«Yom chʼejlet. Chaʼlen wersa chaʼan jini eʼtel»
«Yom bʌxet. Yom chʼejlet. Chaʼlen wersa chaʼan jini eʼtel. Mach a chaʼlen bʌqʼuen yicʼot pensar, come lac Yum Dios [...] mi caj i yajñel a wicʼot» (1 CR. 28:20).
CʼAY: 38, 34
1, 2. a) ¿Chuqui ti ñuc bʌ eʼtel tsaʼ aqʼuenti Salomón? b) ¿Chuqui tsiʼ cʼojoʼta David?
JEHOVÁ tsiʼ yajca Salomón chaʼan miʼ yʌqʼuen jumpʼejl ñuc bʌ eʼtel (troñel), jiñʌch chaʼan miʼ mel (pʌt) jumpʼejl templo yaʼ ti Jerusalén. Ili templo yom wen utsʼat melbil chaʼan «miʼ qʼuejlel ti ñuc ti pejtelel pañimil». Pero ñumen ñuc bʌ jiñʌch chaʼan miʼ cʼotel ti cʌjñel bajcheʼ «i Templo Dios» (1 Cr. 22:1, 5, 9-11).
2 Jiñi rey David tsiʼ ñopo chaʼan Dios mucʼʌch caj i coltan Salomón, pero tsaʼʌch i cʼojoʼta come Salomón xcolel to yicʼot maxto añic chuqui wen cʌmbil i chaʼan. ¿Añʌch ba i chʼejlel Salomón chaʼan miʼ mel jiñi templo? ¿Wocol ba mi caj i yubin tiʼ caj chaʼan xcolel to yicʼot cheʼ maxto añic chuqui wem cʌmbil i chaʼan? Yomʌch miʼ pʌs i chʼejlel yicʼot miʼ chaʼlen wersa chaʼan miʼ tsʼʌctesan jiñi eʼtel.
3. ¿Bajcheʼ tsiʼ cʌñʌ Salomón chaʼan David añʌch i chʼejlel?
3 Tiʼ sujm, Salomón cabʌl chuqui tsiʼ cʌñʌ tiʼ tojlel i tat, jiñi David, cheʼ bʌ tsiʼ pʌsʌ i chʼejlel. Cheʼ bʌ David xcolel to, tsiʼ contraji jontol bʌ bʌteʼel tac cheʼ woli (choncol) i cʌntʌben i tiñʌmeʼ tac i 1 S. 17:34, 35). Tsiʼ pʌsʌ i chʼejlel jaʼel cheʼ bʌ tsiʼ contraji jiñi chan bʌ wiñic i cʼabaʼ Goliat. David jumpʼejl jach xajlel (tun) tsiʼ cʼʌñʌ chaʼan miʼ tsʌnsan Goliat, juntiquil wen yujil bʌ guerra, pero ili tsaʼ mejli i chaʼan tiʼ coltaya Jehová (1 S. 17:45, 49, 50).
tat (4. ¿Chucoch yomʌch miʼ pʌs i chʼejlel jiñi Salomón?
4 Tiʼ sujm, jiñʌch David yom bʌ miʼ pʼʌtʼesan jiñi Salomón chaʼan miʼ pʌs i chʼejlel yicʼot miʼ mel jiñi templo (pejcan 1 Crónicas 28:20). Cheʼ tsaʼic i pʌsʌ i bʌqʼuen Salomón, tajol mach weñic tsaʼ loqʼui jiñi eʼtel o mi tsaʼic to i teche i mel.
5. ¿Chucoch yomʌch mi lac taj lac chʼejlel?
5 Cheʼ bajcheʼ Salomón, yomʌch mi laj cʼajtiben i coltaya Jehová chaʼan miʼ yʌqʼueñonla lac chʼejlel i mi lac tsʼʌctesan jiñi eʼtel tsaʼ bʌ i yʌqʼueyonla. Jin chaʼan, laʼ laj qʼuel tiʼ tojlel chaʼtiquil uxtiquil tsaʼ bʌ i pʌsʌyob i chʼejlel ti wajali. Cheʼ woli (yʌquel) laj qʼuel majlel, laʼ lac ñaʼtan bajcheʼ miʼ mejlel lac taj yicʼot lac pʌs jiñi chʼejlel.
TSAʼ BΛ I PΛSΛYOB I CHʼEJLEL
6. ¿Chuqui maʼ cʌn chaʼan i chʼejlel José?
6 Laʼ lac ñaʼtan bajcheʼ tsiʼ pʌsʌ i chʼejlel José cheʼ bʌ jiñi i yijñam Potifar tiʼ sube chaʼan miʼ ñoltʌl yicʼot. José yujil chaʼan miʼ mejlel i taj tsʌts bʌ wocol mi maʼañic miʼ jacʼben i tʼan. Pero jiñʌch tsaʼ bʌ i mele ti ora, maʼañic tsiʼ jacʼʌ (Gn. 39:10, 12).
7. Tsictesan bajcheʼ tsiʼ pʌsʌ i chʼejlel jiñi Rahab (qʼuele jiñi dibujo am bʌ tiʼ tejchibal).
7 Laʼ laj qʼuel tiʼ tojlel Rahab, tsaʼ bʌ chumle ti Jericó. Tiʼ caj i bʌqʼuen Rahab, tajol maʼañic tsiʼ colta jiñi chaʼtiquil xyojchʼob israeloʼ bʌ tsaʼ bʌ cʼotiyob tiʼ yotot. Pero come ñopol i chaʼan Jehová, tsiʼ coltayob i mujcun i bʌ yicʼot chaʼan miʼ mejlelob ti putsʼel (Jos. 2:4, 5, 9, 12-16). Yujil chaʼan Jehová jiñʌch jiñi isujm bʌ Dios i chaʼan añʌch bajcheʼ mi caj i coltan jiñi israelob chaʼan miʼ chʼʌmob jiñi tejclum. Jin chaʼan, maʼañic tsiʼ bʌcʼña jiñi rey i chaʼan Jericó yicʼot i wiñicob. Come Rahab tsiʼ pʌsʌ i chʼejlel, tsaʼʌch coltʌnti yicʼot i familia (Jos. 6:22, 23).
8. ¿Bajcheʼ tsiʼ colta jiñi apóstolob cheʼ tsiʼ qʼueleyob chaʼan Jesús añʌch i chʼejlel?
8 Jiñi xucʼul bʌ apóstolob i chaʼan Jesús tsaʼʌch i pʌsʌyob i chʼejlel jaʼel. Come qʼuelbil i chaʼañob bajcheʼ tsiʼ pʌsʌ i chʼejlel Jesús, cheʼʌch tsiʼ pʌsʌyob jaʼel (Mt. 8:28-32; Jn. 2:13-17; 18:3-5). Cheʼ bʌ jiñi ñaxañoʼ bʌ ti ñopbalʌl cʌmbiloʼ bʌ bajcheʼ saduceojob tiʼ sube jiñi apóstolob chaʼan miʼ cʌyob tʼan tiʼ tojlel Jesús, maʼañic tsiʼ jacʼʌyob (Hch. 5:17, 18, 27-29).
9. Cheʼ bajcheʼ miʼ yʌl 2 Timoteo 1:7, ¿baqui jach miʼ mejlel lac taj lac chʼejlel?
9 José, Rahab, Jesús yicʼot jiñi apóstolob tsiʼ xucʼchocoyob i pusicʼal tiʼ melol (chaʼlentel) chuqui toj. Tsiʼ pʌsʌyob i chʼejlel come tsiʼ ñopoyob Jehová, mach chaʼañic tsiʼ bajñel qʼueleyob i bʌ ti ñuc. Cheʼ ba ora yom mi lac pʌs lac chʼejlel, laʼ lac ñop Jehová i mach lac bajñel qʼuel lac bʌ ti ñuc (pejcan 2 Timoteo 1:7). Laʼ laj qʼuel chaʼpʼejl baqui yom mi lac pʌs lac chʼejlel: Ti lac familia yicʼot ti congregación.
¿BAQUI YOM MI LAC PΛS LAC CHʼEJLEL?
10. ¿Chucoch yomʌch miʼ pʌsob i chʼejlel jiñi xcolelob?
10 Jiñi xcolelob cabʌl chuqui miʼ ñusañob, jin chaʼan yomʌch miʼ pʌsob i chʼejlel chaʼan xucʼul miʼ yajñelob tiʼ tojlel Jehová. Miʼ mejlel i coltañob tsaʼ bʌ ujti tiʼ tojlel Salomón. Chaʼan Salomón wen chuqui miʼ yajcan i mel yicʼot miʼ yujtesan jiñi eʼtel, tsaʼʌch i pʌsʌ i chʼejlel. Tiʼ sujm, jiñi tatʌlob miʼ mejlel i tojʼesañob i yalobil yicʼot yomʌch miʼ melob. Pero an tacʌch chuqui ñuc bʌ i cʼʌjñibal yom bʌ miʼ bajñel yajcañob i mel (Pr. 27:11). Yom miʼ yajcañob majqui mi caj i sujtelob tiʼ yamigo, baqui bʌ ñusaqʼuin mi caj i melob, chuqui mi caj i melob chaʼan sʌc i melbalob yicʼot jala mi caj i chaʼleñob chʼʌmjaʼ. Chaʼan wen chuqui miʼ yajcañob i mel, yomʌch miʼ pʌsob i chʼejlel, come cheʼʌch bajcheʼ woliʼ contrajiñob Satanás, muʼ bʌ i wajlen Dios yicʼot i mandar tac.
11, 12. a) ¿Bajcheʼ tsiʼ pʌsʌ i chʼejlel Moisés? b) ¿Bajcheʼ miʼ mejlel i tsajcʌbeñob i melbal Moisés jiñi xcolelob?
11 Wen ñuc i cʼʌjñibal cheʼ miʼ ñaʼtañob chuqui mi caj i melob jiñi xcolelob. An país tac baqui miʼ wersa xijqʼuelob majlel ti universidad i chaʼan yom miʼ sʌclañob wem bʌ i yeʼtel. Pero an baqui wocol ti tajol taqʼuin i jiñi xcolelob yom miʼ wen chaʼleñob eʼtel chaʼan miʼ coltañob i familia. Mi cheʼ añet bajcheʼ iliyi, ñaʼtan tiʼ tojlel Moisés. I wentʌlel tsiʼ chaʼle wersa chaʼan wen ñuc miʼ qʼuejlel yicʼot miʼ taj cabʌl i chubʌʼan, come tsaʼ coli tiʼ yotot i yixicʼal (yixicpʼeñal) faraón. Tajol jiñi yambʌ egiptojob, maestrojob yicʼot ñuc bʌ xticʼojelob tsaʼʌch i wen xiqʼuiyob chaʼan cheʼʌch miʼ mel. Pero Moisés tsiʼ pʌsʌ i chʼejlel come maʼañic tsiʼ jacʼʌ, tsiʼ yajca i melben i yeʼtel Dios. Cheʼ tsaʼ loqʼui ti Egipto yicʼot tsiʼ cʌyʌ pejtel i chubʌʼan, tiʼ sʌcla Jehová (He. 11:24-26). Dios tsaʼʌch i yʌqʼue bendición, i cheʼʌch mi caj i mel ti talto bʌ qʼuin.
12 Mi jiñi xcolelob miʼ tsajcañob i melbal Moisés, miʼ melbeñob i yeʼtel Dios yicʼot ñaxan miʼ yʌcʼob ti ñuc jiñi Yumʌntel, cabʌl bendición miʼ tajob. Jehová miʼ coltañob i taj chuqui cʼʌjñibal i chaʼañob tiʼ familia. Cheʼ ti ñaxam bʌ siglo, juntiquil xcolel i cʼabaʼ Timoteo tsiʼ yʌcʼʌ i bʌ ti melol i yeʼtel Dios, i cheʼʌch miʼ mejlel a mel jaʼel * (pejcan Filipenses 2:19-22).
¿Mucʼʌch ba caj lac pʌs lac chʼejlel tiʼ pejtelel chuqui yom melol? (Qʼuele jiñi párrafo 13 cʼʌlʌl ti 17).
13. ¿Chucoch tsiʼ pʌsʌ i chʼejlel juntiquil xcʼalʌl?
13 Laʼ laj qʼuel tsaʼ bʌ i ñusa juntiquil xcʼalʌl yaʼ ti Alabama (Estados Unidos). Chaʼan miʼ yʌcʼ tiʼ jol jiñi eʼtel tac tiʼ chaʼan bʌ Dios, yomʌch an i chʼejlel jaʼel. Miʼ yʌl: «Wen cujil bʌqʼuen cʼʌlʌl cheʼ tsaʼ coliyon. Cheʼ yaʼañon ti Yotlel Tempa bʌ, wocol mi cubin chaʼan mic pejcan yambʌlob. Ñumento cheʼ woliyon ti subtʼan, come mic bʌcʼñan c pejcan mach bʌ j cʌñʌyobic». Jiñi i tatob yicʼot yambʌ hermanojob tsiʼ coltayob chaʼan miʼ mejlel ti ochel bajcheʼ precursora regular. Miʼ chaʼ al: «Jiñi i pañimil (mulawil) Satanás miʼ subeñet chaʼan ñumen wen cheʼ maʼ majlel ti universidad, maʼ sujtel ti juntiquil wen cʌmbil bʌ, maʼ taj cabʌl taqʼuin yicʼot chubʌʼañʌl tac. Pero mach tiʼ pejtelelobic miʼ tajob iliyi. Yonlel mucʼ jach i tajob wocol yicʼot miʼ wen lujbʼañob. Pero joñon, wen tijicña mi cubin c bʌ come woli c melben i yeʼtel Jehová».
14. ¿Baqui ora yom miʼ pʌsob i chʼejlel jiñi tatʌlob?
14 Jiñi tatʌlob yomʌch miʼ pʌsob i chʼejlel jaʼel. Jumpʼejl ejemplo, tajol jiñi i yum eʼtel miʼ suben chaʼan yom miʼ cʌytʌl ti eʼtel, pero ti jiñi qʼuin an i chʼujutesaya ti familia, subtʼan o tempa bʌ tac. Yomʌch miʼ pʌs i chʼejlel come mach junyajlic jach mi caj i suben chaʼan mach mejlic. Mi cheʼʌch miʼ melob bajcheʼ ili, wen bʌ ejemplo woli bʌ i pʌsben i yalobilob. Cheʼ jaʼel, tajol juntiquil tatʌl miʼ mʌctan i yalobilob chaʼan mach yomic miʼ melob bajcheʼ i yalobil yambʌ hermanojob yaʼ ti congregación. ¿Chuqui mi caj i mel jiñi tatʌl cheʼ jiñi yambʌ hermanojob miʼ cʼajtibeñob chucoch miʼ ñaʼtañob bajcheʼ jiñi? Chaʼan miʼ tsictesan ti wen yomʌch miʼ pʌs i chʼejlel.
15. ¿Bajcheʼ miʼ coltan jiñi tatʌlob muʼ bʌ i yʌl Salmo 37:25 yicʼot Hebreos 13:5?
15 Jiñi tatʌlob miʼ pʌsob i chʼejlel cheʼ miʼ coltan i yalobilob i taj eʼtel tac tiʼ chaʼan bʌ Dios. An tatʌlob maʼañic bʌ miʼ ñijcʌbeñob i pusicʼal i yalobil chaʼan miʼ yochelob bajcheʼ precursor, miʼ majlelob baqui yom to xsubtʼañob, eʼtel ti Betel o chaʼan i melol i Yotlel Tempa bʌ o i Yotlel Colem Tempa bʌ tac. Tajol miʼ ñaʼtañob chaʼan jiñi i yalobilob mach mejlix i cʌntañob cheʼ ñoxobix. Pero cheʼ mucʼʌch i Salmo 37:25 yicʼot Hebreos 13:5). Mi weñʌch chuqui miʼ pʌsob jiñi tatʌlob, miʼ coltan i yalobilob chaʼan miʼ tajob i chʼejlel yicʼot miʼ ñopob Jehová (1 S. 1:27, 28; 2 Ti. 3:14, 15).
cʼʌñob i ñaʼtʌbal jiñi tatʌlob, mi caj i pʌsob i chʼejlel i mi caj i ñopob chaʼan Jehová mucʼʌch i tsʼʌctesan i tʼan (pejcan16. a) ¿Chuqui an i mele jiñi tatʌlob chaʼan jiñi i yalobilob miʼ ñaʼtañob eʼtel tac tiʼ chaʼan bʌ Dios? b) ¿Bajcheʼ miʼ tajob i wenlel jiñi i yalobilob?
16 Laʼ laj qʼuel tiʼ tojlel jumpʼejl xñujpuñel chʼoyol bʌ ti Estados Unidos tsaʼ bʌ i colta i yalobilob chaʼan miʼ tajob eʼtel tac tiʼ chaʼan bʌ Dios. Jiñi tatʌl miʼ yʌl: «Cheʼ maxto yujilobic tʼan yicʼot xʌmbal jiñi calobil lojon, muqʼuix lon c subeñob chaʼan mi caj i tajob cabʌl tijicñʌyel cheʼ miʼ yochelob ti precursor yicʼot miʼ coltañob jiñi congregación. Ili ora cheʼix woliʼ ñaʼtañob i mel. Cheʼ miʼ chaʼleñob wersa i tajob miʼ coltañob chaʼan maʼañic miʼ yajlelob tiʼ yac Satanás i miʼ ñumen acʼob ti ñuc jiñi am bʌ i cʼʌjñibal: Jiñʌch i melol i yeʼtel Jehová». Yambʌ hermano chaʼtiquil bʌ i yalobil, tiʼ tsʼijbu: «Cabʌl tatʌlob miʼ toʼol cʼʌñob taqʼuin, i yorajlel i chaʼañob yicʼot i pʼʌtʌlelob chaʼan jiñi i yalobilob miʼ qʼuelob ti ñuc jiñi escuela, alas tac o ñusaqʼuin tac. Pero ñumen wen cheʼ mi laj coltañob i mel jiñi am bʌ i cʼʌjñibal chaʼan lʌcʼʌl miʼ yajñelob tiʼ tojlel Jehová. Wen tijicña mi cubin lon cheʼ jiñi calobil lon woliʼ ñaʼtañob i taj eʼtel tac tiʼ chaʼan bʌ Jehová». Miʼ mejlel lac ñop chaʼan Dios mi caj i yʌqʼuen bendición jiñi tatʌlob muʼ bʌ i coltañob i yalob chaʼan miʼ tajob eʼtel tac tiʼ chaʼan bʌ Dios.
LAʼ LAC PΛS LAC CHʼEJLEL TI CONGREGACIÓN
17. ¿Baqui tac yom mi lac pʌs lac chʼejlel yaʼ ti laj congregación?
17 Yaʼ ti congregación yomʌch mi lac pʌs lac chʼejlel jaʼel. Jumpʼejl ejemplo, jiñi ancianojob yom miʼ qʼuelob cheʼ an majqui miʼ mel tsʌts bʌ mulil o miʼ coltañob hermanojob cheʼ cʼamob o miʼ tajob wocol. An muʼ bʌ i julaʼtañob cárcel tac chaʼan miʼ yʌcʼob estudio loqʼuem bʌ ti Biblia o miʼ melob tempa bʌ tac. Ili ora jaʼel, jiñi hermanajob i bajñelob to bʌ cabʌl chuqui miʼ mejlel i melob jaʼel tiʼ yeʼtel Jehová. Miʼ mejlelob ti ochel bajcheʼ precursora, coltaya baqui ñumen yom to subtʼan, eʼtel ti jiñi Oficina muʼ bʌ i qʼuel i melol i Yototlel
chʼujutesaya, i miʼ mejlelob ti majlel ti jiñi Cʌntesʌntel chaʼan xSubtʼañob chaʼan bʌ i Yumʌntel Dios. An muʼto bʌ i mejlel ti majlel yaʼ ti Cʌntesʌntel i chaʼan Galaad.18. ¿Bajcheʼ miʼ mejlel i pʌsob i chʼejlel jiñi hermanajob añobix bʌ i jabilel?
18 Ti lac pejtelel mi laj qʼuel ti ñuc jiñi hermanajob añoʼ bʌ ti laj congregación añobix bʌ i jabilel, i tijicñayonla cheʼ yaʼañob la quicʼot. Anquese maʼañix miʼ wen mejlelob i melben i yeʼtel Dios cheʼ bajcheʼ ti ñaxan, muʼto i mejlelob i pʌs i chʼejlel yicʼot miʼ coltañob jiñi congregación (pejcan Tito 2:3-5). Cheʼ miʼ subentelob i coltan juntiquil xcʼalʌl chaʼan bajcheʼ yilal yom miʼ xoj i pislel, yomʌch añob i chʼejlel. Maʼañic mi caj i yʌʼleñob, pero mi caj i coltañob chaʼan jiñi hermana miʼ ñaʼtan bajcheʼ miʼ mejlel i ticʼlan yambʌlob cheʼ bajcheʼ yilal i pislel (1 Ti. 2:9, 10). Jiñi congregación miʼ taj i wenlel come jiñi hermanajob añobix bʌ i jabilel miʼ pʌsob cʼuxbiya yicʼot miʼ qʼuelob ti ñuc yambʌlob.
19. a) ¿Bajcheʼ miʼ mejlel i pʌsob i chʼejlel jiñi hermanojob chʼʌmʌlix bʌ i chaʼañob jaʼ? b) ¿Bajcheʼ miʼ coltan jiñi hermanojob muʼ bʌ i yʌl Filipenses 2:13 yicʼot Isaías 12:2?
19 Jiñi hermanojob chʼʌmbilix bʌ i chaʼañob jaʼ yomʌch chʼejlob jaʼel yicʼot miʼ melob chuqui miʼ subentelob. Cheʼ mucʼʌch i jacʼob ñumen ñuc tac bʌ eʼtel, jiñi congregación miʼ taj i wenlel (1 Ti. 3:1). Pero tajol an muʼ bʌ i bʌcʼñañob i chʼʌm ili eʼtel tac. ¿Chucoch? Tajol miʼ ñaʼtañob chaʼan mach utsʼatic cheʼ miʼ jacʼob ochel bajcheʼ anciano o siervo ministerial tiʼ caj tsaʼ bʌ i meleyob ti wajali. O miʼ mejlel i ñaʼtañob chaʼan mach weñic mi caj i melob i yeʼtel. Mi cheʼʌch maʼ wubin jaʼel, Jehová miʼ mejlel i coltañet (pejcan Filipenses 2:13 yicʼot Isaías 12:2). Cʼajtesan tiʼ tojlel Moisés. Mach chajpʌbilic tsiʼ yubi i bʌ chaʼan miʼ mel jiñi eʼtel tsaʼ bʌ aqʼuenti (Éx. 3:11). Pero Jehová tsiʼ yʌqʼue i chʼejlel yicʼot tsiʼ colta i tsʼʌctesan i yeʼtel. Jin chaʼan, cʼajtiben i coltaya Jehová yicʼot pejcan ti jujumpʼejl qʼuin jiñi Biblia mi anto yom a chʼejlel maʼ wubin. Mi caj i coltañet jaʼel cheʼ maʼ wen ñaʼtan jiñi ejemplo tac tiʼ tojlel tsaʼ bʌ i pʌsʌyob i chʼejlel ti wajali. Cheʼ jaʼel, miʼ mejlel a suben jiñi ancianojob chaʼan miʼ cʌntesañetob, i subeñob chaʼan maʼ mejlel ti coltaya ti chuqui jach yom melol. Jin chaʼan, hermanojob chʼʌmʌlix bʌ laʼ chaʼan jaʼ, yom chʼejletla yicʼot wen chaʼlenla eʼtel yaʼ ti congregación.
«LAC YUM DIOS [...] MI CAJ I YAJÑEL A WICʼOT»
20, 21. a) ¿Chuqui tsaʼ subenti Salomón? b) ¿Chuqui miʼ mejlel lac ñop tiʼ tojlel Jehová?
20 Jiñi rey David tiʼ sube Salomón chaʼan Jehová mi caj i coltan jinto miʼ yujtel ti mejlel jiñi templo (1 Cr. 28:20). Salomón tsaʼʌch i wen ñaʼta tsaʼ bʌ i yʌlʌ i tat, anquese xcolel to yicʼot maxto cabʌlic chuqui yujil, maʼañic tsiʼ yʌcʼʌ chaʼan jin miʼ mʌctan tiʼ melol jiñi eʼtel. Tsiʼ pʌsʌ i chʼejlel yicʼot tsiʼ mele jiñi eʼtel, i ti 7 jab yicʼot ojlil tsiʼ yujtesa jiñi templo tiʼ coltaya Jehová.
21 Cheʼ bajcheʼ Jehová tsiʼ colta Salomón, miʼ mejlel i coltañonla lac taj lac chʼejlel jaʼel yicʼot chaʼan mi lac tsʼʌctesan la queʼtel ti lac familia yicʼot ti congregación (Is. 41:10, 13). Mi yicʼot lac chʼejlel mi lac melben i yeʼtel Jehová, miʼ mejlel lac ñop chaʼan mi caj i yʌqʼueñonla bendición ili ora yicʼot ti talto bʌ qʼuin. Pero cheʼ yomonla bajcheʼ tsiʼ yʌlʌ David: «Yom chʼejlet. Chaʼlen wersa chaʼan jini eʼtel».
^ parr. 12 Chaʼan maʼ bej ñaʼtan chuqui miʼ mejlel a mel chaʼan maʼ ñumen melben i yeʼtel Jehová, qʼuele jiñi temaj «Laʼ la cotsan ti lac jol jiñi eʼtel tac chaʼan bʌ i ñuqʼuesʌntel Dios», tsaʼ bʌ loqʼui yaʼ ti La Atalaya 15 i chaʼan julio, 2004.