1, 2. a) ¿Baqui bʌ eʼtel tsiʼ wen qʼuele ti ñuc Jesús, i chucoch? b) ¿Chuqui yom mi lac mel chaʼan wem bʌ xʼeʼtelonla i chaʼan Dios?

JESUCRISTO tsiʼ chaʼle eʼtel (troñel) bajcheʼ xjucʼteʼ yicʼot bajcheʼ xcʌntesa chaʼan jiñi wen tʼan (Mr. 6:3; Jn. 13:13). Tiʼ chaʼpʼejlel i yeʼtel tsiʼ mele ti wen. Tsiʼ cʌñʌ bajcheʼ yom miʼ cʼʌjñel jiñi eʼtijib tac muʼ bʌ cʼʌn juntiquil xjucʼteʼ. Pero tsiʼ cʼʌñʌ ti wen jaʼel pejtel chuqui cʌmbil i chaʼan yaʼ ti Tsʼijbujel chaʼan miʼ coltan jiñi wiñicob xʼixicob (quixtañujob) i chʼʌmbeñob isujm am bʌ tiʼ Tʼan Dios (Mt. 7:28; Lc. 24:32, 45). Cheʼ añix 30 i jabilel tsiʼ cʌyʌ jiñi eʼtel bajcheʼ xjucʼteʼ chaʼan miʼ tech i sub jiñi wen tʼan chaʼan i Yumʌntel Dios. Yujil chaʼan wen ñucʌch i cʼʌjñibal, come tsiʼ yʌlʌ chaʼan jiñʌch junchajp cheʼ Dios tsiʼ choco tilel ila ti Pañimil (Mt. 20:28; Lc. 3:23; 4:43). Jiñi i subtʼan jiñʌch tsaʼ bʌ i ñumen acʼʌ ti ñuc tiʼ cuxtʌlel i yom chaʼan jiñi yambʌlob cheʼʌch miʼ melob jaʼel (Mt. 9:35-38).

² Cabʌlonla mach bʌ la cujilic jiñi eʼtel bajcheʼ xjucʼteʼ, pero xcʌntesajonla chaʼan jiñi wen tʼan. Ili eʼtel wen ñucʌch come Dios woli (choncol) i mel jaʼel. Yaʼ ti Biblia miʼ yʌl chaʼan ‹xʼeʼtelonla yicʼot Dios› (1 Co. 3:9; 2 Co. 6:4). La cujil chaʼan jiñi i sujmlel jiñʌch am bʌ tiʼ tʼan Dios (Jn. 17:17). Jin chaʼan, yom mi lac wen qʼuel yaʼ ti lac subtʼan mi woliyʌch (yʌquelʌch) laj «cʼʌn ti utsʼat jini isujm bʌ tʼan» (pejcan 2 Timoteo 2:15). Cheʼ jiñi, yom mi lac chaʼlen wersa chaʼan mi lac ñumen cʼʌn ti wen jiñi Biblia, come jiñʌch ñuc bʌ la queʼtijib chaʼan mi lac pʌs i sujmlel tiʼ tojlel Jehová, Jesús yicʼot i yumʌntel Dios. I chaʼan wen mi lac mel jiñi eʼtel, jiñi  i yorganización Jehová tsiʼ yajca jiñi eʼtijib tac yom bʌ mi lac wen cʌn, iliyi jiñʌch eʼtijib tac chaʼan bʌ cʌntesa.

3. a) Come tsʼitaʼ jax cʌylem i yorajlel ili pañimil, ¿baqui yom mi la cʌcʼ lac ñaʼtʌbal? b) Cheʼ bajcheʼ miʼ yʌl Hechos 13:48, ¿majqui yom mi lac sʌclañob?

³ Tajol mi laj cʼajtiben lac bʌ, ¿chucoch eʼtijib tac chaʼan bʌ cʌntesa miʼ yʌjlel, i mach cheʼic bajcheʼ eʼtijib tac chaʼan bʌ subtʼan? Come cheʼ woli la cʌl subtʼan, jin woli lac taj ti tʼan jiñi wen tʼan muʼ bʌ lac sub. Pero cheʼ mi la cʌl cʌntesa, woli bʌ lac taj ti tʼan jiñʌch cheʼ mi lac tsictesan jiñi wen tʼan chaʼan miʼ mejlel i chʼʌmben isujm jiñi quixtañu i miʼ ñijcʌyel i pusicʼal chaʼan miʼ mel cheʼ bajcheʼ woliʼ cʌn. Come ili pañimil (mulawil) tsʼitaʼ jax cʌylem i yorajlel, yom mi la cʌcʼ lac ñaʼtʌbal chaʼan mi lac tech la cʌcʼ estudio i mi lac chaʼlen cʌntesa chaʼan bʌ i sujmlel. Iliyi yom i yʌl chaʼan mi lac sʌclan jiñi weñoʼ bʌ i pusicʼal chaʼan miʼ mejlelob i taj i cuxtʌlel mach bʌ añic i jilibal yicʼot chaʼan mi laj coltañob sujtel tiʼ wiñicob Jehová (pejcan Hechos 13:44-48, TNM). *

4. ¿Bajcheʼ miʼ mejlel lac taj «jiñi yomoʼ bʌ i taj i cuxtʌlel mach bʌ añic miʼ jilel»?

⁴ ¿Bajcheʼ miʼ mejlel lac taj «jiñi yomoʼ bʌ i taj i cuxtʌlel mach bʌ añic miʼ jilel»? Cheʼ bajcheʼ tsaʼ mejli ti ñaxam bʌ siglo, jiñʌch cheʼ mi lac chaʼlen subtʼan. Jin chaʼan, yom mi lac jacʼ tsaʼ bʌ i subeyonla Jesús: «Baqui jach mi laʼ wochel ti tejclum, o mi ti chʼochʼoc bʌ xchumtʌl, yom mi laʼ sʌclan juntiquil utsʼat bʌ i pusicʼal» (Mt. 10:11, Jiñi tsijiʼ bʌ wen tʼañ chaʼañ estudio). La cujil chaʼan jiñi wiñicob xʼixicob mach bʌ añic chuqui yomob, muʼ bʌ i chanʼesañob i bʌ yicʼot maʼañic bʌ miʼ qʼuelob ti ñuc i chaʼan bʌ Dios maʼañic mi caj i jacʼob jiñi wen tʼan. Mi lac sʌclan jiñi pecʼoʼ bʌ i pusicʼal yicʼot jiñi isujm bʌ yomob i cʌn jiñi i sujmlel. Laʼ laj cʌl jumpʼejl ejemplo. Cheʼ bʌ Jesús tsiʼ chaʼle eʼtel bajcheʼ xjucʼteʼ, tiʼ sʌcla wem bʌ teʼ chaʼan miʼ mel puerta tac yicʼot jiñi qʼuechoñib cʌmbil bʌ bajcheʼ yugo. Cheʼ bʌ tsaʼix i taja jiñi teʼ, miʼ cʼʌn ti wen i yeʼtijib tac chaʼan miʼ tech i mel chuqui yom. Joñonla lʌcʼʌ lajalʌch yom bʌ mi lac mel jaʼel: Ñaxan yom mi lac sʌclan jiñi quixtañujob utsoʼ bʌ i pusicʼal, i cheʼ jiñi mi lac tech laj cʼʌn ti wen jiñi eʼtijib tac chaʼan miʼ sujtelob ti xcʌntʼan (Mt. 28:19, 20).

5. Tsictesan yicʼot jumpʼejl ejemplo chuqui yom la cujil chaʼan jiñi an tac bʌ yaʼ ti la queʼtijib chaʼan bʌ cʌntesa (qʼuele jiñi foto tac am bʌ tiʼ tejchibal).

⁵ Jujumpʼejl eʼtijib añʌch bajcheʼ yom miʼ cʼʌjñel. Laʼ lac ñaʼtan tsaʼ bʌ i cʼʌñʌ Jesús cheʼ tsiʼ chaʼle eʼtel bajcheʼ xjucʼteʼ, an muʼ bʌ i cʼʌjñel chaʼan miʼ pʼistʌl jiñi teʼ, yambʌ muʼ bʌ i tsep, an chaʼan bʌ miʼ jow yicʼot miʼ weñʼesan, an chaʼan bʌ miʼ pamun, yicʼot yan tac bʌ. Cheʼ jaʼel, pejtelel muʼ bʌ i tilel yaʼ ti la queʼtijib chaʼan bʌ cʌntesa añʌch i cʼʌjñibal tiʼ chajp tiʼ chajp. Tiʼ pejtelel ñuc i cʼʌjñibal, jin chaʼan mi caj laj qʼuel bajcheʼ yom mi laj cʼʌn.

6, 7. a) ¿Bajcheʼ an a cʼʌñʌ jiñi tarjeta tac chaʼan jw.org? b) ¿Baqui bʌ chaʼchajp i cʼʌjñibal jiñi lac pʌyol ti lac tempa bʌ?

⁶ Tarjeta chaʼan jw.org. Ili eʼtijib mach wen colemic, pero ñucʌch i cʼʌjñibal, miʼ mejlel laj cʼʌn la cʌcʼ lac bʌ ti cʌjñel tiʼ tojlel jiñi quixtañujob i mi lac subeñob ochel yaʼ ti lac página chaʼan Internet. Yaʼi miʼ mejlelob i taj muʼ bʌ i yʌjlel ti lac tojlel yicʼot chaʼan miʼ cʼajtiñob jumpʼejl estudio. Ili ora, ñumen ti 400 mil quixtañu an i cʼajtiyob estudio yaʼ ti jw.org. I ti jujumpʼejl qʼuin an yambʌ quixtañujob woli bʌ i bej cʼajtiñob. ¿Ixcu cheʼ muqʼuic a cuch tiʼ pejtelel ora ili tarjeta tac? Cheʼ bajcheʼ ili, bajcheʼ jach ora miʼ mejlel lac sub jiñi wen tʼan.

⁷ Lac pʌyol chaʼan tempa bʌ. Jiñi lac pʌyol chaʼan lac tempa bʌ an chaʼchajp i cʼʌjñibal. Miʼ suben jiñi quixtañu: «Mic pʌyet lojon chaʼan  maʼ chajpan jiñi Biblia a wicʼot jiñi i testigojob Jehová». Ti wiʼil, miʼ suben chaʼan miʼ mejlel i chajpan jiñi Biblia yaʼ ti tempa bʌ tac o cheʼ miʼ chʼʌm jumpʼejl estudio. Jin chaʼan, ili eʼtijib mach cojic jach miʼ coltañonla lac tech tʼan, miʼ coltan jaʼel jiñi «muʼ bʌ i ñaʼtañob chaʼan ñucʌch i cʼʌjñibal i chaʼan bʌ Dios» chaʼan miʼ techob estudio la quicʼot (Mt. 5:3). Tiʼ sujm, majqui jach miʼ mejlel ti majlel ti lac tempa bʌ, anquese maʼañic miʼ chʼʌm jumpʼejl estudio. Mi mucʼʌch i majlel, mi caj i qʼuel chaʼan cabʌl chuqui miʼ mejlel i cʌn yaʼ ti Biblia.

8. ¿Chucoch ñuc i cʼʌjñibal cheʼ jiñi quixtañujob miʼ majlelob ti tempa bʌ, anquese junyajl jach? Alʌ jumpʼejl ejemplo.

⁸ Ñuc i cʼʌjñibal cheʼ mi lac bej pʌyob ti lac tempa bʌ jiñi quixtañujob, anquese yaʼ junyajl jach miʼ majlelob. ¿Chucoch? Come miʼ caj i qʼuelob chaʼan jiñi i testigojonbʌla Jehová mi lac pʌs jiñi i sujmlel am bʌ ti Biblia yicʼot mi laj coltan yambʌlob chaʼan miʼ cʌñob Dios, i mach cheʼic bajcheʼ miʼ mel jiñi mach bʌ isujmic ñopbalʌl (Is. 65:13). Jiñʌch tsaʼ bʌ ujti tiʼ tojlel Ray yicʼot Linda, jumpʼejl xñujpuñel añoʼ bʌ ti Estados Unidos. Miʼ ñopob Dios i miʼ ñaʼtañob chaʼan yomob miʼ majlel ti iglesia chaʼan miʼ ñumen cʌñob. Jin chaʼan, tsaʼ majli i julaʼtañob pejtelel jiñi iglesia am bʌ tiʼ tejclum. Cabʌl iglesia tsiʼ tajayob yicʼot yambʌ ñopbalʌl tac. Ti ñaxan, tsiʼ wen ñaʼtayob chaʼan añʌch chaʼchajp ñuc bʌ i cʼʌjñibal yom bʌ an i chaʼan jumpʼejl ñopbalʌl chaʼan miʼ cʌytʌlob. Ñaxam bʌ, añʌch chuqui yom miʼ cʌñob cheʼ miʼ yujtel jiñi cʌntesʌntel. I chaʼpʼejlel, chaʼan wen jach bajcheʼ yilal miʼ xojob i pislel muʼ bʌ i majlelob yaʼi, come cheʼʌch yom tiʼ tojlel muʼ bʌ i melbeñob i yeʼtel Dios. Cabʌl jab tsiʼ julaʼtayob jiñi iglesia tac, pero tsiʼ tajayob i chʼijiyemlel come maʼañic chuqui tsiʼ cʌñʌyob i jiñi quixtañujob mach utsʼatic jiñi i pislelob muʼ bʌ i xojob. Cheʼ tsaʼ loqʼuiyob ti jiñi cojix bʌ iglesia tsaʼ bʌ i julaʼtayob, Linda tsaʼ majli ti eʼtel i jiñi Ray tsaʼ majli tiʼ yotot. Cheʼ majlel mucʼ tiʼ yotot, Ray tsaʼ ñumi baqui an jumpʼejl i Yotlel Tempa bʌ, i tsiʼ ñaʼta: «¿Chucoch maʼan mi cochel i mij qʼuel chuqui miʼ melob?» Cheʼ bajcheʼ la cujil, wen tijicña tsiʼ yubi i bʌ. Jiñi hermanojob wen jach bajcheʼ tsiʼ pejcayob yicʼot wen jach jiñi i pislelob. Ray tsaʼ buchle tiʼ tejchibal jiñi buchlibʌl tac i wen tijicña cheʼ cabʌl chuqui tsiʼ cʌñʌ. Cheʼʌch tsaʼ ujti bajcheʼ tsiʼ yʌlʌ Pablo tiʼ tojlel jiñi quixtañu cojaxto bʌ miʼ majlel ti tempa bʌ i miʼ yʌl: «Yaʼan Dios laʼ wicʼot ti isujm» (1 Co. 14:23-25). Cʼʌlʌl cheʼ jiñi, Ray tsaʼ caji ti majlel ti jujumpʼejl domingo i ti wiʼil ti jiñi yambʌ tempa bʌ tac. Linda tsaʼ caji ti majlel jaʼel. Anquese ñumeñix ti 70 i jabilelob, tsiʼ jacʼʌyob i chʼʌm jumpʼejl estudio i tsiʼ chaʼleyob chʼʌmjaʼ.

9, 10. a) ¿Chucoch mach wocolic ti cʼʌjñel jiñi tratado tac? b) Tsictesan bajcheʼ miʼ mejlel laj cʼʌn jiñi tratado ¿Chuqui jiñi i Yumʌntel Dios?

⁹ Tratado tac. An waxʌcpʼejl lac tratado, mach wocolic ti cʼʌjñel i miʼ coltañonla lac tech tʼan yicʼot jiñi quixtañujob. Cʼʌlʌl cheʼ tsaʼ tejchi ti mejlel, ti 2013, ñumen ti 5 mil millón an chaʼlenti ti imprimir. Wen utsʼatax bʌ jiñʌch cheʼ mi tsaʼ laj cʌñʌ bajcheʼ yom miʼ cʼʌjñel jumpʼejl, mach wocolix mi caj laj cʼʌn jiñi yan tac bʌ, come junlajal bajcheʼ melbil tac. ¿Bajcheʼ miʼ mejlel laj cʼʌn chaʼan mi lac tech tʼan?

¹⁰ Laʼ lac ñaʼtan chaʼan mi laj cʼʌn jiñi tratado ¿Chuqui jiñi i Yumʌntel Dios? Miʼ mejlel lac pʌsben jiñi quixtañu jiñi am bʌ tiʼ tejchibal i mi lac suben: «¿Am baʼ cʼajtibe a bʌ chuqui jiñi i Yumʌntel Dios? ¿Baqui bʌ i jacʼbal maʼ wʌl ti ili uxchajp?». Mach lac suben mi wen o mach weñic bajcheʼ tsiʼ jacʼʌ, cheʼ jiñi, laʼ ñumiconla yaʼ ti yambʌ i yopol, i laʼ lac pʌsben jiñi parte «Muʼ bʌ i yʌl jiñi Biblia» i mi lac pejcan jiñi texto tac yaʼ bʌ miʼ tilel, jiñi Daniel 2:44 yicʼot Apocalipsis 11:15. Mi mucʼʌch i mejlel, laʼ lac bej chaʼlen tʼan. Tiʼ yujtibal, laʼ lac pʌs jiñi cʼajtiya am bʌ tiʼ pat, yaʼ baʼ miʼ yʌl  «Cʼajtiben a bʌ»: «¿Bajcheʼ yilal mi laj cajel ti chumtʌl cheʼ bʌ miʼ tilel i Yumʌntel Dios?». Cheʼ bajcheʼ jiñi, añix chuqui mi caj la cʌl cheʼ miʼ lac chaʼ pejcan. Cheʼ mi lac chaʼ pejcan jiñi quixtañu, miʼ mejlel lac pʌsbeñob jiñi cʌntesʌntel 7 yaʼ ti folleto ¡Jini wen tʼan tilem bʌ ti Dios!, ili jiñʌch yambʌ eʼtijib chaʼan mi laj cʼʌn lac tech estudio.

11. ¿Bajcheʼ chajpʌbil jiñi lac revista tac, i chuqui yom la cujil?

¹¹ Jiñi revista tac. Jiñi revista Lac Tsictesʌbentel yicʼot ¡Despertad! jin tacʌch ñumen am bʌ chaʼlenti ti traducir yicʼot ñumen pujquem bʌ tiʼ pejtelel pañimil. Jiñi temaj tac am bʌ tiʼ tejchibal yajcʌbil chaʼan miʼ mulʌntel ti pejcʌntel come jiñi quixtañujob tiʼ pejtelel pañimil miʼ wen pejcañob. Yom mi laj cʼʌn chaʼan jiñi quixtañujob miʼ tech i mulañob i cʌn chuqui i cʼʌjñibal i chaʼañob Ili ora. Jin chaʼan, yom mi lac wen ñaʼtan majqui tiʼ tojlelob melbil jiñi revista tac, chaʼan mach majchic jach mi laj cʌybeñob.

12. ¿Majqui tiʼ tojlel melbil jiñi revista ¡Despertad!, i baqui bʌ i cʼʌjñibal?

¹² Jiñi revista ¡Despertad! melbil tiʼ tojlel jiñi mach bʌ wen yujilobic o mach bʌ añic chuqui yujilob chaʼan jiñi Biblia. Tajol mach i cʌñʌyobic jiñi cʌntesʌntel tac am bʌ ti Biblia, maʼañic miʼ wen ñopob muʼ bʌ i yʌjlel ti ñopbalʌl tac o mach yujilobic chaʼan jiñi Biblia miʼ chʼʌm tilel wen tac bʌ ticʼojel chaʼan laj cuxtʌlel. Junchajp ñuc bʌ i cʼʌjñibal ili revista jiñʌch chaʼan miʼ coltan i ñop jiñi quixtañujob chaʼan añʌch Dios (Ro. 1:20; He. 11:6). Miʼ coltan i ñop jaʼel chaʼan jiñi Biblia jiñʌch i Tʼan Dios (1 Ts. 2:13). Jiñi uxpʼejl temaj chaʼan jiñi jabil 2018 jiñʌch «El camino de la felicidad», «12 claves para una familia feliz» yicʼot «Ayuda para quienes están de duelo».

13. a) ¿Majqui tiʼ tojlelob melbil jiñi Lac Tsictesʌbentel chaʼan bʌ subtʼan? b) ¿Baqui bʌ experiencia tajbil a chaʼan cheʼ maʼ cʼʌn ili eʼtijib?

¹³ Jiñi Lac Tsictesʌbentel chaʼan bʌ subtʼan miʼ tsictesan jiñi cʌntesʌntel tac tiʼ tojlel jiñi muʼ bʌ i qʼuelob ti ñuc Dios yicʼot i Tʼan. Tajol i cʌñʌyobʌch tsʼitaʼ muʼ bʌ i yʌl jiñi Biblia, pero maʼañic miʼ wen chʼʌmbeñob isujm jiñi cʌntesa (Ro. 10:2; 1 Ti. 2:3, 4). Jiñi uxpʼejl temaj chaʼan jiñi jabil 2018 miʼ jacʼ ili cʼajtiya tac: «¿Anto ba i cʼʌjñibal jiñi Biblia ili ora?», «¿Chuqui miʼ cajel ti talto bʌ qʼuin?» yicʼot «¿Muʼ ba i chʼʌmet ti ñuc Dios?».

14. a) ¿Chuqui i cʼʌjñibal jiñi chʌmpʼejl video muʼ bʌ lac taj yaʼ ti la queʼtijib tac chaʼan bʌ cʌntesa? b) ¿Baqui bʌ experiencia tac an taja cheʼ cʼʌmbil a chaʼan ili video tac?

¹⁴ Jiñi video tac. Cheʼ tiʼ yorajlel Jesús, jiñi xjucʼteʼob cojach miʼ cʼʌñob jiñi eʼtijib tac mach bʌ chuculic ti luz, pero ili ora añix bajcheʼ jiñi sierra, jiñi taladro yicʼot lijadora. Cheʼ lajal jaʼel, wʌle an lac chaʼan video tac i mach cojic jach jiñi jun tac. Mi lac taj chʌmpʼejl yaʼ ti la queʼtijib chaʼan bʌ cʌntesa: ¿Chucoch yom mi lac pejcan jiñi Biblia?, ¿Chuqui jiñi estudio loqʼuem bʌ ti Biblia?, ¿Chuqui miʼ mejlel yaʼ ti i Yotlel Tempa bʌ? yicʼot ¿Majquiyob jiñi i testigojob Jehová? Jiñi video tac maʼañic bʌ mi jalʼan ti 2 minuto, miʼ mejlel tiʼ cʼʌjñel cheʼ ti ñaxam bʌ julaʼ. I jiñi ñumen jal tac bʌ, miʼ mejlel laj cʼʌn cheʼ mi lac mel revisita tac yicʼot jiñi ñumen am bʌ i yorajlel i chaʼan. Ili utsʼatax bʌ eʼtijib tac miʼ mejlel i ñijcʌben i pusicʼal jiñi quixtañujob chaʼan miʼ chʼʌmob jumpʼejl estudio i miʼ majlelob ti tempa bʌ tac.

15. Alʌ jumpʼejl ejemplo muʼ bʌ i pʌs chaʼan añʌch i cʼʌjñibal cheʼ juntiquil quixtañu miʼ qʼuel video tac tiʼ tʼan.

¹⁵ Laʼ laj qʼuel chuqui miʼ mel tiʼ tojlel quixtañujob jiñi video tac. Juntiquil hermana tsiʼ taja juntiquil xʼixic chʼoyol bʌ ti Micronesia yujil bʌ jiñi tʼan yapés, i tsiʼ pʌsbe jiñi video ¿Chucoch yom mi lac pejcan jiñi Biblia? am bʌ tiʼ tʼan. Cheʼ bʌ tsaʼ caji i qʼuel jiñi video, jiñi xʼixic tsiʼ yʌlʌ: «¡An tic tʼan, maʼañic miʼ mejlel  c ñop! Jiñi wiñic woli bʌ ti tʼan yaʼ ti video lajal mucʼ ti tʼan bajcheʼ yaʼ ti isla baqui tilemon. ¡Yujil jiñi c tʼan!». Ti wiʼil, tsiʼ yʌlʌ chaʼan mi caj i pejcan yicʼot mi caj i luʼ qʼuel am bʌ ti jw.org ti tʼan yapés (laja yicʼot Hechos 2:8, 11). Cheʼʌch tsaʼ ujti jaʼel juntiquil hermana chʼoyol bʌ ti Estados Unidos am bʌ i sobrino ti yambʌ país, tsiʼ chocbe majlel jiñi dirección chaʼan miʼ qʼuel jaʼel jiñi video tiʼ tʼan. Cheʼ bʌ tsaʼix i qʼuele, tsiʼ chocbe majlel jumpʼejl correo i ñaʼjel, tiʼ sube: «Tsaʼ bʌ c ñumen mulaj jiñʌch baqui miʼ tsictesʌntel chaʼan ili pañimil an tiʼ cʼʌb juntiquil pʼʌtʌl bʌ yicʼot jontol bʌ. Tsaʼ j cʼajti jumpʼejl estudio». I sobrino jiñi hermana chumul ti jumpʼejl país baqui mʌctʌbil lac subtʼan.

16. Tsictesan baqui bʌ i cʼʌjñibal ili folleto tac: a) Ñichʼtan Dios i chumlen ti pejtelel ora. b) ¡Jini wen tʼan tilem bʌ ti Dios! c) ¿Majquiyob woli bʌ i melob chuqui yom Jehová ti ili ora?

¹⁶ Jiñi folleto tac. Mi juntiquil quixtañu mach wen yujilic pejcʌntel jun o mi maʼañic jun tac tiʼ tʼan, ¿bajcheʼ miʼ mejlel lac pʌsben jiñi i sujmlel? An lac chaʼan jumpʼejl wem bʌ la queʼtijib: Jiñi folleto Ñichʼtan Dios i chumlen ti pejtelel ora. * Yambʌ wen bʌ la queʼtijib chaʼan mi lac tech jumpʼejl estudio jiñʌch jiñi folleto ¡Jini wen tʼan tilem bʌ ti Dios! Miʼ mejlel lac pʌsben jiñi quixtañu jiñi 14 temaj am bʌ tiʼ yujtibal i yopol, mi laj cʼajtiben baqui bʌ miʼ wen mulan i mi lac tech lac tsajin jiñi temaj tsaʼ bʌ i yajca. ¿Am ba lac mele iliyi cheʼ mi lac mel revisita tac? Jiñi i yuxpʼejlel folleto am bʌ ti la queʼtijib chaʼan bʌ cʌntesa jiñʌch ¿Majquiyob woli bʌ i melob chuqui yom Jehová ti ili ora? Chajpʌbil chaʼan mi laj cʼʌn la coltan jiñi muʼ bʌ la cʌqʼueñob estudio chaʼan miʼ yochelob tiʼ yorganización Jehová. Chaʼan mi lac ñop laj cʼʌn, miʼ mejlel lac pejcan jiñi Jun chaʼan lac tempa bʌ: I Subtʼan yicʼot i Melbal jiñi xÑoptʼan, tsaʼ bʌ loqʼui cheʼ ti marzo ti 2017.

17. a) ¿Chuqui i cʼʌjñibal ti jujunchajp jiñi libro? b) ¿Chuqui yom miʼ mel jiñi muʼ bʌ i chaʼleñob chʼʌmjaʼ, i chucoch?

¹⁷ Jiñi libro tac. Mi tsaʼ lac teche jumpʼejl estudio yicʼot jumpʼejl folleto, miʼ mejlel laj qʼuextan yicʼot jiñi libro ¿Chuqui miʼ cʌntesañonla tiʼ sujmlel jiñi Biblia? Ili eʼtijibʌl miʼ coltan jiñi muʼ bʌ la cʌqʼueñob estudio chaʼan miʼ cʌñob jiñi cʌntesʌntel tac ñuc bʌ i cʼʌjñibal. Mi mucʼʌch i yujtesan jiñi libro yicʼot miʼ wen i taj i colel tiʼ chaʼan bʌ Dios, mi caj laj cʼʌn jiñi libro Chʌn ajñenla tiʼ cʼuxbiya Dios. * Ili libro mi caj i cʌntesan chaʼan yom miʼ pʌs tiʼ melbal jiñi principio tac ti jujumpʼejl qʼuin. Yom mi laj cʼajtesan chaʼan jiñi muʼ bʌ laj cʌqʼuen estudio yom miʼ yujtesan jiñi chaʼpʼejl libro, anquese chʼʌmʌlix i chaʼan jaʼ. Cheʼ bajcheʼ jiñi, wen xucʼul mi caj i yajñel tiʼ sujmlel (pejcan Colosenses 2:6, 7).

18. a) Cheʼ bajcheʼ miʼ yʌl 1 Timoteo 4:16, ¿chuqui yom mi lac mel, i chuqui mi caj lac taj? b) ¿Baqui bʌ i sujmlel cheʼ mi laj cʼʌn jiñi eʼtijib chaʼan bʌ cʌntesa?

¹⁸ Jiñi i testigojonbʌla Jehová yom mi lac sub ñumel jiñi wen tʼan chaʼan jiñi quixtañujob miʼ mejlel i tajob jiñi cuxtʌlel mach bʌ añic i jilibal (Col. 1:5; pejcan 1 Timoteo 4:16). Chaʼan miʼ mejlel lac mel, tsaʼ aqʼuentiyonla jiñi laj queʼtijib tac chaʼan bʌ cʌntesa (qʼuele jiñi recuadro « Eʼtijib tac chaʼan bʌ cʌntesa»). Laʼ laj cʼʌn ti ñumen wen. Jujuntiquil xsubtʼan mi caj i yajcan baqui bʌ eʼtijib mi caj i cʼʌn yicʼot jala. Pero yom mi laj cʼajtesan chaʼan mach yom jach mi lac puc ñumel jiñi jun tac. Mach yomic mi laj cʌybeñob jiñi maʼañic bʌ miʼ qʼuelob ti ñuc jiñi wen tʼan. La com bʌ jiñʌch cheʼ «jiñi yomoʼ bʌ i taj i cuxtʌlel mach bʌ añic miʼ jilel», jiñi utsoʼ bʌ yicʼot pecʼoʼ bʌ, yicʼot jiñi yomoʼ bʌ i cʌn i sujmlel, miʼ sujtelob ti xcʌntʼan i chaʼan cristo (Hch. 13:48; Mt. 28:19, 20).