CHEʼ tsaʼic majliyet yaʼ ti isla Sangir Besar (Indonesia) cheʼ bʌ maxto tejchemic jiñi pandemia, tajol tsaʼ taja a qʼuel uxtiquil hermanajob yaʼ ti playa. Anquese cʌmbilob chaʼan miʼ coltañob lac piʼʌlob chaʼan miʼ chʼʌmbeñob i sujm muʼ bʌ i yʌl jiñi Biblia, muʼ bʌ i melob yaʼ ti playa mach jiñic jiñi subtʼan. ¿I chuqui miʼ melob?

Ñaxan, miʼ majlelob yaʼ ti tiʼ mar chaʼan miʼ sʌclañob xajlel cheʼ tac bʌ ñojel bajcheʼ jumpʼejl pelota chaʼan fútbol, i miʼ cuchob loqʼuel. Cheʼ jiñi, miʼ majlelob ti buchtʌl ti jumpʼejl alʌ silla chaʼan miʼ bicʼtesañob ti martillo jiñi xajlel. Ti wiʼil, miʼ yotsañob ti cubeta i miʼ chʼʌmob majlel tiʼ yotot. Yaʼi, miʼ lotob ti coxtal i miʼ ñumel jumpʼejl colem carro chaʼan miʼ chʼʌm majlel yaʼ baqui miʼ mejlel carretera.

Juntiquil jiñi hermana jiñʌch Hulda, ñumen jal bʌ miʼ chaʼlen eʼtel (troñel) yaʼ ti playa. Jiñi taqʼuin muʼ bʌ i taj miʼ cʼʌn chaʼan miʼ coltan i familia. Pero Hulda an chuqui yom i mʌn: Jumpʼejl tableta chaʼan miʼ mejlel ti ochel yaʼ ti aplicación JW Library^®. Yujil chaʼan jiñi video tac yicʼot jiñi información am bʌ yaʼ ti aplicación mi caj i coltan chaʼan miʼ ñumen weñʼesan i subtʼan yicʼot chaʼan miʼ ñumen chʼʌmben i sujm jiñi Biblia.

Hulda tsiʼ chaʼle eʼtel jumpʼejl uw yicʼot ojlil, chaʼpʼejl ora jujumpʼejl sʌcʼan. Cheʼ bajcheʼ jiñi tsaʼ mejli i tempan ti on jiñi xajlel, tsiʼ choño i tsaʼ mejli i mʌn jiñi i tableta.

Hulda tsiʼ yʌlʌ: «Anquese tsaʼʌch wen lujbʼayon ti topʼ xajlel yicʼot cʼux wochʼan tsaʼ cʌyleyon, cheʼ tsaʼ j qʼuele chaʼan ñumen wen mic chaʼlen subtʼan yicʼot ñumen ora mic chajpan c bʌ chaʼan jiñi tempa bʌ tac, tsaʼ ñajʌyi c chaʼan jiñi lujbel». Cheʼ jaʼel, tsiʼ yʌlʌ chaʼan jiñi tableta tsiʼ colta cheʼ bʌ tsaʼ tejchi jiñi pandemia, cheʼ bʌ jiñi subtʼan yicʼot jiñi tempa bʌ tac ti videollamada jach miʼ mejlel. ¡Wen tijicña mi la cubin cheʼ jiñi hermana Hulda tsaʼʌch mejli i taj jiñi yom bʌ!