1. ¿Bajcheʼ yubil miʼ yubin i bʌ Jehová tiʼ tojlel i wiñicob?

 JEHOVÁ miʼ qʼuel chuqui mi lac ñusan ti jujumpʼejl qʼuin. Miʼ qʼuel cheʼ bʌ tijicñayonla o cheʼ bʌ chʼijyemonla (Sal. 37:18). Cheʼ bʌ mi lac chaʼlen wersa lac melben i yeʼtel (troñel) anquese an lac wocol, tijicña miʼ yubin i bʌ. Pero cheʼ jaʼel yom i coltañonla yicʼot i ñuqʼuesan lac pusicʼal.

2. Cheʼ juntiquil wen chʼijyem i pusicʼal, ¿chuqui miʼ mel Jehová, i chuqui yom miʼ mel jaʼel jiñi chʼijyem bʌ i pusicʼal?

² Salmo 147:3 miʼ pʌsbeñonla chaʼan cheʼ bʌ juntiquil wen chʼijyem i pusicʼal, Jehová miʼ lajmesʌben jiñi i chʼijyemlel, lajal bajcheʼ juntiquil wem bʌ doctor miʼ tsʼʌcan lac lojweñal. Pero chaʼan wen miʼ lajmel jiñi lac lojweñal yomʌch mi lac jacʼ muʼ bʌ i yʌl jiñi doctor. Ili yom i yʌl chaʼan añʌch chuqui yom mi lac mel jaʼel chaʼan Jehová miʼ mejlel i coltañonla, i jiñʌch muʼ bʌ caj laj qʼuel ti ili estudio. Mi caj laj qʼuel chuqui miʼ yʌl Jehová yaʼ ti Biblia chaʼan miʼ lajmesan jiñi i lojwenlel lac pusicʼal i chuqui yom mi lac mel chaʼan mi lac jacʼ jiñi muʼ bʌ i subeñonla.

 JEHOVÁ MIʼ WEN QʼUELONLA TI ÑUC

3. ¿Chucoch an maʼañic bʌ i cʼʌjñibal miʼ yubiñob i bʌ?

³ Ili ora, cabʌl lac piʼʌlob maʼañix miʼ cʼuxbiñob yambʌlob, jin chaʼan mach i wentajobic, miʼ ticʼlañob o maʼañix i cʼʌjñibal miʼ qʼuelob. Jiñʌch tsaʼ bʌ ujti tiʼ tojlel Helen. a Jiñi i papá wen jontol (simaron), ti jujumpʼejl qʼuin miʼ suben chaʼan maʼañic i cʼʌjñibal. ¿Am ba a ñusa jaʼel bajcheʼ jiñi i maʼañic a cʼʌjñibal maʼ wubin a bʌ? Tajol jin chaʼan wocol maʼ wubin chaʼan añʌxto majqui miʼ cʼuxbiñet.

4. ¿Chuqui miʼ subeñonla Salmo 34:18?

⁴ Mi an i yʌqʼueyetob a wubin chaʼan maʼañic a cʼʌjñibal, miʼ mejlel a ñop chaʼan Jehová mucʼʌch i cʼuxbiñet i miʼ wen qʼuelet ti ñuc. Jiñi Biblia miʼ yʌl: «Lʌcʼʌl an lac Yum baʼan chʼijiyemoʼ bʌ i pusicʼal» (pejcan Salmo 34:18). Jin chaʼan mi jatet wen chʼijyem maʼ wubin a bʌ, cʼajtesan chaʼan Jehová tsiʼ pʌyʌyet tilel tiʼ yorganización, an chuqui wem bʌ tsiʼ qʼuele ti a tojlel (Juan 6:44). Maʼañic baʼ ora mi caj i cʌyet, mi caj i yajñel yicʼotet chaʼan miʼ coltañet.

5. ¿Chuqui mi laj cʌn tiʼ tojlel Jehová cheʼ bajcheʼ yilal tsiʼ qʼuele Jesús jiñi lac piʼʌlob ticʼlʌbiloʼ bʌ?

⁵ Jesús tsiʼ pʌsʌ bajcheʼ yilal miʼ qʼuelonla Jehová. Cheʼ bʌ tsajñi ti Pañimil tsiʼ qʼuele chaʼan cabʌl lac piʼʌlob miʼ ticʼlʌntelob yicʼot maʼañic i cʼʌjñibal miʼ qʼuejlelob, i tsiʼ pʼuntayob (Mat. 9:​9-12). Ti jumpʼejl bʌ qʼuin juntiquil xʼixic wen wocol bʌ woli (choncol) i ñusan tiʼ caj jumpʼejl cʼamʌjel, tsaʼ tili baʼan Jesús i tsiʼ tʌlbe i bujc, ¿chuqui tsiʼ mele Jesús? ¿Tsaʼ ba i yʌʼle? Maʼañic. Tiʼ sube chaʼan weñʌch chuqui tsiʼ mele come tsiʼ ñopo chaʼan mucʼʌch i mejlel ti tsʼʌcʌntel (Mar. 5:​25-34). Cheʼ bajcheʼ ili tsiʼ pʌsbeyonla bajcheʼ yilal jiñi i Tat: Chaʼan miʼ cʼuxbiñonla yicʼot miʼ wen qʼuel ti ñuc cheʼ mi laj cʼuxbin i mi lac ñop tiʼ tojlel (Juan 14:9).

6. ¿Chuqui miʼ mejlel lac mel mi maʼañic laj cʼʌjñibal mi la cubin?

 ⁶ ¿Chuqui miʼ mejlel a mel mi maʼañic a cʼʌjñibal maʼ bej ubin a bʌ? Pejcan texto tac yaʼ ti Biblia muʼ bʌ i coltañet a ñaʼtan chaʼan Jehová mucʼʌch i qʼuelet ti ñuc (Sal. 94:19). b Cheʼ jaʼel, cʼajtesan chaʼan Jehová miʼ chʼʌmbeñonla i sujm i yujil baqui jaxʌl miʼ mejlel lac mel. Jin chaʼan, mi maʼañic maʼ taj jumpʼejl meta o mach lajalic miʼ mejlel a mel bajcheʼ jiñi yambʌyob, mach a wubin a chʼijyemlel (Sal. 103:​13, 14). Cheʼ jaʼel, mach a ñaʼtan chaʼan a mul cheʼ tsaʼ ticʼlʌntiyet o tsaʼ melbentiyet mach bʌ weñic, Jehová mi caj i chaʼlen meloñel tiʼ tojlel jiñi muʼ bʌ i melob (chaʼleñob) mach bʌ weñic, mach jiñic tiʼ tojlel jiñi muʼ bʌ i ticʼlʌntelob (1 Ped. 3:12). Laʼcu lac ñaʼtan tiʼ tojlel Sandra, cʼʌlʌl cheʼ alʌto jiñi i papá i mamá tsiʼ wen ticʼlayob, miʼ yʌl chuqui tsiʼ colta: «Tsaʼ c wen cʼajtibe Jehová chaʼan miʼ coltañon j qʼuel chuqui miʼ qʼuel tic tojlel».

7. ¿Bajcheʼ miʼ mejlel laj cʼʌn jiñi ñusʌbil bʌ lac chaʼan ti wajali chaʼan mi laj coltan yañoʼ bʌ?

⁷ Jehová miʼ cʼʌñonla chaʼan mi laj coltan yañoʼ bʌ. ¿Bajcheʼ? Jiñʌch cheʼ mi lac chaʼlen subtʼan (1 Cor. 3:9). Jiñi tsaʼ bʌ lac ñusa ti wajali miʼ mejlel i coltañonla chaʼan mi lac ñumen chʼʌmben i sujm jiñi lac piʼʌlob. Jiñʌch tsaʼ bʌ i mele Helen tsaʼ bʌ lac taja ti tʼan ti párrafo 3, cheʼ bʌ tsaʼ coltʌnti chajpʌbil tsiʼ yubi chaʼan miʼ coltan yañoʼ bʌ. I miʼ yʌl: «Ti ñaxan, maʼan j cʼʌjñibal ti cubi, pero wʌle mij qʼuel chaʼan Jehová miʼ wen cʼuxbiñon i miʼ qʼuelon ti ñuc». Ili ora Helen an bajcheʼ precursora i wen tijicña miʼ yubin i bʌ.

ÑOPO CHAʼAN JEHOVÁ MIʼ ÑUSAN A MUL

8. ¿Chuqui miʼ subeñonla Jehová ti Isaías 1:18?

⁸ Tajol an muʼ bʌ i yubiñob chaʼan bej añobto i mul tiʼ caj chaʼan tsaʼ bʌ i meleyob cheʼ bʌ maxto i cʌñʌyobic Jehová o cheʼ bʌ chʼʌmʌlobix i chaʼan jaʼ. Mi cheʼ maʼ wubin a bʌ bajcheʼ jiñi, cʼajtesan chaʼan Jehová tsiʼ yʌcʼʌ i cuxtʌlel i Yalobil come miʼ wen cʼuxbiñonla. Jin chaʼan miʼ mejlel lac ñop chaʼan mucʼʌch i ñusan lac mul. I miʼ subeñonla: «Laʼcula, laʼ lac tem chaʼlen tʼan». c Ili miʼ yʌqʼueñonla lac ñaʼtan chaʼan cheʼ bʌ mi lac tojʼesan jiñi lac wocol la quicʼot Jehová miʼ junyajl ñusan lac mul (pejcan Isaías 1:18). Wen tijicña mi la cubin cheʼ Jehová miʼ ñajʌtesan jiñi lac mul, pero maʼañic miʼ ñajʌyel i chaʼan jiñi wen tac bʌ tsaʼ lac mele (Sal. 103:​9, 12; Heb. 6:10).

9. Mi muʼto lac bej ubin lac chʼijyemlel chaʼan tsaʼ bʌ lac mele, ¿chuqui miʼ mejlel i coltañonla?

⁹ Mi muʼto lac bej ubin lac chʼijyemlel chaʼan tsaʼ bʌ lac mele. ¿Chuqui miʼ mejlel i coltañonla? Mach lac chʌn ñaʼtan jiñi tsaʼix bʌ lac mele, laʼ lac ñaʼtan jiñi muʼ bʌ mejlel lac mel ili ora yicʼot muʼ bʌ mejlel lac bej mel. Laʼ lac ñaʼtan tiʼ tojlel jiñi apóstol Pablo. Cheʼ bʌ miʼ ñaʼtan bajcheʼ tsiʼ ticʼla jiñi xñoptʼañob ti wajali miʼ wen aqʼuen i chʼijyemlel, anquese yujil chaʼan Jehová tsaʼix i ñusʌbe (1 Tim. 1:​12-15). Pero ¿jimba tsaʼ caji i bej cʼajtesan jiñi tsaʼ bʌ i mele wajali? Maʼañic. Lajal bajcheʼ maʼañic tsiʼ chʌn ñaʼta jaʼel pejtelel jiñi tsaʼ bʌ i cʌyʌ (Filip. 3:​4-8, 13-15). ¿Chuqui tsiʼ mele? Tsaʼ ñumen caji ti subtʼan yicʼot tsaʼ caji i ñaʼtan chuqui muʼto bʌ mejlel i bej mel. Jiñʌch yom bʌ mi lac mel jaʼel. Tajol maʼañix mi caj i mejlel laj qʼuextan o lac tojʼesan jiñi tsaʼix bʌ lac mele, pero miʼ mejlel lac ñaʼtan chuqui muʼto bʌ mejlel lac mel ili ora chaʼan mi lac tijicñesan Jehová, i cheʼ jaʼel miʼ mejlel lac ñaʼtan pejtelel muʼ bʌ caj i mel Jehová ti talto bʌ qʼuin.

10. ¿Chuqui miʼ mejlel lac mel mi an majqui tsaʼ la cʌqʼue i yubin i chʼijyemlel?

 ¹⁰ Ixcu mi mach tijicñayic maʼ wubin a bʌ come a wujil chaʼan an chuqui tsaʼ mele tiʼ tojlel juntiquil. ¿Chuqui miʼ mejlel a mel? Cʼajtiben chaʼan laʼ i ñusʌbeñet a mul i tojʼesan jiñi a wocol a wicʼot (2 Cor. 7:11). Cheʼ jaʼel, cʼajtiben Jehová chaʼan laʼ i coltan jiñi tsaʼ bʌ a lowo. Jehová miʼ mejlel i coltañet chaʼan maʼ chaʼ ubin a tijicñʌyel i miʼ mejlel i coltan jaʼel jiñi tsaʼ bʌ a wʌqʼue i chʼijyemlel.

11. ¿Chuqui mi laj cʌn tiʼ tojlel Jonás? (Qʼuele jaʼel jiñi dibujo).

¹¹ Ñaʼtan chuqui miʼ mejlel a cʌn ti jiñi tsaʼ bʌ a mele i acʼʌ chaʼan Jehová miʼ bej cʼʌñet. Jiñʌch tsaʼ bʌ i mele Jonás. Ti ñaxan Jehová tiʼ sube chaʼan miʼ majlel ti Nínive, pero Jonás tsiʼ xoyo i bijlel. ¿Chuqui tsiʼ mele Jehová? ¿Tsaʼ ba i cʌyʌ i cʼʌn? Maʼañic. Jehová tsiʼ tiqʼui i Jonás tsiʼ cʌñʌ (Jon. 1:​1-4, 15-17; 2:​7-10). I cheʼ bʌ Jehová tsiʼ chaʼ sube chaʼan miʼ majlel ti Nínive ti ora tsiʼ jacʼʌ. Anquese tsaʼʌch i yubi i chʼijyemlel chaʼan jiñi tsaʼ bʌ i mele, mach jiñic tsiʼ mʌcta chaʼan miʼ mel jiñi tsaʼ bʌ i chaʼ sube Jehová (Jon. 3:​1-3).

JEHOVÁ MIʼ CʼɅN I YESPÍRITU CHAʼAN MIʼ TIJICÑESAN LAC PUSICʼAL

12. ¿Chuqui miʼ cʼʌn Jehová chaʼan miʼ tijicñesan lac pusicʼal cheʼ woli lac ñusan jumpʼejl tsʌts bʌ wocol? (Filipenses 4:​6, 7).

¹² Cheʼ bʌ mi lac ñusan jumpʼejl tsʌts bʌ wocol, Jehová miʼ mejlel i cʼʌn i yespíritu chaʼan miʼ tijicñesan lac pusicʼal. Jiñʌch tsaʼ bʌ i qʼuele Ron yicʼot Carol, tsaʼ bʌ i tsʌnsa i bʌ juntiquil i yalobil. ¿Bajcheʼ yubil tsiʼ yubiyob i bʌ? Miʼ yʌlob: «An c ñusa lojon cabʌl wocol, pero iliyi jiñʌch jiñi ñumen tsʌts bʌ. An qʼuiñil maʼañix mic mejlel lojon ti wʌyel, i cheʼ bʌ mi lon j cujtel bajcheʼ iliyi mic pejcan lon Jehová ti oración i yaʼi mi cubin lojon jiñi ñʌchʼtʌlel muʼ bʌ i taj ti tʼan Filipenses 4:​6, 7» (pejcan). Mi jatet woli (yʌquel) a ñusan jumpʼejl tsʌts bʌ wocol i wen chʼijyem maʼ wubin a bʌ, pejcan Jehová jiñʌch jaysujtel i cʼʌjñibal a chaʼan maʼ wubin yicʼot jiñʌch bajcheʼ jalel a wom a mel (Sal. 86:3; 88:1). Miʼ mejlel a ñop chaʼan mi caj i ñʌchʼtañet i mi caj i cʼʌn i yespíritu chaʼan miʼ yʌqʼueñet a chaʼ ubin a tijicñʌyel yicʼot a ñʌchʼtʌlel (Luc. 11:​9-13).

13. ¿Bajcheʼ miʼ coltañonla jiñi espíritu chaʼan mi lac bej melben i yeʼtel Jehová? (Efesios 3:16).

¹³ An i tajol maʼañix lac pʼʌtʌlel mi la cubin tiʼ caj jiñi wocol woli bʌ lac ñusan, pero Jehová miʼ mejlel i cʼʌn i yespíritu chaʼan miʼ yʌqʼueñonla lac pʼʌtʌlel chaʼan mi lac bej melben i yeʼtel (pejcan Efesios 3:16). Jiñʌch tsaʼ bʌ ujti tiʼ tojlel Flora, tsiʼ qʼuele bajcheʼ tsiʼ pʼʌtʼesa Jehová cheʼ bʌ wen wocol woliʼ ñusan. Ti ñaxan, Flora misionera yicʼot i ñoxiʼal, pero jiñi i ñoxiʼal tsiʼ yotsa i bʌ yicʼot juntiquil xʼixic i tsiʼ chaʼleyob i bʌ ti divorciar. Wen wocol tsiʼ ñusa, miʼ yʌl: «Jiñi tsaʼ bʌ ujti tsiʼ wen ticʼlayon, mach tijicñayix mic ñusan jujumpʼejl qʼuin. Jin chaʼan, tsaʼ j cʼajtibe Jehová chaʼan miʼ yʌqʼueñon c pʼʌtʌlel chaʼan mic bej chaʼlen wersa». I Jehová tsiʼ colta chaʼan miʼ chaʼ ubin i tijicñʌyel yicʼot chaʼan miʼ mejlel i ñusan majlel jiñi wocol. Cheʼ bʌ tsiʼ qʼuele bajcheʼ tsiʼ colta Jehová tsiʼ ñumen ñopo tiʼ tojlel i yujil chaʼan Jehová miʼ mejlel i coltan ti baqui jach bʌ wocol. Flora miʼ yʌl chaʼan tsaʼʌch tsʼʌctiyi tiʼ tojlel muʼ bʌ i yʌl Salmo 119:​32, come an i qʼuele bajcheʼ miʼ coltan Jehová chaʼan miʼ bej chaʼlen wersa i melben i yeʼtel.

14. ¿Chuqui yom mi lac mel chaʼan mi lac taj jiñi espíritu?

¹⁴ Cheʼ tsaʼix laj cʼajtibe Jehová chaʼan miʼ yʌqʼueñonla i yespíritu añʌch chuqui yom mi lac mel chaʼan mi lac taj, mach cheʼ jach yom mi lac pijtan. ¿Chuqui yom mi lac mel? Yom mi lac majlel ti tempa bʌ yicʼot mi lac loqʼuel ti subtʼan, i yom mi lac pejcan lac Biblia ti  jujumpʼejl qʼuin chaʼan mi lac bej cʌn majlel chuqui miʼ ñaʼtan Jehová (Filip. 4:​8, 9). I cheʼ bʌ mi lac pejcan jiñi Biblia, laʼ lac ñaʼtan bajcheʼ tsiʼ colta Jehová jiñi i wiñicob wajali cheʼ bʌ tsiʼ ñusayob wocol. Jiñʌch tsaʼ bʌ i mele Sandra, tsaʼ bʌ lac taja ti tʼan yaʼ ti párrafo 6. Miʼ yʌl: «Tsiʼ wen coltayon jiñi ejemplo chaʼan José, anquese tsiʼ ñusa cabʌl wocol yicʼot tsaʼ ticʼlʌnti maʼañic tsiʼ ñajtʼesa i bʌ ti Jehová» (Gn. 39:​21-23).

JEHOVÁ MIʼ CʼɅN JIÑI HERMANOJOB CHAʼAN MIʼ TIJICÑESAN LAC PUSICʼAL

15. ¿Bajcheʼ miʼ mejlel i pʼʌtʼesañonla jiñi hermanojob? (Qʼuele jaʼel jiñi foto).

¹⁵ Jiñi hermanojob miʼ mejlelob i pʼʌtʼesañonla cheʼ bʌ wocol woli lac ñusan (Col. 4:11). ¿Bajcheʼ? Miʼ ñʌchʼtañoñobla yicʼot yaʼ miʼ yajñelob yicʼotonla. Miʼ pejcabeñoñobla jumpʼejl texto o miʼ chaʼleñob oración yicʼotonla, miʼ mejlelob i cʼajtesʌbeñonla bajcheʼ yilal miʼ qʼuel Jehová jiñi lac wocol (Rom. 15:4). d Cabʌl chuqui miʼ melob ti lac tojlel muʼ bʌ i tijicñesan lac pusicʼal. Tiʼ sujm, Jehová miʼ cʼʌn jiñi hermanojob chaʼan miʼ pʌsbeñonla chaʼan miʼ cʼuxbiñonla.

16. ¿Chuqui yom mi lac mel chaʼan mi lac taj laj coltʌntel?

¹⁶ Jiñi hermanojob miʼ cʼuxbiñoñobla i yomob i coltañonla (Pr. 17:17). Pero chaʼan mi lac taj laj coltʌntel yomʌch mi laj cʼajtin come maʼañic mi caj i bajñel ñaʼtañob bajcheʼ yom mi laj coltʌntel (Pr. 14:10). Mi chʼijyem  maʼ wubin a bʌ sʌclan juntiquil a wamigo o hermanojob muʼ bʌ mejlel i coltañetob. Miʼ mejlel a pejcan jiñi ancianojob i subeñob bajcheʼ a wom coltʌntel. Cheʼ jaʼel, an hermanajob muʼ bʌ i mulañob i suben yambʌ hermana bajcheʼ yubil miʼ yubiñob i bʌ.

17. ¿Chuqui miʼ mejlel i mʌctan chaʼan maʼañic mi lac taj jiñi laj coltʌntel?

¹⁷ Chaʼlen wersa chaʼan maʼañic maʼ ñajtʼesan a bʌ tiʼ tojlel jiñi hermanojob. I sujmʌch chaʼan cheʼ chʼijyem mi la cubin lac bʌ maʼañic majqui la com laj qʼuel yubil. Tajol jiñi hermanojob maʼañic miʼ chʼʌmbeñob i sujm bajcheʼ yubil mi la cubin o miʼ yʌlob maʼañic bʌ mi lac wen mulan (Sant. 3:2). Pero mach a ñajtʼesan a bʌ tiʼ tojlel jiñi hermanojob come Jehová miʼ mejlel i cʼʌñob chaʼan miʼ coltañetob. Laʼcu lac ñaʼtan tiʼ tojlel Gavin, juntiquil anciano am bʌ i chaʼan depresión, miʼ yʌl: «Cheʼ bʌ wen chʼijyem mi cubin c bʌ maʼañic majqui com ajñel yicʼot, mi jiñicto yicʼot jiñi camigojob». Pero miʼ chaʼlen wersa chaʼan miʼ yajñel yicʼot jiñi hermanojob, i jiñi miʼ yʌqʼuen i tijicñʌyel. Juntiquil hermana i cʼabaʼ Amy miʼ yʌl: «Wocol mi cubin chaʼan mic ñop tiʼ tojlel jiñi hermanojob tiʼ caj tsaʼ bʌ c ñusa wajali. Pero woli c chaʼlen wersa chaʼan mij cʼuxbiñob yicʼot chaʼan mic ñop tiʼ tojlelob come cheʼʌch miʼ mel Jehová jaʼel. I cheʼ mic mel bajcheʼ jiñi tijicña mi cubin c bʌ i mic tijicñesan Jehová jaʼel».

JIÑI MUʼ BɅ CAJ I MEL JEHOVÁ TI TALTO BɅ QʼUIN MIʼ TIJICÑESAN LAC PUSICʼAL

18. ¿Chuqui mi caj i mel Jehová ti talto bʌ qʼuin, i chuqui yom mi lac mel ili ora?

¹⁸ Tsʼitaʼ jax yom chaʼan Jehová mi caj i lajmesan jiñi i chʼijyemlel lac pusicʼal, i mi caj i jisan pejtelel muʼ bʌ i yʌcʼonla ti wocol (Apoc. 21:​3, 4). Yaʼ ti tsijiʼ bʌ pañimil maʼañix mi caj lac chʌn cʼajtesan jiñi tsaʼ bʌ lac ñusa (Is. 65:17). Ti ili estudio tsaʼ laj qʼuele chaʼan ili ora Jehová miʼ mejlel i lajmesan jiñi lac chʼijyemlel. Cabʌl chuqui tsiʼ yʌcʼʌ chaʼan miʼ coltañonla. Jin chaʼan, qʼuele ti ñuc muʼ bʌ i mel Jehová chaʼan miʼ coltañet. I chʌn cʼajtesan iliyi: Jehová miʼ wen cʼuxbiñet (1 Ped. 5:7).