JIÑI israelitajob miʼ wen qʼuelob ti ñuc jiñi música. Jiñi Biblia miʼ taj ti tʼan tiʼ tojlel lac piʼʌlob yujiloʼ bʌ cʼay, i ñijcʌntel arpa, i wusol flauta o yan tac bʌ. Cheʼ jaʼel, yaʼ ti Biblia mi lac taj cabʌl cʼay tac, bajcheʼ jiñi libro chaʼan Salmos, Cantar de los Cantares yicʼot Lamentaciones. Jumpʼejl libro muʼ bʌ i yʌl bajcheʼ yilal chumulob jiñi lac piʼʌlob ti wajali, miʼ yʌl chaʼan jiñi Biblia miʼ jamʌ pʌs chaʼan jiñi israelitajob miʼ wen mulañob jiñi música.

Jiñi israelitajob miʼ wen mulañob cʼay. Jiñi israelitajob miʼ chaʼleñob cʼay chaʼan miʼ pʌsob bajcheʼ yubil miʼ yubiñob i bʌ (Is. 30:29). Jiñi xʼixicob miʼ chaʼleñob cʼay yicʼotob i tijicñʌyel, miʼ chaʼleñob son yicʼot miʼ ñijcañob jiñi pandereta cheʼ bʌ miʼ waʼchocontel jiñi rey, ti jiñi qʼuiñijel tac yicʼot cheʼ bʌ jiñi soldadojob miʼ mʌlob jiñi guerra (Jue. 11:34; 1 S. 18:​6, 7; 1 R. 1:​39, 40). I cheʼ bʌ an majqui miʼ chʌmel, miʼ chaʼleñob cʼay yicʼotob i chʼijyemlel (2 Cr. 35:25). Yambʌ libro miʼ yʌl chaʼan jiñi israelitajob miʼ wen qʼuelob ti ñuc jiñi música.

Jiñi reyob ti Israel miʼ wen mulañob jiñi música. Jiñi rey Saúl tsiʼ pʌyʌ majlel David yaʼ ti palacio chaʼan miʼ ñijcan jiñi arpa (1 S. 16:​18, 23). I cheʼ bʌ David tsaʼ sujti ti rey tsiʼ mele yan tac bʌ muʼ bʌ i cʼʌjñel chaʼan miʼ ñijcʌntel jiñi música, tiʼ tsʼijbu utsʼatax bʌ cʼay tac yicʼot tsiʼ chajpa chaʼan an muʼ bʌ i chaʼleñob cʼay yaʼ tiʼ templo (2 Cr. 7:6; Amós 6:5). Cheʼ jaʼel, jiñi rey Salomón tsiʼ pʌyʌ majlel yaʼ ti palacio cabʌl xcʼayob (Ec. 2:8).

Jiñi israelitajob miʼ cʼʌñob jiñi música chaʼan miʼ chʼujutesañob Jehová. Yaʼ ti templo am bʌ ti Jerusalén an 4 mil wen yujiloʼ bʌ chaʼan jiñi música, an muʼ bʌ i ñijcañob arpa, trompeta, címbalo yicʼot yan tac bʌ (1 Cr. 23:5; 2 Cr. 5:12). Pero mach jiñobic jach iliyi, come cabʌl israelitajob miʼ cʼʌyiñob jiñi Cʼay chaʼan bʌ letsel cheʼ bʌ woli (choncol) i majlelob ti qʼuiñijel ti Jerusalén (Sal. 120-134). Cheʼ jaʼel, an yambʌ libro tac muʼ bʌ i yʌl chaʼan jiñi israelitajob miʼ cʼʌyiñob jiñi Salmo tac cheʼ bʌ miʼ melob jiñi Pascua.

Ili ora, jiñi i tejclum Dios miʼ wen qʼuel ti ñuc jiñi música (Sant. 5:13). Mi lac chaʼlen cʼay chaʼan mi la cʌqʼuen i ñuclel Jehová (Efes. 5:19). Cheʼ bʌ mi lac chaʼlen cʼay, ñumen lʌcʼʌl mi la cubin lac bʌ tiʼ tojlel jiñi hermanojob yicʼot miʼ coltañonla chaʼan mi lac lʌtʼ jiñi wocol tac (Hech. 16:25; Col. 3:16). Cheʼ jaʼel, miʼ mejlel lac pʌs chaʼan mucʼʌch lac wen ñop Jehová yicʼot chaʼan mucʼʌch lac wen cʼuxbin.