ESTUDIO 43
CʼAY 90 Laʼ lac ñuqʼuesʌben lac bʌ lac pusicʼal
¿Chuqui miʼ mejlel lac mel mi tsaʼ tili ti lac jol muʼ bʌ i yʌqʼueñonla lac chʼijyemlel?
«Wen qʼuelela mi i sujmʌch pejtelel chuqui an» (1 TES. 5:21).
TEMA
Chuqui miʼ mejlel lac mel mi tsaʼ tili ti lac jol muʼ bʌ i mejlel i mʌctañonla chaʼan mi lac bej melben i yeʼtel Jehová.
1, 2. a) ¿Chuqui miʼ mejlel ti tilel ti lac jol? b) ¿Chuqui mi caj laj qʼuel ti ili estudio?
TI LAC pejtelel tajol mi laj cʼajtiben lac bʌ: ¿Anto ba chuqui miʼ qʼuel Jehová tic tojlel? ¿Weñʌch ba jiñi tsaʼ bʌ c mele? ¿Anto ba j cʼʌjñibal ti Jehová? Jumpʼejl ejemplo, tajol juntiquil xcolel mach yomic i chʼʌmjaʼ come miʼ ñaʼtan chaʼan Jehová maʼañic chuqui miʼ qʼuel tiʼ tojlel. O tajol juntiquil hermano tsiʼ teche i melben i yeʼtel (troñel) Jehová cheʼ xcolelto, pero wʌleʼli añix i familia i wocol miʼ yubin chaʼan miʼ mʌcʼlan come maʼañic miʼ wen taj taqʼuin, i tajol miʼ cʼajtiben i bʌ: «¿Weñʌch ba jiñi tsaʼ bʌ c mele?». O laʼcu lac ñaʼtan juntiquil hermano ya ñoxix i mach wen añix i pʼʌtʌlel, jin chaʼan miʼ yubin i chʼijyemlel come mach cheʼix miʼ mejlel i melben i yeʼtel Jehová cheʼ bajcheʼ ti ñaxan.
2 Cheʼ miʼ tilel ti lac jol cheʼ tac bʌ pensar bajcheʼ iliyi miʼ mejlel i cʼuñʼesañonla o miʼ yʌcʼ chaʼan mi laj cʌy lac melben i yeʼtel Jehová. Jin chaʼan, ti ili estudio mi caj laj qʼuel bajcheʼ miʼ coltañonla jiñi Biblia mi tsaʼ lac ñaʼta chaʼan maʼañix chuqui miʼ qʼuel Jehová ti lac tojlel, chaʼan mach weñic tsaʼ bʌ lac ñaʼta lac mel wajali o chaʼan maʼañix laj cʼʌjñibal ti Jehová.
CHUQUI MIʼ MEJLEL I COLTAÑONLA CHEʼ MIʼ TILEL TI LAC JOL MUʼ BɅ I YɅQʼUEÑONLA LAC CHʼIJYEMLEL
3. Cheʼ mi lac ñaʼtan muʼ bʌ i yʌqʼueñonla lac chʼijyemlel, ¿chuqui miʼ mejlel i coltañonla?
3 Jiñi Biblia miʼ mejlel i coltañonla chaʼan mi lac tojʼesan lac ñaʼtʌbal. Cheʼ mi laj qʼuel chuqui miʼ yʌl jiñi i Tʼan Dios miʼ mejlel i coltañonla chaʼan chʌn lʌcʼʌl mi la cajñel ti Jehová i chaʼan xucʼulonla ti lac ñopoñel (1 Cor. 16:13).
4. ¿Bajcheʼ mi lac wen qʼuel miʼ sujmʌch pejtelel chuqui mi lac ñaʼtan? (1 Tesalonicenses 5:21).
4 (Pejcan 1 Tesalonicenses 5:21). Jiñi Biblia miʼ subeñonla: «Wen qʼuelela mi i sujmʌch pejtelel chuqui an». ¿Bajcheʼ miʼ mejlel lac wen qʼuel miʼ sujmʌch pejtelel chuqui mi lac ñaʼtan? Jiñʌch cheʼ mi lac lajeʼ jiñi muʼ bʌ lac ñaʼtan yicʼot muʼ bʌ i yʌl jiñi Biblia. Laʼcu lac ñaʼtan jiñi xcolel muʼ bʌ i cʼajtiben i bʌ mi añixto chuqui miʼ qʼueleʼ Jehová tiʼ tojlel. ¿Cheʼ jach ba yom miʼ cʌytʌl? Maʼañic, yom miʼ pejcan jiñi Biblia chaʼan miʼ wen qʼuel chuqui miʼ ñaʼtan Jehová tiʼ tojlel.
5. ¿Bajcheʼ miʼ mejlel lac «ñʌchʼtan» yom bʌ i subeñonla Jehová?
5 Cheʼ mi lac pejcan jiñi Biblia lajal bajcheʼ woli lac chaʼlen tʼan yicʼot Jehová. Pero chaʼan mi lac «ñʌchʼtan» chuqui yom i subeñonla chaʼan jiñi woli bʌ lac ñaʼtan añʌch chuqui yambʌ yom mi lac mel. Yom mi lac sʌclan texto tac muʼ bʌ i taj i bʌ yicʼot jiñi woli bʌ lac ñaʼtan i yom mi laj cʼʌn jiñi am bʌ i yʌcʼʌ jiñi organización chaʼan mi lac ñumen sʌclan información (Pr. 2:3-6). Cheʼ jaʼel, laʼ laj cʼajtiben Jehová chaʼan miʼ coltañonla lac taj jiñi la com bʌ lac ñaʼtan. I laʼ lac sʌclan principio tac muʼ bʌ mejlel i coltañonla. Yicʼot jaʼel laʼ laj qʼuel relato tac am bʌ ti Biblia chaʼan tsaʼ bʌ i ñaʼtayob bajcheʼ joñonla.
6. ¿Bajcheʼ miʼ coltañonla jiñi tempa bʌ tac?
6 Yambʌ bajcheʼ miʼ mejlel lac «ñʌchʼtan» Jehová jiñʌch cheʼ mi lac chʌn majlel ti tempa bʌ tac. Yaʼi miʼ mejlel ti tsictesʌntel ti jumpʼejl discurso o ti jumpʼejl comentario jiñi la com bʌ lac ñaʼtan (Pr. 27:17). Laʼ laj qʼuel chuqui tac miʼ mejlel ti ñumel ti lac jol, i bajcheʼ miʼ mejlel lac tojʼesan jiñi muʼ bʌ lac ñaʼtan.
«¿ANTO BA CHUQUI MIʼ QʼUEL JEHOVÁ TIC TOJLEL?»
7. ¿Chuqui ti cʼajtiya miʼ mejlel ti tilel ti lac jol?
7 Tajol maʼ wubin chaʼan mach wen añic a cʼʌjñibal i chaʼan maʼañic baʼ ora mi caj a mejlel ti sujtel tiʼ yamigo Dios. Tiʼ caj iliyi an am bʌ i cʼajtibeyob i bʌ mi añixto chuqui miʼ qʼuel Dios tiʼ tojlelob. Tajol cheʼʌch tsiʼ ñaʼta jaʼel jiñi rey David. Jin chaʼan tiʼ sube Jehová: «Winicon lojon, c Yum. ¿Chuqui queʼtel lojon chaʼan maʼ ñaʼtañon lojon? ¿Chuqui i yeʼtel i yalobil winic chaʼan maʼ cʌntan?» (Sal. 144:3). Laʼ laj qʼuel baqui miʼ mejlel lac tajben i jacʼbal iliyi.
8. Cheʼ bajcheʼ miʼ yʌl 1 Samuel 16:6, 7, 10-12, ¿chuqui miʼ qʼuel Jehová?
8 Jiñi Biblia miʼ pʌsbeñonla chaʼan Jehová miʼ chʼʌm ti ñuc jiñi mach bʌ wen ñucobic i cʼʌjñibal yilal tiʼ tojlel yambʌlob. Laʼcu lac ñaʼtan cheʼ bʌ Jehová tsiʼ choco majlel jiñi xʼaltʼan Samuel tiʼ yotot Jesé chaʼan miʼ yajcan jiñi tsijiʼ bʌ rey. Jesé ñaxan tsiʼ pʌyʌ tilel jiñi siete i yalobilob, pero David maʼañic come ijtsʼiñʌl. a I ¿majqui tsiʼ yajca Jehová? ¡Jiñʌch David! ¿Chucoch? Come tsiʼ qʼuele chuqui an tiʼ pusicʼal yicʼot chaʼan mucʼʌch i cʼuxbin (pejcan 1 Samuel 16:6, 7, 10-12).
9. ¿Chucoch miʼ mejlel a ñop chaʼan Jehová mucʼʌch i qʼuelet ti ñuc? (Qʼuele jaʼel jiñi foto).
9 Ñaʼtancu pejtelel am bʌ i mele Jehová ti a tojlel muʼ bʌ i pʌs chaʼan mucʼʌch i qʼuelet ti ñuc. An i yʌqʼueyet wen tac bʌ ticʼojel i cʼʌjñibal bʌ a chaʼan (Sal. 32:8). I chaʼan miʼ mel iliyi yomʌch i cʌñʌyet, ¿mach ba cheʼiqui? (Sal. 139:1). Cheʼ maʼ qʼuel bajcheʼ miʼ coltañet jiñi i ticʼojel tac, ¿mach ba muqʼuic a ñumen ñop chaʼan Jehová mucʼʌch i ñaʼtañet? (1 Cr. 28:9; Hech. 17:26, 27). Cheʼ jaʼel miʼ qʼuel jiñi wen tac bʌ a melbal (chaʼlibal) yic’ot bajcheʼ maʼ chaʼlen wersa a melben i yeʼtel (Jer. 17:10). I yom chaʼan jatet maʼ sujtel tiʼ yamigo (1 Juan 4:19).
«Cheʼ maʼ sajcan lac Yum, mi caj a taj» (1 Cr. 28:9). (Qʼuele jiñi párrafo 9). b
«¿WEÑɅCH BA JIÑI TSAʼ BɅ C MELE?»
10. ¿Chuqui tajol mi laj cʼajtiben lac bʌ cheʼ mi lac ñaʼtan jiñi tsaʼ bʌ laj cʌyʌ?
10 An hermanojob tsaʼ bʌ i cʌyʌyob i lumal, i familia, i yamigo o jumpʼejl eʼtel baqui tajol tsaʼ mejli i ñumen tajob taqʼuin, tsiʼ cʌyʌyob chaʼan miʼ melbeñob i yeʼtel Jehová. Pero cheʼ miʼ qʼuelob chaʼan jiñi i cʌñʌyoʼ bʌ utsʼat chumulob yicʼot chaʼan añob i taqʼuin, tajol miʼ cʼajtibeñob i bʌ: «¿Weñʌch ba jiñi tsaʼ bʌ c mele? ¿Ñumen utsʼat ba chumulon jaʼel cheʼ machic tsaʼ c mele bajcheʼ jiñi?».
11. ¿Chucoch tsiʼ yubi i chʼijyemlel tsaʼ bʌ i tsʼijbu jiñi Salmo 73?
11 ¿Am baʼ ñaʼta jaʼel bajcheʼ jiñi? Cheʼʌch tsaʼ ujti tiʼ tojlel tsaʼ bʌ i tsʼijbu jiñi Salmo 73. Cheʼ bʌ tsiʼ qʼuele chaʼan jiñi maʼañic bʌ miʼ melbeñob i yeʼtel Jehová utsʼat chumulob, mach cʼamobic yilal i cabʌl chuqui añob i chaʼan, tsiʼ cʼajtibe i bʌ mi añixto i cʼʌjñibal cheʼ woliʼ melben i yeʼtel Jehová (Sal. 73:3-5, 12). Tiʼ caj iliyi, chʼijyem jax miʼ ñusan qʼuin. Pero ¿chuqui tsiʼ colta? (Sal. 73:13, 14).
12. Cheʼ bajcheʼ miʼ yʌl Salmo 73:16-18, ¿chuqui tsiʼ colta jiñi salmista chaʼan miʼ tojʼesan i pensar?
12 (Pejcan Salmo 73:16-18). Cheʼ bʌ jiñi salmista tsaʼ ochi yaʼ ti chʼujul bʌ ajñibʌl, tsaʼ mejli i xucʼchocon i pensar. Tsaʼ cʼoti i chʼʌmben i sujm chaʼan jiñi poj wem bʌ chumulob yilal mach weñic chuqui mi caj i yujtel tiʼ tojlelob, i chaʼan jiñi ñumen wem bʌ jiñʌch cheʼ miʼ ñumen melben i yeʼtel Jehová. Jiñi tsiʼ yʌqʼue i pʼʌtʌlel yicʼot i tijicñʌyel chaʼan miʼ bej melben i yeʼtel Jehová (Sal. 73:26-28).
13. ¿Bajcheʼ miʼ mejlel lac chaʼ taj lac tijicñʌyel? (Qʼuele jaʼel jiñi foto tac).
13 Cheʼ bajcheʼ jiñi salmista, joñonla mucʼʌch i mejlel la cubin lac ñʌchʼtʌlel yicʼot lac tijicñʌyel jaʼel, ¿bajcheʼ? Laʼ lac ñaʼtan jiñi bendición tac tajbil bʌ lac chaʼan ili ora. Pero ¿chuqui añob i chaʼan jiñi maʼañic bʌ miʼ melbeñob i yeʼtel Jehová? Cojach am bʌ ila ti pañimil (mulawil), cojachi, maʼañic chuqui yambʌ miʼ pijtañob. Pero joñonla, Jehová miʼ yʌqʼueñonla i tʼan chaʼan ti talto bʌ qʼuin ñumento chuqui mi caj i yʌqʼueñonla (Sal. 145:16). I cheʼ jaʼel, cheʼ yambʌyic chuqui tsaʼ lac ñaʼta lac mel, maʼañic miʼ mejlel lac junyaj al bajcheʼ mero yilal añonla ili ora. Pero mucʼʌch i mejlel la cʌl iliyi: Cheʼ mi lac melben i yeʼtel Jehová chaʼan mi laj cʼuxbin yicʼot chaʼan mi laj cʼuxbin jiñi lac piʼʌlob, miʼ mejlel lac ñop chaʼan utsʼat mi caj la cajñel.
Laʼ lac chʌn cʼajtesan muʼ bʌ caj i mel Jehová ti talto bʌ qʼuin. (Qʼuele jiñi párrafo 13). c
«¿ANTO BA J CʼɅJÑIBAL TI JEHOVÁ?»
14. ¿Chuqui ti wocol tac miʼ ñusañob jiñi hermanojob, i chuqui miʼ cʼajtibeñob i bʌ tiʼ caj jiñi?
14 Tajol an hermanojob o hermanajob muʼ bʌ i yubiñob chaʼan mach wen añobix i cʼʌjñibal ti Jehová come miʼ lon mulañob i ñumen melben i yeʼtel pero maʼañix miʼ mejlelob chaʼan añobix i jabilel o cʼamob. Jin chaʼan, tajol miʼ cʼajtibeñob i bʌ: «¿Anto ba j cʼʌjñibal?».
15. ¿Chuqui tsiʼ ñopo jiñi tsaʼ bʌ i tsʼijbu jiñi Salmo 71?
15 Jiñi tsaʼ bʌ i tsʼijbu jiñi Salmo 71 cheʼʌch tsiʼ yubi i bʌ jaʼel bajcheʼ jiñi, jin chaʼan tiʼ sube Jehová: «Mach a cʌyon cheʼ maʼanix c pʼʌtʌlel» (Sal. 71:9, 18). Pero tsiʼ wen ñopo chaʼan Jehová mi caj i coltan mi maʼañic miʼ cʌy i melben i yeʼtel. I tsaʼ cʼoti i cʌn chaʼan Jehová tijicña miʼ yubin i bʌ cheʼ miʼ qʼuel chaʼan juntiquil woliʼ chaʼlen wersa i melben i yeʼtel anquese wocolʌch (Sal. 37:23-25).
16. ¿Chucoch mi la cʌl chaʼan jiñi hermanojob añobix bʌ i jabilel wen añobʌch i cʼʌjñibal ti Jehová? (Salmo 92:12-15).
16 Mi añix a jabilel i maʼañix chuqui miʼ wen mejlel a mel maʼ wubin, ñopo a qʼuel a bʌ cheʼ bajcheʼ miʼ qʼuelet Jehová. Tiʼ coltaya Jehová cabʌlto chuqui miʼ mejlel a mel (pejcan Salmo 92:12-15). Jin chaʼan, ñaʼtan chuqui muʼto bʌ mejlel a mel, i mach jiñic jiñi maʼañix bʌ. Maʼ mejlel a coltan yañoʼ bʌ cheʼ maʼ wʌcʼ wem bʌ ejemplo yicʼot maʼ chʼʌmob ti ñuc, maʼ mejlel a subeñob bajcheʼ an i coltayet Jehová i chuqui jiñi wen a womix bʌ a qʼuel chaʼan miʼ tsʼʌctiyel. I cʼajtesan jaʼel chaʼan jiñi oración muʼ bʌ a mel tiʼ tojlel yañoʼ bʌ wen ñuc i cʼʌjñibal (1 Ped. 3:12). Jin chaʼan mach yʌlʌyic bajcheʼ yilal añonla, ti lac pejtelel añʌch chuqui miʼ mejlel lac mel tiʼ tojlel Jehová yicʼot tiʼ tojlel yañoʼ bʌ.
17. ¿Chucoch yom mi lac chaʼlen wersa chaʼan maʼañic mi lac lajeʼ lac bʌ la quicʼot yambʌlob?
17 Mi an qʼuiñil maʼ wubin a chʼijyemlel come maʼ ñaʼtan chaʼan maʼañix miʼ mejlel a wen melben i yeʼtel Jehová bajcheʼ a wom, chʌn cʼajtesan chaʼan Jehová miʼ qʼuel ti ñuc muʼ bʌ a chaʼlen wersa a mel. Cheʼ jaʼel, chaʼlen wersa chaʼan maʼañic maʼ lajeʼ a bʌ a wicʼot yambʌlob, ¿chucoch? Jehová maʼañic miʼ lajet yicʼot yambʌ (Gál. 6:4). Laʼ lac ñaʼtan bajcheʼ yilal tsiʼ qʼuele Jesús chaʼtiquil xʼixicob wajali. Juntiquil jiñʌch María, tsaʼ bʌ i mulbe i yoc Jesús ti xojocña bʌ aceite wen lets bʌ i tojol (Juan 12:3-5). Jiñi yambʌ jiñʌch jiñi mebaʼ xʼixic tsaʼ bʌ i yotsa chaʼpʼejl alʌ taqʼuin mach bʌ wen ñuquic i cʼʌjñibal yilal yaʼ ti caja tac am bʌ yaʼ ti Templo (Luc. 21:1-4). ¿Tsaʼ ba i laja Jesús ili chaʼtiquilob? Maʼañic, tsiʼ wen qʼuele ti ñuc cheʼ tsiʼ pʌsʌyob i ñopoñel. Jehová miʼ wen qʼuel ti ñuc jaʼel jiñi muʼ bʌ a mel, anquese maʼ ñaʼtan chaʼan mach ya wen ñuquix i cʼʌjñibal.
18. Cheʼ miʼ tilel ti lac jol muʼ bʌ mejlel i yʌqʼueñonla lac chʼijyemlel, ¿chuqui miʼ mejlel i coltañonla? (Qʼuele jaʼel jiñi recuadro « Jiñi Biblia miʼ mejlel i coltañet»).
18 Ti lac pejtelel miʼ mejlel ti tilel ti lac jol muʼ bʌ i yʌqʼueñonla lac chʼijyemlel, pero jiñi Biblia miʼ coltañonla chaʼan mi lac tojʼesan jiñi lac ñaʼtʌbal yicʼot chaʼan mi lac chaʼ taj lac tijicñʌyel. Jehová añʌch chuqui wem bʌ miʼ qʼuel ti lac tojlel, miʼ wen qʼuel ti ñuc muʼ bʌ lac mel i mi caj i yʌqʼueñonla i bendición. Jin chaʼan, chʌn cʼajtesan iliyi: Jehová miʼ cʼuxbiñonla ti jujuntiquilonla yicʼot miʼ cʌntañonla.
CʼAY 111 Muʼ bʌ i yʌqʼueñonla lac tijicñʌyel
a Jiñi Biblia maʼañic miʼ yʌl jaypʼejl i jabilel David cheʼ bʌ Jehová tsiʼ yajca, tajol xcolel jaxto (qʼuele jiñi La Atalaya 1 de septiembre, 2011, página 29, párrafo 2).
