1, 2. a) ¿Chucoch jiñi wocol woli bʌ lac ñusan ili ora lajal yicʼot jiñi tsaʼ bʌ i ñusayob jiñi judíojob tsaʼ bʌ chaʼ sujtiyob majlel ti Jerusalén? b) ¿Chuqui tac ti wocol tsiʼ tajayob jiñi judíojob? (Qʼuele jaʼel jiñi recuadro « Tiʼ yorajlel Ageo, Zacarías yicʼot Esdras»).

 MI MAʼAÑIC a weʼtel (troñel) maʼ cʌytʌl, tajol maʼ ñaʼtan bajcheʼ mi caj a mʌcʼlan a familia. Mi an wocol chaʼan política, mi an tsʼaʼlentel o miʼ mʌctʌntel jiñi subtʼan tajol maʼ cʼajtiben a bʌ bajcheʼ mi caj a cʌntan jiñi a familia. Mi caj i wen pʼʌtʼesañet cheʼ maʼ qʼuel chuqui tsiʼ mele Jehová chaʼan miʼ coltan jiñi israelitajob cheʼ bʌ tsiʼ tajayob wocol tac bajcheʼ iliyi.

² Cabʌl judíojob añix ora yaʼ chumulob ti Babilonia i yomʌch wen pʼʌtʌlob i ñopoñel chaʼan miʼ chaʼ sujtelob majlel ti Jerusalén, yom miʼ cʌyob i yotot, i yeʼtel i miʼ majlelob ti jumpʼejl tejclum mach bʌ i cʌñʌyobic. Wocol tsaʼ caji i yubiñob chaʼan miʼ mʌcʼlañob i familia, tsaʼ tejchi wocol tiʼ tojlel jiñi yumʌlob ti Persia yicʼot tsaʼ cajiyob ti tsʼaʼlentel, jin chaʼan wocol tsiʼ yubiyob chaʼan miʼ chaʼ melob (pʌtob) jiñi templo. I cheʼ ti jabil 520, Jehová tsiʼ choco majlel jiñi xʼaltʼañob Ageo yicʼot Zacarías chaʼan miʼ chaʼ pʼʌtʼesañob (Hag. 1:1; Zac. 1:1). Cheʼ bajcheʼ mi caj laj qʼuel, ili chaʼtiquil xʼaltʼañob tsaʼʌch i coltayob jiñi tejclum. Pero cheʼ ñumeñix lʌcʼʌ 50 jab, jiñi judíojob tsaʼ chaʼ cʼuñʼayob. Jin chaʼan, Esdras, juntiquil xtsʼijbaya, tsaʼ majli ti Jerusalén chaʼan miʼ coltan jiñi tejclum chaʼan miʼ chaʼ chʼujutesañob Jehová (Esd. 7:1, 6).

3. ¿Chuqui ti cʼajtiya tac mi caj lac jacʼ? (Proverbios 22:19).

³ Jiñi tsaʼ bʌ i yʌlʌyob Ageo yicʼot Zacarías tsaʼʌch i coltayob jiñi judíojob ti wajali chaʼan miʼ bej ñopob ti Jehová anquese  añob i contrajintel, i mucʼʌch i mejlel i coltañonla jaʼel ili ora, mach yʌlʌyic chuqui mi lac ñusan (pejcan Proverbios 22:19). Ti ili estudio, mi caj laj qʼuel chuqui tiʼ sube Jehová jiñi tejclum tiʼ tojlel Ageo yicʼot Zacarías, i mi caj laj cʌn jiñi ejemplo chaʼan Esdras. Cheʼ jaʼel, mi caj lac jacʼ ili cʼajtiya tac: ¿Bajcheʼ tsiʼ ticʼlayob jiñi judíojob jiñi wocol tac tsaʼ bʌ i tajayob cheʼ bʌ tsaʼ chaʼ majliyob ti Jerusalén? ¿Chucoch ñaxañʌch yom mi lac chʌn acʼ Jehová anquese woli (choncol) lac ñusan tsʌts tac bʌ wocol? ¿I chuqui mi caj i coltañonla lac ñumen ñop ti Jehová mach yʌlʌyic chuqui miʼ yujtel?

4, 5. ¿Chucoch tiʼ sʌtʌyob i tijicñʌyel jiñi judíojob?

⁴ Cheʼ bʌ jiñi judíojob tsaʼ cʼotiyob ti Jerusalén cabʌl chuqui yom miʼ melob, yom miʼ melob jiñi pulʌntib baqui miʼ yʌqʼuentel i majtan Jehová yicʼot miʼ melob jiñi templo. Ti ñaxan, wen tijicña tsaʼ cajiyob ti eʼtel (Esd. 3:1-3, 10). Pero mach jalic tiʼ sʌtʌyob jiñi tijicñʌyel. ¿Chucoch? Come yom miʼ melob i yotot jaʼel yicʼot miʼ pʌcʼob chuqui yom miʼ cʼuxob chaʼan miʼ mʌcʼlañob i familia (Esd. 2:68, 70). Cheʼ jaʼel, jiñi i contrajob tsaʼ caji i ñaʼtañob chuqui yom miʼ melob chaʼan maʼañix miʼ bej mejlel jiñi templo (Esd. 4:1-5).

⁵ Ti wajali, Jerusalén chucul ti Persia. Jin chaʼan, jiñi wocol tac yaʼ ti ñuc bʌ tejclum tsaʼʌch i ticʼla jaʼel jiñi judíojob. Cheʼ bʌ Ciro tsaʼ chʌmi ti jabil 530, tsaʼ ochi tiʼ qʼuexol Cambises, ili rey tsaʼ majli ti guerra tiʼ contra Egipto. I yaʼi, jiñi i soldadojob tsaʼ majliyob yaʼ baqui añob jiñi israelitajob chaʼan miʼ wersa cʼajtibeñob jaʼ, bʌlñʌcʼʌl yicʼot baqui miʼ mejlelob ti cʌytʌl. Tiʼ caj iliyi, jiñi israelitajob ñumen wocolto tsaʼ caji i ñusañob. I cheʼ bʌ tsaʼ ochi ti rey jiñi Darío I, tsaʼ wen caji ti contrajintel i maʼañic ñʌchʼtʌlel yaʼ ti tejclum. Jin chaʼan, tiʼ caj iliyi, jiñi judíojob tsaʼ cajiyob ti pensar yicʼot tsiʼ ñaʼtayob bajcheʼ mi caj i mʌcʼlañob i familia, i an tsaʼ bʌ i ñaʼtayob chaʼan maxto i yorajlelic chaʼan miʼ chaʼ melob jiñi templo (Hag. 1:2).

6. ¿Chuqui yambʌ wocol tsiʼ ñusayob jiñi judíojob, i chuqui tsiʼ yʌlʌ Zacarías? (Zacarías 4:6, 7).

⁶ (Pejcan Zacarías 4:6, 7). Yambʌ wocol tsaʼ bʌ i tajayob jiñi judíojob jiñʌch i contrajintelob. Cheʼ ti 522, jiñi i contrajob tsiʼ waʼchocoyob i melol jiñi templo, pero Zacarías tsiʼ yʌlʌ chaʼan Jehová mi caj i cʼʌn i pʼʌtʌlel chaʼan miʼ coltañob. I cheʼ ti 520, jiñi rey Darío tsiʼ yʌcʼʌ i tʼan chaʼan miʼ chaʼ mejlel jiñi templo, pero mach cojachi, tsaʼto i yʌcʼʌ taqʼuin chaʼan miʼ mejlel jiñi eʼtel. I tsiʼ yʌlʌ chaʼan jiñi yambʌ yumʌlob yom miʼ yʌcʼob i coltaya jaʼel (Esd. 6:1, 6-10).

7. ¿Chuqui ti bendición tsiʼ tajayob jiñi judíojob cheʼ ñaxan tsiʼ meleyob chuqui yom bʌ Jehová?

 ⁷ Jehová tsiʼ cʼʌñʌ Ageo yicʼot Zacarías chaʼan miʼ suben i tejclum chaʼan mi caj i yajñel yicʼotob mi mucʼʌch i chaʼ melob jiñi templo (Hag. 1:8, 13, 14; Zac. 1:3, 16). Ili xʼaltʼañob tsiʼ ñijcʌbeyob i pusicʼal jiñi tejclum chaʼan miʼ chaʼ techob i mel jiñi templo cheʼ ti 520, i mach i taja joʼpʼejl jab tsaʼ ujti i melob. Anquese añʌch wocol, ñaxan tsiʼ yʌcʼʌyob i bʌ chaʼan miʼ melob chuqui yom Jehová. Jin chaʼan, Jehová tsiʼ yʌqʼueyob pejtelel chuqui i cʼʌjñibal i chaʼañob yicʼot tsiʼ coltayob chaʼan lʌcʼʌl miʼ yajñelob tiʼ tojlel. Cheʼ bajcheʼ jiñi, jiñi judíojob tijicña tsaʼ mejli i chʼujutesañob Dios (Esd. 6:14-16, 22).

8. ¿Bajcheʼ miʼ coltañonla Hageo 2:4 chaʼan ñaxan mi la cʌcʼ i melol chuqui yom Dios?

⁸ La cujil chaʼan wen lʌcʼʌlix jiñi ñuc bʌ wocol, jin chaʼan wen ñuc i cʼʌjñibal mi lac chaʼlen subtʼan (Mar. 13:10). Pero tajol wocolʌch mi la cubin chaʼan mi lac mel mi woli (yʌquel) lac ñusan wocol chaʼan taqʼuin o mi jiñi añoʼ bʌ i yeʼtel miʼ mʌctañob jiñi subtʼan. ¿Chuqui mi caj i coltañonla? Jiñʌch cheʼ mi lac wen ñop chaʼan Jehová mucʼʌch caj i coltañonla mi ñaxañʌch mi la cʌcʼ jiñi i Yumʌntel. Jin chaʼan maʼañic chuqui yom mi lac bʌcʼñan (pejcan Hageo 2:4).

9, 10. ¿Bajcheʼ tsaʼ tsʼʌctiyi tiʼ tojlel Oleg yicʼot Irina muʼ bʌ i yʌl Mateo 6:33?

⁹ Laʼ laj qʼuel tsaʼ bʌ ujti tiʼ tojlel Oleg yicʼot Irina, b jumpʼejl xñujpuñel precursoroʼ bʌ. Tsaʼ majliyob ti coltaya ti jumpʼejl congregación, pero cheʼ jiñi tiʼ sʌtʌyob i yeʼtel come yaʼ ti país tsaʼ tejchi wocol tiʼ caj taqʼuin. Jiñi hermanojob jumpʼejl jab maʼañic tsiʼ wen tajayob eʼtel, pero tsaʼʌch i yubiyob bajcheʼ tsiʼ cʌntayob Jehová yicʼot tsiʼ qʼueleyob i coltaya jiñi hermanojob. Anquese ti ñaxan tsaʼʌch i yubiyob i chʼijyemlel, Oleg miʼ yʌl: «Cheʼ tsaʼ c chʌn chaʼle lon subtʼan tsiʼ coltayon lojon chaʼan ñaxan mi cʌcʼ lojon jiñi ñumen ñuc bʌ i cʼʌjñibal». Ili xñujpuñel maʼañic tsiʼ cʌyʌ subtʼan anquese maʼañobic i yeʼtel.

¹⁰ Ti jumpʼejl bʌ qʼuin, cheʼ bʌ sujtelix mucʼob ti subtʼan, juntiquil xchumtʌl tiʼ subeyob chaʼan tsajñi juntiquilob i yamigo i tsiʼ cʌybeyob chaʼpʼejl bolsa bʌlñʌcʼʌl, jiñi i yamigojob tsiʼ chaʼle xʌmbal 160 kilómetro chaʼan miʼ cʼotel yaʼi. Oleg miʼ yʌl: «Ti jimbʌ qʼuin tsaʼ lon j qʼuele chaʼan Jehová mucʼʌch i wen ñaʼtañon lojon, cheʼ jaʼel jiñi congregación. Wen cujil lojon chaʼan Jehová maʼañic miʼ wis ñajʌyel i chaʼan i wiñicob, anquese tajol mi laj qʼuel chaʼan lac bajñel jach» (Mat. 6:33).

11. ¿Chuqui mi caj i mel Jehová mi ñaxañʌch mi la cʌcʼ chuqui yom?

 ¹¹ Jehová yom chaʼan mi lac sutqʼuiñob ti xñoptʼan yambʌ lac piʼʌlob. Cheʼ bajcheʼ tsaʼ laj qʼuele yaʼ ti  párrafo 7, Ageo tiʼ sube jiñi judíojob chaʼan miʼ chaʼ melob jiñi templo i miʼ ñajʌtesañob jiñi jabil tac ñumeñix bʌ cheʼ bʌ maʼañic chuqui tsiʼ meleyob. Mi cheʼʌch miʼ melob bajcheʼ jiñi, Jehová mi caj i yʌqʼueñob i bendición (Hag. 2:18, 19). Joñonla jaʼel miʼ mejlel lac ñop chaʼan Jehová mi caj i yʌqʼueñonla i bendición mi ñaxañʌch mi la cʌcʼ ti laj cuxtʌlel jiñi subtʼan.

12. ¿Chucoch Esdras yicʼot jiñi judíojob tsaʼ bʌ majliyob ti Jerusalén yomʌch miʼ ñopob ti Jehová?

¹² Cheʼ ti jabil 468, Esdras tsaʼ majli ti Babilonia yicʼot yambʌ junmojt judíojob. Yomʌch miʼ ñopob ti Jehová chaʼan miʼ majlelob come bʌbʌqʼuen baqui mi caj i ñumelob, i cheʼ jaʼel miʼ mejlel i tajob xujchʼob. Cheʼto jaʼel woliʼ cuchob majlel oro yicʼot plata muʼ bʌ caj i cʼʌjñel yaʼ ti templo (Esd. 7:12-16; 8:31). I cheʼ bʌ yaʼix añob ti Jerusalén tsiʼ qʼueleyob chaʼan bʌbʌqʼuen come maxto añic cabʌl xchumtʌlob, i cheʼ jaʼel, jiñi muro yicʼot jiñi puerta laj jejmen. ¿Bajcheʼ miʼ coltañonla jiñi ejemplo chaʼan Esdras chaʼan mi lac ñumen ñop ti Jehová?

13. ¿Chuqui tsiʼ colta Esdras chaʼan miʼ ñumen ñop ti Jehová? (Qʼuele jaʼel jiñi nota).

¹³ Esdras qʼuelbilix i chaʼan bajcheʼ Jehová tsiʼ colta i tejclum cheʼ bʌ an ti wocol. Cheʼ ti jabil 484, jiñi rey Asuero tsiʼ yʌcʼʌ i tʼan chaʼan miʼ jisʌntel jiñi judíojob chumuloʼ bʌ ti Persia yicʼot ti jiñi tejclum tac am bʌ tiʼ cʼʌb. I ti jimbʌ ora, tajol Esdras yaʼ chumul ti Babilonia (Est. 3:7, 13-15). Jin chaʼan añʌch ti wocol jaʼel. Cheʼ bʌ jiñi judíojob tsiʼ yubiyob iliyi, wen chʼijyem tsiʼ yubiyob i bʌ i tsaʼto i cʌyʌ i cʼuxob i waj, tsiʼ cʼajtibeyob i coltaya Jehová ti wocol tʼan (Est. 4:3). Pero ti wiʼil, jiñi yom bʌ i jisañob jiñi judíojob jiñʌch tsaʼ bʌ jisʌntiyob. ¡Ñaʼtancu bajcheʼ yubil tsiʼ yubi Esdras yicʼot jiñi yambʌ judíojob cheʼ bʌ tsiʼ yubiyob iliyi! (Est. 9:1, 2). Jiñi tsaʼ bʌ i ñusa Esdras tsiʼ chajpa chaʼan jiñi yambʌ wocol tac muʼ bʌ caj i ñusan, i tsiʼ colta i ñumen ñop chaʼan Jehová mucʼʌch i mejlel i cʌntan i tejclum. c

14. ¿Chuqui tsiʼ cʌñʌ juntiquil hermana cheʼ maʼañic i yeʼtel?

¹⁴ Cheʼ bʌ mi laj qʼuel bajcheʼ miʼ cʌntañonla Jehová cheʼ mi lac ñusan wocol, miʼ ñumen pʼʌtʼan jiñi lac ñopoñel. Jiñʌch tsaʼ bʌ ujti tiʼ tojlel Anastasia, juntiquil hermana chumul bʌ ti Europa del Este. Jiñi i piʼʌlob ti eʼtel woliʼ xicʼob chaʼan miʼ yotsan i bʌ ti política, i jin chaʼan tsiʼ cʌyʌ jiñi i yeʼtel. Anastasia miʼ yʌl: «Cʼʌlʌl ti jimbʌ ora maʼañic baʼ c ñusa cheʼ maʼañic c taqʼuin, jin chaʼan tsaʼ c sube Jehová jiñi woli bʌ c ñusan, i tsaʼ j qʼuele chaʼan tsaʼʌch i cʌntayon. Mi tsaʼ c chaʼ sʌtʌ queʼtel maʼañic mi caj c chaʼlen bʌqʼuen, cujil chaʼan Jehová mi caj i cʌntañon tiʼ pejtelel ora».

15. ¿Chuqui tsiʼ colta Esdras chaʼan miʼ bej ñop ti Jehová? (Esdras 7:27, 28).

¹⁵ Esdras tsiʼ qʼuele bajcheʼ an i colta Jehová. Esdras tsiʼ wen ñaʼta bajcheʼ an i colta Jehová tiʼ cuxtʌlel, i jin chaʼan tsiʼ ñumen ñopo tiʼ tojlel. Jin chaʼan tsiʼ yʌlʌ: «Tsiʼ wen coltayon Dios» (pejcan Esdras 7:27, 28).  I mach junsujtelic jach tsiʼ yʌlʌ cheʼ tac bʌ tʼan bajcheʼ ili (Esd. 7:6, 9; 8:18, 22, 31).

16. ¿Baqui ora miʼ mejlel lac ñumen qʼuel chaʼan Jehová mucʼʌch i coltañonla? (Qʼuele jaʼel jiñi foto tac).

¹⁶ Jehová miʼ mejlel i coltañonla cheʼ mi lac ñusan yambʌ wocol tac. Jumpʼejl ejemplo, tajol yom mi laj cʼajtiben permiso jiñi lac yum ti eʼtel chaʼan mi lac majlel ti colem tempa bʌ. O chaʼan mi laj qʼuextan i yorajlel bajcheʼ mi caj lac chaʼlen eʼtel chaʼan maʼañic mi lac sʌt lac tempa bʌ. Cheʼ bʌ miʼ yujtel iliyi, miʼ mejlel laj qʼuel bajcheʼ miʼ coltañonla Jehová. Tajol toj sajtel lac pusicʼal cheʼ bʌ mi laj qʼuel chuqui miʼ yujtel, i cheʼ bajcheʼ jiñi mi lac ñumen ñop ti Jehová.

17. ¿Bajcheʼ la cujil chaʼan Esdras tsaʼʌch i pʌsʌ i pecʼlel? (Qʼuele jiñi dibujo am bʌ tiʼ tejchibal).

¹⁷ Esdras tsiʼ pʌsʌ i pecʼlel i tsiʼ cʼajtibe i coltaya Jehová. Cheʼ bʌ Esdras mach mejlix i tsʼʌctesan i yeʼtel miʼ yubin, miʼ pejcan Jehová chaʼan miʼ cʼajtiben i coltaya (Esd. 8:21-23; 9:3-5). I cheʼ bʌ jiñi yañoʼ bʌ tsiʼ qʼueleyob chaʼan mucʼʌch i wen ñop ti Jehová, tsiʼ yʌqʼueyob i coltaya i tsiʼ pʌsʌyob i ñopoñel jaʼel (Esd. 10:1-4). Mi woli lac wen chaʼlen pensar tiʼ caj maʼañic mi lac wen taj taqʼuin o chaʼan bajcheʼ mi caj laj cʌntan lac familia, laʼ lac pejcan Jehová ti oración i laʼ lac ñop chaʼan mucʼʌch caj i coltañonla.

18. ¿Chuqui mi caj i coltañonla lac ñumen ñop ti Jehová?

¹⁸ Mi mucʼʌch lac pʌs lac pecʼlel i mi laj cʼajtiben i coltaya Jehová, mi caj lac ñumen ñop tiʼ tojlel. Cheʼ jaʼel, yom mi laj cʌy chaʼan jiñi hermanojob mi coltañoñobla. Erika, juntiquil hermana am bʌ uxtiquil i yalobil, maʼañic tsiʼ cʌyʌ i ñop ti Jehová anquese tsiʼ ñusa tsʌts tac bʌ wocol. Ili hermana tsaʼ chʌmi i yalʌ chʼoc cʌntʌbilto bʌ i chaʼan, i cheʼ jaʼel tsaʼ chʌmi i ñoxiʼal. Miʼ yʌl: «Maʼañic miʼ mejlel lac ñaʼtan bajcheʼ mi caj i coltañonla Jehová, i an i tajol mach pijtʌbilic lac chaʼan bajcheʼ miʼ mel. An j qʼuele chaʼan jiñi am bʌ i yʌlʌyob o am bʌ i meleyob jiñi camigojob, jiñʌch i jacʼbal jiñi coración tac. I cheʼ mic subeñob chuqui woli c ñusan, mach wocolic miʼ yubiñob chaʼan miʼ coltañoñob».

19, 20. ¿Chuqui mi laj cʌn tiʼ tojlel jiñi judíojob yaʼ bʌ tsaʼ cʌyleyob ti Babilonia?

¹⁹ Añʌch chuqui miʼ mejlel laj cʌn jaʼel tiʼ tojlelob jiñi judíojob yaʼ bʌ tsaʼ cʌyleyob ti Babilonia, tajol come ñoxobix, cʼamob o maʼañic tsaʼ mejliyob ti majlel. Anquese  cheʼ bajcheʼ jiñi, tsaʼʌch i coltayob jiñi tsaʼ bʌ sujtiyob majlel ti Jerusalén (Esd. 1:5, 6). I cheʼ bʌ ñumeñix 19 jab, ili judíojob tsaʼ bʌ cʌyleyob ti Babilonia muʼto i bej chocob majlel coltaya ti Jerusalén (Zac. 6:10).

²⁰ Anquese maʼañic miʼ mejlel lac melben i yeʼtel Jehová bajcheʼ cʼamel mi lac mulan, miʼ mejlel lac ñop chaʼan Dios miʼ qʼuel ti ñuc jiñi muʼ bʌ lac mel tiʼ tojlel. ¿Bajcheʼ la cujil? Jehová tiʼ sube jiñi xʼaltʼan Zacarías chaʼan miʼ cʼʌn jiñi oro yicʼot plata tsaʼ bʌ i yʌcʼʌyob jiñi judíojob añoʼ bʌ ti Babilonia chaʼan miʼ mel jumpʼejl corona (Zac. 6:11). Ili corona mi caj i yʌqʼueñob i ñaʼtan jiñi i yutslel tsaʼ bʌ i pʌsʌyob jiñi yaʼ bʌ tsaʼ cʌyleyob ti Babilonia (Zac. 6:14). Ili miʼ pʌsbeñonla chaʼan Jehová maʼañic miʼ wis ñajʌyel i chaʼan cheʼ mi lac chaʼlen wersa lac melben i yeʼtel anquese an wocol tac (Heb. 6:10).

21. ¿Chuqui mi caj i coltañonla chaʼan maʼañic mi lac bʌcʼñan muʼ bʌ caj i yujtel ti talto bʌ qʼuin?

²¹ La cujil chaʼan ti ili cojix tac bʌ qʼuin wocol mi caj lac ñusan, i muʼto caj i ñumen tsʌtsʼan (2 Tim. 3:1, 13). Pero mach yomic mi lac chaʼlen pensar, laʼ laj cʼajtesan tsaʼ bʌ i sube Jehová jiñi i wiñicob tiʼ yorajlel Ageo: «Añon quicʼotetla [ . . . ] mach laʼ chaʼlen bʌqʼuen» (Hag. 2:4, 5). Miʼ mejlel lac ñop jaʼel chaʼan mi mucʼʌch lac chaʼlen wersa lac mel chuqui yom Jehová, mi caj i coltañonla. Mi mucʼʌch lac jacʼ tsaʼ bʌ laj cʌñʌ ti chuqui tsiʼ yʌlʌ Ageo yicʼot Zacarías, yicʼot tiʼ yejemplo Esdras, mi caj lac chʌn ñop ti Jehová, mach yʌlʌyic chuqui miʼ yujtel.