1-3. a) ¿Bajcheʼ yom mi laj qʼuel jiñi i sujmlel am bʌ ti Biblia? Alʌ jumpʼejl ejemplo (qʼuele jiñi foto tac). b) ¿Chuqui tiʼ cʼajtiya tac mi caj laj qʼuel ti ili temaj?

ILI ora, ñʌmʌl laj qʼuel cheʼ jiñi wiñicob xʼixicob (quixtañujob) miʼ chaʼ sutqʼuiñob chuqui miʼ mʌñob. An país tac yaʼ baqui jiñi 9% muʼ bʌ i mʌjñel mi chaʼ sutqʼuintel. Tajol miʼ melob (chaʼleñob) bajcheʼ jiñi come maʼañic tsiʼ tajbeyob i wenlel jiñi tsaʼ bʌ i mʌñʌyob, miʼ qʼuelob chaʼan mach weñix o maʼañic tsiʼ chaʼ mulayob. Jin chaʼan, miʼ chaʼ ñaʼtañob i qʼuextan o miʼ cʼajtiñob chaʼan miʼ chaʼ sutqʼuibentelob i taqʼuin.

² Mach cheʼic la com lac mel joñonla yicʼot jiñi i«sujmlel» am bʌ ti Biblia. Cheʼ tsaʼix lac mʌñʌ o laj cʌñʌ jiñi i sujmlel, mach la comic lac chaʼ chon o mi laj cʌy (1 Ti. 2:4; pejcan Proverbios 23:23, TNM). * Cheʼ bajcheʼ tsaʼ laj qʼuele yaʼ ti yambʌ temaj, tsaʼ lac wen aqʼue i yorajlel chaʼan mi lac taj jiñi i sujmlel. An tsaʼ bʌ i cʌyʌyob jumpʼejl eʼtel (troñel) baqui miʼ tajob cabʌl taqʼuin o tsiʼ qʼuextayob bajcheʼ añob yicʼot i familia yicʼot i yamigojob. Yambʌlob tsiʼ qʼuextayob i pensar yicʼot i melbal, i tajol tiʼ cʌyʌyob  costumbre tac o melbalʌl mach bʌ loqʼuemic ti Biblia. Mach jin yʌlʌ chuqui tsiʼ lac mele, ñumen cabʌl jiñi bendición am bʌ lac taja maʼañic bʌ mi laj i bʌ yicʼot jiñi tsaʼ bʌ laj cʌyʌ.

³ Chaʼan Jesús miʼ pʌs chaʼan wen ñuc i cʼʌjñibal jiñi i sujmlel chaʼan bʌ i Yumʌntel Dios tiʼ tojlel jiñi muʼ bʌ i tajob, tsiʼ taja ti tʼan juntiquil xchoñoñel muʼ bʌ ti xʌmbal ñumel i sʌclan perla tac. Cheʼ bʌ tsiʼ taja wen letsem bʌ i tojol ti ora «tsaʼ majli i laj chon pejtelel i chubʌʼan» chaʼan miʼ mʌn (Mt. 13:45, 46). Cheʼ jaʼel, jiñi i sujmlel chaʼan i Yumʌntel Dios yicʼot jiñi yambʌ i cʌntesa tac am bʌ ti Biblia wen ñuc mi laj qʼuel, jin chaʼan cabʌl chuqui tsaʼ laj cʌyʌ chaʼan mi mejlel lac taj. Mi mucʼʌch laj bej qʼuel ti ñuc, maʼañic ba ora mi caj lac chon. Chʼijiyem jax cheʼ an hermanojob muʼ bʌ i cʌyob i qʼuel ti ñuc jiñi i sujmlel yicʼot an tsaʼix bʌ i choñoyob. Mach yomic mi lac mel bajcheʼ jiñi. Yom mi lac jacʼ jiñi mandar am bʌ ti Biblia chaʼan yom mi lac chʌn chaʼlen «xʌmbal tiʼ sujmlel Dios» (pejcan 3 Juan 2-4). Ili yom i yʌl chaʼan mi la cʌcʼ ti ñaxan ti laj cuxtʌlel i mi lac chumtan. Ti ili temaj, mi caj lac jacʼ ili uxpʼejl cʼajtiya tac: ¿Chuqui an i yʌcʼʌ chaʼan juntiquil quixtañu mi chon jiñi i sujmlel, i bajcheʼ an i mele? ¿Chuqui mi caj i coltañonla chaʼan maʼañic mi lac mel? ¿Chuqui mi caj i pʼʌtʼesañonla chaʼan mi lac chʌn chaʼlen «xʌmbal tiʼ sujmlel Dios»?

4. Cheʼ ti ñaxam bʌ siglo, ¿chucoch an tsaʼ bʌ i choñoyob jiñi i sujmlel?

⁴ Cheʼ ti ñaxam bʌ siglo, an tsaʼ bʌ i ñopoyob i cʌntesa tac Jesús pero tsiʼ cʌyʌyob ajñel tiʼ sujmlel. Jumpʼejl ejemplo, ti jumpʼejl bʌ qʼuin Jesús tsiʼ mele jumpʼejl milagro chaʼan miʼ weʼsan cabʌl quixtañu woli (choncol) bʌ i tsajcañob. Ti wiʼil, jiñi quixtañujob tiʼ tsajcayob majlel yaʼ ti yambʌ i tiʼ jiñi mar i chaʼan bʌ Galilea. Pero yaʼi an chuqui tsiʼ yʌlʌ Jesús maʼañic bʌ tsiʼ mulayob: «Mi maʼanic mi laʼ cʼuxben i bʌcʼtal i Yalobil Winic, mi maʼanic mi laʼ jap i chʼichʼel, maʼanic laʼ cuxtʌlel». Pero maʼañic tsiʼ cʼajtibeyob chaʼan miʼ tsictesan chuqui yom i yʌl jiñi tʼan, i tsiʼ yʌlʌyob: «Leco i cʌntesʌbal. ¿Majqui mi mejlel i chʌn ubin?». Jin chaʼan, «cabʌl xcʌntʼañob i chaʼan tsaʼ caji i tʌtsʼob i bʌ. Maʼanix tsiʼ chʌn chaʼleyob xʌmbal yicʼot Jesús» (Jn. 6:53-66).

5, 6. a) ¿Chucoch an hermanojob tsaʼix bʌ i ñaʼtayob i cʌy jiñi i sujmlel? b) ¿Bajcheʼ an i ñajtʼesayob i bʌ yambʌlob ti jiñi i sujmlel?

⁵ Chʼijiyem jax cheʼ ili ora an tsaʼ bʌ i cʌyʌyob i sujmlel. An tsaʼ bʌ yajliyob chaʼan tsaʼ tsijib tsictesʌnti i sujmlel jumpʼejl texto am bʌ ti Biblia o tiʼ caj chuqui tsiʼ mele o tsiʼ yʌlʌ juntiquil hermano. An yambʌlob tsaʼ bʌ michʼayob chaʼan tsaʼ tijqʼuiyob ti Biblia o tsiʼ tajayob wocol yicʼot yambʌ hermano. Yicʼot an yañoʼ bʌ tsaʼ bʌ caji i tsajcañob jiñi tsaʼix bʌ i cʌyʌyob i ñop jiñi isujm bʌ Dios o muʼ bʌ i contrajiñob jiñi lac ñopbal. Mach yʌlʌlic chuqui tiʼ caj, tsiʼ yajcayob i cʌy Jehová yicʼot jiñi congregación (He. 3:12-14). Ñumen wen cheʼ tsaʼic i chʌn ñopoyob Jesús cheʼ bajcheʼ tsiʼ mele jiñi apóstol Pedro. Cheʼ bʌ Jesús tsiʼ cʼajtibeyob jiñi apóstolob mi yomob sujtel jaʼel, Pedro ti orajach tsiʼ jacʼʌ: «C Yum, ¿am ba yambʌ muʼ bʌ mejlel i coltañon lojon? Maʼanic. Come jatet jach maʼ sub jini tʼan chaʼan mic taj lojon j cuxtʌlel mach bʌ anic miʼ jilel» (Jn. 6:67-69).

⁶ An yambʌlob cʼunteʼ cʼunteʼ bʌ tsiʼ cʌyʌyob i sujmlel, i tajol mach ñaʼtʌbilic i chaʼañob. Yaʼ ti Biblia miʼ yʌl chaʼan xucʼu xucʼul miʼ ‹cʌyob› (He. 2:1, Jini wen bʌ tʼan). Tajol mach yomobic i cʌy jiñi i sujmlel, pero tsiʼ  yʌcʼʌyob ti cʼunʼan majlel bajcheʼ añob yicʼot Jehová i ti wiʼil tsiʼ ñajtʼesayob i bʌ. ¿Chuqui yom mi lac mel chaʼan mach cheʼic mi la cujtel jaʼel?

7. ¿Chuqui mi caj i coltañonla chaʼan maʼañic baʼ ora mi lac chon jiñi i sujmlel?

⁷ Chaʼan mi lac chʌn ajñel tiʼ sujmlel, yom mi lac ñop yicʼot mi lac jacʼ pejtelel chuqui miʼ cʌntesʌbeñonla Jehová. Yom ñaxan mi la cʌcʼ ti laj cuxtʌlel jiñi i sujmlel yicʼot chaʼan jiñi principio tac miʼ tojʼesañonla majlel. Ti jumpʼejl bʌ qʼuin jiñi rey David tiʼ sube ti jumpʼejl i pusicʼal Jehová ili tʼan: «Pʌyʌyon majlel tiʼ sujmlel a tʼan» (Sal. 25:5). Cheʼ bajcheʼ David, ti jumpʼejl lac pusicʼal yom mi la cʌl chaʼan mi lac chʌn ajñel tiʼ sujmlel Dios. Mi mach cheʼiqui, miʼ mejlel lac tech lac ñaʼtan pejtelel chuqui tsaʼ laj cʌyʌ chaʼan mi lac mʌn i sujmlel o muʼto i mejlel lac mulan lac chaʼ tʼox taj. Pero iliyi mach yomic mi lac wis mel. La cujil chaʼan maʼañic miʼ mejlel lac yajcan baqui bʌ cʌntesa mi caj lac ñop o baqui bʌ maʼañic, come yomʌch mi lac ñop «pejtelel i sujmlel» (Jn. 16:13). Yaʼ ti yambʌ temaj tsaʼ laj qʼuele joʼchajp tsaʼ bʌ laj cʌyʌ chaʼan mi laj cʌn jiñi i sujmlel yicʼot mi lac chumtan. Laʼ laj qʼuel chuqui miʼ mejlel lac mel chaʼan maʼañic mi lac chaʼ sujtel ti jiñi tsaʼix bʌ laj cʌyʌ tac (Mt. 6:19).

8. ¿Bajcheʼ miʼ mejlel lac ñajtʼesan lac bʌ tiʼ sujmlel cheʼ mach ñaʼtʌbilic lac chaʼan? Alʌ jumpʼejl ejemplo.

⁸ I yorajlel. Chaʼan maʼañic mi lac ñajtʼesan lac bʌ tiʼ sujmlel cheʼ mach ñaʼtʌbilic lac chaʼan, yom mi laj cʼʌn ti wen jiñi i yorajlel am bʌ lac chaʼan. Mi mach tsajaloñicla, miʼ mejlel lac ñumen aqʼuen i yorajlel jiñi ñusaqʼuin tac, chuqui tac mi lac mulan lac mel, jiñi Internet o televisión. Pejtelel iliyi maʼañic i wocolel, pero miʼ mejlel i chilbeñonla i yorajlel chaʼan mi lac chaʼlen estudio ti lac bajñelil o yan tac bʌ yom bʌ melol tiʼ chaʼan bʌ Dios. Laʼ laj qʼuel chuqui tsaʼ ujti tiʼ tojlel juntiquil hermana i cʼabaʼ Emma. * Cheʼ bʌ alʌ xchʼocto, miʼ wen mulan i cʼʌchtan caballo. I cheʼ miʼ tajben i yorajlel, mucʼʌch i mel. Pero tsaʼ cʼoti i ñaʼtan chaʼan cʌlʌxix miʼ yʌqʼuen i yorajlel, jin chaʼan an chuqui tac tsiʼ qʼuexta. Tsiʼ colta jaʼel cheʼ bʌ tsiʼ qʼuele chuqui tsaʼ ujti tiʼ tojlel Cory Wells, ili hermana miʼ cʼʌchtan jiñi caballo i miʼ waʼtʌl ti pat o chuqui tac jach chaʼan jiñi quixtañujob miʼ mulañob i qʼuel. * Ili ora, Emma miʼ ñumen aqʼuen i yorajlel i mel i chaʼan tac bʌ Dios yicʼot chaʼan miʼ tem ajñel yicʼotob i yamigojob yicʼot jiñi xñoptʼañoʼ bʌ i familia. Wʌle, ñumen lʌcʼʌl miʼ yubin i bʌ tiʼ tojlel Jehová yicʼot an i ñʌchʼtʌlel come yujil chaʼan wen bajcheʼ woli (yʌquel) i cʼʌn jiñi i yorajlel am bʌ i chaʼan.

9. ¿Chucoch yom mi laj cʌntan lac bʌ chaʼan jiñi chubʌʼañʌl tac?

⁹ Chubʌʼañʌl tac. Mi la com bej ajñel tiʼ sujmlel, mach yomic mi laj qʼuextan bajcheʼ yilal mi laj qʼuel jiñi chubʌʼañʌl tac. Cheʼ tsaʼ laj cʌñʌ chaʼan bʌ Jehová, ñaxan tsaʼ laj cʌcʼʌ jiñi i chaʼan tac bʌ Dios, i wiʼilix tsaʼ laj cʌyʌ jiñi chubʌʼañʌl tac. Cabʌl chuqui tsaʼ laj cʌyʌ ti jumpʼejl lac pusicʼal chaʼan mi lac mejlel ti ajñel tiʼ sujmlel. Pero ti wiʼil, jin wocol cheʼ mi lac tech lac ñaʼtan chaʼan an chuqui woli lac sʌt, come mi lac taj laj qʼuel jiñi yambʌlob chaʼan woliʼ mʌñob jiñi tsijib tac bʌ woli ti chojñel, bajcheʼ tableta o celular, o ñumen cabʌl chuqui añob i chaʼan. Mi mach tijicñayic mi la cubin lac bʌ yicʼot jiñi am bʌ lac chaʼan, tajol mi laj cʌy jiñi i chaʼan tac bʌ Dios chaʼan jach mi lac ñumen sʌclan  chubʌʼañʌl. Ili jiñʌch muʼ bʌ i cʼajtesʌbeñonla tsaʼ bʌ ujti tiʼ tojlel Demas. Utsʼat woliʼ lon melben i yeʼtel Dios temel yicʼot Pablo, pero Demas tsiʼ cʌyʌ come tsaʼ caji i cʼuxbin «pañimil» (2 Ti. 4:10). Jiñi Biblia maʼañic miʼ yʌl mi Demas tsiʼ ñumen cʼuxbi jiñi chubʌʼañʌl, o mi mach yomix i bej acʼ i bʌ tiʼ yeʼtel Dios. Anquese mach wen la cujilic i sujmlel tiʼ tojlel, miʼ pʌsbeñonla chaʼan mach yomic mi lac chaʼ tech laj cʼuxbin jiñi chubʌʼan tac, come miʼ mejlel i tsʌñesan laj cʼuxbiya chaʼan jiñi i sujmlel.

10. Chaʼan mi lac bej ajñel tiʼ sujmlel, ¿chuqui mach yomic mi lac jacʼ?

¹⁰ Jiñi la camigojob yicʼot lac familia. Chaʼan mi lac bej ajñel tiʼ sujmlel, mach yomic mi lac jacʼ lac xicʼol tiʼ tojlel yambʌlob. Cheʼ tsaʼ laj cʌñʌ i sujmlel, tsaʼ qʼuextʌyi bajcheʼ añonla la quicʼot la camigojob yicʼot jiñi lac familia mach bʌ Testigojobic. An tsaʼ bʌ i qʼueleyob ti ñuc jiñi lac ñopbal, pero an maʼañic bʌ tsiʼ mulayob (1 P. 4:4). Mi lac chaʼlen wersa chaʼan chʌn utsʼat bajcheʼ añonla la quicʼot yambʌ lac familiajob. Pero yom mi laj cʌntan lac bʌ chaʼan maʼan mi lac ñusaben i tʼan Jehová chaʼan la com wen miʼ qʼueloñobla. Wen tsiquil jiñi ticʼojel muʼ bʌ lac taj ti 1 Corintios 15:33, cojach mi lac sʌclañob ti la camigo jiñi muʼ bʌ i cʼuxbiñob Jehová.

11. ¿Chuqui mi caj i coltañonla chaʼan maʼañic lecoj bʌ lac pensar yicʼot lac melbal?

¹¹ Lecoj bʌ pensar yicʼot melbalʌl. Jiñi añoʼ bʌ tiʼ sujmlel yom chʼujulob o sʌcob (Is. 35:8; pejcan 1 Pedro 1:14-16). Cheʼ tsaʼ laj cʌñʌ jiñi toj bʌ mandar tac am bʌ ti Biblia, tsaʼ laj qʼuexta lac melbal. An tsaʼ bʌ i ñoj qʼuextayob bajcheʼ chumulob. Pero maʼañic baqui ora yom mi laj qʼuextan jiñi lac sʌclel ti jiñi bibiʼ jax bʌ i melbal ili pañimil (mulawil). ¿Chuqui mi caj i coltañonla? Cheʼ mi lac wen ñaʼtan bajcheʼ cʼamel i tojol tsaʼ bʌ i yʌcʼʌ Jehová chaʼan chʼujulonla: Jiñi chʼichʼel i Yalobil, Jesucristo (1 P. 1:18, 19). Mi yaʼʌch wen an ti lac ñaʼtʌbal yicʼot ti lac pusicʼal jiñi wen ñuc bʌ i cuxtʌlel tsaʼ bʌ i yʌcʼʌ Jesús, chʌn sʌc mi caj la cajñel tiʼ tojlel Jehová.

12, 13. a) ¿Chucoch ñuc i cʼʌjñibal cheʼ mi laj qʼuel jiñi qʼuiñijel tac cheʼ bajcheʼ miʼ qʼuel Jehová? b) ¿Chuqui mi caj laj qʼuel?

¹² Costumbre yicʼot qʼuiñijel tac mach bʌ weñic. An qʼuiñil jiñi yambʌ lac familiajob o lac piʼʌlob ti qʼueljun o eʼtel miʼ pʌyoñobla tiʼ jumpʼejl qʼuiñijel. ¿Chuqui mi caj i coltañonla chaʼan maʼañic mi la cotsan lac bʌ ti jiñi costumbre tac o qʼuiñijel tac muʼ bʌ i tsʼaʼlen Jehová? Yom wen cʼajal lac chaʼan chucoch miʼ tsʼaʼlen. Cheʼ jaʼel, cheʼ mi lac chaʼ qʼuel chuqui miʼ yʌl lac jun tac chaʼan baqui tilem jiñi qʼuiñijel tac, miʼ coltañonla. Cheʼ mi laj cʼajtesan chucoch miʼ yʌl jiñi Biblia chaʼan maʼañic mi la cotsan lac bʌ yaʼi, mi lac ñumen ñop chaʼan añoñʌchla ti bij muʼ bʌ i mulan Dios (Ef. 5:10). Cheʼ mi lac ñop Jehová yicʼot i tʼan miʼ cʌntañonla chaʼan maʼañic mi lac bʌcʼñan chuqui miʼ yʌl yambʌlob (Pr. 29:25).

¹³ Mi lac pijtan chaʼan tiʼ pejtelel ora mi la cajñel tiʼ sujmlel. ¿Bajcheʼ miʼ mejlel lac ñumen pʼʌtʼesan lac bʌ chaʼan mi lac chʌn ajñel tiʼ sujmlel? Laʼ laj qʼuel uxchajp.

14. a) Mi mucʼʌch lac chʌn tsajin jiñi Biblia, ¿chucoch miʼ coltañonla chaʼan maʼañic mi laj cʌy i sujmlel? b) ¿Chucoch ñuc i cʼʌjñibal lac ñaʼtʌbal, i chʼʌmbentel isujm yicʼot lac tojʼesʌntel?

¹⁴ Ñaxam bʌ, laʼ lac chʌn aqʼuen i yorajlel ti bele ora chaʼan mi lac tsajin jiñi i sujmlel tac am bʌ tiʼ tʼan Dios i laʼ lac wen ñaʼtan. Mi mucʼʌch lac ñumen tsajin, mi caj lac ñumen cʼuxbin i sujmlel yicʼot mi caj i ñumen pʼʌtʼan ti lac pusicʼal chaʼan maʼañic mi lac wis chon. Pero mach jasʌlic cheʼ tsaʼix laj cʌñʌ, añʌch  chuqui yom mi lac mel. Ti Proverbios 23:23, TNM, mi yʌl chaʼan mi tsaʼix lac mʌñʌ i sujmlel, yom mi lac taj lac «ñaʼtʌbal yicʼot tojʼesʌntel yicʼot i chʼʌmbentel isujm». Cheʼ mi lac mʌn lac ñaʼtʌbal yom i yʌl chaʼan mi lac mel cheʼ bajcheʼ mi laj cʌn. Mi lac chʼʌmben isujm cheʼ bʌ mi lac tempan chuqui mi laj cʌn yicʼot jiñi la cujilix bʌ. Cheʼ jaʼel, jiñi i sujmlel an qʼuiñil miʼ tojʼesañonla come miʼ pʌsbeñonla chuqui yom tac mi laj qʼuextan. Orajach yom mi lac jacʼ tiʼ pejtelel ora jiñi lac tojʼesʌntel, come yaʼ ti Biblia miʼ pʌs chaʼan ñumen ñuc i cʼʌjñibal bajcheʼ plata (Pr. 8:10).

15. ¿Bajcheʼ miʼ cʌntañonla jiñi cinturón chaʼan bʌ i sujmlel?

¹⁵ I chaʼpʼejlel, laʼ chumleconla ti jujumpʼejl qʼuin cheʼ bajcheʼ an tiʼ sujmlel. Yom chʌn an lac chaʼan jiñi i cʌjchi lac ñʌcʼ o cinturón, yom bʌ i yʌl, jiñi i sujmlel (Ef. 6:14). Ti wajali, jiñi soldadojob miʼ cʌchob i bʌ ti cinturón chaʼan miʼ cʌntʌbeñob i xiñil yicʼot añoʼ bʌ tiʼ malil. Pero yomʌch wen cʌchʌlob i chaʼan, mi maʼañic, mach muqʼuic caj i coltañob. Come jiñi i sujmlel am bʌ ti Biblia lajalʌch bajcheʼ jumpʼejl cinturón, mi wen cʌchʌlʌch lac chaʼan, mi caj i cʌntañonla ti jiñi mach bʌ isujmic chuqui miʼ yʌjlel yicʼot mi caj i coltañonla lac yajcan chuqui wen. I cheʼ añonla ti jumpʼejl wocol chaʼan i yilʌntel lac pusicʼal, mi caj i yʌqʼueñonla lac pʼʌtʌlel chaʼan mi lac mel chuqui wen. Juntiquil soldado maʼañic mi caj i wis majlel ti guerra mi maʼañic i cinturón. Joñonla jaʼel, maʼañic mi lac wis cʌy jiñi cinturón chaʼan bʌ i sujmlel i yomʌch wen cʌchʌl lac chaʼan. Chʌn añʌch laj quicʼot, mi cheʼʌch mi lac chumtʌl cheʼ bajcheʼ miʼ yʌl. Cheʼ jaʼel, jiñi cinturón miʼ cʼʌjñibʌyel chaʼan yaʼ miʼ cuch majlel i yespada jiñi soldado. Iliyi miʼ taj i bʌ yicʼot i yuxpʼejlel muʼ bʌ caj la cʌl chaʼan bajcheʼ mi lac chʌn ajñel tiʼ sujmlel.

16. ¿Chucoch miʼ pʼʌtʼesañonla chaʼan mi lac chʌn ajñel tiʼ sujmlel cheʼ mi laj cʌntesʌben yambʌlob jeʼel?

¹⁶ I yuxpʼejlel, jiñixto baqui jaxʌl yom mi laj cʌntesan yambʌlob chaʼan jiñi i sujmlel am bʌ ti Biblia. Cheʼ bajcheʼ jiñi soldado yom wen miʼ chuc i yespada, joñonla yom wen chucul lac chaʼan jaʼel jiñi i «tʼan Dios» (Ef. 6:17). Ti lac pejtelel mi lac mejlel lac chaʼlen wersa chaʼan ñumen wem bʌ xcʌntesajonla yicʼot chaʼan mi laj «cʼʌn ti utsʼat jini isujm bʌ tʼan» (2 Ti. 2:15). Mi mucʼʌch laj cʼʌn jiñi Biblia chaʼan mi laj coltan yambʌlob tiʼ mʌñol jiñi i sujmlel yicʼot chaʼan miʼ cʌyob jiñi mach bʌ i sujmic am bʌ ila ti pañimil, mi caj i ñumen cʌytʌl ti lac jol yicʼot ti lac pusicʼal jiñi i cʌntesa Dios. Ili miʼ pʼʌtʼesañonla chaʼan mi lac chʌn ajñel tiʼ sujmlel.

17. ¿Chucoch maʼ qʼuel tiʼ ñuc jiñi i sujmlel?

¹⁷ Jiñi i sujmlel jiñʌch wen ñuc bʌ lac majtan tsaʼ bʌ i yʌqʼueyonla jiñi lac Tat am bʌ ti panchan. Yicʼot ili lac majtan, mi lac mejlel ti sujtel tiʼ yamigo Dios, jiñʌch wen utsʼatax bʌ an lac chaʼan. Pejtel chuqui an cʌntesayonla Dios i tejchibal jaxto, come tsiʼ yʌcʼʌ i tʼan chaʼan jiñi i sujmlel mi caj lac bej mʌn ti pejtelel ora. Jin chaʼan, laʼ laj qʼuel jiñi i sujmlel bajcheʼ wen utsʼatax bʌ perla. Laʼ lac bej mʌn i mach lac wis chon. I cheʼ bajcheʼ David, mi caj lac tsictesʌben i tʼan Jehová chaʼan mi lac chʌn ajñel tiʼ sujmlel (Sal. 25:5).