1, 2. a) ¿Chuquiyes am bʌ i ñumen i cʼʌjñibal bʌ lac chaʼan? b) ¿Baqui bʌ jiñi cʌntesa tac mi lac wen qʼuel ti ñuc, i chucoch? (Qʼuele jiñi dibujo tac).

¿CHUQUIYES ñumen am bʌ i cʼʌjñibal lac chaʼan? ¿Muʼ ba caj laj qʼuextan yicʼot yambʌ mach bʌ añic i wen cʼʌjñibal? I jacʼbal tac mach wen wocolic chaʼan i wiñicob Dios. Ñumen ñuc bʌ i cʼʌjñibal lac chaʼan jiñʌch cheʼ i yamigojonla Jehová, i mach la comic laj qʼuextan. Yicʼot jaʼel, mi laj qʼuel ti ñuc jiñi i sujmlel am bʌ ti Biblia, come miʼ coltañonla chaʼan mi lac sujtel tiʼ yamigo jiñi lac Tat am bʌ ti panchan (Col. 1:9, 10).

² Laʼ lac ñaʼtan pejtelel chuqui miʼ cʌntesañonla jiñi la Caj Cʌntesa, Jehová, yaʼ tiʼ Tʼan, jiñi Biblia. Miʼ subeñonla chuqui i cʼabaʼ yicʼot chuqui yom i yʌl, i miʼ subeñonla chaʼan wen tac bʌ i melbal. Miʼ tsictesʌbeñonla chaʼan jiñi ñuc bʌ majtañʌl, jiñi i tojol mulil, tsiʼ yʌqʼueyonla chaʼan i cʼuxbiya tiʼ tojlel i Yalobil. Miʼ subeñonla jaʼel chaʼan i Yumʌntel jiñi Mesías i miʼ yʌqʼuen i pijtaya jiñi bombiloʼ bʌ o yajcʌbiloʼ bʌ chaʼan miʼ chumtʌlob ti panchan yicʼot chaʼan jiñi ‹yambʌ tiñʌmeʼob› miʼ chumtʌlob ti jumpʼejl paraíso ila ti Pañimil (Jn. 10:16). Cheʼ jaʼel, miʼ cʌntesañonla bajcheʼ yom mi lac chumtʌl yicʼot bajcheʼ yom mi lac pʌs lac melbal tac. Pejtelel ili cʌntesa  wen ñuc i cʼʌjñibal lac chaʼan come miʼ lʌcʼtesañonla tiʼ tojlel jiñi tsaʼ bʌ i Meleyonla (Pʌtʌyonla) i miʼ yʌcʼ chaʼan añʌch i cʼʌjñibal laj cuxtʌlel.

3. ¿Chuqui mach yomic i yʌl jiñi tʼan: «Mʌñʌ i sujmlel»?

³ Cheʼ bʌ jiñi Biblia miʼ subeñonla chaʼan yom mi lac mʌn i sujmlel, ¿yom ba i yʌl jiñi chaʼan yom mi la cʌcʼ taqʼuin chaʼan mi lac taj? Maʼañic. Jehová wen an i yutslel come tsaʼ cʼoti i yʌcʼ ti majtan jach i cuxtʌlel i Yalobil. Cheʼ bʌ miʼ qʼuel chaʼan juntiquil quixtañu yom i cʌn i sujmlel, miʼ coltan chaʼan miʼ taj i maʼañic miʼ cʼajtin taqʼuin ti qʼuexol. Ti jumpʼejl bʌ qʼuin, juntiquil wiñic i cʼabaʼ Simón tsiʼ ñopo i yʌqʼuen taqʼuin jiñi apóstol Pedro chaʼan miʼ yʌqʼuentel i yeʼtel chaʼan miʼ yʌqʼuen yambʌlob jaʼel jiñi chʼujul bʌ espíritu, pero Pedro tsiʼ tiqʼui, tiʼ sube: «Laʼ jilic a taqʼuin a wicʼot, come wolaʼ lon ñaʼtan ti a pusicʼal mi mejlel a mʌn yicʼot taqʼuin a majtan chʼoyol bʌ ti Dios» (Hch. 8:18-20). Jin chaʼan, ¿chuqui yom i yʌl jiñi tʼan: «Mʌñʌ i sujmlel»?

4. ¿Chuqui mi caj i cʌntesañonla chaʼan i sujmlel ili temaj?

⁴ (Pejcan Proverbios 23:23, TNM). * Chaʼan miʼ cʼotel lac taj jiñi i sujmlel am bʌ tiʼ tʼan Dios yom mi lac chaʼlen wersa. Añʌch chuqui tac yom mi laj cʌy chaʼan mi lac taj. Cheʼ bajcheʼ tsiʼ yʌlʌ jiñi tsaʼ bʌ i tsʼijbu jiñi Proverbios, cheʼ tsaʼix laj cʌñʌ i sujmlel, yom tsajilonla chaʼan maʼañic mi lac chon o mi laj cʌy. Mi caj laj qʼuel chuqui yom i yʌl cheʼ mi lac mʌn i sujmlel yicʼot baqui bʌ i tojol yom mi la cʌcʼ chaʼan mi lac taj. Jiñi mi caj i coltañonla chaʼan ñumento mi laj qʼuel ti ñuc yicʼot chaʼan maʼañic baʼ ora mi lac chon. Cheʼ bajcheʼ mi caj laj qʼuel, añʌch i cʼʌjñibal chuqui tac mi laj cʌy chaʼan miʼ mejlel lac mʌn.

5, 6. a) ¿Bajcheʼ miʼ mejlel lac mʌn i sujmlel cheʼ maʼañic mi la cʌcʼ taqʼuin? Alʌ jumpʼejl ejemplo. b) ¿Chuqui bʌ wenlel miʼ tajtʌl cheʼ mi lac mʌn i sujmlel?

⁵ Cheʼ bʌ an chuqui mi lac majtan aqʼuentel, tajol an chuqui mi la cʌcʼ o an chuqui mi lac mel (chaʼlen) ti qʼuexol. Jiñi tʼan am bʌ ti hebreo muʼ bʌ i chaʼlentel ti traducir bajcheʼ «mʌñʌ» ti Proverbios 23:23, TNM, yom i yʌl jaʼel «sʌclan» o «taja». Pejtelel ili tʼan tac miʼ yʌcʼ ti ñaʼtʌntel chaʼan yom mi lac chaʼlen wersa o an chuqui yom mi la cʌcʼ cheʼ an chuqui la com lac taj. Jumpʼejl ejemplo, laʼ lac ñaʼtan chaʼan ti jumpʼejl tienda miʼ subob chaʼan woli (choncol) i yʌcʼob ti majtan jiñi caxlan waj. ¿Muʼ baʼ caj i bajñel pasel jiñi caxlan waj ti lac mesa? Tiʼ sujm, maʼañic. Anquese majtan jach, yom mi la cʌqʼuen i yorajlel yicʼot mi lac chaʼlen wersa chaʼan mi lac majlel lac chʼʌm. Cheʼ jaʼel, chaʼan mi lac mʌn jiñi i sujmlel maʼañic mi la cʌcʼ taqʼuin, pero añʌch chuqui yom mi lac mel.

⁶ (Pejcan Isaías 55:1-3). Jiñi i tʼan tac Jehová muʼ bʌ lac taj yaʼ ti libro i chaʼan Isaías miʼ coltañonla lac ñaʼtan chuqui yom i yʌl cheʼ mi lac mʌn i sujmlel. Ti ili texto, Dios miʼ lajin i tʼan tac cheʼ bajcheʼ jaʼ, lech yicʼot vino. Jiñi i sujmlel tac i chaʼan bʌ Dios lajal bajcheʼ tsʌwan tsʌwan bʌ jaʼ muʼ bʌ lac jap. Cheʼ jaʼel, lajal bajcheʼ jiñi lech miʼ coltañonla chaʼan mi laj colel cheʼ chutontola, jiñi i tʼan tac Jehová miʼ coltañonla chaʼan mi laj colel tiʼ chaʼan bʌ Dios. Pero ¿bajcheʼ miʼ lajintel jiñi tʼan tac yicʼot jiñi vino? Yaʼ ti Biblia, jiñi vino miʼ taj i bʌ yicʼot lac tijicñʌyel (Sal. 104:15). Jin chaʼan, cheʼ bʌ Dios miʼ subeñonla lac mʌn jiñi vino, miʼ yʌqʼueñonla i tʼan chaʼan tijicña mi caj la cajñel cheʼ mi lac jacʼben i mandar tac (Sal. 19:8). Ti jiñi lajiya tac, Jehová miʼ coltañonla lac chʼʌmben isujm baqui bʌ i wenlel tac cheʼ mi laj cʌn i sujmlel i mi lac pʌs ti lac melbal.  Jin chaʼan, laʼ laj qʼuel joʼchajp yom bʌ mi laj cʌy chaʼan mi lac mʌn i sujmlel.

7, 8. a) ¿Chucoch yom an i yorajlel lac chaʼan chaʼan mi lac mʌn i sujmlel? b) ¿Chuqui tsiʼ ñaʼta i mel juntiquil xcʼalʌl woli bʌ ti clase, i chuqui tsaʼ ujti tiʼ tojlel?

⁷ I yorajlel. Ti lac pejtelel yom mi la cʌcʼ iliyi chaʼan mi lac mʌn i sujmlel. Yom an i yorajlel lac chaʼan chaʼan mi lac ñʌchʼtan jiñi wen tʼan chaʼan i Yumʌntel Dios, mi lac pejcan Biblia yicʼot lac jun tac, jiñi estudio ti lac bajñelil, lac chajpʌntel chaʼan tempa bʌ tac yicʼot mi lac majlel yaʼi. Jiñi i yorajlel am bʌ lac chaʼan yom mi lac locʼsan ti jiñi mach bʌ ñuquic i cʼʌjñibal woli (yʌquel) lac mel (pejcan Efesios 5:15, 16). ¿Bajcheʼ cʼamel yom miʼ jalʼan juntiquil chaʼan miʼ cʌn jiñi ñaxan tac bʌ cʌntesʌntel am bʌ ti Biblia? Jiñʌch bajcheʼ chumul jujuntiquil. Pero maʼañic baqui jaxʌl miʼ mejlel laj cʌn chaʼan i ñaʼtʌbal Jehová, bajcheʼ yilal yicʼot jiñi melbil tac bʌ i chaʼan (Ro. 11:33). Ili ñaxam bʌ revista tsaʼ bʌ loqʼui ti inglés tsiʼ laji jiñi i sujmlel bajcheʼ «alʌ ñichteʼ» i tsiʼ yʌcʼʌ ili ticʼojel: «Mach jasʌlic yom mi a wubin mi tsaʼix a taja jumpʼejl. Mi cojach yom an a chaʼan jumpʼejl, Dios maʼañic chucoch tsiʼ yʌcʼʌ yan tac bʌ. Chʌn sʌclan yicʼot loto». Laʼ laj cʼajtiben lac bʌ: «¿Jaypʼejl an c chaʼan jiñi ñichteʼ i chaʼan bʌ i sujmlel?». Jinto jaʼel cheʼ mi lac chumtʌl tiʼ pejtelel ora, mi caj lac bej cʌn majlel i chaʼan bʌ Jehová. Wʌle, ñumen ñuc bʌ i cʼʌjñibal jiñʌch cheʼ wen mi laj cʼʌn jiñi i yorajlel am bʌ lac chaʼan chaʼan mi lac ñumen mʌn jiñi i sujmlel tac bʌ. Laʼ laj qʼuel tiʼ tojlel juntiquil yom bʌ i taj jiñi i sujmlel.

⁸ Juntiquil xcʼalʌl chʼoyol bʌ ti Japón i cʼabaʼ Mariko * tsaʼ majli ti chumtʌl ti Nueva York (Estados Unidos) chaʼan miʼ chaʼlen clase. Ti jiñi bʌ ora, ochem ti jumpʼejl ñopbalʌl tsaʼ bʌ tejchi ti Japón cheʼ ti 1959. Juntiquil precursora tsiʼ cʌñʌ jiñi xcʼalʌl cheʼ woli ti subtʼan ti jujumpʼejl otot. Mariko tsaʼ caji i cʌn jiñi i sujmlel, i wen tijicña tsiʼ yubi i bʌ, jin chaʼan tsiʼ cʼajtibe jiñi precursora chaʼan miʼ yʌqʼuen estudio chaʼyajl ti jujumpʼejl semana. Anquese woli ti clase yicʼot miʼ chaʼlen eʼtel (troñel), tsiʼ locʼsʌbe i yorajlel chaʼan miʼ majlel ti tempa bʌ tac. Cheʼ jaʼel, chaʼan miʼ mejlel i cʌn majlel jiñi i sujmlel, tsiʼ cʌyʌ majlel ti ñusaqʼuin tac. Cheʼ tsiʼ cʌyʌ i mel ili, tsiʼ wen colta chaʼan ora miʼ colel tiʼ chaʼan bʌ Dios. Mach i tajax jumpʼejl jab cheʼ tsiʼ chʼʌmʌ jaʼ. Cheʼ tsaʼ ñumi wʌcpʼejl uw, ti 2006, tsaʼ ochi bajcheʼ precursora, i choncolto i bej mel jiñi eʼtel.

9, 10. a) ¿Bajcheʼ yilal mi lac tech laj qʼuel jiñi chubʌʼan tac cheʼ mi lac mʌn jiñi i sujmlel? b) ¿Chuqui tsiʼ cʌyʌ i ñaʼtan juntiquil xcʼalʌl, i bajcheʼ miʼ yubin i bʌ chaʼan tsaʼ bʌ i mele?

⁹ Chubʌʼañʌl tac. Chaʼan mi lac mʌn jiñi i sujmlel an i tajol yom mi laj cʌy jumpʼejl eʼtel muʼ bʌ i yʌqʼueñonla lac taj cabʌl taqʼuin. Laʼ lac ñaʼtan tiʼ tojlel Pedro yicʼot Andrés añoʼ bʌ i yeʼtel bajcheʼ xchucchʌyob. Cheʼ bʌ Jesús tiʼ subeyob chaʼan miʼ sujtelob ti «xchuc winicob», tsiʼ cʌyʌyob i chimoʼchʌy i tsaʼ majli yicʼotob (Mt. 4:18-20). Tiʼ sujm, ili mach yom i yʌl chaʼan pejtelel muʼ bʌ i cʌñob i sujmlel yom miʼ cʌyob i troñel, come yom miʼ tajob taqʼuin i miʼ mʌcʼlañob i familia (1 Ti. 5:8). Pero, an i tajol yom miʼ qʼuextañob chuqui miʼ yʌcʼob ti ñaxan yicʼot bajcheʼ miʼ qʼuelob jiñi chubʌʼañʌl tac. Jesús wen tsiquil tsiʼ yʌlʌ cheʼ bʌ tsiʼ subeyonla chaʼan mi laj cʌy lac tempan «chubʌʼan ti pañimil» i chaʼan mi lac tempan «chubʌʼan ti panchan» (Mt. 6:19, 20). Laʼ laj qʼuel chuqui tsaʼ ujti tiʼ tojlel juntiquil xcʼalʌl.

¹⁰ María tsiʼ teche alas golf cheʼ maxto añic i jabilel chaʼan miʼ yochel ti escuela. Ti secundaria wen yujil alas, jin chaʼan tsaʼ aqʼuenti jumpʼejl beca chaʼan miʼ majlel ti universidad. Jiñi i cuxtʌlel yaʼ jach an ti jiñi alas, i tsiʼ ñaʼta  sujtel ti juntiquil wen cʌmbil bʌ xʼalas yicʼot chaʼan miʼ taj cabʌl taqʼuin. Pero tsaʼ caji i chʼʌm estudio. Jiñi i sujmlel tsaʼ bʌ caji i cʌn majlel tsiʼ wen mulaj yicʼot bajcheʼ woliʼ coltan majlel chaʼan miʼ qʼuextan i melbal. Tsiʼ yʌlʌ: «Cheʼ bʌ mij qʼuextan majlel jiñi c pensar yicʼot bajcheʼ chumulon cheʼ bajcheʼ miʼ yʌl jiñi mandar tac am bʌ ti Biblia, wen tijicña mi cubin c bʌ». Tsaʼ cʼoti i chʼʌmben isujm chaʼan wocolʌch cheʼ yom i taj chʼujul bʌ chubʌʼañʌl yicʼot jaʼel jiñi an tac bʌ ti pañimil (mulawil) (Mt. 6:24). Jin chaʼan, tsiʼ cʌyʌ i ñaʼtan sujtel ti juntiquil wen cʌmbil bʌ xʼalas golf cabʌl bʌ i taqʼuin. Wʌle ora an bajcheʼ precursora i miʼ yʌl chaʼan «ñumen tijicña yicʼot tsʼʌcʌl bajcheʼ an jiñi i cuxtʌlel».

11. Cheʼ bʌ mi lac mʌn i sujmlel, ¿chuqui miʼ mejlel i yujtel tiʼ tojlel la camigojob yicʼot lac familia?

¹¹ Jiñi la camigojob yicʼot lac familia. Cheʼ mi lac chʼʌm ti ñuc ti lac melbal jiñi mandar tac am bʌ ti Biblia, miʼ mejlel i qʼuextʌyel bajcheʼ an la quicʼot. ¿Chucoch? Cheʼ yʌquel i taj ti tʼan jiñi xcʌntʼañob i chaʼan, Jesús tsiʼ cʼajtibe Jehová: «Sʌqʼuesañob ti a sujmlel. Isujmʌch jini a tʼan» (Jn. 17:17). Jiñi tʼan «sʌqʼuesañob» yom i yʌl jaʼel «bajñel tʼoxoyob» o «locʼsañob». Cheʼ bʌ mi lac jacʼ jiñi i sujmlel, mi lac locʼsʌntel ila ti pañimil come maʼañix mi lac mel muʼ bʌ i melob. Qʼuexelix miʼ cʼotel i qʼueloñobla jiñi wiñicob xʼixicob (quixtañujob) come mi laj qʼuextan jiñi lac melbal tac i mi la cʌcʼ chaʼan miʼ tojʼesañonla majlel jiñi i sujmlel am bʌ ti Biblia. Mach lon la comic chaʼan mi lac tʼox lac bʌ, pero an laj camigojob o ti lac familia muʼ bʌ i ñajtesañob i bʌ ti lac tojlel o tajol miʼ contrajiñob jiñi lac tsijib ñopbal. Iliyi maʼañic miʼ yʌcʼ ti toj sajtel lac pusicʼal, come Jesús tsiʼ yʌlʌ: «Winicob mi caj i tajob i tsʼaʼlentel tiʼ tojlel i piʼʌlob tiʼ yotot» (Mt. 10:36). Pero tsiʼ subeyonla chaʼan mi caj lac taj ñuc tac bʌ majtañʌl cheʼ mi lac mʌn i sujmlel ñumento bʌ i cʼʌjñibal bajcheʼ jiñi muʼ bʌ laj cʌy (pejcan Marcos 10:28-30).

12. ¿Chuqui tsiʼ ñaʼta i mel juntiquil wiñic judío am bʌ i yeʼtel ti jumpʼejl empresa chaʼan jiñi i sujmlel?

¹² Juntiquil wiñic judío muʼ bʌ ti eʼtel ti jumpʼejl empresa, i cʼabaʼ Aarón, tsiʼ cʌñʌ cheʼ bʌ chʼoʼchʼocto chaʼan mach yomic miʼ yʌjlel i cʼabaʼ Dios. Pero tiʼ pusicʼal yomʌch i cʌn i sujmlel tiʼ tojlel Dios. Ti jumpʼejl bʌ qʼuin, juntiquil Testigo tsiʼ pʌsbe chaʼan cheʼ jiñi chʌmpʼejl i letrajlel i cʼabaʼ Dios am bʌ ti hebreo miʼ yotsʌbentel vocal tac miʼ mejlel i yʌjlel «Jehová». Tsiʼ wen mulaj tsaʼ bʌ i cʌñʌ, jin chaʼan tsaʼ majli yaʼ tiʼ sinagoga i suben jiñi xcʌntesajob i chaʼan judíojob. Pero mach cheʼic tsaʼ jacʼbenti bajcheʼ tsiʼ lon pijta. Anquese tsaʼʌch i tajayob i tijicñʌyel yomic chaʼan tsaʼ i cʌñʌ jiñi i sujmlel tiʼ tojlel Dios, tsiʼ tujbayob yicʼot tiʼ wetʼseʼyob loqʼuel. Tsaʼʌch i taja wocol jaʼel chaʼan bajcheʼ an yicʼot i familia. Pero maʼañic tsiʼ yʌcʼʌ chaʼan ili tac miʼ mʌctan i bej cʌn Jehová. Tsiʼ chʼʌmʌ jaʼ yicʼot tsiʼ pʌsʌ i xucʼtʌlel ti melol i yeʼtel Dios ti pejtelel ora. Lajal bajcheʼ jiñi Aarón mi caj lac chʼujbin chuqui jach miʼ qʼuextʌyel ti bajcheʼ chumulonla o bajcheʼ an la quicʼot lac familia chaʼan mi lac mʌn i sujmlel.

13, 14. Chaʼan miʼ mejlel lac mʌn i sujmlel, ¿chuqui tajol yom mi laj qʼuextan ti lac pensar yicʼot ti lac melbal? Acʼʌ jumpʼejl ejemplo.

¹³ Lecoj bʌ pensar yicʼot melbalʌl. Mi la comʌch lac chʼujbin jiñi i sujmlel yicʼot lac chumtan, yom mi lac qʼuextan lac pensar yicʼot lac melbal. Pedro tsiʼ yʌcʼʌ ili ticʼojel: «Yom lajaletla bajcheʼ alobob muʼ bʌ i wen jacʼob tʼan. Mach mi laʼ chʌn mel cheʼ bajcheʼ ti yambʌ ora cheʼ maxto anic laʼ ñaʼtʌbal». I tsiʼ bej alʌ: «Jini chaʼan yom chʼujuletla jaʼel tiʼ pejtelel laʼ melbal» (1 P. 1:14, 15). Jumpʼejl ejemplo, yaʼ ti Corinto baqui an cabʌl jontolil yicʼot tsʼiʼlel, jiñi quixtañujob tsaʼ bʌ i chʼujbiyob jiñi i sujmlel cabʌl chuqui tsiʼ qʼuextayob tiʼ cuxtʌlel (1 Co. 6:9-11). Cheʼ jaʼel, wʌle ora an cabʌlob am bʌ i cʌyʌyob mach bʌ weñic melbalʌl chaʼan miʼ mʌñob jiñi i sujmlel. Pedro tsiʼ yʌlʌ  jaʼel ili tʼan tiʼ tojlel jiñi xñoptʼañob ti jiñi bʌ ora: «Jasʌlix jini qʼuin tac tsaʼ bʌ laʼ ñusa tiʼ melol mulil cheʼ bajcheʼ jini sajtemoʼ bʌ muʼ bʌ i jacʼob i colosojlel i pusicʼal yicʼot i tsʼiʼlel. Miʼ chaʼleñob chuqui jisil yicʼot yʌcʼajel yicʼot leco bʌ qʼuiñijel, yicʼot lemoñel. Miʼ melob leco bʌ i qʼuiñilel dios tac» (1 P. 4:3).

¹⁴ Devynn yicʼot Jasmine cabʌl jab tsiʼ tajayob wocol tiʼ caj lembal. Devynn wen yujil jiñi troñel chaʼan contabilidad, pero tiʼ caj i lemoñel miʼ chojquel loqʼuel tiʼ yeʼtel. Jasmine miʼ cʌjñel bajcheʼ juntiquil wen yujil bʌ michʼan yicʼot jatsʼ. Tiʼ jumpʼejl bʌ qʼuin, cheʼ yʌc (qʼuixin) woliʼ ti xʌmbal ti carretera, tsiʼ taja jumpʼejl xñujpuñel misionerojoʼ bʌ, tsaʼ bʌ i subeyob chaʼan mi caj i yʌqʼueñob estudio. Tsaʼ ñumi jumpʼejl semana i tsaʼ majliyob i qʼuel tiʼ yotot, pero Devynn yicʼot Jasmine wen yʌcob. Maʼañic tsiʼ ñaʼtayob chaʼan miʼ wen chʼʌjmelob ti ñuc tiʼ tojlel jiñi misionerojob i miʼ majlel i julaʼtʌntelob. Cheʼ bʌ tsaʼ chaʼ majliyob ti julaʼ jiñi misionerojob, mach cheʼix tsaʼ ujti bajcheʼ ti ñaxan. Ti jiñi jach bʌ ora, Devynn yicʼot Jasmine tsiʼ qʼueleyob ti ñuc jiñi estudio i tsaʼ caji i chumtañob woli bʌ i cʌñob. Cheʼ ñumeñix uxpʼejl uw, tsiʼ yʌcʼʌyob i tʼan chaʼan mi caj i cʌy i japob lembal i ti wiʼil tsaʼ ñujpuñiyob. Pejtelel jiñi quixtañujob yaʼ ti tejclum, tsiʼ qʼueleyob chaʼan tsiʼ qʼuextayob i melbal, jin chaʼan cabʌl tsiʼ cʼajtiyob jumpʼejl estudio jaʼel.

15. ¿Bajcheʼ cʼamel yom mi lac toj chaʼan mi lac mʌn i sujmlel, i chucoch?

¹⁵ Costumbre yicʼot qʼuiñijel tac mach bʌ weñic. An yambʌlob mach bʌ wocolic miʼ yubiñob chaʼan miʼ cʌyob costumbre yicʼot melbal tac cheʼ bʌ miʼ cʼotel i cʌñob chaʼan Dios miʼ tsʼaʼlen. Pero an yambʌlob, wocol bʌ miʼ yubiñob chaʼan miʼ tojob jiñi i sujmlel. Tajol maxto i wen ñaʼtayob chaʼan yomʌch miʼ cʌyob jiñi costumbre tac tiʼ caj chuqui miʼ subentelob tiʼ familia, i piʼʌlob ti troñel yicʼot i yamigojob. Ili ñumen wocolʌch cheʼ yom miʼ cʌyob melbal tac chaʼan miʼ yʌqʼueñob i ñuclel jiñi chʌmeñoʼ bʌ (sajtemoʼ bʌ) tiʼ familia (Dt. 14:1). Jiñi ejemplo tac chaʼan bajcheʼ an i pʌsʌyob yambʌ hermanojob i chʼejlel miʼ mejlel i coltañonla cheʼ an chuqui yom mi laj qʼuextan. Laʼ laj qʼuel chuqui tsiʼ meleyob jiñi quixtañujob chʼoyoloʼ bʌ ti Éfeso cheʼ ti ñaxam bʌ siglo.

16. ¿Chuqui tsiʼ meleyob jiñi chʼoyoloʼ bʌ ti Éfeso chaʼan miʼ mʌñob i sujmlel?

¹⁶ Jiñi tejclum Éfeso wen cʌmbil ti wajali come yaʼi miʼ wen cʼʌjñel magia. ¿Chuqui tsiʼ meleyob jiñi quixtañujob tsaʼ bʌ ochiyob ti xñoptʼan? Jiñi Biblia miʼ tsictesan: «Cabʌl tsaʼ bʌ i chaʼleyob wujt tsiʼ tempayob i jun. Tsiʼ puluyob tiʼ wut winicob xʼixicob. Tsiʼ tsicbeyob i tojol, lujumpʼejl i yuxcʼal mil sʌsʌc taqʼuin. Jini chaʼan cabʌl tsaʼ ñojpi i tʼan Dios. Tsaʼ wen tsictiyi i pʼʌtʌlel» (Hch. 19:19, 20). Jiñi xucʼul bʌ xñoptʼañob tsiʼ jisayob jiñi jun tac letsen tac bʌ i tojol, pero tsaʼʌch i tajayob ñuc tac bʌ bendición chaʼan tsiʼ pʌsʌyob i chʼejlel.

17. a) ¿Chuqui tajol an laj cʌyʌ chaʼan mi lac taj jiñi i sujmlel? b) ¿Baqui bʌ cʼajtiya tac mi caj la cʌqʼuen i jacʼbal yaʼ ti yambʌ temaj?

¹⁷ ¿Chuqui an a cʌyʌ jatet chaʼan maʼ taj i sujmlel? Ti lac pejtelel mi la cʌqʼuen i yorajlel chaʼan mi lac taj «ñichteʼ tac» chaʼan bʌ i sujmlel. An muʼ bʌ i cʌyob chubʌʼañʌl tac jaʼel yicʼot miʼ qʼuextañob bajcheʼ an yicʼotob i familiajob yicʼot i yamigojob. Cabʌlob yom miʼ qʼuextañob i pensar yicʼot i melbal, i an tajol miʼ cʌyob costumbre tac yicʼot melbal tac mach bʌ loqʼuemic ti Biblia. Mach yʌlʌlic chuqui mi laj cʌcʼ chaʼan mi lac toj, la cujil chaʼan ñucʌch i cʼʌjñibal chuqui mi lac mel chaʼan mi lac taj jiñi i sujmlel. Cheʼ jiñi, tiʼ qʼuexol mi lac taj jiñi ñumen ñuc bʌ i cʼʌjñibal, jiñʌch cheʼ i yamigojonla Jehová. Cheʼ mi lac ñaʼtan pejtelel jiñi wenlel tac chaʼan mi laj cʌn i sujmlel, maʼañic miʼ mejlel lac ñop cheʼ an majqui yom i chon. ¿Bajcheʼ miʼ mejlel ti ujtel iliyi? ¿Chuqui mi caj i coltañonla chaʼan maʼañic mi lac mel jiñi tsʌts bʌ wocol? Mi caj lac tajben i jacʼbal yaʼ ti yambʌ temaj.