1, 2. ¿Chuqui ti ñuc bʌ eʼtel tsaʼ aqʼuenti Josué cheʼ bʌ tsaʼ chʌmi Moisés?

JEHOVÁ tiʼ sube Josué: «Tsaʼix chʌmi c winic Moisés. Yom maʼ chajpan a bʌ wʌle. Yom maʼ cʼaxel ti ili colem jaʼ i cʼabaʼ Jordán a wicʼotob pejtel ili israelob. Yom maʼ majlel ti jini lum muʼ bʌ caj cʌqʼueñetla» (Jos. 1:1, 2). ¡Ti ora tsaʼ qʼuextʌyi tiʼ tojlel Josué! Lʌcʼʌ 40 jab tsiʼ chaʼle eʼtel (troñel) yicʼot Moisés, pero wʌle tsaʼ waʼchoconti tiʼ yeʼtel tiʼ tojlel jiñi tejclum Israel.

² Tajol Josué tsaʼ caji i ñaʼtan bajcheʼ yilal mi caj i qʼuel jiñi tejclum cheʼ jiñix tsaʼ waʼchoconti, come Moisés cabʌl ora tsaʼ ajñi tiʼ wenta jiñi tejclum (Dt. 34:8, 10-12). Jumpʼejl libro muʼ bʌ i tsictesan chaʼan Biblia miʼ taj ti tʼan Josué 1:1, 2, miʼ yʌl: «Ti wajali, cheʼ bajcheʼ ili ora, cheʼ miʼ qʼuextʌyel juntiquil yumʌl jiñʌch cheʼ bʌ miʼ wen ñusan wocol jumpʼejl tejclum».

3, 4. ¿Bajcheʼ la cujil chaʼan weñʌch tsiʼ mele Josúe cheʼ tsiʼ ñopo Dios, i chuqui tajol miʼ mejlel laj cʼajtiben lac bʌ?

³ Josué machʌch toʼolic tsiʼ chaʼle bʌqʼuen, pero ti orajach tsiʼ teche i mel (chaʼlen) i yeʼtel i tsiʼ wen ñopo Jehová (Jos. 1:9-11). I weñʌch bajcheʼ tsiʼ mele. Cheʼ bajcheʼ miʼ yʌl jiñi Biblia, Jehová tsiʼ cʼʌñʌ juntiquil ángel chaʼan miʼ tojʼesan majlel Josué yicʼot i tejclum Israel. Wen tsiquil chaʼan jiñi ángel jiñʌch «jini Tʼan», jiñi  ñaxam bʌ i Yalobil Dios (Jn. 1:1; Éx. 23:20-23).

⁴ Tiʼ coltaya Jehová, jiñi tejclum mach wocolic tsiʼ yubi chaʼan miʼ tsajcañob jiñi tsijiʼ bʌ yumʌl, Josué. Ili ora jaʼel, cabʌl chuqui mi laj qʼuel woli (choncol) bʌ ti qʼuextʌyel. Jin chaʼan, tajol an muʼ bʌ i cʼajtiben i bʌ: «Mi orajʌch bajcheʼ woliʼ xʌn majlel i yorganización Dios ili ora, ¿mucʼʌch ba i mejlel lac ñop tiʼ tojlel Jesús, jiñi lac Yum?» (pejcan Mateo 23:10). Laʼ laj qʼuel bajcheʼ tsiʼ tojʼesa majlel i tejclum Jehová wajali cheʼ an chuqui tac tsaʼ qʼuextʌyi tiʼ tojlelob.

5. ¿Majqui tsiʼ taja Josué yaʼ ti tʼejl Jericó? (Qʼuele jiñi dibujo am bʌ tiʼ tejchibal).

⁵ Cheʼ maxto wen jalic i ñumelob yaʼ ti Jordán jaʼ, an chuqui tsaʼ ujti tiʼ tojlel Josué. Cheʼ yaʼan tiʼ tʼejl jiñi tejclum Jericó, tsiʼ qʼuele juntiquil wiñic chucul bʌ i chaʼan juntsʼijt espada. Come Josué mach yujilic majqui, tsiʼ cʼajtibe: «¿Jatet ba jini c piʼʌlet bʌ lojon o jatet ba jini i piʼʌlet bʌ j contra lojon?». Pero toj sajtel i pusicʼal cheʼ bʌ jiñi wiñic tsiʼ yʌlʌ majqui. Jiñʌch jiñi i «capitán soldadojob i chaʼan lac Yum», i chajpʌbilix chaʼan miʼ coltʌben i tejclum Dios (pejcan Josué 5:13-15). Anquese an baqui miʼ yʌjlel chaʼan jin Jehová tsaʼ bʌ i pejca Josué, wen tsiquil chaʼan tiʼ tojlelʌch juntiquil ángel tsiʼ mele, cheʼ bajcheʼ melbil i chaʼan tiʼ tojlel yambʌlob (Éx. 3:2-4; Jos. 4:1, 15; 5:2, 9; Hch. 7:38; Gá. 3:19).

6-8. a) ¿Chucoch maʼañic i sujmlel yilal jiñi tsaʼ bʌ i yʌlʌ Jehová? b) ¿Chucoch weñʌch yicʼot i cʼʌjñibalʌch jiñi tsaʼ bʌ i yʌlʌ? (Qʼuele jaʼel jiñi nota).

⁶ Josué tsaʼix wen subenti bajcheʼ yom miʼ mel chaʼan miʼ yochel yaʼ ti tejclum Jericó. Tajol ti ñaxan an tacʌch maʼañic bʌ tsiʼ wen chʼʌmbe isujm. Jumpʼejl ejemplo, Dios tiʼ sube chaʼan pejtelel jiñi wiñicob yom miʼ tsepbentelob i pʌchʌlel. Tiʼ caj iliyi, jiñi soldadojob cabʌl qʼuin maʼañic mi caj i loqʼuelob ti guerra. ¿Jiñʌch ba wem bʌ i yorajlel chaʼan miʼ tsepbentelob i pʌchʌlel? (Gn. 34:24, 25; Jos. 5:2, 8).

⁷ Tajol jiñi soldadojob tsiʼ cʼajtibeyob i bʌ: «¿Bajcheʼ mi caj i mejlel laj cʌntan lac familia mi tsaʼ tili laj contrajob?». Pero jiñi añoʼ bʌ ti Jericó maʼañic tsaʼ majli i contrajiñob, come tsiʼ chaʼleyob bʌqʼuen i tsiʼ meleyob mach bʌ pijtʌbilic i chaʼan jiñi israelob. Jiñi Biblia miʼ yʌl: «Ñupʼul jini tejclum Jericó, wen ñupʼbil, come tsiʼ bʌcʼñayob jini israelob. Maʼanic majch tsaʼ mejli ti loqʼuel ti ochel» (Jos. 6:1). Ili tsaʼ bʌ ujti tsiʼ wen pʼʌtʼesa jiñi israelob chaʼan miʼ ñopbeñob i tʼan Jehová.

⁸ Cheʼ jaʼel, Jehová tiʼ subeyob chaʼan maʼañic miʼ cajelob ti jatsʼ yicʼot Jericó. Tsaʼ jach subentiyob chaʼan miʼ chaʼleñob xʌmbal tiʼ joytʌlel jiñi tejclum, ti wʌcpʼejl qʼuin junyajl ti jujumpʼejl, i cheʼ tiʼ wucpʼejlel qʼuin, wucyajl yom miʼ melob. Tajol an soldadojob tsaʼ bʌ i ñaʼtayob chaʼan sʌt qʼuin jach yicʼot woli (yʌquel) jach i jisañob i pʼʌtʌlel. Pero Jehová, jiñi i Yum Israel, wen yujil chuqui woliʼ mel. Cheʼ jiñi israelob tsiʼ jacʼʌyob bajcheʼ tsaʼ subentiyob, tsaʼ mejliyob i chʼʌm jiñi tejclum yicʼot tsiʼ pʼʌtʼesʌbeyob i ñopoñel (chʼujbiya). Cheʼ jaʼel, mach cʼʌñʌlic tsiʼ chaʼleyob jatsʼ yicʼot jiñi pʼʌtʌl bʌ i soldadojob Jericó (Jos. 6:2-5; He. 11:30). *

9. ¿Chucoch yom mi lac jacʼ chuqui mi lac subentel tiʼ yorganización Dios? Acʼʌ jumpʼejl ejemplo.

⁹ ¿Chuqui mi laj cʌn ti ili relato? Tajol an qʼuiñil maʼañic mi lac wen chʼʌmben isujm chuqui tac miʼ chajpan jiñi organización. Jumpʼejl ejemplo, tajol cheʼ bʌ tsaʼ ajli chaʼan miʼ mejlel ti cʼʌjñel jiñi teléfono o tableta cheʼ  mi lac chajpan lac bʌ, ti lac subtʼan yicʼot ti lac tempa bʌ tac, tajol maʼañic tsaʼ lac wen mulaj. Pero ili ora tajol muqʼuix laj qʼuelben i wenlel cheʼ woli laj cʼʌn, mi mucʼʌch a mejlel. Jin chaʼan, yomʌch mi lac jacʼ chuqui miʼ yʌl i yorganización Dios, anquese tajol maʼañic maʼ chʼʌmben isujm ti ñaxan. Pero cheʼ mi laj qʼuelben i wenlel, miʼ ñumen pʼʌtʼan lac ñopoñel i ñumen muchʼulonla.

10. ¿Majqui tsiʼ chʼʌmʌ tiʼ wenta chaʼan miʼ mejlel jiñi tempa bʌ yicʼot jiñi junmojt muʼ bʌ i pʌsob bij añoʼ bʌ ti Jerusalén?

¹⁰ Cheʼ bʌ juntiquil gentil maxto bʌ tsepbenti i pʌchʌlel i cʼabaʼ Cornelio tsaʼ sujti ti xñoptʼan, anquese ñumeñix 13 jab, an xñoptʼañob judíojoʼ bʌ muʼto bʌ i bej ñopob jiñi tsep pʌchʌlel (Hch. 15:1, 2). Cheʼ bʌ tsaʼ tejchi jumpʼejl wocol ti Antioquía tiʼ caj jiñi, Pablo tsaʼ subenti majlel ti Jerusalén chaʼan miʼ tsictesʌben jiñi junmojt muʼ bʌ i pʌsob bij. Pero ¿majqui tsiʼ chʼʌmʌ tiʼ wenta pejtelel jiñi? Pablo tsiʼ yʌlʌ: «Dios tiʼ xiqʼuiyon majlel». Wen tsiquil chaʼan Dios tiʼ tojlel cristo tiʼ chʼʌmʌ tiʼ wenta chaʼan jiñi junmojt muʼ bʌ i pʌsob bij miʼ tojʼesañob jiñi wocol (Gá. 2:1-3, Jini wen bʌ tʼan).

11. a) ¿Bajcheʼ yilal miʼ qʼuejlel jiñi tsep pʌchʌlel tiʼ tojlel cabʌl xñoptʼañob judíojoʼ bʌ? b) ¿Bajcheʼ tsiʼ pʌsʌ i pecʼlel Pablo tiʼ tojlel jiñi ancianojob ti Jerusalén? (Qʼuele jaʼel jiñi nota).

¹¹ Tiʼ coltaya Cristo, jiñi junmojt muʼ bʌ i pʌsob bij tiʼ tsictesayob chaʼan mach chʌn xicʼbilic miʼ tsepob i pʌchʌlel jiñi mach bʌ judíojobic (Hch. 15:19, 20). Pero cheʼ ñumeñix cabʌl jabil cabʌl judíojob muʼto i tsepbeñob i pʌchʌlel i yalobil. I cheʼ bʌ jiñi ancianojob ti Jerusalén tsiʼ yubiyob ti ajlel chaʼan Pablo maʼañic woliʼ jacʼ i mandar Moisés, an chuqui tiʼ subeyob i mel (Hch. 21:20-26). * Tsaʼ subenti majlel yicʼot yambʌ chʌntiquil wiñicob yaʼ ti templo chaʼan miʼ sʌqʼuesan i bʌ, i cheʼ jiñi, miʼ qʼuejlel chaʼan woliyʌch i «jacʼ jini mandar». Tajol Pablo tsaʼ mejli i yʌl chaʼan jiñi mach i cʼʌjñibalic i chaʼan, jiñi wocol tiʼ tojlel jiñi judíojob jiñʌch cheʼ maʼañic miʼ wen chʼʌmbeñob isujm chaʼan jiñi tsep pʌchʌlel. Pero mach cheʼic tsiʼ  mele, tsiʼ jacʼʌ tsaʼ bʌ i yʌlʌ jiñi ancianojob chaʼan chʌn muchʼul miʼ ajñel jiñi xñoptʼañob, i tsiʼ pʌsʌ i pecʼlel. Pero tajol mi laj cʼajtiben lac bʌ: «Mi jiñi Mandar tsaʼ qʼuextʌyi cheʼ bʌ tsaʼ chʌmi Jesús, ¿chucoch jalto tsaʼ tojʼesʌnti jiñi wocol?» (Col. 2:13, 14).

12. ¿Chucoch tajol jal tsiʼ yʌcʼʌ ti ñumel Cristo chaʼan miʼ tojʼesʌntel jiñi wocol chaʼan tsep pʌchʌlel?

¹² An ñumen jal bʌ miʼ cʼotel i qʼuelob ti wen cheʼ an chuqui miʼ tsijib tsictesʌntel. Jiñi xñoptʼan judíojoʼ bʌ mach ti orajic tsaʼ mejli i qʼuextañob i ñaʼtʌbal chaʼan jiñi tsep pʌchʌlel (Jn. 16:12). An wocol bʌ tsaʼ mejli i ñopob chaʼan mach chʌn jiñix jiñi señal chaʼan bajcheʼ añob yicʼot Dios (Gn. 17:9-12). An tsaʼ bʌ i bʌcʼñayob chaʼan mi caj i tsʼaʼlentelob cheʼ mach lajalobix yicʼotob yambʌlob (Gá. 6:12). Pero ti wiʼil, Cristo cabʌlto chuqui tiʼ tsictesʌbeyob ti jiñi carta tac tsaʼ bʌ i tsʼijbu Pablo (Ro. 2:28, 29; Gá. 3:23-25).

13. ¿Chuqui mi caj i coltañonla chaʼan mi lac jacʼ muʼ bʌ i yʌl Cristo ili ora?

¹³ Cheʼ maʼañic mi lac luʼ chʼʌmben isujm chuqui tac miʼ qʼuextʌyel ti organización, yom mi lac ñaʼtan bajcheʼ an i tojʼesa tilel Cristo i wiñicob Dios ti wajali. Cheʼ tiʼ qʼuiñilel Josué yicʼot jiñi xñoptʼañob ti ñaxam bʌ siglo, Cristo an i tojʼesayob chaʼan maʼañic chuqui miʼ chaʼleñob, miʼ ñumen pʼʌtʼañob i ñopoñel yicʼot chʌn muchʼulob (He. 13:8).

14-16. ¿Bajcheʼ miʼ pʌs Cristo tiʼ tojlel «jini xucʼul bʌ xʼeʼtel am bʌ cabʌl i ñaʼtʌbal» chaʼan miʼ chʼʌm ti ñuc bajcheʼ añonla tiʼ chaʼan bʌ Dios?

¹⁴ Ili ora, «jini xucʼul bʌ xʼeʼtel am bʌ cabʌl i ñaʼtʌbal» miʼ yʌl chuqui yom mi lac mel cheʼ ti wem bʌ i yorajlel (Mt. 24:45). Ili miʼ pʌs chaʼan Jesús miʼ cʼuxbiñonla yicʼot miʼ qʼuel chaʼan utsʼat mi la cajñel tiʼ chaʼan bʌ Dios. Marc, am bʌ chʌntiquil i yalobil, miʼ yʌl: «Chaʼan Satanás miʼ cʼunʼesan jiñi congregación tac, miʼ yochel ti lac familia. Ti bele ora woli laj cʼajtesʌbentel chaʼan ti jujumpʼejl semana yom mi lac mel lac chʼujutesaya ti familia. Jiñi añonbʌla tiʼ wenta lac familia, wen tsiquil yom bʌ mi lac mel: Laʼ laj cʌntan lac familia».

¹⁵ Cheʼ mi laj qʼuel bajcheʼ woliʼ tojʼesañonla majlel Cristo, tsiquil chaʼan yom i coltañonla lac pʼʌtʼesan lac ñopoñel. Juntiquil anciano i cʼabaʼ Patrick miʼ yʌl: «Ti ñaxan, an maʼañic bʌ tsiʼ mulayob chaʼan yom miʼ tempañob i bʌ ti alʌ grupo tac chaʼan jiñi subtʼan tiʼ yujtibal semana. Pero iliyi an chuqui ñuc bʌ miʼ pʌsbeñonla tiʼ tojlel Jesús: Chaʼan miʼ chʼʌm ti ñuc añoʼ bʌ i pecʼlel. Jiñi hermanojob muʼ bʌ i bʌcʼñañob tʼan o maʼañic bʌ miʼ wen loqʼuelob ti subtʼan, miʼ qʼuelob chaʼan mucʼʌch i chʼʌjmelob ti ñuc yicʼot añobʌch i cʼʌjñibal. Cheʼ bajcheʼ jiñi, ñumen chʼejlob tiʼ melol i yeʼtel Jehová».

¹⁶ Cristo mach cojach miʼ chʼʌm ti ñuc chuqui la com tiʼ chaʼan bʌ Dios. Miʼ coltañonla la cʌcʼ lac ñaʼtʌbal jaʼel ti jiñi ñumen ñuc bʌ eʼtel ili ora (pejcan Marcos 13:10). Juntiquil hermano maxto bʌ wen jalic tsaʼ waʼchoconti ti anciano, i cʼabaʼ André, chʌn yʌxʌl i yoj chaʼan chuqui tac miʼ tsijib ajlel tiʼ yorganización Dios. Miʼ yʌl: «Cheʼ bʌ tsaʼ tʼox loqʼui hermanojob ti cabʌl sucursal miʼ cʼajtesʌbeñonla chaʼan añoñixla ti cojix tac bʌ qʼuin i chaʼan yom mi la cʌcʼ lac ñaʼtʌbal ti subtʼan».

17, 18. ¿Chucoch weñʌch cheʼ mi lac ñaʼtan i wenlel tac tiʼ jacʼol chuqui albil i chaʼan jiñi organización maxto wen jali?

¹⁷ Cheʼ bajcheʼ woliʼ tojʼesañonla majlel Jesucristo, jiñi lac Rey, mi caj i coltañonla ili ora yicʼot ti talto bʌ qʼuin. Jin chaʼan, yom tijicñayonla cheʼ mi lac ñaʼtan i wenlel tac muʼ bʌ lac taj tiʼ jacʼol chuqui tac maxto bʌ jalic qʼuextʌyem. Cheʼ mi lac mel lac chʼujutesaya ti lac familia, ¿ixcu cheʼ muqʼuic lac tsajin jiñi qʼuextʌyem tac bʌ chaʼan lac tempa bʌ  yicʼot lac subtʼan, i bajcheʼ coltʌbil i chaʼañonla? Ili mi caj i wen pʼʌtʼesañonla.

¹⁸ Mi mucʼʌch laj cʼajtesan chaʼan añʌch i wenlel tac pejtelel chuqui miʼ subeñonla i yorganización Jehová, ti jumpʼejl lac pusicʼal mi caj lac jacʼ yicʼot tijicña mi caj la cajñel. Tijicña mi la cubin cheʼ maʼañix woliʼ wen chaʼlentel ti imprimir jiñi jun tac, come maʼañix miʼ cʌlʌx jisʌntel taqʼuin. I jiñi wen tʼan woliʼ ñumen cʼotel ti yonlel quixtañujob tiʼ coltaya jiñi woli bʌ i cʼʌjñel chaʼan tecnología. Mi cheʼ bajcheʼ iliyi, i mucʼʌch lac mejlel laj cʼʌn jaʼel jiñi tableta tac o celular chaʼan mi laj qʼuel lac jun tac, video tac yicʼot grabación, ¿ixcu cheʼ muqʼuic lac ñumen cʼʌn? Cheʼ bajcheʼ iliyi, miʼ mejlel laj coltan Jesús, come yom chaʼan wen tsajibil miʼ cʼʌjñel chuqui an i chaʼan jiñi organización.

19. ¿Chucoch yom mi lac tsajcan muʼ bʌ i yʌl Cristo?

¹⁹ Cheʼ mi lac tsajcan muʼ bʌ i yʌl Cristo, miʼ pʼʌtʼesan lac ñopoñel yicʼot miʼ yʌcʼ chaʼan muchʼulonla la quicʼot la quermañojob. Jiñi hermano André, tsaʼix bʌ laj cʌlʌ, tsiʼ yʌlʌ bajcheʼ yilal miʼ qʼuel jiñi tsaʼ bʌ ujti ti Betel ti cabʌl tejclum: «Cheʼ mij qʼuel bajcheʼ yilal tsiʼ jacʼʌyob jiñi hermanojob tsaʼ bʌ loqʼuiyob ti Betel, miʼ coltañon j qʼuel ti ñuc yicʼot c ñop jiñi yumʌl lac chaʼan, Cristo. Lajal woliʼ majlelob cheʼ bajcheʼ woliʼ xʌn i carro Jehová i tijicñayob baqui jach woliʼ melbeñob i yeʼtel».

20, 21. a) ¿Chucoch miʼ mejlel lac ñop ti Jesucristo, jiñi Yumʌl lac chaʼan? b) ¿Chuqui mi caj i yʌjlel yaʼ ti yambʌ temaj?

²⁰ Tsʼitaʼ jax yom chaʼan jiñi Yumʌl lac chaʼan, Jesucristo, miʼ mʌjlel i chaʼan yicʼot miʼ mel ñuc tac bʌ i yeʼtel (Ap. 6:2; Sal. 45:4). Pero ili ora woliʼ chajpan i wiñicob Dios chaʼan miʼ chumtʌlob yaʼ ti tsijiʼ bʌ pañimil (mulawil) yicʼot chaʼan pejtelel jiñi eʼtel muʼ bʌ i cajel, cheʼ ba ora mi caj laj cʌntesan jiñi muʼ bʌ caj i chaʼ tejchelob yicʼot cheʼ mi caj lac sujtesan ti jumpʼejl paraíso ili Lum.

²¹ Yaʼ ti tsijiʼ bʌ pañimil temel mi caj la cochel la quicʼot jiñi Rey mi mucʼʌch lac chʌn ñop tiʼ tojlel, anquese an chuqui miʼ yujtel (pejcan Salmo 46:1-3). Isujmʌch, an qʼuiñil wocol mi la cubin cheʼ an chuqui miʼ qʼuextʌyel, ñumento cheʼ an chuqui miʼ yujtel ti laj cuxtʌlel. Mi cheʼ bajcheʼ jiñi, bajcheʼ miʼ mejlel lac chʌn taj i ñʌchʼtʌlel lac pusicʼal yicʼot mi lac chʌn ñop Jehová? Ili mi caj i yʌjlel yaʼ ti yambʌ temaj.