I yochib jiñi templo cheʼ yilal bajcheʼ alʌ boxol bʌ otot i yaʼ yom miʼ ñumelob chaʼan miʼ cʼotelob ti jiñi Chʼujul bʌ ajñibʌl. ¿Pero bajcheʼ chañel? Ti ñaxan, yaʼ ti 2 Crónicas 3:4 ti jiñi Traducción del Nuevo Mundo ti español, miʼ yʌl: «I yochib jiñi templo lajal i tamlel i xujc bajcheʼ jiñi otot: 20 codo i 120 i chanlel». An yambʌ traducción tac muʼ bʌ i yʌl chaʼan i yochib jiñi templo an i chaʼan «120 codo». ¡Ili yom i yʌl chaʼan 53 metro i chanlel!

Pero cheʼ ti 2023 ili versículo tsaʼ qʼuextʌyi. Wʌle muqʼuix i yʌl: «20 codo i chanlel», ili jiñʌch 9 metro. a Laʼ laj qʼuel chucoch tsaʼ qʼuextʌyi.

Ti 1 Reyes maʼañic miʼ yʌl bajcheʼ chañel i yochib jiñi templo. Ti 1 Reyes 6:​3, Jeremías miʼ yʌl jaypʼejl metro i tamlel yicʼot jaypʼejl metro i xujc, pero maʼañic miʼ yʌl jaypʼejl i chanlel. Cheʼ jiñi, ti jiñi yambʌ capítulo miʼ taj ti tʼan chuqui tac yambʌ an yaʼ ti templo, bajcheʼ jiñi colem bʌ i yajñib jaʼ melbil bʌ ti cobre, jiñi yambʌ 10 i yajñib jaʼ yicʼot jiñi chaʼpʼejl i yoyel melbil bʌ ti cobre am bʌ yaʼ ti puerta (1 R. 7:​15-37). Cheʼ ñumeñic ti 50 metro i chanlel i yochib jiñi templo, ñumen chanto bajcheʼ jiñi templo. Mi cheʼ bajcheʼ jiñi, ¿chucoch Jeremías maʼañic tsiʼ taja ti tʼan? Cheʼ jaʼel, an judíojob wen yujiloʼ bʌ chaʼan historia muʼ bʌ i yʌlob chaʼan i yochib jiñi templo mach ñumen chañic bajcheʼ jiñi templo.

Jiñi wen yujiloʼ bʌ bajcheʼ miʼ mejlel colem otot tac maʼañic miʼ ñopob chaʼan i paredlel jiñi templo miʼ mejlel i lʌtʼ ñumen chan bʌ i yochib. Ti wajali, cheʼ bʌ yomob i mel (pʌt) chan bʌ otot, colem miʼ melbeñob i yebal i cheʼ bʌ miʼ chañʼan majlel, chʼoʼchʼoquix miʼ melob, cheʼ bajcheʼ jiñi templo tac ti Egipto. Pero jiñi templo chaʼan Salomón mach cheʼic melbil bajcheʼ jiñi. An wen yujiloʼ bʌ muʼ bʌ i yʌlob chaʼan jiñi pared chaʼan jiñi templo an jach cheʼ bʌ 2.7 metro o 6 codo i pimlel. Theodor Busink juntiquil wen yujil bʌ chaʼan bajcheʼ miʼ mejlel tac jiñi otot tac ti wajali, miʼ yʌl: «Come mach wen pimic jiñi pared, miʼ mejlel la cʌl chaʼan i yochib jiñi templo mach 120 codojic i chanlel».

Tajol mach weñic bajcheʼ tsaʼ chaʼlenti ti copiar muʼ bʌ i yʌl 2 Crónicas 3:4. Anquese an ñoxix tac bʌ tsʼijbujel muʼ bʌ i yʌl «120», an yambʌ tsʼijbujel tac muʼ bʌ i yʌl «20 codo», bajcheʼ jiñi Códice alejandrino añix bʌ ñumen ti 1,500 jab tsaʼ mejli yicʼot jiñi Códice ambrosiano añix bʌ ñumen ti 1,400 jab tsaʼ mejli. Pero ¿chucoch tsaʼ ñajʌyiyob jiñi tsaʼ bʌ i tsʼijbuyob? Come ti hebreo jiñi tʼan cien yicʼot jiñi tʼan codo lʌcʼʌ lajal bajcheʼ yilal. Jin chaʼan, tajol cheʼ bʌ tsaʼ chaʼlenti ti copiar, an majqui tiʼ tsʼijbu 120 i mach 20 codo.

Yomʌch mi lac chaʼlen wersa lac chʼʌmben i sujm bajcheʼ ñoj yilal jiñi templo tsaʼ bʌ i mele Salomón, pero jiñi ñumen ñuc bʌ i cʼʌjñibal jin cheʼ mi lac ñaʼtan chaʼan ili templo i yejtalʌch jiñi chʼujul bʌ i templo Jehová. ¡Wen tijicña mi la cubin cheʼ Jehová tsiʼ pʌyʌyonla ti lac pejtelel chaʼan mi lac chʼujutesan yaʼ tiʼ templo! (Heb. 9:​11-14; Apoc. 3:12; 7:​9-17).