1, 2. ¿Chucoch an i tajol miʼ mejlel la cubin chaʼan Jehová maʼañic woliʼ jacʼbeñonla la coración?

 «YOM tijicñayet ti lac Yum. Mi caj i yʌqʼueñet chuqui yom a pusicʼal» (Sal. 37:4). ¡Wen utsʼatax ili tʼan tac! Pero ¿yom ba i yʌl iliyi chaʼan Jehová orajach mi caj i yʌqʼueñonla pejtelel muʼ bʌ laj cʼajtiben? Weñʌch cheʼ mi lac ñaʼtan ili cʼajtiya. ¿Chucoch? Ñaʼtancu muʼ bʌ i mejlel ti ujtel. Juntiquil hermana miʼ suben Jehová chaʼan yom majlel ti jiñi Escuela chaʼan Evangelizadores, pero miʼ ñumel cabʌl jab i maʼañic miʼ chaʼlentel ti invitar. Juntiquil xcolel cʼam bʌ miʼ cʼajtiben Jehová chaʼan miʼ cʼoqʼuesan chaʼan miʼ ñumen melben i yeʼtel ti congregación, pero mach cheʼic miʼ yujtel. Juntiquil hermano yicʼot i yijñam miʼ cʼajtiñob ti oración chaʼan jiñi i yalobil maʼañic miʼ ñajtʼesan i bʌ ti Jehová, pero ti wiʼil miʼ cʌy i sujmlel.

² Tajol jatet añix chuqui an a cʼajtibe Jehová, pero maʼañic an i yʌqʼueyet. Jin chaʼan, maʼ ñaʼtan chaʼan Jehová mucʼʌch i jacʼben i yoración yambʌlob, pero a chaʼan bʌ maʼañic. O tajol maʼ ñaʼtan chaʼan maʼañic woli (choncol) i jacʼbeñet come tsaʼ mele mach bʌ weñic. Cheʼʌch tsaʼ ujti juntiquil hermana i cʼabaʼ Janice. b Ili hermana yicʼot i ñoxiʼal tiʼ subeyob Jehová chaʼan yomob majlel ti Betel. Janice miʼ yʌl: «Tsaʼ c ñaʼta chaʼan ti orajach mi caj lon c pʌjyel». Pero tsaʼ ñumi cabʌl jab i maʼañic tsaʼ pʌjyiyob. Miʼ bej al: «Wen chʼijyem tsaʼ cubi c bʌ i maʼañic tsaʼ c ñaʼta chucoch cheʼ woli (yʌquel) i yujtel bajcheʼ  jiñi. Tsaʼ j cʼajtibe c bʌ mi tsaʼ c mele mach bʌ weñic. Cheʼ jaʼel, jamʌ tsiquil chuqui tsaʼ j cʼajtibe Jehová ti coración, jin chaʼan maʼañic mic ñaʼtan chucoch maʼañic woliʼ jacʼ».

3. ¿Chuqui mi caj laj qʼuel ti ili estudio?

³ An i tajol mi laj cʼajtiben lac bʌ: «¿Muqʼuixto ba i ñʌchʼtañon Jehová?». Ti wajali an tsaʼ bʌ i cʼajtibeyob i bʌ iliyi (Job 30:20; Sal. 22:2; Hab. 1:2). ¿Chuqui miʼ mejlel i coltañet a ñop chaʼan Jehová mucʼʌch i jacʼ a woración? (Sal. 65:2). Chaʼan mi lac ñaʼtan, mi caj lac ñaxan aqʼuen i jacʼbal ili uxpʼejl cʼajtiya: 1) ¿Chuqui mi lac pijtan chaʼan miʼ mel Jehová?, 2) ¿chuqui miʼ pijtan Jehová ti lac tojlel? yicʼot 3) ¿chucoch tajol yom mi laj qʼuextan jiñi tsaʼ bʌ laj cʼajti?

4. Cheʼ bajcheʼ miʼ yʌl Jeremías 29:12, ¿chuqui miʼ yʌl Jehová chaʼan mi caj i mel?

⁴ Jehová miʼ yʌcʼ i tʼan chaʼan mi caj i ñʌchʼtan la coración (pejcan Jeremías 29:12). Dios miʼ wen cʼuxbin i wiñicob, i jin chaʼan miʼ ñʌchʼtʌbeñob i yoración (Sal. 10:17; 37:28). Pero ili mach yomic i yʌl chaʼan mi caj i luʼ aqʼueñonla pejtelel muʼ bʌ laj cʼajtiben. Tajol yom mi lac pijtan chaʼan yaʼto ti tsijiʼ bʌ pañimil miʼ yʌqʼueñonla jiñi tsaʼ bʌ laj cʼajtibe.

5. ¿Chuqui miʼ chʼʌm ti ñuc Jehová cheʼ bʌ mi caj i jacʼ la coración?

⁵ Cheʼ bʌ Jehová mi caj i jacʼ la coración miʼ ñaxan chʼʌm ti ñuc jiñi ñaʼtʌbil bʌ i chaʼan (Is. 55:8, 9). ¿I chuqui jiñi ñaʼtʌbil bʌ i chaʼan? Junchajp jiñʌch chaʼan wʌʼ ti Pañimil cojach miʼ chumtʌlob lac piʼʌlob muʼ bʌ i jacʼbeñob i tʼan bajcheʼ yumʌl, i tijicña yicʼot temel miʼ melbeñob i yeʼtel (troñel). Pero Satanás tsiʼ yʌlʌ chaʼan ñumen wen cheʼ joñon jachla mi lac yuman lac bʌ (Gn. 3:1-5). Chaʼan tsiquil miʼ cʌlel chaʼan mach i sujmic tsaʼ bʌ i yʌlʌ Satanás, Jehová tsiʼ cʌyʌ chaʼan jiñi quixtañujob miʼ bajñel yumañob i bʌ, pero an jach i yʌcʼʌ cabʌl wocol (Ec. 8:9). La cujil chaʼan Jehová maʼañic mi caj i tojʼesan pejtelel jiñi wocol ili ora. Cheʼ muqʼuic i mel, an muʼ bʌ i mejlel i ñaʼtañob chaʼan machʌch cʼʌñʌlic mi lac jacʼben i tʼan Dios i chaʼan miʼ mejlel i bajñel tojʼesañob jiñi wocol tac.

6. ¿Chucoch yom mi lac ñop chaʼan Jehová toj chuqui miʼ mel yicʼot chaʼan yujil cʼuxbiya?

⁶ Jehová mach junlajalic bajcheʼ miʼ jacʼ jiñi oración tac anquese lʌcʼʌ lajal muʼ bʌ i cʼajtibentel. Jumpʼejl ejemplo, cheʼ bʌ jiñi rey Ezequías tsaʼ cʼamʼa, tsiʼ cʼajtibe Jehová ti wocol tʼan chaʼan miʼ chaʼ cʼoqʼuesan, i Jehová tsaʼʌch i mele (2 R. 20:1-6). Pero cheʼ bʌ jiñi apóstol Pablo tsiʼ cʼajtibe Jehová chaʼan miʼ locʼsʌben jumpʼejl wocol am bʌ i chaʼan lajal bʌ bajcheʼ chʼix, tajol jumpʼejl cʼamʌjel, Jehová maʼañic tsiʼ mele (2 Cor. 12:7-9). Laʼ laj cʼajtesan jaʼel tsaʼ bʌ ujti tiʼ tojlel Santiago yicʼot Pedro. Jiñi rey Herodes yom i tsʌnsañob. Jiñi congregación tsiʼ chaʼle oración tiʼ tojlel Pedro, i miʼ mejlel la cʌl chaʼan cheʼʌch tsiʼ mele jaʼel tiʼ tojlel Santiago. Pero Santiago tsaʼ tsʌnsʌnti, ¿i chuqui tsaʼ ujti tiʼ tojlel Pedro? Jehová tsiʼ mele jumpʼejl milagro chaʼan miʼ coltan (Hech. 12:1-11). Tajol mi laj cʼajtiben lac bʌ chucoch Jehová tsaʼʌch i colta juntiquil i jiñi yambʌ maʼañic. Anquese jiñi Biblia maʼañic miʼ tsictesan, laʼ cujil chaʼan Jehová maʼañic tsiʼ mele mach bʌ weñic i chaʼan tsaʼʌch i cʼuxbi tiʼ chaʼticlelob (Dt. 32:4; Apoc. 21:14). c Tajol mach cheʼic mi lac jacʼbentel la coración cheʼ bajcheʼ la com, pero maʼañic mi lac ñaʼtan chaʼan mach weñic bajcheʼ woliʼ mel Jehová come la cujil chaʼan toj yicʼot yujil cʼuxbiya (Job 33:13).

7. ¿Chuqui mach bʌ yomic mi lac mel, i chucoch?

 ⁷ Mach yomic mi lac lajeʼ jiñi woli bʌ lac ñusan yicʼot jiñi woli bʌ i ñusan yambʌ. Jumpʼejl ejemplo, tajol an chuqui mi lac jamʌ cʼajtiben Jehová, pero maʼañic miʼ jacʼbeñonla. Ti wiʼil, tajol mi la cubin chaʼan an yambʌ majqui lʌcʼʌ lajal chuqui tsiʼ cʼajti, i Jehová tsaʼʌch jacʼbe yilal. Jiñʌch tsaʼ bʌ ujti tiʼ tojlel juntiquil hermana i cʼabaʼ Anna. Jiñi i ñoxiʼal, Matthew, an i chaʼan cáncer i tsiʼ cʼajtibe Jehová chaʼan miʼ coltan. Ti jimbʌ ora, chaʼtiquil hermanajob ñoxobix bʌ añob i chaʼan cáncer jaʼel, jin chaʼan Anna tsiʼ tajayob ti oración tiʼ yuxticlelob. Ti wiʼil, jiñi chaʼtiquil hermanajob tsaʼʌch lajmiyob, pero Matthew tsaʼ chʌmi. Anna tsiʼ cʼajtibe i bʌ mi Jehová jiñʌch tsaʼ bʌ i colta ili hermanajob chaʼan miʼ chaʼ cʼocʼañob, i mi cheʼ bajcheʼ jiñi chucoch mach cheʼic tsiʼ mele tiʼ tojlel i ñoxiʼal. Mach la cujilic chucoch jiñi hermanajob tsaʼ lajmiyob, pero la cujil bʌ jiñʌch chaʼan Jehová mi caj junyajl jisan pejtelel muʼ bʌ i yʌqʼueñonla lac ñusan wocol yicʼot chaʼan mi caj i chaʼ chʼojyesan jiñi chʌmeñoʼ bʌ (Job 14:15).

8. a) Cheʼ bajcheʼ miʼ yʌl Isaías 43:2, ¿chuqui miʼ mel Jehová chaʼan miʼ coltañonla? b) ¿Bajcheʼ miʼ coltañonla jiñi oración cheʼ bʌ mi lac ñusan tsʌts tac bʌ wocol? (Qʼuele jaʼel jiñi video ¿Bajcheʼ miʼ coltañonla jiñi oración chaʼan maʼañic mi lac lujbʼan?).

⁸ Jehová tiʼ pejtelel ora mi caj i coltañonla. Jehová, jiñi lac Tat, miʼ cʼuxbiñonla i mach yomic chaʼan mi lac ñusan wocol (Is. 63:9). Pero jiñi mach yomic i yʌl chaʼan mi caj i junyajl jisan pejtelel jiñi wocol tac, muʼ bʌ i lajintel yaʼ ti Biblia bajcheʼ jaʼ o cʼajc (pejcan Isaías 43:2). Jehová mucʼʌch caj i coltañonla chaʼan mi lac ñusan jiñi wocol tac yicʼot chaʼan chʌn xucʼul mi la cajñel tiʼ tojlel. Cheʼ jaʼel, mi caj i yʌqʼueñonla chʼujul bʌ i yespíritu (Luc. 11:13; Filip. 4:13). Jin chaʼan, miʼ mejlel lac ñop chaʼan Jehová tiʼ pejtelel ora mi caj i yʌqʼueñonla chuqui i cʼʌjñibal bʌ chaʼan mi laj cuch yicʼot chaʼan chʌn xucʼul mi la cajñel. d

9. Cheʼ bajcheʼ miʼ yʌl Santiago 1:6, 7, ¿chucoch ñuc i cʼʌjñibal mi lac ñop chaʼan Jehová mucʼʌch caj i coltañonla?

⁹ Jehová miʼ pijtan chaʼan mi lac ñop tiʼ tojlel (Heb. 11:6). An i tajol mi lac ñaʼtan chaʼan Jehová maʼañic mi caj i mejlel i coltañonla cheʼ wen wocol woli lac ñusan. Pero jiñi Biblia miʼ subeñonla chaʼan tiʼ coltaya Jehová mi caj i mejlel lac ñusan baqui jach bʌ wocol (Sal. 18:29). Jin chaʼan, mach lac ñaʼtan chaʼan Jehová maʼañic mi caj i coltañonla. Laʼ lac melben oración ti jumpʼejl lac pusicʼal i laʼ lac ñop chaʼan mucʼʌch caj i jacʼ (pejcan Santiago 1:6, 7).

10. Acʼʌ jumpʼejl ejemplo muʼ bʌ i pʌs chuqui yom mi lac mel cheʼ bʌ tsaʼix lac mele oración.

¹⁰ Jehová miʼ pijtan chaʼan an chuqui mi lac mel jaʼel. Laʼcu lac ñaʼtan tiʼ tojlel juntiquil hermano yom bʌ majlel ti colem tempa bʌ i miʼ cʼajtiben i coltaya Jehová chaʼan miʼ yʌqʼuentel permiso tiʼ yeʼtel. ¿Chuqui mi caj i mel Jehová chaʼan miʼ jacʼben i yoración? Tajol mi caj i yʌqʼuen i chʼejlel jiñi hermano chaʼan miʼ pejcan jiñi i yum ti eʼtel, pero jiñʌch jiñi hermano yom bʌ miʼ majlel i pejcan i tajol mach junsujtelic jach mi caj i mel. Tajol miʼ mejlel i suben chaʼan mi caj i qʼuextan i turno yicʼot yambʌ, o chaʼan mach wersajic miʼ tojbentel jiñi qʼuin cheʼ bʌ maʼañic mi caj i cʼotel ti eʼtel.

11. ¿Chucoch yom mi lac chʌn chaʼlen oración?

¹¹ Jehová miʼ pijtan chaʼan maʼañic mi lac lujbʼan laj cʼajtin chuqui la com (1 Tes. 5:17).  Jesús tsiʼ yʌlʌ chaʼan an i tajol mach ti orajic mi caj laj qʼuelben i jacʼbal la coración (Luc. 11:9). Jin chaʼan, mach yomic mi lac lujbʼan. Laʼ lac chʌn cʼajtiben Jehová (Luc. 18:1-7). Cheʼ bʌ mi lac chʌn suben Jehová chuqui la com, woli lac pʌsben chaʼan mach toʼolic chuqui woli laj cʼajtin i chaʼan mi lac ñop chaʼan mucʼʌch caj i coltañonla.

12. a) ¿Chuqui yom bʌ mi laj cʼajtiben lac bʌ, i chucoch? b) ¿Bajcheʼ mi lac pʌs chaʼan mi laj qʼuel ti ñuc Jehová cheʼ bʌ mi lac mel oración? (Qʼuele jaʼel jiñi recuadro « ¿Woli ba c pʌs chaʼan mij qʼuel ti ñuc Jehová cheʼ bʌ mic mel oración?»).

¹² Mi maʼañic tsaʼ jacʼbentiyonla la coración, an uxchajp muʼ bʌ i mejlel laj cʼajtiben lac bʌ. Jiñi ñaxam bʌ jiñʌch: «¿Weñʌch ba jiñi woli bʌ j cʼajtin?». Lʌcʼʌ tiʼ pejtelel ora mi lac ñaʼtan chaʼan la cujil chuqui jiñi ñumen wem bʌ chaʼañonla, pero ti wiʼil tajol miʼ chaʼ ticʼlañonla. Tajol tsaʼ lac sube Jehová chaʼan an bajcheʼ la com chaʼan miʼ tojʼesan jumpʼejl wocol, pero anto ñumen wem bʌ muʼ bʌ i mejlel i mel. Cheʼ jaʼel, tajol jiñi tsaʼ bʌ laj cʼajti maʼañic miʼ taj i bʌ yicʼot chuqui yom bʌ i mel Jehová (1 Juan 5:14). Jumpʼejl ejemplo, laʼ lac chaʼ ñaʼtan tiʼ tojlel jiñi tatʌlob tsaʼ bʌ lac taja ti tʼan ti párrafo 1. Tsiʼ cʼajtibeyob Jehová chaʼan maʼañic miʼ yʌcʼ chaʼan jiñi i yalobil miʼ tʌtsʼ i bʌ tiʼ sujmlel. Weñʌch yilal chuqui tsiʼ cʼajtiyob. Pero tiʼ sujm, Jehová maʼañic miʼ xicʼonla chaʼan mi lac melben i yeʼtel. Yom chaʼan ti bajñel lac pusicʼal miʼ loqʼuel chaʼan mi lac chʼujutesan (Dt. 10:12, 13; 30:19, 20). Jin chaʼan, ¿chuqui miʼ mejlel i cʼajtiñob ili tatʌlob? Miʼ mejlel i subeñob Jehová chaʼan laʼ mejlic i coltañob i yalobil chaʼan miʼ cʼuxbin Jehová i miʼ mulan sujtel tiʼ yamigo (Pr. 22:6; Efes. 6:4).

13. Cheʼ bajcheʼ miʼ yʌl Hebreos 4:16, ¿baqui ora miʼ coltañonla Jehová?

 ¹³ I chaʼpʼejlel cʼajtiya jiñʌch: «¿Muʼ baʼ i ñaʼtan Jehová chaʼan i yorajlelix chaʼan miʼ yʌqʼueñon jiñi tsaʼ bʌ j cʼajtibe?». Tajol mi lac ñaʼtan chaʼan ti ora yom mi la cʌqʼuentel jiñi tsaʼ bʌ laj cʼajti. Pero tiʼ sujm, Jehová yujil baqui bʌ ñumen wem bʌ i yorajlel chaʼan miʼ coltañonla (pejcan Hebreos 4:16). Mi Jehová mach ti orajic miʼ yʌqʼueñonla tsaʼ bʌ laj cʼajti, tajol mi lac ñaʼtan chaʼan woliʼ subeñonla chaʼan maʼañic, pero tajol jiñi yom bʌ i yʌl jiñʌch chaʼan yomto mi lac pijtan. Laʼcu lac chaʼ ñaʼtan jiñi xcolel tsaʼ bʌ i cʼajti chaʼan miʼ lajmel i cʼamʌjel. Cheʼ Jehová tsaʼic i mele iliyi, Satanás tsaʼ mejli i yʌl chaʼan ili chʼiton woli jach i melben i yeʼtel Jehová come tsaʼ cʼoqʼuesʌnti (Job 1:9-11; 2:4). Cheʼ jaʼel, Jehová tsaʼix i yʌqʼue i yorajlel chaʼan miʼ jisan jiñi cʼamʌjel tac, jin chaʼan maʼañic mi lac pijtan chaʼan miʼ lajmesan laj cʼamʌjel ili ora (Is. 33:24; Apoc. 21:3, 4). Cheʼ jiñi, ¿chuqui miʼ mejlel i cʼajtin ili chʼiton? Miʼ mejlel i suben Jehová chaʼan laʼ i yʌqʼuen i pʼʌtʌlel yicʼot i ñʌchʼtʌlel chaʼan miʼ bej melben i yeʼtel anquese an i cʼamʌjel (Sal. 29:11).

14. ¿Chuqui mi laj cʌn tiʼ tojlel Janice?

¹⁴ Laʼ lac chaʼ ñaʼtan tiʼ tojlel Janice, tsaʼ bʌ i sube Jehová chaʼan yom majlel ti Betel. Tsaʼto ñumi joʼpʼejl jab chaʼan miʼ chʼʌmben i sujm tsaʼ bʌ i mele Jehová chaʼan miʼ jacʼben i yoración. Janice miʼ yʌl: «Ti jiñi joʼpʼejl jab tsaʼ bʌ ñumi, Jehová tsiʼ cʌntesayon i tsiʼ coltayon chaʼan mic ñumen weñʼesan jiñi c melbal (chaʼlibal). Tsaʼ j qʼuele chaʼan yomto mic ñumen ñop tiʼ tojlel yicʼot mic weñʼesan bajcheʼ mic chaʼlen estudio, i cheʼ jaʼel tsaʼ j cʌñʌ chaʼan tijicña miʼ mejlel lac melben i yeʼtel Jehová mach yʌlʌyic baqui añonla». Ti wiʼil, Janice yicʼot i ñoxiʼal tsaʼ ochiyob ti viajante.  Janice miʼ bej al: «Jehová tsaʼʌch i jacʼʌ jiñi coración, pero mach cheʼic bajcheʼ tsaʼ c ñaʼta. Tsaʼto ñumi cabʌl ora chaʼan mij qʼuel bajcheʼ tsiʼ jacʼʌ. Pero mic wen aqʼuen wocolix i yʌlʌ come tsiʼ pʌsbeyon jiñi i cʼuxbiya yicʼot i yutslel».

15. ¿Chucoch mach tiʼ pejtelelic ora yom jamʌ tsiquil chuqui mi laj cʼajtin? (Qʼuele jaʼel jiñi foto tac).

¹⁵ I yuxpʼejlel cʼajtiya jiñʌch: «¿Ñumeñix ba ti pʼis chuqui woli c jamʌ cʼajtiben Jehová?». Anquese yomʌch mi lac jamʌ suben Jehová chuqui la com, yom pʼisbil jach bajcheʼ mi lac mel chaʼan miʼ mejlel lac ñaʼtan chuqui yom Jehová chaʼañonla. Laʼ lac ñaʼtan jiñi hermana tsaʼ bʌ i sube Jehová chaʼan yom majlel ti jiñi Escuela chaʼan Evangelizadores. Yom majlel come yom i ñumen chaʼlen coltaya. Anquese miʼ mejlel i bej cʼajtin tiʼ yoración iliyi, ¿anto ba chuqui yambʌ miʼ mejlel i cʼajtiben Jehová? Miʼ mejlel i suben chaʼan laʼ i coltan i taj bajcheʼ tac yambʌ miʼ ñumen melben i yeʼtel (Hech. 16:9, 10). Jin chaʼan, cheʼ bʌ tsaʼix i chaʼle oración, miʼ mejlel i cʼajtiben jiñi viajante mi an jumpʼejl congregación baqui yomto coltʌntel. O cheʼ jaʼel, miʼ mejlel i tsʼijbuben majlel jiñi sucursal chaʼan miʼ cʼajtin baqui ñumen yomto coltʌntel ti subtʼan. e

16. ¿Chuqui miʼ mejlel lac ñop?

¹⁶ Cheʼ bajcheʼ tsaʼix laj cʌñʌ miʼ mejlel lac ñop chaʼan Jehová mucʼʌch caj i jacʼ jiñi la coración, wen chuqui mi caj i mel yicʼot mi caj i pʌs i cʼuxbiya (Sal. 4:3; Is. 30:18). Anquese an i tajol maʼañic mi caj i jacʼ cheʼ bajcheʼ mi lac pijtan, pero la cujil chaʼan mucʼʌch caj i ñʌchʼtañonla i maʼañic baʼ ora mi caj i cʌyonla (Sal. 9:10). Jin chaʼan, laʼ lac chʌn ñop ti Jehová i laʼ lac suben pejtelel am bʌ ti lac pusicʼal (Sal. 62:8).