1, 2. ¿Chuqui yom mi lac mel cheʼ bʌ mi lac pejcan jiñi Biblia? Acʼʌ jumpʼejl ejemplo.

 ÑAʼTANCU chaʼan a wom a mʌn jumpʼejl a moto i maʼ wubin chaʼan an majqui woli (choncol) i chon i chaʼan, ¿chuqui mi caj a mel? ¿Muʼ ba caj a waʼ mʌn ti ora, o maʼ ñaxan wen qʼuel mi weñʌch i maʼañic chuqui asiyem i chaʼan? Cheʼʌchi, yomʌch maʼ ñaxan wen qʼuel chaʼan maʼ ñaʼtan mi mucʼʌch caj a mʌn.

² Jiñʌch yom bʌ mi lac mel jaʼel cheʼ bʌ mi lac pejcan jiñi Biblia. ¿Bajcheʼ miʼ mejlel lac mel? Mi orajach mi lac pejcan, cojach mi caj laj cʌn «jiñi ñaxan tac bʌ cʌntesa am bʌ yaʼ ti chʼujul bʌ i tʼan Dios» (Heb. 5:12). Jin chaʼan, yomʌch mi lac wen tsajin (wen qʼuel) muʼ bʌ i yʌl jiñi Biblia. Yom mi lac wen qʼuel bajcheʼ miʼ taj i bʌ jujumpʼejl parte yic’ot yambʌ. Mach cojach yom mi lac ñop chuqui miʼ yʌl jiñi Biblia, yomʌch mi lac chʼʌmben i sujm chucoch mi lac ñop.

3. ¿Chuqui tsiʼ yʌlʌ Pablo chaʼan yom miʼ melob jiñi xñoptʼañob, i chucoch? (Efesios 3:​14-19).

³ Chaʼan mi lac chʼʌmben i sujm ti tsʼʌcʌl jiñi i Tʼan Dios yom mi lac tsajin jaʼel jiñi ñumen wocol tac bʌ ti ñaʼtʌntel. Jiñi apóstol Pablo tiʼ sube jiñi xñoptʼañob ti jimbʌ ora chaʼan miʼ tsajiñob jiñi «i pochtʌlel, i ñajtlel, i chanlel yicʼot i tamlel» jiñi  i Tʼan Dios chaʼan miʼ ñumen chʼʌmbeñob i sujm, cheʼ bajcheʼ jiñi xucʼul mi caj i bej ajñelob yicʼot tsʌts chuculob tiʼ ñopoñel (pejcan Efesios 3:​14-19). Jiñʌch yom bʌ mi lac mel jaʼel. Laʼ laj qʼuel bajcheʼ miʼ mejlel lac tsajin jiñi i Tʼan Dios chaʼan mi lac wen chʼʌmben i sujm.

4. ¿Chuqui miʼ mejlel lac mel chaʼan mi lac ñumen lʌcʼtesan lac bʌ ti Jehová? Acʼʌ ejemplo tac.

⁴ Mach jiñic jach la com laj cʌn jiñi cʌntesa tac mach bʌ wocolic ti ñaʼtʌntel, la com laj cʌn jaʼel «jinto jiñi mucul tac bʌ i ñaʼtʌbal Dios», i jiñi chʼujul bʌ espíritu miʼ mejlel i coltañonla (1 Cor. 2:​9, 10). ¿Ixcu cheʼ muqʼuic a wʌqʼuen a bʌ jiñi meta chaʼan maʼ tsajin jumpʼejl tema muʼ bʌ i ñumen lʌcʼtesañet ti Jehová? Miʼ mejlel a tsajin bajcheʼ tsiʼ pʌsbe i cʼuxbiya Jehová jiñi i wiñicob ti wajali i bajcheʼ miʼ pʌsbeñet chaʼan mucʼʌch i cʼuxbiñet jaʼel. Cheʼ jaʼel, miʼ mejlel a tsajin bajcheʼ jiñi israelitajob tsiʼ chʼujutesayob Jehová wajali i bajcheʼ miʼ mejlel ili ora. O miʼ mejlel a tsajin jiñi profecía tac tsaʼ bʌ i tsʼʌctesa Jesús cheʼ bʌ tsajñi ila ti Lum yicʼot cheʼ tsiʼ chaʼle subtʼan.

5. ¿Chuqui ti tema a wom a chaʼlen ti estudiar?

⁵ An hermanojob tsaʼ bʌ cʼajtibentiyob baqui tac bʌ tema miʼ mulan i ñumen tsajiñob. Yaʼ ti recuadro « Tema tac mejl bʌ lac chaʼlen ti estudiar» miʼ mejlel lac taj jiñi tema tac tsaʼ bʌ i yʌlʌyob. Cheʼ bʌ maʼ tsajin ili tema tac, miʼ mejlel a cʼʌn jiñi Índice de las publicaciones Watch Tower yicʼot jiñi Coltʌntel chaʼan estudio. Ili mi caj i coltañet chaʼan maʼ pʼʌtʼesan a ñopoñel yicʼot maʼ ñumen cʌn Dios (Pr. 2:​4, 5). Wʌle laʼ laj qʼuel baqui bʌ cʌntesa tac miʼ mejlel lac tsajin.

6. a) Acʼʌ jumpʼejl ejemplo muʼ bʌ i pʌs chaʼan Jehová tiʼ pejtelel ora miʼ tsʼʌctesan jiñi ñaʼtʌbil bʌ i chaʼan. b) ¿Chucoch miʼ mejlel la cʌl chaʼan jiñi ñaʼtʌbil bʌ i chaʼan Jehová miʼ «jalijel tiʼ pejtelel ora»? (Efesios 3:11).

⁶ Jehová tiʼ pejtelel ora miʼ tsʼʌctesan jiñi ñaʼtʌbil bʌ i chaʼan. ¿Bajcheʼ la cujil? Laʼ la cʌl  jumpʼejl ejemplo. Ñaʼtancu chaʼan an baqui majlel muqʼuet, pero yaʼ ti bij an chuqui miʼ mʌctañet, ¿chuqui mi caj a mel? ¿Mach ba muqʼuic caj a sʌclan yambʌ bij chaʼan maʼ cʼotel yaʼ baqui ñaʼtʌbil a chaʼan? La cujil chaʼan Jehová an chuqui ñaʼtʌbil i chaʼan «muʼ bʌ i jalijel tiʼ pejtelel ora» i mi lac wen qʼuel ti ñuc cheʼ an i tsictesʌbeyonla majlel yaʼ ti Biblia (Efes. 3:11). Tiʼ sujm, Jehová an i laj cʼʌñʌ chuqui an chaʼan miʼ tsʼʌctiyel jiñi ñaʼtʌbil bʌ i chaʼan (Prov. 16:​4, TNM). Cheʼ jaʼel, la cujil chaʼan pejtelel muʼ bʌ i mel chaʼañʌch tiʼ pejtelel ora. Cheʼ jiñi, ¿chuqui jiñi yom bʌ i mel Jehová, i chuqui an i mele chaʼan miʼ tsʼʌctesan?

7. Cheʼ bʌ Adán yicʼot Eva tsiʼ ñusayob tʼan, ¿chuqui tsiʼ mele Jehová chaʼan miʼ tsʼʌctesan jiñi ñaʼtʌbil bʌ i chaʼan? (Mateo 25:34).

⁷ Wen tsiquil chuqui jiñi ñaʼtʌbil bʌ i chaʼan Jehová cheʼ bʌ tiʼ subeyob Adán yicʼot Eva: «Butʼula jini pañimil. Cʼʌñʌla. Laʼ i yumañetla [ . . . ] pejtel cuxul tac bʌ muʼ bʌ ti xʌmbal ti pañimil» (Gn. 1:28). Cheʼ bʌ Adán yicʼot Eva tsiʼ ñusʌbeyob i tʼan Jehová, tsaʼ ochi jiñi mulil, pero jiñi maʼañic tsiʼ mʌcta chaʼan miʼ tsʼʌctesan jiñi ñaʼtʌbil bʌ i chaʼan, tsaʼ jach i qʼuexta bajcheʼ mi caj i mel. ¿Chuqui tsiʼ mele? Ti orajach tsiʼ yʌlʌ chaʼan mi caj i waʼchocon jumpʼejl Yumʌntel ti panchan chaʼan miʼ tsʼʌctiyel chuqui yom Jehová (pejcan Mateo 25:34). Ti wiʼil, Jehová tsiʼ pʌsʌ i cʼuxbiya i tsiʼ choco tilel i Yalobil ila ti pañimil. Jesús tiʼ sube lac piʼʌlob jiñi wen tʼan chaʼan ili Yumʌntel i tsiʼ yʌcʼʌ i cuxtʌlel chaʼan miʼ locʼsañonla ti jiñi mulil yicʼot chʌmel. Ti wiʼil tsaʼ chaʼ chʼojyi, tsaʼ majli ti panchan i tsiʼ chʼʌmʌ i yeʼtel bajcheʼ Rey tiʼ Yumʌntel Dios. Pero anto chuqui tac yambʌ miʼ mejlel lac ñaʼtan chaʼan iliyi.

8. a) ¿Baqui bʌ i temajlel jiñi Biblia? b) Cheʼ bajcheʼ miʼ yʌl Efesios 1:​8-11, ¿chuqui yambʌ mi caj i mel Jehová? (Qʼuele jiñi dibujo am bʌ tiʼ tejchibal).

⁸ I temajlel jiñi Biblia jiñʌch: Jehová mi caj i ñuqʼuesan i cʼabaʼ cheʼ miʼ cʼʌn jiñi i Yumʌntel chaʼan miʼ tsʼʌctesan jiñi ñaʼtʌbil bʌ i chaʼan chaʼan ili Pañimil. Jehová miʼ yʌcʼ i tʼan chaʼan mi caj i tsʼʌctesan jiñi tsaʼix bʌ i yʌlʌ. Maʼañic chuqui miʼ mejlel i mʌctan (Is. 46:​10, 11; Heb. 6:​17, 18). Jiñi Pañimil mi caj i sujtel ti jumpʼejl paraíso baqui jiñi i pʼolbalob Adán yicʼot Eva tojobix i mi caj i yajñelob tiʼ pejtelel ora (Sal. 22:26). Pero anto yambʌ, jiñi ñaʼtʌbil bʌ i chaʼan Jehová mi caj i junyajl tsʼʌctiyel cheʼ bʌ jiñi i yalobilob ti panchan yicʼot jiñi añoʼ bʌ ti Pañimil juntemel mi caj i yajñelob bajcheʼ jumpʼejl familia, i tiʼ pejtelelob mi caj i jacʼbeñob i tʼan Jehová bajcheʼ yumʌl (pejcan Efesios 1:​8-11).

9. ¿Chuqui la cujil chaʼan mi caj i yujtel ti talto bʌ qʼuin?

⁹ Laʼcu lac ñaʼtan jiñi profecía tsaʼ bʌ i yʌlʌ Jehová muʼ bʌ lac taj ti Génesis 3:15. b Chaʼan miʼ tsʼʌctiyel ili profecía an tacʌch cabʌl chuqui yom miʼ yujtel i yom miʼ ñumel cabʌl jab. Jumpʼejl ejemplo, Jehová tiʼ sube Abrahán chaʼan jiñi Mesías mi caj i tilel tiʼ pʼolbal (Gn. 22:​15-18). Tsaʼ ñumi cabʌl ora, i cheʼ ti jabil 33, Jesús tsaʼ tsʌnsʌnti i lajal bajcheʼ tsaʼ lowbenti i tunʼoc, cheʼ bajcheʼ jiñi tsaʼ tsʼʌctiyi jiñi wʌn albil bʌ (Hech. 3:​13-15). Pero chaʼan miʼ junyajl tsʼʌctiyel jiñi profecía i miʼ jisʌntel Satanás, yomto miʼ ñumel ñumen ti mil jab (Apoc. 20:​7-10). Jiñi Biblia miʼ subeñonla chuqui tac yambʌ miʼ caj ti ujtel cheʼ bʌ Satanás muʼto caj i contrajin jiñi i yorganización Jehová.

10. a) ¿Chuqui tac mi caj i yujtel ti talto bʌ qʼuin? b) ¿Bajcheʼ miʼ mejlel lac chajpan lac bʌ? (Qʼuele jaʼel jiñi nota).

 ¹⁰ Laʼ laj cʼajtesan pejtelel muʼ bʌ i yʌl jiñi Biblia chaʼan muʼto bʌ caj i yujtel. Ñaxan, jiñi yumʌlob mi caj i yʌlob chaʼan añix «ñʌchʼtʌlel yicʼot maʼañix chuqui bʌbʌqʼuen bʌ» (1 Tes. 5:​2, 3). Cheʼ jiñi, jiñi ñuc bʌ wocol mi caj i tejchel cheʼ bʌ jiñi yumʌlob miʼ contrajiñob jiñi mach bʌ i sujmic ñopbalʌl (Apoc. 17:16). Ti wiʼil, tajol mi caj i yujtel chuqui tac bʌbʌqʼuen bʌ, i cheʼ bajcheʼ jiñi mi caj i tsictiyel chaʼan «jiñi i Yalobil wiñic woliʼ tilel yaʼ ti tocal am bʌ ti panchan, wen an i pʼʌtʌlel yicʼot i ñuclel» (Mat. 24:30). Cheʼ jaʼel, Jesús mi caj i chaʼlen meloñel i mi caj i tʼox jiñi lac piʼʌlob cheʼ bʌ yilalob bajcheʼ tiñʌmeʼ yicʼot cheʼ bʌ yilalob bajcheʼ chivo (Mat. 25:​31-33, 46). Pero Satanás mach cheʼic jach mi caj i cʌytʌl, mi caj i ñijcʌben i pusicʼal junmojt tejclum tac chaʼan miʼ contrajibeñob i tejclum Jehová, yaʼ ti Biblia miʼ subentel bajcheʼ Gog (Ez. 38:​1-3, 10, 11). Cheʼ jaʼel, jiñi yajcʌbiloʼ bʌ wʌʼto bʌ añob ti pañimil mi caj i majlelob ti panchan, cheʼ bʌ yaʼix añob yicʼot Jesús yicʼot jiñi ángelob mi caj i chaʼleñob guerra ti Armagedón (Mat. 24:31; Apoc. 16:​14, 16). c Ti wiʼil, mi caj i tejchel jiñi mil jab i yumʌntel Jesús wʌʼ ti Pañimil (Apoc. 20:6).

11. ¿Chuqui mi caj i mejlel lac mel cheʼ mi lac chumtʌl tiʼ pejtelel ora? (Qʼuele jaʼel jiñi dibujo).

¹¹ Laʼcu lac ñumen ñaʼtan jiñi talto bʌ qʼuin. Jiñi Biblia miʼ yʌl chaʼan Jehová tsiʼ yotsa ti lac pusicʼal chaʼan mi lac mulan chumtʌl tiʼ pejtelel ora (Ecl. 3:​11, TNM). ¿I chuqui yom i yʌl chaʼañonla iliyi? Jiñi libro Acerquémonos a Jehová ti página 319, miʼ yʌl chaʼan mi caj i mejlel lac ñumen cʌn Jehová come mi caj lac chumtʌl tiʼ pejtelel ora. Pero mach yʌlʌyic jaypʼejl tiempo miʼ ñumel, ñumen cabʌlto chuqui mi caj i mejlel laj cʌn tiʼ tojlel Jehová. Wen utsʼatax mi caj lac chumtʌl yaʼ ti Paraíso, pero jiñi ñumen wem bʌ jin cheʼ ti jujumpʼejl qʼuin mi caj i mejlel lac ñumen lʌcʼtesan lac bʌ ti Jehová. Pero cheʼ bʌ wolito  (yʌquelto) lac pijtan chaʼan miʼ tsʼʌctiyel pejtelel iliyi, ¿chuqui tac yambʌ miʼ mejlel lac tsajin yaʼ ti Biblia?

12. ¿Bajcheʼ miʼ mejlel laj qʼuel jiñi i ñuclel Dios ti panchan? Acʼʌ jumpʼejl ejemplo.

¹² Jiñi Biblia miʼ coltañonla lac tsʼitaʼ qʼuel bajcheʼ yilal i ñuclel Dios ti panchan (Is. 33:5). Miʼ subeñonla chuqui tac utsʼatax bʌ tiʼ tojlel Jehová yicʼot tiʼ tojlel jumpʼejl parte i yorganización yaʼ ti panchan (Is. 6:​1-4; Dn. 7:​9, 10; Apoc. 4:​1-6). Jumpʼejl ejemplo, miʼ mejlel lac pejcan jiñi libro chaʼan Ezequiel, baqui miʼ yʌl chaʼan Ezequiel tsiʼ qʼuele cheʼ bʌ «tsaʼ jajmi jini panchan» i an chuqui tac tsaʼ pʌsbenti tilem bʌ ti Dios (Ez. 1:​1-3).

13. Cheʼ bʌ maʼ ñaʼtan woli bʌ i mel Jesús yaʼ ti panchan, ¿bajcheʼ yubil maʼ wubin a bʌ? (Hebreos 4:​14-16).

¹³ Laʼ lac ñaʼtan jaʼel jiñi woli bʌ i mel Jesús yaʼ ti panchan cheʼ añix bajcheʼ Rey yicʼot bajcheʼ Ñumen ñuc bʌ sacerdote. Tiʼ coltaya miʼ mejlel lac lʌcʼtesan lac bʌ ti Jehová i mi laj cʼajtin laj coltʌntel cheʼ i cʼʌjñibal lac chaʼan (pejcan Hebreos 4:​14-16). Laʼ lac wen ñaʼtan ti jujumpʼejl qʼuin jiñi am bʌ i meleyob yicʼot woli bʌ i melob ti lac tojlel, Jehová yicʼot Jesús. Cheʼ bʌ mi laj qʼuel bajcheʼ miʼ pʌsbeñoñobla i cʼuxbiya yomʌch miʼ ñijcan lac pusicʼal chaʼan mi lac bej melben i yeʼtel Jehová yicʼot lac tijicñʌyel (2 Cor. 5:​14, 15).

14. ¿Bajcheʼ miʼ mejlel lac pʌsbeñob Jehová yicʼot Jesús chaʼan mi laj qʼuel ti ñuc am bʌ i meleyob ti lac tojlel? (Qʼuele jaʼel jiñi foto tac).

¹⁴ Junchajp bajcheʼ mi lac pʌs chaʼan mi lac wen qʼuel ti ñuc woli bʌ i melob Jehová yicʼot Jesús ti lac tojlel jiñʌch cheʼ mi lac chaʼlen wersa laj coltan jiñi lac piʼʌlob chaʼan miʼ sujtelob tiʼ testigo Jehová yicʼot ti xcʌntʼañob i chaʼan Jesús (Mat. 28:​19, 20). Jiñʌch tsaʼ bʌ i mele jiñi apóstol Pablo, yujil chaʼan  jiñi yom bʌ Jehová jiñʌch «chaʼan pejtelel lac piʼʌlob miʼ tajob i coltʌntel i miʼ cʌñob ti tsʼʌcʌl jiñi i sujmlel» (1 Tim. 2:​3, 4). Jin chaʼan tsiʼ chaʼle wersa subtʼan, chaʼan cheʼ bajcheʼ jiñi miʼ mejlel i coltan cabʌl lac piʼʌlob (1 Cor. 9:​22, 23).

15. Cheʼ bajcheʼ miʼ yʌl Salmo 1:​2, ¿chuqui mi caj i yʌqʼueñonla lac tijicñʌyel?

¹⁵ Jiñi salmista tsiʼ yʌlʌ chaʼan jiñi tijicña bʌ wiñic jiñʌch muʼ bʌ i chʌn pejcan i Tʼan Dios, «miʼ chʌn ñaʼtan chuqui yom lac Yum ti qʼuinil yicʼot ti acʼʌlel» (Sal. 1:​1-3). Joseph Rotherham, juntiquil traductor chaʼan Biblia, tsiʼ yʌlʌ chaʼan jiñi muʼ bʌ i pejcan i Tʼan Dios yom miʼ taj i tijicñʌyel cheʼ bʌ miʼ chaʼlen ti investigar yicʼot miʼ wen ñaʼtan muʼ bʌ i pejcan. I tsiʼ yʌlʌ jaʼel chaʼan mi maʼañic mi lac pejcan jiñi Biblia jumpʼejl qʼuin lajal bajcheʼ toʼol jach tsaʼ ñumi jiñi qʼuin. Jatet jaʼel miʼ mejlel a taj a tijicñʌyel tiʼ pejcʌntel jiñi Biblia mi maʼ chaʼlen wersa a wen tsajin yicʼot maʼ qʼuel bajcheʼ miʼ taj i bʌ jujunchajp muʼ bʌ i yʌl.

16. ¿Chuqui mi caj laj qʼuel ti yambʌ estudio?

¹⁶ Ti lac pejtelel miʼ mejlel lac chʼʌmben i sujm muʼ bʌ i pʌsbeñonla Jehová tiʼ Tʼan. Ti yambʌ estudio mi caj laj qʼuel jumpʼejl cʌntesa wen ñuc bʌ i cʼʌjñibal: Jiñi chʼujul bʌ i templo Jehová tsaʼ bʌ i taja ti tʼan Pablo yaʼ ti carta chaʼan Hebreos. Mi caj lac wen ñusan lac bʌ cheʼ bʌ mi lac tsajin iliyi.