JIÑI c tat c ñaʼ i cʼabaʼ James yicʼot Jessie Sinclair, tsaʼ majliyob ti chumtʌl ti Bronx, cheʼ bʌ ti jabil 1935, ili yaʼ cʌylem ti Nueva York. Tsaʼ cʼoti i cʌñob juntiquil chʼoyol bʌ ti Escocia i cʼabaʼ Willie Sneddon. Cheʼ tsaʼix i jumucʼ cʌñʌyob i bʌ, tsaʼ caji i yʌlob chaʼan i familia. Joñon maxto chʼocʼayon (quila pañimil) cheʼ jiñi.

Jiñi c mamá tiʼ sube Willie chaʼan cheʼ lʌcʼʌlix mi caj i tejchel jiñi Ñuc bʌ Guerra, jiñi i tat yicʼot i yʌscun tsaʼ chʌmiyob (sajtiyob) yaʼ ti mar del Norte. Jiñi barco muʼ bʌ i cʼʌñob ti chuc chʌy tsiʼ taja i jatsʼ jumpʼejl bomba baqui ñumel mucʼ. Willie tsiʼ jacʼʌ: «Añix ti infierno jiñi a tat». * Anquese Willie jiñʌch i testigo Jehová, cheʼʌch tsiʼ jacʼbe c mamá bajcheʼ iliyi chaʼan miʼ cʌn i sujmlel.

Jiñi c mamá maʼañic tsiʼ wen mulaj come yujil chaʼan wem bʌ wiñic jiñi i tat. Cheʼ jiñi, Willie tsiʼ yʌlʌ: «¿Bej tijicñayet ba cheʼ mic subeñet chaʼan Jesús tsajñi ti infierno jaʼel?». Jiñi c mamá tsaʼ cʼajtiyi i chaʼan jumpʼejl cʼay tsaʼ bʌ i cʌñʌ yaʼ tiʼ ñopbal, baqui miʼ yʌl chaʼan Jesús tsajñi ti infierno i tsaʼ chaʼ tejchi loqʼuel tiʼ yuxqʼuiñil. Cheʼ jiñi tsaʼ caji i ñaʼtan chucoch tsajñi Jesús yaʼ baqui miʼ wen ticʼlʌntelob ti cʼajc jiñi jontoloʼ bʌ. Jiñʌch tsaʼ bʌ i ñijcʌbe i pusicʼal c mamá chaʼan miʼ cʌn i sujmlel. Tsaʼ caji ti majlel ti tempa bʌ tac yaʼ ti congregación am bʌ ti Bronx i tsiʼ chaʼle chʼʌmjaʼ ti 1940.

Ti jiñi bʌ ora maxto wen ñuquic miʼ qʼuejlel chaʼan jiñi tatʌlob yom miʼ tem pejcañob Biblia yicʼot i yalobilob. Cheʼ chutonto, c papá miʼ cʌntañon cheʼ miʼ majlel ti tempa bʌ jiñi c mamá yicʼot ti subtʼan ti yujtibal semana. Ti wiʼil, temel ti lon cuxticlel tsaʼ cajiyon lon ti tempa bʌ. Jiñi c mamá miʼ wen chaʼlen subtʼan i cabʌl majqui tsaʼ caji i cʌntesan chaʼan Biblia. Tsaʼ cʼoti i yorajlel cheʼ tsiʼ tempa jiñi muʼ bʌ i cʌntesañob chaʼan juntemel miʼ chaʼleñob estudio come lʌcʼʌl chumulob. Cheʼ bʌ maʼañic jiñi clase, mic majlel quicʼot c mamá ti subtʼan. Cabʌl chuqui tsaʼ j cʌñʌ chaʼan Biblia yicʼot bajcheʼ miʼ mejlel j cʌntesan yambʌlob.

Maʼañic mic mulan cʌl, pero maʼañic tsaʼ c wen chʼʌmʌ ti ñuc i sujmlel cheʼ chutonto. Maʼañic i cʼʌjñibal tsaʼ j qʼuele. Pero cheʼ  añix 12 c jabilel tsaʼ ochiyon bajcheʼ xsubtʼan, i maʼañic cʌybil c chaʼan cʼʌlʌl ili ora. Tsaʼ cʌcʼʌ c bʌ ti Jehová cheʼ añix 16 c jabilel. Cheʼ ti 24 i chaʼan julio, 1954, tsaʼ c chʼʌmʌ jaʼ ti colem tempa bʌ tsaʼ bʌ ujti ti Toronto (Canadá).

Yaʼ tij congregación an hermanojob añoʼ bʌ ti Betel o tsaʼ bʌ i chaʼleyob eʼtel (troñel) yaʼi. Tsaʼ c wen cʌñʌ tiʼ tojlelob. Mic wen mulan bajcheʼ miʼ chaʼleñob cʌntesa ti plataforma yicʼot bajcheʼ miʼ tsictesañob i sujmlel chaʼan Biblia ti subtʼan. Jiñi c maestrojob yomob tsiʼ yʌlʌ chaʼan mic majlel ti universidad, pero joñon tsaʼ c ñaʼta majlel ti Betel. Jin chaʼan, tsaʼ c butʼu jumpʼejl solicitud ti jiñi colem tempa bʌ tsaʼ bʌ ujti ti Toronto. Cheʼ tsaʼ ñumi jumpʼejl jab, tsaʼ c chaʼ butʼu ti jumpʼejl colem tempa bʌ yaʼ ti Estadio i chaʼan Yankees, Nueva York. Cheʼ bʌ 17 c jabilel, ti 19 i chaʼan septiembre, 1955, tsaʼ pʌjyiyon ti Betel am bʌ ti Brooklyn. Tiʼ chaʼpʼejlel qʼuin cheʼ tsaʼ cʼotiyon, tsaʼ majliyon yaʼ baqui miʼ lʌjpʼejl jun tac, ti calle i cʼabaʼ Adams número 117. Yaʼʌch baqui tsaʼ aqʼuentiyon ñaxam bʌ queʼtel. Tsaʼ caji j cʼʌn jumpʼejl máquina muʼ bʌ i chʼuy jun tac, miʼ tempan 32 i yopol jumpʼejl libro chaʼan miʼ ñusan ti yambʌ máquina chaʼan miʼ tsʼistʌl.

Cheʼ añix jumpʼejl uw j cʼotel yaʼ baqui miʼ lʌjpʼel jun tac, tsiʼ chocoyoñob majlel yaʼ ti Oficina chaʼan revista tac come cujil tsʼijb ti máquina. Ti jiñi bʌ ora, an hermanojob yicʼot hermanajob muʼ bʌ i qʼuelob baqui chumulob jiñi tsaʼ jaxto bʌ i techeyob i cʼajtin chaʼan miʼ chocbentelob majlel ili revista tac, i miʼ tsʼijbuñob ochel jiñi dirección ti alʌ lata tac ñʌpʼʌl bʌ muʼ bʌ i majlel yaʼ ti Lac Tsictesʌbentel yicʼot ¡Despertad! Ti wiʼil tsaʼ ñumiyon yaʼ ti Oficina baqui miʼ qʼuejlel jiñi jun tac muʼ bʌ i chojquel majlel ti baqui jach. Jiñi hermano Klaus Jensen tsiʼ cʼajtibeyon mi comʌch j coltan jiñi muʼ bʌ i chʼʌm majlel ti carro jiñi caja tac cʼʌlʌl baqui miʼ letsʌntel ti barco chaʼan miʼ chojquel  majlel ti yan tac bʌ país. Cheʼ jaʼel yom miʼ majlel ti cʌjyel yaʼ ti oficina chaʼan correo jiñi revista tac yom bʌ miʼ majlel ti Estados Unidos. Tiʼ subeyon chaʼan ili eʼtel mi caj i wen coltañon, come wen tiquin bichilon. An jach 57 kilo j calel. Pejtelel jiñi eʼtel, tsiʼ ñumen pʼʌtʼesayon. Isujmʌch tsaʼ bʌ i subeyon jiñi hermano Jensen.

Jiñi Oficina chaʼan revista tac an tiʼ wenta miʼ qʼuel jaʼel bajcheʼ cʼamel revista miʼ cʼajtin jiñi congregación tac. Cheʼʌch tsaʼ mejli j cʌn jiñi yambʌ tʼan tac baqui miʼ chojquel majlel jiñi revista. Maʼañic baʼ c wis ubi jiñi yambʌ tʼan tac, pero miʼ yʌqʼueñon c tijicñʌyel cheʼ mi cubin chaʼan cabʌl tejclum baqui woli (choncol) i chojquel majlel jiñi revista. Ti jiñi bʌ ora, maʼañic tsaʼ c wis ñaʼta chaʼan ti wiʼil mi caj c julaʼtan jiñi tejclum tac.

Ti 1961 tsaʼ chojquiyon majlel yaʼ ti Oficina baqui miʼ qʼuejlel chaʼan taqʼuin, i jiñi hermano Grant Suiter jiñʌch am bʌ tiʼ wenta. Cheʼ ñumeñix chaʼpʼejl uxpʼejl jab, tsaʼ subentiyon chaʼan mic majlel tiʼ yoficina jiñi hermano Nathan Knorr, am bʌ tiʼ wenta jiñi subtʼan ti jiñi bʌ ora. Jiñi hermano Knorr tiʼ subeyon chaʼan juntiquil hermano muʼ bʌ i chaʼlen eʼtel yicʼot, mi caj ti majlel jumpʼejl uw yaʼ ti Cʌntesʌntel tiʼ chaʼan bʌ i Yumʌntel Dios, i chaʼan yaʼix miʼ cajel ti eʼtel yaʼ ti Oficina chaʼan Subtʼan cheʼ bʌ miʼ sujtel. Tiʼ subeyon chaʼan joñon mij cochel tiʼ qʼuexol, i chaʼan quicʼotix Don Adams mic chaʼlen eʼtel. Jiñi hermano Don jiñʌch tsaʼ bʌ i chʼʌmʌ jiñi c solicitud chaʼan bʌ Betel yaʼ ti colem tempa bʌ cheʼ ti 1955. Jiñi hermano Robert Wallen yicʼot Charles Molohan yaʼix woliyob (choncolob) ti eʼtel cheʼ bʌ tsaʼ cʼotiyon. Ti lon c chʌnticlel, ñumen ti 50 jab tsaʼ c tem chaʼle lon eʼtel. Wen utsʼatax tsaʼ cubi cheʼ bʌ tsaʼ c chaʼle eʼtel quicʼot xucʼul bʌ hermanojob yicʼot chʼejloʼ bʌ tiʼ chaʼan bʌ Dios (Sal. 133:1).

Cheʼ ti 1970 tsaʼ aqʼuentiyon tsijiʼ bʌ eʼtel:  Junyajl ti jujumpʼejl jab mic majlel c julaʼtan yambʌ sucursal chaʼpʼejl uxpʼejl semana. Ili julaʼ cʌmbil wajali bajcheʼ visita de zona, chaʼañʌch miʼ pʼʌtʼesʌntel jiñi hermanojob añoʼ bʌ ti Betel yicʼot misionerojob i miʼ qʼuejlel bajcheʼ an jiñi eʼtel yaʼ ti sucursal. Tsaʼ mejli j cʌn cabʌl hermanojob tsajñoʼ bʌ yaʼ ti ñaxam bʌ cʌntesʌntel i chaʼan Galaad yicʼot tsaʼ i bej melbeyob i yeʼtel Jehová ti yambʌ país. Cʼʌlʌl tsaʼ caji c mel ili eʼtel, añix 90 país julaʼtʌbil c chaʼan. Wen tijicña mi cubin tiʼ melol ili eʼtel.

Come jiñi añon bʌ lon ti Betel mic chojquel lon majlel ti congregación tac am bʌ tiʼ tʼejl jiñi Nueva York, tsaʼ chojquiyon majlel ti Bronx. Jiñi congregación yaʼ ti Bronx tsaʼ tʼoxle come wen colemix. Jiñi ñaxañʌch bʌ congregación i cajel, tsaʼ cʌyle i cʼabaʼ bajcheʼ Congregación Upper Bronx, i yaʼʌch baqui tsaʼ cʼotiyon.

Cheʼ tiʼ yojlil majlel jiñi 1960, an jumpʼejl familia chʼoyol bʌ ti Letonia tsaʼ bʌ i cʌñʌyob i chaʼan bʌ Biblia tiʼ junwejlel jiñi Bronx, tsaʼ cʼotiyob ti chumtʌl yaʼ baʼ añon lojon. Jiñi chichʌl bʌ i yixicʼalob (yixicpʼeñalob) i cʼabaʼ Livija, tsaʼ ochi ti precursora cheʼ bʌ tsaʼ loqʼui ti escuela. Cheʼ ñumeñix chaʼpʼejl uxpʼejl uw, tsaʼ majli ti coltaya baqui ñumen yom to xsubtʼañob ti jumpʼejl tejclum ti Massachusetts. Mic chʌcʌ tsʼijbuben majlel chaʼan mic suben bajcheʼ an jiñi congregación, i miʼ subeñon jaʼel bajcheʼ yilal i majlel tiʼ subtʼan yaʼ ti Boston.

Maʼañic tsaʼ ñumi cabʌl jabil, Livija tsaʼ waʼchoconti bajcheʼ precursora especial. Pero tsiʼ butʼu jaʼel jumpʼejl solicitud chaʼan miʼ majlel ti Betel come tsiʼ mulaj i melben i yeʼtel Jehová jiñʌch bajcheʼ cʼamel miʼ mejlel, i tsaʼ pʌjyi ti Betel cheʼ ti 1971. Tsaʼ cʼoti c ñaʼtan chaʼan an chuqui woliʼ subeñon Jehová. Tsaʼ ñujpuñiyon lon ti 27 i chaʼan octubre, 1973, i jiñi hermano Knorr jiñʌch tsaʼ bʌ i ñusa jiñi discurso. Proverbios 18:22 miʼ yʌl: «Jini muʼ bʌ i pʌy i yijñam miʼ taj i tijicñʌyel. Miʼ tajben i yutslel lac Yum». Isujmʌch iliyi. Jehová an i yʌqʼueyon lon bendición come añix 40 jab añon lon ti Betel. Cheʼ jaʼel, yaʼʌch bej añon lon ti jiñi congregación am bʌ ti Bronx.

Wen utsʼatax tsaʼ cubi cheʼ tsaʼ c chaʼle eʼtel yicʼot jiñi hermano Knorr. Wen chʼejl tiʼ yeʼtel come miʼ qʼuel ti ñuc jiñi i sujmlel yicʼot jiñi misionerojob. Cabʌl misionerojob jiñobʌch ñaxam bʌ Testigojob ti jiñi país baqui tsaʼ chojquiyob majlel. Jiñi hermano Knorr tsiʼ taja cáncer cheʼ ti 1976, tsiʼ wen aqʼueyon c chʼijiyemlel cheʼ bʌ woliʼ ñusan ili wocol. Ti jumpʼejl bʌ qʼuin cheʼ bʌ ñolol tiʼ wʌyib, tiʼ subeyon c pejcʌben jiñi tsijib temaj tac muʼto bʌ caj i chaʼlentel ti imprimir. Tiʼ subeyon chaʼan mic pʌy jiñi hermano Frederick Franz chaʼan miʼ ñʌchʼtan jaʼel. Wiʼil to tsaʼ cʼoti c ñaʼtan chaʼan jiñi hermano Franz maʼañic miʼ wen cʼotel i wut, i jiñʌch jiñi hermano Knorr muʼ bʌ i pejcʌben tsijib temaj tac.

Jiñi hermano Knorr tsaʼ chʌmi ti 1977, pero  tsaʼ c taja lon c tijicñʌyel cheʼ tsaʼ j qʼuele lon chaʼan wen tsiʼ mele i yeʼtel cheʼ wʌʼto an ti pañimil (mulawil) (Ap. 2:10). Tsaʼ bʌ cʌyle tiʼ wenta jiñi eʼtel chaʼan subtʼan jiñʌch jiñi hermano Franz.

Ti jimbʌ ora, mij coltan jiñi hermano Milton Henschel bajcheʼ secretario, ili hermano cabʌl jab tsiʼ chaʼle eʼtel yicʼot jiñi hermano Knorr. Tiʼ subeyon chaʼan jiñi queʼtel muʼ bʌ i cajel jiñʌch mij coltan jiñi hermano Franz tiʼ pejtelel chuqui yom. Ti bele ora mic pejcʌben jiñi tsijib temaj tac muʼto bʌ i caj i chaʼlentel ti imprimir. Wen chʼejl i ñaʼtʌbal, i maʼañic chuqui miʼ mejlel i mʌyben i jol ti jiñi woli bʌ i pejcʌbentel. Utsʼatax tsaʼ cubi cheʼ tsaʼ c chaʼle eʼtel tiʼ tʼejl cʼʌlʌl cheʼ tsaʼ chʌmi ti diciembre i chaʼan 1992.

Jiñi c tat c ña chʌn xucʼul tsiʼ melbeyob i yeʼtel Jehová jaʼel cʼʌlʌl tsaʼ chʌmiyob, wen comix c chaʼ qʼuelob yaʼ ti tsijiʼ bʌ pañimil (Jn. 5:28, 29). Añix 61 jab yaʼañon ti Betel, i mach jalic tsaʼ ñumi mi cubin. Pejtelel chuqui an ila ti pañimil, maʼañic miʼ mejlel ti lajintel bajcheʼ jiñi ñumen ñuc bʌ lac majtan chaʼan mi laj coltan la quermañojob tiʼ pejtelel pañimil. Joñon yicʼot Livija miʼ mejlel lon cʌl chaʼan jiñi tijicñʌyel chʼoyol bʌ ti Jehová an i yʌqʼueyon lon c pʼʌtʌlel chaʼan mic melben lon i yeʼtel tiʼ pejtelel jiñi jabil ñumen bʌ (Neh. 8:10).

Jiñi eʼtel chaʼan subtʼan maʼañic mi caj i waʼtʌl anquese an chuqui miʼ yujtel, maʼañic majqui ñoj i cʼʌjñibal wʌʼ tiʼ yorganización Jehová. Wen tijicña mi cubin cheʼ tsaʼ mejliyon ti eʼtel yicʼot hermanojob yicʼot hermanajob xucʼuloʼ bʌ. Cabʌl tsaʼ bʌ c chaʼle eʼtel quicʼotob añoʼ bʌ i pijtaya ti panchan mach cuxulobix. Pero wen tijicña mi cubin cheʼ lʌcʼʌl tsaʼ c chaʼle eʼtel quicʼotob tiʼ chaʼan bʌ Jehová.