1. ¿Baqui tsiʼ tajayob i pʼʌtʌlel jiñi i wiñicob Dios ti wajali?

 JIÑI Biblia miʼ yʌl chaʼan jiñi i wiñicob Dios ti wajali wen pʼʌtʌlob o chʼejlob. Pero mach tiʼ pejtelelic ora cheʼ tsiʼ yubiyob i bʌ bajcheʼ jiñi. Jumpʼejl ejemplo, David tsiʼ yʌlʌ chaʼan xucʼul o pʼʌtʌl «bajcheʼ wits», pero an i tajol tsiʼ chaʼle bʌqʼuen i tsiʼ mele i pusicʼal (Sal. 30:7). Cheʼ jaʼel, Sansón pʼʌtʌl tsiʼ yubi i bʌ cheʼ bʌ an yicʼot i yespíritu Jehová, pero cheʼ bʌ maʼañiqui lajal miʼ sujtel «bajcheʼ pejtelel winicob» (Jue. 14:​5, 6; 16:17). ¿Baqui tsiʼ tajayob i pʼʌtʌlel? Ti Jehová.

2. ¿Chucoch tsiʼ yʌlʌ Pablo chaʼan cheʼ bʌ cʼun pʼʌtʌl? (2 Corintios 12:​9, 10).

² Jiñi apóstol Pablo yujil jaʼel chaʼan i cʼʌjñibalʌch i chaʼan i pʼʌtʌlel Jehová (pejcan 2 Corintios 12:​9, 10). ¿Chucoch? Come lajal bajcheʼ joñonla, Pablo tsaʼ cʼamʼa, tsiʼ chaʼle wersa chaʼan miʼ mel chuqui wen, tsiʼ chaʼle pensar i an i tajol colel i sʌt i cuxtʌlel (Rom. 7:​18, 19; 2 Cor. 1:​8, 9; Gál. 4:​13, 14). Pero tsiʼ yʌlʌ: «Cheʼ bʌ cʼuñon, pʼʌtʌlon». ¿Chucoch? Come Jehová tsiʼ yʌqʼue jiñi i pʼʌtʌlel anto bʌ yom i chaʼan.

3. ¿Chuqui ti cʼajtiya tac mi caj lac jacʼ ti ili estudio?

³ Jehová miʼ mejlel i yʌqʼueñonla lac pʼʌtʌlel jaʼel, pero añʌch chuqui yom mi lac mel (1 Ped. 5:10). Jumpʼejl ejemplo, laʼcu lac ñaʼtan juncojt carro. Chaʼan miʼ mejlel ti ñijcʌntel  yom an wem bʌ i motor. Pero ¿muʼ ba caj i chaʼlen xʌmbal mi jiñi woli (choncol) bʌ i ñijcan maʼañic miʼ petsʼ jiñi acelerador? Lajal miʼ yujtel mi la com chaʼan Jehová miʼ yʌqʼueñonla lac pʼʌtʌlel. Lajal bajcheʼ jiñi motor Jehová miʼ mejlel i yʌqʼueñonla lac pʼʌtʌlel, pero mach cheʼ jach yom mi laj cʌytʌl jaʼel. ¿Chuqui tac an i yʌqʼueyonla Jehová chaʼan miʼ pʼʌtʼesañonla? ¿I chuqui yom mi lac mel chaʼan mi lac tajben i wenlel? Chaʼan mi lac ñaʼtan, laʼ laj qʼuel bajcheʼ tsaʼ pʼʌtʼesʌntiyob ti Jehová jiñi Jonás, María (i mamá Jesús) yicʼot jiñi apóstol Pablo. Cheʼ jiñi, mi caj laj qʼuel bajcheʼ miʼ pʼʌtʼesañonla Jehová jaʼel ili ora.

4. ¿Chuqui yom mi lac mel chaʼan mi lac tajben i pʼʌtʌlel Jehová?

⁴ Junchajp bajcheʼ miʼ mejlel lac tajben i pʼʌtʌlel Jehová jiñʌch cheʼ mi lac chaʼlen oración, i Jehová mi caj i yʌqʼueñonla jiñi lac pʼʌtʌlel mach bʌ añic miʼ mejlel i taj jiñi lac piʼʌlob (2 Cor. 4:7). Cheʼ jaʼel yom mi lac pejcan jiñi Biblia yicʼot mi lac wen ñaʼtan muʼ bʌ i yʌl come jiñi i Tʼan Dios pʼʌtʌlʌch (Sal. 86:11; Heb. 4:12). Cheʼ bajcheʼ jiñi, mi caj i mejlel laj cuch jiñi wocol tac, mi caj lac bej melben i yeʼtel (troñel) Jehová yicʼot lac tijicñʌyel i mi caj lac tsʼʌctesan jiñi eʼtel muʼ bʌ la cʌqʼuentel anquese wocol mi la cubin. Laʼ laj qʼuel bajcheʼ tsiʼ pʼʌtʼesa Jehová jiñi xʼaltʼan Jonás.

5. ¿Chucoch yomʌch an i chʼejlel Jonás?

⁵ Jonás tsaʼ aqʼuenti jumpʼejl ñuc bʌ eʼtel, i chaʼan miʼ tsʼʌctesan yomʌch an i chʼejlel. Pero tsiʼ chaʼle bʌqʼuen i tsaʼ putsʼi, tsaʼ letsi ti jumpʼejl barco i ñajt baqui tsaʼ majli. Tiʼ caj jiñi, Jonás yicʼot jiñi yaʼ bʌ majlelob yaʼ ti barco colel i chʌmelob (sajtelob). Jin chaʼan, Jonás tsaʼ chojqui ochel ti jaʼ i tsaʼ bujqʼui ti juncojt colem chʌy. Yaʼ tiʼ ñʌcʼ jiñi chʌy icʼyochʼan yicʼot bʌbʌqʼuen jax. Ñaʼtancu bajcheʼ tsiʼ yubi i bʌ Jonás cheʼ yaʼan yaʼi, ¿tsaʼ ba i ñaʼta chaʼan yaʼix mi caj i chʌmel? ¿Tsaʼ ba i ñaʼta chaʼan Jehová tsaʼix i cʌyʌ? Miʼ mejlel lac ñaʼtan chaʼan wen chʼijyemʌch tsiʼ yubi i bʌ.

6. ¿Chuqui tsiʼ colta Jonás chaʼan miʼ chaʼ taj i chʼejlel? (Jonás 2:​1, 2, 7).

⁶ ¿Chuqui tsiʼ mele Jonás chaʼan miʼ chaʼ taj i chʼejlel? Tsiʼ mele jumpʼejl oración (pejcan Jonás 2:​1, 2, 7). Anquese tsiʼ ñusʌbe i tʼan Jehová, Jonás yujil chaʼan mucʼʌch caj i ñʌchʼtʌntel come tsaʼix i ñaʼta i bʌ. Cheʼ jaʼel tsiʼ wen ñaʼta jiñi Tsʼijbujel. ¿Bajcheʼ la cujil? Come jiñi tʼan tac tsaʼ bʌ i yʌlʌ, muʼ bʌ lac taj tiʼ capítulo 2 chaʼan Jonás, lajal bajcheʼ muʼ bʌ i tilel ti Salmos (jumpʼejl ejemplo, laja Jonás 2:​2, 5 yicʼot Salmo 69:1; 86:7). Iliyi miʼ pʌs chaʼan Jonás i cʌñʌyʌch jiñi Tsʼijbujel i jiñi tsiʼ colta i ñop chaʼan Jehová mucʼʌch caj i coltan. Ti wiʼil, cheʼ bʌ tsaʼix ñumi i chaʼan jiñi wocol, chajpʌbilix tsiʼ yubi i bʌ chaʼan miʼ tsʼʌctesan jiñi eʼtel (Jon. 2:10–3:4).

7, 8. ¿Chuqui tsiʼ colta juntiquil hermano chaʼan miʼ ñusan jiñi wocol tac?

⁷ Jiñi ejemplo chaʼan Jonás miʼ coltañonla cheʼ bʌ woli (yʌquel) lac ñusan wocol tac. Laʼ laj qʼuel tiʼ tojlel Zhiming, juntiquil hermano chʼoyol bʌ ti Taiwán, b cʼam yicʼot miʼ tsʼaʼlentel tiʼ familia. ¿Chuqui miʼ coltan chaʼan miʼ mejlel i ñusan jiñi wocol tac? Jiñʌch cheʼ miʼ chaʼlen oración yicʼot estudio. Miʼ yʌl: «An i tajol, cheʼ an jumpʼejl wocol, mij cʌlʌx chaʼlen pensar i wocol mi cubin chaʼan mic  chaʼlen estudio». Pero ili hermano maʼañic miʼ cʌy i bʌ. Miʼ bej al: «Ñaxan mic chaʼlen oración. Cheʼ jiñi mic ñʌchʼtan jiñi cʼay tac am bʌ ti jw.org, i an i tajol muʼto j cʼʌyin majlel ti cʼunteʼ jach bʌ tʼan, jiñi miʼ coltañon chaʼan mi cubin c ñʌchʼtʌlel. Cheʼ jiñi muqʼuix c mejlel ti estudio».

⁸ Jiñi am bʌ i cʌñʌ Zhiming tiʼ estudio an i colta chaʼan miʼ ñusan wocol tac. Jumpʼejl ejemplo, cheʼ bʌ tsaʼ melbenti jumpʼejl operación tsaʼ subenti chaʼan yom miʼ chʼʌm chʼichʼ come juben jiñi i glóbulos rojos. Cheʼ bʌ anto yom jumpʼejl acʼʌlel chaʼan miʼ melbentel jiñi operación tsiʼ pejca jumpʼejl experiencia chaʼan juntiquil hermana tsaʼ bʌ i ñusa jaʼel jiñi wocol i ñumen jubento i chaʼan jiñi glóbulos rojos, pero maʼañic tsiʼ chʼʌmʌ chʼichʼ i wen jach tsaʼ cʼocʼa majlel. Ili experiencia tsiʼ colta Zhiming chaʼan xucʼul miʼ yajñel.

9. ¿Chuqui miʼ mejlel a mel mi maʼañix a pʼʌtʌlel maʼ wubin tiʼ caj jumpʼejl wocol? (Qʼuele jaʼel jiñi foto).

⁹ Cheʼ bʌ an chuqui woli lac ñusan tajol wocol mi la cubin chaʼan mi lac mel oración o chaʼan mi lac chaʼlen estudio. Pero miʼ mejlel a ñop chaʼan Jehová miʼ chʼʌmbeñonla i sujm. Jin chaʼan, anquese mach cabʌlic chuqui maʼ wʌl ti a woración, miʼ mejlel a ñop chaʼan Jehová mi caj i yʌqʼueñet jiñi i cʼʌjñibal bʌ a chaʼan (Efes. 3:20). Cheʼ jaʼel, mi cʼamet o chʼijyem maʼ wubin a bʌ, miʼ mejlel a ñʌchʼtan i audiojlel jiñi Biblia yicʼot lac jun tac. Yambʌ muʼ bʌ i mejlel i coltañet jiñʌch jiñi cʼay tac o jiñi video tac am bʌ ti jw.org. Jehová yom i coltañet, ¿bajcheʼ miʼ mel? Jiñʌch cheʼ maʼ pejcan ti oración, i cheʼ jiñi, maʼ pejcan jiñi Biblia chaʼan maʼ qʼuel bajcheʼ miʼ jacʼbeñet jiñi a woración. Mi cheʼʌch maʼ mel lajal bajcheʼ woli a suben Jehová: «A wocolic, aqʼueñon c pʼʌtʌlel».

10. ¿Bajcheʼ miʼ coltañoñobla jiñi hermanojob?

¹⁰ Cheʼ bʌ woli lac ñusan jumpʼejl wocol o woli lac chaʼlen wersa lac tsʼʌctesan jumpʼejl eʼtel am bʌ lac chaʼan wocol bʌ mi la cubin, jiñi hermanojob miʼ mejlel i pʼʌtʼesañoñobla (Col. 4:​10, 11). La com chaʼan yaʼʌch  añob jiñi la camigojob cheʼ bʌ woli lac ñusan jumpʼejl wocol (Pr. 17:17). Cheʼ bʌ mach pʼʌtʌloñicla mi la cubin, jiñi hermanojob miʼ mejlel i yʌqʼueñoñobla chuqui i cʼʌjñibal lac chaʼan, i miʼ tijicñesañob lac pusicʼal yicʼot miʼ pʼʌtʼesañoñobla yicʼot jiñi i Tʼan Dios. Laʼ laj qʼuel bajcheʼ tsaʼ coltʌnti María, i mamá Jesús.

11. ¿Chucoch yomʌch an i chʼejlel María?

¹¹ María yomʌch an i chʼejlel jaʼel chaʼan miʼ tsʼʌctesan jiñi eʼtel tsaʼ bʌ aqʼuenti. Juntiquil ángel tiʼ sube chaʼan embarazada mi caj i cʌytʌl i mi caj i yʌcʼ ti pañimil jiñi muʼ bʌ caj i sujtel ti Mesías. Tajol tsaʼʌch i wen chaʼle pensar cheʼ bʌ tsiʼ yubi iliyi come embarazada mi caj i cʌytʌl cheʼ bʌ maxto ñujpuñemic i maʼañic piʼlebil i chaʼan juntiquil wiñic. Cheʼ jaʼel, yom miʼ suben José pejtelel iliyi come jin mi caj i ñujpuñel yicʼot (Luc. 1:​26-33).

12. Cheʼ bajcheʼ miʼ yʌl Lucas 1:​39-45, ¿bajcheʼ tsiʼ taja i chʼejlel María?

¹² ¿Bajcheʼ tsiʼ taja i chʼejlel María chaʼan miʼ tsʼʌctesan jiñi eʼtel wen ñuc bʌ yicʼot maʼañic bʌ baʼ i mele? Tsiʼ cʼajtibe i coltaya jiñi yambʌyob. Tsiʼ cʼajtibe jiñi ángel Gabriel chaʼan miʼ ñumen tsictesʌben jiñi eʼtel yom bʌ miʼ mel (Luc. 1:34). Cheʼ jaʼel tsaʼ majli ti Judá chaʼan miʼ julaʼtan Elisabet, i yaʼi Elisabet tsiʼ yʌlʌ jumpʼejl profecía tiʼ tojlel jiñi alʌl cʌntʌbil i bʌ i chaʼan María (pejcan Lucas 1:​39-45). Jin chaʼan, María tsiʼ yʌlʌ chaʼan Jehová «tsiʼ pʌsʌ i pʼʌtʌlel tiʼ cʼʌb» (Luc. 1:​46-51). Cheʼ bajcheʼ jiñi, Jehová tsiʼ cʼʌñʌ jiñi ángel Gabriel yicʼot Elisabet chaʼan miʼ pʼʌtʼesan María.

13. ¿Chuqui tsaʼ ujti cheʼ bʌ Dasurí tsiʼ cʼajti i coltʌntel?

¹³ Cheʼ bajcheʼ María, joñonla mi lac mejlel lac taj laj coltʌntel tiʼ tojlel jiñi hermanojob. Laʼ laj qʼuel tiʼ tojlel Dasurí, chʼoyol bʌ ti Bolivia. Cheʼ bʌ jiñi i papá tsaʼ tajbenti jumpʼejl tsʌts bʌ cʼamʌjel i tsaʼ otsʌnti ti hospital, Dasurí an tiʼ wenta tsiʼ yubi i jin chaʼan yom i wen cʌntan (1 Tim. 5:4). Anquese i cʼʌjñibalʌch i chaʼan i coltaya yambʌlob, cojach tsiʼ cʼajtibe i coltaya Jehová. Dasurí miʼ yʌl: «Mach comic cʌqʼuen cabʌl eʼtel jiñi hermanojob. ‹Tsaʼ c ñaʼta chaʼan jiñʌch Jehová muʼ bʌ caj i coltañon›. Pero tsaʼ cʼoti j qʼuel chaʼan mi maʼañic mij cʼajtin j coltʌntel maʼañic mi caj c bajñel mejlel» (Pr. 18:1). Jin chaʼan Dasurí tiʼ tsʼijbube majlel jiñi i yamigojob chaʼan miʼ subeñob chuqui woliʼ ñusan. Miʼ bej al: «Maʼañic mic taj chuqui yom mi cʌl, jiñi hermanojob tsiʼ wen coltayoñob yicʼot tsiʼ ñuqʼuesayob c pusicʼal. Tsiʼ chʼʌmbeyoñob majlel chuqui mij cʼux yicʼot tsiʼ pejcʌbeyoñob texto tac am bʌ ti Biblia. ¡Mach lac bajñelic! Añonla ti jumpʼejl utsʼatax bʌ familia, yaʼañob la quicʼot cheʼ bʌ woli lac ñusan jumpʼejl wocol».

14. ¿Chucoch yomʌch mi lac jacʼ laj coltʌntel ti jiñi ancianojob?

¹⁴ Jiñi ancianojob lajalob bajcheʼ lac majtan tilem bʌ ti Jehová, jin miʼ cʼʌñob chaʼan miʼ pʼʌtʼesañoñobla yicʼot chaʼan miʼ ñuqʼuesañob lac pusicʼal (Is. 32:​1, 2). Jin chaʼan, mi an chuqui maʼ pensarin, pejcañob i jacʼʌ jiñi coltʌntel muʼ bʌ i yʌqʼueñetob. Jehová miʼ cʼʌñob chaʼan miʼ pʼʌtʼesañoñobla.

15. ¿Baqui bʌ jiñi lac pijtaya an lac chaʼan?

¹⁵ Jiñi pijtaya muʼ bʌ lac taj yaʼ ti Biblia miʼ yʌqʼueñonla lac pʼʌtʌlel (Rom. 4:​3, 18-20). Ti lac pejtelel mi lac mejlel ti chumtʌl tiʼ pejtelel ora, an muʼ bʌ caj i majlelob ti panchan i an wʌʼ bʌ mi caj i cʌytʌlob ti Lum. Ili miʼ coltañonla chaʼan mi laj cuch jiñi wocol tac,  chaʼan mi lac bej chaʼlen subtʼan yicʼot mi lac tsʼʌctesan jiñi eʼtel am bʌ lac chaʼan ti congregación (1 Tes. 1:3). Laʼ laj qʼuel bajcheʼ tsiʼ colta jiñi apóstol Pablo.

16. ¿Chucoch yomʌch miʼ pʼʌtʼesʌntel jiñi apóstol Pablo?

¹⁶ Jiñi apóstol Pablo tsiʼ ñusa cabʌl wocol. Cheʼ bʌ tiʼ tsʼijbu majlel jiñi carta tiʼ tojlel jiñi corintiojob tsiʼ yʌlʌ chaʼan lajal bajcheʼ pʼejt melbil bʌ ti lum, chaʼan tsaʼ tsʌtsʌ ñejtʼi, chaʼan an i tajol maʼañic tsiʼ ñaʼta chuqui yom miʼ mel, tsaʼ contrajinti yicʼot tsaʼ ticʼlʌnti. Yomʌch miʼ pʼʌtʼesʌntel chaʼan miʼ cuch pejtelel jiñi (2 Cor. 4:​8-10). Pablo tiʼ tsʼijbu pejtelel iliyi ti jiñi i yuxpʼejlel i viaje bajcheʼ misionero, pero maʼañic tsiʼ ñaʼta chaʼan muʼto caj i taj yan tac bʌ wocol. Ti wiʼil, cabʌl lac piʼʌlob tsiʼ tempayob i bʌ i tsiʼ jatsʼʌyob, colel i chʌmel ti mar i tsiʼ yotsayob ti cárcel.

17. Cheʼ bajcheʼ miʼ yʌl 2 Corintios 4:​16-18, ¿chuqui tsiʼ colta Pablo chaʼan miʼ cuch jiñi wocol tac?

¹⁷ ¿Bajcheʼ tsiʼ taja i pʼʌtʌlel jiñi Pablo? Jiñʌch cheʼ tsiʼ chʌn ñaʼta jiñi i pijtaya (pejcan 2 Corintios 4:​16-18). Jin chaʼan tiʼ sube jiñi xñoptʼañob ti Corinto, chaʼan anquese jiñi i bʌcʼtal «miʼ ñoxʼan majlel», jiñi i «pusicʼal miʼ chaʼ tsijibʌyel ti jujumpʼejl qʼuin». Pablo tsaʼʌch i wen qʼuele ti ñuc jiñi pijtaya am bʌ i chaʼan, jin chaʼan tsaʼ mejli i cuch jiñi wocol tac.

18. ¿Bajcheʼ an i colta Tíjomir yicʼot i familia jiñi pijtaya añoʼ bʌ i chaʼan?

¹⁸ Tíjomir juntiquil hermano chʼoyol bʌ ti Bulgaria, tsaʼ chʌmi i yijtsʼin, Zdravko, ti jumpʼejl accidente i wen chʼijyem tsiʼ yubi i bʌ. ¿Chuqui an i colta Tíjomir yicʼot i familia? Jiñʌch cheʼ miʼ wen ñaʼtan cheʼ baʼ ora miʼ chaʼ chʼojyel jiñi i yijtsʼin. Miʼ cʼajtibeñob i bʌ baqui mi caj i majlel i tajob, chuqui mi caj i melbeñob i cʼux, majqui mi caj i pʌyob chaʼan yaʼañob yicʼot ti jimbʌ ora yicʼot chuqui tac mi caj i subeñob. Ili miʼ yʌqʼueñob i pʼʌtʌlel chaʼan miʼ bej ñusañob majlel jiñi wocol i miʼ chʌn pijtañob jinto miʼ chaʼ chʼojyel i yijtsʼin.

19. ¿Chuqui miʼ mejlel a mel chaʼan maʼ pʼʌtʼesan a pijtaya? (Qʼuele jaʼel jiñi foto).

 ¹⁹ ¿Bajcheʼ miʼ mejlel a pʼʌtʼesan jiñi a pijtaya? Mi maʼ pijtan chumtʌl wʌʼ ti Pañimil, pejcan muʼ bʌ i yʌl jiñi Biblia chaʼan jiñi Paraíso i ñaʼtan chaʼan yaʼix añeti (Is. 25:8; 32:​16-18). ¿Muʼ baʼ qʼuel a bʌ yaʼi? ¿Majqui yambʌ maʼ taj a qʼuelob? ¿Chuqui maʼ taj a ñʌchʼtan? ¿Bajcheʼ yubil maʼ wubin? Jiñi dibujo tac muʼ bʌ i tilel ti lac jun tac miʼ mejlel i coltañet a ñaʼtan a bʌ yaʼi. Cheʼ jaʼel miʼ mejlel a qʼuel jiñi video yicʼot bʌ música, bajcheʼ jiñi I sujm bʌ laj cuxtʌlel, Lʌcʼʌlix jiñi Paraíso yicʼot Mic wʌn ñaʼtan jiñi tsijiʼ bʌ Pañimil. Cheʼ maʼ ñaʼtan a bʌ yaʼ ti Paraíso, jiñi wocol tac mach jalic mi caj a wubin yicʼot mach ñuquic (2 Cor. 4:17). Jiñi pijtaya muʼ bʌ i yʌqʼueñonla Jehová mi caj i pʼʌtʼesañonla.

20. ¿Baqui mi caj lac taj jiñi lac pʼʌtʌlel cheʼ bʌ cʼuñonla mi la cubin lac bʌ?

²⁰ Anquese cʼuñonla mi la cubin lac bʌ, miʼ mejlel la cʌl: «Jiñʌch Dios muʼ bʌ i yʌqʼueñon c pʼʌtʌlel» (Sal. 18:32). Jehová an i yʌqʼueyonla pejtelel i cʼʌjñibal lac chaʼan chaʼan mi lac taj lac pʼʌtʌlel. Jin chaʼan, cheʼ bʌ wocol mi la cubin chaʼan mi lac tsʼʌctesan jumpʼejl eʼtel, chaʼan mi laj cuch jumpʼejl wocol o chaʼan tijicña mi lac chʌn melben i yeʼtel Jehová, laʼ lac chaʼlen oración ti jumpʼejl lac pusicʼal, laʼ lac pejcan jiñi Biblia chaʼan mi laj qʼuel chuqui miʼ subeñonla, laʼ lac jacʼben i coltaya jiñi hermanojob yicʼot laʼ lac chʌn ñaʼtan jiñi lac pijtaya. Cheʼ bajcheʼ jiñi, Jehová mi caj i yʌqʼueñonla jiñi lac pʼʌtʌlel «i cʼʌjñibal bʌ laʼ chaʼan chaʼan miʼ laj mejlel laʼ cuch yicʼot laʼ pijt i yicʼot laʼ tijicñʌyel» (Col. 1:11).