1, 2. ¿Chuquiyes am bʌ i ñumen aqʼue wocol jiñi quixtañujob, i majqui i mul?

JIÑI melbil (pʌtbil) tac bʌ ili ora bajcheʼ teléfono, foco chaʼan luz, jiñi carro yicʼot refrigerador añʌch i wen coltayonla. I an yan tac bʌ am bʌ i yʌcʼʌ cabʌl wocol, bajcheʼ jiñi juloñib tac, jiñi bomba tac yicʼot jiñi cʼujts. Pero añʌch yambʌ am bʌ i yʌqʼue cabʌl wocol jiñi wiñicob xʼixicob i jiñʌch jiñi ñaxam bʌ tsaʼ bʌ ochi ti pañimil (mulawil). ¿Chuquiyes? Jiñʌch jiñi lot, ili jiñʌch cheʼ an chuqui la cujil chaʼan mach isujmic, pero mi laj cʼʌn lac lotin juntiquil quixtañu. Jiñi Diablo jiñʌch tsaʼ bʌ i ñaxan chaʼle lot, Jesús tsiʼ yʌlʌ chaʼan jiñʌch i tat jiñi lot (pejcan Juan 8:44). ¿Jalixqui tsiʼ yʌlʌ jiñi ñaxam bʌ lot?

² Añix ñumen cabʌl mil jab tsiʼ yʌlʌ, yaʼʌch yaʼ ti pʌcʼʌbʌl Edén. Adán yicʼot Eva tijicña chumulob yaʼ ti paraíso tsaʼ bʌ aqʼuentiyob ti Dios. Pero tsaʼ subentiyob chaʼan maʼañic miʼ cʼuxbeñob i wut ‹jini teʼ muʼ bʌ i yʌqʼueñob i cʌn chuqui utsʼat yicʼot chuqui jontol›. Mi tsiʼ ñusayob ili tʼan, miʼ chʌmelob (sajtelob). I Satanás wen yujilʌch iliyi, pero tsiʼ cʼʌñʌ juncojt lucum chaʼan miʼ suben Eva ili ñaxam bʌ lot: «Maʼanic mi caj laʼ chʌmel». Tsiʼ bej alʌ: «Yujil Dios mux i cajñel laʼ wut cheʼ mi laʼ cʼuxben i wut jini teʼ. Lajal mi caj laʼ wajñel bajcheʼ Dios. Mi caj laʼ cʌn chuqui tac utsʼat yicʼot chuqui tac jontol» (Gn. 2:15-17; 3:1-5).

3. a) ¿Chucoch wen jontol jax i lot Satanás? b) ¿I chuqui tsaʼ ujti tiʼ caj jiñi?

 ³ Wen jontol jax i lot jiñi Satanás, come yujil chaʼan mi Eva miʼ ñopben i tʼan i miʼ cʼuxben i wut jiñi teʼ, mi caj i chʌmel. Eva yicʼot i ñoxiʼal tsiʼ ñusʌbeyob i tʼan Jehová i ti wiʼil tsaʼ chʌmiyob (Gn. 3:6; 5:5). Pero mach cojach jiñi, tiʼ caj mulil «mi lac chʌmel ti lac pejtelel» i cheʼʌch miʼ yujtel tiʼ tojlel «jini mach bʌ lajalobic i mul bajcheʼ Adán» (Ro. 5:12, 14). Jiñi wiñicob xʼixicob (quixtañujob) maʼañic miʼ mejlelob ti chumtʌl tiʼ pejtelel ora cheʼ bajcheʼ tsiʼ ñaʼta Dios, cojach miʼ cʼotelob ti 70 jab o mi añobto i pʼʌtʌlel miʼ cʼotelob ti 80 jab. Pero wen tsʌts yicʼot wocol jax miʼ ñusañob (Sal. 90:10). ¡Pejtelel iliyi ujtem tiʼ caj i lot Satanás!

4. a) ¿Baqui tac bʌ cʼajtiya yom mi la cʌqʼuen i jacʼbal? b) Cheʼ bajcheʼ mi laj qʼuel ti Efesios 4:25, ¿majqui jach miʼ mejlelob ti sujtel tiʼ yamigo Jehová?

⁴ Ti Juan 8:44 Jesús tsiʼ yʌlʌ: «Maʼanic tsaʼ chʌn ajni tiʼ sujmlel Dios, come maʼanic chuqui isujm tiʼ pusicʼal xiba». I bej cheʼʌch ili ora. Satanás woli (choncol) i bej lotin «pejtel winicob ti pañimil» (Ap. 12:9). Pero joñonla mach la com lotintel ti Satanás i mi laj cʌy Jehová, cheʼ bajcheʼ tsiʼ mele (chaʼle) Adán yicʼot Eva. Jin chaʼan mi caj laj qʼuel ili uxpʼejl cʼajtiya: ¿Bajcheʼ miʼ lotin quixtañujob jiñi Satanás? ¿Chucoch mucʼob ti lot jiñi quixtañujob? I ¿bajcheʼ mi lac pʌs chaʼan tiʼ pejtelel ora mi laj cʌl chuqui isujm? (Pejcan Efesios 4:25).

5. ¿Bajcheʼ miʼ lotin quixtañujob jiñi Satanás ili ora?

⁵ Jiñi apóstol Pablo yujil chaʼan machʌch añic mi lac mejlel ti yajlel tiʼ yac Satanás come «la cujil isujm miʼ bej sʌclan bajcheʼ miʼ lotiñonla chaʼan i yʌsañonla ti mulil» (2 Co. 2:11, Jini wen bʌ tʼan). La cujil chaʼan ili pañimil an tiʼ pʼʌtʌlel Satanás, yaʼ ochem jiñi mach bʌ isujmic ñopbalʌl, jiñi yumʌlob xujchʼoʼ bʌ yicʼot jiñi choñoñelʌl tac (1 Jn. 5:19). Jin chaʼan, mach toj sajtel lac pusicʼal cheʼ Satanás yicʼot i xibajob miʼ ñijcʌben i pusicʼal jiñi ñucoʼ bʌ i yeʼtel (troñel) chaʼan miʼ chaʼleñob lot (1 Ti. 4:1, 2). Jumpʼejl ejemplo, an xchoñoñelob mucʼoʼ bʌ ti lot cheʼ miʼ subob chuqui tac miʼ choñob chaʼan yomob miʼ mʌnbentel anquese yujilob chaʼan mach weñic o chaʼan jach miʼ cʌytʌlob yicʼot i taqʼuin jiñi quixtañujob.

6, 7. a) ¿Chucoch ñumen añob i mul jiñi xcʌntesajob ti jiñi mach bʌ isujmic ñopbalʌl? b) ¿Chuqui ti lot an tac a wubi i yʌlob jiñi xcʌntesajob ti mach bʌ isujmic ñopbalʌl?

⁶ Ñumen añoʼ bʌ i mul jiñʌch jiñi xcʌntesajob ti jiñi mach bʌ isujmic ñopbalʌl. ¿Chucoch? Come jiñi quixtañujob miʼ ñopbeñob i lot yicʼot miʼ melob muʼ bʌ i tsʼaʼlen Dios i miʼ mejlelob i sʌt i cuxtʌlel tiʼ pejtelel ora (Os. 4:9). Jesús yujil chaʼan jiñi ñucoʼ bʌ i yeʼtel ti ñopbalʌl ti wajali miʼ lotiñob quixtañujob. Jin chaʼan, tiʼ subeyob: «¡Mi caj laʼ taj wocol stsʼijbayajob yicʼot fariseojob! ¡Chaʼpʼejl jax laʼ pusicʼal! Mi laʼ ñumel ti xʌmbal ti lum yicʼot ti ñajb chaʼan miʼ sutqʼuin i bʌ juntiquil winic. Cheʼ bʌ tsaʼix i sutqʼui i bʌ, mi laʼ wutsi xicʼben ti jontolil jinto ñumen an i jontolil bajcheʼ laʼ jontolil», yom i yʌl, chaʼan miʼ junyajlel jisʌntelob (Mt. 23:15). Jesús tsiʼ yʌqʼueyob tsʌts bʌ ticʼojel i tiʼ subeyob: «Jatetla i chaʼañetla xiba» come «stsʌnsayajʌch» (Jn. 8:44).

⁷ Ili ora an cabʌl ñucoʼ bʌ i yeʼtel ti ñopbalʌl i miʼ subentelob ti pastor, motomajob o yan tac bʌ bajcheʼ miʼ cʌjñelob. Lajalob bajcheʼ jiñi fariseojob, maʼañic miʼ pʌsob i sujmlel am bʌ tiʼ Tʼan Dios i tsaʼix i «cʌyʌyob i sujmlel Dios chaʼan miʼ ñopob lot» (Ro. 1:18, 25). Miʼ yʌlob chaʼan mi caj lac pulel ti cʼajc tiʼ pejtelel ora, chaʼan mach yujilic chʌmel lac bʌcʼtal yicʼot chaʼan Dios  utsʼat miʼ qʼuel jiñi muʼ bʌ i wʌlʌc piʼleñob i bʌ yicʼot cheʼ miʼ ñujpuñelob laj bʌ wiñicob o xʼixicob.

8. a) ¿Chuqui bʌ lot mach jalix yom chaʼan miʼ yʌlob jiñi añoʼ bʌ ti política? b) ¿Chuqui mi cajel lac mel?

⁸ Jiñi añoʼ bʌ ti política an i lotiyob jiñi quixtañujob. Mach jalix yom chaʼan miʼ yʌlob jumpʼejl ñuc bʌ lot: «Ñʌchʼʌlix pañimil, [...] maʼanic tsiquil bʌbʌqʼuen bʌ». Pero «cheʼ jini mi caj i bʌcʼ jisʌntelob». Mach la cʌcʼ lac bʌ ti lotintel cheʼ miʼ yʌlob chaʼan ili pañimil maʼañix ti wocol. Come la cujil chaʼan «mi caj i tilel i qʼuiñilel lac Yum cheʼ bajcheʼ xujchʼ ti acʼʌlel» (1 Ts. 5:1-4).

9, 10. a) ¿Chucoch mucʼob ti lot jiñi quixtañujob, i bajcheʼ miʼ ticʼlañonla? b) ¿Chuqui yom mi laj cʼajtesan tiʼ tojlel Jehová?

⁹ Wʌle ora, ti ili pañimil jiñi quixtañujob ñʌmʌlob ti lot. Mach cojach jiñi añoʼ bʌ ñuc bʌ i yeʼtel. Ti jumpʼejl revista wen cʌmbil bʌ, tsiʼ chʼʌmʌ tilel ili temaj «¿Chucoch mucʼonla ti lot?», i tsiʼ yʌlʌ: «Tsaʼix wen qʼuejli chaʼan jiñi lot jiñʌch maʼañix bʌ miʼ mejlel i cʌy i yʌlob jiñi quixtañujob». Cabʌl quixtañujob miʼ chaʼleñob lot tajol chaʼan maʼañic chuqui miʼ chaʼleñob, miʼ mucob i mul yicʼot chuqui mach bʌ weñic miʼ melob, o chaʼan miʼ tajob ñumen wem bʌ i yeʼtel o miʼ ñumen tajob taqʼuin o chuqui jach yomob. Tsiʼ taja ti tʼan jaʼel chaʼan jiñi quixtañujob «mach wocolic miʼ yʌlob ñuc tac bʌ o mach bʌ ñuquic lot tiʼ tojlel jiñi mach bʌ i cʌñʌyobic, tiʼ piʼʌlob ti eʼtel, i yamigojob yicʼot i cʌñʌyoʼ bʌ».

¹⁰ ¿Bajcheʼ tac miʼ ticʼlañonla cheʼ mucʼonla ti lot? Maʼañix mi caj i ñopob lac tʼan yicʼot mi lac sʌt la camigojob. Jumpʼejl ejemplo, laʼ lac ñaʼtan bajcheʼ miʼ yubin i bʌ juntiquil wiñic cheʼ bʌ jiñi i yijñam mach xucʼulic tiʼ tojlel i maʼañic chuqui miʼ suben. Chʼijiyemtic jax jaʼel cheʼ juntiquil wiñic miʼ pʌs chaʼan wem bʌ ñoxiʼalʌl yicʼot tatʌl tiʼ tojlel i yijñam yicʼot i yalobilob, pero yaʼ tiʼ yotot miʼ ticʼlañob. Pero yom mi laj cʼajtesan chaʼan muʼ bʌ i melob bajcheʼ iliyi maʼañic chuqui miʼ mejlel i mucbeñob Jehová, come «jamʌl tiʼ wut pejtel chuqui tac an» (He. 4:13).

11. ¿Chuqui miʼ cʌntesañonla tsaʼ bʌ i meleyob Ananías yicʼot Safira? (Qʼuele jiñi dibujo am bʌ tiʼ tejchibal).

¹¹ Yaʼ ti Biblia mi lac taj jumpʼejl ejemplo, jiñʌch chaʼan jumpʼejl xñujpuñel yaʼ ti congregación cheʼ ti ñaxam bʌ siglo, Ananías yicʼot Safira. Satanás tsiʼ ñijcʌbeyob i pusicʼal chaʼan miʼ lotiñob Dios. Tsiʼ choñoyob jumpʼejl i lum i tiʼ subeyob jiñi apóstolob chaʼan woli (yʌquel) i yʌcʼbeñob pejtelel i tojol, pero mach cheʼic tsiʼ meleyob, come tsiʼ tʼox chʼʌmʌyob. Yomob jach chaʼan jiñi yambʌ hermanojob miʼ qʼuelob ti wen i chaʼan miʼ pʌsob chaʼan ñumen añobʌch i yutslel i pusicʼal. Pero Jehová tsiʼ ñaʼta chaʼan i lotob jach i tsiʼ yʌqʼueyob i xotʼ i mul (Hch. 5:1-10).

12. ¿Chuqui mi caj i chaʼleñob jiñi maʼañic bʌ miʼ cʌyob lot, i chucoch?

¹² ¿Bajcheʼ miʼ qʼuel Jehová jiñi lot? Satanás yicʼot pejtelel jiñi maʼañic bʌ miʼ cʌyob lot mi caj i chojquelob majlel «tiʼ cʼajc». Yom i yʌl chaʼan mi caj i junyajlel jisʌntelob (Ap. 20:10; 21:8; Sal. 5:6). ¿Chucoch? Come jiñi quixtañujob mucʼoʼ bʌ ti lot, tiʼ wut Jehová lajalob bajcheʼ cheʼoʼ bʌ i melbal bajcheʼ «tsʼiʼ», yom i yʌl, bajcheʼ jiñi ñʌmʌl bʌ i melob chuqui biʼtic jax bʌ tiʼ tojlel Dios (Ap. 22:15).

13. ¿Chuqui la cujil tiʼ tojlel Jehová, i chuqui miʼ ñijcañonla lac mel?

¹³ La cujil chaʼan mach «lajalic Dios bajcheʼ winicob yujiloʼ bʌ lot». Tiʼ sujm, «Dios mach mejlic i chaʼlen lot» (Nm. 23:19; He. 6:18). Jiñi Biblia miʼ yʌl chaʼan miʼ tsʼaʼlen «jini muʼ bʌ i chaʼlen lot» (Pr. 6:16, 17).  Chaʼan wen miʼ qʼuelonla Dios, yom mi lac jacʼben i mandar yicʼot mi la cʌl chuqui isujm. Yom mi lac jacʼ ili mandar: «Mach mi laʼ lotin laʼ piʼʌlob» (Col. 3:9).

14. a) ¿Bajcheʼ mach lajalonla yicʼot jiñi ochemoʼ bʌ ti mach bʌ isujmic ñopbalʌl? b) Tsictesan chuqui miʼ yʌcʼ ti ñaʼtʌntel Lucas 6:45.

¹⁴ ¿Bajcheʼ mach lajalic jiñi isujm bʌ xñoptʼañob yicʼot jiñi ochemoʼ bʌ ti mach bʌ isujmic ñopbalʌl? Jiñi i wiñiconbʌla Dios mi la cʌl chuqui i sujmlel (pejcan Zacarías 8:16, 17). Pablo tiʼ tsictesa chaʼan cheʼ mi lac mel bajcheʼ jiñi, ‹tsiquil xʼeʼtelonla i chaʼan Dios› (2 Co. 6:4, 7). Jesús tsiʼ yʌlʌ chaʼan «chuqui jach butʼul ti lac pusicʼal miʼ tsictiyel cheʼ mi lac chaʼlen tʼan» (Lc. 6:45). Ili yom i yʌl chaʼan juntiquil quixtañu muʼ bʌ i mel chuqui wen, tiʼ pejtelel ora mi caj i yʌl chuqui isujm. Maʼañic mi la cʌl ñuc tac bʌ lot o mach bʌ ñuquic, come tiʼ pejtelel ora mi lac subeñob chuqui isujm jiñi mach bʌ laj cʌñʌyob, lac piʼʌlob ti eʼtel, la camigojob yicʼot muʼ bʌ laj cʼuxbiñob. Laʼ laj qʼuel baqui yom mi lac chaʼlen wersa laj cʌl chuqui isujm.

15. a) ¿Chucoch mach yomic chaʼchajp a pusicʼal? b) ¿Chuqui miʼ mejlel i coltañet a lʌtʼ a xicʼol tiʼ melol mach bʌ weñic?

¹⁵ Mi xcolelet, i tilelʌch cheʼ maʼ mulan chaʼan jiñi a piʼʌlob miʼ qʼueletob ti wen, pero mach yomic chaʼchajp a pusicʼal cheʼ bajcheʼ miʼ mel yambʌlob. Miʼ pʌsob i bʌ bajcheʼ wem bʌ xñoptʼañob cheʼ yaʼañob yicʼot i familia yicʼot yaʼ ti congregación, pero cheʼ añob yicʼot xcolelob maʼañic bʌ miʼ ñopob Dios o cheʼ miʼ cʼʌñob jiñi página tac chaʼan Internet, wen qʼuexelob. Miʼ yʌlob tsucul tʼan, lecoj i pislel muʼ bʌ i xojob, miʼ ñʌchʼtañob bibiʼ tac bʌ cʼay, miʼ cʌlʌx japob lembal, miʼ cʼʌñob droga tac, mucul añob i novio o novia o ñumen lecoj chuqui tac miʼ melob. Ili xcolelob miʼ lotiñob i tat i ñaʼ, jiñi hermanojob yicʼot jiñi Dios (Sal. 26:4, 5). Pero Jehová yujil chaʼan ti la quej jach mi la cʌqʼuen i ñuclel, i chaʼan ñajt an lac pusicʼal tiʼ tojlel (Mr. 7:6). Ñumen wen cheʼ maʼ mel muʼ bʌ i yʌl ili proverbio: «Mach maʼ mulʌben i chubʌʼan xmulilob. Yom maʼ chʌn bʌcʼñan lac Yum ti pejtelel ora» (Pr. 23:17). *

16. Cheʼ mi lac butʼ jumpʼejl solicitud chaʼan i melol i yeʼtel Jehová tiʼ pejtelel ora, ¿bajcheʼ yom mi lac mel?

¹⁶ Tajol a wom ochel bajcheʼ precursor regular o chaʼan maʼ ñumen melben i yeʼtel Jehová tiʼ pejtelel ora, bajcheʼ ti Betel.  Cheʼ bʌ maʼ butʼ jumpʼejl solicitud, i cʼʌjñibal chaʼan isujm chuqui maʼ wʌl cheʼ maʼ jacʼ jiñi cʼajtiya tac chaʼan bʌ a cʼocʼlel, a ñusaqʼuin yicʼot a melbal (He. 13:18). ¿Ixcu mi an a mele chuqui bibiʼ o mach bʌ weñic i maʼañic subebil a chaʼan jiñi ancianojob? Cʼajtibeñob i coltaya chaʼan miʼ mejlel a melben i yeʼtel Jehová tiʼ sʌclel a conciencia (Ro. 9:1; Gá. 6:1).

17. ¿Chuqui yom mi lac mel cheʼ an chuqui mi laj cʼajtibentel chaʼan la quermañojob?

¹⁷ Laʼcu lac ñaʼtan chaʼan jiñi yumʌlob miʼ mʌctañob i melol i yeʼtel Jehová i an chuqui tac mi laj cʼajtibentel chaʼan jiñi la quermañojob. ¿Yom ba mi lac sub pejtelel chuqui la cujil? Laʼ lac ñaʼtan chuqui tsiʼ mele Jesús cheʼ jiñi gobernador i chaʼan Roma tsiʼ melbe cʼajtiya tac. Jesús tsiʼ jacʼʌ ili principio: «An i yorajlel mi lac ñʌjchʼel. An i yorajlel mi lac chaʼlen tʼan», i an qʼuiñil maʼañic chuqui tsiʼ yʌlʌ (Ec. 3:1, 7; Mt. 27:11-14). Cheʼ mi lac ñusan bajcheʼ jiñi, yom wen tsajilonla chaʼan maʼañic mi la cotsan ti wocol la quermañojob (Pr. 10:19; 11:12).

18. Cheʼ bʌ jiñi ancianojob miʼ cʼajtibeñoñobla tiʼ tojlel juntiquil hermano, ¿chuqui yom mi lac mel?

¹⁸ Laʼ lac ñaʼtan ili yambʌ. Laʼ la cʌl chaʼan an majqui tsiʼ chaʼle tsʌts bʌ mulil i joñonla la cujil. Tajol jiñi ancianojob miʼ cʼajtibeñoñobla chuqui la cujil come añob tiʼ wenta chaʼan chʌn sʌc miʼ yajñel jiñi congregación. Pero jiñi tsaʼ bʌ i chaʼle mulil juntiquil la camigo o ti lac familia, ¿chuqui mi caj la cʌl? Jiñi Biblia miʼ yʌl chaʼan jiñi xucʼul bʌ quixtañu «miʼ yʌcʼ ti tsictiyel chuqui toj», o miʼ yʌl chuqui i sujmlel (Pr. 12:17; 21:28). Jin chaʼan, an ti lac wenta mi lac suben pejtelel chuqui la cujil jiñi ancianojob, maʼañic chuqui yom mi lac muc o qʼuexel mi la cʌl. Jiñi ancianojob yom yujilob pejtelel chuqui tsaʼ ujti chaʼan miʼ mejlelob i coltan jiñi quixtañu chaʼan utsʼat miʼ chaʼ ajñel yicʼot Jehová (Stg. 5:14, 15).

19. ¿Chuqui mi caj i taj ti tʼan jiñi yambʌ temaj?

¹⁹ David tiʼ sube Jehová ti oración: «A wom a taj chuqui tac isujm tiʼ pusicʼal winic» (Sal. 51:6). David yujil chaʼan wen ñuc i cʼʌjñibal chuqui an ti lac pusicʼal. Jiñi isujm bʌ xñoptʼañonla, tiʼ pejtelel ora yom mi la cʌl i sujmlel, cheʼ bajcheʼ miʼ yʌl jiñi texto baʼ chucul ili temaj. Yambʌ bajcheʼ miʼ mejlel lac pʌs chaʼan qʼuexel lac melbal jiñʌch cheʼ mi lac pʌsbeñob i sujmlel jiñi quixtañujob. Ti yambʌ temaj mi caj la cʌl bajcheʼ miʼ mejlel lac mel.