1, 2. a) ¿Chuqui tsiʼ jacʼʌ Jesús cheʼ bʌ Pedro tiʼ sube chaʼan yom miʼ pʼuntan i bʌ? (Qʼuele jiñi dibujo). b) ¿Chucoch cheʼ tsiʼ jacʼʌ bajcheʼ jiñi?

JIÑI xcʌntʼañob i chaʼan Jesús toj sajtelob i pusicʼal chaʼan tsaʼ bʌ ujti i yubiñob. Tsiʼ ñaʼtayob chaʼan Jesús mi caj i chaʼ waʼchocon i yumʌntel Israel, pero tsiʼ yʌlʌ chaʼan mi caj i ñusan wocol yicʼot mi caj i chʌmel (sajtel). Jiñi apóstol Pedro tiʼ sube: «C Yum, pʼuntan a bʌ. Mach cheʼic mi caj a wujtel cheʼ bajcheʼ tsaʼ ujti a wʌl». Jesús tsiʼ jacʼbe: «Tʌtsʼʌ a bʌ tiʼ tojel c wut Satanás, jatet xmʌctayajet jach ti c tojlel, come jatet maʼañic maʼ chʼʌmben isujm chuqui yom Dios, cojach maʼ ñaʼtan chuqui yom wiñicob» (Mt. 16:21-23, Jiñi tsijiʼ bʌ wen tʼañ chaʼañ estudio; Hch. 1:6).

² Cheʼ bajcheʼ ili, Jesús tsiʼ pʌsʌ chaʼan mach lajalic jiñi pensar tilem bʌ ti Dios yicʼot tilem bʌ tiʼ pañimil (mulawil) Satanás (1 Jn. 5:19). Jiñi tsaʼ bʌ i yʌlʌ Pedro miʼ pʌs bajcheʼ yilal miʼ ñaʼtan ili pañimil. Pero Jesús yujil chaʼan qʼuexel bajcheʼ miʼ ñaʼtan Jehová. Yujil chaʼan yom miʼ chajpan i bʌ chaʼan miʼ ñusan wocol yicʼot miʼ chʌmel. Tsaʼ bʌ i yʌlʌ Jesús miʼ pʌs chaʼan maʼañic tsiʼ wis ñopo bajcheʼ an i pensar ili pañimil come lajalʌch i pensar bajcheʼ i Tat.

3. ¿Chucoch wocolʌch mi laj cʌy lac ñaʼtan bajcheʼ mi ñaʼtan ili pañimil i chaʼan mi lac ñaʼtan bajcheʼ Jehová?

 ³ ¿Ixcu joñonla? ¿Cheʼ ba mi lac chaʼlen pensar bajcheʼ Dios o cheʼ bajcheʼ ili pañimil? Mi la cʌl chaʼan tsaʼix lac tojʼesa laj cuxtʌlel cheʼ bajcheʼ miʼ yʌl tiʼ mandar tac Jehová. Pero ¿ixcu ti chuqui mi lac ñaʼtan? ¿Lajal ba bajcheʼ chuqui miʼ ñaʼtan Dios? Chaʼan mi lac mejlel, yomʌch mi lac chaʼlen wersa. Pero chaʼan mi lac chaʼlen pensar bajcheʼ ili pañimil, mach cʼʌñʌlic mi lac chaʼlen wersa come baqui jach an jiñi i pʼʌtʌlel (Ef. 2:2). Yicʼot jaʼel, cheʼ bajcheʼ yilal i pensar ili pañimil mucʼʌch i mejlel i yʌconla come miʼ yʌcʼ ti ñuc chaʼan joñon jachla yom mi lac ñaʼtan lac bʌ. Jin chaʼan, wocolʌch cheʼ lajal mi lac chaʼlen pensar bajcheʼ Jehová, pero mach saj wocolic chaʼan mi lac chaʼlen pensar bajcheʼ ili pañimil.

4. a) ¿Chuqui mi caj i yujtel mi tsaʼ la cʌcʼʌ chaʼan ili pañimil miʼ ñijcan majlel bajcheʼ mi lac chaʼlen pensar? b) ¿Bajcheʼ mi caj i coltañonla ili temaj?

⁴ Mi tsaʼ la cʌcʼʌ chaʼan ili pañimil miʼ ñijcan majlel bajcheʼ mi lac chaʼlen pensar, joñon jachla mi caj lac ñumen ñaʼtan lac bʌ yicʼot mi caj lac mulan lac bajñel ñaʼtan chuqui wen o mach bʌ weñic (Mr. 7:21, 22). Jin chaʼan, i cʼʌjñibal mi laj cʌn pensar bajcheʼ Jehová, mach cheʼic bajcheʼ jiñi wiñicob xʼixicob (quixtañujob). Ili temaj mi caj i coltañonla lac mel (chaʼlen). Mi caj laj qʼuel chucoch miʼ mejlel lac ñop chaʼan cheʼ mi lac chaʼlen pensar bajcheʼ Dios, mach chaʼañic woli (choncol) laj cʌlʌx mʌctʌntel chaʼan mach librejoñicla, chaʼañʌch lac wenlel. Yicʼot mi caj la cʌl chuqui yom mi lac mel chaʼan maʼañic miʼ qʼuextʌyel lac pensar bajcheʼ i chaʼan ili pañimil. Yaʼ ti yambʌ temaj, mi caj laj qʼuel bajcheʼ miʼ mejlel la cotsan ti lac tojlel jiñi i pensar Dios.

5. ¿Chucoch an quixtañujob mach bʌ yomobic cheʼ an majqui miʼ qʼuextʌbeñob i pensar?

⁵ An quixtañujob mach bʌ yomobic chaʼan an majqui miʼ qʼuextʌbeñob i pensar. Miʼ yʌlob: «Mach comic majqui miʼ chaʼlen pensar tic tojlel». Tajol yomob i yʌl chaʼan i bajñelob yom i ñaʼtan chuqui miʼ melob, i machʌch añic i wocolel. Mach yomobic cheʼ an majqui miʼ subeñob miʼ yubin yom bʌ miʼ melob o chaʼan cheʼ miʼ melbentelob bajcheʼ yambʌlob. *

6. a) ¿Chuqui libre bʌ miʼ mejlel lac mel tsiʼ yʌcʼʌ Jehová? b) ¿Yom i yʌl chaʼan ñoj libre añonla?

⁶ Pero miʼ mejlel lac ñop chaʼan mi tsaʼ laj cʌñʌ pensar bajcheʼ Jehová mach yom i yʌl chaʼan mach mejlix la cʌl chuqui mi lac ñaʼtan o mi lac mel chuqui la com. Ti 2 Corintios 3:17 miʼ yʌl chaʼan «jini am bʌ i chaʼan i yEspíritu lac Yum librejix». Libre miʼ mejlel lac ñaʼtan bajcheʼ yilal la com sujtel i chaʼan mi lac yajcan chuqui mi lac mulan. Dios cheʼʌch tsiʼ meleyonla (pʌtʌyonla). Maʼañic bʌ mi lac mejlel jiñʌch cheʼ la com lac mel chuqui jach cheʼ bajcheʼ ñoj librejoñixla yubil, come pʼisbil jach jiñi lac librejlel (pejcan 1 Pedro 2:16). Cheʼ mi lac yajcan chuqui wen yicʼot mach bʌ weñic, yom mi lac tsajcan chuqui miʼ subeñonla tiʼ Tʼan Jehová come cheʼʌch miʼ mulan. ¿Ñoj tsʌts ba iliyi o añʌch i wenlel?

7, 8. ¿Chucoch mach cʌlʌx tsʌtsic chaʼañonla cheʼ mi lac chaʼlen pensar bajcheʼ Jehová? Acʼʌ jumpʼejl ejemplo.

⁷ Laʼ la cʌl jumpʼejl ejemplo. Jiñi tatʌlob wen miʼ ñopob i cʌntesan i yalobilob chaʼan  miʼ melob chuqui wen, yujilob eʼtel (troñel) yicʼot miʼ chʼʌmob ti ñuc yambʌlob. ¿Ñoj tsʌtsob jach ba jiñi tatʌlob? Mach cheʼiqui. Woli (yʌquel) jach i cʌntesañob i yalobil chaʼan utsʼat miʼ chumtʌlob ti wiʼil. Cheʼ bʌ ñucobix i miʼ loqʼuelob tiʼ yotot, jin mi caj i yajcañob chuqui mi caj i melob. Mi tsiʼ jacʼʌyob bajcheʼ tsaʼ cʌntesʌntiyob tiʼ tat i ñaʼ, tajol maʼañic mi caj i wiʼil ubiñob i chʼijiyemlel chaʼan chuqui miʼ yajcañob, cheʼ jiñi, maʼañic mi caj i wen tajob wocol yicʼot cʼojol.

⁸ Jehová jiñʌch wem bʌ Tatʌl, i yom chaʼan wen miʼ chumtʌl i yalobilob (Is. 48:17, 18). Jin chaʼan, miʼ pʌsbeñonla ñuc tac bʌ principio chaʼan bajcheʼ yilal yom lac melbal (chaʼlebal) yicʼot bajcheʼ yomonla tiʼ tojlel yambʌlob. I miʼ subeñonla chaʼan yom mi lac chaʼlen pensar bajcheʼ i chaʼan yicʼot mi lac pʌs wen tac bʌ lac melbal cheʼ bajcheʼ miʼ mel. Iliyi mach ñoj tsʌtsic chaʼañonla, miʼ ñumen coltañonla lac taj lac ñaʼtʌbal i chaʼan wen chuqui mi lac yajcan (Sal. 92:5; Pr. 2:1-5; Is. 55:9). Miʼ coltañonla lac yajcan muʼ bʌ i yʌqʼueñonla lac tijicñʌyel yicʼot chaʼan mi lac mel chuqui mi lac mulan (Sal. 1:2, 3). Tiʼ sujm, an i wenlel chaʼañonla cheʼ mi lac chaʼlen pensar bajcheʼ Jehová.

9, 10. ¿Chucoch mi la cʌl chaʼan ñumen ñuc i pensar Dios bajcheʼ i chaʼan ili pañimil?

⁹ Jiñi i pensar Dios chaʼan chuqui tac an ñumen ñuc bajcheʼ i chaʼan ili pañimil, i jiñʌch yambʌ i sujmlel cheʼ la com pensar bajcheʼ Dios. I pensar ili pañimil miʼ yʌcʼ ticʼojel tac chaʼan bajcheʼ yom lac melbal, chaʼan bʌ ti lac familia yicʼot chaʼan la queʼtel. Pero cabʌl mach bʌ lajalic miʼ taj i bʌ yicʼot chuqui miʼ ñaʼtan Jehová. Jumpʼejl ejemplo, jiñi quixtañujob miʼ wen alob chaʼan yom mi lac sʌclan chuqui la com yicʼot chaʼan mach lecojic jiñi tsʼiʼlel. Jiñi xñujpuñelob an qʼuiñil miʼ subentelob chaʼan miʼ mejlel i cʌyob i bʌ o miʼ chaʼleñob i bʌ ti divorciar chaʼan ñumen tijicñayob, anquese mach tsʌtsobic i wocol. ¿Am ba mucʼʌch bʌ i mejlel i ñumen coltañonla ili ora bajcheʼ jiñi an tac bʌ ti Biblia?

¹⁰ Jesús tsiʼ yʌlʌ: «I ñaʼtʌbal Dios miʼ tsictiyel tiʼ yalobilob [«melbal», TNM]» (Mt. 11:19). Anquese ili ora cabʌlix chuqui melbil i chaʼan jiñi tecnología, maʼañic miʼ mejlel i jisan jiñi ñuc tac bʌ wocol muʼ bʌ i chilbeñonla lac tijicñʌyel, bajcheʼ jiñi guerra, tsʼaʼleya tiʼ caj i colorlel lac pʌchʌlel o xujchʼ o yan tac bʌ. Cheʼ jaʼel, maʼañix chuqui miʼ yʌjlel chaʼan jiñi tsʼiʼlel. Pejtelel iliyi, ¿tsaʼix ba mejli i jisan wocol ti familia, jiñi cʼamʌjel tac o yan tac bʌ? Maʼañic. Cabʌl miʼ yʌlob chaʼan woli jach i ñumen tsʌtsʼesan jiñi wocol. Pero jiñi lajaloʼ bʌ miʼ chaʼleñob pensar bajcheʼ Dios ñumen tijicñayob tiʼ familia, maʼañic miʼ tajob cʼamʌjel tiʼ caj tsʼiʼlel yicʼot añob ti ñʌchʼtʌlel yicʼotob i yermañojob tiʼ pejtelel pañimil (Is. 2:4; Hch. 10:34, 35; 1 Co. 6:9-11). ¿Mach ba tsiquilic mi laj qʼuel chaʼan ñumen ñuc i pensar Dios bajcheʼ i chaʼan ili pañimil?

11. ¿Majqui i pensar tsiʼ yʌcʼʌ i bʌ ti tojʼesʌntel Moisés, i baqui bʌ i wenlel tsiʼ taja?

¹¹ Ti wajali jiñi i wiñicob Dios tsiʼ ñopoyob chaʼan ñumen ñucʌch i pensar Dios bajcheʼ i chaʼan wiñicob. Laʼ laj cʌl tiʼ tojlel Moisés. Tsiʼ cʼajti i ñaʼtʌbal ti Dios anquese tsaʼ wen cʌntesʌnti «tiʼ pejtelel i ñaʼtʌbal egiptojob» (Hch. 7:22; Sal. 90:12). Yicʼot jaʼel, tsiʼ cʼajtibe Dios chaʼan miʼ pʌsben bajcheʼ yom miʼ chaʼlen xʌmbal (Éx. 33:13). Come tsiʼ yʌcʼʌ i bʌ ti tojʼesʌntel ti Jehová, tsiʼ mele jumpʼejl ñuc bʌ troñel chaʼan miʼ tsʼʌctiyel chuqui tsiʼ ñaʼta Dios. I yaʼ ti Biblia miʼ yʌjlel chaʼan jiñʌch juntiquil wiñic tsaʼ bʌ i ñopo Dios (He. 11:24-27).

12. ¿Baqui tsiʼ chucu jiñi apóstol Pablo pejtelel chuqui tsiʼ ñaʼta i mel?

¹² Jiñi apóstol Pablo juntiquilʌch wiñic wen cʌntesʌbil bʌ yicʼot chʼejl bʌ i yujil  chaʼpʼejl tʼan, jiñi hebreo yicʼot griego (Hch. 5:34; 21:37, 39; 22:2, 3). Pero pejtelel chuqui miʼ ñaʼtan mach yaʼic chucul tiʼ ñaʼtʌbal pañimil, jiñʌch tiʼ Tʼan Dios (pejcan Hechos 17:2; 1 Corintios 2:6, 7, 13). Cheʼ tsiʼ mele bajcheʼ ili, utsʼat bajcheʼ tsiʼ mele i subtʼan i tsiʼ pijta chumtʌl tiʼ pejtelel ora yaʼ ti panchan (2 Ti. 4:8).

13. ¿Majqui an tiʼ wenta chaʼan mi laj cʌn pensar bajcheʼ Dios?

¹³ Tiʼ sujm, ñumen ñucʌch i pensar Dios bajcheʼ i chaʼan ili pañimil. Cheʼ mi lac mel bajcheʼ miʼ yʌl Dios mi lac wen taj lac tijicñʌyel yicʼot wen mi lac chumtʌl. Pero Jehová maʼañic miʼ xicʼonla chaʼan yom lajal lac pensar bajcheʼ i chaʼan. Mi jiñicto miʼ mel jiñi «xucʼul bʌ xʼeʼtel am bʌ cabʌl i ñaʼtʌbal» mi jiñic jiñi ancianojob (Mt. 24:45; 2 Co. 1:24). An ti lac wenta ti jujuntiquil chaʼan mi laj cʌn pensar bajcheʼ Dios. ¿Bajcheʼ miʼ mejlel lac mel?

14, 15. a) Chaʼan lajal lac pensar bajcheʼ i chaʼan Jehová, ¿baqui yom mi lac chʌn acʼ lac ñaʼtʌbal? b) Cheʼ bajcheʼ miʼ yʌl Romanos 12:2, TNM, ¿chucoch mach yomic mi lac chʌn acʼ ti ochel ti lac pensar muʼ bʌ i ñaʼtan ili pañimil? Alʌ jumpʼejl ejemplo.

¹⁴ Ti Romanos 12:2, (TNM) miʼ subeñonla chuqui yom mi lac mel: «I cʌyʌx laʼ wʌcʼ laʼ bʌ ti tojʼesʌntel ti jiñi chubʌʼan tac ila ti pañimil, pero yom mi laʼ qʼuextan laʼ bʌ cheʼ mi laʼ chaʼ tsijibtesan laʼ pensar, chaʼan miʼ mejlel laʼ ñop ti laʼ bajñelil jiñi wem bʌ, muʼ bʌ i chʼʌm yicʼot jiñi toj bʌ chuqui yom Dios». Ili yom i yʌl chaʼan mucʼʌch lac mejlel ti pensar bajcheʼ Jehová, anquese cheʼ maxto laj cʌñʌ i sujmlel yambʌ chuqui tsiʼ ñijcayonla. Isujmʌch, cheʼ bajcheʼ yilalonla tʼox jiñʌch chaʼan tsaʼ cʌyle la quicʼot bajcheʼ yilalob lac tat lac ñaʼ yicʼot chaʼan chuqui an lac ñusa. Pero jiñi lac pensar mucʼʌch i mejlel ti bej qʼuextʌntel, jin jach ñopol chuqui mi la cʌcʼ ti ochel yicʼot mi laj cʌy. Mi tsaʼ lac chʌn acʼʌ lac pensar ti chuqui yom Dios, mi caj laj qʼuel chaʼan tojʌch chuqui miʼ ñaʼtan. Cheʼ bajcheʼ jiñi, i bajñel mi caj i tilel ti lac pusicʼal chaʼan lajal mi lac chaʼlen pensar bajcheʼ Dios.

¹⁵ Cheʼ mi lac wen ñaʼtan, chaʼan miʼ mejlel laj qʼuextan lac pensar mach yomic mi laj cʌcʼ chaʼan jin miʼ tojʼesañonla ili pañimil. Yom i yʌl chaʼan mach yomic mi la cʌcʼ ti ochel ti lac jol i ñaʼtʌbal ili pañimil am bʌ tiʼ contra Dios. Jiñʌch ñaxam bʌ yom mi lac mel wen ñuc bʌ i cʼʌjñibal. Laʼ laj cʌl jumpʼejl ejemplo chaʼan mi lac ñaʼtan chucoch. Juntiquil quixtañu miʼ tech i cʼux wen tac bʌ bʌlñʌcʼʌl come yom cʼocʼan. ¿Pero muʼ ba caj i cʼʌjñibʌyel mi maʼañic miʼ cʌy i cʼux jiñi bibiʼ tac bʌ o mach bʌ weñic? Cheʼ jaʼel, mi mucʼʌch lac bej otsan ti lac jol chuqui tac miʼ ñaʼtan ili pañimil, maʼañic mi caj i wen cʼʌjñibʌyel cheʼ woli lac lon tojʼesan lac pensar bajcheʼ i chaʼan Dios.

16. ¿Chuqui tac yom bʌ mi laj cʌntan lac bʌ?

¹⁶ Isujm, jiñi i ñaʼtʌbal pañimil maʼañic mi caj i junyajl tʌtsʼ i bʌ ti lac tʼejl come maʼañic mi lac mejlel ti loqʼuel ila ti pañimil (1 Co. 5:9, 10). Yaʼ ti subtʼan mi lac taj lac ñʌchʼtan mach tac bʌ isujmic miʼ ñop jiñi quixtañujob. Pero cheʼ mach mejlic laj cʌy la cubiben i ñaʼtʌbal ili pañimil, muʼ bʌ mejlel lac mel jin jach cheʼ maʼañic mi lac wen ñaʼtan yicʼot cheʼ mi lac locʼsan ti lac jol. Cheʼ bajcheʼ Jesús, ti orajach yom mi lac locʼsan ti lac pensar jiñi yom bʌ Satanás chaʼan miʼ cʌytʌl. Cheʼ jaʼel, miʼ mejlel laj cʌntan lac bʌ chaʼan maʼañic mi laj cʌlʌx ñochtañob jiñi añoʼ bʌ i chaʼan i pensar ili pañimil. Laʼ laj qʼuel bajcheʼ (pejcan Proverbios 4:23).

17. ¿Chuqui miʼ mejlel lac mel chaʼan maʼañic mi laj cʌlʌx ñochtan jiñi lajaloʼ bʌ i pensar bajcheʼ ili pañimil?

¹⁷ Jumpʼejl ejemplo, yom mi laj cʌntan lac bʌ chaʼan majqui mi lac yajcañob ti la camigo. Jiñi Biblia miʼ yʌl chaʼan mi tsaʼ lac  ñochta maʼañic bʌ miʼ melbeñob i yeʼtel Jehová, lajal mi caj lac chaʼlen pensar bajcheʼob (Pr. 13:20; 1 Co. 15:12, 32, 33). Yom wen mi lac yajcan jaʼel jiñi ñusaqʼuin com bʌ lac mel. Mi maʼañic mi lac yajcan muʼ bʌ i yʌcʼ ti ñuc jiñi evolución, jatsʼ, tsʌnsa yicʼot jiñi tsʼiʼlel, jiñi lac pensar maʼañic mi caj i bibʼan yicʼot chuqui am bʌ tiʼ contra «i sujmlel Dios» (2 Co. 10:5).

18, 19. a) ¿Chucoch yom mi laj cʌntan lac bʌ chaʼan chuqui miʼ ñaʼtan ili pañimil? b) ¿Chuqui bʌ cʼajtiya tac yom mi lac melben lac bʌ, i chucoch?

¹⁸ Cheʼ yom i mucul ochel ti lac tojlel jiñi i pensar pañimil, yomʌch mi laj cʌn jaʼel chaʼan maʼañic mi la cʌcʼ ti ochel. Jumpʼejl ejemplo, tajol jumpʼejl noticia melbil chaʼan junsujm jach yom bʌ i ñumen acʼ ti ñuc chaʼan jiñi política. Tajol miʼ ñusʌntel ti televisión chaʼan i cuxtʌlel juntiquil quixtañu i miʼ yʌl chaʼan chuqui miʼ ñaʼtan ili pañimil chaʼan chuqui yom mi lac sʌclan o chaʼan muʼ bʌ i mejlel lac taj. An tac película yicʼot libro utsʼatax bʌ bajcheʼ miʼ pʌs chaʼan weñʌch cheʼ mi lac ñaʼtan chaʼan ñumen ñuc laj cʼʌjñibal o jiñi lac familia. Pero iliyi mach cheʼic an bajcheʼ miʼ pʌs jiñi Biblia, chaʼan an tijicñʌyel ti lac bajñelil yicʼot ti lac familia ñaxan yom mi laj cʼuxbin Jehová (Mt. 22:36-39). An cuento tac chaʼan alʌlob, maʼañic bʌ chuqui lecoj miʼ chʼʌm tʌlel yilal, pero tajol añʌch chuqui miʼ mucul otsʌben ti jol jiñi alʌlob chaʼan miʼ qʼuelob ti wen chuqui tac bibiʼ.

¹⁹ Ili mach yom i yʌl chaʼan mach yomix mi lac chaʼlen wen tac bʌ ñusaqʼuin. Pero yom mi laj cʼajtiben lac bʌ: «¿Mucʼʌch ba i mejlel j cʌn bajcheʼ tac yilal i pensar jiñi pañimil anquese mucul jach miʼ ñop i yotsan? ¿Pʼisbil jach ba chuqui mij cʌy chaʼan miʼ qʼuel o pejcan jiñi calobilob? ¿Cheʼʌch ba mic mel jaʼel? ¿Muʼ ba cʌntesan jiñi calobilob chaʼan miʼ cʌmbeñob i pensar Jehová i maʼañic miʼ ñopob chuqui miʼ ñaʼtan ili pañimil?». Mi mucʼʌch lac wen cʌn bajcheʼ yilal i pensar Jehová yicʼot i chaʼan ili pañimil, mach jiñic mi caj i tojʼesañonla majlel «jini añoʼ bʌ ti pañimil».

20. ¿Chuqui mi caj i ñijcan lac pensar chaʼan miʼ qʼuextʌyel?

²⁰ Yom mi laj cʼajtesan chaʼan chaʼchajp jach am bʌ: I pensar Jehová yicʼot i chaʼan bʌ ili pañimil Satanás. Muʼ bʌ caj i qʼuextan majlel lac pensar jiñʌch muʼ bʌ lac ñumen chʼʌm ti ñuc. Mi tsaʼ laj cotsa ti lac ñaʼtʌbal chaʼan bʌ ili pañimil, jiñi lac pensar yicʼot lac melbal cheʼʌch mi cajel bajcheʼ jiñi yambʌ quixtañujob. Jin chaʼan yom wen tsajilonla chaʼan chuqui tac mi laj qʼuel, mi laj pejcan, mi lac ñʌchʼtan yicʼot chuqui tac mi lac ñaʼtan.

21. ¿Chuqui ñuc bʌ i cʼʌjñibal mi caj laj qʼuel ti yambʌ temaj?

²¹ Cheʼ bajcheʼ tsaʼix laj cʌlʌ, chaʼan lajal mi lac chaʼlen pensar bajcheʼ Jehová mach cojach yom chaʼan maʼañic mi laj cotsan chuqui tac miʼ jem. I cʼʌjñibalʌch jaʼel chaʼan mi laj cotsan ti lac pensar chuqui tac miʼ ñaʼtan Dios. Ti yambʌ temaj mi caj laj qʼuel bajcheʼ miʼ mejlel jiñi.