1, 2. a) ¿Bajcheʼ yilal bʌ ñʌchʼtʌlel miʼ mejlel lac taj ili ora? b) ¿Chucoch maxto añic miʼ mejlel lac taj pejtelel jiñi ñʌchʼtʌlel la com bʌ ili ora? (Qʼuele jiñi foto).

TI LAC pejtelel mi lac mulan chumtʌl cheʼ an ñʌchʼtʌlel i maʼañic chuqui mi laj cʼojoʼtan. Jin chaʼan, mi lac wen aqʼuen wocolix i yʌlʌ Jehová cheʼ miʼ yʌqʼueñonla ‹i ñʌchʼtʌlel lac pusicʼal chʼoyol bʌ ti Dios›. Ili ñʌchʼtʌlel maʼañic miʼ yʌcʼ ti ochel ti lac ñaʼtʌbal yicʼot ti lac pusicʼal muʼ bʌ i yʌqʼueñonla lac chʼijiyemlel (Fil. 4:6, 7). Come tsaʼix la cʌcʼʌ laj cuxtʌlel ti Jehová an lac chaʼan «i ñʌchʼtʌlel lac pusicʼal yicʼot Dios», yom i yʌl, chaʼan utsʼat añonla la quicʼot (Ro. 5:1, Jiñi tsijiʼ bʌ wen tʼañ chaʼañ estudio).

² Pero maxto i yorajlelic chaʼan Dios miʼ chʼʌm tilel pejtelel jiñi ñʌchʼtʌlel la com bʌ. Ili ora an cabʌl wocol yicʼot an wiñicob xʼixicob (quixtañujob) jontoloʼ bʌ i melbal, come chumulonla ti cojix bʌ qʼuin (2 Ti. 3:1-4). Cheʼ jaʼel, yom mi lac chaʼlen wersa laj contrajin Satanás yicʼot jiñi cʌntesa muʼ bʌ i puc (2 Co. 10:4, 5). Pero cheʼ an lac piʼʌlob mach bʌ Testigojobic, jiñʌch muʼ bʌ i mejlel i ñumen chilbeñonla i ñʌchʼtʌlel lac pusicʼal. Tajol an muʼ bʌ i wajleñob lac ñopbal o miʼ yʌlob chaʼan woli (choncol) lac tʼox jiñi lac familia. An  muʼto bʌ i mejlel i subeñoñobla chaʼan maʼañix mi caj i qʼueloñobla tiʼ familia. ¿Chuqui yom la cujil cheʼ an laj contrajintel ti lac familia? ¿Chuqui miʼ mejlel lac mel (chaʼlen) cheʼ añonla ti ili tsʌts bʌ wocol?

3, 4. a) ¿Chuqui mi caj i yujtel tsiʼ yʌlʌ Jesús chaʼan jiñi i cʌntesa? b) ¿Baqui ora ñumen wocol ti tsajcʌntel Jesús?

³ Jesús yujil chaʼan tiʼ caj i cʌntesa miʼ cajel tʼox bʌ i chaʼan jiñi xcʌntʼañob i chaʼan yomʌch miʼ pʌsob i chʼejlel cheʼ miʼ contrajintelob. Yicʼot jaʼel, miʼ mejlel i jisan jiñi ñʌchʼtʌlel ti jumpʼejl familia. Jesús tsiʼ yʌlʌ: «Mach mi laʼ lon ñaʼtan ti laʼ pusicʼal tsaʼ tiliyon chaʼan mic ñʌchʼchocon jini añoʼ bʌ ti pañimil. Maʼanic tsaʼ tili c ñʌchʼchocoñob, pero chaʼan mi cʌqʼueñob espada, chaʼan miʼ contrajiñob i bʌ. Tsaʼ tiliyon chaʼan mi cʌqʼueñob i tʼoxob i bʌ, winic tiʼ contra i tat, xʼixic tiʼ contra i ñaʼ, aʼlibʌl tiʼ contra i yʌʼlib. Winicob mi caj i tajob i tsʼaʼlentel tiʼ tojlel i piʼʌlob tiʼ yotot» (Mt. 10:34-36).

⁴ ¿Chucoch tsiʼ yʌlʌ Jesús mach laʼ ñaʼtan chaʼan tsaʼ tili c ñʌchʼchocon jiñi añoʼ bʌ ti pañimil (mulawil)? Come yom chaʼan jiñi quixtañujob miʼ ñaʼtañob chaʼan añʌch wocol cheʼ miʼ sujtelob ti xcʌntʼan i chaʼan. Jesús maʼañic tsiʼ ñaʼta chaʼan miʼ tʼox quixtañujob come tsaʼ tili chaʼan miʼ yʌcʼ «ti cʌjñel i sujmlel Dios» (Jn. 18:37). Pero jiñʌch muʼ bʌ i mejlel ti ujtel. Jin chaʼan, Jesús tiʼ tsictesa chaʼan an qʼuiñil wocolʌch cheʼ xcʌntʼañonla i chaʼan, ñumento cheʼ jiñi la camigojob o lac piʼʌlob miʼ pʼajob i sujmlel bʌ.

5. ¿Chuqui an i cuchuyob jiñi xcʌntʼañob i chaʼan Jesús?

⁵ Jesús tsiʼ yʌlʌ chaʼan jiñi xcʌntʼañob i chaʼan ti jumpʼejlob i pusicʼal yom miʼ cuchob wocol, bajcheʼ i contrajintelob tiʼ familia (Mt. 10:38). Jiñi xcʌntʼañob tsaʼʌch i cuchuyob i wajlentel yicʼot i tsʼaʼlentelob tiʼ familia chaʼan miʼ chʼʌjmelob ti Cristo. Pero ñumen cabʌl chuqui tajbil i chaʼañob bajcheʼ tsaʼ bʌ i cʌyʌyob (pejcan Marcos 10:29, 30).

6. ¿Chuqui yom mi laj cʼajtesan mi maʼañic miʼ melbeñob i yeʼtel Jehová jiñi yambʌ lac familia?

⁶ Anquese jiñi lac familia mach yomic chaʼan mi lac melben i yeʼtel (troñel) Jehová, yomʌch mi laj cʼuxbiñob. Pero yom mi lac ñaʼtan chaʼan ñaxan yom mi laj cʼuxbin Dios yicʼot Cristo (Mt. 10:37). Yom mi laj cʼajtesan jaʼel chaʼan Satanás yom i cʼʌn laj cʼuxbiya ti lac familia chaʼan mi laj cʌy Jehová. Laʼ laj cʌl chuqui tac ti wocol miʼ mejlel ti ujtel i bajcheʼ miʼ mejlel lac ñusan.

7. ¿Bajcheʼ yilal yom miʼ qʼuel i ñujpuñel juntiquil mach bʌ Testigojic i yijñam o i ñoxiʼal?

⁷ Jiñi Biblia miʼ wʌn al chaʼan muʼ bʌ i ñujpuñelob «mi caj i yubiñob wocol» (1 Co. 7:28). Ñumento miʼ mejlel lac taj wocol ti lac ñujpuñel mi mach Testigojic jiñi lac piʼʌl. Jin chaʼan, jiñi woli bʌ lac ñusan ti lac ñujpuñel, cheʼʌch yom mi laj qʼuel cheʼ bajcheʼ miʼ qʼuel Dios. Mi mach yomic i melben i yeʼtel Jehová jiñi lac piʼʌl, mach jiñic chaʼan mi caj laj cʌy o mi lac mel divorcio (1 Co. 7:12-16). Jiñi ijñamʌl xñoptʼan bʌ yom miʼ qʼuel ti ñuc i ñoxiʼal come jiñʌch i jol i familia, anquese maʼañic chuqui woli (yʌquel) i yʌcʼ tiʼ chaʼan bʌ Dios. Cheʼ jaʼel, jiñi ñoxiʼalʌl yom miʼ cʼuxbin yicʼot miʼ cʌntan i yijñam, anquese maʼañic miʼ melben i yeʼtel Jehová (Ef. 5:22, 23, 28, 29).

8. ¿Chuqui yom mi laj cʼajtiben lac bʌ mi jiñi lac piʼʌl pʼisbil jach bajcheʼ yom i yʌqʼueñonla lac melben i yeʼtel Jehová?

⁸ Pero mi jiñi lac piʼʌl pʼisbil jach bajcheʼ miʼ yʌcʼonla lac melben i yeʼtel Jehová, ¿chuqui miʼ mejlel lac mel? Jumpʼejl ejemplo, juntiquil hermana tsaʼ subenti tiʼ ñoxiʼal mach bʌ Testigojic chaʼan maʼañic jaypʼejl qʼuin yom miʼ loqʼuel ti subtʼan. Mi cheʼ mi lac ñusan jaʼel, yom mi laj cʼajtiben lac bʌ: «¿Woli ba i xicʼon j cʌy c chʼujutesan Jehová? Mi mach cheʼiqui, ¿muʼ  ba i mejlel c jacʼben i tʼan?». Cheʼ mi la pʌs la cutslel miʼ coltañonla chaʼan maʼañic miʼ toʼol tejchel wocol (Fil. 4:5).

9. ¿Bajcheʼ miʼ mejlel i cʌntesan i yalobil juntiquil xñoptʼan chaʼan miʼ qʼuel ti ñuc jiñi i tat o i ñaʼ mach bʌ Testigojic?

⁹ Wocolʌch ti cʌntesʌntel alʌlob mi jiñi lac piʼʌl maʼañic miʼ melben i yeʼtel Jehová jaʼel. Yom mi laj cʌntesañob i chʼujbin jiñi mandar baʼ miʼ yʌl chaʼan yom miʼ qʼuelob ti ñuc i tat i ñaʼ (Ef. 6:1-3). Pero ¿chuqui yom mi lac mel mi jiñi lac piʼʌl maʼañic miʼ jacʼ muʼ bʌ i yʌl jiñi Biblia? Laʼ lac pʌsbeñob chaʼan mucʼʌch laj qʼuel ti ñuc. Yom mi laj qʼuel jiñi wen tac bʌ i melbal yicʼot mi lac suben jiñi wen tac bʌ chuqui miʼ mel. Mach lac suben mach bʌ utsʼatic tiʼ wut la calobilob. Yom bʌ mi lac suben la calobilob jiñʌch chaʼan ti jujuntiquil an ti lac wenta mi lac ñaʼtan miʼ mucʼʌch caj lac melben i yeʼtel Dios o maʼañic. Cheʼ wen i melbal la calobilob miʼ mejlel i ñijcʌben i pusicʼal jiñi lac piʼʌl chaʼan miʼ cʌn Jehová jaʼel.

10. Mi mach Testigojic i piʼʌl juntiquil hermana, ¿bajcheʼ miʼ mejlel i cʌntesan i yalobilob tiʼ chaʼan bʌ Jehová?

¹⁰ An i tajol jiñi mach bʌ Testigojic miʼ mulan i mel yicʼot i yalobilob qʼuiñijel tac i chaʼan bʌ pañimil o chaʼan miʼ ñopob i cʌntesa jiñi mach bʌ isujmic ñopbalʌl. An muʼ bʌ i mʌctañob i yijñam Testigo bʌ chaʼan maʼañic miʼ cʌntesan i yalobilob. Pero jiñi hermana mucʼʌch i chaʼlen wersa chaʼan miʼ pʌsbeñob i sujmlel am bʌ ti Biblia i yalobilob (Hch. 16:1; 2 Ti. 3:14, 15). Jumpʼejl ejemplo, tajol juntiquil hermana miʼ mʌctʌntel tiʼ ñoxiʼal chaʼan miʼ cʌntesan jiñi chut to bʌ i yalobilob o chaʼan miʼ pʌyob majlel ti tempa bʌ. Anquese mucʼʌch i jacʼben i tʼan i ñoxiʼal, pero cheʼ jajayajl miʼ mejlel i suben i yalobilob, cheʼʌch miʼ mel. Cheʼ bajcheʼ ili, miʼ cʌntesañob tiʼ chaʼan  bʌ Jehová yicʼot i mandar tac (Hch. 4:19, 20). Ti isujm, jiñʌch i yalobilob miʼ cajelob i ñaʼtan mi mucʼʌch i melbeñob i yeʼtel Jehová o maʼañic (Dt. 30:19, 20). *

11. ¿Chuqui miʼ mejlel i tech wocol la quicʼot jiñi yambʌ lac familiajob mach bʌ Testigojic?

¹¹ Tajol cheʼ tsaʼ lac teche estudio yicʼot jiñi i testigojob Jehová maʼañic tsaʼ lac sube jiñi yambʌ lac familiajob. Pero jiñi lac ñopoñel (chʼujbiya) ti Dios tsaʼ ñumen pʼʌtʼa majlel, i tsaʼ laj qʼuele chaʼan yom mi lac pʌs lac chʼejlel yicʼot mi lac subeñob chuqui woli lac ñop (Mr. 8:38). Mi an lac taja wocol la quicʼotob chaʼan xucʼulonla tiʼ tojlel Jehová, ¿chuqui yom mi lac mel chaʼan maʼañic miʼ jilel jiñi ñʌchʼtʌlel yicʼot bej xucʼulonla? Laʼ laj qʼuel muʼ bʌ i mejlel i coltañonla.

12. ¿Chucoch miʼ mejlel i contrajiñoñobla yambʌ lac familia cheʼ Testigojonla, i chuqui miʼ mejlel lac mel?

¹² Laʼ lac chʼʌmben isujm chuqui miʼ ñaʼtan jiñi lac familia mach bʌ Testigojobic. Cheʼ mi laj cʌn jiñi i sujmlel am bʌ ti Biblia mucʼʌch i wen aqʼueñonla lac tijicñʌyel. Pero an lac familiajob muʼ bʌ i ñaʼtañob chaʼan tsaʼ jach lotintiyonla o chaʼan añonla ti jumpʼejl secta. Tajol miʼ ñaʼtañob chaʼan maʼañix mi laj cʼuxbiñob come maʼañic mi lac mel qʼuiñijel la quicʼotob. Miʼ bʌcʼñañob chaʼan miʼ mejlel lac taj wocol. Yomʌch mi lac chʼʌmben isujm chuqui miʼ ñaʼtañob i mi lac ñʌchʼtañob chaʼan miʼ mejlel lac ñaʼtan chuqui miʼ cʼojoʼtañob (Pr. 20:5). Miʼ mejlel lac mel bajcheʼ jiñi apóstol Pablo, tsiʼ chaʼle wersa chaʼan miʼ chʼʌmben isujm chuqui miʼ ñaʼtan «pejtelel winicob» come cheʼʌch tsaʼ mejli i subeñob jiñi wen tʼan. Cheʼ mi lac mel jaʼel bajcheʼ ili, miʼ mejlel lac suben chuqui mi lac ñopol jiñi lac familiajob (1 Co. 9:19-23).

13. ¿Bajcheʼ yilal yom mi lac pejcan jiñi yambʌ lac familiajob?

¹³ Uts jach yom mi lac chaʼlen tʼan. Jiñi Biblia miʼ yʌl: «Tiʼ pejtelel ora chaʼlenla uts bʌ tʼan» (Col. 4:6). Miʼ mejlel laj cʼajtiben chʼujul bʌ i yespíritu Jehová chaʼan ti wen jach bʌ tʼan mi lac pejcan jiñi lac familiajob. Mach yomic mi lac ñop lac luʼ tajbeñob ti tʼan jiñi mach bʌ isujmic chuqui ñopol i chaʼañob. Mi mach weñic chuqui miʼ subeñoñobla, cheʼ jach yomonla bajcheʼ jiñi apóstolob. Pablo tiʼ tsʼijbu: «Cheʼ miʼ pʼajoñob mic pejcañob ti wen bʌ tʼan. Cheʼ miʼ ticʼlañoñob, mij cuchben lojon. Cheʼ miʼ yuʼyajiñoñob, mic pejcañob ti uts bʌ tʼan» (1 Co. 4:12, 13).

14. ¿Bajcheʼ miʼ coltañonla cheʼ wen lac melbal?

¹⁴ Yom wen lac melbal. Cheʼ wen jach mi lac chaʼlen tʼan la quicʼot lac familiajob an ñʌchʼtʌlel, pero miʼ mejlel i ñumen coltañonla cheʼ mi lac pʌs wem bʌ lac melbal (pejcan 1 Pedro 3:1, 2, 16). Mi weñʌch bajcheʼ mi lac pʌs, miʼ mejlel i qʼuelob chaʼan jiñi i testigojob Jehová tijicñayob tiʼ ñujpuñel, miʼ cʌntañob i yalobil yicʼot utsʼat chumulob. Anquese maʼañic baʼ ora miʼ sujtelob ti Testigo jiñi lac tat lac ñaʼ, miʼ mejlel la cubin lac tijicñʌyel chaʼan utsʼat woliʼ qʼuelonla Jehová come chʌn xucʼulonla.

15. ¿Chuqui miʼ mejlel lac mel chaʼan maʼañic miʼ tejchel aʼleya la quicʼot yambʌ lac familia?

¹⁵ Laʼ lac wʌn ñaʼtan jiñi wocol. Yom mi lac wʌn ñaʼtan chuqui tac miʼ mejlel i tech leto (aʼleya tʼan) la quicʼot yambʌ lac familiajob i laʼ laj qʼuel chuqui yom mi lac mel chaʼan mach cheʼic mi la cujtel (Pr. 12:16, 23). Juntiquil hermana chʼoyol bʌ ti Australia miʼ yʌl: «Jiñi c suegro tsiʼ wen contraji jiñi i sujmlel. Cheʼ muʼto caj c pejcan lon ti teléfono, ñaxan mij cʼajtiben lon i coltaya Jehová quicʼot c ñoxiʼal chaʼan mach michʼic mic jacʼben lon i tʼan. Mic wen ñaʼtan lon chuqui yom mi cʌleʼ lon chaʼan wen jach mic chaʼlen lon tʼan. I mach wen jalic mi lon c pejcan chaʼan maʼañic miʼ tamʼan jiñi tʼan chaʼan bʌ ñopbalʌl muʼ bʌ i mejlel i tech aʼleya».

16. ¿Chuqui miʼ mejlel i coltañonla chaʼan mach lac mulic mi la cubin cheʼ miʼ tejchel aʼleya yicʼot yambʌ lac familia?

 ¹⁶ Tiʼ sujm, añʌch i tajol miʼ wersa tejchel aʼleya yicʼot jiñi yambʌ lac familia mach bʌ Testigojic. Tajol lac mulʌch mi la cubin come mi laj cʼuxbiñob yicʼot la com chaʼan chʌn wen miʼ qʼueloñobla. Mi cheʼ mi la cubin bajcheʼ jiñi, laʼ laj cʼajtesan chaʼan ñumen ñuc i cʼʌjñibal cheʼ xucʼulonla ti Jehová, i mach jiñic laj cʼuxbiya ti lac familia. Cheʼ bajcheʼ ili, jiñi lac familiajob tajol miʼ cʼotelob i cʌn chaʼan ñucʌch i cʼʌjñibal mi lac jacʼ muʼ bʌ i yʌl jiñi Biblia come yaʼʌch cʌylem laj cuxtʌlel. Pero yom mi lac ñaʼtan chaʼan maʼañic majqui miʼ mejlel lac xicʼ chaʼan miʼ melben i yeʼtel Jehová. Muʼ bʌ i mejlel lac mel jiñʌch cheʼ mi lac subeñob bajcheʼ an i coltayonla cheʼ mi lac jacʼben i tʼan. Come Dios an i cʼuxbiya, miʼ yʌqʼueñob tiʼ wenta cheʼ bajcheʼ joñonla, chaʼan miʼ ñaʼtañob mi mucʼʌch caj i melbeñob i yeʼtel o maʼañic (Is. 48:17, 18).

17, 18. ¿Chuqui miʼ mejlel lac mel mi juntiquil ti lac familia miʼ cʌy Jehová?

¹⁷ Wen cʼux mi la cubin cheʼ miʼ chaʼlentel ti expulsar juntiquil ti lac familia o miʼ cʌy ajñel bajcheʼ Testigo, lajal bajcheʼ miʼ sʌl jecʼonla jumpʼejl machit. Pero ¿chuqui miʼ mejlel lac mel?

¹⁸ Yom chʌn chʼejlonla tiʼ chaʼan bʌ Dios. Chaʼan chʌn pʼʌtʌl lac ñopoñel, ti bele ora yom mi lac pejcan jiñi Biblia, mi lac chajpan lac bʌ yicʼot mi lac majlel ti tempa bʌ, mi lac loqʼuel ti subtʼan i mi laj cʼajtin lac pʼʌtʌlel ti Dios (Jud. 20, 21). Pero mi tsaʼ laj cʌyʌ lac mel ili tac tiʼ caj lac chʼijiyemlel, ¿chuqui miʼ mejlel lac mel? Mach yomic mi lac boʼoyel. Laʼ la cʌcʼ lac ñaʼtʌbal tiʼ yeʼtel Jehová come jiñʌch mi caj i coltañonla chaʼan mi lac ticʼ lac pensar yicʼot lac chʼijiyemlel. Laʼ laj qʼuel chuqui tsaʼ ujti tiʼ tojlel jiñi tsaʼ bʌ i tsʼijbu jiñi Salmo 73. Añʌch chuqui tsiʼ ñusa baqui wocol tsiʼ yubi chaʼan miʼ mejlel i ticʼ i pensar yicʼot bajcheʼ yubil miʼ yubin i bʌ. Pero tsaʼ bʌ i colta i tojʼesan i pensar jiñʌch cheʼ tsiʼ yʌcʼʌ i ñaʼtʌbal tiʼ melol i yeʼtel Jehová (Sal. 73:16, 17). Mi mucʼʌch lac mel iliyi, mi caj i coltañonla jaʼel.

19. ¿Bajcheʼ mi lac pʌs chaʼan mucʼʌch laj qʼuel ti ñuc i ticʼojel Jehová?

¹⁹ Laʼ laj qʼuel ti ñuc i ticʼojel Jehová. Ti ñaxan, cʼux mi la cubin cheʼ mi lac tijqʼuel, pero mucʼʌch lac taj lac wenlel ti lac pejtelel, jinto jaʼel jiñi muʼ bʌ i chaʼlen mulil (pejcan Hebreos 12:11). Jumpʼejl ejemplo, Jehová miʼ subeñonla chaʼan mi laj cʌy lac ñochtan jiñi muʼ bʌ i chaʼlen mulil i maʼañic miʼ cʌy i mul (1 Co. 5:11-13). Anquese cʼuxʌch mi la cubin, mach yomic mi lac pejcan jiñi tsaʼ bʌ chaʼlenti ti expulsar ti lac familia mi maʼañic i cʼʌjñibal, mi jiñic to ti teléfono, mensaje tac, ti carta, correo electrónico o yan tac bʌ bajcheʼ miʼ mejlel ti Internet.

20. ¿Baqui bʌ jiñi pijtaya mach bʌ yomic mi lac sʌt?

²⁰ Mach lac sʌt lac pijtaya. Jiñi cʼuxbiya miʼ luʼ pijtan, jin chaʼan, mach yomic mi lac sʌt lac pijtaya chaʼan miʼ mejlel ti chaʼ sujtel jiñi tsaʼ bʌ i cʌyʌ Jehová (1 Co. 13:7). Mi tsaʼ laj qʼuele chaʼan juntiquil ti lac familia tsaʼ bʌ i cʌyʌ Jehová wolix i cʌy i tsucul melbal, miʼ mejlel laj cʼajtiben Dios chaʼan jiñi Biblia miʼ yʌqʼuen i pʼʌtʌlel chaʼan miʼ jacʼ ili tʼan: «Chaʼ sutqʼuin a bʌ tic tojlel» (Is. 44:22).

21. ¿Chuqui miʼ mejlel lac mel mi tsaʼ lac taja contrajintel ti lac familia tiʼ caj chaʼan woli lac tsajcan Jesús?

²¹ Jesús tsiʼ yʌlʌ chaʼan jin yom mi lac ñumen cʼuxbin bajcheʼ yambʌlob. Pero tsiʼ ñopo chaʼan jiñi xcʌntʼañob i chaʼan mi caj i pʌsob i chʼejlel chaʼan xucʼul miʼ yajñelob anquese miʼ tajob contrajintel tiʼ familia. Mi tsaʼ lac taja contrajintel ti lac familia tiʼ caj woli lac tsajcan Jesús, la lac sʌclan laj coltʌntel ti Jehová chaʼan mi laj cuch (Is. 41:10, 13). Laʼ lac ñaʼtan chaʼan Jehová yicʼot Jesús tijicña miʼ qʼueloñobla i chaʼan yom i yʌqʼueñoñobla cabʌl bendición come xucʼulonla. Tiʼ sujm, iliyi miʼ yʌqʼueñonla cabʌl lac tijicñʌyel.