1, 2. Cheʼ bʌ jiñi xʼaltʼan Zacarías tsaʼ ujti i qʼuel jiñi i sietejlel i ñajal, ¿bajcheʼ yilal añob jiñi judíojob ti Jerusalén?

CHEʼ bʌ jiñi xʼaltʼan Zacarías tsaʼ ujti i qʼuel jiñi i sietejlel i ñajal, cabʌl chuqui tsaʼ caji i ñaʼtan. Tsaʼ bʌ i ñuqʼuesʌbe i pusicʼal jiñʌch cheʼ Jehová tsiʼ yʌlʌ chaʼan mi caj i yʌqʼueñob i toj i mul jiñi mach bʌ weñobic i melbal. Pero maʼañic chuqui qʼuextʌyem. Yonlel maʼañic miʼ cʌyob i mel chuqui mach bʌ weñic. Cheʼ jaʼel, jiñi judíojob maʼañic ujtem i chaʼ melbeñob (pʌtbeñob) i templo Jehová. ¿Chucoch tsiʼ cʌyʌyob i mel jiñi eʼtel (troñel) tsaʼ bʌ subentiyob ti Dios? ¿Chaʼan jach ba miʼ yʌcʼob i ñaʼtʌbal chaʼan miʼ chumtʌlob ti wen cheʼ tsaʼ chaʼ sujtiyob majlel tiʼ tejclum?

² Zacarías yujil chaʼan añobʌch i ñopoñel ti Dios jiñi judíojob tsaʼ bʌ chaʼ sujtiyob majlel ti Jerusalén. Jiñi Biblia miʼ yʌl chaʼan «Dios tsiʼ ñijcʌbeyob i pusicʼal» chaʼan miʼ cʌyob i yotot yicʼot i choñoñelob yaʼ ti Babilonia (Esd. 1:2, 3, 5). Tsiʼ cʌyʌyob jumpʼejl tejclum wen cʌmbil bʌ i chaʼañob, i tsaʼ majliyob ti yambʌ tejclum baqui cabʌlob mach bʌ cʌmbilic i chaʼañob. Tsiʼ qʼueleyob ti ñuc chaʼan yomʌch miʼ chaʼ mejlel i templo Dios, jin chaʼan tsiʼ xʌñʌyob ñumel ti jumpʼejl lum wen wocol bʌ yicʼot  bʌbʌqʼuen jax bʌ ti xʌjñel, am bʌ 1,600 kilómetro i ñajtlel.

3, 4. ¿Baqui tac bʌ wocol tsiʼ tajayob jiñi judíojob cheʼ bʌ tsaʼ chaʼ sujtiyob majlel ti Jerusalén?

³ Cheʼ bʌ wolito (choncolto) i xʌñob majlel ti Jerusalén, tajol tsaʼ caji i wen ñaʼtañob bajcheʼ yilal come yaʼʌch miʼ cajelob ti chumtʌl. Ubibil i chaʼañob chaʼan wen utsʼatax. I jiñi ñoxobix bʌ qʼuelbil i chaʼañob wajali chaʼan jiñi templo wen ñucʌch (Esd. 3:12). Cheʼ yaʼic añonla yicʼotob, ¿bajcheʼ yubil tsaʼ la cubi lac bʌ cheʼ tsaʼ cʼoti laj qʼuel Jerusalén? ¿Tsaʼ ba la cubi lac chʼijiyemlel cheʼ tsaʼ laj qʼuele chaʼan luʼ jejmeñix yicʼot wen pimix? ¿Tsaʼ ba caji lac lajin jiñi luʼ jejmeñix bʌ i tsʼajquil Jerusalén yicʼot jiñi i tsʼajquil Babilonia chaʼlajm bʌ melbil? Pero jiñi judíojob maʼañic tsiʼ tajayob i chʼijiyemlel come tsiʼ qʼueleyob i coltaya Jehová yicʼot i cʌntaya cheʼ bʌ tsiʼ chaʼleyob ñajt bʌ xʌmbal. Cheʼ bʌ tsaʼ cʼotiyob, tsaʼ bʌ i ñaxan meleyob yaʼ baqui tsaʼ ajñi jiñi templo jiñʌch jumpʼejl pulʌntib. Yaʼi tsaʼ caji i yʌqʼueñob pulbil bʌ i majtan Jehová ti jujumpʼejl qʼuin (Esd. 3:1, 2). Wen tijicñayob i maʼañic chuqui miʼ mejlel i yʌqʼueñob i chʼijiyemlel yubil.

⁴ Pero jiñi israelob mach cojic jach yom miʼ chaʼ melob jiñi templo, yom miʼ chaʼ tojʼesañob jaʼel jiñi tejclum. Yom miʼ melob i yotot yicʼot miʼ pʌcʼob chuqui tac yom miʼ cʼuxob (Esd. 2:70). Cabʌl i yeʼtelob. Pero muʼ bʌ i tsʼaʼleñob jiñi isujm bʌ chʼujutesaya tsaʼ caji i mʌctañob jiñi eʼtel. Ti ñaxan, jiñi israelob maʼañic tsiʼ cʌyʌyob i mel jiñi eʼtel. Pero 15 jab tsaʼ jalʼa i contrajintelob, jin chaʼan xucʼu xucʼul tsaʼ cajiyob ti cʼunʼan majlel (Esd. 4:1-4). Pero tsaʼ cʼoti yambʌ wocol cheʼ ti jabil 522 cheʼ bʌ maxto tilemic Cristo (m.t.C.), jiñi rey ti Persia tsiʼ yʌlʌ chaʼan maʼañix miʼ bej mejlel jiñi eʼtel ti Jerusalén. Maʼañic baqui ora miʼ caj ti tojʼesʌntel yilal jiñi tejclum (Esd. 4:21-24).

5. ¿Chuqui tsiʼ mele Jehová chaʼan miʼ pʼʌtʼesan i tejclum?

⁵ Jehová wen yujil chuqui i cʼʌjñibal i chaʼan jiñi judíojob. Jin chaʼan, Jehová tsiʼ yʌqʼue jiñi cojix bʌ i ñajal Zacarías chaʼan miʼ yʌqʼueñob i ñaʼtan chaʼan mucʼʌch i cʼuxbintelob yicʼot miʼ qʼuel ti ñuc pejtel chuqui tsiʼ meleyob. Cheʼ jaʼel, tsiʼ yʌqʼueyob i ñaʼtan chaʼan Jehová mi caj i cʌntañob mi mucʼʌch i chaʼ melob jiñi eʼtel tsaʼ bʌ aqʼuentiyob. Tiʼ tojlel Zacarías, tsiʼ yʌcʼʌ ili i tʼan miʼ mucʼʌch i chaʼ melob jiñi templo: «Cheʼʌch mi caj i yujtel mi xucʼul maʼ jacʼben i tʼan a Yum Dios» (Zac. 6:15).

6. a) ¿Bajcheʼ yilal miʼ tejchel jiñi cojix bʌ i ñajal Zacarías? (Qʼuele jiñi dibujo am bʌ tiʼ tejchibal). b) ¿Chucoch mach lajalic i colorlel jiñi caballo tac?

⁶ Muʼ bʌ i ñumen pʼʌtʼesan lac ñopoñel ti Dios tajol jiñʌch ili cojix bʌ i ñajal Zacarías, jiñi i yochojlel (pejcan Zacarías 6:1-3). Laʼ cu lac ñaʼtan tsaʼ bʌ i qʼuele tiʼ ñajal jiñi xʼaltʼan: Yaʼ tiʼ xiñil chaʼpʼejl wits melbil bʌ ti bronce, an chʌmpʼejl carreta chajpʌbil bʌ chaʼan guerra ti ajñel bʌ woli (yʌquel) i loqʼuel tilel. Jiñi caballo tac woli bʌ i tujcʼan majlel jiñi carreta tac mach junlajalic i colorlel, cheʼ bajcheʼ ili miʼ mejlel ti cʌjñel ti jujumpʼejl jiñi carro. Zacarías miʼ cʼajtin: «¿Chuqui jini?» (Zac. 6:4). Ili cʼajtiya yomʌch mi lac ñaʼtan come jiñi i ñajal Zacarías miʼ tajonla jaʼel ili ora.

7, 8. a) ¿Chuqui yom i yʌl jiñi chaʼpʼejl wits? b) ¿Chucoch melbil tac ti bronce?

⁷ Jiñi Biblia an i tajol miʼ cʼʌn jiñi tʼan wits chaʼan miʼ taj ti tʼan yumʌlob o jumpʼejl yumʌntel. Tsaʼ bʌ i qʼuele tiʼ ñajal Zacarías lajalʌch bajcheʼ jiñi chaʼpʼejl wits tsaʼ bʌ i taja ti tʼan Daniel. Jumpʼejl wits yom i yʌl jiñi i yumʌntel Jehová ti panchan yicʼot ti pañimil maʼañic bʌ i jilibal. Jiñi yambʌ yom i yʌl jiñi Yumʌntel am bʌ tiʼ wenta Jesús bajcheʼ jiñi Mesías (Dn. 2:35, 45).  Cheʼ bʌ tsaʼ waʼchoconti Jesús ti 1914, ili chaʼpʼejl wits chʌn lajal woliyob ti eʼtel chaʼan miʼ tsʼʌctiyel chuqui yom Dios wʌʼ ti Pañimil.

⁸ ¿Chucoch melbil ti bronce? Come mucʼʌch i wen qʼuejlel ti ñuc jaʼel bajcheʼ jiñi oro. Jehová tsiʼ yʌlʌ chaʼan jiñʌch yom bʌ miʼ cʼʌjñel chaʼan miʼ mejlel jiñi tabernáculo yicʼot jiñi templo ti Jerusalén (Éx. 27:1-3; 1 R. 7:13-16). Jin chaʼan, cheʼ melbil ti bronce ili chaʼpʼejl wits miʼ pʌs chaʼan cojach wen ñuc i Yumʌntel Jehová ti pañimil yicʼot panchan, yicʼot i Yumʌntel jiñi Mesías. Ili chaʼpʼejl yumʌntel mi caj i mel chaʼan wen miʼ yajñel jiñi wiñicob xʼixicob (quixtañujob) yicʼot miʼ tajob cabʌl bendición.

9. ¿Majquiyob jiñi woli bʌ i ñijcañob majlel jiñi carreta, i baqui bʌ i yeʼtelob?

⁹ ¿Chuqui yom i yʌl jiñi carreta tac yicʼot majqui woli bʌ i ñijcañob majlel? Jiñi woli bʌ i ñijcañob majlel jiñʌch jiñi ángelob, tajol chaʼan wen chajpʌbil bajcheʼ tʼoxbilob (pejcan Zacarías 6:5-8). Loqʼuel mucʼob baqui an jiñi «Yumʌl tiʼ pejtelel pañimil» i tsaʼ aqʼuentiyob ñuc bʌ eʼtel. ¿Baqui bʌ? Jehová tsiʼ chocoyob majlel i cʌntʌben i tejclum tiʼ tojlel i contrajob, ñumento tiʼ contra Babilonia, am bʌ «tiʼ tojel norte». Jehová tsiʼ wen qʼuele chaʼan jiñi i wiñicob maʼañic miʼ chaʼ chujquelob majlel ti Babilonia. Ili tsaʼʌch i wen pʼʌtʼesʌbeyob i pusicʼal woli bʌ i chaʼ melob jiñi templo cheʼ tiʼ yorajlel Zacarías. Tsiʼ ñopoyob chaʼan jiñi i contrajob maʼañic mi caj i mʌctañob.

10. ¿Chuqui miʼ yʌqʼueñonla lac ñop jiñi profecía i chaʼan Zacarías chaʼan jiñi carreta tac yicʼot woli bʌ i ñijcañob majlel?

¹⁰ Ili ora, Jehová woliʼ bej cʼʌn i yángelob chaʼan miʼ cʌntan yicʼot miʼ pʼʌtʼesan i tejclum, cheʼ bajcheʼ tsiʼ mele tiʼ yorajlel Zacarías (Mal. 3:6; He. 1:7, 14). Cheʼ jiñi chʼujul bʌ Israel tsaʼ cojliyob loqʼuel tiʼ cʼʌb jiñi Ñuc bʌ Babilonia ti 1919, jiñi isujm bʌ ñopbalʌl woliyʌch i bej colel majlel anquese añʌch i taja i contrajintel (Ap. 18:4). Mach yomic mi lac bʌcʼñan chaʼan mi caj lac chaʼ ajñel tiʼ cʼʌb jiñi mach bʌ isujmic ñopbalʌl come jiñi ángelob miʼ coltañoñobla (Sal. 34:7). La cujil chaʼan jiñi i wiñicob Jehová añoʼ bʌ tiʼ petol pañimil (mulawil) mi caj i chʌn melbeñob i yeʼtel yicʼotob i tijicñʌyel. Cheʼ mi lac wen ñaʼtan jiñi profecía i chaʼan Zacarías, maʼañic chuqui mi caj lac bʌcʼñan yicʼot cʌntʌbilonla mi caj la cubin lac bʌ tiʼ yebal jiñi chaʼpʼejl wits.

11. ¿Chucoch mach yomic mi lac bʌcʼñan cheʼ baʼ ora mi caj i contrajintel i tejclum Dios?

¹¹ Lʌcʼʌlix chaʼan jiñi añoʼ bʌ i yeʼtel ti política wʌʼ tiʼ pañimil Satanás mi caj i tempañob i bʌ chaʼan miʼ ñop i jisañob i tejclum Dios (Ez. 38:2, 10-12; Dn. 11:40, 44, 45; Ap. 19:19). Jiñi profecía i chaʼan Ezequiel miʼ yʌl chaʼan mi caj i tempañob i bʌ tiʼ pejtelel pañimil cheʼ bajcheʼ tocal. Miʼ yʌl jaʼel chaʼan cʼʌchʌlob ti caballo yicʼot wen michʼob mi caj i contrajiñob i tejclum Dios (Ez. 38:15, 16). * ¿Yom ba mi lac bʌcʼñan iliyi? Mach yomic. I yángelob Jehová mi caj i coltañoñobla. Cheʼ miʼ ñoj tejchel jiñi ñuc bʌ wocol, jiñi ángelob mi caj i cʌntan i wiñicob Dios yicʼot mi caj i jisañob jiñi muʼ bʌ i contrajiñob i yumʌntel Jehová (2 Ts. 1:7, 8). ¡Wen ñucʌch bajcheʼ miʼ cajel ti ujtel! Pero ¿majqui an tiʼ wenta jiñi i yángelob Jehová?

12, 13. a) ¿Chuqui tsiʼ sube i mel Jehová jiñi Zacarías? b) ¿Bajcheʼ la cujil chaʼan jiñi «Buts teʼ» jiñʌch Jesucristo?

¹² Cojach Zacarías tsaʼ bʌ i qʼuele jiñi 8 ñajal tac tsʼijbubil bʌ yaʼ tiʼ libro. Ti wiʼil, an chuqui tsiʼ mele tsaʼ bʌ i taja i qʼuel yambʌlob yicʼot tsiʼ pʼʌtʼesa jiñi woli bʌ i chaʼ melob i templo Dios (pejcan Zacarías 6:9-12). Jehová tiʼ sube chaʼan miʼ cʼajtiben plata yicʼot oro Heldai, Tobiya yicʼot Jedayá, cʼotel jaxto bʌ mucʼob ti Babilonia. Jiñi xʼaltʼan tsiʼ cʼʌñʌ jiñi plata yicʼot oro chaʼan miʼ mel jumpʼejl «corona» (Zac. 6:11). ¿Majqui tsaʼ aqʼuenti jiñi corona? ¿Jimba jiñi yumʌl Zorobabel loqʼuem bʌ tiʼ tribu Judá yicʼot tiʼ pʼolbal David? Mach jiñiqui. Jehová tiʼ sube Zacarías chaʼan jin miʼ yʌqʼuen jiñi ñuc bʌ motomaj Josué. Tajol toj sajtelob i pusicʼal jiñi tsaʼ bʌ i qʼueleyob.

¹³ ¿Yom ba i yʌl iliyi chaʼan jiñi ñuc bʌ motomaj Josué tsaʼ sujti ti rey? Maʼañic. Maʼañic miʼ mejlel come mach tilemic tiʼ pʼolbal David. Jiñi tsaʼ bʌ qʼuejli jiñʌch muʼ bʌ i caj ti ujtel tiʼ tojlel juntiquil rey yicʼot ñuc bʌ motomaj cʌmbil bʌ bajcheʼ «Buts teʼ». ¿Majqui jiñi? Jiñi Chʼujul bʌ Tsʼijbujel miʼ yʌl chaʼan jiñʌch Jesucristo (Is. 11:1; Mt. 2:23).

14. ¿Chuqui bʌ eʼtel miʼ mel Jesús cheʼ waʼchocobil bajcheʼ rey yicʼot bajcheʼ ñuc bʌ motomaj?

¹⁴ Jesús jiñʌch rey yicʼot ñuc bʌ motomaj, i jiñʌch am bʌ tiʼ wenta jiñi i yángelob Jehová. Ora miʼ mel i yeʼtel chaʼan jiñi i tejclum Dios miʼ yajñel ti wen ti ili jontol bʌ pañimil (Jer. 23:5, 6). Lʌcʼʌlix mi caj i jisan jiñi yumʌlob i cheʼʌch mi caj i coltan i yumʌntel Jehová yicʼot mi caj i cʌntan i wiñicob (Ap. 17:12-14; 19:11, 14, 15). Pero cheʼ maxto cʼot i yorajlel jiñi, Jesús o jiñi «Buts teʼ» mi caj i mel jumpʼejl ñuc bʌ eʼtel.

15, 16. a) ¿Majqui tsiʼ waʼchoco yicʼot i weñʼesa jiñi isujm bʌ chʼujutesa ti ili ora, i bajcheʼ an i mele? b) ¿Bajcheʼ yilal miʼ cajel ili Pañimil cheʼ bʌ Cristo miʼ yujtel ti Yumʌntel ti Mil Jab?

¹⁵ Cheʼ bajcheʼ miʼ yʌl Zacarías 6:12, Jesús tsaʼ waʼchoconti chaʼan miʼ «waʼchocoben i Templo lac Yum [Jehová]», cheʼ jaʼel, chaʼan miʼ «chaʼlen i yeʼtel Rey yicʼot i yeʼtel Motomaj» (pejcan Zacarías 6:13). Ili eʼtel tsiʼ mele ti 1919 cheʼ bʌ tsiʼ locʼsa i tejclum Dios tiʼ cʼʌb jiñi Ñuc bʌ Babilonia yicʼot tsiʼ chaʼ waʼchoco jiñi isujm bʌ chʼujutesa. Tsiʼ waʼchoco jaʼel «jini xucʼul bʌ xʼeʼtel am bʌ cabʌl i ñaʼtʌbal» chaʼan miʼ qʼuel jiñi eʼtel woli bʌ i mejlel ila ti Lum, i jumpatlel jiñi colem templo chʼujul bʌ (Mt. 24:45). Jesús an i ñumen weñʼesa majlel jiñi i tejclum Jehová yicʼot miʼ coltan chaʼan sʌc miʼ chʼujutesañob Dios (Mal. 3:1-3).

¹⁶ Cheʼ baʼ ora Jesús yicʼot jiñi 144 mil reyob yicʼot motomajob miʼ chaʼleñob Yumʌl ti Mil Jab mi caj i coltañob jiñi quixtañujob chaʼan miʼ sujtelob ti toj. Cheʼ miʼ yujtel ti melol ili cojach mi caj i cʌytʌlob ti ili sʌc bʌ pañimil jiñi muʼ bʌ i chʼujutesañob Dios. Cheʼ bajcheʼ jiñi, mi caj i waʼchocontel ti tsʼʌcʌl jiñi isujm bʌ chʼujutesaya.

17. a) ¿Chuqui tiʼ sube Jehová jiñi judíojob? b) ¿Bajcheʼ tsiʼ coltayob tsaʼ bʌ i yʌlʌ Jehová?

¹⁷ ¿Bajcheʼ tsiʼ colta jiñi judíojob i tʼan Zacarías? Jehová tsiʼ yʌlʌ chaʼan mi caj i cʌntañob cʼʌlʌl miʼ yujtel i melob jiñi templo, i tsaʼʌch i yubiyob i tijicñʌyel. Pero mi mach wen cabʌlobic, ¿bajcheʼ tsaʼ ujti i melob pejtelel jiñi eʼtel? Cheʼ bʌ Zacarías tsiʼ bej tsictesʌbeyob tsaʼ bʌ i yʌlʌ Dios, maʼañic chuqui tsaʼ caji i bʌcʼñañob. Mach cojach Heldai, Tobiya yicʼot Jedayá tsiʼ chaʼleyob coltaya come Dios tsiʼ yʌlʌ chaʼan cabʌlob  muʼ bʌ caj i chaʼleñob coltaya tiʼ melol jiñi i «Templo lac Yum» (pejcan Zacarías 6:15). Jiñi judíojob tsaʼʌch i ñopoyob chaʼan mi caj i coltʌntelob ti Jehová. Jin chaʼan, ti orajach tsiʼ techeyob jiñi eʼtel anquese jiñi rey i chaʼan Persia tsiʼ lon mʌctayob. Jehová mach jalic tsiʼ locʼsʌbeyob jiñi wocol woli bʌ i mʌctañob, lajal bʌ bajcheʼ colem wits. Jiñi templo tsaʼ ujti ti mejlel cheʼ ti 515 (m.t.C.) (Esd. 6:22; Zac. 4:6, 7). Pero tsaʼ bʌ i yʌlʌ Jehová anto chuqui ñumen ñuc bʌ miʼ taj ti tʼan woli bʌ ti ujtel ili ora.

18. ¿Bajcheʼ miʼ tsʼʌctiyel ili ora muʼ bʌ i yʌl Zacarías 6:15?

¹⁸ Ili ora cabʌl muʼ bʌ i melbeñob i yeʼtel Jehová. Miʼ yʌcʼob i chubʌʼan bajcheʼ i yorajlel i chaʼañob, taqʼuin yicʼot i pʼʌtʌlelob come cheʼʌch miʼ loqʼuelob tiʼ pusicʼal (Pr. 3:9). Cheʼ bajcheʼ ili, miʼ chaʼleñob coltaya yaʼ ti chʼujul bʌ colem templo i chaʼan Dios. Miʼ mejlel lac ñop chaʼan Jehová miʼ qʼuel ti ñuc muʼ bʌ lac mel tiʼ tojlel yicʼot cheʼ xucʼulonla. Yom mi laj cʼajtesan chaʼan Heldai, Tobiya yicʼot Jedayá tsiʼ yʌcʼʌyob i chubʌʼan chaʼan Zacarías miʼ mel jumpʼejl corona. Jiñi corona tsaʼ cʼʌjñibʌyi chaʼan «i ñaʼtʌntel» o chaʼan i cʼajtesʌntel chuqui tsiʼ yʌcʼʌyob chaʼan jiñi isujm bʌ chʼujutesaya (Zac. 6:14). Cheʼ jaʼel, pejtelel chuqui mi lac mel tiʼ tojlel Jehová yicʼot cheʼ mucʼʌch laj cʼuxbin maʼañic baʼ ora miʼ ñajʌtesan (He. 6:10).

19. ¿Bajcheʼ yom miʼ coltañonla jiñi i ñajal tac Zacarías?

¹⁹ Jiñi tajbil tilel ti ili cojix bʌ qʼuin ti jiñi isujm bʌ ñopbalʌl miʼ pʌs chaʼan Jehová choncol i yʌcʼ tilel bendición yicʼot chaʼan Cristo jiñʌch woliʼ qʼuel jiñi eʼtel. Jiñi organización baqui ochemonla maʼañic chuqui mi caj i chaʼlen. Jiñi ñaʼtʌbil bʌ i chaʼan Jehová chaʼan jiñi sʌc bʌ chʼujutesaya mucʼʌch caj i tsʼʌctiyel cheʼ bajcheʼ tsiʼ wʌn alʌ Zacarías. Jin chaʼan, laʼ laj qʼuel ti ñuc baqui tsiʼ yʌcʼʌyonla Jehová tiʼ tejclum i laʼ lac chʌn «jacʼben i tʼan». Mi cheʼʌch mi lac mel, jiñi lac Rey yicʼot Ñuc bʌ lac Motomaj i jiñi ángelob muʼ bʌ i ñijcañob jiñi carreta tac mi caj i cʌntañoñobla. Laʼ lac chaʼlen wersa chaʼan mi laj coltan jiñi isujm bʌ chʼujutesaya. Cheʼ bajcheʼ jiñi, ti jumpʼejl lac pusicʼal mi caj lac ñop chaʼan Jehová, i Yum cabʌl ángelob, mi caj i cʌntañonla ti jiñi cojix bʌ qʼuin wʌʼ ti pañimil yicʼot tiʼ pejtelel ora.