1, 2. Cheʼ bʌ mi lac taj majlel laj colel tiʼ chaʼan bʌ Dios, ¿chuqui mi laj cʌn lac mel? Alʌ jumpʼejl ejemplo.

CHEʼ bʌ juntiquil chʼiton miʼ yʌqʼuentel jumpʼejl majtañʌl, jiñi i tat i ñaʼ miʼ subeñob: «¿Chuqui yom maʼ suben?», i miʼ jacʼ: «Wocolix a wʌlʌ», anquese maʼañic miʼ loqʼuel tiʼ pusicʼal. Cheʼ woli (choncol) i colel majlel, miʼ tech i chʼʌmben isujm chucoch jiñi i tat i ñaʼ miʼ qʼuelob ti ñuc cheʼ miʼ yʌl wocolix i yʌlʌ. Maʼañix majqui miʼ suben chaʼan yom miʼ mel come i bajñelix miʼ loqʼuel tiʼ pusicʼal. ¿Chucoch tsaʼ qʼuextʌyi? Come tsiʼ cʌñʌ pensar bajcheʼ i tat i ñaʼ i chaʼan yom miʼ yʌc wocolix i yʌlʌ.

² Cheʼʌch miʼ yujtel jaʼel cheʼ bʌ mi laj cʌn jiñi i sujmlel am bʌ ti Biblia come mi lac chʼʌmben isujm chaʼan ñucʌch i cʼʌjñibal cheʼ mi laj jacʼ jiñi ñaxam bʌ cʌntesʌntel i chaʼan Dios. Pero cheʼ mi lac taj majlel laj colel tiʼ chaʼan bʌ Dios, mi laj cʌn bajcheʼ miʼ chaʼlen pensar: Chuqui tac miʼ mulan yicʼot chuqui tac maʼañic, yicʼot bajcheʼ miʼ qʼuel chuqui tac miʼ yujtel. Cheʼ bʌ mi lac tech laj cʼʌn lac pensar bajcheʼ Jehová yicʼot chaʼan jiñi miʼ coltañonla ti lac melbal (chaʼlebal) tac yicʼot ti chuqui mi lac yajcan lac mel, mi lac pʌs chaʼan woli (yʌquel) lac sujtesan ti lac chaʼan jiñi i pensar Jehová.

3. ¿Chucoch an i tajol wocolʌch mi la cubin chaʼan mi lac sujtesan ti lac chaʼan i pensar Jehová?

³ Anquese mucʼʌch lac mulan laj cʌmben majlel i pensar Jehová, an i tajol mach cʼuñic ti melol come xmulilonla. Jumpʼejl ejemplo,  tajol wocol mi la cubin chaʼan mi lac chʼʌmben isujm chaʼan bajcheʼ yilal miʼ qʼuel Jehová cheʼ sʌc lac melbal, jiñi i mulʌntel chubʌʼañʌl, jiñi subtʼan yicʼot cheʼ mach weñic miʼ cʼʌjñel jiñi chʼichʼ. ¿Chuqui mi caj i coltañonla chaʼan mi lac bej sujtesan ti lac chaʼan jiñi i pensar Jehová? I ¿bajcheʼ mi caj i coltañonla ti chuqui mi lac yajcan ili ora yicʼot ti talto bʌ qʼuin?

4. ¿Chuqui yom i yʌl cheʼ mi lac mel ti tsijib jiñi lac pensar?

⁴ (Pejcan Romanos 12:2, TNM). * Ti ili texto, jiñi apóstol Pablo tiʼ tsictesa chuqui yom mi lac mel chaʼan mi laj cʌn lac sujtesan ti lac chaʼan i pensar Jehová. Yaʼ ti yambʌ temaj tsiʼ coltayonla laj qʼuel chaʼan cheʼ mi laj cʌy lac mel i chaʼan bʌ ili «pañimil», mi laj cʌy lac chʼujbin jiñi i pensar tac yicʼot i melbal. Pero Pablo tsiʼ yʌlʌ jaʼel chaʼan wersa yom mi lac mel ti tsijib jiñi lac pensar. Jin chaʼan, ñuc i cʼʌjñibal cheʼ mi lac wen pejcan jiñi Biblia chaʼan miʼ cʼotel lac ñaʼtʌben i pensar Dios, yom mi lac tsajin yicʼot lac chaʼlen pensar cheʼ bajcheʼ miʼ mel.

5. Tsictesan chucoch mach lajalic jiñi estudio ti lac bajñelil yicʼot cheʼ an chuqui mi lac pam pejcan.

⁵ Cheʼ mi lac chaʼlen estudio ti lac bajñelil mach cojach ochem jiñi i pam pejcʌntel jiñi jun i chaʼan mi lac sʌp i jacʼbal jiñi cʼajtiya tac. Cheʼ mi lac wen pejcan jiñi jun, mi laj qʼuel chuqui miʼ subeñonla tiʼ tojlel Jehová yicʼot bajcheʼ miʼ chaʼlen pensar yicʼot bajcheʼ yilal i melbal tac. Mi lac chaʼlen wersa chaʼan mi lac ñaʼtan chucoch an i tajol an chuqui tac miʼ cʼajtin yicʼot an tac bʌ chuqui miʼ tsʼaʼlen. Cheʼ jaʼel, mi lac ñaʼtan chuqui yom mi laj qʼuextan ti lac pensar yicʼot ti laj cuxtʌlel. Tiʼ sujm, tajol maʼañic mi caj i tilel ti lac ñaʼtʌbal pejtelel iliyi cheʼ bʌ mi lac chaʼlen estudio. Pero weñʌch cheʼ mi lac jumucʼ aqʼuen i yorajlel chaʼan mi lac tsajin woli bʌ lac pejcan, tajol cheʼ tiʼ xiñilel majlel jiñi lac estudio (Sal. 119:97; 1 Ti. 4:15).

6. ¿Chuqui miʼ yujtel ti lac tojlel cheʼ bʌ mi lac tsajin majlel i pensar Dios?

⁶ Mi ñʌmʌlonla lac tsajin jiñi i Tʼan Dios an chuqui ñuc bʌ i cʼʌjñibal miʼ yujtel ti lac tojlel. Miʼ cʼotel lac ñop o lac bajñel ñaʼtan chaʼan jiñi i pensar Jehová jiñʌch jiñi toj bʌ. Mi lac tech lac chʼʌmben i sujm chucoch añʌch bajcheʼ yilal miʼ qʼuel chuqui tac jach miʼ yujtel i cheʼ jiñi mi lac sujtesan ti lac chaʼan. Cheʼ bʌ mi lac mel ti tsijib jiñi lac pensar, miʼ qʼuextʌyel bajcheʼ mi caj lac chaʼlen pensar. Cʼunteʼ cʼunteʼ mi cajel laj cʼotel lac chaʼlen pensar bajcheʼ Jehová.

7, 8. a) ¿Bajcheʼ yilal miʼ qʼuel Jehová jiñi chubʌʼañʌl tac? (Qʼuele jiñi dibujo tac am bʌ tiʼ tejchibal). b) Mi cheʼʌch lac pensar bajcheʼ Jehová, ¿chuqui yom mi lac ñaxan acʼ ti ñuc?

⁷ Jiñi lac pensar mach cojach yaʼ ochem ti bajcheʼ mi la cubin lac bʌ, yicʼotʌch jaʼel ti chuqui mi lac mel (Mr. 7:21-23; Stg. 2:17). Chaʼan mi lac wen chʼʌmben i sujm, laʼ laj qʼuel ejemplo tac. Ñaxan, chaʼan bajcheʼ yom mi laj qʼuel jiñi chubʌʼañʌl. Jiñi Evangelio tac jamʌ tsiquil miʼ yʌc ti ñaʼtʌntel bajcheʼ yilal miʼ qʼuel Jehová jiñi. Wen jach majqui tiʼ sʌcla Jehová chaʼan miʼ sujtelob tiʼ tatob i Yalobil chaʼan miʼ cosañob ila ti pañimil (mulawil), jiñʌch jumpʼejl xñujpuñel mach bʌ cabʌlic i taqʼuin (Lv. 12:8; Lc. 2:24). Jiñi Biblia miʼ yʌl chaʼan cheʼ tsaʼ chʼocʼa Jesús, jiñi María «tsiʼ ñolchoco tiʼ bucʼujib alʌcʼʌl, come maʼanic tsiʼ taja i yajñib tiʼ yotlel wʌyibʌl» (Lc. 2:7). Mi tsaʼic i mulaj Jehová, tsaʼʌch mejli i yʌcʼ wem bʌ ajñibʌl baqui mi yilan pañimil i Yalobil. Pero ñuc bʌ i cʼʌjñibal i chaʼan Jehová jiñʌch cheʼ yaʼ miʼ colel ti jumpʼejl familia muʼ bʌ i yʌcʼ ti ñaxan i chaʼan bʌ Dios.

⁸ Cheʼ bʌ mi lac tsajin ili relato, mi cʼotel lac  ñaʼtan bajcheʼ yilal miʼ qʼuel Jehová jiñi chubʌʼan tac. An tatʌlob muʼ bʌ i wen chaʼleñob wersa chaʼan miʼ yʌqʼueñob chuqui wen i yalobilob anquese miʼ tajob wocol tac tiʼ chaʼan bʌ Dios. Pero tiʼ sujm, ñumen am bʌ i cʼʌjñibal i chaʼan Jehová jiñʌch bajcheʼ an yicʼotob. ¿Ixcu joñonla? ¿Tsaʼix ba lac sujtesa lac pensar ti bajcheʼ i chaʼan? ¿Chuqui miʼ yʌcʼ ti ñaʼtʌntel jiñi lac melbal tac? (Pejcan Hebreos 13:5).

9, 10. ¿Bajcheʼ mi lac pʌs chaʼan lajal lac pensar bajcheʼ Jehová cheʼ maʼañic mi la cʌcʼ ti yajlel yambʌlob?

⁹ Jiñi yambʌ ejemplo jiñʌch cheʼ mi la cʌcʼ ti yajlel yambʌlob, tajol chaʼan miʼ chaʼleñob mulil o chaʼan miʼ cʌyob i chʼujutesan Jehová. ¿Chuqui miʼ ñaʼtan Dios chaʼan jiñi? Jesús tsiʼ yʌlʌ: «Majqui jach miʼ yʌsan ti mulil juntiquil chʼoʼchʼoc bʌ muʼ bʌ i ñopon, mach utsʼatic mi caj i yujtel. Ñumen utsʼat tsaʼic ñaxan cʌjchi ñaʼatun tiʼ bicʼ jini winic chaʼan miʼ chojquel ochel ti ñajb» (Mr. 9:42). Cheʼ bajcheʼ mi laj qʼuel, tiʼ tojlel Jesús wen tsʌtsʌch jiñi. Come Jesús tsiʼ pʌsʌ ti toj bajcheʼ yilal i melbal tac i Tat, miʼ mejlel lac ñop chaʼan Jehová mach weñic miʼ qʼuel jaʼel cheʼ an majqui miʼ yʌcʼ ti yajlel juntiquil xñoptʼan i chaʼan Cristo tiʼ caj i melbal tac (Jn. 14:9).

¹⁰ ¿Lajal ba lac pensar la quicʼot Jehová yicʼot Jesús? ¿Chuqui miʼ yʌcʼ ti ñaʼtʌntel jiñi lac melbal tac? Laʼ lac ñaʼtan chaʼan an bajcheʼ yilal mi lac mulan lac xoj lac pislel o mi lac chʼʌl lac bʌ, pero miʼ cʼotel la cubin chaʼan an la quermañojob mach bʌ weñic miʼ qʼuelob o chaʼan miʼ mejlel i techbeñob lecoj bʌ i pensar. ¿Chuqui mi caj lac mel? ¿Muʼ ba caj i ñijcañonla laj cʼuxbiya tiʼ tojlelob chaʼan mi laj cʌy lac mel chuqui mi lac bajñel mulan? (1 Ti. 2:9, 10).

11, 12. Cheʼ mi laj qʼuel jiñi jontolil bajcheʼ miʼ qʼuel Jehová yicʼot cheʼ mi lac ticʼ lac bʌ, ¿bajcheʼ miʼ cʌntañonla chaʼan jiñi mulil?

¹¹ Laʼ laj qʼuel jiñi i yuxpʼejlel ejemplo: Jehová miʼ tsʼaʼlen jontolil (Sal. 5:4). Anquese yujil chaʼan an qʼuiñil miʼ tilel mach bʌ weñic ti lac pensar come xmulilonla, miʼ subeñonla chaʼan yom mi lac tsʼaʼlen jontolil cheʼ bajcheʼ miʼ mel jaʼel (pejcan Salmo 97:10). Cheʼ mi lac tsajin chucoch miʼ tsʼaʼlen jontolil miʼ coltañonla chaʼan cheʼʌch mi laj qʼuel jaʼel i miʼ yʌqʼueñonla lac pʼʌtʌlel chaʼan maʼañic mi lac chʼujbin.

¹² An yambʌ bajcheʼ miʼ mejlel i coltañonla cheʼ mi laj qʼuel jiñi jontolil cheʼ bajcheʼ miʼ qʼuel Jehová. Mi caj lac ñaʼtan chaʼan an melbalʌl tac mach bʌ weñic anquese mach jamʌ tsiquilic miʼ yʌl jiñi Biblia. Jumpʼejl ejemplo, wʌle ora choncol i wen pujquel jumpʼejl son cʌmbil bʌ bajcheʼ lap dance. An muʼ bʌ i ñaʼtañob chaʼan mach lecojic come mach lajalic bajcheʼ an majqui woli ti piʼleya. * Pero ¿cheʼʌch ba miʼ ñaʼtan Jehová jaʼel? Laʼ laj cʼajtesan chaʼan miʼ tsʼaʼlen pejtelel jontolil. Jin chaʼan, laʼ lac ñajtʼesan lac bʌ ti mulil cheʼ mi lac chaʼlen wersa lac ticʼ lac bʌ yicʼot chaʼan mi lac tsʼaʼlen muʼ bʌ i tsʼaʼlen Jehová (Ro. 12:9).

13. ¿Chucoch yom mi lac wʌn ñaʼtan bajcheʼ yilal i pensar Jehová?

¹³ Cheʼ bʌ woli lac tsajin jiñi Biblia, laʼ lac wen ñaʼtan bajcheʼ miʼ mejlel i coltañonla jiñi i pensar Dios cheʼ an chuqui yom mi lac yajcan lac mel ti talto bʌ qʼuin. Cheʼ bajcheʼ jiñi, chajpʌbil mi caj la cajñel cheʼ bʌ an chuqui miʼ waʼ tajonla i ti orajach yom mi lac ñaʼtan chuqui mi caj lac mel (Pr. 22:3). Laʼ laj qʼuel ejemplo tac am bʌ ti Biblia.

14. ¿Chuqui mi laj cʌn ti tsaʼ bʌ i mele José cheʼ bʌ jiñi i yijñam Potifar tsiʼ ñopo i yʌc?

¹⁴ Laʼ lac ñaʼtan chuqui tsiʼ ñusa José. Jiñi i yijñam Potifar tsiʼ ñopo i yʌc chaʼan miʼ totsʼtʌl yicʼot, pero José orajach tsiʼ yʌlʌ  chaʼan maʼañic. Cheʼʌch tsiʼ pʌsʌ chaʼan añʌch i wen ñaʼta bajcheʼ yilal miʼ qʼuel Dios jiñi xucʼtʌlel ti jumpʼejl ñujpuñel (pejcan Génesis 39:8, 9). José tsiʼ jacʼbe jiñi i yijñam Potifar: «¿Bajcheʼ mi mejlel c chaʼlen jini ñuc bʌ mulil? ¿Bajcheʼ mi mejlel c chaʼlen mulil tiʼ contra Dios?». Ili miʼ pʌsbeñonla chaʼan tsiʼ yʌcʼʌ tiʼ pusicʼal jiñi i pensar Jehová. Wʌle laʼ lac ñaʼtan ti lac tojlel. Laʼcu lac ñaʼtan chaʼan juntiquil lac piʼʌl ti eʼtel (troñel) miʼ tech i pʌs chaʼan miʼ mulañonla o miʼ cʼotel jumpʼejl mensaje o jumpʼejl foto ti lac celular muʼ bʌ i yʌl o jamʌ tsiquil bʌ miʼ pʌs chaʼan bʌ piʼleya. * Mi ñaʼtʌbilix lac chaʼan bajcheʼ tac yilal miʼ qʼuel Jehová iliyi, tsaʼix la cotsa ti lac pusicʼal chuqui miʼ ñaʼtan yicʼot toj ñaʼtʌbilix lac chaʼan chuqui mi caj lac mel, mach wocolic mi caj la cubin chaʼan xucʼul mi la cajñel.

15. Cheʼ bajcheʼ jiñi uxtiquil hebreojob, ¿bajcheʼ miʼ mejlel lac lʌtʼ jiñi lac xicʼol ti mach bʌ weñic chaʼan chʌn xucʼulonla ti Jehová?

¹⁵ Wʌle laʼ laj qʼuel tiʼ tojlel jiñi uxtiquil hebreojob cʌmbiloʼ bʌ bajcheʼ Sadrac, Mesac yicʼot Abednego. Jiñi rey Nabucodonosor tsiʼ yʌcʼʌ ti melol i yejtal ti oro yicʼot tsiʼ cʼajti chaʼan miʼ chʼujutesʌntel. Pero jiñi uxtiquil hebreojob maʼañic tsiʼ jacʼʌyob. Cheʼ bajcheʼ tsiʼ jacʼbeyob jiñi rey tsiʼ pʌsʌ chaʼan tsaʼʌch i ñaʼtayob chuqui yom i yʌl jiñi xucʼtʌlel tiʼ tojlel Jehová (Éx. 20:4, 5; Dn. 3:4-6, 12, 16-18). Laʼ lac ñaʼtan chaʼan jiñi lac yum ti troñel miʼ cʼajtibeñonla taqʼuin chaʼan jumpʼejl qʼuiñijel i chaʼan jiñi mach bʌ i sujmic ñopbalʌl. ¿Chuqui mi caj lac mel? Mach lac pijtan chaʼan jinto mi la cujtel bajcheʼ ili, laʼ lac wʌn ñaʼtan wʌle ora bajcheʼ yilal miʼ qʼuel Jehová. Cheʼ jiñi, mach wocolic mi caj la cubin chaʼan mi lac mel yicʼot mi la cʌl chuqui wen, cheʼ bajcheʼ tsaʼ ujti tiʼ tojlel jiñi uxtiquil hebreojob.

16. Cheʼ bʌ wen la cujilʌch bajcheʼ miʼ ñaʼtan Jehová, ¿bajcheʼ miʼ chajpañonla cheʼ an wocol chaʼan laj cʼocʼlel?

¹⁶ Cheʼ mi lac ñaxan wen ñaʼtan chucoch an i cʼʌjñibal cheʼ xucʼulonla ti Dios, miʼ mejlel i coltañonla cheʼ bʌ orajach mi lac pʌjyel majlel ti hospital. Tiʼ sujm, maʼañic mi lac chʼujbin chaʼan mi la cotsʌbentel chʼichʼ o jiñi chʌnchajp muʼ bʌ i chʼʌm tilel jiñi chʼichʼ (Hch. 15:28, 29). Pero an bajcheʼ tac miʼ cʼʌjñel jaʼel jiñi chʼichʼ baqui yom mi lac bajñel ñaʼtan chuqui mi caj lac mel. Jin chaʼan, i cʼʌjñibal mi lac tsajin jiñi principio tac loqʼuem bʌ ti Biblia muʼ bʌ i yʌcʼ ti ñaʼtʌntel bajcheʼ yilal miʼ qʼuel Jehová. Pero chaʼan mi lac ñaʼtan chuqui mi caj lac mel  mach yomic mi lac pijtan cheʼ yaʼix añonla ti hospital, tajol cheʼ añix i cʼuxel la quicʼot o cheʼ wolix lac xijqʼuel chaʼan ti ora yom mi la cʌl chuqui mi caj lac mel. Wʌle yomix mi lac wen ñaʼtan chaʼan ili temaj, mi lac tsʼijbun chuqui la com ti jumpʼejl jun cʌmbil bʌ ti yumʌlob bajcheʼ jiñi directriz médica yicʼot mi lac wʌn pejcan jiñi doctor. *

17-19. ¿Chucoch i cʼʌjñibalʌch cheʼ wʌleʼli mi lac ñop laj cʌn chuqui miʼ ñaʼtan Jehová? Alʌ jumpʼejl ejemplo baqui yom chajpʌbilonla.

¹⁷ Jiñi cojix bʌ, laʼ lac ñaʼtan bajcheʼ tsiʼ jacʼʌ Jesús ti orajach cheʼ bʌ Pedro tiʼ sube ili mach bʌ weñic ticʼojel: «C Yum, pʼuntan a bʌ». Jamʌ tsiquil chaʼan wen ñaʼtʌbilʌch i chaʼan chuqui yom Dios chaʼan miʼ mel yicʼot ti jiñi tsaʼ bʌ wʌn ajli chaʼan i cuxtʌlel ila ti Pañimil yicʼot cheʼ miʼ chʌmel (sajtel). Ili tsiʼ wen pʼʌtʼesa chaʼan chʌn xucʼul miʼ yajñel yicʼot ti jumpʼejl i pusicʼal miʼ yʌcʼ i cuxtʌlel tiʼ tojlel quixtañujob (pejcan Mateo 16:21, 23; 16:22, Jiñi tsijiʼ bʌ wen tʼañ chaʼañ estudio [TWT]). *

¹⁸ Ili ora, Jehová yom chaʼan i yamigojonla yicʼot mi lac chaʼlen wersa chaʼan mi lac mel i yeʼtel (Mt. 6:33; 28:19, 20; Stg. 4:8). Pero tajol mi lac mejlel ti ujtel bajcheʼ Jesús, cheʼ an chuqui mi lac subentel anquese mach lecojic, pero miʼ mʌctañonla tiʼ chaʼan bʌ Jehová. Jumpʼejl ejemplo, laʼ lac ñaʼtan chaʼan jiñi lac yum ti eʼtel miʼ subeñonla yambʌ ñumen ñuc bʌ eʼtel yicʼot ñumen lets bʌ lac tojol. Pero jiñi wocol jin cheʼ mi caj i mʌctañonla tiʼ melol i chaʼan bʌ Jehová. O mi xcoleletto, ñaʼtancu chaʼan maʼ subentel a coltʌntel chaʼan maʼ ñumen chaʼlen qʼueljun, pero yom maʼ loqʼuel majlel ti a wotot. ¿A wujil ba chuqui mi caj a mel ti jimbʌ ora? Mach a pijtan chaʼan ti jinto bʌ ora mi caj a mel oración, maʼ wen sʌclan chuqui yom maʼ mel yicʼot maʼ pejcan a familia yicʼot jiñi ancianojob chaʼan maʼ ñaʼtan chuqui mi caj a mel. Wʌn melex ili ora chaʼan maʼ cʌn a qʼuel chuqui miʼ ñaʼtan Jehová yicʼot chaʼan lajalʌch bajcheʼ miʼ cʼotel a ñaʼtan jaʼel.

¹⁹ Tajol mucʼʌch i tilel ti lac jol yan tac bʌ chuqui miʼ mejlel ti ujtel. Isujmʌch chaʼan maʼañic miʼ mejlel lac chajpan lac bʌ chaʼan tiʼ pejtelel chuqui miʼ tilel ti lac jol. Pero mi mucʼʌch lac wen ñaʼtan bajcheʼ yilal i pensar Jehová cheʼ yʌquel lac tsajin ti lac bajñelil jiñi Biblia, mi caj lac ñumen cʼajtesan chuqui tsaʼix bʌ laj qʼuele yicʼot mi caj laj cʼʌn cheʼ an chuqui miʼ tilel ti lac tojlel. Jin chaʼan, laʼ lac chaʼlen wersa laj cʌmben i pensar Jehová, laʼ lac chaʼañan yicʼot lac wen ñaʼtan chuqui mi caj i mel ti lac tojlel jiñi muʼ bʌ lac yajcan lac mel ili ora yicʼot ti talto bʌ qʼuin.

20, 21. a) ¿Chucoch añʌch i pʼisol cheʼ libre mi caj la cajñel yaʼ ti tsijiʼ bʌ pañimil? b) ¿Bajcheʼ miʼ mejlel lac taj lac tijicñʌyel jaʼel ili ora?

²⁰ La comix chaʼan yaʼañonla yaʼ ti tsijiʼ bʌ pañimil. Lʌcʼʌ ti lac pejtelel choncol lac pijtan chumtʌl tiʼ pejtelel ora ti jumpʼejl Paraíso ila ti Lum. Jiñi i Yumʌntel Dios mi caj i jisan pejtelel chuqui miʼ yʌcʼonla ti wocol ila ti pañimil. Pero cheʼ yaʼix añonla yaʼi, joñoñʌchla mi caj lac bej mejlel lac yajcan chuqui la com lac mel cheʼ bajcheʼ mi lac mulan yicʼot bajcheʼ la com.

²¹ Isujmʌch chaʼan libre mi caj lac bej ajñel, pero iliyi pʼisbil jach. Ti jimbʌ ora, jiñi utsoʼ bʌ mi caj i chʼʌmob ti ñuc i mandar tac Jehová yicʼot chuqui miʼ ñaʼtan chaʼan miʼ yajcañob chuqui jiñi wem bʌ o mach bʌ weñic. Iliyi mi caj i wen acʼ ti pʼojlel tijicñʌyel yicʼot ñʌchʼtʌlel (Sal. 37:11). Pero ili ora miʼ mejlel lac taj lac tijicñʌyel jaʼel mi mucʼʌch lac chʼʌm cheʼ bajcheʼ an i pensar Jehová.