¿CHUQUI mi lac mel cheʼ laj com lac ñaʼtan bajcheʼ ora? Tajol mi laj qʼuel jiñi lac reloj cʌchʌl bʌ ti laj cʼʌb o jumpʼejl reloj yaʼ bʌ jocʼol ti la cotot. Mi an majqui miʼ cʼajtibeñonla bajcheʼ ora, ¿bajcheʼ mi lac jacʼ? Cabʌl bajcheʼ miʼ mejlel lac jacʼ.

Jumpʼejl ejemplo, laʼ lac ñaʼtan chaʼan ñumeñix jumpʼejl ora yicʼot 45 minuto jiñi xinqʼuiñil. Miʼ mejlel la cʌl la 1:45 o chaʼan yom jax 15 minuto chaʼan las dos. Mi chumulonla ti jumpʼejl tejclum baqui miʼ cʼʌjñel jiñi 24 ora, tajol mi la cʌl las 13:45.

Cheʼ bʌ mi lac pejcan jiñi Biblia, tajol an laj cʼajtibe lac bʌ: «¿Bajcheʼ miʼ tsijquel ora ti wajali?». Cheʼ bajcheʼ joñonla, cabʌl bajcheʼ miʼ tsicob jaʼel. Yaʼ ti tsʼijbujel hebreo, miʼ taj ti tʼan «sʌcʼan», «xinqʼuiñil», «iqʼuix» yicʼot «acʼʌlel» (Gn. 8:11; 19:27; 43:16; Jue. 19:9). Pero an i tajol jiñi Biblia ñumen tsiquil miʼ yʌl.

Ti wajali, ñʌmʌl miʼ yʌjqʼuel xcʌntayajob, ñumento cheʼ ti acʼʌlel. Cheʼ bʌ jalto yom chaʼan miʼ yilan pañimil Jesús, jiñi israelob ti uxpʼejl miʼ tʼoxob jiñi acʼʌlel cheʼʌch bajcheʼ uxyajl miʼ qʼuexob i bʌ jiñi xcʌntayajob. Cheʼ tiʼ qʼuiñilel Jesús, jiñi judíojob cheʼix tsaʼ caji i melob bajcheʼ jiñi griegojob yicʼot romanojob, ti chʌmpʼejl miʼ tʼoxob jiñi acʼʌlel.

Yaʼ ti Evangelio tac miʼ wen tajtʌl ti tʼan bajcheʼ tʼoxbil jiñi acʼʌlel. Jumpʼejl ejemplo, jiñʌch «cheʼ yomix sʌcʼan [«tsaʼix ochi jiñi i chʌnticlel xcʌntaya», TNM]» cheʼ bʌ Jesús tsiʼ chaʼle xʌmbal ti jaʼ chaʼan miʼ lʌcʼtesan i bʌ yaʼ ti barco baqui añob jiñi xcʌntʼañob i chaʼan (Mt. 14:25). Ti Lucas 12:38, Jesús tsiʼ taja ti tʼan i yorajlel cʌntaya «cheʼ yomix i taj ojlil acʼʌlel» o «cheʼ ñumenix ti ojlil acʼʌlel».

Jesús jin tsiʼ taja ti tʼan jiñi chʌnchajp bajcheʼ tʼoxbil jiñi acʼʌlel cheʼ bʌ tiʼ sube jiñi xcʌntʼañob i chaʼan: «Yom yʌxʌl laʼ wo, cheʼ jini, come mach laʼ wujilic baqui ora tal i yum otot, mi ti icʼajel, mi ti ojlil acʼʌlel, mi cheʼ wolix ti uqʼuel mut, mi ti sʌcʼajel» (Mr. 13:35). Jiñi ñaxam bʌ bajcheʼ tʼoxbil jiñi acʼʌlel miʼ tejchel ti tsijquel cheʼ ti «icʼajel», cheʼ bʌ wolix i bʌjlel jiñi qʼuin cʼʌlʌl cheʼ ti las nueve ti acʼʌlel. Jiñi i chaʼpʼejlel miʼ tsijquel ti «ojlil acʼʌlel», miʼ tejchel ti las nueve cʼʌlʌl las doce tiʼ yojlil acʼʌlel. Jiñi i yuxpʼejlel jin cheʼ «wolix ti uqʼuel mut», miʼ tejchel tiʼ yojlil acʼʌlel cʼʌlʌl ti las tres cheʼ bʌ icʼto pañimil. Tajol jin ti ili ora cheʼ tsiʼ chaʼle cʼay jiñi xtat mut cheʼ bʌ tsiʼ chucuyob Jesús (Mr. 14:72). I jiñi i chʌmpʼejlel jiñʌch cheʼ ti «sʌcʼajel», miʼ tejchel ti las tres cheʼ bʌ icʼto cʼʌlʌl cheʼ miʼ pasel jiñi qʼuin.

Cheʼ bajcheʼ mi laj qʼuel, anquese wajali maxto añic reloj tac bajcheʼ ili ora, añʌch yambʌ bajcheʼ miʼ ñaʼtañob ora jiñi quixtañujob.