1. ¿Chuqui woliʼ yʌl juntiquil ángel, i chuqui yom mi lac mel?

 CHEʼ muqʼuic i pejcañet juntiquil ángel, ¿muʼ ba caj a ñʌchʼtan? Ti ili ora juntiquil ángel woli (choncol) i suben jiñi ñuqui tejclum, pʼolbalʌl tac, tʼan tac yicʼot alʌ tejclum tac: «Bʌcʼñanla Dios yicʼot aqʼuenla i ñuclel [ . . . ]. Chʼujutesanla jiñi tsaʼ bʌ i mele panchan, lum, mar yicʼot i pasibal jaʼ» (Apoc. 14:​6, 7). Jehová jiñʌch jiñi i sujm bʌ Dios, jin chaʼan yomʌch mi lac chʼujutesan. Mi lac wen ubin lac tijicñʌyel cheʼ miʼ mejlel lac chʼujutesan yaʼ tiʼ templo.

2. ¿Chuqui woliʼ tajtʌl ti tʼan cheʼ bʌ miʼ yʌjlel jiñi chʼujul bʌ i templo Jehová? (Qʼuele jaʼel jiñi recuadro « Jiñi mach bʌ jiñiqui»).

² ¿Chuqui woli (yʌquel) i tajtʌl ti tʼan cheʼ bʌ miʼ yʌjlel jiñi chʼujul bʌ i templo Jehová? Mach jumpʼejlic templo melbil bʌ (pʌtbil bʌ) tiʼ cʼʌb wiñicob. Jiñʌch pejtelel tsaʼ bʌ i chajpa Jehová chaʼan miʼ mejlel lac chʼujutesan, chucul bʌ tiʼ cuxtʌlel Jesús. ¿I chuqui miʼ yʌl jiñi Biblia chaʼan iliyi? Jiñi apóstol Pablo cabʌl chuqui tiʼ tsictesa chaʼan ili templo yaʼ ti carta chaʼan Hebreos. b

3, 4. ¿Chucoch Pablo tsiʼ chocbe majlel jumpʼejl carta jiñi xñoptʼañob hebreojoʼ bʌ, i chuqui tiʼ subeyob?

 ³ ¿Chucoch Pablo tsiʼ chocbeyob majlel carta jiñi xñoptʼañob hebreojoʼ bʌ chumuloʼ bʌ yaʼ ti Judea? Ñaxan, come tajol yom i ñuqʼuesʌbeñob i pusicʼal. Lʌcʼʌ tiʼ pejtelelob tsaʼ cosʌntiyob tiʼ ñopbal jiñi judíojob. Tajol cheʼ bʌ tsaʼ sujtiyob ti xcʌntʼan i chaʼan Cristo, jiñi ñucoʼ bʌ i yeʼtel tsaʼ caji i wajleñob. ¿Chucoch? Come jiñi xñoptʼañob maʼañobic i chaʼan jumpʼejl colem templo baqui miʼ chʼujutesañob Dios, baqui miʼ yʌqʼueñob majtañʌl yicʼot maʼañobix i sacerdote. Tajol jiñi tsiʼ yʌqʼueyob i chʼijyemlel yicʼot tsaʼ cʼuñʼayob i ñopoñel (Heb. 2:1; 3:​12, 14). Tajol anto tsaʼ bʌ i chaʼ ñaʼtayob sujtel tiʼ ñopbal jiñi judíojob.

⁴ I chaʼpʼejlel, Pablo tsiʼ yʌqʼue i qʼuel jiñi xñoptʼañob hebreojoʼ bʌ chaʼan maʼañic woliʼ chaʼleñob wersa i chʼʌmbeñob i sujm jiñi cʌntesa tac wocol bʌ ti ñaʼtʌntel, muʼ bʌ i lajintel bajcheʼ jiñi «bʌlñʌcʼʌl i chaʼañob jiñi ñucobix bʌ» (Heb. 5:​11-14). Tajol an wolito bʌ i bej jacʼob jiñi Mandar tsaʼ bʌ aqʼuenti Moisés. Pablo tiʼ subeyob chaʼan jiñi majtañʌl muʼ bʌ i lon acʼob maʼañic miʼ junyajl ñusʌbeñob i mul, jin chaʼan maʼañix i cʼʌjñibal jiñi Mandar. Cheʼ jaʼel, tsiʼ cʼajtesʌbeyob chaʼan jiñi i cuxtʌlel Jesús miʼ yʌqʼueñob jiñi «ñumen wem bʌ pijtaya», i jiñi miʼ mejlel i coltañob chaʼan miʼ lʌcʼtesañob i bʌ ti Dios (Heb. 7:​18, 19).

5. ¿Chuqui yom bʌ mi lac chʼʌmben i sujm, i chucoch?

⁵ Pablo tiʼ sube jiñi hermanojob hebreojoʼ bʌ chaʼan ñumen wen bajcheʼ woliʼ chʼujutesañob Jehová i mach jiñic bajcheʼ woliʼ lon melob tilel ti ñaxan. Jin chaʼan, tsiʼ yʌlʌ chaʼan bajcheʼ woliʼ melob jiñi judíojob «i yʌxñal jach jiñi muʼto bʌ caj i tilel, pero jiñi i sujm bʌ bʌcʼtalʌl jiñʌch Cristo» (Col. 2:17). Laʼcu lac ñaʼtan iliyi, cheʼ bʌ mi laj qʼuelben i yʌxñʌlel juntiquil lac piʼʌl, ¿yom ba i yʌl chaʼan woli lac junyajl taj laj qʼuel? Maʼañic. Cheʼ jaʼel, jiñi chʼujutesaya tsaʼ bʌ i yʌqʼueyob Jehová jiñi judíojob, i yʌxñʌlel jach yambʌ ñumen wem bʌ bajcheʼ mi caj i chʼujutesʌntel Jehová. Jin chaʼan, ñuc i cʼʌjñibal mi lac chʼʌmben i sujm chuquiyes jiñi chʼujul bʌ i templo Jehová, come jiñʌch muʼ bʌ i coltañonla chaʼan miʼ ñusʌntel lac mul yicʼot mi lac chʼujutesan cheʼ bajcheʼ yom. Jin chaʼan, laʼ laj qʼuel bajcheʼ tsaʼ chʼujutesʌnti Jehová ti wajali (i yʌxñal) i bajcheʼ miʼ chʼujutesʌntel ili ora (i sujmlel). Cheʼ bajcheʼ ili, mi caj lac ñumen ñaʼtan chuquiyes jiñi templo woli bʌ la cʌl i chucoch ñuc i cʼʌjñibal chaʼañonla.

6. ¿Bajcheʼ tsaʼ cʼʌjñi jiñi tabernáculo?

⁶ I chʼujutesʌntel Jehová ti wajali. Pablo tsiʼ taja ti tʼan jiñi tabernáculo tsaʼ bʌ i waʼchoco Moisés cheʼ ti jabil 1512 chaʼan miʼ tsictesan jiñi chʼujul bʌ i templo Jehová (qʼuele jiñi recuadro «I chʼujutesʌntel Jehová ti wajali yicʼot ti ili ora»). Jiñi tabernáculo jiñʌch baqui jiñi israelitajob tsiʼ chʼujutesayob Dios yicʼot tsiʼ yʌqʼueyob i majtan (Éx. 29:​43-46). Tsiʼ cuchuyob ñumel yaʼ baqui miʼ majlelob (Éx. 25:​8, 9; Nm. 9:22). Tsiʼ cʼʌñʌyob lʌcʼʌ 500 jab, jinto tsaʼ mejli jiñi templo yaʼ ti Jerusalén. Jiñi tabernáculo tsiʼ pʌsʌ chaʼan anto chuqui ñumen wem bʌ mi caj i tilel tiʼ tojlel jiñi xñoptʼañob.

7. ¿Jalix tsaʼ waʼchoconti jiñi chʼujul bʌ templo?

⁷ I chʼujutesʌntel Jehová ti ili ora. Jiñi tabernáculo «jiñʌch junchajp muʼ bʌ i pʌs an tac bʌ ti panchan yicʼot i yʌxñalʌch» jiñi chʼujul bʌ templo. Pablo tsiʼ yʌlʌ: «Ili pisil bʌ otot [o tabernáculo] jumpʼejlʌch lajiya chaʼan ili ora» (Heb. 8:5; 9:9). Jin chaʼan, cheʼ bʌ Pablo tiʼ tsʼijbubeyob majlel carta jiñi xñoptʼañob hebreojoʼ bʌ, añix jiñi chʼujul bʌ templo. Tsaʼ waʼchoconti cheʼ ti jabil 29, cheʼ bʌ Jesús tsiʼ chʼʌmʌ jaʼ i tsaʼ caji i mel i yeʼtel bajcheʼ «ñumen ñuc bʌ sacerdote» (Heb. 4:14; Hech. 10:​37, 38). c

8, 9. Cheʼ bajcheʼ miʼ yʌl Hebreos 7:​23-27, ¿chucoch wen qʼuexelʌch jiñi ñumen ñuc bʌ sacerdotejob ti wajali yicʼot jiñi ñumen ñuc bʌ sacerdote, Jesucristo?

⁸ I chʼujutesʌntel Jehová ti wajali. Jiñi ñumen ñuc bʌ sacerdote jiñʌch muʼ bʌ i yʌcʼ jiñi majtañʌl chaʼan jiñi tejclum. Jiñi ñaxam bʌ ñumen ñuc bʌ sacerdote tsaʼ bʌ yajcʌnti ti Jehová jiñʌch Aarón i tsaʼ waʼchoconti cheʼ bʌ tsaʼ mejli jiñi tabernáculo. Pero Pablo tsiʼ yʌlʌ chaʼan «jiñi chʌmel maʼañic tsiʼ yʌcʼʌ chaʼan jiñi sacerdotejob miʼ bej melob i yeʼtel, jin chaʼan tsaʼ ochiyob i qʼuexol chaʼan miʼ bej melob jiñi eʼtel» (pejcan Hebreos 7:​23-27). d Come jiñi ñumen ñuc bʌ sacerdotejob xmulilob, yom miʼ yʌcʼob majtañʌl tac chaʼan miʼ ñusʌbentelob i mul. Pero Jesús maʼañic tsiʼ mele jiñi come mach xmulilic. Ili miʼ pʌs chucoch Jesús mach lajalic bajcheʼ jiñi ñumen ñuc bʌ sacerdotejob ti wajali.

⁹ I chʼujutesʌntel Jehová ti ili ora. Jiñi ñumen ñuc bʌ sacerdote, Jesucristo, jiñʌch «xyaj eʼtel ti jiñi chʼujul bʌ ajñibʌl yicʼot ti jiñi i sujm bʌ pisil bʌ otot tsaʼ bʌ i mele Jehová i mach jiñic wiñicob» (Heb. 8:​1, 2). Pablo tsiʼ yʌlʌ: «Jesús cuxul tiʼ pejtelel ora, jin chaʼan maʼañic majqui miʼ yochel tiʼ qʼuexol ti jiñi i yeʼtel bajcheʼ sacerdote». Cheʼ jaʼel, maʼañic i mul yicʼot maʼañic i bibiʼlel, jin chaʼan «mach cʼʌñʌlic miʼ yʌcʼ tsʌnsʌbil bʌ añimal tac ti jujumpʼejl qʼuin». ¿I chuqui miʼ mejlel la cʌl chaʼan jiñi pulʌntib yicʼot jiñi majtañʌl muʼ bʌ i yʌjqʼuel? Laʼ laj qʼuel.

10. ¿Chuqui yom i yʌl jiñi majtañʌl tac tsaʼ bʌ ajqʼui yaʼ ti pulʌntib melbil bʌ ti cobre?

¹⁰ I chʼujutesʌntel Jehová ti wajali. Yaʼ tiʼ jumpatlel jiñi tabernáculo an jumpʼejl pulʌntib melbil bʌ ti cobre baqui miʼ yʌqʼuentel tsʌnsʌbil bʌ i majtan Jehová (Éx. 27:​1, 2; 40:29). Pero ili majtañʌl tac maʼañic miʼ junyajl ñusʌben i mul jiñi lac piʼʌlob (Heb. 10:​1-4). Jiñi majtañʌl tac tsiʼ wʌn pʌsʌ jiñi muʼ bʌ caj i yʌjqʼuel chaʼan miʼ junyajl ñusʌben i mul jiñi lac piʼʌlob.

11. ¿Chuquiyes jiñi pulʌntib baqui Jesús tsiʼ yʌcʼʌ i bʌ bajcheʼ majtañʌl? (Hebreos 10:​5-7, 10).

 ¹¹ I chʼujutesʌntel Jehová ti ili ora. Jesús yujil chucoch Jehová tsiʼ choco tilel ila ti Lum: Chaʼan miʼ yʌcʼ i cuxtʌlel i miʼ tojben i mul pejtelel lac piʼʌlob (Mat. 20:28). Jin chaʼan, cheʼ bʌ tsiʼ chʼʌmʌ jaʼ tsiʼ pʌsʌ chaʼan yom i mel chuqui yom bʌ Jehová, lajal bajcheʼ tsiʼ yʌcʼʌ i bʌ ti jumpʼejl pulʌntib (Juan 6:38; Gál. 1:4). ¿Chucoch cheʼ mi la cʌl? Come jiñi pulʌntib yom i yʌl chuqui yom bʌ Jehová, i jiñi yom bʌ jiñʌch chaʼan Jesús miʼ yʌcʼ i cuxtʌlel. Cheʼ bʌ Jesús tsiʼ yʌcʼʌ i bʌ ti chʌmel junsujtel jach tsiʼ mele i «chaʼañʌch tiʼ pejtelel ora», cheʼ bajcheʼ jiñi miʼ junyajl ñusʌntel lac mul mi mucʼʌch lac ñop tiʼ tojlel (pejcan Hebreos 10:​5-7, 10). Wʌle mi caj la cʌl jiñi an tac bʌ tiʼ mal jiñi tabernáculo i chuqui yom i yʌl jujunchajp am bʌ yaʼi.

12. ¿Majqui jiñi muʼ bʌ i mejlelob ti ochel ti jujumpʼejl parte yaʼ ti tabernáculo?

¹² I chʼujutesʌntel Jehová ti wajali. Jiñi tabernáculo yicʼot jiñi templo ti Jerusalén lʌcʼʌ lajal jiñi i mal. An jumpʼejl «cortina» muʼ bʌ i tʼox ti chaʼpʼejl: Jiñi Chʼujul bʌ ajñibʌl yicʼot jiñi Wen chʼujul bʌ ajñibʌl (Heb. 9:​2-5; Éx. 26:​31-33). Yaʼ ti Chʼujul bʌ ajñibʌl an jumpʼejl candelabro melbil bʌ ti oro, jumpʼejl pulʌntib baqui miʼ pulob pom yicʼot jumpʼejl mesa baqui miʼ yʌcʼob jiñi pan. Ilayi, cojach jiñi sacerdotejob miʼ mejlelob ti ochel chaʼan miʼ melob jiñi chʼujul bʌ i yeʼtel (Nm. 3:​3, 7, 10). I yaʼ ti Wen chʼujul bʌ ajñibʌl yaʼan jiñi arca chaʼan bʌ trato melbil bʌ ti oro, i jiñi tsiʼ pʌsʌ chaʼan yaʼan Jehová (Éx. 25:​21, 22). Cojach  jiñi ñumen ñuc bʌ sacerdote miʼ mejlel ti ñumel yaʼ ti cortina chaʼan miʼ yochel yaʼ ti Wen chʼujul bʌ ajñibʌl, i miʼ mel cheʼ tiʼ Qʼuiñilel i ñusʌntel mulil muʼ bʌ i mejlel ti jujumpʼejl jab. Ti jimbʌ ora, miʼ chʼʌm ochel i chʼichʼel añimal chaʼan miʼ cʼajtin i ñusʌntel i mul yicʼot i chaʼan jiñi tejclum (Lv. 16:​2, 17). Ti wiʼil, Jehová tsiʼ cʼʌñʌ chʼujul bʌ i yespíritu chaʼan miʼ tsictesan baqui bʌ i sujmlel pejtelel iliyi (Heb. 9:​6-8). e

13. ¿Chuqui yom i yʌl jiñi Chʼujul bʌ ajñibʌl yicʼot jiñi Wen chʼujul bʌ ajñibʌl?

¹³ I chʼujutesʌntel Jehová ti ili ora. Jehová tsiʼ yajca 144 mil xñoptʼañob muʼ bʌ caj i majlelob ti panchan i mi caj i melob i yeʼtel bajcheʼ sacerdote. Ili xñoptʼañob wen lʌcʼʌl añob yicʼot Jehová (Apoc. 1:6; 14:1). Cheʼ bʌ wʌʼto añob ti pañimil, Dios miʼ yajcañob tiʼ chʼujul bʌ i yespíritu i lajal bajcheʼ i yalobilobix. Jin chaʼan, jiñi Chʼujul bʌ ajñibʌl am bʌ yaʼ ti tabernáculo yom i yʌl bajcheʼqui Jehová wen lʌcʼʌl an yicʼot jiñi 144 mil (Rom. 8:​15-17). Jiñi Wen chʼujul bʌ ajñibʌl am bʌ yaʼ ti tabernáculo jiñʌch jiñi panchan, baqui chumul Jehová. Jiñi «cortina» muʼ bʌ i tʼox jiñi Chʼujul bʌ ajñibʌl yicʼot jiñi Wen chʼujul bʌ ajñibʌl jiñʌch i bʌcʼtal Jesús. Jiñi i bʌcʼtal tsiʼ mʌcta chaʼan maʼañic miʼ yʌcʼ ti ochel yaʼ ti panchan chaʼan miʼ mel i yeʼtel bajcheʼ jiñi ñumen ñuc bʌ sacerdote yaʼ ti chʼujul bʌ templo. Cheʼ bʌ tsaʼix i yʌcʼʌ i cuxtʌlel, Jesús tsiʼ jamʌ jiñi bij chaʼan tiʼ pejtelel jiñi xñoptʼañob yajcʌbiloʼ bʌ miʼ mejlelob ti ochel yaʼ ti panchan. Pero chaʼan miʼ melob iliyi yom miʼ cʌyob i bʌcʼtal (Heb. 10:​19, 20; 1 Cor. 15:50). Cheʼ bʌ Jesús tsaʼix chaʼ tejchi, tsaʼ ochi yaʼ ti Wen chʼujul bʌ ajñibʌl, yaʼ baqui mi caj i majlelob jaʼel jiñi xñoptʼañob yajcʌbiloʼ bʌ.

14. Cheʼ bajcheʼ miʼ yʌl Hebreos 9:​12, 24-26, ¿chucoch ñumen wento jiñi chʼujul bʌ templo?

¹⁴ Wen tsiquil chaʼan ñumen wento jiñi tsaʼ bʌ i chajpa Jehová chaʼan miʼ chʼujutesʌntel, come yaʼʌch chucul ti jiñi i cuxtʌlel tsaʼ bʌ i yʌcʼʌ Jesucristo yicʼot cheʼ jiñʌch jiñi Ñumen ñuc bʌ lac sacerdote. Yaʼ ti Wen chʼujul bʌ ajñibʌl baqui miʼ yochel jiñi ñumen ñuc bʌ sacerdote ti Israel melbil jach ti wiñicob, i miʼ chʼʌm ochel i chʼichʼel añimal. Pero Jesús tsaʼ junyajl ochi ti panchan, tiʼ tojel i wut Jehová, yaʼi tsiʼ pʌsʌ chaʼan tsaʼix i yʌcʼʌ i cuxtʌlel «chaʼan miʼ jisan jiñi mulil» (pejcan Hebreos 9:​12, 24-26). Cheʼ bʌ Jesús tsiʼ yʌcʼʌ i cuxtʌlel, tsiʼ junyajl ñusa lac mul. Wʌle mi caj laj qʼuel chaʼan ti lac pejtelel miʼ mejlel lac chʼujutesan Jehová yaʼ tiʼ templo, mach yʌlʌyic baqui bʌ jiñi lac pijtaya, mi ti panchan o ti Lum.

15. ¿Majqui miʼ chaʼleñob eʼtel yaʼ tiʼ jumpatlel jiñi tabernáculo?

¹⁵ I chʼujutesʌntel Jehová ti wajali. Tiʼ jumpatlel jiñi tabernáculo jiñi sacerdotejob miʼ melob i yeʼtel, yaʼi an jumpʼejl pulʌntib baqui miʼ yʌjqʼuel majtañʌl tac yicʼot i yajñib jaʼ baqui jiñi sacerdotejob miʼ sʌqʼuesañob i bʌ cheʼ bʌ mi caj i melob i yeʼtel (Éx. 30:​17-20; 40:​6-8). Ti wiʼil, cheʼ bʌ tsaʼ mejli jiñi templo, tsaʼ mejli yambʌ jumpat chaʼan jiñi mach bʌ sacerdotejobic miʼ mejlelob ti ochel chaʼan miʼ chʼujutesañob Dios.

16. ¿Majqui woliʼ melbeñob i yeʼtel Jehová ti jiñi jumpat chaʼan sacerdotejob yicʼot yaʼ ti yambʌ i jumpatlel jiñi templo?

¹⁶ I chʼujutesʌntel Jehová ti ili ora. Cheʼ bʌ jiñi yajcʌbiloʼ bʌ chaʼan miʼ majlelob ti panchan wʌʼto añob ti pañimil, miʼ melbeñob i yeʼtel Jehová yaʼ ti jumpat chaʼan sacerdotejob am bʌ yaʼ ti chʼujul bʌ i templo. I jiñi i yajñib jaʼ am bʌ yaʼ ti tabernáculo yicʼot yaʼ ti  templo ti wajali miʼ cʼajtesʌbeñob jiñi muʼ bʌ caj i majlelob ti panchan yicʼot wʌʼ bʌ mi caj i chumtʌlob ti pañimil chaʼan yom sʌc miʼ yajñelob. ¿I baqui woliʼ chʼujutesañob Dios jiñi yonlel wiñicob xʼixicob woli bʌ i coltañob jiñi i yermañujob Cristo? Jiñi apóstol Juan tsiʼ qʼuele chaʼan «yaʼañob tiʼ tojel jiñi i trono Dios i miʼ melbeñob chʼujul bʌ i yeʼtel ti qʼuiñil yicʼot ti acʼʌlel yaʼ tiʼ templo». Jin chaʼan, jiñi yonlel wiñicob xʼixicob woliʼ melbeñob i yeʼtel Dios ila ti pañimil, ti jiñi yambʌ i jumpatlel jiñi templo (Apoc. 7:​9, 13-15). ¡Mi lac wen qʼuel ti ñuc cheʼ ti lac pejtelel añʌch baqui miʼ mejlel lac chʼujutesan Jehová yaʼ ti chʼujul bʌ templo!

17. ¿Chuqui miʼ mejlel la cʌqʼuen Jehová?

¹⁷ Ti lac pejtelel miʼ mejlel la cʌqʼuen i majtan Jehová. ¿Bajcheʼ? Jiñʌch cheʼ mi laj cʼʌn lac tiempo, lac pʼʌtʌlel yicʼot lac taqʼuin chaʼan mi laj coltʌben jiñi i Yumʌntel. Cheʼ bajcheʼ tsiʼ yʌlʌ Pablo tiʼ tojlel jiñi xñoptʼañob hebreojoʼ bʌ, miʼ mejlel laj cʼʌn la quej chaʼan mi lac jamʌ sub i cʼabaʼ (Heb. 13:15). Mi mucʼʌch lac chaʼlen wersa bajcheʼ cʼamel chaʼan mi lac melben i yeʼtel Jehová mi caj lac pʌs chaʼan mucʼʌch laj qʼuel ti ñuc cheʼ miʼ mejlel lac chʼujutesan.

18. Cheʼ bajcheʼ miʼ yʌl Hebreos 10:​22-25, ¿chuqui jiñi mach bʌ yomic mi laj cʌy lac mel, i chuqui mach bʌ yomic miʼ ñajʌyel lac chaʼan?

¹⁸ (Pejcan Hebreos 10:​22-25). Tiʼ yujtibal jiñi carta chaʼan Hebreos, Pablo tsiʼ taja ti tʼan chuqui tac jiñi mach bʌ yomic mi laj cʌy lac mel. Tsiʼ yʌlʌ chaʼan ñuc i cʼʌjñibal cheʼ mi lac melben oración Jehová, mi lac suben yambʌlob chaʼan bʌ lac pijtaya yicʼot mi lac tempan lac bʌ yicʼot jiñi hermanojob chaʼan mi lac ñuqʼuesʌben lac bʌ lac pusicʼal, «ñumento cheʼ woli laj qʼuel chaʼan woliʼ lʌcʼtiyel jiñi qʼuin». Ti jiñi cojix bʌ capítulo tac chaʼan Apocalipsis, jiñi i yángel Jehová miʼ yʌl: «¡Chʼujutesan Dios!». Chaʼyajlto tsiʼ yʌlʌ, i jiñi miʼ pʌs chaʼan wen ñucʌch i cʼʌjñibal (Apoc. 19:10; 22:9). Mach lac ñajʌtesan jiñi tsaʼ tac bʌ laj cʌñʌ chaʼan jiñi chʼujul bʌ i templo Jehová yicʼot chaʼan jumpʼejlʌch ñuc bʌ lac majtan cheʼ mi lac chʼujutesan.