1. ¿Baqui chucul jiñi ñumen toj bʌ cʼuxbiya, i chucoch? (Qʼuele jiñi foto tac).

JIÑI ñumen toj bʌ cʼuxbiya chʼoyolʌch ti Jehová (1 Jn. 4:7). Chucul ti toj bʌ principio tac, i jiñi Biblia miʼ cʼʌn jiñi tʼan agápe, am bʌ ti griego, chaʼan miʼ taj ti tʼan ili cʼuxbiya. Iliyi mi lac pʌs ti chuqui wem bʌ mi lac mel (chaʼlen) tiʼ tojlel yambʌlob, mach jiñic jach yom i yʌl chaʼan bajcheʼ yubil mi la cubin tiʼ tojlel yambʌlob. Jumpʼejl diccionario miʼ yʌl chaʼan agápe «cojach miʼ mejlel ti cʌjñel ti lac melbal». Miʼ yʌqʼueñonla lac tijicñʌyel yicʼot an i sujmlel mi la cubin jiñi laj cuxtʌlel.

2, 3. ¿Bajcheʼ tsiʼ pʌsʌ ñuc bʌ i cʼuxbiya Jehová ti lac tojlel?

² Jehová tsiʼ wʌn pʌsʌ i cʼuxbiya tiʼ tojlel wiñicob xʼixicob (quixtañujob) cheʼ maxto i mele (pʌtʌ) jiñi Adán yicʼot Eva. Jumpʼejl ejemplo, tsiʼ mele ili Lum chaʼan tiʼ pejtelel ora mi lac chumtʌl i tsiʼ yʌcʼʌ pejtel chuqui i cʼʌjñibal lac chaʼan, come yom chaʼan wen tijicña mi lac ñusan. I pejtelel tsaʼ bʌ i mele chaʼañʌch lac wenlel. Cheʼ jaʼel, tsiʼ yʌqʼueyonla lac pijtaya chaʼan tiʼ pejtelel ora mi lac chumtʌl ti Paraíso.

³ Cheʼ bʌ Adán yicʼot Eva tsiʼ chaʼleyob mulil, Jehová tsiʼ pʌsʌ jiñi ñumen ñuc bʌ cʼuxbiya. Tsiʼ wʌn ñaʼta chaʼan yaʼ tiʼ pʼolbalob Adán  añʌch muʼ bʌ caj i cʼuxbiñob, jin chaʼan an chuqui tsiʼ mele chaʼan miʼ coltañob (Gn. 3:15; 1 Jn. 4:10). Cheʼ bʌ Jehová tsiʼ yʌcʼʌ i tʼan chaʼan mi caj i yʌcʼ i cuxtʌlel i Yalobil bajcheʼ xColtaya lac chaʼan, cheʼ bajcheʼ tsʼʌctiyemix tsiʼ qʼuele ti jiñi jach bʌ ora. Cheʼ bʌ tsaʼ ñumi 4,000 jab, anquese Jehová wen cʼuxʌch tsiʼ yubi, tsiʼ yʌcʼʌ ti chʌmel (sajtel) jiñi cojach bʌ i Yalobil ti laj caj (Jn. 3:16). ¡Wen tijicñayonla chaʼan tsaʼ bʌ i mele ti lac tojlel!

4. ¿Bajcheʼ la cujil chaʼan mucʼʌch i mejlel lac pʌs ñuc bʌ laj cʼuxbiya jeʼel anquese xmulilonla?

⁴ Joñonla miʼ mejlel lac pʌs ñuc bʌ laj cʼuxbiya jaʼel come melbilonla tiʼ yejtal Dios. An i tajol wocolʌch chaʼan mi la pʌs come xmulilonla, pero mucʼʌch i mejlel lac mel. Jumpʼejl ejemplo, Abel tsiʼ pʌsʌ chaʼan mucʼʌch i wen cʼuxbin Dios cheʼ bʌ tsiʼ yʌqʼue ti majtan jiñi ñumen wem bʌ an i chaʼan (Gn. 4:3, 4). Noé tsaʼʌch i pʌsʌ chaʼan miʼ cʼuxbin jiñi quixtañujob come cabʌl jabil tsiʼ chaʼle subtʼan anquese maʼañic tsaʼ jacʼbenti i tʼan (2 P. 2:5). Abrahán tsiʼ pʌsʌ jaʼel chaʼan cojach miʼ wen cʼuxbin Dios come ti jumpʼejl i pusicʼal tsiʼ jacʼʌ i yʌcʼ i yalobil bajcheʼ tsʌnsʌbil bʌ majtañʌl (Stg. 2:21). Joñonla cheʼʌch la com lac pʌs laj cʼuxbiya bajcheʼ ili xucʼul bʌ wiñicob anquese wen wocol mi lac cubin ti melol.

5. ¿Bajcheʼ miʼ mejlel lac pʌs jiñi isujm bʌ cʼuxbiya?

⁵ Jiñi Biblia miʼ yʌl chaʼan jiñi isujm bʌ cʼuxbiya mach «ti lac tʼan jach mi ti lac subal jach» mi lac pʌs, tsiquil «ti lac melbal» jaʼel (1 Jn. 3:18). Ili mach yomic i yʌl chaʼan maʼañic miʼ mejlel lac pʌs cʼuxbiya ti chuqui mi la cʌl (1 Ts. 4:18). Yom bʌ i yʌl, jiñʌch chaʼan an i tajol mach jasʌlic cheʼ an majqui mi lac suben chaʼan mi laj cʼuxbin. Tajol an chuqui woli (choncol) i ñusan baqui i cʼʌjñibal i chaʼan mi laj coltan. Jumpʼejl ejemplo, mi juntiquil hermano mach bʌ wen añic chuqui miʼ cʼux o maʼañic i pislel, mach jasʌlic yom mi lac suben chuqui wen (Stg. 2:15, 16). Cheʼ jaʼel, mi mucʼʌch laj cʼuxbin Dios yicʼot yambʌ lac piʼʌlob, yomʌch mi lac chaʼlen wersa ti subtʼan i mach cojach mi laj cʼajtiben Jehová chaʼan miʼ ñumen choc tilel xsubtʼañob (Mt. 9:38).

6, 7. a) ¿Chuqui yom i yʌl jiñi isujm bʌ cʼuxbiya? b) ¿Chuqui tac ti ejemplo mi lac taj chaʼan jiñi mach bʌ isujmic cʼuxbiya?

⁶ Jiñi apóstol Juan tsiʼ yʌlʌ chaʼan yom mi lac pʌs «cʼuxbiya ti isujm [yicʼot] ti lac melbal». Cheʼ jaʼel, jiñi apóstol Pablo tsiʼ yʌlʌ chaʼan yom mi lac ‹chaʼlen cʼuxbiya tiʼ sujmlel› (Ro. 12:9; 2 Co. 6:6). Ili yom i yʌl chaʼan maʼañic miʼ mejlel lac lolom pʌs chaʼan la cujilʌch cʼuxbiya, come woli jach lac mʌc wutiñob. Mi juntiquil quixtañu miʼ mel bajcheʼ iliyi, maʼañic i cʼʌjñibal jiñi cʼuxbiya woli (yʌquel) bʌ i pʌs.

⁷ Laʼ laj qʼuel ejemplo tac chaʼan jiñi mach bʌ isujmic cʼuxbiya. Satanás tsiʼ poj pʌsʌ chaʼan yomʌch chaʼan Eva miʼ taj i wenlel cheʼ bʌ tsiʼ pejca yaʼ ti pʌcʼʌbʌl Edén. Pero mach isujmic tsaʼ bʌ i mele, bajñel i wenlel jach tiʼ sʌcla (Gn. 3:4, 5). Ahitofel jiñʌch yambʌ tsaʼ bʌ i poj pʌsʌ i bʌ tiʼ yamigo jiñi rey David, pero tsaʼ sujti tiʼ contra cheʼ tsiʼ qʼuele chaʼan miʼ mejlel i bajñel taj i wenlel (2 S. 15:31). Ili ora, jiñi yomoʼ bʌ i tʼox congregación miʼ cʼʌñob «maña jax bʌ tʼan» yicʼot miʼ yʌqʼueñob i ñop jiñi hermanojob chaʼan mucʼʌch i cʼuxbintelob. Pero mach isujmic chuqui miʼ melob (Ro. 16:17, 18).

8. ¿Chuqui yom mi laj cʼajtiben lac bʌ?

⁸ Cheʼ mi lac poj pʌs chaʼan la cujilʌch cʼuxbiya, pero chaʼan jach mi lac lotin yambʌlob, jiñʌch tsʌts bʌ mulil. Joñonla miʼ mejlel lac lotin yañoʼ bʌ, pero Jehová maʼañic. Jesús tsiʼ yʌlʌ chaʼan cheʼ bʌ miʼ melob bajcheʼ iliyi «tsʌts mi caj i yʌqʼuen[telob] i toj i mul» (Mt. 24:51, Jiñi tsijiʼ bʌ wen tʼañ chaʼañ estudio). Tiʼ sujm, jiñi i wiñiconbʌla  Jehová maʼañic baʼ ora cheʼ la com lac mel bajcheʼ jiñi. Jin chaʼan yom mi laj cʼajtiben lac bʌ: «¿I sujmlelʌch ba cʼuxbiya muʼ bʌ c pʌs tiʼ pejtelel ora?». An 9 muʼ bʌ caj laj qʼuel chaʼan bajcheʼ miʼ mejlel lac pʌs jiñi isujm bʌ cʼuxbiya.

9. ¿Chuqui mi caj lac mel mi mucʼʌch laj cʼuxbiñob tiʼ sujm jiñi hermanojob?

⁹ Laʼ lac chaʼlen coltaya ti jumpʼejl lac pusicʼal anquese maʼañic majqui miʼ taj i qʼuel. Yom mi lac mel chuqui tac wen tiʼ tojlel la quermañojob pero «ti mucul», ili yom i yʌl, chaʼan mach i cʼʌjñibalic miʼ ñaʼtan jiñi yambʌlob (pejcan Mateo 6:1-4). Ananías yicʼot Safira mach cheʼic tsiʼ meleyob. Tsiʼ mulayob i yʌcʼ ti ñaʼtʌntel chaʼan tsiʼ yʌcʼʌyob taqʼuin yaʼ ti templo. Pero mach tsʼʌcʌlic tsiʼ yʌcʼʌyob cheʼ bajcheʼ tsiʼ yʌlʌyob. Jin chaʼan, Dios tsiʼ yʌqʼueyob i toj i mul (Hch. 5:1-10). Cheʼ mucʼʌch laj cʼuxbin la quermañojob tiʼ sujmlel, ti jumpʼejl lac pusicʼal mi laj coltañob i maʼañic mi lac luʼ acʼ tiʼ ñaʼtʌntel tsaʼ bʌ lac mele. An hermanojob muʼ bʌ i coltañob jiñi Junmojt muʼ bʌ i pʌsob bij chaʼan miʼ chajpʌntel jiñi chʼujul bʌ bʌlñʌcʼʌl, pero maʼañic miʼ yʌcʼob i bʌ ti qʼuejlel ti ñuc mi muqʼuic i tsictesañob chuqui tac ti eʼtel (troñel) melbil i chaʼañob.

10. ¿Bajcheʼ miʼ mejlel laj qʼuel ti ñuc yambʌlob?

¹⁰ Laʼ laj qʼuel ti ñuc yambʌlob (pejcan Romanos 12:10). Cheʼ bʌ Jesús tsiʼ pocbe i yoc jiñi apóstolob i chaʼan, an chuqui wem bʌ tsiʼ pʌsbeyonla cʌytʌl (Jn. 13:3-5, 12-15). Jiñi apóstolob maʼañic tsaʼ mejli i wen chʼʌmbeñob isujm tsaʼ bʌ i mele Jesús jinto cheʼ tsaʼ aqʼuentiyob chʼujul bʌ espíritu (Jn. 13:7). Joñonla yomʌch mi lac chaʼlen wersa lac pʌs lac pecʼlel cheʼ bajcheʼ Jesús yicʼot mi laj qʼuel ti ñuc yambʌlob. ¿Bajcheʼ? Mach yomic mi laj cʌlʌx qʼuel lac bʌ ti ñuc chaʼan tsajñiyonla ti escuela, chaʼan chuqui melbil lac chaʼan o chaʼan jiñi eʼtel tac aqʼuebilonbʌla tiʼ tojlel Jehová (Ro. 12:3). Yicʼot jaʼel, tijicña mi la cubin ti tojlel juntiquil muʼ bʌ i subentel wen tac bʌ tʼan chaʼan i yeʼtel, anquese tajol mi lac ñaʼtan chaʼan cheʼʌch yom mi lac melbentel jaʼel cheʼ la cujil chaʼan tsaʼ lac chaʼle coltaya ti jiñi eʼtel.

11. ¿Chucoch yom mi la cʌqʼueñob i yubin i tijicñʌyel jiñi hermanojob?

¹¹ Laʼ la cʌqʼueñob i yubin i tijicñʌyel jiñi hermanojob. Jiñʌch jayajl mi lac mejlel, yom mi la cʌqʼueñob i yubin i tijicñʌyel jiñi yambʌlob, come utsʼatʌch chaʼan miʼ mejlel lac pʼʌtʼesañob (Ef. 4:29). Pero yom mi lac wen ñaʼtan mi loqʼuemʌch ti lac pusicʼal yicʼot mi isujmʌch chuqui mi lac subeñob. Mach lac toʼol al mach bʌ añic mi la cubin ti lac pusicʼal i mi an majqui yom mi la cʌqʼuen jumpʼejl ticʼojel, yomʌch mi lac mel (Pr. 29:5). Maʼañic i cʼʌjñibal mi an majqui mi la poj aqʼuen i yubin i tijicñʌyel, pero mi lac jatsʼ ti tʼan cheʼ añonla la quicʼot yambʌlob. Jiñi apóstol Pablo utsʼatax bajcheʼ tsiʼ pʌsʌ jiñi isujm bʌ cʼuxbiya. Ti jumpʼejl bʌ qʼuin, tiʼ sube jiñi hermanojob ti Corinto chuqui utsʼat woliʼ melob (1 Co. 11:2). Pero tsaʼʌch i tiqʼuiyob jaʼel yicʼot wen jach tiʼ tsictesʌbeyob chuqui mach bʌ weñic woliʼ melob (1 Co. 11:20-22).

12. Cheʼ mi lac pʼuntan yambʌlob, ¿bajcheʼ mi lac pʌs laj cʼuxbiya?

¹² Laʼ lac pʌs lac pʼuntaya. Jehová miʼ yʌl chaʼan yom mi lac tʼoxben la quermañojob chuqui an lac chaʼan (pejcan 1 Juan 3:17). Pero yomʌch wem bʌ i sujmlel chucoch mi lac mel. Laʼ laj cʼajtiben lac bʌ: «¿Cojach ba mic pʌsbeñob cutslel jiñi wen camigojoʼ bʌ yicʼot ñuc bʌ mij qʼuelob ti congregación? ¿Jin jach ba mic pʌyob baʼañon jiñi am bʌ chuqui miʼ mejlel i chaʼ melob tic tojlel? ¿O muʼ ba c chaʼlen wersa c pʌsbeñob cutslel jiñi mach bʌ wen j cʌñʌyobic o jiñi maʼañic bʌ miʼ mejlel i chaʼ sutqʼuiñob bajcheʼ tsaʼ c melbeyob?» (Lc. 14:12-14). Laʼ lac ñaʼtan tiʼ tojlel  juntiquil hermano yom bʌ coltʌntel tiʼ caj mach weñic chuqui tsiʼ mele, o juntiquil mach bʌ añic subebil i chaʼañonla wocolix la cʌlʌ cheʼ tsaʼ lac pʌyʌ ti la cotot ti yambʌ qʼuin. Mi cheʼ bajcheʼ jiñi, yom mi lac jacʼ ili ticʼojel: «Pʌyʌla ochel laʼ piʼʌlob ti laʼ wotot. Mach yomic mi laʼ chaʼlen wulwul tʼañ», yom i yʌl, chaʼan ti jumpʼejl lac pusicʼal (1 P. 4:9, Jiñi tsijiʼ bʌ wen tʼañ chaʼañ estudio). Tijicñayonla cheʼ mucʼʌch lac jacʼ ili principio, come weñʌch i sujmlel chucoch mi lac mel (Hch. 20:35).

13. a) ¿Baqui ora yom la cujil pijt tiʼ tojlel la quermañojob? b) ¿Bajcheʼ miʼ mejlel laj coltan jiñi cʼuñoʼ bʌ?

¹³ Laʼ laj coltan jiñi cʼuñoʼ bʌ. Mi lac pʌs chaʼan isujmʌch laj cʼuxbiya cheʼ mi lac jacʼ ili mandar: «Coltanla jini mach bʌ añobic i pʼʌtʌlel. Cuchbenla i sajtemal pejtelel winicob» (1 Ts. 5:14). An cabʌl hermanojob mach bʌ pʼʌtʌlobic ti congregación, pero ti wiʼil miʼ chaʼ pʼʌtʼañob. I an yambʌlob yom bʌ mi lac bej coltañob come jal miʼ chaʼ pʼʌtʼañob, i yomʌch la cujil pijt. ¿Bajcheʼ? Mi laj cʼʌn jiñi Biblia chaʼan mi lac pʼʌtʼesʌben i pusicʼal, mi lac pʌyob loqʼuel ti subtʼan o mi lac ñʌchʼtan chuqui miʼ yʌlob. Yom mi laj cʼajtesan chaʼan ti jujuntiquil añʌch baqui pʼʌtʌlonla yicʼot baqui cʼuñonla, jin chaʼan mach yomic mi la cʌl mi wen pʼʌtʌl juntiquil hermano o maʼañic. Jinto jiñi apóstol Pablo tsiʼ yʌlʌ chaʼan añʌch i cʼunlel (2 Co. 12:9, 10). Ti lac pejtelel la com laj coltʌntel tiʼ tojlel yambʌ la quermañojob.

14. Chaʼan an ñʌchʼtʌlel tiʼ tojlel la quermañojob, ¿chuqui yom mi lac mel?

¹⁴ Yom chʌn añonla ti ñʌchʼtʌlel. Yom mi lac chaʼlen wersa chaʼan ti ñʌchʼtʌlel añonla yicʼot yambʌ hermanojob anquese maʼañic miʼ wen chʼʌmbeñoñobla isujm o miʼ melob mach bʌ weñic ti lac tojlel (pejcan Romanos 12:17, 18). Mi tsaʼ la cʌlʌ mach bʌ weñic, ti jumpʼejl lac pusicʼal yom mi laj cʼajtin lac ñusʌbentel. Mach cojach yom mi la cʌl «ñusʌbeñon», yom mi la cʌqʼuen i ñaʼtan chaʼan machʌch weñic tsaʼ bʌ lac mele, i mi lac suben: «Ñusʌbeñon cheʼ mach weñic chuqui tsaʼ c tumbeyet». Ti jumpʼejl ñujpuñel ñucʌch i cʼʌjñibal jiñi ñʌchʼtʌlel. Mach weñic cheʼ miʼ poj pʌsob tiʼ tojlel quixtañujob chaʼan mucʼʌch i cʼuxbiñob i bʌ, pero maʼañic miʼ pejcañob i bʌ cheʼ i bajñelob jach, miʼ yʌʼleñob i bʌ o muʼto i jatsʼob i bʌ.

15. ¿Bajcheʼ tac miʼ mejlel lac pʌs chaʼan tsaʼix lac ñusʌbe i mul juntiquil?

¹⁵ Laʼ lac ñusʌben i mul yambʌlob. Mi an chuqui mi lac melbentel, yomʌch mi lac ñusʌbeñob yicʼot mi lac ñajʌtesan, anquese tajol mach tsajalic i chaʼan. Jiñi xñoptʼañob miʼ jacʼob ili ticʼojel: «Chʌn cuchbeñob i sajtemal laʼ piʼʌlob ti laʼ cʼuxbiya. Chaʼlenla wersa chaʼan ñʌchʼʌl mi laʼ wajñel ti jumpʼejl jach laʼ pusicʼal ti jini Espíritu» (Ef. 4:2, 3). Chaʼan ti jumpʼejl lac pusicʼal mi lac ñusan muʼ bʌ lac tumbentel, wen jach chuqui yom mi lac ñaʼtan i ‹maʼañic mi lac lot ti lac pusicʼal› (1 Co. 13:4, 5). Mi chʌn an lac michʼajel ti lac pusicʼal, miʼ mejlel i ñajtʼesañonla tiʼ tojlel la quermaño yicʼot Jehová (Mt. 6:14, 15). Cheʼ  mi lac taj ti oración jiñi tsaʼ bʌ i lowoyonla jiñʌch yambʌ junchajp bajcheʼ mi lac pʌs chaʼan tsaʼʌchix lac ñusʌbe i mul (Lc. 6:27, 28).

16. ¿Bajcheʼ yilal yom mi laj qʼuel jiñi eʼtel muʼ bʌ la cʌqʼuentel ti chaʼan bʌ Jehová?

¹⁶ Laʼ la cʌcʼ lac bʌ chaʼan i wenlel yambʌlob. Cheʼ mi la cʌqʼuentel jumpʼejl eʼtel ti chaʼan bʌ Jehová, yom mi lac ñaʼtan chaʼan jiñʌch i yorajlel mi lac pʌs jiñi isujm bʌ cʼuxbiya. ¿Bajcheʼ? «Mach i lon sʌclan i bajñel wenlel mi juntiquilic. Laʼ i ñaʼtan i wenlel yañoʼ bʌ» (1 Co. 10:24). Jumpʼejl ejemplo, juntiquil acomodador ti colem tempa bʌ jiñʌch ñaxam bʌ yaʼan, jin chaʼan tajol miʼ tilel tiʼ pusicʼal chaʼan mi wʌn mʌctan jiñi ñaxan tac bʌ buchlibʌl ñumen wem bʌ chaʼan i familia. Pero mach cheʼic miʼ melob, yaʼʌch miʼ cʌytʌlob baqui woliyob ti eʼtel anquese maʼañic miʼ mulañob. Cheʼ bajcheʼ ili, miʼ pʌsob chaʼan mach jiñob jach miʼ ñaʼtañob i bʌ. ¿Am ba bajcheʼ miʼ mejlel lac lajiñob?

17. Cheʼ bʌ juntiquil miʼ chaʼlen tsʌts bʌ mulil, ¿chuqui mi caj i mel mi añʌch isujm bʌ i cʼuxbiya?

¹⁷ Laʼ lac tsictesan jiñi lac mul yicʼot laʼ laj cʌy lac mel. An hermanojob chaʼlebiloʼ bʌ i chaʼan tsʌts bʌ mulil maʼañic bʌ miʼ tsictesañob come quisintic miʼ yubiñob i mach yomobic i yʌqʼuen i chʼijiyemlel yambʌlob (Pr. 28:13). Pero bajcheʼ iliyi maʼañic miʼ pʌsob cʼuxbiya, mucʼ jach i lowob i bʌ yicʼot miʼ lowob yambʌlob. Cheʼ jaʼel, jiñi chʼujul bʌ espíritu maʼañix mi caj i mel i yeʼtel yaʼ ti congregación i miʼ mejlel ti sajtel jiñi ñʌchʼtʌlel (Ef. 4:30). Mi juntiquil muʼ bʌ i chaʼlen tsʌts bʌ mulil an isujm bʌ i cʼuxbiya, mi caj i pejcan jiñi ancianojob chaʼan miʼ cʼajtin i coltʌntel (Stg. 5:14, 15).

18. ¿Chucoch wen ñuc i cʼʌjñibal jiñi isujm bʌ cʼuxbiya?

¹⁸ Jiñi cʼuxbiya jiñʌch ñumen ñuc bʌ i melbal juntiquil xñoptʼan (1 Co. 13:13). Miʼ yʌcʼonla ti cʌjñel chaʼan isujm bʌ xcʌntʼañonla i chaʼan Jesús, i chaʼan woli lac lajin Jehová, yaʼ baqui chʼoyol jiñi cʼuxbiya (Ef. 5:1, 2). Pablo tsiʼ yʌlʌ chaʼan maʼañic chuqui i cʼʌjñibal mi maʼañic i cʼuxbiya (1 Co. 13:2). Jin mecu chaʼan, laʼ lac chʌn pʌs laj «cʼuxbiya ti isujm [yicʼot] ti lac melbal», mach ti lac tʼañic jach.