1. ¿Chucoch miʼ mejlel lac ñop chaʼan añʌch i pʼʌtʌlel jiñi i Tʼan Dios? (Qʼuele jiñi foto tac).

JIÑI i wiñiconbʌla Jehová la cujil chaʼan «cuxul i tʼan Dios» yicʼot «wen pʼʌtʌl» (He. 4:12). Qʼuelbil lac chaʼan chaʼan muʼ bʌ i yʌl jiñi Biblia añʌch i pʼʌtʌlel chaʼan miʼ qʼuextan laj cuxtʌlel yicʼot miʼ qʼuextan yambʌlob. An tsaʼ bʌ i chaʼleyob xujchʼ, tsiʼ ñucʼuyob cʼujts yicʼot tsiʼ meleyob tsʼiʼlel cheʼ maxto Testigojobic. An tsaʼ bʌ i wen tajayob i ñuclel ti pañimil yicʼot tsiʼ tajayob taqʼuin, pero mach tijicñayobic (Ec. 2:3-11). Tiʼ coltaya jiñi Biblia, ili ora cabʌlob añobix bʌ i pijtaya yicʼot añix i sujmlel i cuxtʌlelob. Tajol pejcʌbil lac chaʼan chuqui ujtem tiʼ tojlel chaʼtiquil uxtiquilob yaʼ baqui miʼ yʌl «Jiñi Biblia tsiʼ qʼuextʌbeyob i pensar» muʼ bʌ i loqʼuel yaʼ ti Lac Tsictesʌbentel. I qʼuelbil lac chaʼan jaʼel chaʼan yom mi lac chʌn sʌclan laj coltʌntel ti Biblia chaʼan ñumen lʌcʼʌl mi la cajñel la quicʼot Jehová, anquese Testigojoñixla.

2. ¿Bajcheʼ tsiʼ tajayob i coltʌntel tiʼ Tʼan Dios chaʼtiquil uxtiquil xñoptʼañob ti ñaxam bʌ siglo?

² Ili ora mi laj qʼuel cabʌl quixtañu muʼ bʌ i qʼuextañob i melbal cheʼ miʼ pejcañob i Tʼan Dios. Cheʼʌch tsaʼ ujti tiʼ tojlel jiñi xñoptʼañob bombiloʼ bʌ o yajcʌbiloʼ bʌ ti espíritu cheʼ ti ñaxam bʌ siglo (pejcan 1 Corintios 6:9-11). Jiñi apóstol Pablo tiʼ tsictesa bajcheʼ yilal jiñi quixtañujob maʼañic bʌ mi caj i  yochelob tiʼ Yumʌntel Dios, i ti wiʼil tiʼ sube jiñi xñoptʼañob: «Lamitaletla cheʼʌch tsaʼ laʼ mele». Pero jiñi chʼujul bʌ espíritu yicʼot i Tʼan Dios tsiʼ coltayob chaʼan miʼ qʼuextañob i melbal. Cheʼ bʌ tsaʼix i chʼʌmʌyob jaʼ, an tsaʼ bʌ i meleyob tsʌts bʌ mulil i tsiʼ jemeyob bajcheʼ añob yicʼot Jehová. Jumpʼejl ejemplo, jiñi Biblia miʼ taj ti tʼan juntiquil xñoptʼan bombil bʌ ti espíritu tsaʼ bʌ chaʼlenti ti expulsar. Pero ti wiʼil, tsiʼ qʼuexta i melbal i tsaʼ chaʼ chʼʌjmi yaʼ ti congregación (1 Co. 5:1-5; 2 Co. 2:5-8). Mi la cubin lac tijicñʌyel cheʼ mi laj qʼuel bajcheʼ cabʌl hermanojob an i qʼuextayob i melbal tiʼ coltaya i Tʼan Dios.

3. ¿Chuqui mi caj laj qʼuel ti ili temaj?

³ Come Jehová aqʼuebil i chaʼañonla jiñi i Tʼan, la com laj cʼʌn ti wen (2 Ti. 2:15). Jin chaʼan, ti ili temaj mi caj laj qʼuel muʼ bʌ i mejlel lac mel chaʼan mi lac ñumen tajben i wenlel jiñi BiBlia, i an uxchajp baqui miʼ mejlel lac pʌs. Ñaxam bʌ, ti laj cuxtʌlel. I chaʼpʼejlel, ti lac subtʼan. I yuxpʼejlel, cheʼ mi lac chaʼlen cʌntesa ti plataforma. Ili temaj mi caj i coltañonla chaʼan mi lac ñumen pʌsben cʼuxbiya yicʼot mi la cʌqʼuen wocolix i yʌlʌ lac Tat am bʌ ti panchan, come miʼ cʌntesañonla chaʼan mi lac taj lac wenlel (Is. 48:17).

4. a) ¿Chuqui yom mi lac mel chaʼan jiñi i Tʼan Dios mucʼʌch i mel i yeʼtel ti lac tojlel? b) Ixcu jatet, ¿bajcheʼ maʼ locʼsʌben i yorajlel chaʼan maʼ pejcan a Biblia?

⁴ Chaʼan miʼ mel i yeʼtel ti lac tojlel jiñi i Tʼan Dios, ti bele ora yom mi lac pejcan, ti jujumpʼejl qʼuin (Jos. 1:8, TNM). Tiʼ sujm, cabʌl chuqui mi lac mel ti jujumpʼejl qʼuin, pero maʼañic chuqui yom miʼ mʌctañonla chaʼan mi lac pejcan jiñi Biblia, mi jiñic to la queʼtel (pejcan Efesios 5:15, 16, Jiñi tsijiʼ bʌ wen tʼañ chaʼañ estudio). * Miʼ mejlel lac pejcan cheʼ ti sʌcʼan, ti xinqʼuiñil o ti acʼʌlel. Cheʼʌch mi la cubin lac bʌ bajcheʼ tsaʼ bʌ i tsʼijbu ili Salmo: «Cabʌl mij cʼuxbin a tʼan. Mic chʌn ñaʼtan cʼʌlʌl miʼ sʌcʼan cʼʌlʌl miʼ yicʼan» (Sal. 119:97).

5, 6. a) ¿Chucoch ñuc i cʼʌjñibal cheʼ mi lac wen ñaʼtan muʼ bʌ lac pejcan? b) ¿Bajcheʼ miʼ mejlel lac ñumen tajben i wenlel cheʼ mi lac wen ñaʼtan muʼ bʌ i yʌl jiñi Biblia? c) ¿Bajcheʼ an i coltayet jiñi i Tʼan Dios yicʼot cheʼ maʼ wen ñaʼtan muʼ bʌ i yʌl?

⁵ Pero mach cojic jach yom mi lac pejcan jiñi Biblia. Yomʌch mi lac wen ñaʼtan woli bʌ lac pejcan (Sal. 1:1-3). Cheʼ bajcheʼ jiñi, jiñi lac ñaʼtʌbal muʼ bʌ lac taj tiʼ Tʼan Dios tsiquil ti lac melbal. Mach yʌlʌlic bajcheʼ mi lac pejcan, mi ti jun, ti celular o tableta, la com bʌ jiñʌch chaʼan miʼ cʼotel ti lac pusicʼal.

 ⁶ ¿Bajcheʼ miʼ mejlel lac ñumen tajben i wenlel cheʼ mi lac wen ñaʼtan muʼ bʌ i yʌl jiñi Biblia? Cheʼ wolito lac pejcan majlel, miʼ mejlel lac jumucʼ cʌy lac pejcan i mi laj cʼajtiben lac bʌ: «¿Chuqui miʼ cʌntesañon tiʼ tojlel Jehová iliyi? ¿Wolix ba c pʌs tij cuxtʌlel ili principio? ¿Anto ba chuqui yom mic tojʼesan tic tojlel?». Mi mucʼʌch lac wen ñaʼtan am bʌ tiʼ Tʼan Dios yicʼot mi lac melben oración Jehová, mi caj i ñijcañonla lac chʼujbin i ticʼojel tac. Cheʼʌch mi caj lac ñumen tajben i wenlel i Tʼan Dios ti laj cuxtʌlel (2 Co. 10:4, 5).

7. ¿Bajcheʼ miʼ mejlel lac ñumen tajben i wenlel jiñi Biblia ti lac subtʼan?

⁷ ¿Bajcheʼ miʼ mejlel lac ñumen tajben i wenlel jiñi Biblia ti lac subtʼan yicʼot cheʼ mi laj cʌntesan yambʌlob? Junchajp jiñʌch cheʼ mi lac bele cʼʌn. Juntiquil hermano tsiʼ yʌlʌ: «Cheʼ yaʼic a majlel a wicʼot Jehová ti subtʼan, ¿jatet jach ba mi caj a chaʼlen tʼan, o muʼ ba caj a wʌcʼ ti tʼan jeʼel?». ¿Chuqui yom i yʌl iliyi? Chaʼan cheʼ baʼ ora mi lac pejcʌben Biblia juntiquil quixtañu, lajalʌch bajcheʼ woli la cʌcʼ ti tʼan Jehová. Jumpʼejl versículo wen yajcʌbil bʌ ñumen an i pʼʌtʌlel, i mach jiñic muʼ bʌ la cʌl (1 Ts. 2:13). Jin chaʼan laʼ laj cʼajtiben lac bʌ: «Cheʼ woliyon ti subtʼan, ¿muʼ ba c chaʼlen wersa chaʼan mic pejcʌben Biblia jiñi quixtañujob cheʼ bʌ mucʼʌch i mejlel?».

8. ¿Chucoch mach cojic jach mi caj lac pejcʌben texto tac jiñi quixtañujob?

⁸ Tiʼ sujm, mach cojic jach yom mi lac pejcʌben texto tac jiñi quixtañujob. Cheʼ bajcheʼ tsaʼ ujti ti ñaxam bʌ siglo, yonlel quixtañu ili ora maʼañic miʼ chʼʌmbeñob isujm muʼ bʌ i yʌl jiñi Biblia (Ro. 10:2). Jin chaʼan, mach yomic mi lac ñaʼtan chaʼan juntiquil quixtañu miʼ chʼʌmben isujm jumpʼejl texto cheʼ cojach mi lac pejcʌben. Yom mi la cʌqʼuen i yorajlel lac wen tsictesʌbeñob yicʼot mi lac chaʼ pejcʌbeñob jiñi tʼan tac ñuc bʌ i cʼʌjñibal.  Mi cheʼʌch mi lac mel, jiñi i Tʼan Dios mi caj i cʌylelob tiʼ jol yicʼot tiʼ pusicʼal (pejcan Lucas 24:32).

9. Tsictesan chuqui tac miʼ mejlel la cʌl chaʼan juntiquil miʼ qʼuel ti ñuc jiñi Biblia cheʼ bʌ muʼto caj lac pejcʌben jumpʼejl texto.

⁹ Cheʼ mi caj lac pejcan jumpʼejl texto, wen chuqui yom mi la cʌl chaʼan jiñi quixtañu miʼ qʼuel ti ñuc jiñi Biblia. Jumpʼejl ejemplo, miʼ mejlel la cʌl: «Laʼ laj qʼuel chuqui mi yʌl Dios chaʼan ili temaj». Pero cheʼ woliyonla ti tʼan yicʼot juntiquil mach bʌ xñoptʼañic, miʼ mejlel la cʌl: «Qʼuele chuqui miʼ yʌl ili chʼujul bʌ tsʼijbujel». I cheʼ mi lac taj juntiquil maʼañic bʌ miʼ mulan i chaʼan bʌ Biblia, miʼ mejlel laj cʼajtiben: «¿Am baʼ wubi ili tʼan tac wajalix bʌ tsʼijbubil?». Yom mi lac tsajin bajcheʼ mi caj lac chaʼlen tʼan come jiñi quixtañujob mach lajalobic i pensar (1 Co. 9:22, 23).

10. a) ¿Chuqui tsiʼ ñusa juntiquil hermano ti subtʼan? b) Tsictesan bajcheʼ qʼuelbil a chaʼan ti a subtʼan chaʼan jiñi i Tʼan Dios mucʼʌch i ñijcʌben i pusicʼal jiñi quixtañujob.

¹⁰ Cabʌl hermanojob an i qʼueleyob chaʼan jiñi i Tʼan Dios mucʼʌch i ñijcʌbeñob i pusicʼal jiñi quixtañujob. Laʼ laj qʼuel jumpʼejl ejemplo, juntiquil hermano cabʌl jab tsiʼ julaʼta juntiquil wiñic añix bʌ i jabilel i tsiʼ chʼʌmbe majlel jiñi revista tac. Ti jumpʼejl bʌ qʼuin, tsiʼ ñaʼta chaʼan miʼ pejcʌben jumpʼejl texto muʼ bʌ i tilel yaʼ ti revista Lac Tsictesʌbentel i mach cojach miʼ cʌyben. Jiñi texto jiñʌch 2 Corintios 1:3, 4, ba miʼ yʌl chaʼan Jehová «jiñʌch lac Tat jaʼel muʼ bʌ i pʼuntañonla, muʼ bʌ i ñuqʼuesan lac pusicʼal tiʼ pejtelel wocol». Jiñi wiñic tsiʼ wen mulaj i tiʼ sube jiñi hermano chaʼan miʼ chaʼ pejcʌben jiñi texto. Ti wiʼil, tiʼ sube chaʼan yomʌch miʼ tijicñesʌbentel i pusicʼal yicʼot i yijñam i chaʼan yomob i ñumen cʌn jiñi Biblia. Cheʼ bajcheʼ mi laj qʼuel, cheʼ mi laj cʼʌn ti subtʼan jiñi i Tʼan Dios mucʼʌch i ñijcʌben i pusicʼal jiñi quixtañujob (Hch. 19:20).

11. ¿Chuqui ti ñuc bʌ eʼtel an i chaʼan jiñi hermanojob muʼ bʌ i chaʼleñob cʌntesa ti plataforma?

¹¹ Ti lac pejtelel mi lac mulan majlel ti tempa bʌ tac yicʼot ti colem tempa bʌ tac. Mi la cajñel come yaʼʌch mi lac chʼujutesan Jehová. Pero mi la cajñel jaʼel come mi lac taj lac wenlel ti jiñi cʌntesʌntel tac. Tiʼ sujm, jiñi hermanojob mucʼoʼ bʌ ti cʌntesa ti plataforma añob ñuc bʌ i majtan, pero cheʼ jaʼel jumpʼejl ñuc bʌ eʼtel (Stg. 3:1). Jin chaʼan, yom miʼ wen qʼuelob mi loqʼuemʌch ti Biblia i cʌntesajob. Mi tsaʼ aqʼuentiyet ili eʼtel, ¿chuqui miʼ mejlel a mel chaʼan jiñi i Tʼan Dios miʼ cʼotel tiʼ pusicʼal jiñi woli bʌ i ñʌchʼtañetob?

12. ¿Bajcheʼ miʼ mejlel i ñaʼtan jiñi xñusa discurso mi jiñʌch woliʼ ñumen qʼuel ti ñuc jiñi Biblia?

¹² Wen qʼuele mi jiñʌch woli a ñumen acʼ ti ñuc jiñi Biblia yaʼ ti a discurso (Jn. 7:16). Wen qʼuele chaʼan cheʼ bajcheʼ mi caj a ñusan a discurso o jiñi ejemplo tac muʼ bʌ caj a cʼʌn, maʼañic miʼ juʼsʌben i cʼʌjñibal jiñi texto tac muʼ bʌ caj a pejcan. Cheʼ jaʼel, yom maʼ cʼajtesan chaʼan mach lajalic cheʼ mi lac pejcan muʼ bʌ i yʌl jiñi Biblia yicʼot cheʼ mi lac tsictesan muʼ bʌ i yʌl jiñi Biblia. Cheʼ cabʌl texto maʼ pejcan, maʼañic majqui mi caj i wen cʼajtesan. Jin chaʼan, yajcan baqui bʌ texto tac mi caj a pejcan yicʼot locʼsʌben i yorajlel chaʼan maʼ pejcan ti wen, tsictesan, acʼʌ ejemplo tac yicʼot alʌ bajcheʼ miʼ mejlel laj cʼʌn (Neh. 8:8). Mi jiñi discurso chucbil ti jumpʼejl bosquejo, wen pejcan yaʼ bʌ tsʼijbubil yicʼot jiñi texto tac am bʌ i chaʼan, i wen ñaʼtan bajcheʼ miʼ taj i bʌ. Ti wiʼil, mi caj a yajcan baqui bʌ texto tac mi caj a cʼʌn chaʼan maʼ tsictesan muʼ bʌ i yʌl jiñi  bosquejo (mi caj a ñumen taj chuqui miʼ mejlel a mel yaʼ ti cʌntesʌntel 21, 22 yicʼot 23 ti jiñi libro Benefíciese de la Escuela del Ministerio Teocrático). Pero ñumen ñuc bʌ i cʼʌjñibal jiñʌch cheʼ maʼ cʼajtiben i coltaya Jehová chaʼan maʼ tsictesan ti wen jiñi cʌntesa tac am bʌ tiʼ Tʼan (pejcan Esdras 7:10 yicʼot Proverbios 3:13, 14).

13. a) ¿Chuqui tsaʼ ujti tiʼ tojlel juntiquil hermana cheʼ tsiʼ yubi jumpʼejl texto yaʼ ti tempa bʌ? b) ¿Bajcheʼ tajbil a chaʼan i wenlel jiñi Biblia cheʼ miʼ cʼʌjñel yaʼ ti tempa bʌ tac?

¹³ Laʼ laj qʼuel bajcheʼ jumpʼejl texto tsaʼ bʌ pejcʌnti ti tempa bʌ tsiʼ ñijcʌbe i pusicʼal juntiquil hermana chʼoyol bʌ ti Australia. Cheʼ xcʼalʌl to tsiʼ ñusa tsʌts bʌ wocol, pero tsiʼ jacʼʌ jiñi tʼan am bʌ Biblia i tsiʼ yʌqʼue Jehová jiñi i cuxtʌlel. Anquese cheʼʌch tsiʼ mele, wocol tsiʼ ñopo chaʼan mucʼʌch i cʼuxbintel ti Jehová. Ti jumpʼejl bʌ qʼuin, tsaʼ cʼoti tiʼ pusicʼal jumpʼejl texto tsaʼ bʌ pejcʌnti yaʼ ti tempa bʌ. Cheʼ tsaʼ ujti i wen ñaʼtan yicʼot i sʌclan yambʌ versículo tac, tsaʼ cʼoti i cʌn chaʼan Jehová mucʼʌch i cʼuxbin. * Ixcu jatet, ¿am baʼ wubi jumpʼejl texto yaʼ ti tempa bʌ o colem tempa bʌ tac tsaʼ bʌ i wen ñijca a pusicʼal? (Neh. 8:12).

14. ¿Bajcheʼ mi caj lac pʌs chaʼan mucʼʌch laj qʼuel ti ñuc i Tʼan Dios?

¹⁴ Tiʼ sujm, ti lac pejtelel mi la cʌqʼuen wocolix i yʌlʌ Jehová, jiñi Dios am bʌ i cʼuxbiya, chaʼan tsiʼ yʌqʼueyonla i Tʼan yicʼot chaʼan maʼañic ba ora mi caj i jilel cheʼʌch bajcheʼ tsiʼ wʌn alʌ (1 P. 1:24, 25). Jin chaʼan, laʼ lac pejcan ti bele ora, laʼ lac jacʼ muʼ bʌ i yʌl yicʼot laʼ laj cʼʌn chaʼan mi laj coltan yambʌlob. Cheʼʌch mi caj lac pʌs chaʼan mucʼʌch laj cʼuxbin yicʼot mi laj qʼuel ti ñuc ili majtañʌl. Pero ñumen ñuc bʌ jin cheʼ mi caj lac pʌs chaʼan mi laj cʼuxbin Jehová, jiñi tsaʼ bʌ i yʌcʼʌ ti tsʼijbuntel.