chʼʌjmelob ti ñuc come tajol maʼañic baʼ i qʼueleyob jiñi. I cheʼʌch mi caj i melob tiʼ tojlel yambʌlob jaʼel. Jehová mi caj i yʌqʼuen i cuxtʌlel maʼañic bʌ i jilibal jiñi muʼ bʌ i pʌsob cʼuxbiya yicʼot miʼ chʼʌmob ti ñuc yambʌlob. Pero jiñi mach bʌ cheʼobiqui, mi caj i jisʌntelob (Sal. 37:9-11). Tiʼ sujm, cheʼ añix tiʼ tojlel i Yumʌntel Dios ili pañimil maʼañic chuqui mi caj lac bʌcʼñan yicʼot mi cajel ñʌchʼtʌlel. Pero cheʼ maxto cʼot jiñi ora, ¿bajcheʼ miʼ coltañonla wʌle cheʼ mi lac pʌs lac wenlel?

Jiñi Biblia miʼ yʌl chaʼan jiñi muʼ bʌ i chʼʌmob ti ñuc yicʼot miʼ pʌsbeñob i yutslel yambʌlob miʼ tajob i wenlel jaʼel (Pr. 11:17). Jiñi quixtañujob mi caj i mulañob i pejcan yicʼot i tsajcʌbeñob i melbal. Jesús tsiʼ yʌlʌ: «Cheʼ bajcheʼ mi laʼ pʼisben winicob cheʼʌch mi caj laʼ wʌqʼuentel» (Lc. 6:38). I cheʼ bʌ i melbalob jiñi, mach wocolic miʼ mejlel i tajob i yamigojob.

Jiñi apóstol Pablo tsiʼ yʌqʼue ili ticʼojel jiñi xñoptʼañob ti Éfeso: «Yom mi laʼ coltan laʼ piʼʌlob tiʼ yutslel laʼ pusicʼal. Pʼuntan laʼ piʼʌlob. Ñusʌben laʼ bʌ laʼ mul» (Ef. 4:32). Jiñi congregación tac miʼ taj i wenlel cheʼ jiñi hermanojob miʼ ñopob i yubin bajcheʼ mi yubin i bʌ yambʌlob yicʼot miʼ chaʼleñob wersa i coltañob i bʌ. Maʼañic miʼ chaʼleñob wajleya, mi muqʼuic i cʼʌñob tʼan tac muʼ bʌ i lowonla o tsʌts bʌ tʼan. Miʼ chaʼleñob wersa i yʌl tʼan tac muʼ bʌ i pʼʌtʼesan yambʌlob, i maʼañic miʼ yʌlob yambʌlob (Pr. 12:18). I bajcheʼ iliyi, jiñi congregación tac miʼ ñumen colel majlel tiʼ chaʼan bʌ Dios.

Tiʼ sujm, jiñi wenlel jumpʼejlʌch melbalʌl muʼ bʌ lac pʌs ti lac tʼan yicʼot ti muʼ bʌ lac mel tiʼ tojlel yambʌlob. Cheʼ wen chuqui mi lac melben yambʌlob woli lac pʌs chaʼan Jehová an i cʼuxbiya i mach chʌquic (Ef. 5:1). Yicʼot jaʼel mi lac pʼʌtʼesan jiñi congregación tac i mi lac ñijcʌben i pusicʼal yambʌlob chaʼan miʼ cʌñob i sujmlel. Jin chaʼan la lac chaʼlen wersa chaʼan mi lac pʌs ili utsʼatax bʌ melbalʌl.