1, 2. a) ¿Chucoch tsiʼ yʌlʌ jiñi apóstol Pablo chaʼan jiñi cʼuxbiya jiñʌch «ñumen ñuc bʌ»? b) ¿Chuqui ti cʼajtiya tac mi caj lac jacʼ?

 CHEʼ bʌ Pablo tsiʼ taja ti tʼan jiñi lac ñopoñel, lac pijtaya yicʼot jiñi cʼuxbiya, tsiʼ yʌlʌ chaʼan «jiñi ñumen ñuc bʌ tiʼ pejtelel jiñʌch jiñi cʼuxbiya» (1 Cor. 13:13). ¿Chucoch tsiʼ yʌlʌ Pablo iliyi? Come Jehová mi caj i tsʼʌctesan pejtelel chuqui woli bʌ (choncol bʌ) lac pijtan, jin chaʼan mach wersajix jiñi lac ñopoñel yicʼot lac pijtaya. Pero jiñi laj cʼuxbiya maʼañic mi caj i jilel come yomʌch mi caj lac bej cʼuxbin Jehová yicʼot jiñi lac piʼʌlob. I jiñi laj cʼuxbiya mi caj i bej pʼʌtʼan majlel.

² Come yomʌch mi caj lac bej pʌs jiñi cʼuxbiya, mi caj la cʌqʼuen i jacʼbal ili uxpʼejl cʼajtiya: ¿Chucoch yomʌch mi laj cʼuxbin lac bʌ? ¿Bajcheʼ miʼ mejlel lac pʌs chaʼan mucʼʌch laj cʼuxbin lac bʌ? ¿I chuqui miʼ mejlel lac mel chaʼan miʼ ñumen pʼʌtʼan jiñi laj cʼuxbiya?

3. ¿Chucoch yom mi laj cʼuxbin lac bʌ?

³ ¿Chucoch ñuc i cʼʌjñibal cheʼ mi laj cʼuxbin lac bʌ? Junchajp,  come jiñʌch muʼ bʌ i pʌs chaʼan i sujm bʌ xñoptʼañonla. Jesús tsiʼ yʌlʌ: «Cheʼ bajcheʼ iliyi tiʼ pejtelelob mi caj i ñaʼtañob chaʼan xcʌntʼañetla c chaʼan: Mi mucʼʌch laʼ cʼuxbin laʼ bʌ» (Juan 13:35). Yambʌ, come jiñʌch muʼ bʌ i temonla. Jin chaʼan, jiñi apóstol Pablo tsiʼ yʌlʌ: «Come jiñi cʼuxbiya mucʼʌch i tem lac piʼʌlob tiʼ sujm» (Col. 3:14). Cheʼ jaʼel, cheʼ mucʼʌch lac pʌsben laj cʼuxbiya jiñi hermanojob, woli (yʌquel) lac pʌs jaʼel chaʼan mi laj cʼuxbin Jehová. Jiñi apóstol Juan tsiʼ yʌlʌ: «Jiñi muʼ bʌ i cʼuxbin Dios laʼ i cʼuxbin i yermañu jaʼel» (1 Juan 4:21).

4, 5. ¿Bajcheʼ miʼ mejlel lac ñaʼtan mi pʼʌtʌlʌch jiñi laj cʼuxbiya ti Jehová? Acʼʌ jumpʼejl ejemplo.

⁴ ¿Chucoch mi la cʌl chaʼan cheʼ mi laj cʼuxbin jiñi hermanojob woli lac pʌs chaʼan mi laj cʼuxbin Jehová? Laʼcu lac ñaʼtan iliyi: ¿Bajcheʼ miʼ ñaʼtan juntiquil doctor mi weñʌch woli ti eʼtel (troñel) jiñi lac pusicʼal? Junchajp jiñʌch cheʼ miʼ tʌleʼ ti laj cʼʌb jiñi lac chijil chaʼan miʼ yubin bajcheʼ woli ti eʼtel jiñi lac pusicʼal. ¿Bajcheʼ miʼ taj i bʌ ili ejemplo yicʼot jiñi laj cʼuxbiya ti Jehová?

⁵ Lajal bajcheʼ jiñi doctor miʼ ñaʼtan chaʼan weñʌch woli ti eʼtel jiñi lac pusicʼal cheʼ bʌ miʼ tʌleʼ jiñi laj cʼʌb. Joñonla jaʼel miʼ mejlel lac ñaʼtan bajcheʼ an jiñi laj cʼuxbiya ti Jehová cheʼ mi lac ñaʼtan mi wolʌch lac wen cʼuxbin jiñi hermanojob. Mi tsaʼ laj qʼuele chaʼan mach cheʼiqui, yom i yʌl chaʼan jiñi laj cʼuxbiya ti Jehová mach wen pʼʌtʌlic. Pero mi mucʼʌch lac chʌn sʌclan bajcheʼ miʼ mejlel lac pʌsben laj cʼuxbiya jiñi hermanojob, yom i yʌl chaʼan pʼʌtʌlʌch jiñi laj cʼuxbiya ti Jehová.

6. ¿Chucoch yomʌch mi lac pensarin lac bʌ mi mach wen pʼʌtʌlic jiñi laj cʼuxbiya ti la quermañujob? (1 Juan 4:7-9, 11).

⁶ Mi mach wen pʼʌtʌlic jiñi laj cʼuxbiya ti jiñi hermanojob añonla ti jumpʼejl wocol, i yomʌch miʼ yʌcʼonla ti pensar iliyi. ¿Chucoch? Come miʼ mejlel lac ñajtʼesan lac bʌ ti Jehová. Jin chaʼan, jiñi apóstol Juan tsiʼ yʌlʌ: «Jiñi maʼañic bʌ miʼ cʼuxbin i yermañu, muʼ bʌ i taj i qʼuel, maʼañic miʼ mejlel i cʼuxbin Dios, maʼañic bʌ miʼ taj i qʼuel» (1 Juan 4:20). ¿Chuqui miʼ pʌsbeñonla iliyi? Chaʼan Jehová cojach wen mi caj i qʼuelonla mi mucʼʌch laj cʼuxbin lac bʌ (pejcan 1 Juan 4:7-9, 11).

7, 8. ¿Bajcheʼ tac miʼ mejlel lac pʌsben laj cʼuxbiya jiñi hermanojob?

⁷ Jiñi Biblia mach junsujtelic jach miʼ yʌl chaʼan yom mi laj cʼuxbin lac bʌ (Juan 15:12, 17; Rom. 13:8; 1 Tes. 4:9; 1 Ped. 1:22; 1 Juan 4:11). Jiñi cʼuxbiya loqʼuem ti lac pusicʼal i maʼañic majqui miʼ mejlel i qʼuel. Jin chaʼan, ¿bajcheʼ mi caj i ñaʼtan yambʌlob chaʼan mucʼʌch laj cʼuxbiñob? Jiñʌch ti chuqui mi lac mel yicʼot ti chuqui mi la cʌl.

⁸ An cabʌl bajcheʼ miʼ mejlel lac pʌsben laj cʼuxbiya jiñi hermanojob. Jiñi Biblia miʼ yʌl chuqui tac miʼ mejlel lac mel. «Pejcan laʼ bʌ ti isujm» (Zac. 8:16). «Yom an laʼ ñʌchʼtʌlel laʼ wicʼot yambʌlob» (Mar. 9:50). «Jatetla yom mi laʼ ñaxan qʼuel ti ñuc yambʌlob» (Rom. 12:10). «Yom utsʼat mi laʼ chʼʌm laʼ bʌ» (Rom. 15:7). «Chʌn [ . . . ] ñusʌben laʼ bʌ laʼ mul» (Col. 3:13). «Chʌn coltan laʼ bʌ tiʼ chʼʌmol majlel jiñi laʼ cuch» (Gál. 6:2). «Chʌn ñuqʼuesʌben laʼ bʌ laʼ  pusicʼal» (1 Tes. 4:18). «Comol pʼʌtʼesan laʼ bʌ» (1 Tes. 5:11). «Chaʼlenla oración tiʼ tojlel yambʌlob» (Sant. 5:16).

9. ¿Chucoch wolʌch lac pʌs cʼuxbiya cheʼ mi lac ñuqʼuesʌbeñob i pusicʼal yambʌlob? (Qʼuele jaʼel jiñi foto tac).

⁹ Laʼ lac ñumen ñaʼtan junchajp wen ñuc bʌ i cʼʌjñibal bajcheʼ mi lac pʌsben lac bʌ cʼuxbiya. Jiñi apóstol Pablo tsiʼ yʌlʌ: «Chʌn ñuqʼuesʌben laʼ bʌ laʼ pusicʼal». ¿Chucoch ñuc i cʼʌjñibal iliyi? Jumpʼejl libro miʼ yʌl chaʼan jiñi tʼan tsaʼ bʌ i cʼʌñʌ jiñi apóstol Pablo yom i yʌl chaʼan yaʼ waʼal la quicʼot jiñi woli bʌ i ñusan wocol chaʼan mi lac ñuqʼuesʌben i pusicʼal. Cheʼ bʌ mi lac ñuqʼuesʌben i pusicʼal juntiquil la quermañu, woli laj coltan chaʼan miʼ chʌn chaʼlen xʌmbal ti jiñi bij chaʼan bʌ laj cuxtʌlel. Jin chaʼan, cheʼ bʌ yaʼañonla la quicʼot jiñi hermanojob cheʼ bʌ miʼ ñusañob wocol woli lac subeñob chaʼan mi laj cʼuxbiñob (2 Cor. 7:6, 7, 13).

10. ¿Chucoch yom la cujil pʼuntaya chaʼan miʼ mejlel lac ñuqʼuesʌben i pusicʼal yambʌlob?

¹⁰ Chaʼan miʼ mejlel lac ñuqʼuesʌben i pusicʼal yambʌlob yom la cujil pʼuntaya. ¿Chucoch? Come jiñʌch muʼ bʌ i ñijcañonla chaʼan mi laj coltan jiñi woli bʌ i ñusan wocol yicʼot chaʼan mi lac ñuqʼuesʌben i pusicʼal. Cheʼʌch miʼ yujtel tiʼ tojlel Jehová jaʼel. Jin chaʼan, Pablo tsiʼ yʌlʌ chaʼan Jehová «jiñʌch jiñi Tatʌl am bʌ i chaʼan jiñi ñuc bʌ pʼuntaya yicʼot jiñʌch jiñi Dios muʼ bʌ i ñuqʼuesʌben i pusicʼal lac piʼʌlob» (2 Cor. 1:3). Jiñi tsaʼ bʌ i yʌlʌ Pablo miʼ pʌsbeñonla chaʼan jiñi pʼuntaya yaʼʌch tilem ti Jehová i jiñʌch muʼ bʌ i ñijcan chaʼan miʼ coltañonla tiʼ pejtelel lac wocol (2 Cor. 1:4). Lajal bajcheʼ jiñi jaʼ tsʌwan tsʌwam bʌ miʼ tijicñesʌben i pusicʼal jiñi tiquin bʌ i tiʼ, Jehová miʼ tijicñesʌben i pusicʼal jaʼel jiñi woli bʌ i ñusan wocol. ¿Chuqui mi caj i coltañonla chaʼan mi lac pʌs pʼuntaya yicʼot chaʼan mi lac ñuqʼuesʌben i pusicʼal yambʌlob? Laʼ laj qʼuel.

11. Cheʼ bajcheʼ miʼ yʌl Colosenses 3:12 yicʼot 1 Pedro 3:8, ¿baqui tac bʌ melbalʌl mi caj i coltañonla chaʼan mi lac ñumen cʼuxbin yicʼot mi lac ñuqʼuesʌben i pusicʼal jiñi la quermañujob?

¹¹ ¿Chuqui mi caj i coltañonla chaʼan mi lac bej pʌsben cʼuxbiya jiñi hermanojob yicʼot chaʼan mi lac ñuqʼuesʌbeñob i pusicʼal? Yom mi lac ñop la cubin bajcheʼ yubil miʼ yubiñob i bʌ, mi lac pʌs la cutslel yicʼot mi lac pʌs jiñi cʼuxbiya bajcheʼ am bʌ ti jumpʼejl familia (pejcan Colosenses 3:12; 1 Pedro 3:8). Cheʼ mi lac pʌs lac pʼuntaya yicʼot mi lac wen ñaʼtañob jiñi la quermañujob mi caj lac mulan lac ñuqʼuesʌbeñob i pusicʼal cheʼ bʌ miʼ ñusañob wocol. Jesús tsiʼ yʌlʌ: «Ti la quej miʼ loqʼuel chuqui tac an ti lac pusicʼal. Jiñi wem bʌ wiñic miʼ yʌl chuqui tac wen come wen chuqui an tiʼ pusicʼal» (Mat. 12:34, 35). Jin chaʼan, cheʼ bʌ mi lac ñuqʼuesʌbeñob i pusicʼal jiñi la quermañujob jiñʌch junchajp bajcheʼ mi lac pʌs chaʼan mucʼʌch laj cʼuxbiñob.

12. a) ¿Chucoch yom mi laj cʌntan lac bʌ? b) ¿Chuqui ti cʼajtiya mi caj lac jacʼ?

¹² Ti lac pejtelel la com lac jacʼ ili mandar: «Laʼ lac chʌn cʼuxbin lac bʌ» (1 Juan 4:7). Pero mach yomic miʼ ñajʌyel lac chaʼan tsaʼ bʌ i yʌlʌ Jesús: «Mi caj i tsʌñan i cʼuxbiya lʌcʼʌ tiʼ pejtelel  quixtañujob» (Mat. 24:12). Jesús maʼañic tsiʼ yʌlʌ chaʼan jiñi xcʌntʼañob i chaʼan mi caj i cʌy i cʼuxbiñob i bʌ. Pero yom mi laj cʌntan lac bʌ chaʼan mach cheʼic mi lac mel bajcheʼ jiñi lac piʼʌlob maʼañix bʌ miʼ pʌsbeñob i bʌ cʼuxbiya. Jin chaʼan, laʼ la cʌqʼuen i jacʼbal ili cʼajtiya: ¿Bajcheʼ miʼ mejlel lac ñaʼtan mi pʼʌtʌlʌch jiñi laj cʼuxbiya tiʼ tojlel jiñi hermanojob?

13. ¿Bajcheʼ miʼ mejlel lac ñaʼtan mi pʼʌtʌlʌch jiñi laj cʼuxbiya tiʼ tojlel jiñi hermanojob?

¹³ Junchajp muʼ bʌ i coltañonla laj qʼuel mi pʼʌtʌlʌch jiñi laj cʼuxbiya tiʼ tojlel jiñi hermanojob, jiñʌch cheʼ mi lac ñaʼtan chuqui mi lac mel cheʼ bʌ miʼ tajob i sajtemal o miʼ melob mach bʌ weñic ti lac tojlel (2 Cor. 8:8). Jiñi apóstol Pedro tsiʼ yʌlʌ: «Pero ñumen ñuc bʌ i cʼʌjñibal jin cheʼ mi laʼ wen cʼuxbin laʼ bʌ, come jiñi cʼuxbiya miʼ ñusan cabʌl mulil» (1 Ped. 4:8).

14. Cheʼ bajcheʼ miʼ yʌl 1 Pedro 4:8, ¿bajcheʼ yilal yom jiñi laj cʼuxbiya tiʼ tojlel la quermañujob? Acʼʌ jumpʼejl ejemplo.

¹⁴ Jiñi apóstol Pedro tsiʼ yʌlʌ chaʼan yom mi lac wen cʼuxbin lac bʌ. Jiñi tʼan am bʌ ti griego tsaʼ bʌ cʼʌjñi ilayi miʼ yʌcʼ ti ñaʼtʌntel chaʼan an chuqui «miʼ tijchʼel majlel»,  lajal bajcheʼ mi lac tichʼ jumpʼejl pisil chaʼan mi lac mos jiñi mesa chaʼan mach tsiquilic jiñi i bibiʼlel o baqui mach utsʼatic ti qʼuelol. Miʼ mejlel la cʌl chaʼan jiñi cʼuxbiya lajal bajcheʼ jiñi pisil muʼ bʌ i mejlel i mos o i ñusan cabʌl i sajtemal jiñi la quermañujob, mach jumpʼejlic jach.

15. Mi pʼʌtʌlʌch jiñi laj cʼuxbiya tiʼ tojlel yambʌlob, ¿chuqui mi caj lac mel? (Colosenses 3:13).

¹⁵ Mi pʼʌtʌlʌch jiñi laj cʼuxbiya tiʼ tojlel jiñi hermanojob mi caj lac ñusʌbeñob i mul, anquese wocolʌch mi la cubin (pejcan Colosenses 3:13). Mi cheʼʌch mi lac mel mi caj lac pʌs chaʼan pʼʌtʌl jiñi laj cʼuxbiya yicʼot chaʼan la com lac tijicñesan Jehová. ¿Chuqui yambʌ miʼ mejlel i coltañonla chaʼan mi lac ñusʌbeñob i mul jiñi hermanojob?

16, 17. ¿Chuqui yambʌ miʼ mejlel i coltañonla chaʼan mi lac ñusʌben i sajtemal yambʌlob? Alʌ jumpʼejl ejemplo. (Qʼuele jaʼel jiñi foto tac).

¹⁶ Qʼuele chuqui wem bʌ tiʼ tojlel yambʌlob. Ñaʼtancu chaʼan yaʼan a wicʼot yambʌ hermanojob i tijicña woli laʼ ñusan, ti wiʼil mi laʼ locʼsan laʼ bʌ ti foto. Pero ¿chuqui maʼ mel cheʼ bʌ maʼ qʼuel chaʼan mach cʌlʌx weñic tsaʼ loqʼui jumpʼejl foto? Maʼ yʌp, cojach miʼ cʌlel a wicʼot jiñi ñumen wem bʌ.

¹⁷ Jiñi wen tac bʌ chuqui ñusʌbil lac chaʼan la quicʼot jiñi la quermañujob lajalʌch bajcheʼ jumpʼejl wem bʌ foto lotol bʌ  lac chaʼan. Pero mi an juntiquil hermano tsaʼ bʌ i yʌlʌ o i mele mach bʌ weñic. ¿Chuqui mi caj a mel? ¿Muʼ ba caj a chʌn cʼajtesan? Maʼañic (Pr. 19:11; Efes. 4:32). Iliyi lajalʌch bajcheʼ maʼ yʌp jumpʼejl foto mach bʌ weñic. Ñumen wen cheʼ jin jach mi laj cʼajtesan chuqui tac wem bʌ ñusʌbil lac chaʼan.

18. ¿Baqui bʌ jiñi uxchajp tsaʼ bʌ laj cʌñʌ ti ili estudio?

¹⁸ ¿Chucoch la com chaʼan chʌn pʼʌtʌl jiñi laj cʼuxbiya? Come cheʼ mi lac pʌs chaʼan mi laj cʼuxbin jiñi hermanojob woli lac pʌs chaʼan mi laj cʼuxbin Jehová. ¿Bajcheʼ miʼ mejlel lac pʌs jiñi laj cʼuxbiya? Jiñʌch cheʼ bʌ mi lac ñuqʼuesʌbeñob i pusicʼal jiñi hermanojob. I chaʼan mi lac bej mel yomʌch mi lac pʌs lac pʼuntaya. ¿Chuqui miʼ mejlel lac mel chaʼan chʌn pʼʌtʌl jiñi laj cʼuxbiya? Mi lac ñusʌben i mul jiñi yambʌlob.

19. ¿Chucoch wen ñuc i cʼʌjñibal cheʼ mi lac pʌsben lac bʌ cʼuxbiya ili ora?

¹⁹ ¿Chucoch wen ñuc i cʼʌjñibal jiñi cʼuxbiya ili ora? Jiñi apóstol Pedro tsiʼ yʌlʌ: «Tsaʼix lʌcʼtiyi i jilibal pejtelel chuqui an. Jin chaʼan, […] wen cʼuxbin laʼ bʌ» (1 Ped. 4:7, 8). ¿Chuqui mi caj i yujtel cheʼ bʌ wolix i lʌcʼtiyel jiñi i jilibal? Jesús tsiʼ yʌlʌ: «Pejtelel jiñi tejclum tac mi caj i tsʼaʼleñetla tiʼ caj j cʼabaʼ» (Mat. 24:9). Chaʼan mi lac bej melben i yeʼtel Jehová anquese mi lac tsʼaʼlentel, yom chʌn temelonla. Mi mucʼʌch laj cʼuxbin jiñi hermanojob, Satanás maʼañic mi caj i mejlel i tʼoxonla come jiñi cʼuxbiya «mucʼʌch i tem lac piʼʌlob tiʼ sujm» (Col. 3:14; Filip. 2:1, 2).