1. ¿Chuqui tiʼ sube jiñi xʼaltʼan Isaías jiñi israelitajob?

 JIÑI xʼaltʼan Isaías tsiʼ yʌlʌ chaʼan Jehová jiñʌch «jiñi Dios i sujm bʌ chuqui miʼ yʌl». Jiñi tʼan muʼ bʌ i chaʼlentel ti traducir bajcheʼ «i sujm bʌ», ti hebreo jiñʌch «amén» (Is. 65:16, TNM). Amén yom i yʌl «cheʼʌchi» o «muʼ bʌ i mejlel lac ñop». Yaʼ ti Biblia miʼ wen cʼʌjñel ili tʼan chaʼan miʼ pʌstʌl chaʼan pejtelel chuqui miʼ yʌl o muʼ bʌ i mel Jehová yicʼot Jesús, i sujmʌch. Jin chaʼan, tsaʼ bʌ i yʌlʌ Isaías tsiʼ pʌsbe jiñi israelitajob chaʼan pejtelel chuqui miʼ yʌl Jehová mucʼʌch i tsʼʌctiyel. Jehová an i pʌsʌ chaʼan cheʼʌchi, come an i tsʼʌctesa jiñi albil tac bʌ i chaʼan.

2. ¿Chucoch miʼ mejlel lac ñop pejtelel jiñi albil bʌ i chaʼan Jehová? ¿Chuqui ti cʼajtiya mi caj lac jacʼ ti ili estudio?

² ¿Ixcu joñonla? ¿Muʼ ba i mejlel lac ñop jiñi am bʌ i yʌlʌ Jehová chaʼan jiñi talto bʌ qʼuin? Cheʼ bʌ añix 800 jab tsaʼ chumle jiñi xʼaltʼan Isaías, jiñi apóstol Pablo tsiʼ yʌlʌ chucoch miʼ mejlel lac ñop chaʼan pejtelel jiñi am bʌ i yʌlʌ Jehová mi caj i tsʼʌctiyel. Tsiʼ yʌlʌ: «Dios mach mejlic ti lot» (Heb. 6:18).  Laʼcu lac ñaʼtan iliyi, ¿muʼ ba i loqʼuel ticʌw bʌ jaʼ yaʼ baqui miʼ pasel jaʼ? Maʼañic, joy ora tsʌwan miʼ loqʼuel. Cheʼ jaʼel, Jehová, muʼ bʌ i yʌl chuqui i sujm, mach mejlic i yʌl mach tac bʌ i sujmic. Jin chaʼan, miʼ mejlel lac ñop chaʼan pejtelel am bʌ i yʌlʌ mucʼʌch caj i tsʼʌctiyel. Ti ili estudio mi caj lac jacʼ ili cʼajtiya tac: ¿Chuqui jiñi am bʌ i yʌlʌ Jehová chaʼan mi caj i mel ti talto bʌ qʼuin? ¿Bajcheʼ an i pʌsʌ chaʼan mucʼʌch caj i tsʼʌctesan i tʼan?

3. a) ¿Baqui bʌ junchajp albil bʌ i chaʼan Jehová mi lac wen qʼuel ti ñuc? (Apocalipsis 21:3, 4). b) ¿Chuqui miʼ yʌlob chaʼtiqui uxtiquilob cheʼ bʌ mi lac pejcʌbeñob ili texto?

³ An junchajp albil bʌ i chaʼan Jehová muʼ bʌ lac wen qʼuel ti ñuc (pejcan Apocalipsis 21:3, 4). Jehová an i yʌcʼʌ i tʼan chaʼan «maʼañix miʼ cajel chʌmel, mi muqʼuicto i cajel chʼijyemlel, uqʼuel yicʼot cʼuxyajiyel». Ili texto mi lac wen cʼʌn ti subtʼan chaʼan mi lac ñuqʼuesʌben i pusicʼal lac piʼʌlob i mi lac subeñob bajcheʼ yilal mi caj lac chumtʌl yaʼ ti Paraíso. Pero ¿chuqui miʼ yʌlob chaʼtiqui uxtiquilob cheʼ bʌ miʼ yubiñob iliyi? An muʼ bʌ i yʌlob: «¿Muqʼuixto caj i tsʼʌctiyel maʼ wʌl?».

4. a) ¿Baqui bʌ chaʼchajp yujil bʌ Jehová? b) ¿Chucoch miʼ mejlel lac ñop jiñi am bʌ i yʌlʌ Jehová?

⁴ Cheʼ bʌ Jehová tsiʼ yʌcʼʌ chaʼan jiñi apóstol Juan miʼ tsʼijbun ili tʼan tac, yujil chaʼan mi caj laj cʼʌn ti subtʼan. Cheʼ jaʼel, yujil chaʼan cabʌl lac piʼʌlob maʼañic mi caj i ñopob iliyi (Is. 42:9; 60:2; 2 Cor. 4:3, 4). Jin chaʼan, ¿chuqui miʼ mejlel lac mel chaʼan mi laj coltan yambʌlob chaʼan miʼ ñopob chuqui miʼ yʌl Apocalipsis 21:3, 4? ¿I chuqui miʼ mejlel lac mel chaʼan mi lac ñumen ñop jiñi albil tac bʌ i chaʼan Jehová? Jehová mach cojach tiʼ subeyonla muʼ bʌ caj i mel ti talto bʌ qʼuin, an tacʌch jaʼel chuqui miʼ pʌsbeñonla chaʼan mucʼʌch caj i tsʼʌctiyel. ¿Baqui tac bʌ?

5. ¿Baqui bʌ texto miʼ pʌsbeñonla chaʼan mucʼʌch caj i tsʼʌctiyel jiñi albil bʌ i chaʼan Jehová, i chuqui miʼ yʌl?

⁵ Jiñi libro chaʼan Apocalipsis miʼ pʌsbeñonla chaʼan miʼ mejlel lac ñop chaʼan mucʼʌch caj i tsʼʌctiyel pejtelel albil bʌ i chaʼan Jehová, yaʼi miʼ yʌl: «Jiñi yaʼ bʌ buchul ti trono tsiʼ yʌlʌ: ‹¡Qʼuele! Woli c tsijibtesan pejtelel chuqui an›. Tsiʼ yʌlʌ jaʼel: ‹Tsʼijbun ili tʼan tac, come xucʼulʌch yicʼot i sujmʌch›. I tiʼ subeyon: ‹¡Tsaʼix tsʼʌctiyi! Joñon jiñi i Tejchibal yicʼot i Yujtibal›» (Apoc. 21:5, 6a).

6. ¿Bajcheʼ miʼ coltañonla muʼ bʌ i yʌl Apocalipsis 21:5, 6 chaʼan mi lac ñumen ñop jiñi albil bʌ i chaʼan Jehová?

⁶ ¿Chucoch miʼ coltañonla ili texto chaʼan mi lac ñumen ñop jiñi am bʌ i yʌlʌ Jehová? Jiñi libro Apocalipsis b miʼ yʌl chaʼan ti ili versículo tac «lajal bajcheʼ Jehová woliʼ chaʼlen ti firmar jumpʼejl jun i bajcheʼ jiñi miʼ pʌs chaʼan mucʼʌch caj i tsʼʌctesan i tʼan». Ti Apocalipsis 21:3, 4 mi lac taj jiñi albil bʌ i chaʼan Jehová, i yaʼ ti versículo 5 yicʼot 6, lajal bajcheʼ Jehová woli (choncol) i yʌcʼ i firma chaʼan miʼ pʌsbeñonla chaʼan mucʼʌch caj i tsʼʌctesan jiñi tsaʼix bʌ i yʌlʌ. Wʌle laʼ lac ñumen qʼuel tsaʼ tac bʌ i yʌlʌ Jehová ti ili versículo tac.

7. ¿Chuqui miʼ tech i yʌl jiñi versículo 5, i chucoch ñuc i cʼʌjñibal iliyi?

⁷ Ti Apocalipsis 21:5a, miʼ yʌl: «Jiñi yaʼ bʌ buchul ti trono tsiʼ yʌlʌ». Ili tʼan tac wen ñucʌch i cʼʌjñibal, ¿chucoch? Come yaʼ ti libro chaʼan Apocalipsis cojach uxyajl miʼ tilel baqui jin Jehová muʼ bʌ i chaʼlen tʼan, ili jiñʌch jumpʼejl. Mach juntiquilic ángel jiñi woli bʌ (yʌquel bʌ) ti tʼan, mi jiñic Jesús. Jin chaʼan  miʼ mejlel lac ñop chaʼan i sujmʌch chuqui miʼ yʌl, come Jehová jiñʌch «jiñi Dios mach bʌ añic miʼ mejlel ti lot» (Tito 1:2).

8. ¿Bajcheʼ la cujil chaʼan Jehová mucʼʌch caj i tsʼʌctesan i tʼan? (Isaías 46:10).

⁸ Jiñi yambʌ tʼan muʼ bʌ i tilel ti Apocalipsis 21:5 jiñʌch: «¡Qʼuele!». Ili tʼan am bʌ ti griego miʼ wen tilel ti Apocalipsis. Miʼ yʌjlel chaʼan ili tʼan miʼ cʼʌjñel chaʼan miʼ subentel jiñi woli bʌ i pejcan jun chaʼan miʼ wen qʼuel jiñi muʼ bʌ caj i yʌjlel. ¿I chuqui jiñi muʼ bʌ i bej ajlel? Jehová miʼ yʌl: «Woli c tsijibtesan pejtelel chuqui an». Anquese woli bʌ i yʌl Jehová ti talto bʌ qʼuin miʼ cajel, yujil chaʼan mucʼʌch caj i tsʼʌctesan. Jin chaʼan cheʼ bʌ miʼ yʌl, lajal bajcheʼ wolix i mel (pejcan Isaías 46:10).

9. a) ¿Chuqui miʼ yʌqʼueñonla lac ñaʼtan jiñi tʼan «tsijibtesan pejtelel chuqui an»? b) ¿Chuqui mi caj i chaʼlen jiñi «panchan» yicʼot «pañimil» am bʌ ili ora?

⁹ Wʌle laʼ laj qʼuel yambʌ muʼ bʌ i yʌl jiñi versículo 5: «Tsijibtesan pejtelel chuqui an». Ili tʼan tac miʼ yʌqʼueñonla lac ñaʼtan chaʼchajp chuqui mi caj i mel Jehová: Mi caj i qʼuextan yicʼot i tsijibtesan chuqui an. Ñaxan, laʼ la cʌl jiñi muʼ bʌ caj i qʼuextan. Ti Apocalipsis 21:1 miʼ yʌl: «Jiñi panchan yicʼot jiñi pañimil am bʌ ti ñaxan tsaʼix jili». «Jiñi panchan am bʌ ti ñaxan» jiñʌch jiñi yumʌlob añoʼ bʌ tiʼ cʼʌb Satanás yicʼot i xibajob (Mat. 4:8, 9; 1 Juan 5:19). Yaʼ ti Biblia, cheʼ bʌ miʼ cʼʌjñel jiñi tʼan pañimil an i tajol miʼ taj ti tʼan jiñi lac piʼʌlob (Gn. 11:1; Sal. 96:1). Jin chaʼan, «jiñi pañimil am bʌ ti ñaxan» jiñʌch jiñi jontol bʌ (maña bʌ) lac piʼʌlob añoʼ bʌ ili ora. Jehová mi caj i junyajl jisan jiñi panchan yicʼot pañimil, ili yom i yʌl, jiñi yumʌlob añoʼ bʌ ili ora yicʼot jiñi jontol bʌ lac piʼʌlob. I mi caj i yotsan ti qʼuexol «jumpʼejl tsijiʼ bʌ panchan yicʼot jumpʼejl tsijiʼ bʌ pañimil», ili yom i yʌl, jumpʼejl tsijiʼ bʌ yumʌl yicʼot utsoʼ bʌ lac piʼʌlob.

10. ¿Chuqui jiñi muʼ bʌ caj i tsijibtesan Jehová?

¹⁰ ¿Chuqui yambʌ mi caj i mel Jehová chaʼan miʼ «tsijibtesan pejtelel chuqui an»? (Apoc. 21:5). Jehová mi caj i chaʼ tsijibtesan ili Pañimil, i jiñi muʼ bʌ caj i chumtʌlob yaʼi mach xmulilobix. Cheʼ bajcheʼ tsiʼ wʌn alʌ jiñi xʼaltʼan Isaías, pejtelel ili Pañimil mi caj i sujtel ti jumpʼejl paraíso. Miʼ mejlel la cʌl chaʼan joñonla jaʼel mi caj lac chaʼ tsijibtesʌntel come Jehová mi caj i lajmesan pejtelel jiñi cʼamʌjel tac, mi caj i cʼoqʼuesan jiñi mach bʌ añic miʼ mejlelob ti xʌmbal, jiñi xpotsʼob yicʼot jiñi xcojcob, i cheʼto jaʼel mi caj i chaʼ chʼojyesan jiñi chʌmeñobix bʌ (Is. 25:8; 35:1-7).

11. ¿Chuqui tsaʼ subenti i mel Juan, i chucoch?

¹¹ ¿Chuqui yambʌ tsiʼ yʌlʌ Jehová muʼ bʌ i pʌsbeñonla chaʼan mucʼʌch caj i tsʼʌctesan i tʼan? Jehová tiʼ sube Juan: «Tsʼijbun ili tʼan tac, come xucʼulʌch yicʼot i sujmʌch» (Apoc. 21:5). Jehová mach tsaʼ jach i sube jiñi apóstol Juan chaʼan miʼ tsʼijbun jiñi tʼan tac, tiʼ sube jaʼel chaʼan yom miʼ tsʼijbun jiñi i tʼan come «xucʼulʌch yicʼot i sujmʌch», mucʼʌch i mejlel lac ñop. Juan tsaʼʌch i jacʼʌ i tiʼ tsʼijbu jiñi tsaʼ i bʌ i sube Jehová. I weñʌch cheʼ tsiʼ mele bajcheʼ jiñi, come ili ora miʼ mejlel lac pejcan muʼ bʌ caj i mel Jehová ti talto bʌ qʼuin.

12. ¿Chucoch miʼ yʌl Jehová chaʼan jiñi albil bʌ i chaʼan tsaʼix tsʼʌctiyi?

¹² Jehová tsiʼ yʌlʌ jaʼel: «¡Tsaʼix tsʼʌctiyi!» (Apoc. 21:6). Tiʼ tojlel Jehová lajal bajcheʼ  tsaʼix tsʼʌctiyi pejtelel albil bʌ i chaʼan chaʼan jiñi Paraíso. I jiñi añʌch i sujmlel, come maʼañic chuqui miʼ mejlel i mʌctan chaʼan miʼ mel chuqui yom. Laʼ laj qʼuel chuqui yambʌ tsiʼ yʌlʌ Jehová muʼ bʌ i coltañonla lac ñumen ñop chaʼan mucʼʌch caj i tsʼʌctesan i tʼan.

13. ¿Chucoch miʼ yʌl Jehová chaʼan jiñʌch «i Tejchibal yicʼot i Yujtibal»?

¹³ Cheʼ bajcheʼ tsaʼix laj qʼuele, yaʼ ti libro chaʼan Apocalipsis Jehová uxsujtel miʼ chaʼlen tʼan, i cheʼ bʌ tsiʼ mele, tsiʼ yʌlʌ: «Joñon jiñi i Tejchibal («Alfa», nota) yicʼot i Yujtibal («Omega», nota)» (Apoc. 1:8; 21:5, 6; 22:13). Ili chaʼpʼejl tʼan, Alfa yicʼot Omega, jiñʌch jiñi ñaxam bʌ yicʼot cojix bʌ letra ti jiñi alfabeto griego. Cheʼ bʌ Jehová tsiʼ yʌlʌ chaʼan jiñʌch «i Tejchibal yicʼot i Yujtibal» miʼ pʌs chaʼan cheʼ bʌ an chuqui miʼ tech i mel mucʼʌch i yujtesan.

14. a) Tsictesan jalix tsiʼ yʌlʌ Jehová jiñi tʼan «Alfa» i baqui ora mi caj i yʌl jiñi tʼan «Omega». b) ¿Chuqui miʼ pʌsbeñonla Génesis 2:1-3?

¹⁴ Cheʼ bʌ Jehová tsaʼ ujti i mel (pʌt) Adán yicʼot Eva, tiʼ subeyob: «Laʼ pʼojliquetla. Butʼula jini pañimil. Cʼʌñʌla» (Gn. 1:28). Cheʼ bʌ Jehová tsiʼ yʌlʌ yom bʌ i mel ila ti Pañimil yicʼot tiʼ tojlel lac piʼʌlob, lajal bajcheʼ tsiʼ yʌlʌ «Alfa». I cheʼ bʌ pejtelel i pʼolbal Adán yicʼot Eva tojobix i tsaʼix i sujtesayob ti jumpʼejl paraíso ili Pañimil, lajal bajcheʼ Jehová mi caj i yʌl «Omega». Cheʼ bʌ Jehová «tsaʼ ujti i mel jini panchan yicʼot pañimil yicʼot pejtelel i bʌl», an chuqui tsiʼ mele muʼ bʌ i pʌsbeñonla chaʼan mucʼʌch caj i tsʼʌctesan jiñi ñaʼtʌbil bʌ i chaʼan. ¿Chuqui tsiʼ mele? Jehová tsiʼ yʌlʌ chaʼan yom chʼujul miʼ qʼuejlel i sietejlel qʼuin (pejcan Génesis 2:1-3). ¿Chuqui yom i yʌl jiñi? Chaʼan jiñi ñaʼtʌbil bʌ i chaʼan Jehová chaʼan ili Pañimil yicʼot lac piʼʌlob mi  caj i junyajlel tsʼʌctiyel tiʼ yujtibal jiñi i sietejlel qʼuin.

15. ¿Chucoch Satanás tajol tsiʼ ñaʼta chaʼan Jehová maʼañix mi caj i mejlel i tsʼʌctesan jiñi ñaʼtʌbil bʌ i chaʼan?

¹⁵ Cheʼ bʌ Adán yicʼot Eva tsiʼ ñusayob tʼan tsaʼ sujtiyob ti xmulil, i jin chaʼan jiñi i pʼolbalob xmulilob jaʼel (Rom. 5:12). ¿Muʼ ba caj i mʌctan jiñi chaʼan Jehová maʼañix miʼ mel chuqui yom ila ti Pañimil? ¿Yom ba i yʌl chaʼan maʼañic baʼ ora mi caj i yʌl «Omega» tiʼ mul Satanás? Tajol Satanás tsiʼ ñaʼta chaʼan junchajp muʼ bʌ i mejlel i mel Jehová jin cheʼ miʼ jisan Adán yicʼot Eva i miʼ chaʼ mel yambʌ wiñic yicʼot xʼixic tojoʼ bʌ chaʼan miʼ tsʼʌctesañob jiñi ñaʼtʌbil bʌ i chaʼan. Pero cheʼ tsaʼic i mele Jehová jiñi, Satanás tsaʼ mejli i yʌl chaʼan juntiquilʌch xlot. ¿Chucoch? Come cheʼ bajcheʼ miʼ yʌl Génesis 1:28, Jehová tiʼ sube Adán yicʼot Eva chaʼan jiñʌch jiñi i pʼolbalob muʼ bʌ caj i butʼob ili Pañimil.

16. ¿Chucoch Satanás tajol tsiʼ ñaʼta chaʼan Jehová maʼañic mi caj i mejlel i mel chuqui yom?

¹⁶ Tajol Satanás tsiʼ ñaʼta chaʼan Jehová mi caj i cʌy chaʼan Adán yicʼot Eva miʼ yʌcʼob i yalobil, pero chaʼan maʼañic ba ora mi caj i sujtelob ti toj (Ec. 7:20; Rom. 3:23). Cheʼ bajcheʼ jiñi, Satanás miʼ mejlel i yʌl chaʼan Jehová maʼañic baʼ ora mi caj i mejlel i mel chuqui yom, come jiñi Pañimil maʼañic mi caj i bujtʼel ti toj bʌ lac piʼʌlob.

17. ¿Chuqui tsiʼ mele Jehová chaʼan miʼ tojʼesan jiñi wocol tsaʼ bʌ i yotsayob Satanás, Adán yicʼot Eva? ¿Chuqui mi caj i yujtel ti wiʼil? (Qʼuele jaʼel jiñi dibujo).

¹⁷ Toj sajtel i pusicʼal Satanás cheʼ bʌ tsiʼ qʼuele bajcheʼ Jehová tsiʼ tojʼesa jiñi wocol tsaʼ bʌ tejchi tiʼ caj i ñusatʼan Adán yicʼot Eva (Sal. 92:5). Cheʼ bʌ tsiʼ cʌyʌ chaʼan Adán yicʼot Eva miʼ yʌcʼob i yalobil, Jehová tsiʼ pʌsʌ chaʼan mach juntiquilic xlot. Cheʼ jaʼel, tsiʼ pʌsʌ chaʼan mucʼʌch i mejlel i mel chuqui yom come tsiʼ yʌcʼʌ chaʼan miʼ tilel jumpʼejl pʼolbalʌl muʼ bʌ caj i coltan jiñi i yalobilob Adán yicʼot Eva xjacʼtʼañoʼ bʌ. Cheʼ bajcheʼ jiñi, jiñi ñaʼtʌbil bʌ i chaʼan Jehová maʼañic tsaʼ qʼuextʌyi (Gn. 3:15; 22:18). Satanás maʼañic tsaʼ wis ñumi tiʼ jol chaʼan Jehová mi caj i cʼʌn ili pʼolbalʌl chaʼan miʼ tojtʌl lac mul. ¿Chucoch? Come jiñi tsaʼ bʌ i mele Jehová yaʼʌch chucul ti ñuc bʌ i cʼuxbiya, i Satanás maʼañic i chaʼan iliyi (Mat. 20:28; Juan 3:16). Cheʼ jiñi, come tsaʼix tojle lac mul, tiʼ yujtibal jiñi mil jab, jiñi i pʼolbalob Adán yicʼot Eva tsaʼ bʌ i jacʼbeyob i tʼan Jehová yicʼot tojobix bʌ mi caj i chumtʌlob ila ti Pañimil cheʼ bʌ sujtemix ti paraíso, cheʼʌch bajcheʼ  tsiʼ wʌn alʌ Jehová. Ti jimbʌ ora, Jehová mi caj i yʌl: «Omega».

18. ¿Baqui bʌ uxchajp miʼ coltañonla lac ñop muʼ bʌ i yʌl Jehová? (Qʼuele jaʼel jiñi recuadro « Uxchajp muʼ bʌ i coltañonla lac ñop muʼ bʌ i yʌl Jehová»).

¹⁸ Ti ili estudio tsaʼ laj qʼuele chuqui tac miʼ pʌsbeñonla chaʼan ili Pañimil mucʼʌch caj i sujtel ti jumpʼejl paraíso. Jin chaʼan, ¿chuqui miʼ mejlel lac suben yambʌ lac piʼʌlob chaʼan miʼ ñopob chaʼan Dios mucʼʌch caj i tsʼʌctesan i tʼan? Ñaxan, miʼ mejlel lac subeñob chaʼan jiñʌch Jehová muʼ bʌ i yʌcʼ i tʼan, come yaʼ ti Apocalipsis miʼ yʌl: «Jiñi yaʼ bʌ buchul ti trono tsiʼ yʌlʌ: ‹¡Qʼuele! Woli c tsijibtesan pejtelel chuqui an›». Jehová yomʌch i tsʼʌctesan i tʼan, i an i pʼʌtʌlel chaʼan miʼ mel. I chaʼpʼejlel, Jehová yujil chaʼan mucʼʌch caj i tsʼʌctesan i tʼan, tiʼ tojlel, lajal bajcheʼ tsʼʌctiyemix. Jin chaʼan tsiʼ yʌlʌ chaʼan jiñi i tʼan «xucʼulʌch yicʼot i sujmʌch», i miʼ bej al: «¡Tsaʼix tsʼʌctiyi!». Jiñi i yuxpʼejlel, cheʼ bʌ Jehová an chuqui miʼ tech i mel, mucʼʌch i yujtesan. Jin chaʼan miʼ yʌl chaʼan jiñʌch «i Tejchibal yicʼot i Yujtibal». Jehová mi caj i pʌs chaʼan Satanás juntiquilʌch xlot yicʼot chaʼan mach mejlic i mel chuqui yom.

19. ¿Chuqui miʼ mejlel lac mel mi an majqui maʼañic miʼ ñop chaʼan ili Pañimil mi caj i sujtel ti jumpʼejl paraíso?

¹⁹ Cheʼ bʌ mi lac suben yambʌlob chuqui tac miʼ pʌsbeñonla chaʼan Jehová mucʼʌch caj i tsʼʌctesan i tʼan, miʼ coltañonla chaʼan mi lac ñumen ñop. Mi tsaʼ lac pejcʌbe juntiquil lac piʼʌl muʼ bʌ i yʌl Apocalipsis 21:4, i miʼ subeñonla chaʼan maʼañic miʼ ñop chaʼan mi caj i tsʼʌctiyel, miʼ mejlel lac pejcʌben yicʼot lac tsictesʌben muʼ bʌ i yʌl jiñi versículo 5 yicʼot 6. Laʼ lac suben bajcheʼ Jehová an i pʌsʌ chaʼan mucʼʌch caj i tsʼʌctesan i tʼan, chaʼan lajal bajcheʼ tsaʼix i yʌcʼʌ i firma (Is. 65:16).