TSAʼ quila pañimil (chʼocʼayon) ti 1923 ti Hemsworth, jumpʼejl tejclum am bʌ ti Yorkshire (Inglaterra). Bob, ascuñʌl bʌ queran. Jiñi c papá miʼ wen tsʼaʼlen i lotiya jiñi ñucoʼ bʌ i yeʼtel ti ñopbalʌl, pero ti jumpʼejl bʌ qʼuin tsiʼ chʼʌmʌ cʼotel libro tac muʼ bʌ i tsictesan jiñi mach bʌ isujmic cʌntesa, nueve jaxto c jabilel cheʼ bʌ jiñi. Toj sajtel i pusicʼal chaʼan tsaʼ bʌ i cʌñʌ. Ti wiʼil, tsaʼ cʼoti ti otot Bob Atkinson i tsiʼ yʌqʼueyon lon c ñʌchʼtan ti gramófono jumpʼejl discurso i chaʼan jiñi hermano Rutherford. Tsaʼ cʼoti lon c ñaʼtan chaʼan jiñobʌch tsaʼ bʌ i meleyob jaʼel jiñi libro tac. Jiñi c tatob tiʼ subeyob jiñi hermano chaʼan yaʼʌch miʼ cʼotel i cʼux i waj ti lon cotot ti jujumpʼejl icʼan yicʼot miʼ tsictesʌbeñon lojon pejtelel jiñi lon j cʼajtiya chaʼan bʌ Biblia. Tsiʼ pʌyʌyon lojon ti tempa bʌ muʼ bʌ i mejlel tiʼ yotot juntiquil hermano ñajt bʌ cʌylem yaʼ baqui chumulon lojon. Ti orajach tsaʼ caji lon c tech majlel, i mach jalic tsaʼ tejchi jumpʼejl alʌ congregación ti Hemsworth. Mach wen jalic tsaʼ ñumi, i tsaʼ caji lon c pʌy ti otot jaʼel jiñi cʌmbiloʼ bʌ bajcheʼ siervo de zona (superintendentejob i chaʼan circuito) chaʼan yaʼʌch miʼ jijlelob, i mic pʌy lon ti cʼux waj jiñi precursorob. Tsaʼʌch i wen coltayoñob.

Jiñi c familia tsaʼ jaxto i techeyob i mel jumpʼejl choñoñel, pero jiñi c papá tiʼ sube cʌscun: «Mi a wom ochel ti precursor, cojach yom mi laj cʌy lac choñoñel». Bob tsaʼ loqʼui majlel bajcheʼ precursor cheʼ bʌ 21 i jabilel. I chaʼpʼejl jach jab tsaʼ ñumi, tsaʼ ochiyon bajcheʼ precursora jaʼel cheʼ bʌ 16 c jabilel. Lʌcʼʌ tiʼ pejtelel ora c bajñel jach mic chaʼlen subtʼan, cojach mic chʼʌm majlel jiñi gramófono yicʼot jiñi tarjeta de testimonio. Pero tiʼ coltaya Jehová, tsaʼ caji cʌqʼuen estudio juntiquil xʼixic ti ora bʌ tsaʼ cʼʌjqui majlel tiʼ chaʼan bʌ Jehová. Ti wiʼil, yonlel i familia tsaʼ bʌ i jacʼʌyob jaʼel jiñi i sujmlel. Cheʼ ti yambʌ junjab, tsaʼ waʼchontiyon bajcheʼ precursora especial, i jiñi c piʼʌl ti subtʼan jiñʌch Mary Henshall. Tsaʼ chojquiyon lon majlel ti jumpʼejl territorio am bʌ ti Cheshire maʼañic bʌ tiʼ wenta mi jumpʼejlic congregación.

Ti jiñi bʌ ora, woli (choncol) jiñi Segunda Guerra Mundial, i tsaʼ chojquiyon lon majlel ti guerra jaʼel. Tsaʼ c lon ñaʼta lon chaʼan jiñi añoʼ bʌ i yeʼtel maʼañic mi caj i pʌyon lon chaʼan jiñi servicio militar come xʼeʼtelon lojon i chaʼan Dios tiʼ pejtelel ora, i jiñi yambʌlob ñucoʼ bʌ ti ñopbalʌl maʼañic tsaʼ pʌjyiyob. Pero maʼañic tsaʼ jacʼbentiyon lon i tsaʼ otsʌntiyon 31 qʼuin  ti cárcel. Cheʼ bʌ tsaʼ ñumi jumpʼejl jab i tsaʼ c taja 19 c jabilel, tsaʼ c subu c bʌ chaʼan joñon maʼañic mi cotsan c bʌ ti guerra. Chaʼsujtel tsaʼ chojquiyon majlel ti melobʌjʌl, i libre tsaʼ cʌjyiyon ti jiñi chaʼsujtel. Ti jiñi bʌ ora, Jehová chʌn chuculʌch i chaʼan j cʼʌb tsaʼ cubi, tsiʼ coltayon yicʼot i yespíritu yicʼot tsiʼ pʼʌtʼesayon (Is. 41:10, 13).

Tsaʼ j cʌñʌ Arthur Matthews ti 1946. Uxpʼejl jab tsaʼ otsʌnti ti cárcel come maʼañic tsaʼ majli ti guerra, i maxto jalic i loqʼuel. Tsaʼ majli ti subtʼan ti Hemsworth yicʼot i yeran i cʼabaʼ Dennis, ochem bʌ bajcheʼ precursor especial. Jiñi i tatob tsiʼ cʌntesayob tiʼ sujmlel cʼʌlʌl cheʼ chutob to, Arthur tsiʼ chʼʌmʌ jaʼ cheʼ 17 i jabilel, i Dennis cheʼ bʌ 16. Cheʼ maxto wen jalic i cʼotelob ti Hemsworth, Dennis tsaʼ chojqui majlel ti Irlanda. Jiñi c tatob tiʼ subeyob Arthur chaʼan miʼ chumtʌl yicʼotob, come tsiʼ qʼueleyob chaʼan wen chʼejl bʌ precursor yicʼot utsʼat i melbal. Cheʼ bʌ mic julaʼtan c familia, joñon yicʼot Arthur mic poc lojon jiñi chʼejew. Ti wiʼil, tsaʼ caji c tsʼijbuben lon c bʌ carta. Anquese Arthur tsaʼ otsʌnti uxpʼejl uw ti cárcel cheʼ ti 1948, ti enero i chaʼan 1949 tsaʼ ñujpuñiyon lojon. Tsaʼ lon c ñaʼta chaʼan mic bej melben lojon i yeʼtel Jehová tiʼ pejtelel ora. Wen pʼisbil jach mi lon j cʼʌn taqʼuin, i cheʼ an i yorajlel lon c chaʼan, mic chaʼlen lon eʼtel baqui miʼ pʌjqʼuel i wut teʼ. Tiʼ coltaya Jehová tsaʼ c chʌn chaʼle lon eʼtel bajcheʼ precursor.

Cheʼ bʌ tsaʼ ñumi jumpʼejl jab, tsaʼ subentiyon lon majlel ti subtʼan ti Irlanda del Norte. Tsajñiyon lon ti Armagh i wiʼil ti Newry, baʼ cabʌl católicojob. Cabʌl contrajintel yaʼi, jin chaʼan yom tsajilon lojon chaʼan chuqui jach mi lon c mel o cheʼ mic chaʼlen lon subtʼan. Miʼ mejlel jiñi tempa bʌ tac tiʼ yotot jumpʼejl xñujpuñel am bʌ 16 kilómetro i ñajtlel ti lon cotot. Ya 8 jach mic tempan lon c bʌ. Ti piso mi lon c wʌyel cheʼ bʌ yaʼ mi lon j cʌytʌl, i ti sʌcʼan wen mij cʼux lon c waj. Cheʼ bʌ mi cubin ili ora chaʼan añix cabʌl hermanojob yaʼi, miʼ wen aqʼueñon tijicñʌyel.

Jiñi cʌscun yicʼot i yijñam, i cʼabaʼ Lottie, woliyobix (yʌquelobix) ti eʼtel bajcheʼ precursor especial ti Irlanda del Norte. Temel tsajñiyon lojon ti jiñi uxpʼejl bʌ qʼuin colem tempa bʌ cheʼ ti 1952 yaʼ ti Belfast. Tiʼ yotot jiñi hermano baqui tsaʼ jijliyon lojon yaʼ jijlem jaʼel jiñi hermano Pryce Hughes, xʼeʼtel am bʌ tiʼ wenta jiñi sucursal ti Gran Bretaña ti jiñi bʌ ora. Ti jumpʼejl bʌ acʼʌlel tsaʼ caji lon j cʌl chaʼan jiñi folleto El camino de Dios es el de amor, tsaʼ jaxto bʌ loqʼui chaʼan jiñi wiñicob xʼixicob (quixtañujob) ti Irlanda. Jiñi hermano Hughes tsiʼ yʌlʌ chaʼan wocolʌch miʼ subentelob wen tʼan jiñi católicojob yaʼ bʌ chumulob ti República de Irlanda. Woliʼ wejtsʼelob loqʼuel jiñi hermanojob i jiñi motomajob woliyob ti xicʼoñel chaʼan miʼ ticʼlʌntel jiñi hermanojob. Tsiʼ yʌlʌ jaʼel: «Com lojon cheʼ añic xñujpuñelob añoʼ bʌ i carro yicʼot yomoʼ bʌ majlel ti jiñi ñuc bʌ subtʼan chaʼan miʼ pujquel ili folleto ti jiñi país». * Jin chaʼan, cheʼʌch tsaʼ lon c jacʼʌ bajcheʼ tsaʼ cʌlʌ ti ñaxan: «¡Mic mejlel lon ti majlel!».

Ti Dublín, jiñi precursorob yaʼʌch miʼ jijlelob tiʼ yotot Rutland, juntiquil hermana wajalix bʌ caji i melben i yeʼtel Jehová. Yaʼʌch tsaʼ jumucʼ cʌleyon lon  tiʼ yotot i tsaʼ c tsʼitaʼ choño lon chuqui am bʌ lon c chaʼan. Ti wiʼil, ti lon c chʌnticlel tsaʼ majliyon lojon tiʼ moto Bob am bʌ i yalʌ carrojlel, chaʼan mi lon c mʌn juncojt carro. Tsaʼ c mʌñʌ lon juncojt mach bʌ tsijibix i tsaʼ c sube lon jiñi tsaʼ bʌ c mʌmbe chaʼan miʼ poj majlel i cʌybeñon lojon come mach cujilic lon i ñijcʌntel. Arthur jumpʼejl icʼan buchul tsiʼ ñusa tiʼ wʌyib i woliʼ poj ñijcan juncojt carro miʼ mel. Cheʼ ti yijcʼʌlal, cheʼ bʌ Arthur woliʼ ñop i ñijcan loqʼuel jiñi carro cheʼ ti sʌcʼajel, tsaʼ cʼoti jiñi hermana Mildred Willet (juntiquil misionera tsaʼ bʌ ñujpuñi yicʼot John Barr ti wiʼil). Yujilʌch i ñijcʌntel carro i bajñel. Tiʼ tsʼitaʼ cʌntesayon lojon, i mach jalic tsaʼ lon j cʌñʌ.

Yom bʌ mi lon c sʌclan waʼli jiñʌch baqui mi lon c jijlel. Tsaʼ subentiyon lojon chaʼan mach yomic mi lon c chumtʌl ti alʌ otot quipʌbil jach bʌ ñumel ti carro, tajol miʼ mejlel i pulob. Tsaʼ c sʌcla lon jumpʼejl otot, pero maʼañic tsaʼ lon c taja. Jin chaʼan ti carro tsaʼ wʌyiyon lojon. Tiʼ yijcʼʌlal, cojach tsaʼ lon c taja jumpʼejl carro am bʌ i yalʌ ototlel chaʼpʼejl jach bʌ i yalʌ wʌyiblel. Yaʼʌch tsaʼ chumleyon lojon. Tsaʼ c taja lon c tijicñʌyel cheʼ bʌ an utsoʼ bʌ quixtañu tsaʼ bʌ i subeyon lojon chaʼan yaʼ tiʼ lumob miʼ mejlel lon j cʌy jiñi carro baqui chumulon lojon. Cʼʌlʌl baqui mi lon c chaʼlen subtʼan an 20 kilómetro i ñajtlel yaʼ baqui mij cʌy jiñi lon j carro am bʌ i yototlel. Ti wiʼil, mi lon c chʼʌm majlel ti yambʌ parte chaʼan yaʼix mi lon c chaʼlen subtʼan yaʼ baqui tsaʼ lon c ñaxan cʌyʌ.

Mach wen wocolic tsaʼ cubi lon cheʼ tsaʼ c julaʼta lon pejtel xchumtʌlob am bʌ ti Irlanda. Ñumen ti 20,000 folleto tsaʼ lon c pucu, i tsaʼ lon c subu yaʼ ti sucursal i chaʼan Gran Bretaña i cʼabaʼ jiñi tsaʼ bʌ i mulayob i ñumen cʌn. Miʼ yʌqʼueñon c tijicñʌyel cheʼ cabʌlix Testigojob ili ora.

Mach jalic tsaʼ ñumi i tsaʼ chojquiyon lon majlel ti Londres. Cheʼ bʌ chaʼpʼejl uxpʼejl semana jaxto lon j cʼotel, Arthur tsaʼ pejcʌnti yaʼ ti sucursal i tsaʼ subenti chaʼan miʼ tech eʼtel bajcheʼ superintendente i chaʼan circuito tiʼ yijcʼʌlal. Jumpʼejl semana tsiʼ chʼʌmʌ i cʌntesʌntel, cheʼ jiñi tsaʼ majliyon lon ti Escocia. Anquese Arthur maʼañic tsiʼ wen tajbe i yorajlel chaʼan miʼ chajpan i discurso tac, tsaʼʌch i jacʼʌ jiñi wocol bʌ eʼtel tac. ¡Tsaʼʌch i wen pʼʌtʼesayon i melbal! Tsaʼ c wen mulaj lon ili tsijiʼ bʌ eʼtel. Jiñʌch ñuc bʌ bendición cheʼ tsaʼ j cʌñʌ lon cabʌl hermanojob come añix ora tsaʼ c teche lon subtʼan baqui maʼañic majqui an tiʼ wenta miʼ qʼuel.

Arthur tsaʼ pʌjyi ti jiñi Cʌntesʌntel i chaʼan Galaad ti 1962. Jiñi cʌntesʌntel miʼ jalʼan 10 uw, pero joñon maʼañic tsaʼ pʌjyiyon, jin chaʼan wocolʌch tsaʼ c ñaʼta chuqui mi lon c mel. Pero tsaʼ cʼoti lon c ñaʼtan chaʼan Arthur yomʌch miʼ jacʼ ili ñuc bʌ majtañʌl anquese cabʌl ora yom mic bajñel ajñel. Tsaʼ chaʼ chojquiyon majlel bajcheʼ precursora especial ti Hemsworth. Cheʼ bʌ Arthur tsaʼ chaʼ sujti tiʼ jumpʼejlel jab, tsaʼ waʼchoconti bajcheʼ superintendente i chaʼan distrito. Yom mi lon c majlel ti julaʼ ti Escocia, ti norte i chaʼan Inglaterra yicʼot Irlanda del Norte.

Arthur tsaʼ aqʼuenti tsijiʼ bʌ eʼtel ti 1964. Tsaʼ waʼchoconti bajcheʼ xʼeʼtel am bʌ tiʼ wenta jiñi sucursal i  chaʼan Irlanda. Ili tsijiʼ bʌ eʼtel tsaʼ c mero bʌcʼña come tsaʼ c wen mulaj lon jiñi eʼtel bajcheʼ superintendente i chaʼan circuito yicʼot distrito. Pero wen tijicña mi cubin ili ora cheʼ tsaʼ aqʼuentiyon lon ili utsʼatax bʌ eʼtel. Qʼuelbil c chaʼan chaʼan Jehová miʼ chʌn aqʼueñonla i bendición cheʼ mucʼʌch lac jacʼ jiñi eʼtel muʼ bʌ i yʌqʼueñonla anquese tajol maʼañic mi lac mulan. Yaʼ ti Betel tsaʼ c chaʼle eʼtel ti oficina, butʼ jun, chajpaya waj yicʼot i sujcuntel chuqui tac an. Tsaʼ c jumucʼ chaʼle lon eʼtel jaʼel bajcheʼ superintendente i chaʼan distrito i tsaʼ j cʌñʌ lon cabʌl hermanojob. Cheʼ jaʼel, tsaʼ j qʼuele lon bajcheʼ tsaʼ pʼʌtʼayob majlel jiñi tsaʼ bʌ lon cʌqʼueyob estudio. Pejtelel jiñi, tsiʼ yʌcʼʌ chaʼan mic wen cʼuxbin lon c bʌ yicʼot jiñi hermanojob ti Irlanda. ¡Wen utsʼatax bʌ bendición!

Cheʼ ti 1965 tsaʼ ujti jiñi ñaxam bʌ colem tempa bʌ internacional bʌ ti jumpʼejl tejclum i cʼabaʼ Dublín, ti Irlanda. * Ili colem tempa bʌ utsʼat tsaʼ ujti anquese an tsaʼ bʌ i ñopo i mʌctañob. Tsiʼ tempayob i bʌ 3,948, i 65 tsaʼ bʌ i chʼʌmʌyob jaʼ. Jiñi yaʼ bʌ chumulob ti Dublín tsiʼ majñayob i yotot chaʼan yaʼ miʼ jijlelob jiñi 3,500 hermanojob chʼoyoloʼ bʌ ti yambʌ país tac. Jiñi quixtañujob tsaʼ aqʼuentiyob jumpʼejl carta chaʼan wocolix i yʌlʌyob cheʼ tsiʼ majñayob i yotot. Cabʌl tsaʼ i yʌlʌyob chaʼan jiñi hermanojob utsʼatax i melbalob. Jiñi yaʼ bʌ chumulob ti Irlanda tsiʼ wen mulayob ili tsaʼ bʌ ujti.

Cheʼ ti 1966, yaʼ ti norte yicʼot sur i chaʼan Irlanda tsaʼ cʼaxi tiʼ wenta jiñi sucursal i chaʼan Dublín. Mach wis lajalic bajcheʼ añob tiʼ chaʼan bʌ política yicʼot ñopbalʌl tac yaʼ ti isla come wen tʼoxolob. Utsʼatax cheʼ bʌ cabʌl católicojob tsaʼ caji i ñopob i sujmlel i temelix tsaʼ cajiyob tiʼ eʼtel yicʼot yambʌ hermanojob.

Cheʼ ti 2011, an chuqui mach bʌ jalic tsaʼ qʼuextʌyi ti lon c tojlel. Tsaʼ subentiyon lon majlel yaʼ ti Betel i chaʼan Londres, come jiñi sucursal i chaʼan Gran Bretaña yicʼot Irlanda tsaʼ ñujpʼi. Ti jiñi bʌ ora, cʼamix jiñi c ñoxiʼal. Tsaʼ subentiyon lon chaʼan an i cʼamʌjel i cʼabaʼ Parkinson. 66 jab temel tsaʼ c melbe lon i yeʼtel Jehová, Arthur tsaʼ chʌmi (sajti) ti 20 i chaʼan mayo, 2015.

Wen wocolʌch an c ñusa tilel ili jabil tac. Ili ora muʼto c chʌn cʼajtesan Arthur come wen ñʌmʌl quicʼot. Cheʼ bʌ maʼ ñusan wocol tac bajcheʼ iliyi, maʼ ñumen lʌcʼtesan a bʌ tiʼ tojlel Jehová. Cheʼ jaʼel, tijicña mi cubin cheʼ mij qʼuel chaʼan Arthur tsaʼʌch wen cʼuxbinti ti yambʌ hermanojob. An c chʼʌmʌ carta tac tilem bʌ ti Irlanda, Gran Bretaña yicʼot Estados Unidos. Iliyi añʌch i wen coltayon, cheʼ jaʼel jiñi tʼan tac am bʌ i subeyon Dennis yicʼot i yijñam i cʼabaʼ Mavis, cheʼ jaʼel jiñi i yixicʼalob cʌscun i cʼabaʼ Ruth yicʼot Judy, i maʼañix mic taj chuqui yom mi cʌl.

An jumpʼejl texto muʼ bʌ i wen coltañon. Jiñʌch Isaías 30:18, baqui miʼ yʌl: «Lac Yum woli to i pijtañetla jinto mi laʼ sutqʼuin laʼ bʌ, chaʼan miʼ pʌsbeñetla i yutslel i pusicʼal. Yom i pʼuntañetla, come tojʌch lac Yum Dios. Tijicñayob pejtelel muʼ bʌ i pijtañob lac Yum». Miʼ yʌqʼueñon c tijicñʌyel cheʼ Jehová woliʼ pijtan chaʼan miʼ cʼotel i yorajlel chaʼan miʼ jisan jiñi wocol tac i miʼ yʌqʼueñonla utsʼatax bʌ eʼtel yaʼ ti tsijiʼ bʌ pañimil (mulawil).

Cheʼ mij cʼajtesan tsaʼ bʌ c mele wajali, mij qʼuel chaʼan jiñʌch Jehová tsiʼ chʼʌmʌ tiʼ wenta jiñi eʼtel ti Irlanda yicʼot an i yʌcʼʌ i bendición. Wen tijicña mi cubin chaʼan tsaʼixto c chaʼle tsʼitaʼ coltaya jeʼel. Tiʼ sujm, Jehová miʼ yʌqʼueñonla i bendición cheʼ mucʼʌch lac mel muʼ bʌ i subeñonla.