TSAʼ quila pañimil (chʼocʼayon) ti 1934. Jiñi c tatob, Fred yicʼot Edna Molohan, añix 20 jab i yochelob bajcheʼ xPejcaya bibliajob (i testigojob Jehová). Mic wen aqʼueñob wocolix i yʌlʌ cheʼ tsiʼ wen cʌntesayoñob j cʼuxbin Dios. Chumulon lojon ti Parsons, am bʌ yaʼ ti estado i chaʼan Kansas. Lʌcʼʌ tiʼ pejtelel jiñi hermanojob am bʌ yaʼ ti congregación bombilob o yajcʌbilob ti espíritu. Maʼañic mij cʌy lon c bʌ ti tempa bʌ i tiʼ pejtelel ora mi lon c loqʼuel ti subtʼan. Cheʼ ti icʼan ti sábado ti bele ora mi lon c loqʼuel ti subtʼan ti calle, ili ora jiñʌch jiñi subtʼan baqui miʼ ñumel cabʌl quixtañujob. An qʼuiñil mic lujbʼan lojon, pero jiñi c papá ti bele ora miʼ mʌmbeñon lon nieve cheʼ tsaʼix ujtiyon lojon.

Wen colem i territorio Jiñi lon j congregación, an i chaʼan cabʌl alʌ xchumtʌl tac yicʼot rancho tac. An wiñicob xʼixicob (quixtañujob) muʼ bʌ i yʌcʼob i wut teʼ o chuqui tac miʼ pʌcʼʌb, tumut o mut chaʼan i qʼuexol jiñi jun tac muʼ bʌ lon j cʌcʼ. Come maʼañic wen an lon c taqʼuin i jiñi c papá tsaʼix i yʌcʼʌ chaʼan jiñi jun tac, jiñi muʼ bʌ lon j cʼux yaʼ miʼ loqʼuel ti chuqui mi lon j cʌqʼuentel.

Jiñi c tatob tsiʼ tajayob jumpʼejl gramófono chaʼan miʼ cʼʌñob ti subtʼan. Ti jimbʌ ora chutonto i maxto mejlic j cʼʌn, pero cheʼ miʼ yajñelob ti acʼ estudio o mel revisita tac, mic mulan j coltañob i yotsan jiñi discurso tac grabadojix bʌ tiʼ tojlel jiñi hermano Rutherford.

Jiñi c papá tsiʼ yotsa colem bocina tiʼ jol jiñi lon j carro. Tsaʼʌch wen cʼʌjñibʌyi lon c chaʼan ti subtʼan jiñi lon j carro. Ñaxan mi lon c tsʼitaʼ acʼ música chaʼan jiñi quixtañujob miʼ mulan i ñʌchʼtañob, ti wiʼil mi cotsan lojon jumpʼejl discurso grabadojix bʌ. Cheʼ bʌ miʼ yujtel, mic pucben lojon jun tac jiñi yomoʼ bʌ i cʌn i sujmlel.

 Cheʼ bʌ añon lojon yaʼ ti Kansas, ti jumpʼejl alʌ tejclum i cʼabaʼ Cherryvale, jiñi policía tiʼ sube c papá chaʼan maʼañix miʼ yotsan grabación yaʼ ti parque, come cheʼ ti domingo cabʌlob miʼ cʼotel i cʼajob i yo. Pero tsaʼ subenti chaʼan miʼ mejlel i yotsan tiʼ jumpatlel jiñi parque. I jiñi c papá wen jach tsiʼ jacʼʌ i tsaʼ majli i yʌcʼ i carro ti yambʌ calle am bʌ tiʼ tojel jiñi parque. Cheʼ jiñi, tsiʼ chaʼ tsʼʌbʌ jiñi grabación chaʼan miʼ chaʼ ñʌchʼtañob. Joñon tsaʼ c wen mulaj c chumtan pejtelel tsaʼ bʌ i ñusa jiñi c papá yicʼot cʌscun Jerry.

Cheʼ maxto cʼot jiñi jabil 1940, tsaʼ c chaʼle lojon orajach bʌ subtʼan yaʼ ti territorio tac baqui mʌctʌbil ili eʼtel (troñel). Cheʼ bajcheʼ tsaʼ cʌlʌ ti ñaxan, icʼto mi lon c tejchel chaʼan mi lon c majlel ti Joplin (Misuri), i wen xucʼul jach mij cʌy lojon ñumel tratado o folleto tac tiʼ yebal i tiʼ i yotot jiñi quixtañujob. Ti wiʼil, mic tempan lon c bʌ tiʼ jumpatlel jiñi tejclum chaʼan mij qʼueleʼ lon mi maʼañic majqui tsaʼ chujqui ti policía.

Ti jiñi bʌ ora, mic wen mulan jaʼel cheʼ miʼ yujtel jiñi marcha chaʼan subtʼan. Mi lon j cʼʌn jun tac muʼ bʌ c jocʼchocon ti lon j quejlab yicʼot tsolol mic chaʼlen lojon xʌmbal chaʼan mi lon c sub jiñi wen tʼan chaʼan i Yumʌntel Dios. Cʼajalto c chaʼan cheʼ bʌ tsaʼ c chaʼle lon marcha yaʼ tic tejclum. Jiñi hermanojob tsiʼ jocʼchocoyob jiñi wel wel jun baqui miʼ yʌl: «Jiñi ñopbalʌl jumpʼejl jach yac yicʼot lotintel». Tsaʼ loqʼuiyob yaʼ ti lon cotot, i cheʼ añix jumpʼejl kilómetro yicʼot ojlil tsiʼ xʌñʌyob, tsaʼ chaʼ sujtiyob. Weñʌch cheʼ maʼañic tsiʼ tajayob i contrajob, pero tsaʼʌch i tajayob quixtañujob tsaʼ bʌ i qʼueleyob ti ñuc jiñi subtʼan.

Jiñi c familia miʼ yajñel ti colem tempa bʌ tac yaʼ ti Texas. Come jiñi c papá miʼ chaʼlen eʼtel yaʼ ti compañía chaʼan tren muʼ bʌ i majlel ti Misuri, Kansas cʼʌlʌl ti Texas, maʼañic mi lon c toj jiñi pasaje. Jiñi i yʌscun c mamá, i cʼabaʼ Fred Wismar, yaʼ chumul yicʼot i yijñam yaʼ ti Temple (Texas). Jiñi quichan Fred tsiʼ cʌñʌ i sujmlel tiʼ tejchibal jiñi jabil 1900, cheʼ bʌ xcolelto, chʼʌmʌlix i chaʼan jaʼ yicʼot tiʼ sube wen tʼan i yijtsʼiñob, yaʼ ochem jiñi c mamá. Jiñi hermanojob ti Texas i wen cʌñʌyob quichan, yaʼ tsiʼ chaʼle eʼtel bajcheʼ siervo de zona (superintendente i chaʼan circuito). Utsʼatax cheʼ añonla la quicʼot come wen uts yicʼot tijicña. Wen chʼejl tiʼ yeʼtel Dios, i cabʌl chuqui tsaʼ j cʌñʌ tiʼ tojlel cheʼ xcolelonto.

Cheʼ ti 1941, tsaʼ majliyon lojon ti tren cʼʌlʌl ti San Luis (Misuri) chaʼan jumpʼejl colem tempa bʌ. Pejtelel jiñi alʌbob yicʼot xcolelonto bʌ lon yilol chajpʌbil baqui tsaʼ pajyiyon lon ti buchtʌl chaʼan mij cubin lon jiñi discurso «I yalobilob jiñi Rey» tsaʼ bʌ i ñusa jiñi hermano Rutherford. Cheʼ tsaʼ ujti jiñi discurso jiñi hermano Rutherford yicʼot xcoltayajob i chaʼan tsiʼ pucbeyon lojon jiñi tsijib libro i cʼabaʼ Hijos.

Ti abril i chaʼan 1943, tsaʼ majliyon lojon ti jumpʼejl alʌ colem tempa bʌ mach bʌ ñajʌyic c chaʼan yaʼ ti Coffeyville (Kansas), am bʌ i temajlel bajcheʼ «Pʌjyel ti Eʼtel». Yaʼi tsaʼ ajli chaʼan tiʼ pejtelel congregación mi caj i ñusʌntel jiñi Escuela chaʼan bʌ i Yeʼtel Dios. Tsaʼ loqʼui jaʼel jumpʼejl tsijib

 folleto am bʌ i chaʼan 52 cʌntesʌntel, muʼ bʌ caj i cʼʌjñel ti tempa bʌ. Ti jiñi jabil, tsaʼ c ñusa jiñi ñaxam bʌ c discurso ti jiñi escuela. Ti jiñi colem tempa bʌ tsaʼ c chaʼle chʼʌm jaʼ yicʼot yambʌ quixtañujob yaʼ ti tsʌwan bʌ jaʼ ti jumpʼejl rancho. Tiʼ sujm, wen ñuc tsaʼ j qʼuele.

Cheʼ bʌ tsaʼ loqʼuiyon ti secundaria ti 1951, tsaʼ c ñaʼta chuqui mi caj c mel (chaʼlen) tij cuxtʌlel. Ñumen com bʌ jiñʌch cheʼ mic majlel ti Betel, baqui tsiʼ chaʼle eʼtel jiñi cʌscun Jerry. Jin chaʼan tsaʼ c choco majlel jiñi c solicitud ti Brooklyn. Mach wen jalic tsaʼ ñumi i tsaʼ pʌjyiyon ti Betel chaʼan mic tech eʼtel ti 10 i chaʼan Marzo ti 1952. Ili tsaʼ bʌ c yajca c mel tsiʼ wen coltayon tiʼ chaʼan bʌ Dios.

Tsaʼ c lon ñaʼta chaʼan yaʼ mi caj c chaʼlen eʼtel ti imprenta baqui miʼ chaʼlentel ti imprimir jiñi revista tac yicʼot yan tac bʌ jun. Pero maʼañic tsaʼ c chaʼle eʼtel yaʼi come tsaʼ ajqʼuiyon chaʼan mic ñusan bʌlñʌcʼʌl, tiʼ wiʼil tsaʼ chojquiyon majlel baqui miʼ mejlel (pʌjtel) uchʼibʌl. Tsaʼ c mulaj muʼ bʌ c mel yaʼi, i cabʌl chuqui tsaʼ j cʌñʌ. Cheʼ jaʼel, come an muʼ bʌ c taj lojon eʼtel ti qʼuiñil o ti acʼʌlel tiʼ melol bʌlñʌcʼʌl, ñʌchʼʌcña miʼ mejlel c pejcan jiñi Biblia cheʼ ti qʼuiñil yaʼ ti colem biblioteca am bʌ ti Betel. Iliyi tsiʼ pʼʌtʼesa bajcheʼ añon quicʼot Jehová, jiñi c ñopoñel (chʼujbiya) yicʼot chaʼan mic ñumen mulan eʼtel yaʼ ti Betel. Jerry tsaʼ loqʼui ti Betel ti 1949 i tsaʼ ñujpuñi yicʼot juntiquil hermana i cʼabaʼ Patricia, pero tsaʼ cʌyleyob ti chumtʌl yaʼ ti Brooklyn. Cheʼ ti ñaxam bʌ jabil tsaʼ ajñiyon ti Betel, jiñobʌch tsaʼ tsiʼ wen coltayoñob yicʼot tsiʼ ñuqʼuesʌbeyoñob c pusicʼal.

Cheʼ bʌ cʼotel jaxto mucʼon ti Betel, tsaʼ caji ti yajcʌntel hermanojob chaʼan ñumen cabʌlob jiñi xʼacʼ discurso i chaʼan Betel. Ili hermanojob miʼ yʌqʼuentelob asignación tac chaʼan jumpʼejl jab i miʼ julaʼtañob congregación tac am bʌ 322 kilómetro i ñajtlel tiʼ joytʌlel jiñi Betel. Miʼ yʌcʼob jumpʼejl discurso muʼ bʌ i jalʼan jumpʼejl ora i miʼ chaʼleñob subtʼan yicʼot jiñi hermanojob. Wen tijicña tsaʼ cubi cheʼ bʌ tsaʼ yajcantiyon jaʼel. Pero wen an c bʌqʼuen cheʼ bʌ cajelto mucʼon. Ti bele ora mic chaʼlen xʌmbal ti tren. Cʼajalto c chaʼan tsaʼ bʌ ujti ti jumpʼejl icʼan cheʼ ti domingo ti jabil 1954. Sujtel mucʼon ti tren ti Nueva York, ti acʼʌlel i wentʌlel mij cʼotel ti Betel. Pero tsaʼ wen caji ti yajlel hielo yicʼot tsaʼ caji tsʌts bʌ icʼ yicʼot tsʌñal, i tsaʼ jejmi i motorlel jiñi tren. Tiʼ yijcʼʌlelto tsaʼ cʼotiyon baqui miʼ cʼotel jiñi tren ti Nueva York, a las cinco cheʼ bʌ icʼto pañimil. Yaʼi tsaʼ cʼʌjquiyon ti jiñi metro muʼ bʌ i majlel ti Brooklyn. Anquese bej chañix qʼuin tsaʼ cʼotiyon yicʼot wen lujboñix come maʼañic tsaʼ j cʼaja j co, ti orajach tsaʼ majliyon ti eʼtel baʼ miʼ chajpʌntel bʌlñʌcʼʌl. Pero ili wocol tac maʼañic miʼ wis lajeʼ i bʌ yicʼot jiñi tijicñʌyel muʼ bʌ cubin cheʼ mic chaʼlen eʼtel chaʼan quermañojob yicʼot cheʼ mic taj tsijib camigojob tiʼ julaʼtʌntel congregación tac tiʼ yujtibal semana.

Ti jiñi ñaxan tac bʌ jabil cheʼ tsaʼ cʼotiyon ti Betel, tsaʼ pʌjyiyon ti eʼtel yaʼ ti estación chaʼan radio WBBR, cheʼ bʌ yaʼto an yaʼ ti calle Columbia Heights, tiʼ chaʼpʼejlel piso ti jiñi otot número 124. Tsaʼ ochiyon jaʼel ti jiñi programa am bʌ ti jujumpʼejl semana chaʼan miʼ tem chajpʌntel jiñi Biblia, i miʼ ñusʌntel yaʼ ti radio. Yambʌ ochem bʌ yaʼ ti programa jiñʌch jiñi hermano A. H. Macmillan, muʼ bʌ c suben lojon ti hermano Mac. Cabʌl jab tsiʼ chaʼle eʼtel ti Betel, i jiñi maxto bʌ wen jalic lon j cʼotel, tsaʼ c wen cʌñʌ lon tiʼ tojlel chaʼan bajcheʼ tsiʼ lʌtʼʌ tiʼ melol i yeʼtel Jehová.

Cheʼ ti 1958, tsaʼ pʌjyiyon chaʼan mic chaʼlen coltaya yaʼ ti Cʌntesʌntel chaʼan Galaad. Jiñi queʼtel jiñʌch chaʼan mij coltan jiñi tsijib misionerojob chaʼan miʼ yʌqʼuentelob i visa yicʼot chaʼan mij qʼuel yaʼ baqui mi caj i majlelob. Ti jiñi bʌ ora, wen lets i tojol chaʼan mi lac xʌn ti avión, jin chaʼan tsʼitaʼ jach majqui miʼ mejlelob i cʼʌn. Jiñi chocbiloʼ bʌ majlel ti África o cʼʌlʌl ti Asia, miʼ majlelob ti barco tac chaʼan bʌ cuchijel. Jiñi misionerojob jinto tsaʼ cajiyob ti majlel ti avión tac chaʼan bʌ cuchijel cheʼ bʌ tsaʼ jubi i tojol.

Cheʼ ti 1960 tsaʼ ñumen ocʼa jiñi queʼtel, tsaʼ cʌyle tic wenta chaʼan mij qʼuel jiñi avión tac muʼ bʌ i majlel ti Europa chaʼan jiñi colem tempa bʌ internacional bʌ chaʼan jiñi jabil 1961. Tsaʼto c taja majlel ti avión jaʼel cʼʌlʌl ti Hamburgo (Alemania). Cheʼ bʌ tsaʼ ujti jiñi colem tempa bʌ ti jiñi tejclum, tsaʼ majliyon ti Italia quicʼot yambʌ uxtiquil añoʼ bʌ ti Betel, i tsajñiyon lojon yaʼ ti sucursal am bʌ ti Roma. Ti wiʼil tsaʼ majliyon lojon ti Francia, tsaʼ ñumiyon lojon yaʼ ti wits tac baʼan jiñi pirineojob i tsaʼ ochiyon lojon ti España, yaʼ baqui mʌctʌbil jiñi subtʼan. Utsʼatax cheʼ tsaʼ mejli j cʌn jiñi hermanojob añoʼ bʌ ti Barcelona yicʼot tsaʼ mejli cʌqʼueñob jun tac ti mucul. Tsaʼ loqʼuiyon lojon ti España cʼʌlʌl ti Ámsterdam i cheʼ jiñi tsaʼ chaʼ sujtiyon lojon ti Nueva York.

Cheʼ ti 1962, tsaʼ chaʼ aqʼuentiyon tic wenta chaʼan mic chajpan bajcheʼ mi caj i ñijcañob i bʌ jiñi 583 hermanojob yicʼot hermanajob yajcʌbiloʼ bʌ chaʼan miʼ majlelob ti colem tempa bʌ internacional bʌ. Jiñʌch jiñi colem tempa bʌ «Wen Tʼan tiʼ Pejtelel ora», tsaʼ bʌ ujti ti 1963. Ili tsaʼ mejli ti Europa, Asia yicʼot jiñi Pacífico sur, Honolulú (Hawái) yicʼot ti Pasadena (California). Ti jimbʌ ora tsaʼ ñumiyon lon jaʼel ti Líbano yicʼot Jordania, chaʼan mij cʌñeʼ lojon jiñi lum tac muʼ bʌ i yʌl jiñi Biblia. Mach cojach yom mic sʌclan jiñi avión tac yicʼot hotel baqui miʼ cʼotelob, yom mic locʼsan lojon jaʼel jiñi visa chaʼan jiñi país tac baqui miʼ cʼajtintel.

Wen ñuc tsaʼ bʌ ujti tic tojlel cheʼ ti 1963. Cheʼ ti 29 i chaʼan junio tsaʼ ñujpuñiyon quicʼot jiñi hermana Lila Rogers chʼoyol bʌ ti Misuri, añix bʌ uxpʼejl jab yaʼan ti Betel. Cheʼ jumpʼejlix semana lon c ñujpuñel, tsaʼ caji c xʌñeʼ lon tiʼ pejtelel pañimil jaʼel, tsajñiyon lojon ti Grecia, Egipto yicʼot Líbano. Tsaʼ loqʼuiyon lon ti avión yaʼ ti Beirut chaʼan mic majlel lon ti Jordania. Pero ti ili país mʌctʌbil jiñi subtʼan i maʼañic miʼ yʌqʼuentelob visa jiñi i testigojob Jehová, jin chaʼan tsaʼ caji lon c ñaʼtan chuqui mi caj i yujtel cheʼ mij cʼotel lojon. Pero toj sajtel lon c pusicʼal cheʼ tsaʼ cʼoti c tajeʼ lon jiñi hermanojob i tichʼil i chaʼañob jumpʼejl jun baqui miʼ yʌl «Taja laʼ tijicñʌyel i testigojob Jehová». Wen utsʼatax cheʼ tsaʼ ñumiyon lojon yaʼ ti lum tac baqui tsaʼ ñumi Abrahán, Isaac yicʼot Jacob, baqui tsiʼ chaʼle subtʼan Jesús yicʼot xcʌntʼañob i chaʼan, yicʼot baqui tsaʼ caji ti pujquel jiñi subtʼan ‹tiʼ pejtelel pañimil› (Hch. 13:47).

Lila añix 55 jab i cajel i coltañon tiʼ xuctʌlel chaʼan pejtelel jiñi queʼtel tac. Mach junsujtel jach ajñemon lojon ti España yicʼot Portugal, cheʼ bʌ mʌctʌbilto jiñi subtʼan. Tsaʼ c pʼʌtʼesa lojon jiñi hermanojob i tsaʼ c chʼʌmbe lon majlel jun tac yicʼot yambʌ chuqui i cʼʌjñibal i chaʼañob. Tsajñito j qʼuel lojon jiñi hermanojob añoʼ bʌ ti cárcel yaʼ ti tejclum Cádiz (España). Wen tijicña tsaʼ cubi cheʼ tsaʼ mejli j cʌcʼ jumpʼejl discurso chaʼan mic pʼʌtʼesañob.

 Cʼʌlʌl ti 1963, an c chaʼle coltaya baqui miʼ qʼuejlel chaʼan jiñi hermanojob miʼ mejlelob ti majlel ti colem tempa bʌ tac internacional bʌ ti África, América Central yicʼot Sur, Australia, Europa, Hawái, Lejano Oriente, Nueva Zelanda yicʼot ti Puerto Rico. Cabʌl chuqui utsʼatax bʌ ñusʌbil lon c chaʼan ti colem tempa bʌ tac quicʼot Lila, bajcheʼ jiñi tsaʼ bʌ ujti ti 1989 yaʼ ti Varsovia (Polonia). Tsajñi cabʌl hermanojob chʼoyoloʼ bʌ ti Rusia, i jiñʌch ñaxam bʌ colem tempa bʌ tsajñiyob. Tsaʼ j cʌñʌ lojon jiñi tsaʼ bʌ ajñiyob ti cabʌl jab ti cárcel yaʼ ti Unión Soviética chaʼañob i ñopbal.

Yambʌ utsʼatax jiñʌch cheʼ tsaʼ c julaʼta lojon sucursal tac yicʼot misionerojob ti cabʌl país chaʼan mic pʼʌtʼesan lojon. Ti jiñi cojix bʌ julaʼ tsajñiyon lojon ti Corea del Sur, tsaʼ j cʌñʌ lon 50 hermanojob añoʼ bʌ ti cárcel yaʼ ti Suwon. Luʼ tijicñayob yicʼot miʼ mulañon loqʼuel chaʼan miʼ bej melbeñob i yeʼtel Jehová. Ili tsiʼ wen pʼʌtʼesayon lojon (Ro. 1:11, 12).

Ti cabʌl jabil qʼuelbil c chaʼan bajcheʼ woliʼ colel majlel i tejclum Jehová. Cheʼ tsaʼ c chʼʌmʌ jaʼ ti 1943, an jaxto cheʼ bʌ 100 mil xsubtʼañob. Ili ora ñumeñix ti 8 millón i testigojob Jehová ti 240 país yicʼot territorio tac. Ili tajbil jaʼel tiʼ coltaya jiñi misionerojob ajñemoʼ bʌ ti Galaad. Tijicña mi cubin cheʼ an c chaʼle eʼtel yicʼotob ti cabʌl jabil, i coltʌbil c chaʼañob chaʼan miʼ cʼotelob yaʼ baqui chocbilob majlel.

Wen tijicñayon cheʼ tsaʼ mejli j cʼʌn j cuxtʌlel tiʼ melol i yeʼtel Jehová cʼʌlʌl cheʼ xcolelonto yicʼot cheʼ tsaʼ c butʼu jiñi solicitud chaʼan Betel. Cʼʌlʌl ti jiñi bʌ ora, Jehová an i wen aqʼueyon i bendición. Cheʼ jaʼel, utsʼatax ñusʌbil c chaʼan lojon ti Betel, Lila yicʼot joñon, tsaʼ ajñiyon lojon ti cabʌl congregación yaʼ ti Brooklyn ti cabʌl jabil i tsaʼ c wen taja lon camigojob.

Joñon yicʼot Lila bej woliyon (choncolon) lojon ti eʼtel ti Betel. Ñumeñix ti 84 c jabilel, pero muqʼuixto c mejlel ti eʼtel, an tic wenta pejtelel jiñi correo tac muʼ bʌ i cʼotel ti sucursal.

Wen utsʼatax cheʼ ochemon jaʼel tiʼ yorganización Jehová yicʼot cheʼ mij qʼuel bajcheʼ miʼ tsʼʌctiyel Malaquías 3:18: «Mi caj laʼ ñaʼtan mach lajalic miʼ yujtel jini toj bʌ yicʼot jini mach bʌ tojic tiʼ yorajlel meloñel. Mi caj laʼ qʼuel majqui wen chumul, jini muʼ bʌ i melben i yeʼtel Dios o mi jini mach bʌ anic miʼ mel». Ti jujumpʼejl qʼuin woli (yʌquel) laj qʼuel bajcheʼ woliʼ jilel majlel ili i pañimil (mulawil) Satanás i chaʼan jiñi quixtañujob maʼañobic i pijtaya yicʼot mach tijicñayobic. Pero pejtelel muʼ bʌ laj cʼuxbin Jehová yicʼot mi lac melben i yeʼtel, tijicñayonla come an wem bʌ lac pijtaya chaʼan ti talto bʌ qʼuin anquese ili ora wen wocolʌch. Jiñʌch ñuc bʌ lac majtan cheʼ miʼ mejlel lac sub jiñi wen tʼan chaʼan i Yumʌntel Dios (Mt. 24:14). Ili Yumʌntel lʌcʼʌlix mi caj i jisan ili tsucul bʌ pañimil yicʼot mi caj i chʼʌm tilel jumpʼejl paraíso. ¡Wen la comix chaʼan miʼ cʼotel jiñi qʼuin! Ti jimbʌ ora, jiñi xucʼul bʌ i wiñicob Jehová mi caj i tajob jiñi isujm bʌ i cʼocʼlel yicʼot tiʼ pejtelel ora mi caj i chumtʌlob ila ti Pañimil.