JIÑI i familia John chumul ti jumpʼejl alʌ tejclum am bʌ ti Gujarat (India). Jiñi i papá añix cheʼ bʌ 60 jab tsiʼ chaʼle chʼʌmjaʼ bajcheʼ i testigo Jehová. Pero ti jimbʌ ora, John, jiñi i mamá, juntiquil i chich yicʼot yambʌ chʌntiquil i yijtsʼiñob mach yomobic i qʼuel i ñopbal i papá come wen católicojob.

Ti jumpʼejl bʌ qʼuin, jiñi i papá John tsiʼ choco majlel tiʼ yotot juntiquil hermano i yamigo bʌ tiʼ congregación chaʼan miʼ yʌqʼuen jumpʼejl carta. Ti jimbʌ sʌcʼan, John tsiʼ lowo i cʼʌb cheʼ bʌ woliʼ jam jumpʼejl tambo melbil (pʌtbil) bʌ ti lata. Pero John tsaʼ jach i tepʼe ti pisil jiñi i yalʌ cʼʌb chaʼan miʼ majlel yaʼ baqui woli (choncol) i choc majlel i papá, come yomʌch i jacʼben i tʼan.

Cheʼ bʌ tsaʼ cʼoti John tiʼ yotot jiñi hermano, jiñi carta jiñʌch tsiʼ chʼʌmʌ i yijñam Testigo bʌ jaʼel. Cheʼ bʌ jiñi hermana tsiʼ qʼuelbe i lojweñal, tiʼ sube chaʼan miʼ tsʼʌcʌben. Tsiʼ locʼsa muʼ bʌ i cʼʌn ti tsʼʌcaya, tsiʼ pocbe yicʼot tsiʼ tepʼbe. Cheʼ jiñi tsiʼ yʌqʼue jumpʼejl taza té, i tsaʼ caji i suben chaʼan bʌ Biblia.

John tsaʼ caji ti qʼuextʌyel majlel cheʼ bajcheʼ yilal miʼ qʼuel jiñi Testigojob. Jin chaʼan, tsaʼ caji i melben cʼajtiya tac jiñi hermana. John miʼ lon ñop chaʼan Jesús Diosʌch i chaʼan yom mi lac pejcan ti oración jiñi María, pero jiñi i papá mach cheʼic miʼ ñop. Come jiñi hermana tsiʼ cʌñʌ jiñi tʼan gujarati, tiʼ tsictesʌbe tiʼ tʼan chuqui muʼ bʌ i yʌl jiñi Biblia chaʼan jiñi chaʼpʼejl temaj. Ti wiʼil, tsiʼ yʌqʼue jiñi folleto «Estas buenas nuevas del reino».

Cheʼ bʌ John tsiʼ pejca jiñi folleto, tsiʼ cʌñʌ i sujmlel. Cheʼ jiñi, tsaʼ majli i qʼuel jiñi cura yaʼ ti iglesia i tsiʼ melbe jaʼel jiñi cʼajtiya tsaʼ bʌ i melbe jiñi hermana. Pero jiñi cura tsaʼ wen michʼa, tsiʼ chocbe jiñi Biblia i tiʼ sube ti cʼam bʌ tʼan: «¡Xibajetix! ¿Baqui miʼ yʌl yaʼ ti Biblia chaʼan mach Diosic jiñi Jesús? ¿Baqui miʼ yʌl chaʼan mach yomic mi lac pejcan ti oración jiñi María? ¿¡Baqui!?». John mach cheʼic tsiʼ ñaʼta chaʼan cheʼ mi caj i jacʼbentel bajcheʼ jiñi, i tiʼ sube: «Maʼañic baqui ora mi caj c chaʼ ochel ti jumpʼejl iglesia católica». I cheʼʌch tsiʼ mele.

John tsiʼ teche jumpʼejl estudio yicʼot jiñi Testigojob, tsaʼ ochi tiʼ sujmlel i tsiʼ techeʼ i melben i yeʼtel Jehová. Cheʼʌch tsaʼ caji i melob yambʌ i familiajob jaʼel. Cheʼ bʌ John miʼ qʼuel ili ora jiñi tsoy baqui tiʼ tsepe i yal i cʼʌb wajali, miʼ chaʼ cʼajtesan bajcheʼ juntiquil hermana tsiʼ pʌsbe i yutslel i pusicʼal i jiñʌch tsaʼ bʌ i colta chaʼan miʼ taj jiñi i sujmlel (2 Co. 6:4, 6).